DA Hike 2026: കേന്ദ്ര ജീവനക്കാർക്ക് ഡിഎ വർധന ഉടൻ; ബോണസ് 20,724 രൂപയായി ഉയരും?
Central Government Employees Bonus May Rise to Rs 20,724 Under New Proposal: ഒക്ടോബര്‍ 10ന് അയച്ച കത്തില്‍ കേന്ദ്ര കാബിനറ്റ് സെക്രട്ടറിക്കും ബന്ധപ്പെട്ട മന്ത്രാലയങ്ങള്‍ക്കും മുന്നിലാണ് സംഘടന ആവശ്യങ്ങള്‍ ഉന്നയിച്ചത്. ജൂലൈ ഒന്നുമുതല്‍ പ്രാബല്യത്തില്‍ വരേണ്ട ഡിഎ, ഡിആര്‍ വര്‍ധന പ്രഖ്യാപനം ഉടന്‍ നടത്തണമെന്നാണ് പ്രധാന ആവശ്യം.
കേന്ദ്ര സര്‍ക്കാര്‍ ജീവനക്കാരും പെന്‍ഷന്‍കാരും ക്ഷാമബത്ത (ഡിഎ), ക്ഷാമാശ്വാസം (ഡിആര്‍) വര്‍ധനയുടെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ്. ഇതിനിടെ, ഡിഎ വര്‍ധന വൈകാതെ പ്രഖ്യാപിക്കണമെന്നും ജീവനക്കാരുടെ ബോണസ് കണക്കാക്കുന്നതിനുള്ള വേതനപരിധി ഉയര്‍ത്തണമെന്നും ആവശ്യപ്പെട്ട് ഓള്‍ ഇന്ത്യ ഡിഫന്‍സ് എംപ്ലോയീസ് ഫെഡറേഷന്‍ (എഐഡിഇഎഫ്) കേന്ദ്ര സര്‍ക്കാരിന് കത്തയച്ചു. വര്‍ധിച്ചുവരുന്ന ജീവിതച്ചെലവ് ജീവനക്കാരെയും പെന്‍ഷന്‍കാരെയും സാമ്പത്തികമായി ബാധിക്കുന്ന സാഹചര്യത്തിലാണ് സംഘടനയുടെ ഇടപെടല്‍.
ഒക്ടോബര്‍ 10ന് അയച്ച കത്തില്‍ കേന്ദ്ര കാബിനറ്റ് സെക്രട്ടറിക്കും ബന്ധപ്പെട്ട മന്ത്രാലയങ്ങള്‍ക്കും മുന്നിലാണ് സംഘടന ആവശ്യങ്ങള്‍ ഉന്നയിച്ചത്. ജൂലൈ ഒന്നുമുതല്‍ പ്രാബല്യത്തില്‍ വരേണ്ട ഡിഎ, ഡിആര്‍ വര്‍ധന പ്രഖ്യാപനം ഉടന്‍ നടത്തണമെന്നാണ് പ്രധാന ആവശ്യം. ജീവനക്കാരുടെ ആശങ്കകള്‍ പരിഹരിക്കാന്‍ സര്‍ക്കാര്‍ അടിയന്തര നടപടി സ്വീകരിക്കണമെന്നും കത്തില്‍ ആവശ്യപ്പെട്ടിട്ടുണ്ട്.
ഡിഎ 63 ശതമാനമാകുമോ?
കേന്ദ്ര സര്‍ക്കാര്‍ ജീവനക്കാര്‍ക്ക് നിലവില്‍ അടിസ്ഥാന ശമ്പളത്തിന്റെ 60 ശതമാനമാണ് ക്ഷാമബത്ത ലഭിക്കുന്നത്. പെന്‍ഷന്‍കാര്‍ക്ക് ഇതേ നിരക്കില്‍ ക്ഷാമാശ്വാസവും ലഭിക്കുന്നു. 2026 ജൂണിലെ അഖിലേന്ത്യാ ഉപഭോക്തൃ വിലസൂചിക അടിസ്ഥാനമാക്കിയുള്ള കണക്കുകള്‍ പ്രകാരം ഡിഎ ഏകദേശം 63 ശതമാനമായി ഉയര്‍ന്നേക്കാമെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. വിലക്കയറ്റം മൂലം അവശ്യസാധനങ്ങള്‍ വാങ്ങുന്നതിനുള്ള ചെലവ് ഉയരുകയാണെന്നും ഇത് ജീവനക്കാരുടെയും പെന്‍ഷന്‍കാരുടെയും കുടുംബബജറ്റിനെ ബാധിക്കുന്നുണ്ടെന്നും സംഘടന ചൂണ്ടിക്കാട്ടുന്നു. ഡിഎ, ഡിആര്‍ പ്രഖ്യാപനം വൈകുന്നത് ആശങ്ക വര്‍ധിപ്പിക്കുന്നതായും കത്തില്‍ പറയുന്നു.
Also Read: DA Hike 2026: സർക്കാർ ജീവനക്കാർക്ക് ഡിഎ വർധന; 3.64%, 2.73% വീതം വർധിപ്പിച്ചു, കുടിശ്ശിക 33 തവണകളായി
ബോണസ് പരിധി 7,000 രൂപയില്‍നിന്ന് 21,000 രൂപയാക്കണം
കേന്ദ്ര സര്‍ക്കാര്‍ ജീവനക്കാര്‍ക്ക് ലഭിക്കുന്ന വാര്‍ഷിക ബോണസ് കണക്കാക്കുന്നതിനുള്ള വേതനപരിധി ഉയര്‍ത്തണമെന്നതാണ് മറ്റൊരു പ്രധാന ആവശ്യം. നിലവിലുള്ള 7,000 രൂപയുടെ പരിധി 21,000 രൂപയായി വര്‍ധിപ്പിക്കണമെന്നാണ് എഐഡിഇഎഫിന്റെ ആവശ്യം. കേന്ദ്ര സര്‍ക്കാര്‍ നിശ്ചയിച്ച കുറഞ്ഞ വേതനം വര്‍ധിച്ച സാഹചര്യത്തില്‍ ബോണസ് കണക്കാക്കാനുള്ള പരിധിയും അതിനനുസരിച്ച് പുതുക്കണമെന്നാണ് സംഘടനയുടെ നിലപാട്. നിലവിലുള്ള പരിധി ജീവനക്കാര്‍ക്ക് ലഭിക്കുന്ന ബോണസ് തുക കുറയ്ക്കുന്നുവെന്നും സംഘടന ചൂണ്ടിക്കാട്ടുന്നു.
ബോണസ് തുക മൂന്നിരട്ടിയാകുമോ?
നിലവിലുള്ള 7,000 രൂപയുടെ വേതനപരിധി അടിസ്ഥാനമാക്കി കണക്കാക്കുമ്പോള്‍ ജീവനക്കാര്‍ക്ക് ലഭിക്കുന്ന വാര്‍ഷിക ബോണസ് ഏകദേശം 6,908 രൂപയാണ്. പരിധി 21,000 രൂപയായി ഉയര്‍ത്തിയാല്‍ ഈ തുക ഏകദേശം 20,724 രൂപയായി വര്‍ധിക്കുമെന്നാണ് കണക്ക്. അതായത്, നിര്‍ദേശിച്ച വര്‍ധന അംഗീകരിക്കപ്പെട്ടാല്‍ ബോണസ് തുക നിലവിലുള്ളതിന്റെ ഏകദേശം മൂന്നിരട്ടിയാകും. എന്നാല്‍ ഇത് നിലവില്‍ ഒരു ആവശ്യവും കണക്കുകൂട്ടലും മാത്രമാണ്.
English Summary
Central government employees are awaiting the announcement of a possible 3% Dearness Allowance (DA) hike for 2026. The All India Defence Employees Federation has also urged the government to increase the bonus calculation limit from Rs 7,000 to Rs 21,000. If approved, the proposed revision could significantly increase the annual bonus amount. Both changes are yet to receive official confirmation.
