Nitai Roy Chowdhury: ബിഎന്പിയുടെ ‘ന്യൂനപക്ഷ മുഖം’; ബംഗ്ലാദേശ് മന്ത്രിസഭയിലെ ഏക ഹിന്ദു; ആരാണ് നിതായ് റോയ് ചൗധരി?
Meet Nitai Roy Chowdhury: ബിഎൻപി നേതാവും ബംഗ്ലാദേശിലെ ന്യൂനപക്ഷ മുഖവുമായ നിതായ് റോയ് ചൗധരി താരിഖ് റഹ്മാൻ നയിക്കുന്ന സര്ക്കാരില് അംഗമായി. മന്ത്രിസഭയിലെ ഏക ഹിന്ദുവാണ് നിതായ് റോയ് ചൗധരി.
നിതായ് റോയ് ചൗധരി
ധാക്ക: ബംഗ്ലാദേശ് നാഷണലിസ്റ്റ് പാർട്ടിയുടെ (ബിഎൻപി) മുതിർന്ന നേതാവും പ്രമുഖ ന്യൂനപക്ഷ മുഖവുമായ നിതായ് റോയ് ചൗധരി താരിഖ് റഹ്മാൻ നയിക്കുന്ന സര്ക്കാരില് അംഗമായി. ബംഗ്ലാദേശിലെ 50 അംഗ മന്ത്രിസഭയിലെ ഏക ഹിന്ദുവാണ് നിതായ് റോയ് ചൗധരി. ബിഎന്പിയുടെ മുതിര്ന്ന നേതാവായ ഇദ്ദേഹം രാജ്യത്തെ പ്രമുഖ അഭിഭാഷകന് കൂടിയാണ്. ദേശീയ രാഷ്ട്രീയത്തിൽ പതിറ്റാണ്ടുകളായി സജീവമാണ്.
1949 ജനുവരി 7 ന് മഗുര ജില്ലയിലെ മുഹമ്മദ്പൂരിലെ ഹത്ബാരിയ ഗ്രാമത്തിലാണ് ഇദ്ദേഹം ജനിച്ചത്. അലോക്ഡിയ പുഖുരിയ ഹൈസ്കൂളിലും മഗുര ഗവൺമെന്റ് കോളേജിലും സ്കൂൾ വിദ്യാഭ്യാസം പൂർത്തിയാക്കി. ധാക്ക സർവകലാശാലയിൽ നിന്ന് ബിരുദ പഠനം പൂര്ത്തിയാക്കിയ ശേഷം നിയമരംഗത്തേക്ക് പ്രവേശിച്ചു.
‘ഛാത്ര യൂണിയന്’ എന്ന വിദ്യാര്ത്ഥി സംഘടനയിലൂടെയാണ് ചൗധരി തന്റെ രാഷ്ട്രീയ ജീവിതം ആരംഭിച്ചത്. 1988-ൽ നടന്ന പാർലമെന്റ് തിരഞ്ഞെടുപ്പിൽ ജാതീയ പാർട്ടി ടിക്കറ്റിൽ മഗുര-2 മണ്ഡലത്തിൽ നിന്ന് എംപിയായി തിരഞ്ഞെടുക്കപ്പെട്ടു. ആ കാലയളവിൽ, അദ്ദേഹം മന്ത്രി പദവിയോടെ മഗുര ജില്ലാ കൗൺസിലിന്റെ ചെയർമാനായി പ്രവര്ത്തിച്ചു.
പിന്നീട് അദ്ദേഹം വിദ്യാഭ്യാസം, യുവജന-കായിക, നിയമം, നീതി, പാർലമെന്ററി കാര്യ മന്ത്രാലയങ്ങളിൽ സഹമന്ത്രിയായി സേവനമനുഷ്ഠിച്ചു. 1990 സെപ്റ്റംബർ 9 മുതൽ 1990 ഡിസംബർ 6 വരെ യുവജന-കായിക മന്ത്രിയായും നിതായ് റോയ് ചൗധരി പ്രവര്ത്തിച്ചു. എച്ച്.എം. ഇർഷാദ് സർക്കാരിന്റെ പതനത്തിനുശേഷമാണ് ഇദ്ദേഹം ബിഎന്പിയില് ചേര്ന്നത്. ക്രമേണ ബിഎന്പിയുടെ നേതാവായി. ബിഎൻപി വൈസ് പ്രസിഡന്റായും പാർട്ടി നേതൃത്വത്തിന്റെ മുതിർന്ന ഉപദേശകനായും നിതായ് റോയ് ചൗധരി പ്രവര്ത്തിച്ചു. ബിഎന്പിയുടെ തന്ത്രജ്ഞനും, പാര്ട്ടിയുടെ നയരൂപീകരണ സ്റ്റാന്ഡിങ് കമ്മിറ്റിയംഗവുമാണ്.
പാർലമെന്റ് തിരഞ്ഞെടുപ്പിൽ, ചൗധരി മഗുര-2 മണ്ഡലത്തിൽ നിന്നാണ് അദ്ദേഹം വിജയിച്ചത്. 1,47,896 വോട്ടുകൾ നേടി. എതിര് സ്ഥാനാര്ത്ഥിയായ ബംഗ്ലാദേശ് ജമാഅത്തെ ഇസ്ലാമിയുടെ മുസ്തർഷിദ് ബില്ലയ്ക്ക് 1,17,018 വോട്ടുകള് ലഭിച്ചു. തിരഞ്ഞെടുപ്പിൽ വിജയിച്ച നാല് ന്യൂനപക്ഷ സ്ഥാനാർത്ഥികളിൽ ഒരാളാണ് നിതായ് റോയ് ചൗധരി. ബിഎന്പിയുടെ മറ്റൊരു ന്യൂനപക്ഷ നേതാവായ ഗോയേശ്വര് ചന്ദ്ര റോയ് ധാക്കയില് നിന്ന് വിജയിച്ചിരുന്നു.
ബംഗ്ലാദേശിലെ ഏകദേശം 17 കോടി ജനസംഖ്യയുടെ എട്ട് ശതമാനത്തോളം ഹിന്ദുക്കളാണ്. നിതായ് റോയ് ചൗധരിയെ മന്ത്രിസഭയില് ഉള്പ്പെടുത്തിയത് ന്യൂനപക്ഷ സമുദായങ്ങളിലേക്ക് അടുക്കുന്നതിനുള്ള ബിഎൻപി സർക്കാരിന്റെ നീക്കത്തിന്റെ ഭാഗമായാണ് വിലയിരുത്തുന്നത്.
