E-passports: പ്രവാസികൾ അറിയാൻ പറയുന്നു, ഇ-പാസ്പോർട്ടിലേക്ക് മാറണം… ഗുണങ്ങൾ ഏറെയുണ്ട്, അപേക്ഷിക്കേണ്ട വിധം
E-passports, benefits and how to apply: ചിപ്പിലെ വിവരങ്ങൾ എൻക്രിപ്റ്റ് ചെയ്തിരിക്കുന്നതിനാൽ പാസ്പോർട്ട് വ്യാജമായി നിർമ്മിക്കാനോ വിവരങ്ങൾ ചോർത്താനോ സാധിക്കില്ല.
ദുബായ്: യുഎഇയിലെ ഇന്ത്യൻ പ്രവാസികൾക്ക് വിദേശയാത്രകൾ കൂടുതൽ എളുപ്പമാക്കാൻ ലക്ഷ്യമിട്ടുകൊണ്ട് അത്യാധുനിക ചിപ്പ് ഘടിപ്പിച്ച ഇ-പാസ്പോർട്ടുകൾ വിതരണം ആരംഭിച്ചു. പഴയകാല പാസ്പോർട്ടുകളിൽ നിന്ന് വ്യത്യസ്തമായി, ഡിജിറ്റൽ സുരക്ഷാ സംവിധാനങ്ങൾ ഉൾക്കൊള്ളിച്ച ഈ യാത്രാരേഖകൾ പ്രവാസികളുടെ അന്താരാഷ്ട്ര യാത്രകളിൽ വലിയ മാറ്റങ്ങൾ കൊണ്ടുവരും.
അബുദാബിയിലെ ഇന്ത്യൻ എംബസിയും ദുബായിലെ കോൺസുലേറ്റും വഴി ഒക്ടോബർ 2025 മുതൽ ഈ സേവനം ലഭ്യമാണ്. വിമാനത്താവളങ്ങളിലെ ഇമിഗ്രേഷൻ നടപടികൾ മിനിറ്റുകൾക്കുള്ളിൽ പൂർത്തിയാക്കാൻ സഹായിക്കുന്ന ഈ സംവിധാനം ഡിജിറ്റൽ ഇന്ത്യ പദ്ധതിയുടെ ഭാഗമായുള്ള ഒരു പ്രധാന ചുവടുവെപ്പാണ്.
എന്തുകൊണ്ട് ഇ-പാസ്പോർട്ടിലേക്ക് മാറണം?
സ്മാർട്ട് ഗേറ്റുകളും ഓട്ടോമേറ്റഡ് ഇ-ഗേറ്റുകളും ഉപയോഗിക്കാൻ സാധിക്കുന്നതിനാൽ വിമാനത്താവളങ്ങളിലെ കാത്തിരിപ്പ് സമയം 25 മിനിറ്റിൽ നിന്നും 5 മിനിറ്റിൽ താഴെയായി കുറയും. യുഎഇ, സിംഗപ്പൂർ, ഓസ്ട്രേലിയ തുടങ്ങിയ രാജ്യങ്ങളിലെ വിമാനത്താവളങ്ങളിൽ ഈ സൗകര്യം ലഭ്യമാണ്.
ചിപ്പിലെ വിവരങ്ങൾ എൻക്രിപ്റ്റ് ചെയ്തിരിക്കുന്നതിനാൽ പാസ്പോർട്ട് വ്യാജമായി നിർമ്മിക്കാനോ വിവരങ്ങൾ ചോർത്താനോ സാധിക്കില്ല. അന്താരാഷ്ട്ര സിവിൽ ഏവിയേഷൻ ഓർഗനൈസേഷൻ മാനദണ്ഡങ്ങൾ പാലിക്കുന്നതിനാൽ ലോകമെമ്പാടുമുള്ള ഓട്ടോമേറ്റഡ് ബോർഡർ കൺട്രോൾ സിസ്റ്റങ്ങളിൽ ഇത് സ്വീകാര്യമാണ്.
അപേക്ഷിക്കേണ്ട വിധം
- 2025 ഒക്ടോബർ 28 മുതൽ സമർപ്പിക്കുന്ന എല്ലാ അപേക്ഷകളും ഇ-പാസ്പോർട്ടുകളായാണ് പരിഗണിക്കുന്നത്. ഗ്ലോബൽ പാസ്പോർട്ട് സേവാ പോർട്ടൽ 2.0 വഴിയാണ് അപേക്ഷിക്കേണ്ടത്.
- mportal.passportindia.gov.in എന്ന പോർട്ടലിൽ രജിസ്റ്റർ ചെയ്യുക.
- ലോഗിൻ ചെയ്ത ശേഷം ‘Fresh’ അല്ലെങ്കിൽ ‘Re-issue’ വിഭാഗം തിരഞ്ഞെടുക്കുക.
- ഫോട്ടോയും മറ്റ് രേഖകളും അപ്ലോഡ് ചെയ്യുക.
- അബുദാബിയിലെയോ ദുബായിലെയോ BLS ഇന്റർനാഷണൽ സെന്ററുകളിൽ അപ്പോയിന്റ്മെന്റ് എടുത്ത് അപേക്ഷ സമർപ്പിക്കുക.
നിലവിലുള്ള പാസ്പോർട്ടുകൾ അവയുടെ കാലാവധി തീരുന്നത് വരെ സാധുവായിരിക്കും. ഉടനടി മാറ്റേണ്ടത് നിർബന്ധമല്ല, എന്നാൽ ഇടയ്ക്കിടെ യാത്ര ചെയ്യുന്നവർക്ക് ഇ-പാസ്പോർട്ട് ഗുണകരമാണ്. സാധാരണ പാസ്പോർട്ട് പുതുക്കുന്ന അതേ നിരക്ക് തന്നെയാണ് ഇ-പാസ്പോർട്ടിനും. അധിക ചിലവുകളില്ല. പാസ്പോർട്ടിന്റെ മുൻകവറിൽ താഴെയായി സ്വർണ്ണ നിറത്തിലുള്ള ഒരു ചിപ്പ് ചിഹ്നം (Symbol) ഉണ്ടായിരിക്കും.
