SIP: മാസം 2,000 രൂപ എസ്‌ഐപി നിക്ഷേപിക്കാം; 10 ലക്ഷം രൂപ സമ്പാദിക്കാൻ എത്ര വർഷം വേണം?

വലിയ ശമ്പളം ലഭിച്ചുതുടങ്ങിയ ശേഷം നിക്ഷേപം ആരംഭിക്കാമെന്ന് കരുതുന്നവരാണ് പലരും. എന്നാല്‍ ശമ്പളം വര്‍ധിക്കുന്നതിനൊപ്പം ജീവിതച്ചെലവുകളും കൂടുന്നതോടെ നിക്ഷേപം വീണ്ടും നീണ്ടുപോകാം. വലിയൊരു തുക കൈയിലുണ്ടെങ്കിലേ സമ്പാദ്യം കെട്ടിപ്പടുക്കാന്‍ കഴിയൂ എന്ന ധാരണയും പലരെയും പിന്നോട്ടുവലിക്കുന്നു. എന്നാല്‍ ചെറിയ തുകയില്‍നിന്ന് തന്നെ നിക്ഷേപം ആരംഭിച്ച് ദീര്‍ഘകാലത്തേക്ക് തുടരുന്നതിലൂടെ മികച്ചൊരു സമ്പാദ്യം രൂപപ്പെടുത്താന്‍ കഴിയും. ഇതിനായി പരിഗണിക്കാവുന്ന മാര്‍ഗങ്ങളിലൊന്നാണ് മ്യൂച്വല്‍ ഫണ്ടുകളിലെ സിസ്റ്റമാറ്റിക് ഇന്‍വെസ്റ്റ്മെന്റ് പ്ലാന്‍ അഥവാ എസ്ഐപി.

പ്രതിമാസം 2,000 രൂപ മാറ്റിവെച്ച് നിക്ഷേപം ആരംഭിച്ചാല്‍ പോലും ദീര്‍ഘകാലാടിസ്ഥാനത്തില്‍ 10 ലക്ഷം രൂപയുടെ സമ്പാദ്യം ലക്ഷ്യമിടാം. നിക്ഷേപിക്കുന്ന തുകയ്‌ക്കൊപ്പം ലഭിക്കുന്ന വരുമാനവും വീണ്ടും നിക്ഷേപത്തിലൂടെ വളരുന്നതാണ് കോമ്പൗണ്ടിങ്ങിന്റെ പ്രത്യേകത. കാലാവധി കൂടുന്തോറും ഈ വളര്‍ച്ച നിക്ഷേപത്തിന്റെ ആകെ മൂല്യത്തെ സ്വാധീനിക്കും.

2,000 രൂപയുടെ എസ്ഐപി 10 ലക്ഷമാകാന്‍

പ്രതിമാസം 2,000 രൂപ വീതം മ്യൂച്വല്‍ ഫണ്ടില്‍ നിക്ഷേപിക്കുന്ന ഒരാള്‍ക്ക് ലഭിക്കുന്ന അന്തിമ തുക പ്രതീക്ഷിക്കുന്ന വാര്‍ഷിക വരുമാനത്തെ ആശ്രയിച്ചിരിക്കും. 12 ശതമാനം വാര്‍ഷിക വരുമാനം ലഭിക്കുന്ന സാഹചര്യമാണെങ്കില്‍ 10 ലക്ഷം രൂപയിലെത്താന്‍ ഏകദേശം 15 വര്‍ഷത്തിലധികം വേണ്ടിവരും. 14 ശതമാനം വരുമാനമാണെങ്കില്‍ ഏകദേശം 14 വര്‍ഷവും 16 ശതമാനം വരുമാനമാണെങ്കില്‍ ഏകദേശം 13 വര്‍ഷവും വേണ്ടിവരാം.

എസ്ഐപി തുക ഓരോ വര്‍ഷവും കൂട്ടിയാല്‍ നേട്ടം

സമ്പാദ്യം വേഗത്തില്‍ വളര്‍ത്താന്‍ സഹായിക്കുന്ന മറ്റൊരു മാര്‍ഗമാണ് സ്റ്റെപ്പ്-അപ്പ് എസ്ഐപി. ഇതിലൂടെ ഓരോ വര്‍ഷവും പ്രതിമാസ നിക്ഷേപത്തുക നിശ്ചിത ശതമാനം വര്‍ധിപ്പിക്കാം. ഉദാഹരണത്തിന്, തുടക്കത്തില്‍ 2,000 രൂപ നിക്ഷേപിക്കുന്ന ഒരാള്‍ ഓരോ വര്‍ഷവും എസ്ഐപി തുക 10 ശതമാനം വീതം വര്‍ധിപ്പിച്ചാല്‍ കാലക്രമേണ നിക്ഷേപിക്കുന്ന ആകെ തുകയും വളരും.

Also Read: Stock Market: ഓഹരി വിപണിയിൽ മുന്നേറ്റമോ തളർച്ചയോ?; തിങ്കളാഴ്ചത്തെ ട്രെൻഡ് നിർണയിക്കുന്ന ഘടകങ്ങൾ

കോമ്പൗണ്ടിങ് എങ്ങനെ സഹായിക്കും?

നിക്ഷേപത്തില്‍നിന്ന് ലഭിക്കുന്ന വരുമാനം വീണ്ടും നിക്ഷേപത്തിന്റെ ഭാഗമായി വളരുന്നതിനെയാണ് കോമ്പൗണ്ടിങ് എന്ന് പറയുന്നത്. ദീര്‍ഘകാല നിക്ഷേപത്തില്‍ ഈ പ്രക്രിയയ്ക്ക് വലിയ പ്രാധാന്യമുണ്ട്. തുടക്കത്തില്‍ ചെറിയതായി തോന്നുന്ന തുക പോലും സ്ഥിരമായി നിക്ഷേപിക്കുകയും വരുമാനം വീണ്ടും വളരാന്‍ സമയം നല്‍കുകയും ചെയ്താല്‍ കാലക്രമേണ വലിയൊരു സമ്പാദ്യമായി മാറാം.

എന്നാല്‍ ഓഹരി അധിഷ്ഠിത മ്യൂച്വല്‍ ഫണ്ടുകളില്‍ വിപണിയിലെ ചാഞ്ചാട്ടം മൂലം നഷ്ടസാധ്യതയുണ്ട്. കഴിഞ്ഞകാല വരുമാനം ഭാവിയിലും അതേപോലെ ലഭിക്കുമെന്ന് ഉറപ്പില്ല. അതിനാല്‍ നിക്ഷേപം തുടങ്ങുന്നതിന് മുമ്പ് അടിയന്തര ആവശ്യങ്ങള്‍ക്കുള്ള പണം മാറ്റിവെക്കുകയും സാമ്പത്തിക ലക്ഷ്യത്തിനും റിസ്‌ക് എടുക്കാനുള്ള ശേഷിക്കും അനുയോജ്യമായ പദ്ധതി തിരഞ്ഞെടുക്കുകയും വേണം.

English Summary

A monthly SIP of 2,000 can help investors target a ₹10 lakh corpus over the long term. Learn how expected returns, compounding and a 10% annual SIP increase can influence investment growth and the time required to reach this financial goal.