NEET UG Re-Exam 2026: നീറ്റ് പരീക്ഷയ്ക്ക് പോകുമ്പോൾ എന്തൊക്കെ ധരിക്കാം? അനുവദനീയമായ സാധനങ്ങൾ ഇവ, ഇതറിയാതെ പോകരുത്

നാളെ (ജൂൺ 21-ഞായർ) നടക്കുന്ന നീറ്റ് (NEET UG retest 2026) പുനഃപരീക്ഷ തികച്ചും സുതാര്യവും കുറ്റമറ്റതുമായി നടത്താൻ നാഷണൽ ടെസ്റ്റിങ് ഏജൻസി (NTA) കർശനമായ സുരക്ഷാ പ്രോട്ടോക്കോളുകളാണ് രാജ്യവ്യാപകമായി ഏർപ്പെടുത്തിയിരിക്കുന്നത്. അവസാന നിമിഷം പരീക്ഷാ കേന്ദ്രങ്ങളിൽ വെച്ച് ഉണ്ടാകാൻ ഇടയുള്ള അനാവശ്യ ബുദ്ധിമുട്ടുകളും മറ്റും ഒഴിവാക്കാൻ വിദ്യാർത്ഥികൾ നിർബന്ധമായും പാലിക്കേണ്ട ഡ്രസ് കോഡും (NEET UG Exam Dress Code), പരീക്ഷാ ഹാളിൽ അനുവദനീയമായ സാധനങ്ങളുടെ പട്ടിക എൻടിഎ പുറത്തിറക്കിയിരുന്നു. വസ്ത്രധാരണത്തിൽ വരുത്തുന്ന ചെറിയ പിഴവുകൾ പോലും പരീക്ഷാ ഹാളിലേക്കുള്ള പ്രവേശനം തടയാൻ കാരണമായേക്കാം. അതിനാൽ താഴെ പറയുന്ന കാര്യങ്ങൾ കൃത്യമായി ശ്രദ്ധിക്കുക.

ALSO READ: നീറ്റ് പുനഃപരീക്ഷ നാളെ: സുരക്ഷ ഉറപ്പാക്കാൻ ഇന്ന് രാജ്യവ്യാപക മോക് ഡ്രിൽ, പരീക്ഷാ കേന്ദ്രങ്ങളിൽ ‌സുരക്ഷാ കവചം

നീറ്റ് പരീക്ഷാ ഡ്രസ് കോഡ്, അനുവദനീയമായ സാധനങ്ങൾ

• പരീക്ഷാ ഹാളിനുള്ളിൽ ട്രാൻസ്പെരൻ്റായിട്ടുള്ള വെള്ളക്കുപ്പികൾ മാത്രമെ അനുവദിക്കൂ.
• മഴ നനയാതിരിക്കാൻ ഉദ്യോഗാർത്ഥികൾക്ക് അഡ്മിറ്റ് കാർഡ് ട്രാൻസ്പെരൻ്റായിട്ടുള്ള പ്ലാസ്റ്റിക് പൗച്ചിൽ കൊണ്ടുപോകാം.
• മതചിഹ്നങ്ങൾ, തലപ്പാവ്, ഹിജാബ്, സമാനമായ വസ്തുക്കൾ എന്നിവയുൾപ്പെടെയുള്ള വിശ്വാസപരമായ വസ്തുക്കൾ ഉദ്യോഗാർത്ഥികൾക്ക് ധരിക്കാം.
• എന്നാൽ ഇത്തരം വസ്ത്രങ്ങൾ ധരിക്കുന്നവർ സമഗ്രമായ പരിശോധനയ്ക്ക് സൗകര്യമൊരുക്കുന്നതിനായി പരീക്ഷാ കേന്ദ്രത്തിൽ മുൻകൂട്ടി റിപ്പോർട്ട് ചെയ്യണം.
• പകുതി കൈകളുള്ള ടി-ഷർട്ടുകളോ ഷർട്ടുകളോ മാത്രമേ ധരിക്കാൻ പാടുള്ളൂ. വലിയ ബട്ടണുകളോ, വലിയ ഡിസൈനുകളോ, പോക്കറ്റുകളോ വസ്ത്രങ്ങളിൽ ഉണ്ടാകരുത്.
• അമിതമായി പോക്കറ്റുകളുള്ള കാർഗോ പാൻ്റുകളോ സിപ്പുകളുള്ള വസ്ത്രങ്ങളോ ഒഴിവാക്കണം.
• കുറഞ്ഞ ഹീലുള്ള ചെരുപ്പുകളോ ഓപ്പണായിട്ടുള്ള ചെരുപ്പുകളോ ധരിക്കാം. കാൽവിരലുകൾ പൂർണ്ണമായി മൂടുന്ന തരത്തിലുള്ള ഷൂസുകൾ ധരിച്ച് വരുന്നത് കർശനമായി നിരോധിച്ചിരിക്കുന്നു.

അനുവദനീയമല്ലാത്ത വസ്തുക്കൾ

1. മൊബൈൽ ഫോണുകൾ
2. സ്മാർട്ട് വാച്ചുകൾ
3. ബ്ലൂടൂത്ത് ഉപകരണങ്ങൾ
4. ഇയർഫോണുകൾ
5. മറ്റേതെങ്കിലും ആശയവിനിമയ ഉപകരണങ്ങൾ
6. ലോഹ വസ്തുക്കൾ
7. വലിയ ബെൽറ്റ് ബക്കിളുകൾ
8. ഭാരമേറിയ ആഭരണങ്ങൾ
9. വലിയ ഹെയർ ക്ലിപ്പുകൾ
10. സുരക്ഷാ പരിശോധനകളെ തടസ്സപ്പെടുത്തുന്ന മറ്റ് വസ്തുക്കൾ

നീറ്റ് യുജി 2026 പുനഃപരീക്ഷയുമായി ബന്ധപ്പെട്ട എന്തെങ്കിലും സംശയമുണ്ടെങ്കിൽ, ഉദ്യോഗാർത്ഥികൾക്ക് 011-40759000 അല്ലെങ്കിൽ 011-69227700 എന്ന നമ്പറിൽ NTA ഹെൽപ്പ്‌ഡെസ്‌കുമായി ബന്ധപ്പെടാം, അല്ലെങ്കിൽ neetug2026@nta.ac.in എന്ന മെയിലുമായും ബന്ധപ്പെടാവുന്നതാണ്. ഡ്രസ് കോഡും സുരക്ഷാ പ്രോട്ടോക്കോളുകളും കർശനമായി പാലിക്കണമെന്ന് എൻ‌ടി‌എ ഉദ്യോഗാർത്ഥികളോട് ആവശ്യപ്പെട്ടിട്ടുണ്ട്. പരീക്ഷാ ഹാളിൽ പ്രവേശിക്കുന്നതിന് മുമ്പ് എല്ലാ ഉദ്യോഗാർത്ഥികളും നിർബന്ധിത പരിശോധനയ്ക്ക് വിധേയരാകുമെന്ന് പരീക്ഷാ ഏജൻസി അറിയിച്ചു. സുരക്ഷാ പരിശോധനകൾ സുഗമമായി പൂർത്തിയാക്കുന്നതിനും അവസാന നിമിഷത്തെ അസൗകര്യങ്ങൾ ഒഴിവാക്കുന്നതിനും ഉദ്യോഗാർത്ഥികൾ നിശ്ചിത റിപ്പോർട്ടിംഗ് സമയത്ത് അവരുടെ നിയുക്ത കേന്ദ്രങ്ങളിൽ റിപ്പോർട്ട് ചെയ്യണമെന്ന് നിർദ്ദേശിച്ചിട്ടുണ്ട്.

പരീക്ഷാ ഹാളിലേക്ക് കൊണ്ടുപോകാൻ അനുവദിച്ചവ

• അഡ്മിറ്റ് കാർഡും ഫോട്ടോയും
• ഔദ്യോഗിക തിരിച്ചറിയൽ രേഖ
• സുതാര്യമായ വാട്ടർ ബോട്ടിൽ

മോക് ഡ്രിൽ ഇന്ന്

പരീക്ഷ നടത്തിപ്പിൻ്റെ ഭാ​ഗമായി രാജ്യവ്യാപകമായി ഇന്ന് മോക് ഡ്രിൽ സംഘടിപ്പിക്കും. രാജ്യത്തെ മെഡിക്കൽ പ്രവേശന പരീക്ഷയായ നീറ്റ്-യുജി 2026 പുനഃപരീക്ഷയുടെ സുഗമമായ നടത്തിപ്പിനായാണ് എൻടിഎയുടെ നീക്കം. മോക്ക് ഡ്രിൽ രാവിലെ 9 മണിക്ക് ആരംഭിച്ച് വൈകുന്നേരം വരെ തുടരും. ദേശീയ പരീക്ഷാ ഏജൻസി (എൻടിഎ) യാണ് ഇന്ന് രാജ്യവ്യാപകമായി മോക് ഡ്രിൽ സംഘടിപ്പിക്കുമെന്ന് വ്യക്തമാക്കിയത്. ചോദ്യപേപ്പർ ചോർച്ചയുമായി ബന്ധപ്പെട്ട ആരോപണങ്ങളെ തുടർന്നാണ് മെയ് മൂന്നിന് നടന്ന നീറ്റ്-യുജി പരീക്ഷ റദ്ദാക്കിയത്. ഇതുമായി ബന്ധപ്പെട്ട അന്വേഷണം സിബിഐയുടെ ഭാ​ഗത്ത് നിന്ന് പുരോ​ഗമിക്കവെയാണ് പുനഃപരീക്ഷ നാളെ നടക്കുന്നത്.

English Summary:

National Testing Agency (NTA) has issued an advisory for candidates appearing in the NEET UG 2026 re-examination on June 21 sunday. Here is the dress code, permissible items and security protocols to be followed at examination centres.