UAE Minibus Safety: യുഎഇയിൽ മിനിബസുകളുടെ സുരക്ഷയെക്കുറിച്ച് ചർച്ചകൾ സജീവമാകുന്നു, കർശന നടപടിക്ക് ശുപാർശ
UAE Minibus Safety Under Scrutiny: സാധാരണ വലിയ ബസുകളെ അപേക്ഷിച്ച് മിനിബസുകൾക്ക് അപകടങ്ങളെ ചെറുക്കാനുള്ള ശേഷി കുറവാണ്. വലിയൊരു ആഘാതം താങ്ങാൻ ഇവയുടെ ബോഡിക്ക് കഴിയില്ല. മുൻകാലങ്ങളിൽ 14 മുതൽ 17 യാത്രക്കാരെ വരെ കുത്തിനിറച്ച് കൊണ്ടുപോകാൻ മടക്കാവുന്ന സീറ്റുകൾ ഉപയോഗിച്ചിരുന്നു. വാഹനം മറിയുകയോ ഇടിക്കുകയോ ചെയ്യുമ്പോൾ യാത്രക്കാർ പരസ്പരം ഇടിച്ചും മാരകമായി പരിക്കേൽക്കാൻ ഇത് കാരണമാകുന്നു.
Minibus Accident Uae
ദുബായ്: എമിറേറ്റ്സ് റോഡിലുണ്ടായ മിനിബസ് അപകടത്തിൽ ഏഴ് പേർ മരിക്കുകയും ഒമ്പത് പേർക്ക് ഗുരുതരമായി പരിക്കേൽക്കുകയും ചെയ്ത ദാരുണ സംഭവത്തിന് പിന്നാലെ, യുഎഇയിലെ റോഡുകളിൽ അതീവ സുരക്ഷാ നിർദ്ദേശങ്ങൾ ഏർപ്പെടുത്തി. ഇതോടൊപ്പം സാധാരണക്കാരായ പ്രവാസികളും നിർമ്മാണ തൊഴിലാളികളും ദിവസേന യാത്രാ ആവശ്യങ്ങൾക്കായി ആശ്രയിക്കുന്ന മിനിബസുകളുടെ (ചെറിയ വാനുകൾ) സുരക്ഷയെക്കുറിച്ചുള്ള ചർച്ചകളും രാജ്യത്ത് വീണ്ടും സജീവമായിരിക്കുകയാണ്.
യുഎഇയിലെ ഗതാഗത അപകടങ്ങളെക്കുറിച്ച് നടത്തിയ പഠനങ്ങളിൽ, മിനിബസുകൾ റോഡുകളിൽ വലിയൊരു സുരക്ഷാ ഭീഷണി ഉയർത്തുന്നതായാണ് വ്യക്തമാകുന്നത്. രാജ്യത്തുണ്ടാകുന്ന വലിയ റോഡപകടങ്ങളിൽ 15 ശതമാനവും ഇത്തരം മിനിബസുകൾ മൂലമാണ് സംഭവിക്കുന്നത്.
അപകടസാധ്യത കൂട്ടുന്ന ഘടകങ്ങൾ
സാധാരണ വലിയ ബസുകളെ അപേക്ഷിച്ച് മിനിബസുകൾക്ക് അപകടങ്ങളെ ചെറുക്കാനുള്ള ശേഷി കുറവാണ്. വലിയൊരു ആഘാതം താങ്ങാൻ ഇവയുടെ ബോഡിക്ക് കഴിയില്ല. മുൻകാലങ്ങളിൽ 14 മുതൽ 17 യാത്രക്കാരെ വരെ കുത്തിനിറച്ച് കൊണ്ടുപോകാൻ മടക്കാവുന്ന സീറ്റുകൾ ഉപയോഗിച്ചിരുന്നു. വാഹനം മറിയുകയോ ഇടിക്കുകയോ ചെയ്യുമ്പോൾ യാത്രക്കാർ പരസ്പരം ഇടിച്ചും മാരകമായി പരിക്കേൽക്കാൻ ഇത് കാരണമാകുന്നു. ഇത്തരം സീറ്റുകൾ നിരോധിക്കണമെന്ന ആവശ്യം ശക്തമാണ്.
അമിതവേഗതയിൽ പോകുമ്പോൾ പെട്ടെന്ന് ബ്രേക്ക് ഇട്ടാലോ ലൈൻ മാറിയാലോ ഇവയുടെ നിയന്ത്രണം നഷ്ടപ്പെടാൻ സാധ്യത കൂടുതലാണ്. കൂട്ടിയിടി മുന്നറിയിപ്പ് നൽകുന്ന ആധുനിക സാങ്കേതികവിദ്യകൾ ഭൂരിഭാഗം മിനിബസുകളിലും ഉണ്ടാകാറില്ല.
നിരോധനത്തിനുള്ള മുൻകാല ശുപാർശകൾ
ഈ അപകട ഭീഷണി മുൻനിർത്തി, 2019-ൽ യുഎഇ റോഡുകളിൽ നിന്ന് പാസഞ്ചർ മിനിബസുകൾ പൂർണ്ണമായി നിരോധിക്കണമെന്ന് ഫെഡറൽ ട്രാഫിക് കൗൺസിൽ ആഭ്യന്തര മന്ത്രാലയത്തോട് ആവശ്യപ്പെട്ടിരുന്നു. കുട്ടികളുടെ സുരക്ഷ മുൻനിർത്തി ദുബായ് 2016-ൽ തന്നെ സ്കൂൾ ബസുകളായി മിനിബസുകൾ ഉപയോഗിക്കുന്നത് പൂർണ്ണമായി നിരോധിച്ചിരുന്നു.
വാഹനത്തിന്റെ സാങ്കേതിക പ്രശ്നങ്ങൾക്ക് പുറമെ ഡ്രൈവർമാരുടെ അശ്രദ്ധയും ഇത്തരം അപകടങ്ങൾക്ക് കാരണമാകുന്നുണ്ടെന്ന് റോഡ് സുരക്ഷാ വിദഗ്ദ്ധർ ചൂണ്ടിക്കാണിക്കുന്നു. അപകടങ്ങളിൽ ഇരയാകുന്നത് ഭൂരിഭാഗവും പാവപ്പെട്ട തൊഴിലാളികളായതിനാൽ, ഒരു വലിയ ദുരന്തം നടക്കുന്നത് വരെ സുരക്ഷയെ നിസ്സാരമായി കാണരുതെന്നും, തൊഴിലാളികൾക്ക് സുരക്ഷിതമായ യാത്ര ഉറപ്പാക്കാൻ എല്ലാ കമ്പനികളും തയ്യാറാകണമെന്നും വിദഗ്ദ്ധർ ആവശ്യപ്പെടുന്നു.
English Summary
A tragic minibus crash on the Emirates Road that left seven dead and nine injured has reignited crucial safety debates in the UAE regarding the structural vulnerabilities of these smaller transport vans. Highlighting that minibuses are responsible for 15% of major road accidents due to their lack of collision warning technology and weak impact resistance, safety experts are urging companies to prioritize secure transit for expat workers.
