കൊച്ചിയിലെ തിരക്കുകളിൽ നിന്നും ജോലിത്തിരക്കുകളിൽ നിന്നും മാറി ഒരു ദിവസത്തേക്ക് കാടിൻ്റെ കുളിർമയും വെള്ളച്ചാട്ടങ്ങളുടെ ഭംഗിയും ആസ്വദിക്കാൻ ആഗ്രഹിക്കുന്നുണ്ടോ? എങ്കിൽ പോക്കറ്റ് ചോരാതെ അടിച്ചുപൊളിക്കാൻ കെഎസ്ആർടിസി ബജറ്റ് ടൂറിസം സെൽ നിങ്ങൾക്കായി ഒരുക്കുന്ന അതിമനോഹരമായ അവസരമാണ് എറണാകുളം - മലക്കപ്പാറ ഏകദിന ട്രിപ്പ്. ഏകദേശം 600 മുതൽ 1000 രൂപയ്ക്കുള്ളിൽ പ്രകൃതിഭംഗി തുളുമ്പുന്ന അതിരപ്പിള്ളി മുതൽ തേയിലത്തോട്ടങ്ങൾ നിറഞ്ഞ മലക്കപ്പാറ വരെ ആനവണ്ടിയിൽ പോയി വരാവുന്ന യാത്രയുടെ കൂടുതൽ വിവരങ്ങൾ അറിയാം.

എറണാകുളം കെഎസ്ആർടിസി ഡിപ്പോയിൽ നിന്ന് പുലർച്ചെ ആരംഭിക്കുന്ന ഈ യാത്ര, പച്ചപ്പുനിറഞ്ഞ വനപാതകളിലൂടെയും അതിമനോഹരമായ വ്യൂ പോയിന്റുകളിലൂടെയുമാണ് കടന്നുപോകുന്നത്. ബൈക്കുകളിലോ കാറുകളിലോ പോകുന്നതിനേക്കാൾ കെഎസ്ആർടിസിയുടെ സൈഡ് സീറ്റിലിരുന്ന് കാനനക്കാഴ്ചകൾ തികച്ചും വ്യത്യസ്തമായ ഒരു യാത്രാനുഭവമാണ് സമ്മാനിക്കുക. ചാലക്കുടി പിന്നിട്ട് കാട്ടുപാതയിലേക്ക് പ്രവേശിക്കുന്നത് മുതൽ കാഴ്ചകളുടെ വിരുന്നാണ് ആനവണ്ടിയിൽ ഒരുക്കിയിരിക്കുന്നത്.

ALSO READ: തണുപ്പും ചാറ്റൽമഴയും; മഴക്കാല യാത്രകൾക്ക് ഊട്ടിയേക്കാൾ മികച്ച സ്ഥലം വേറെയില്ല

യാത്രാ സമയക്രമവും പ്രത്യേകതകളും

സാധാരണയായി എല്ലാ ശനി, ഞായർ ദിവസങ്ങളിലും മറ്റ് പൊതുഅവധി ദിവസങ്ങളിലും പുലർച്ചെ 5:00-നും 5:30-നും ഇടയിൽ എറണാകുളം ഡിപ്പോയിൽ നിന്ന് ബസ് പുറപ്പെടും. മലക്കപ്പാറയിലെ കാഴ്ചകളും കണ്ട് അസ്തമയത്തോടെ മലയിറങ്ങി രാത്രി 9:30-ഓടെ എറണാകുളത്ത് തിരിച്ചെത്തും. സ്ത്രീകൾക്കും കുട്ടികൾക്കും അടക്കം സുരക്ഷിതമായ യാത്രയാണ് കെഎസ്ആർടിസി ഒരുക്കുന്നത്. ഒരൊറ്റ ഫോൺ കോളിലൂടെ മുൻകൂട്ടി സീറ്റുകൾ ബുക്ക് ചെയ്ത് ഈ യാത്രയുടെ ഭാഗമാകാം എന്നതാണ് കെഎസ്ആർടിസി പാക്കേജുകളുടെ ഏറ്റവും വലിയ പ്രത്യേകത.

മലക്കപ്പാറയ്ക്ക് പുറമെ എറണാകുളം കെഎസ്ആർടിസി ഡിപ്പോയിൽ നിന്ന് സഞ്ചാരികൾക്കായി ഒട്ടനവധി സൂപ്പർ ഹിറ്റ് ബജറ്റ് ടൂറിസം പാക്കേജുകൾ വേറെയും ഒരുക്കിയിട്ടുണ്ട്. അവധിക്കാലങ്ങളും വാരാന്ത്യങ്ങളും കൂടുതൽ മനോഹരമാക്കാൻ പോക്കറ്റ് ഫ്രണ്ട്‌ലിയായി തിരഞ്ഞെടുക്കാവുന്ന പാക്കേജുകളാണ് കെഎസ്ആർടിസി ഒരുക്കുന്നത്.

​ഗവി മൂന്നാർ യാത്ര

മലക്കപ്പാറ കഴിഞ്ഞാൽ സഞ്ചാരികൾ ഏറ്റവും കൂടുതൽ തിരയുന്ന പാക്കേജുകളിൽ ഒന്നാണ് ​ഗവി മൂന്നാർ യാത്ര. പത്തനംതിട്ട വഴി മൂഴിയാർ ഡാം, ശബരിഗിരി പദ്ധതി പ്രദേശം, കക്കി ഡാം, ആനത്തോട് ഡാം, ഗവി എക്കോ ടൂറിസം സെന്റർ, വനപാതയിലൂടെയുള്ള കാനന സഫാരി. ഗവിയിലെ തടാകത്തിലൂടെയുള്ള ബോട്ടിലിംഗും ഈ പാക്കേജിന്റെ ഭാഗമാണ്. സാധാരണയായി 1300 - 1500 രൂപയ്ക്ക് ഉള്ളിലാണ് ഒരാൾക്കുള്ള നിരക്ക് വരുന്നത്.

കുറഞ്ഞ ചെലവിൽ മൂന്നാറിന്റെ തണുപ്പും തേയിലത്തോട്ടങ്ങളും കണ്ട് വരാൻ ആഗ്രഹിക്കുന്നവർക്ക് പറ്റിയ പാക്കേജാണ് മൂന്നാറിലേക്കുള്ളത്. അടിമാലി വഴി ചീയപ്പാറ, വാളറ വെള്ളച്ചാട്ടങ്ങൾ, മൂന്നാർ ടൗൺ, മാട്ടുപ്പെട്ടി ഡാം, എക്കോ പോയിന്റ്, കുണ്ടള ഡാം, ടോപ്പ് സ്റ്റേഷൻ. കൂടാതെ രാത്രികാല കാനന ഭംഗി ആസ്വദിക്കാൻ കെഎസ്ആർടിസി ഒരുക്കുന്ന പ്രത്യേക ജംഗിൾ സഫാരിയും ഇതിൻ്റെവൺ ഡേ ട്രിപ്പുകൾക്ക് പുറമെ, ശനിയാഴ്ച വൈകുന്നേരം പുറപ്പെട്ട് ഞായറാഴ്ച രാത്രി തിരിച്ചെത്തുന്ന രീതിയിൽ കെഎസ്ആർടിസി സ്ലീപ്പർ ബസുകളിൽ രാത്രി താമസം ഒരുക്കുന്ന പ്രത്യേക രണ്ട് ദിവസത്തെ പാക്കേജുകളും ലഭ്യമാണ്. ഭാഗമാണ്.

English Summary:

Planning a quick weekend escape from Kochi, here is the complete travel details of Ernakulam to Malakkappara KSRTC One-Day Trip package. Find ticket prices, route maps, sightseeing spots.

വേനൽക്കാലത്തെ കടുത്ത ചൂടിൽ നിന്നും രക്ഷനേടാൻ ആളുകൾ കൂട്ടത്തോടെ വണ്ടി കയറുന്ന ഇടമാണ് ഊട്ടി (Ooty Monsoon Travel Guide). എന്നാൽ, പലരും അറിയാതെ പോകുന്ന മറ്റൊരു രഹസ്യമുണ്ട്, ഊട്ടിയുടെ യഥാർത്ഥ സൗന്ദര്യം ഉണരുന്നത് വേനലിലല്ല, മറിച്ച് മഴക്കാലത്താണ്. വേനലിൻ്റെ തീഷ്ണത മങ്ങിത്തുടങ്ങുന്ന മഴയുടെ ഇരമ്പൽ ആരംഭിക്കുന്ന ജൂൺ ജൂലൈ മാസമാണ് ഊട്ടിയെ ഏറ്റവും മനോഹരമായി കാണാൻ സാധിക്കുന്നത്. ചാറ്റൽമഴയും തണുത്ത കാറ്റും മലനിരകളെ പൂർണ്ണമായി മൂടുന്ന കോടമഞ്ഞും ഊട്ടിയെ ഒരു മാന്ത്രിക ലോകമാക്കി മാറ്റുന്നു. മഴക്കാല യാത്രകളെ പ്രണയിക്കുന്നവർക്ക് എന്തുകൊണ്ടും ഈ സീസണിൽ പോകാൻ പറ്റിയ ഇടമാണ് ഊട്ടി. എന്നാൽ ഊട്ടിയിലെ ചില സ്ഥലങ്ങൾക്ക് ഈ സമയം ഒരു പ്രത്യേക ഭം​ഗിയുണ്ട്. അവ ഏതെല്ലാമെന്ന് നോക്കാം.

മഴക്കാലത്ത് ഊട്ടിയിലെ റോഡുകളിലൂടെയുള്ള യാത്ര അതീവ മനോഹരമാണ്. തൊട്ടുമുന്നിലുള്ള കാഴ്ചകൾ പോലും മറച്ചുകളയുന്ന കട്ടിയേറിയ കോടമഞ്ഞ് നിമിഷനേരം കൊണ്ട് നമ്മുടെ മനസ്സിലെ കുളിരണിയിക്കും. കുന്നിൻ ചെരിവുകളിലെ പൈൻ കാടുകൾക്ക് നടുവിലൂടെ തണുത്ത കാറ്റേറ്റ്, ചൂടുചായയും കുടിച്ചുള്ള ഒരു നടത്തം ഏതൊരു സഞ്ചാരിയുടെയും മനസ്സ് നിറയ്ക്കും. വേനലിൽ വരണ്ടുണങ്ങിപ്പോകുന്ന ഊട്ടിയിലെ വെള്ളച്ചാട്ടങ്ങളിൽ പലതും മഴക്കാലത്ത് അതിന്റെ പൂർണ്ണ ശക്തിയോടെ ആർത്തലച്ചു പതഞ്ഞൊഴുകുന്നത് കാണാം.

ALSO READ: യാത്രയ്ക്ക് പ്ലാനുണ്ടോ? കേരളത്തിലെ ടൂറിസം കേന്ദ്രങ്ങളിൽ കർശന നിയന്ത്രണം; അടച്ചത് ഇവയെല്ലാം

ടോയ് ട്രെയിൻ യാത്രയും വെള്ളച്ചാട്ടവും

കൽഹാട്ടി വെള്ളച്ചാട്ടവും ഈ സമയത്ത് കാണുന്നത് കണ്ണുകൾക്ക് ഒരു വിരുന്നാണ്. പച്ചപ്പുനിറഞ്ഞ പാറക്കെട്ടുകളിലൂടെ വെള്ളം കുതിച്ചുചാടുന്ന കാഴ്ച ക്യാമറകളിൽ പകർത്താൻ നിരവധി സഞ്ചാരികളാണ് ഇവിടെയെത്തുന്നത്. യുനെസ്കോയുടെ പൈതൃക പട്ടികയിലുള്ള ഊട്ടി ടോയ് ട്രെയിൻ യാത്ര മഴക്കാലത്ത് ഇരട്ടി മനോഹരമാകും. മേട്ടുപ്പാളയത്തുനിന്നോ കൂനൂരിൽ നിന്നോ ഊട്ടിയിലേക്കുള്ള ഈ ട്രെയിൻ യാത്രയിൽ, കുന്നിൻ ചെരിവുകളിലൂടെയും പച്ചപ്പ് നിറഞ്ഞ തോട്ടങ്ങളിലൂടെയും ട്രെയിൻ നീങ്ങുമ്പോൾ ജനലരികിലേക്ക് ചാറ്റൽമഴയുടെ തുള്ളികൾ തെറിച്ചുവീഴുന്നത് അതീവ മനോഹരമായ അനുഭവമാണ്.

മഴക്കാലത്ത് സാധാരണയായി ഊട്ടിയിൽ സഞ്ചാരികളുടെ തിരക്ക് വളരെ കുറവായിരിക്കും. അതുകൊണ്ട് തന്നെ നിങ്ങൾക്ക് സമാധാനത്തോടെ കാഴ്ച്ചകൾ ആസ്വദിക്കാനാകും. എന്നാൽ റീലുകളും വീഡിയോകളും വെറലായതോടെ ഇപ്പോൾ മഴക്കാലത്തും ഊട്ടിയിലെ ചില സ്ഥലങ്ങളിൽ മഞ്ഞുകാണാൻ ധാരാളം ആളുകൾ എത്താറുണ്ട്. കൂടാതെ ഈ സമയത്ത് ഹോട്ടലുകൾ, ഹോംസ്റ്റേകൾ, റിസോർട്ടുകൾ എന്നിവ വളരെ കുറഞ്ഞ നിരക്കിൽ ലഭ്യമാകും എന്നതും താമസത്തിൻ്റെ കാര്യത്തിൽ വലിയ അനു​ഗ്രഹമാണ്.

മഴക്കാല ഊട്ടി യാത്രയിൽ ശ്രദ്ധിക്കേണ്ടത്

മഴ പെയ്യുന്നതോടെ ഊട്ടിയിലെ തണുപ്പ് ശക്തമാകും. അതിനാൽ നല്ല ക്വാളിറ്റിയുള്ള സ്വെറ്ററുകൾ, ജാക്കറ്റുകൾ എന്നിവ കൈവശം കരുതാൻ മറക്കരുത്.

ചുരം റോഡുകളിലും ഹിൽ സ്റ്റേഷനുകളിലും കനത്ത കോടമഞ്ഞ് കാരണം കാഴ്ച മങ്ങാൻ സാധ്യതയുണ്ട്. അതുകൊണ്ട് പുലർച്ചെയുള്ള യാത്രകൾ ഒഴിവാക്കുക, വാഹനം വളരെ ശ്രദ്ധിച്ച് മാത്രം ഓടിക്കുക.

മലമുകളായതിനാൽ എപ്പോഴാണ് മഴ പെയ്യുക എന്ന് പ്രവചിക്കാൻ സാധിക്കില്ല. യാത്രകളിൽ എപ്പോഴും ഒരു കുടയോ റെയിൻകോട്ടോ കൂടെക്കരുതുന്നത് നല്ലതാണ്.

യാത്ര തിരിക്കുന്നതിന് മുൻപ് പ്രാദേശിക വാർത്തകളും തമിഴ്‌നാട് ടൂറിസം വകുപ്പിൻ്റെ മുന്നറിയിപ്പുകളും പരിശോധിച്ച് കനത്ത മഴയോ മണ്ണിടിച്ചിൽ സാധ്യതയോ ഇല്ലെന്ന് ഉറപ്പുവരുത്തുക.

English Summary:

Planning a trip to the Nilgiris, Here is why you need to experience Ooty in the rainy season 2026. Discover the top mist-covered places to visit, roaring waterfalls.

പത്തനംതിട്ട ജില്ലയിലെ വിഖ്യാതമായ ആറന്മുള പാർത്ഥസാരഥി ക്ഷേത്രത്തിലെ ചരിത്രപ്രസിദ്ധമായ ആറന്മുള വള്ളസദ്യ (Aranmula Vallasadya) സീസൺ ആരംഭിക്കുകയാണ്. വള്ളപ്പാട്ടിൻ്റെ ഈരടികളും രുചിപ്പെരുമയുടെ വിഭവങ്ങളും സമന്വയിക്കുന്ന ഈ സാംസ്കാരിക ഉത്സവം ഒരു നാടിൻ്റെ മാത്രം ഉത്സവമായി കരുതാനാകില്ല. നാടെങ്ങും അറിഞ്ഞും കേട്ടും നിരവധി പേരാണ് ഇതിൽ പങ്കുചേരാൻ ഓരോ വർഷവും ഇവിടേക്ക് എത്തുന്നത്. രുചിപ്പെരുമയുടെയും ആചാരപ്പെരുമയുടെയും പുതിയൊരു ഉത്സവകാലത്തിന് തുടക്കം കുറിച്ചുകൊണ്ട് ഈ വർഷത്തെ ആറന്മുള വള്ളസദ്യ ജൂലൈ 19 മുതൽ ആരംഭിക്കും.സെപ്റ്റംബർ 16 വരെ നീണ്ടുനിൽക്കുന്ന 60 ദിവസത്തെ ഈ ഉത്സവകാലത്തിനായി വലിയ ഒരുക്കങ്ങളാണ് ക്ഷേത്രത്തിലും പള്ളിയോടക്കരകളിലും തുടക്കമിട്ടിരിക്കുന്നത്.

ALSO READ: യാത്രയ്ക്ക് പ്ലാനുണ്ടോ? കേരളത്തിലെ ടൂറിസം കേന്ദ്രങ്ങളിൽ കർശന നിയന്ത്രണം; അടച്ചത് ഇവയെല്ലാം

നൂറ്റാണ്ടുകളായി മാറ്റമില്ലാതെ തുടരുന്ന ആറന്മുളയുടെ ഈ പരമ്പരാഗത ആചാരം കാണാനും വഴിപാട് സമർപ്പിക്കാനുമായി ആയിരക്കണക്കിന് ഭക്തരാണ് ഈ ദിവസങ്ങളിൽ പമ്പാനദിയോടെ ചേർന്നുള്ള ഈ ക്ഷേത്രത്തിലേക്ക് എത്തുന്നത്. ആറന്മുള വള്ളസദ്യയുടെ ഏറ്റവും വലിയ പ്രത്യേകത അതിൻ്റെ വിഭവസമൃദ്ധി തന്നെയാണ്. സാധാരണ സദ്യകളിൽ നിന്ന് വ്യത്യസ്തമായി, കേരളീയ തനിമയിൽ വാഴയിലയിൽ വിളമ്പുന്ന 70-ലധികം പരമ്പരാഗത വിഭവങ്ങളാണ് വള്ളസദ്യയിൽ ഉൾപ്പെടുന്നത്.

ക്ഷേത്രത്തിലെത്തുന്ന പള്ളിയോടങ്ങളിലെ തുഴച്ചിൽക്കാരെ (ഭഗവാന്റെ പ്രജകളെ) വള്ളപ്പാട്ട് പാടി ആവശ്യപ്രകാരം വേണ്ട വിഭവങ്ങൾ വിളമ്പുന്നതാണ് ഇവിടുത്തെ രീതി. വഴുതനങ്ങ മെഴുക്കുപുരട്ടി, പാളതൈര്, അമ്പലപ്പുഴ പാൽപ്പായസം, ഉണ്ണിയപ്പം തുടങ്ങി സാധാരണ സദ്യകളിൽ കാണാത്ത ഒട്ടനവധി പ്രത്യേക വിഭവങ്ങൾ ഇതിലുണ്ടാകും. ഈ സീസണിൽ ഏകദേശം 380 വള്ളസദ്യകൾ ഇതിനകം ബുക്ക് ചെയ്തിട്ടുണ്ടെന്നാണ് ക്ഷേത്രവുമായി ബന്ധപ്പെട്ട അധികൃതർ പറയുന്നത്.

ഉത്സവ സീസണിലെ രണ്ട് പ്രധാന പരിപാടികളായ ഉതൃട്ടാതി വള്ളംകളിയും അഷ്ടമിരോഹിണി വള്ളസദ്യയും യഥാക്രമം ഓഗസ്റ്റ് 30 നും സെപ്റ്റംബർ നാലിനും നടക്കും. ഈ വർഷം, ആറന്മുളയിലെ പാഞ്ചജന്യം ഓഡിറ്റോറിയത്തിൽ 56 ദിവസത്തേക്ക് കെഎസ്ആർടിസിയുടെ ബജറ്റ് ടൂറിസം പരിപാടിയുടെ ഭാ​ഗമായി സന്ദർശകർക്ക് വള്ളസദ്യ വിരുന്നൊരുക്കുന്നുണ്ട്. വള്ളസദ്യ ബുക്കിംഗിനായി, 8281113010 എന്ന നമ്പറിൽ ബന്ധപ്പെടാവുന്നതാണ്.

വള്ളസദ്യ എങ്ങനെ ബുക്ക് ചെയ്യാം?

ആറന്മുള പാർത്ഥസാരഥി ക്ഷേത്രത്തിലെ വള്ളസദ്യ വഴിപാട് മുൻകൂട്ടി ബുക്ക് ചെയ്യുന്നതിന് കൃത്യമായ ചില മാനദണ്ഡങ്ങളുണ്ട്. തിരുവിതാംകൂർ ദേവസ്വം ബോർഡിന്റെയും പള്ളിയോട സേവാസംഘത്തിന്റെയും മേൽനോട്ടത്തിലാണ് എല്ലാക്കൊല്ലവും ബുക്കിംഗ് നടപടികൾ നടക്കുന്നത്. വള്ളസദ്യ നേരിട്ട് ബുക്ക് ചെയ്യാനുള്ള ഏറ്റവും നല്ല മാർഗ്ഗം ആറന്മുളയിലുള്ള പള്ളിയോട സേവാസംഘത്തിന്റെ കേന്ദ്ര ഓഫീസുമായി ബന്ധപ്പെടുക എന്നതാണ്.

ആറന്മുള ക്ഷേത്രത്തിന് സമീപമുള്ള പള്ളിയോട സേവാസംഘം ഓഫീസിൽ നേരിട്ടെത്തിയോ അല്ലെങ്കിൽ അവരുടെ ഔദ്യോഗിക ഫോൺ നമ്പറുകൾ വഴിയോ ബുക്കിംഗ് തീയതികളുടെ ലഭ്യത പരിശോധിക്കാം. വള്ളസദ്യ നടത്തുന്നതിനായി 52 പള്ളിയോടങ്ങളിൽ ഏതെങ്കിലും ഒരു പള്ളിയോടക്കരക്കാരെ ഭക്തർക്ക് തിരഞ്ഞെടുക്കാം. ആറന്മുള പാർത്ഥസാരഥി ക്ഷേത്രത്തിലെ തിരുവിതാംകൂർ ദേവസ്വം ബോർഡിന്റെ പ്രത്യേക കൗണ്ടറുകൾ വഴിയും വള്ളസദ്യ ബുക്ക് ചെയ്യാവുന്നതാണ്.

English Summary:

Aranmula Vallasadya season at the iconic Parthasarathy temple in Aranmula of Pathanamthitta district will be held from July 19 to September 16. The vallasadya spanning 60 days, featuring over 70 traditional dishes served on a plantain leaf in typical Kerala style.

സംസ്ഥാനത്ത് കാലവർഷം കനത്തതോടെ വിനോദസഞ്ചാര യാത്രകൾ പ്ലാൻ ചെയ്യുന്നവർക്ക് വനംവകുപ്പിന്റെയും ദുരന്തനിവാരണ അതോറിറ്റിയുടെയും കർശന മുന്നറിയിപ്പ്. തുടർച്ചയായി പെയ്യുന്ന കനത്ത മഴയെയും കാറ്റിനെയും തുടർന്ന് കേരളത്തിലെ പ്രമുഖ വിനോദസഞ്ചാര കേന്ദ്രങ്ങളിൽ അതീവ ജാഗ്രത പ്രഖ്യാപിക്കുകയും പൊതുജനങ്ങളുടെ പ്രവേശനം താൽക്കാലികമായി നിരോധിക്കുകയും ചെയ്തിട്ടുണ്ട്. മഴക്കാലത്ത് ഉണ്ടാകാൻ സാധ്യതയുള്ള ഉരുൾപൊട്ടൽ, മണ്ണൊലിപ്പ്, വെള്ളപ്പൊക്കം, മരങ്ങൾ കടപുഴകി വീഴൽ തുടങ്ങിയ അപകടങ്ങൾ ഒഴിവാക്കാനാണ് ഈ അടിയന്തര നടപടി. യാത്ര തിരിക്കും മുൻപ് നിലവിൽ അടച്ചിട്ടിരിക്കുന്ന പ്രധാന കേന്ദ്രങ്ങളും യാത്രാ നിയന്ത്രണങ്ങളും എന്തൊക്കെയാണെന്ന് കൃത്യമായി മനസ്സിലാക്കണം.

ALSO READ: യാത്ര പോകാൻ വരട്ടെ! മണ്ണിടിച്ചിൽ സാധ്യത: പൊൻമുടി അ‌ടച്ചു; ഇടുക്കിയിൽ നിയന്ത്രണം, വയനാട്ടിൽ ഇളവ്

പൂർണ്ണമായും അടച്ചിട്ട വിനോദസഞ്ചാര കേന്ദ്രങ്ങൾ

ട്രെക്കിങ് പാതകളും കാടുകളും: വയനാട്, ഇടുക്കി, പത്തനംതിട്ട, തിരുവനന്തപുരം ജില്ലകളിലെ വനത്തിനുള്ളിലേക്കുള്ള എല്ലാവിധ ട്രെക്കിങ് പാതകളും ഈക്കോ ടൂറിസം കേന്ദ്രങ്ങളും പൂർണ്ണമായും അടച്ചു. കാപിൽ ബീച്ച്, മീൻമുട്ടി, കുറുവാദ്വീപ്, പൊന്മുടി തുടങ്ങിയവയാണ് അടച്ചിട്ടിരിക്കുന്നത്. അതിനാൽ ഇവിടേക്ക് യാത്ര പോകുന്നതിന് മുമ്പ് അധിക‍ൃതരുടെ നിർദ്ദേശം മനസ്സിലാക്കുക.

വെള്ളച്ചാട്ടങ്ങളും ജലാശയങ്ങളും: അതിരപ്പിള്ളി, വാഴച്ചാൽ ഉൾപ്പെടെയുള്ള പ്രമുഖ വെള്ളച്ചാട്ടങ്ങൾക്ക് സമീപത്തേക്ക് സഞ്ചാരികൾ ഇറങ്ങുന്നത് കർശനമായി വിലക്കിയിട്ടുണ്ട്. പുഴകളിൽ നീന്താനിറങ്ങുന്നതിനും പുഴക്കരകളിൽ സെൽഫിയെടുക്കുന്നതിനും കർശന നിരോധനമുണ്ട്. മലവെള്ളപ്പാച്ചിലിന് സാധ്യതയുള്ളതിനാൽ ജലാശയങ്ങളിൽ ഇറങ്ങരുത്.

ബീച്ചുകളും ബോട്ടിങ്ങും: കടൽ അതീവ പ്രക്ഷുബ്ധമായതിനാൽ കോഴിക്കോട്, ആലപ്പുഴ, കോവളം, ഫോർട്ട് കൊച്ചി തുടങ്ങിയ പ്രധാന ബീച്ചുകളിൽ കടലിൽ ഇറങ്ങുന്നതിന് വിലക്കുണ്ട്. കനത്ത കാറ്റും മഴയും ഉള്ളതിനാൽ ഹൗസ് ബോട്ട് സർവീസുകളും കായൽ ടൂറിസം ബോട്ടിങ്ങുകളും താൽക്കാലികമായി നിർത്തിവെക്കാൻ നിർദ്ദേശമുണ്ട്.

മലയോര മേഖലകളിൽ രാത്രികാല യാത്രാ നിരോധനം

ഇടുക്കി- മൂന്നാർ മേഖലകൾ, വയനാട്- താമരശ്ശേരി ചുരം വഴി, പത്തനംതിട്ട -ഗവി മേഖല തുടങ്ങിയ ഹൈറേഞ്ച് പ്രദേശങ്ങളിലേക്ക് രാത്രി 7:00 മണി മുതൽ രാവിലെ 6:00 മണി വരെ അടിയന്തര ആവശ്യങ്ങൾക്കൊഴികെയുള്ള യാത്രകൾക്ക് കളക്ടർമാർ കർശന നിയന്ത്രണം ഏർപ്പെടുത്തിയിട്ടുണ്ട്. മലയോര പാതകളിൽ മൂടൽമഞ്ഞും കൂറ്റൻ കല്ലുകൾ ഉരുണ്ടുവീഴാനുള്ള സാധ്യതയും നിലനിൽക്കുന്നതിനാലാണിത്.

മഴക്കാലത്തെ പ്രകൃതിഭംഗി ആസ്വദിക്കാൻ യാത്ര പുറപ്പെടുന്നതിന് മുൻപ്, നിങ്ങൾ പോകാൻ ഉദ്ദേശിക്കുന്ന ജില്ലയിലെ ജില്ലാ ദുരന്തനിവാരണ അതോറിറ്റിയുടെയോ അതത് ഡിടിപിസി ഓഫീസുകളുടെയോ ഔദ്യോഗിക പേജുകൾ പരിശോധിച്ച് അവിടുത്തെ കൃത്യമായ സാഹചര്യം ഉറപ്പുവരുത്തുക. നിലവിലെ റെഡ്/ഓറഞ്ച് അലർട്ടുകൾ ഉള്ള ദിവസങ്ങളിൽ യാത്രകൾ പൂർണ്ണമായും ഒഴിവാക്കുന്നതാണ് സുരക്ഷിതം.

English Summary:

Planning a trip to Kerala, Heavy monsoon rain has forced authorities to shut down major tourist spots, eco-tourism centers, and trekking trails across Munnar, Wayanad, and Idukki. Check the updated full list of closed destinations.

തിരുവനന്തപുരം: സംസ്ഥാനത്ത് കാലവർഷം ശക്തമാകുന്നതിനിടെ, മണ്ണിടിച്ചിൽ സാധ്യത കണക്കിലെടുത്ത് പൊൻമുടി ഇക്കോ ടൂറിസം കേന്ദ്രത്തിലേക്കുള്ള പ്രവേശനം താൽക്കാലികമായി നിർത്തിവച്ചു. പ്രദേശത്ത് ശക്തമായ മഴ തുടരുന്ന സാഹചര്യത്തിൽ സന്ദർശകരുടെ സുരക്ഷ മുൻനിർത്തി തിരുവനന്തപുരം ഡിവിഷണൽ ഫോറസ്റ്റ് ഓഫീസറുടെ നിർദേശത്തെ തുടർന്നാണ് നടപടി. ജൂൺ 8 മുതൽ ഇനിയൊരു അറിയിപ്പ് ഉണ്ടാകുന്നത് വരെ സഞ്ചാരികൾക്ക് പ്രവേശനം ഉണ്ടായിരിക്കില്ല എന്നാണ് അ‌റിയിപ്പ്. കോഴിക്കോട്, കണ്ണൂർ, കാസർഗോഡ് എന്നീ ജില്ലകളിൽ ഇന്ന് ഓറഞ്ച് അ‌ലർട്ട് പ്രഖ്യാപിച്ചിട്ടുണ്ട്. അ‌തേസമയം, പൊന്മുടി ഉൾപ്പെടുന്ന തിരുവനന്തപുരം ജില്ലയിലും കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, വയനാട് എന്നീ ജില്ലകളിലും ഇന്ന് യെല്ലോ അ‌ലർട്ട് ആണ് പ്രഖ്യാപിച്ചിരിക്കുന്നത്.

ഇടുക്കിയിൽ രാത്രി യാത്രാ നിരോധനം

മഴക്കാലമായതിനാൽ മണ്ണിടിച്ചിൽ ഉൾപ്പെടെയുള്ള വിവിധ അ‌പകട സാധ്യതകൾ കണക്കിലെടുത്ത് അ‌നാവശ്യ യാത്രകൾ ​ഒഴിവാക്കണം, പ്രത്യേകിച്ച് മലയോര മേഖലകളിലേക്കുള്ള വിനോദസഞ്ചാരങ്ങൾ. കേന്ദ്ര കാലാവസ്ഥാ വകുപ്പ് ഓറഞ്ച് അലർട്ട് പ്രഖ്യാപിച്ചിട്ടുള്ളതിനാൽ ഇടുക്കി ജില്ലയിലെ മലയോര മേഖലകളിൽ രാത്രി യാത്രയ്ക്ക് നിരോധനമേർപ്പെടുത്തി ജില്ലാ കളക്ടർ ഉത്തരവിട്ടിട്ടുണ്ട്.

രാത്രി 7 മണി മുതൽ രാവിലെ 6 മണി വരെയാണ് ഇടുക്കിയുടെ മലയോര മേഖലകളിൽ രാത്രി യാത്ര നിരോധിച്ചിരിക്കുന്നത്. ശക്തമായ മഴ പെയ്യുന്നതിനാലും മലയോര മേഖലകളിൽ മണ്ണിടിച്ചിൽ, ഉരുൾ പൊട്ടൽ സാധ്യത നിലനിൽക്കുന്നതിനാലും ദുരന്ത സാഹചര്യം ഒഴിവാക്കുന്നതിനാണ് ഈ നിയന്ത്രണമെന്ന് അ‌ധികൃതർ വിശദീകരിച്ചു. ഉത്തരവ് കർശനമായി നടപ്പാക്കുന്നതിന് ജില്ലാ പോലീസ് മേധാവി, ആർടിഒ, സബ് ഡിവിഷണൽ മജിസ്‌ട്രേറ്റുമാർ, തഹസിൽദാർമാർ എന്നിവരെ ചുമതലപ്പെടുത്തിയിട്ടുണ്ട്.

ALSO READ: മഴ നനഞ്ഞ് കാടുകയറാം; മൺസൂൺ കാലത്ത് ഈ വെള്ളച്ചാട്ടങ്ങൾ മിസ്സ് ചെയ്യരുതേ

വയനാട്ടിൽ നിയന്ത്രണത്തിൽ ഇളവ്

വയനാട്ടിൽ ശക്തമായ മഴ മുന്നറിയിപ്പിനെ തുടർന്ന് ക്വാറികളുടെ പ്രവർത്തനത്തിനും വിനോദസഞ്ചാരത്തിനും ഏർപ്പെടുത്തിയിരുന്ന നിയന്ത്രണങ്ങൾ കഴിഞ്ഞ ദിവസം കലക്ടർ ഡി.ആർ. മേഘശ്രീ പിൻവലിച്ചിട്ടുണ്ട്. എന്നാൽ യന്ത്ര സഹായത്തോടെയുള്ള മണ്ണ് നീക്കത്തിന് നിയന്ത്രണം തുടരും. ദുരന്ത സാധ്യത നേരിടുന്ന ദുർബല പ്രദേശങ്ങളിലെ ഹോം സ്റ്റേ ഉൾപ്പെടെയുള്ള ടൂറിസ്റ്റ് കേന്ദ്രങ്ങളുടെ പ്രവർത്തനങ്ങൾക്കും അഡ്വഞ്ചർ ടൂറിസം സെന്ററുകൾക്കും ട്രക്കിങുകൾക്കും ക്വാറികൾക്കും ഏർപ്പെടുത്തിയിരുന്ന നിയന്ത്രണമാണ് പിൻവലിച്ചത്.

സുരക്ഷാ നിർദേശങ്ങൾ

കാലവർഷം കണക്കിലെടുത്ത് ദുരന്ത നിവാരണ അ‌തോറിറ്റി പൊതുജനങ്ങൾക്കായി പൊതുവിൽ ചില സുരക്ഷാ നിർദേശങ്ങൾ പുറപ്പെടുവിച്ചിട്ടുണ്ട്. മഴ ശക്തമാകുന്ന അവസരങ്ങളിൽ അത്യാവശ്യമല്ലാത്ത യാത്രകൾ പരമാവധി ഒഴിവാക്കുക. വെള്ളച്ചാട്ടങ്ങൾ, ജലാശയങ്ങൾ, മലയോര മേഖലകൾ എന്നിവിടങ്ങളിലേക്കുള്ള വിനോദ യാത്രകൾ മഴ മുന്നറിയിപ്പ് മാറുന്നത് വരെ ഒഴിവാക്കേണ്ടതാണ് എന്ന് അ‌തോറിറ്റി നിർദേശിക്കുന്നു.

മറ്റ് പ്രധാന നിർദേശങ്ങൾ

ശക്തമായ മഴയുള്ള മലയോര മേഖലയിൽ മണ്ണിടിച്ചിൽ, ഉരുൾപൊട്ടൽ, മലവെള്ളപ്പാച്ചിൽ സാധ്യതയുള്ള പ്രദേശങ്ങളിലുള്ളവർ സുരക്ഷിതമായ സ്ഥലത്തേക്ക് പകൽ തന്നെ മാറി താമസിക്കേണ്ടതാണ്. സ്ഥിരമായി വെള്ളക്കെട്ട് രൂപപ്പെടാറുള്ള താഴ്ന്ന പ്രദേശങ്ങളിലുള്ളവർ സാഹചര്യം വിലയിരുത്തി തയ്യാറാക്കപ്പെടുന്ന ക്യാമ്പുകളിലേക്ക് മാറണം. സ്വകാര്യ - പൊതു ഇടങ്ങളിൽ അപകടാവസ്ഥയിൽ നിൽക്കുന്ന മരങ്ങൾ/പോസ്റ്റുകൾ/ബോർഡുകൾ, മതിലുകൾ തുടങ്ങിയവ സുരക്ഷിതമാക്കുകയും അപകടാവസ്ഥകൾ അധികൃതരുടെ ശ്രദ്ധയിൽപ്പെടുത്തുകയും ചെയ്യുക.

ജലാശയങ്ങളോട് ചേർന്ന റോഡുകളിലൂടെയുള്ള യാത്രകളിൽ പ്രത്യേക ജാഗ്രത പാലിക്കുക. അറ്റകുറ്റപ്പണികൾ നടക്കുന്ന റോഡുകളിലും ജാഗ്രത പാലിക്കുക. വൈദ്യതി ലൈനുകൾ പൊട്ടി വീണ് അപകടങ്ങൾക്ക് സാധ്യതയുണ്ട്. അതിനാൽ വഴികളിലെ വെള്ളക്കെട്ടുകളിൽ ഇറങ്ങുന്നതിന് മുൻപ് വൈദ്യുതി അപകട സാധ്യത ഇല്ല എന്ന് ഉറപ്പാക്കണം. അതിരാവിലെ ജോലിക്ക് പോകുന്നവർ, ക്ലാസുകളിൽ പോകുന്ന വിദ്യാർഥികൾ തുടങ്ങിയവർ ഇക്കാര്യം പ്രത്യേകം ശ്രദ്ധിക്കണം. വൈദ്യുതി ലൈനുകളുടെ അപകട സാധ്യത ശ്രദ്ധയിൽ പെട്ടാൽ 1912 എന്ന നമ്പറിൽ KSEB യെ അറിയിക്കുക.

ശക്തമായ മഴ പെയ്യുന്ന സാഹചര്യത്തിൽ ഒരു കാരണവശാലും നദികൾ മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീൻപിടിക്കാനോ മറ്റ് ആവശ്യങ്ങൾക്കോ ഇറങ്ങാൻ പാടുള്ളതല്ല. കേരളത്തിലെ എല്ലാ ജില്ലകളിലും 24*7 മണിക്കൂർ പ്രവർത്തിക്കുന്ന താലൂക്ക്, ജില്ലാ കണ്ട്രോൾ റൂമുകൾ ഉണ്ട്. അപകട സാധ്യത മുന്നിൽ കാണുന്ന ഘട്ടത്തിലും സഹായങ്ങൾക്കുമായി 1077, 1070 എന്നീ ടോൾ ഫ്രീ നമ്പറുകളിൽ ബന്ധപ്പെടാവുന്നതാണ്.

English Summary

Entry to the Ponmudi Eco-Tourism Centre has been temporarily suspended due to the possibility of landslides. Tourists will not be allowed to enter from June 8 until further notice, the notice said. A yellow alert has been issued today for the Thiruvananthapuram district, which includes Ponmudi, and the districts of Kollam, Pathanamthitta, Alappuzha, Kottayam, Idukki, Ernakulam, Thrissur, Palakkad, Malappuram and Wayanad.

കർണാടകയിലെ ഏറ്റവും മനോഹരമായ പശ്ചിമഘട്ട മലനിരകളിലൊന്നായ കുദ്രേമുഖ് നാഷണൽ പാർക്കിലെ ട്രെക്കിങ് പാതകൾ വീണ്ടും സഞ്ചാരികൾക്കായി തുറന്നിരിക്കുകയാണ്. ഒരു ഇടവേളയ്ക്ക് ശേഷമാണ് കർണാടക വനംവകുപ്പ് കർശനമായ സുരക്ഷാ മാനദണ്ഡങ്ങളോടെ ട്രെക്കിങ് പുനരാരംഭിച്ചിരിക്കുന്നത്. പ്രകൃതിസ്‌നേഹികൾക്കും ട്രെക്കിങ് പ്രേമികൾക്കും ഒരുപോലെ ഇഷ്ടപ്പെടുന്ന സ്ഥലമാണിത്. കുദ്രേമുഖിന്റെ പച്ചപ്പും കോടമഞ്ഞും ആസ്വദിച്ച് മലകയറാൻ പ്ലാൻ ചെയ്യുന്നവർക്കായി ഓൺലൈൻ ബുക്കിങ് രീതികളും വനംവകുപ്പ് ഏർപ്പെടുത്തിയ പുതിയ നിയന്ത്രണങ്ങളും അടങ്ങുന്ന ഒരു യാത്രാ ​ഗൈഡ് വായിച്ചറിയാം.

കുദ്രേമുഖ്, ഗംഗാഡിക്കൽ, നേത്രാവതി, കുറിഞ്ഞാൽ കുന്നുകൾ തുടങ്ങിയ മേഖലകളിലേക്കുള്ള ട്രെക്കിംഗ് ജൂൺ മുതലാണ് വനം വകുപ്പ് ഔദ്യോഗികമായി വീണ്ടും തുറന്നത്. വനം വകുപ്പിന്റെ ആരണ്യ വിഹാര വെബ്‌സൈറ്റ് വഴി ഓൺലൈനിലൂടെ ബുക്ക് ചെയ്യന്നവർക്ക് മാത്രമാണ് നിലവിൽ ട്രക്കിങ്ങിനുള്ള അനുമതി നൽകുന്നത്. ജൂൺ 15ന് ശേഷം മേഖലയിലെ മറ്റ് ട്രെക്കിംഗ് സ്ഥലങ്ങൾ കൂടി തുറക്കുമെന്നും സംസ്ഥാന വനം വകുപ്പ് അറിയിച്ചിട്ടുണ്ട്. അഞ്ചുമാസത്തെ പ്രവേശന വിലക്കിന് ശേഷമാണ് ഇവിടെ സഞ്ചാരികളെ കയറ്റാൻ തുടങ്ങിയത്.

ALSO READ: മഴ നനഞ്ഞ് കാടുകയറാം; മൺസൂൺ കാലത്ത് ഈ വെള്ളച്ചാട്ടങ്ങൾ മിസ്സ് ചെയ്യരുതേ

ട്രെക്കിംഗ് യാത്രക്കാരുടെ സുരക്ഷ വർദ്ധിപ്പിക്കുന്നതിനായി, പരിശീലനം ലഭിച്ച 300 പ്രാദേശിക ഗൈഡുകളെയാണ് പ്രദേശത്ത് വിന്യസിച്ചിട്ടുള്ളത്. അവരുടെ കൈവശം വാക്കി-ടോക്കികൾ, പ്രഥമശുശ്രൂഷ കിറ്റുകൾ, മറ്റ് സുരക്ഷാ ഉപകരണങ്ങൾ എന്നിവയും നൽകിയിട്ടുണ്ടാകും. ട്രക്കിംഗ് നടത്തുന്നതിനിടെ ആളുകൾക്ക് വഴിതെറ്റുന്നത് തടയാൻ സഹായിക്കുന്നതിന് വനം വകുപ്പ് ട്രെക്കിംഗ് റൂട്ടുകളിൽ സൈൻബോർഡുകൾ സ്ഥാപിക്കുകയും റൂട്ട് വിവരങ്ങൾ അടങ്ങിയ ചെറിയ പുസ്തകങ്ങൾ നൽകുകയും ചെയ്യും. ഒരു ദിവസം 300 പേർക്കാണ് ടോക്കൺ അനുവദിക്കുക.

അറിഞ്ഞിരിക്കേണ്ട സുരക്ഷാ നിയമങ്ങൾ

ഗൈഡിന്റെ സഹായം നിർബന്ധം: വനംവകുപ്പ് അംഗീകരിച്ചിട്ടുള്ള തദ്ദേശീയരായ ഗൈഡുമാരുടെ കൂടെ മാത്രമേ മലകയറാൻ പാടുള്ളു. വഴിയറിയാതെ കാട്ടിൽ അകപ്പെടുന്നത് തടയാൻ അവരുടെ നിർദ്ദേശങ്ങൾ അനുസരിക്കണം.

പ്ലാസ്റ്റിക് നിരോധനം: കുദ്രേമുഖിലേക്ക് പ്ലാസ്റ്റിക് കുപ്പികളോ കവറുകളോ കൊണ്ടുപോകാൻ അനുവദിക്കില്ല. ഇത് തികച്ചും പ്ലാസ്റ്റിക്ക് മുക്ത മേഖലയാണ്. നിരവധി വന്യജീവികളുടെ ആവാസ കേന്ദ്രം കൂടിയാണിത്. എൻട്രി പോയിന്റിൽ വെച്ച് കടുത്ത പരിശോധനകൾ ഉണ്ടാകും.

മെഡിക്കൽ ഫിറ്റ്‌നസ്: കുദ്രേമുഖ് ട്രെക്കിങ് ഏകദേശം 20 കിലോമീറ്ററോളം (പോയി വരാൻ) ദൂരമുള്ള കഠിനമായ ഒന്നായതിനാൽ, മികച്ച ശാരീരികക്ഷമത ഉള്ളവർ മാത്രം യാത്രയ്ക്ക് മുതിരുക.

വന്യജീവികൾക്ക് ശല്യമുണ്ടാക്കരുത്: കാട്ടിനുള്ളിൽ ഉച്ചത്തിൽ സംസാരിക്കുന്നതും വന്യജീവികളെ ആകർഷിക്കുന്ന രീതിയിലുള്ള നിറത്തിലുള്ള വസ്ത്രങ്ങൾ ധരിക്കുന്നതും ഒഴിവാക്കുക. അതുപോലെ വന്യജീവികളെ കണ്ടാൽ അവയെ പ്രകോപിപ്പിക്കാൻ നോക്കരുത്.

യാത്രാ ടിപ്പ്: ട്രെക്കിങ് പുലർച്ചെ 6:00 മണിക്ക് തന്നെ ആരംഭിക്കുന്നതാണ് ഏറ്റവും ഉചിതം. ഉച്ചയ്ക്ക് ശേഷം മലമുകളിൽ കടുത്ത മഞ്ഞും കാറ്റും ഉണ്ടാകാൻ സാധ്യതയുള്ളതിനാൽ കൃത്യസമയത്ത് തന്നെ തിരികെ ബേസ് ക്യാമ്പിൽ എത്തിച്ചേരാൻ ശ്രദ്ധിക്കുക.

English Summary:

Karnataka Forest Department has officially reopened trekking routes to Kudremukh, Gangadikal, Netravathi and Kurinjal hills from June 1. Trekking activities will be conducted in accordance with the government's newly introduced Standard Operating Procedures (SOPs).

വയനാടിന്റെ മനോഹാരിതയും കുളിരും ആസ്വദിക്കാൻ പോകാനിരിക്കുന്നവർ പ്രത്യേകം ശ്രദ്ധിക്കുക. കനത്ത മഴയെത്തുടർന്ന് വയനാട് ജില്ലയിൽ റെഡ് അലേർട്ട് പ്രഖ്യാപിച്ച പശ്ചാത്തലത്തിൽ ജില്ലയിലെ വിനോദസഞ്ചാര മേഖലയ്ക്ക് ജില്ലാ ഭരണകൂടം കർശന നിയന്ത്രണങ്ങൾ ഏർപ്പെടുത്തിയിരിക്കുകയാണ്. കനത്ത മഴ തുടരുന്നതിനാൽ മേപ്പാടി മേഖലയിൽ കർശന നിയന്ത്രണമേർപ്പെടുത്തി. ജൂൺ ആറ്, ഏഴ് (ഇന്നും നാളെയും) തീയതികളിൽ വിനോദസഞ്ചാര കേന്ദ്രങ്ങൾ തുറക്കരുതെന്നും മേപ്പാടി പരിധിയിലെ ടൂറിസം കേന്ദ്രങ്ങൾക്ക് സമ്പൂർണ്ണ നിരോധനവുമാണ് ജില്ലാ ഭരണകൂടം ഏർപ്പെടുത്തിയിരിക്കുന്നത്.

റിസോർട്ടുകളും ഹോംസ്റ്റേകളും സർവീസ് വില്ലകളും പ്രവർത്തിപ്പിക്കരുതെന്നും ജില്ലാ ഭരണകൂടം നിർദേശം നൽകിയിട്ടുണ്ട്. റെഡ് അലർട്ടിന്റെ പശ്ചാത്തലത്തിൽ വയനാട് ജില്ലാ കളക്ടറുടെ അധ്യക്ഷതയിൽ യോഗം ചേർന്നതിന് പിന്നാലെയാണ് നിയന്ത്രണങ്ങൾ നിലവിൽ വന്നത്. ജില്ലയിലെ പ്രധാന മേഖലകളിലെല്ലാം കർശന നിരീക്ഷണം വേണമെന്നാണ് നിർദ്ദേശം. എല്ലാ വകുപ്പിലെയും ജില്ലാ മേധാവിമാരോട് ജില്ലയിൽ തുടരാനും നിർദ്ദേശം നൽകിയിട്ടുണ്ട്. കൽപ്പറ്റ മുൻസിപ്പാലിറ്റിയിൽ കൺട്രോൾ റൂം തുറന്നിട്ടുണ്ട്.

ALSO READ: മഴ നനഞ്ഞ് കാടുകയറാം; മൺസൂൺ കാലത്ത് ഈ വെള്ളച്ചാട്ടങ്ങൾ മിസ്സ് ചെയ്യരുതേ

സംസ്ഥാനത്ത് ഇന്നും നാളെയും ശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പിൻ്റെ മുന്നറിയിപ്പ്. ഇതേ തുടർന്ന് വിവിധ ജില്ലകളിൽ റെഡ്, ഓറഞ്ച്, യെല്ലോ അലർട്ടുകൾ പ്രഖ്യാപിച്ചിട്ടുണ്ട്. വടക്കൻ കേരളത്തിലാണ് നിലവിൽ റെഡ് അലർട്ട് പ്രഖ്യാപിച്ചിരിക്കുന്നത്. മലപ്പുറം, കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിലാണ് അതിശക്തമായ മഴ മുന്നറിയിപ്പിനെ തുടർന്ന് ഇന്ന് റെഡ് അലർട്ട് നിലനിൽക്കുന്നത്. പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട് ജില്ലകളിൽ ഓറഞ്ച് അലർട്ടും, തിരുവനന്തപുരം, കൊല്ലം, ആലപ്പുഴ ജില്ലകളിൽ യെല്ലോ അലർട്ടുമാണ്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.

യാത്രക്കാർക്കുള്ള കർശന നിർദ്ദേശങ്ങൾ

മഴ ശക്തമായി തുടരുന്നതിനാൽ ദുരന്തനിവാരണ അതോറിറ്റി പുറപ്പെടുവിച്ച അടിയന്തിര ജാഗ്രതാ നിർദ്ദേശങ്ങൾ

മലയോര മേഖലകളിൽ ട്രെക്കിങ് പൂർണ്ണമായി നിരോധിച്ചിരിക്കുകയാണ്. ചെമ്പ്ര പീക്ക്, ബാണാസുര മല തുടങ്ങിയ മലയോര മേഖലകളിലേക്കുള്ള എല്ലാവിധ ഓഫ്-റോഡ് ഡ്രൈവിംഗും ട്രെക്കിങ്ങും അടുത്ത അറിയിപ്പ് ഉണ്ടാകുന്നത് വരെ നിരോധിച്ചിരിക്കുന്നു.

മലയോര പാതകളിലും ചുരം റോഡുകളിലും രാത്രി ഏഴ് മണി മുതൽ രാവിലെ 6 മണി വരെയുള്ള അനാവശ്യ യാത്രകൾ പൂർണ്ണമായും ഒഴിവാക്കാൻ നിർദ്ദേശമുണ്ട്.

മഴവെള്ളപ്പാച്ചിലിനും പെട്ടെന്നുള്ള വെള്ളപ്പൊക്കത്തിനും സാധ്യതയുള്ളതിനാൽ പുഴകളിലോ തോടുകളിലോ ജലാശയങ്ങളിലോ ഇറങ്ങി കുളിക്കുന്നതും സെൽഫി എടുക്കുന്നതും കർശനമായി തടഞ്ഞിട്ടുണ്ട്.

കാലാവസ്ഥാ വ്യതിയാനവും കനത്ത മഴയും തുടരുന്നതിനാൽ ഔദ്യോഗിക അറിയിപ്പുകൾ വരുന്നത് വരെ വയനാട്ടിലേക്കുള്ള വിനോദയാത്രകൾ പൂർണ്ണമായും മാറ്റിവെക്കുന്നതാണ് നല്ലത്.

മഴയുള്ളപ്പോൾ വെള്ളച്ചാട്ടങ്ങൾക്ക് സമീപമുള്ള പാറകളിൽ നല്ല വഴുക്കലുണ്ടാകും. സുരക്ഷാ വേലികൾ മറികടന്ന് ചിത്രങ്ങൾ എടുക്കാൻ ശ്രമിക്കരുത്.

മലയോര മേഖലകളിൽ ശക്തമായ മഴ പെയ്യുമ്പോൾ നിമിഷ നേരം കൊണ്ട് വെള്ളച്ചാട്ടങ്ങളിൽ വെള്ളം ഉയരാനും കുത്തൊഴുക്കുണ്ടാകാനും സാധ്യതയുണ്ട്. അതിനാൽ വനംവകുപ്പ് അനുവദിച്ച സുരക്ഷിത സ്ഥാനങ്ങളിൽ മാത്രം നിൽക്കുക.

അതിശക്തമായ മഴയുള്ള ദിവസങ്ങളിൽ മലയോര മേഖലകളിലേക്ക് രാത്രികാല യാത്രാ നിരോധനവും വെള്ളച്ചാട്ടങ്ങളിലേക്ക് താൽക്കാലിക പ്രവേശന വിലക്കും ഉണ്ടാകാറുണ്ട്. യാത്ര തിരിക്കും മുൻപ് പ്രാദേശിക വാർത്തകളും ടൂറിസം വകുപ്പിന്റെ അപ്‌ഡേറ്റുകളും പരിശോധിക്കുക.

English Summary:

Wayanad Travel Alert Due To Heavy Rainfall And Red Alert. Check The List Of Destination Which Closed Due To Travelers Safety. Kerala Witness Monsson Heavy Rain Across The State.

കാലവർഷം കേരളത്തിൻ്റെ മണ്ണിൽ തൊട്ടുതലോടിക്കഴിഞ്ഞു. കനത്ത മഴ പെയ്യുന്ന ഈ സമയത്ത് നമ്മുടെ പ്രകൃതി ഒരു പ്രത്യേക ഭംഗിയിലാണ് മുന്നോട്ട് പോകുന്നത്. കാടിന്റെ വന്യതയിലും, വെള്ളച്ചാട്ടങ്ങളുടെ ഇരമ്പുന്ന ശബ്ദവും കടലിൻ്റെ കാതടപ്പിക്കുന്ന കോലാഹലവും എന്നും പ്രകൃതി നമുക്ക് നൽകുന്ന വിസ്മയ കാഴ്ച്ചകളാണ്. കരിമ്പാറക്കൂട്ടങ്ങളെ ചുംബിച്ചു കൊണ്ട് കാടിന്റെ വന്യതയിലൂടെ ഒഴുകിയെത്തുന്ന വെള്ളച്ചാട്ടങ്ങൾ തന്നെയാണ് മഴയുടെ യഥാർത്ഥ ഭം​ഗി. നഗരങ്ങളിലെ തിരക്കുകളിൽ നിന്ന് മാറി, തണുത്ത കാറ്റും കോടമഞ്ഞും ആസ്വദിച്ച് കാടിനുള്ളിലെ വെള്ളച്ചാട്ടങ്ങൾ കാണാൻ പോകാൻ ആ​ഗ്രഹിക്കുന്നവർക്ക്, ഇതാ മൺസൂൺ കാലത്ത് ഒട്ടും മിസ്സ് ചെയ്യാൻ പാടില്ലാത്ത ചില സ്പോട്ടുകൾ പരിചയപ്പെടാം.

ALSO READ: തടി കുറയ്ക്കാൻ നോക്കുന്നവർ ദിവസവും എത്ര മുട്ട കഴിക്കണം? മുട്ടയുടെ മഞ്ഞക്കരു കഴിക്കാമോ

അതിരപ്പിള്ളി വെള്ളച്ചാട്ടം

മഴക്കാലത്ത് അതിരപ്പിള്ളി കാണുന്നത് ഒരു പ്രത്യേക അനുഭവമാണ്. ചാലക്കുടിപ്പുഴ കവിഞ്ഞൊഴുകി 80 അടി ഉയരത്തിൽ നിന്ന് താഴേക്ക് പതിക്കുമ്പോൾ ഉണ്ടാകുന്ന ആ ഗർജ്ജനവും ജലകണങ്ങളും നമ്മുടെ കണ്ണുകൾക്ക് എന്നും ഒരു അത്ഭുത കാഴ്ച്ചയാണ്. മൺസൂൺ സമയത്ത് ഇവിടുത്തെ എല്ലാ കൈവഴികളും ഒന്നിച്ചു ചേർന്നുകൊണ്ടാണ് ഈ കാഴ്ചയൊരുക്കുന്നത്. ഇതിനടുത്തുള്ള വാഴച്ചാൽ, ചാർപ്പ വെള്ളച്ചാട്ടങ്ങളും ഈ സമയത്ത് കാണാൻ പറ്റിയ സ്ഥലങ്ങളാണ്.

ചീയപ്പാറ- വാളറ വെള്ളച്ചാട്ടങ്ങൾ

മുന്നാർ യാത്രയിലെ ഏറ്റവും വലിയ വിസ്മയങ്ങളിൽ ഒന്നാണ് ചീയപ്പാറ- വാളറ വെള്ളച്ചാട്ടങ്ങൾ. കൊച്ചി-മുന്നാർ ദേശീയപാതയ്ക്ക് വശങ്ങളിലായി സ്ഥിതി ചെയ്യുന്ന ഈ ഇരട്ട വെള്ളച്ചാട്ടങ്ങൾ മഴക്കാലത്താണ് അതിൻ്റെ പൂർണ്ണ രൂപത്തിലാകുന്നത്. ഏഴ് തട്ടുകളായി പാറക്കെട്ടുകളിലൂടെ താഴേക്ക് പതിക്കുന്ന ചീയപ്പാറ വെള്ളച്ചാട്ടം റോഡരികിൽ നിന്ന് തന്നെ ആസ്വദിക്കാനാകും. കോടമഞ്ഞും പച്ചപ്പും നിറഞ്ഞ കാടും ഈ യാത്രയുടെ പ്രത്യേകതയാണ്.

സൂചിപ്പാറ വെള്ളച്ചാട്ടം

സെൻ്റിനൽ റോക്ക് വെള്ളച്ചാട്ടം എന്നും അറിയപ്പെടുന്ന സൂചിപ്പാറ വയനാട്ടിലെ മേപ്പാടിക്ക് അടുത്താണ് സ്ഥിതി ചെയ്യുന്നത്. മൂന്ന് തട്ടുകളായി 200 മീറ്ററോളം ഉയരത്തിൽ നിന്നാണ് ഇത് താഴേക്ക് പതിക്കുന്നത്. പച്ചനിറത്തിലുള്ള തേയിലത്തോട്ടങ്ങൾക്ക് ഇടയിലൂടെയുള്ള യാത്രയും കാടിനുള്ളിലൂടെയുള്ള ചെറിയ ട്രെക്കിംഗും വെള്ളച്ചാട്ടത്തിന്റെ വന്യമായ ഭംഗിയും മൺസൂൺ യാത്രികർക്ക് മറക്കാനാവാത്ത ഓർമ്മകൾ സമ്മാനിക്കും.

പാലരുവി വെള്ളച്ചാട്ടം

കൊല്ലം ജില്ലയിലെ ആര്യങ്കാവിന് അടുത്തുള്ള പാലരുവി ഇന്ത്യയിലെ തന്നെ ഏറ്റവും ഉയരമുള്ള വെള്ളച്ചാട്ടങ്ങളിൽ ഒന്നാണ്. കാനനത്തിനുള്ളിലെ കരിമ്പാറക്കൂട്ടങ്ങളിലൂടെ പാൽ ഒഴുകുന്നത് പോലെ പതിക്കുന്നത് കൊണ്ടാണ് ഇതിന് പാലരുവി എന്ന് പേര് തന്നെ ലഭിച്ചത്. പശ്ചിമഘട്ടത്തിലെ ഔഷധസസ്യങ്ങളെ സ്പർശിച്ച് ഒഴുകിവരുന്ന വെള്ളമായതുകൊണ്ട് തന്നെ ഇതിൽ കുളിക്കുന്നത് ആരോഗ്യത്തിന് നല്ലതാണെന്നൊരു വിശ്വാസം പണ്ടുമുതൽക്കെ കേട്ടുകേൾവിയുണ്ട്.

നിർദ്ദേശങ്ങൾ കർശനമായി പാലിക്കുക

വഴുക്കലുള്ള പാറകൾ: മഴയുള്ളപ്പോൾ വെള്ളച്ചാട്ടങ്ങൾക്ക് സമീപമുള്ള പാറകളിൽ നല്ല വഴുക്കലുണ്ടാകും. സുരക്ഷാ വേലികൾ മറികടന്ന് ചിത്രങ്ങൾ എടുക്കാൻ ശ്രമിക്കരുത്.

അപ്രതീക്ഷിത കുത്തൊഴുക്ക്: മലയോര മേഖലകളിൽ ശക്തമായ മഴ പെയ്യുമ്പോൾ നിമിഷ നേരം കൊണ്ട് വെള്ളച്ചാട്ടങ്ങളിൽ വെള്ളം ഉയരാനും കുത്തൊഴുക്കുണ്ടാകാനും സാധ്യതയുണ്ട്. അതിനാൽ വനംവകുപ്പ് അനുവദിച്ച സുരക്ഷിത സ്ഥാനങ്ങളിൽ മാത്രം നിൽക്കുക.

യാത്രാ നിയന്ത്രണങ്ങൾ: അതിശക്തമായ മഴയുള്ള ദിവസങ്ങളിൽ മലയോര മേഖലകളിലേക്ക് രാത്രികാല യാത്രാ നിരോധനവും വെള്ളച്ചാട്ടങ്ങളിലേക്ക് താൽക്കാലിക പ്രവേശന വിലക്കും ഉണ്ടാകാറുണ്ട്. യാത്ര തിരിക്കും മുൻപ് പ്രാദേശിക വാർത്തകളും ടൂറിസം വകുപ്പിന്റെ അപ്‌ഡേറ്റുകളും പരിശോധിക്കുക.

English Summary:

Best Waterfalls in Kerala to Visit in This Rainy Season 2026. Here Is The Ultimate Monsoon Travel Guide For Travelers And Safety Precuations We Know Before Trip.

മഴക്കാലത്തെ യാത്രകൾ ഇഷ്ടപ്പെടുന്നവർക്ക് ഒരൊറ്റ മൈൻഡിൽ പോകാൻ പറ്റിയ സ്വർഗ്ഗഭൂമിയാണ് മഹാരാഷ്ട്രയിലെ മതേരാൻ (Matheran). മുംബൈയിൽ നിന്നും പൂനെയിൽ നിന്നും വളരെ എളുപ്പത്തിൽ എത്തിച്ചേരാൻ പറ്റുന്ന ഈ മലയോര പ്രദേശം വെറുമൊരു ഹിൽ സ്റ്റേഷൻ മാത്രമല്ല. ഇന്ത്യയിലെ, പച്ചപ്പ് നിറഞ്ഞ, വായുമലിനീകരണം എന്താണെന്ന് പോലും അറിയാത്ത ഒരേയൊരു ഹിൽ സ്റ്റേഷനാണ് മതേരാൻ. കാരണം വേറൊന്നുമല്ല, ഈ പ്രദേശത്ത് വണ്ടികൾക്ക് കയറി ചെല്ലാൻ അനുവാദമില്ല. ഹോണടിയുടെ ബഹളങ്ങളോ കരിപ്പുകയോ ഇല്ലാതെ, കോടമഞ്ഞും തോരാത്ത മഴയും ടോയ് ട്രെയ്ൻ യാത്രയിലൂടെയും മറ്റും മതേരാനിലെ മഴക്കാല കാഴ്ചകൾ കാണാൻ പോയാലോ.

ALSO READ: കാലവർഷം ദാ എത്തി! യാത്രയ്ക്ക് മുമ്പ് ഈ സാധനങ്ങൾ പാക്ക് ചെയ്യാൻ മറക്കരുത്; ശ്രദ്ധിക്കുക

മതേരാനിൽ വണ്ടികൾക്ക് വിലക്ക്

കേന്ദ്ര പരിസ്ഥിതി മന്ത്രാലയം മതേരാനെ ഒരു എക്കോ-സെൻസിറ്റീവ് സോൺ ആയി പ്രഖ്യാപിച്ചിട്ടുള്ളതാണ്. അതുകൊണ്ട് തന്നെ മതേരാന്റെ അതിർത്തിയായ 'ദസ്തൂരി പോയിൻ്റ്' (Dasturi Point) കഴിഞ്ഞാൽ അങ്ങോട്ട് ഒരു മോട്ടോർ വാഹനത്തിനും പോലും പ്രവേശിക്കാനാകില്ല. നിങ്ങൾ സ്വന്തം വണ്ടിയിലോ ടാക്സിയിലോ പോയാലും ദസ്തൂരി പോയിൻ്റിൽൽ വണ്ടി പാർക്ക് ചെയ്യണം. അവിടെ നിന്ന് മതേരാൻ ടൗണിലേക്ക് 3 കിലോമീറ്ററോളം ദൂരമുണ്ട്. ഈ ദൂരം സഞ്ചരിക്കാൻ മൂന്ന് വഴികളുണ്ട്. ഒന്ന് പ്രകൃതിയുടെ സൗന്ദര്യം ആസ്വദിച്ച് കാട്ടിലൂടെ നടക്കുക, കുതിരപ്പുറത്ത് യാത്ര ചെയ്യുക, മനുഷ്യർ വലിക്കുന്ന റിക്ഷകളെ ആശ്രയിക്കുക ഇതാണ് ആ മൂന്ന് വഴികൾ.

കോടമഞ്ഞിലൂടെ ഒരു ടോയ് ട്രെയിൻ യാത്ര

മതേരാനിലെ ഏറ്റവും വലിയ ആകർഷണം അവിടുത്തെ ഹെറിറ്റേജ് ടോയ് ട്രെയിൻ യാത്ര ആണ്. മലനിരകളെ ചുറ്റിപ്പിണഞ്ഞ് പോകുന്ന ഈ തീവണ്ടിയിൽ ഇരുന്നുകൊണ്ട് മഴക്കാഴ്ചകൾ കാണുന്നത് ഒരു പ്രത്യേക അനുഭവമാണ്. ശക്തമായ മഴയുള്ള ജൂൺ മുതൽ സെപ്റ്റംബർ വരെയുള്ള മാസങ്ങളിൽ സുരക്ഷാ കാരണങ്ങളാൽ നെരാലിൽ നിന്നുള്ള മെയിൻ ടോയ് ട്രെയിൻ സർവീസ് നിർത്തിവെക്കാറുണ്ട്. എങ്കിലും, ദസ്തൂരി പോയിൻ്റിനടുത്തുള്ള അമൻ ലോഡ്ജ് മുതൽ മതേരാൻ സ്റ്റേഷൻ വരെയുള്ള ഷട്ടിൽ ടോയ് ട്രെയിൻ സർവീസുകൾ മഴക്കാലത്തും സർവീസ് നടത്താറുണ്ട്.

കണ്ടിരിക്കേണ്ട പ്രധാന കാഴ്ച്ചകൾ

ലൂയിസ പോയിന്റ്: മതേരാനിലെ ഏറ്റവും പ്രശസ്തമായ പോയിൻ്റാണിത്. മഴക്കാലത്ത് പ്രകൃതി ഒരുക്കുന്ന പച്ചപ്പും താഴ്‌വാരങ്ങളിലെ വെള്ളച്ചാട്ടങ്ങളും ഇവിടെ നിന്ന് വ്യക്തമായി കാണാനാകും. ഇവിടുത്തെ 'റിവേഴ്സ് വാട്ടർ ഫാൾ' മഴക്കാലത്തെ ഏറ്റവും വലിയ ഒരു അത്ഭുതമാണ്.

ഷാർലറ്റ് തടാകം: മതേരാന് കുടിവെള്ളം നൽകുന്ന മനോഹരമായ തടാകമാണിത്. മഴയത്ത് കോടമഞ്ഞ് വന്ന് തടാകത്തെ മൂടുന്ന കാഴ്ച ക്യാമറകളിൽ പകർത്താൻ സഞ്ചാരികളുടെ വലിയ തിരക്കാണ് ഇവിടെ അനുഭവപ്പെടുന്നത്.

പനോരമ പോയിൻ്റ്: ചുറ്റുമുള്ള മലനിരകളുടെ 360 ഡിഗ്രി ദൃശ്യം സമ്മാനിക്കുന്ന ഒരിടം. ട്രെക്കിംഗ് ഇഷ്ടപ്പെടുന്നവർക്ക് പറ്റിയ പാതയാണിത്.

മഴക്കാലയാത്രയിൽ ശ്രദ്ധിക്കേണ്ടത്

മതേരാനിലെ മണ്ണ് ചുവന്ന മണ്ണാണ്. മഴ പെയ്യുമ്പോൾ ഇത് നല്ലതുപോലെ വഴുക്കാൻ സാധ്യതയുണ്ട്. അതുകൊണ്ട് ട്രെക്കിംഗിന് അനുയോജ്യമായ, പാദരക്ഷകൾ ശ്രദ്ധിക്കുക.

മതേരാനിൽ എപ്പോൾ വേണമെങ്കിലും കനത്ത മഴയ്ക്ക് സാധ്യതയുണ്ട്. കുടയേക്കാൾ നല്ലത് റെയിൻകോട്ട് ആയിരിക്കും. ഫോണും ക്യാമറയും നനയാതിരിക്കാൻ വാട്ടർപ്രൂഫ് പൗച്ചുകൾ കരുതുക.

English Summary:

Check out our ultimate 2026 Matheran monsoon travel guide. Discover how to plan your weekend trip from Mumbai or Pune, updated Dasturi Point parking rules and shuttle toy train availability in rainy season.

വേനൽച്ചൂടിന് വിരാമമിട്ട് കേരളത്തിലേക്ക് കാലവർഷം എത്താൻ തയ്യാറെടുക്കുകയാണ്. കാലാവസ്ഥ വകുപ്പിൻ്റെ പ്രവചനം അനുസരിച്ച്, നാളെ മുതൽ കാലവർഷം സംസ്ഥാനത്ത് എത്തുമെന്നാണ് പ്രവചിക്കുന്നത്. മിക്ക ജില്ലകളിലും വരുന്ന അഞ്ച് ദിവസത്തേക്ക് ശക്തമായ അലർട്ടുകളാണ് പ്രഖ്യാപിച്ചിരിക്കുന്നത്. കനത്തുപെയ്യുന്ന മഴയും മൂടൽമഞ്ഞും പച്ചപ്പും നിറഞ്ഞ ഈ സമയത്തെ യാത്രകൾ പ്രകൃതിയുടെ ഏറ്റവും മനോഹരമായ ദൃശ്യങ്ങളാണ് നമുക്ക് സമ്മാനിക്കുന്നത്. എന്നാൽ, കൃത്യമായ പ്ലാനിംഗും പാക്കിങ്ങും ഇല്ലെങ്കിൽ കനത്ത മഴ നിങ്ങളുടെ യാത്രായുടെ എല്ലാ രസവും ഇല്ലാതാക്കിയേക്കാം. മഴക്കാല യാത്രകൾ സുരക്ഷിതവും ആസ്വാദ്യകരവുമാക്കാൻ ബാഗ് പാക്ക് ചെയ്യുമ്പോൾ അറിഞ്ഞിരിക്കേണ്ട പാക്കിങ് ടിപ്പുകൾ നമുക്ക് നോക്കാം.

ALSO READ: വൈശാലി ഗുഹയും ചെറുതോണി അണക്കെട്ടും കാണണോ; നേരെ വിട്ടോ, കൂടുതലറിയാം

ബാഗിൽ കരുതേണ്ട അത്യാവശ്യ സാധനങ്ങൾ

വാട്ടർപ്രൂഫ് ബാഗുകൾ

നിങ്ങളുടെ വിലപിടിപ്പുള്ള മൊബൈൽ ഫോൺ, പവർ ബാങ്ക്, ക്യാമറ, പാസ്‌പോർട്ട്, പണം എന്നിവ നനയാതിരിക്കാൻ സിപ്‌ലോക്ക് കവറുകളിലോ വാട്ടർപ്രൂഫ് ഡ്രൈ പാക്കുകളിലോ പൊതിഞ്ഞ് ലഗേജിൽ വെയ്ക്കുക. വലിയ ട്രാവൽ ബാഗുകൾക്ക് മുകളിലിടാൻ ഒരു റെയിൻ കവർ കരുതുന്നത് ലഗേജ് മുഴുവൻ നനയുന്നത് തടയും.

പെട്ടെന്ന് ഉണങ്ങുന്ന വസ്ത്രം

മഴക്കാലത്ത് ജാക്കറ്റുകളും കട്ടിയുള്ള ജീൻസുകളും പരമാവധി ഒഴിവാക്കുക. നനഞ്ഞാൽ പെട്ടെന്ന് ഉണങ്ങുന്ന നൈലോൺ, പോളിസ്റ്റർ അല്ലെങ്കിൽ ലൈറ്റ് കോട്ടൺ വസ്ത്രങ്ങൾ തിരഞ്ഞെടുക്കാവുന്നതാണ്. ഇവ ബാഗിനുള്ളിൽ കുറഞ്ഞ സ്ഥലം മാത്രമേ എടുക്കൂകയുള്ളൂ. അതിനാൽ കൊണ്ടുപോകാനും വളരെ എളുപ്പമാണ്. കൂടാതെ പെട്ടെന്ന് ഉണക്കാൻ സാധിക്കുന്നതിനാൽ ഈർപ്പം കാരണം വസ്ത്രങ്ങളിൽ ദുർഗന്ധം ഉണ്ടാകുന്നത് തടയുകയും ചെയ്യും. ഒരു നല്ല റെയിൻകോട്ട് അല്ലെങ്കിൽ കുട എപ്പോഴും കൈയ്യിൽ കരുതാവുന്നതാണ്.

വഴുക്കലില്ലാത്ത പാദരക്ഷകൾ

മഴയത്ത് ലെതർ ചെരിപ്പുകളോ പെട്ടെന്ന് വെള്ളം വലിച്ചെടുക്കുന്ന സ്നീക്കറുകളോ ഉപയോഗിക്കുന്നത് വലിയ അബദ്ധമാണ്. റബ്ബർ അല്ലെങ്കിൽ ഫ്ലോട്ടർ ടൈപ്പ് ആയ, നല്ല ഗ്രിപ്പുള്ള വാട്ടർപ്രൂഫ് ചെരിപ്പുകൾ ധരിക്കാൻ ശ്രമിക്കണം. ഷൂപോലുള്ള പാദരക്ഷകൾ ഒവിവാക്കുക. പെട്ടെന്ന് ഉണങ്ങുന് ഈർപ്പം തങ്ങിനിൽക്കാത്തവയാണ് ഏറ്റവും നല്ലത്. ഇത് വഴുക്കലുള്ള വഴികളിൽ വീഴാതെ നടക്കാൻ സഹായിക്കും.

മെഡിക്കൽ കിറ്റ്

മഴക്കാലം പകർച്ചവ്യാധികളുടെയും കൊതുകുകടിയുടെയും സമയമാണ്. പനി, ജലദോഷം, വയറുവേദന, തുടങ്ങി നിരവധി അസുഖങ്ങളും മഴ്ക്കാലത്ത് ഒപ്പമെത്തും. അതിനാൽ നിങ്ങളുടെ കൈവശം ഒആർഎസ് പാക്കറ്റുകൾ, ബാൻഡേജ്, അത്യാവശ്യ മരുന്നുങ്ങൾ തുടങ്ങിയവ കൈയ്യിൽ കരുതണം. വനപ്രദേശങ്ങളിലോ മലയോര മേഖലകളിലോ ആണ് യാത്രയെങ്കിൽ കൊതുകിൻ്റെ ആക്രമണത്തിൽ നിന്ന് രക്ഷപ്പെടാനുള്ളവ കരുതുക.

മൈക്രോഫൈബർ ടവ്വലുകൾ

സാധാരണ കോട്ടൺ തോർത്തുകൾക്ക് പകരം മൈക്രോഫൈബർ ടവ്വലുകൾ ഉപയോ​ഗിക്കുന്നതാണ് മഴസമയത്തുള്ള യാത്രയിൽ നല്ലത്. ഇവയ്ക്ക് വെള്ളം പെട്ടെന്ന് വലിച്ചെടുക്കാനുള്ള ശേഷിയുണ്ട്, കൂടാതെ വളരെ ചെറിയ രീതിയിൽ മടക്കി ബാഗിന്റെ സൈഡ് പോക്കറ്റിൽ സൂക്ഷിക്കാനും സാധിക്കും. മഴ നനഞ്ഞാലും അവയ്ക്ക് ഭാരം തോന്നിക്കത്തുമില്ല.

മഴക്കാല യാത്രയിൽ ശ്രദ്ധിക്കേണ്ടത്

യാത്ര തിരിക്കുന്നതിന് മുൻപ് സംസ്ഥാന ദുരന്തനിവാരണ അതോറിറ്റി നൽകുന്ന റെഡ്/ഓറഞ്ച് അലർട്ടുകൾ കൃത്യമായി പരിശോധിക്കുക. ഉരുൾപൊട്ടൽ സാധ്യതയുള്ള സമയങ്ങളിലെ മലയോര യാത്രകൾ പൂർണ്ണമായും ഒഴിവാക്കുക.

മഴക്കാലത്ത് പുറത്തുനിന്നുള്ള ‌ഭക്ഷണങ്ങളും പച്ചവെള്ളവും കുടിക്കുന്നത് ഒഴിവാക്കണം. കാരണം ടൈഫോയ്ഡ്, കോളറ തുടങ്ങിയ ജലജന്യ രോഗങ്ങൾ വരാൻ സാധ്യതയുണ്ട്. തിളപ്പിച്ചാറിയ വെള്ളം എപ്പോഴും കൈയ്യിൽ കരുതുക.

English Summary:

Monsoon has officially arrived in Kerala from tomorrow June 3. Before your Trip In rain day here is the monsoon packing guide featuring the ultimate list of essential items.

കേരളത്തിലെ കണ്ടിരിക്കേണ്ട ദൃശ്യവിസ്മയങ്ങളിൽ ഒന്നാണ് ഇടുക്കിയിലെ പ്രകൃതി ഒരുക്കിയിരിക്കുന്ന വിസ്മയ കാഴ്ചകൾ. കനത്ത സുരക്ഷാ കാരണങ്ങളാൽ വർഷത്തിൽ ചില പ്രത്യേക സീസണുകളിലും അവധിക്കാലങ്ങളിലും മാത്രമായിരുന്നു മുൻപ് ഇടുക്കി ഡാം പൊതുജനങ്ങൾക്കായി തുറന്നുകൊടുത്തിരുന്നതെങ്കിൽ, ഇപ്പോൾ ആഴ്ചയ്യൽ ആറ് ദിവസവും സന്ദർശകർക്ക് പ്രവേശനം അനുവദിക്കുന്നുണ്ട്. ഈ വർഷം ആദ്യമായി കുറച്ച് ദിവസങ്ങൾക്ക് മുമ്പാണ് ഇടുക്കി അണക്കെട്ട് സഞ്ചാരികൾക്കായി തുറന്നുകൊടുത്തത്. തദ്ദേശീയർക്ക് പുറമേ, സംസ്ഥാനത്തിന്റെ വിവിധ ഭാഗങ്ങളിൽ നിന്നും അയൽ സംസ്ഥാനങ്ങളിൽ നിന്നും എത്തുന്ന വിനോദ സഞ്ചാരികൾക്ക് ഇപ്പോൾ ഇടുക്കി ആർച്ച് ഡാം കാണാൻ സാധിക്കുന്നതാണ്.

ചെറുതോണി അണക്കെട്ടിന്റെ പ്രകൃതിഭംഗി ആസ്വദിക്കാനും, മനോഹരമായ ഇടുക്കി തടാകത്തിലെ ബോട്ടിംഗ് സവാരി നടത്താനും വനം വകുപ്പ് വിനോദസഞ്ചാരികൾക്ക് അവസരമൊരുക്കിയിട്ടുണ്ട്. രാവിലെ 9 മുതൽ വൈകുന്നേരം അഞ്ച് മണി വരെ ബോട്ടിംഗ് സൗകര്യം ലഭിക്കുന്നതാണ്. മുതിർന്നവർക്ക് 178 രൂപയും 12 വയസ്സിന് താഴെയുള്ള കുട്ടികൾക്ക് 85 രൂപയുമാണ് ബോട്ടിങ്ങിന് ഈടാക്കുന്നത്. അര മണിക്കൂറാണ് ബോട്ട് യാത്ര ക്രമീകരിച്ചിരിക്കുന്നത്. നിലവിൽ പതിനെട്ട് പേരെ ഒരേസമയം കൊണ്ടുപോകാൻ കഴിയുന്ന ബോട്ടാണ് ഇവിടെയുള്ളത്. വെള്ളാപ്പാറ ബോട്ട് ജെട്ടിയിൽ നിന്ന് ആരംഭിക്കുന്ന യാത്രയിൽ പ്രധാനമായും ഇടുക്കി, ചെറുതോണി അണക്കെട്ട്. വൈശാലി ഗുഹ എന്നീ വിസ്മയ കാഴ്ചകൾ കാണാം.

ALSO READ: മാലിദ്വീപിലേക്കല്ല ഇനി ലക്ഷദ്വീപിലേക്ക്; യാത്രാസമയം പകുതിയാകും, പറന്നിറങ്ങാൻ സീപ്ലെയിൻ

ഇടുക്കി പദ്ധതിയുടെ തുടക്കം മുതലുള്ള ചരിത്രം വിനോദസഞ്ചാരികൾക്ക് പകർന്നുനൽകാൻ ബോട്ട് ജീവനക്കാരും യാത്രക്കാരോടൊപ്പം ഉണ്ടാകും. ആനകൾ ഉൾപ്പെടെയുള്ള വന്യമൃഗങ്ങളെയും ബോട്ട് യാത്രയിൽ കാണാൻ കഴിയും. 2015 മുതൽ പദ്ധതി നിലവിലുണ്ടെങ്കിലും, ഇതിന് വേണ്ടത്ര പ്രചാരണം ലഭിച്ചിട്ടില്ല, അതിനാൽ അധികം വിനോദസഞ്ചാരികൾ ഇവിടെ എത്താറില്ല. പാറേമ്മാവിൽ കൊളുമ്പൻ സമാധിക്ക് എതിർവശത്തുള്ള കൗണ്ടറിൽ നിന്നാണ് ബോട്ടിങ്ങിനുള്ള ടിക്കറ്റുകൾ വാങ്ങേണ്ടത്. ബോട്ട് ജെട്ടിയിലെത്തിയ ശേഷം സവാരി ആരംഭിക്കാം.

എന്താണ് വൈശാലി ​ഗുഹ?

1988-ൽ ഭരതൻ സംവിധാനം ചെയ്ത 'വൈശാലി' എന്ന ഇതിഹാസ സിനിമയിലെ സുപ്രധാന രംഗങ്ങൾ ചിത്രീകരിച്ചത് ഇടുക്കി ഡാമിന് സമീപമുള്ള ഈ ഗുഹയിൽ വച്ചാണ്. ചെറുതോണി അണക്കെട്ടിൽ നിന്നും ഇടുക്കി ആർച്ച് ഡാമിലേക്ക് പോകുന്ന വഴിക്കാണ് കരിമ്പാറ തുരന്നുണ്ടാക്കിയ ഈ മനോഹരമായ ഗുഹ സ്ഥിതി ചെയ്യുന്നത്. ഒരു വശത്ത് തടാകത്തിൻ്റെ നീലനിറവും മറുവശത്ത് ഭീമാകാരമായ കരിമ്പാറക്കൂട്ടങ്ങളും ഈ ഗുഹയിലെത്തിയാൽ നിങ്ങൾക്ക് കാണാൻ സാധിക്കും. വൈശാലി ചിത്രം പുറത്തിറങ്ങിയ ശേഷം പിന്നീട് ഈ ​ഗുഹ അറിയപ്പെടുന്നത് വൈശാലി ​ഗുഹ എന്ന പേരിലാണ്.

ഡാമിലേക്കുള്ള ടിക്കറ്റ്

ഡാം സന്ദർശനത്തിനായുള്ള ടിക്കറ്റുകൾ കവാടത്തിലെ കൗണ്ടറുകളിൽ നിന്ന് നേരിട്ടോ അല്ലെങ്കിൽ ജലവിഭവ വകുപ്പിന്റെ പോർട്ടൽ വഴിയോ ബുക്ക് ചെയ്യാവുന്നതാണ്. വിനോദ സഞ്ചാരികൾക്ക് ഡാമിന് മുകളിലേക്ക് മൊബൈൽ ഫോണുകൾ, ക്യാമറകൾ, ബാഗുകൾ, മറ്റ് ഇലക്ട്രോണിക് ഉപകരണങ്ങൾ എന്നിവ കൊണ്ടുപോകാൻ അനുവാദമില്ല. ഇവ കവാടത്തിലെ സുരക്ഷിതമായ കൗണ്ടറുകളിൽ സൂക്ഷിക്കേണ്ടതാണ്. എറണാകുളത്ത് നിന്ന് വരുന്നവർക്ക് കോതമംഗലം, അടിമാലി അല്ലെങ്കിൽ മുവാറ്റുപുഴ, വണ്ണപ്പുറം വഴി ഏകദേശം 110 കിലോമീറ്റർ ദൂരമുണ്ടാകും ഇവിടേക്ക്. കോട്ടയത്ത് നിന്ന് വരുന്നവർക്ക് നേരെ പാലാ, തൊടുപുഴ വഴി 100 കിലോമീറ്റർ സഞ്ചരിച്ചാൽ ഡാമിലേക്ക് എത്തിച്ചേരാനാകും.

ENGLISH SUMMARY:

Explore and know about travel guide to visiting the Idukki Arch Dam also known as Cheruthoni Dam, and the iconic Vaisali Cave. Check the entry timings, ticket prices, boating details, and security guidelines before your trip.

ലക്ഷദ്വീപ് വിനോദസഞ്ചാര മേഖലയിൽ വിപ്ലവകരമായ മാറ്റങ്ങൾക്ക് വഴിയൊരുക്കിക്കൊണ്ട് ആറ് ദ്വീപുകളിൽ 'വാട്ടർ എയ്റോഡ്രോം' പദ്ധതികൾക്ക് കേന്ദ്ര പരിസ്ഥിതി മന്ത്രാലയത്തിന് കീഴിലുള്ള വിദഗ്ധ സമിതി പാരിസ്ഥിതിക അനുമതി നൽകാൻ ശുപാർശ ചെയ്തതായി ദേശീയ മാധ്യമങ്ങൾ റിപ്പോർട്ട് ചെയ്തു. മാലിദ്വീപ് മോഡലിൽ കടലിൽ നിന്ന് നേരിട്ട് പറന്നുയരാനും കടൽത്തിരമാലകളിൽ പറന്നിറങ്ങാനും കഴിയുന്ന സീപ്ലെയിൻ സർവീസുകളാണ് ലക്ഷദ്വീപിൽ യാഥാർത്ഥ്യമാകാൻ പോകുന്നത്. കേരളത്തിൽ നിന്നും മറ്റ് നാടുകളിൽ നിന്നും ലക്ഷദ്വീപിലേക്ക് യാത്ര ചെയ്യാൻ ആഗ്രഹിക്കുന്ന വിനോദസഞ്ചാരികൾക്ക് ഏറ്റവും മികച്ച അനുഭവമാകും ഇതിലൂടെ ലഭിക്കുക.

കൊച്ചിയെ ലക്ഷദ്വീപിലെ ആറ് പ്രധാന ദ്വീപുകളായ കവരത്തി, കൽപേനി, കിൽത്താൻ, കടമത്ത്, മിനിക്കോയ്, അഗത്തി എന്നിവയുമായി ബന്ധിപ്പിക്കുന്നതാണ് പുതിയ സീപ്ലെയിൻ പദ്ധതി. ഇന്ത്യയിലെ ഏറ്റവും മനോഹരമായ ഈ ദ്വീപസമൂഹത്തിലേക്കുള്ള വിനോദസഞ്ചാരികളുടെ യാത്രയെ ഇത് പൂർണ്ണമായും മാറ്റിമറിക്കും. നിലവിൽ അഗത്തിയിലേക്കുള്ള പരിമിതമായ വിമാന സർവീസുകൾ മാത്രമാണുള്ളത്. ഇതുകൂടാതെ കൊച്ചിയിൽ നിന്നുള്ള നീണ്ട കപ്പൽ യാത്രകളെയുമാണ് വിനോദസഞ്ചാരികൾ ആശ്രയിക്കുന്നത്. അതുകൊണ്ടുതന്നെ പല ദ്വീപുകളിലേക്കും എത്തിപ്പെടുക പലപ്പോഴും ബുദ്ധിമുട്ടുള്ള കാര്യമാണ്. എന്നാൽ സീപ്ലെയിനുകൾ വരുന്നതോടെ ഈ ബുദ്ധിമുട്ടുകളും കുറയുകയും കുറഞ്ഞ സമയത്തിനുള്ളിൽ ലക്ഷദ്വീപിലേക്ക് എത്തിച്ചേരാനും സാധിക്കും.

ALSO READ; മഴ പെയ്താൽ കൂടുതൽ സുന്ദരിയാകുന്ന കേരളത്തിലെ കിടിലൻ സ്ഥലങ്ങൾ

മാലിദ്വീപിലെ സീപ്ലേയിൻ

മാലിദ്വീപിലെ സീപ്ലെയിനുകൾക്ക് സമാനമായ രീതിയിലാകും ലക്ഷദ്വീപിലും പദ്ധതി രൂപപ്പെടുത്തുക. എല്ലാ അനുമതികളും ലഭിച്ചാൽ, വിനോദസഞ്ചാരികൾക്ക് മിക്ക ദ്വീപുകളിലേക്കും സുഖകരമായി എത്തിപ്പെടാനാകും. മേയ് 13-ന് കൊച്ചിക്കും ലക്ഷദ്വീപിനുമിടയിൽ ആദ്യത്തെ സീപ്ലെയിൻ പരീക്ഷണ പറക്കൽ വിജയകരമായി പൂർത്തിയാക്കിയിരുന്നു. അഗത്തിയിൽ ആദ്യം ഇറങ്ങിയ വിമാനം പിന്നീട് കവരത്തിക്കടുത്തും സുരക്ഷിതമായി ലാൻഡ് ചെയ്തത് ഈ പദ്ധതിക്ക് കൂടുതൽ ഊന്നൽ നൽകി. കൊച്ചിയിൽ നിന്നുള്ള യാത്രാസമയം പകുതിയായി കുറയ്ക്കാനും സീപ്ലേയിൻ പദ്ധതിക്ക് സാധിക്കും.

എന്താണ് വാട്ടർ എയ്റോഡ്രോമുകൾ?

കടൽ വിമാനങ്ങൾക്കും ആംഫിബിയൻ വിമാനങ്ങൾക്കും (കരയിലും വെള്ളത്തിലും ഇറങ്ങാൻ കഴിയുന്നവ) സുരക്ഷിതമായി ലാൻഡ് ചെയ്യാനും ടേക്ക് ഓഫ് ചെയ്യാനും ആവശ്യമായ സൗകര്യങ്ങളുള്ള, വെള്ളത്തിന് മുകളിൽ തയ്യാറാക്കിയ പ്രത്യേക വിമാനത്താവളങ്ങളെയാണ് വാട്ടർ എയ്‌റോഡ്രോമുകൾ എന്ന് അറിയപ്പെടുന്നത്. സാധാരണ വിമാനത്താവളങ്ങൾക്ക് കോൺക്രീറ്റ് റൺവേകൾ വേണമെങ്കിൽ, വാട്ടർ എയ്‌റോഡ്രോമുകൾക്ക് 'വാട്ടർ റൺവേ' ആണുള്ളത്. അതായത്, വിമാനങ്ങൾക്ക് ഇറങ്ങാൻ സൗകര്യപ്രതമായ രീതിയിൽ, കൃത്യമായി അടയാളപ്പെടുത്തിയ ജലാശയത്തിലെ ഭാ​ഗം.

വിമാനത്തിൽ നിന്ന് യാത്രക്കാർക്ക് സുരക്ഷിതമായി ഇറങ്ങാനും കയറാനും ഇവിടെ സൗകര്യമുണ്ടാകും. കടലിലോ കായലിലോ വിമാനം ഇറങ്ങേണ്ട ഭാഗം പ്രത്യേക ഫ്ലോട്ടുകൾ ഉപയോഗിച്ച് അടയാളപ്പെടുത്തിയിരിക്കും. യാത്രക്കാരുടെ സുരക്ഷാ പരിശോധനയ്ക്കും വിശ്രമിക്കുന്നതിനുമായി കരയിൽ തന്നെ ചെറിയ ടെർമിനലുകൾ ഉണ്ടായിരിക്കും. ദ്വീപുകളിലെയും തീരപ്രദേശങ്ങളിലെയും പ്രകൃതി ഭംഗി നശിപ്പിക്കാതെ കോൺക്രീറ്റ് കെട്ടിടങ്ങളോ മറ്റോ ഇല്ലാതെ തന്നെ യാത്രാ സൗകര്യം സുഖപ്പെടുത്താനാകും.

അഗത്തി, കൽപേനി, കിൽത്താൻ എന്നിവിടങ്ങളിൽ പ്രതിവർഷം 8,000 യാത്രക്കാർ ലക്ഷദ്വീപിലേക്ക് എത്തിയേക്കാമെന്നാണ് പ്രതീക്ഷിക്കുന്നത്. ഈ പദ്ധതി യാഥാർത്ഥ്യമായാൽ ദ്വീപുകൾക്കിടയിലുള്ള യാത്രാസമയം ഗണ്യമായി കുറയുമെന്ന് മാത്രമല്ല, നിലവിൽ എത്തിപ്പെടാൻ ബുദ്ധിമുട്ടുള്ള വിദൂര പ്രദേശങ്ങളിലേക്ക് യാത്ര എളുപ്പമാവുകയും ചെയ്യും.

English Summary:

Boost to tourism and connectivity, the Centre has moved a step closer to launching seaplane operations across the Lakshadweep archipelago. Network will connect Kochi with six islands—Kavaratti, Kalpeni, Kiltan, Kadmat, Minicoy, and Agatti

കേരളത്തിൽ കാലവർഷം ഏകദേശം സജീവമായിക്കഴിഞ്ഞു. ചുട്ടുപൊള്ളുന്ന വേനലിൽ നിന്നും പ്രകൃതി പച്ചപ്പിലേക്ക് വഴിമാറുന്ന മനോഹരമായ കാഴ്ചയാണ് കേരളത്തിൽ ഇപ്പോൾ എവിടെ നോക്കിയാലും. മഴക്കാലത്ത് യാത്ര ചെയ്യാൻ ഇഷ്ടപ്പെടുന്നവർക്ക് കേരളത്തേക്കാൾ മികച്ച മറ്റൊരു സ്ഥലമില്ലെന്ന് തന്നെ പറയാം. മലനിരകളും തോട്ടങ്ങളും കോടമഞ്ഞും, കായലുകളും കടലുകളും എന്നിങ്ങനെ ഓരോ സ്ഥലങ്ങളും അതിമനോഹരമായി കാണപ്പെടുന്നത് മഴക്കാലത്താണ്. മഴയുടെ ഭം​ഗിയും കാടിൻ്റെ ഒത്തുചേരുന്ന കേരളത്തിലെ ഹിൽ സ്റ്റേഷനുകൾ മഴ പെയ്യുമ്പോൾ കൂടുതൽ സുന്ദരിമാരാകും. ഈ മൺസൂൺ സീസണിൽ നിങ്ങൾക്ക് സുരക്ഷിതമായി പോയി വരാൻ പറ്റിയ ചില സ്ഥലങ്ങൾ ഏതെല്ലാമെന്ന് നമുക്ക് നോക്കാം.

ALSO READ: കൈയടിച്ചാൽ കുമിളകൾ പൊന്തിവരും!; ഗോവയിലെ ഈ അത്ഭുത തടാകം കണ്ടിട്ടുണ്ടോ?

മൂന്നാർ

മഴക്കാലത്ത് മൂന്നാറിൻ്റെ ഭംഗി വാക്കുകളാൽ തീർക്കാവുന്നതല്ല. മഴ പെയ്തിറങ്ങുമ്പോൾ തേയിലത്തോട്ടങ്ങളും കണ്ണെത്താ ദൂരത്ത് തലയുയർത്തി നിൽക്കുന്ന മരങ്ങളും കൂടുതൽ പച്ചപ്പണിയുന്നത് കാണാം. കൂടെവരുന്ന കോടമഞ്ഞും തണുത്ത കാറ്റും കൂടിയാകുമ്പോൾ മൂന്നാർ ഒരു മാന്ത്രിക ലോകമായി മാറും. ഡ്രൈവ് ചെയ്യാൻ ഇഷ്ടപ്പെടുന്നവർക്ക് മൂന്നാർ റൂട്ടുകളിലെ കാഴ്ച ആസ്വദിക്കാൻ ഇതിലും നല്ലൊരു സമയമില്ല. വലിയ ട്രെക്കിംഗുകൾ ഒഴിവാക്കാൻ ശ്രദ്ധിക്കണം.

വാഗമൺ

കോട്ടയം-ഇടുക്കി അതിർത്തിയിലുള്ള വാഗമൺ മഴക്കാലമായാൽ പിന്നെ സഞ്ചാരികളുടെ പ്രിയപ്പെട്ട ഇടമാണ്. ഇവിടുത്തെ പൈൻ കാടുകളും മൊട്ടക്കുന്നുകളും മഴ പെയ്യുമ്പോൾ തികച്ചും വ്യത്യസ്തമായ രീതിയിലേക്ക് രൂപമാറ്റം നടത്തുന്നു. അഡ്വഞ്ചർ ടൂറിസം താല്പര്യമുള്ളവർക്ക് വാഗമണ്ണിലെ പ്രശസ്തമായ ഗ്ലാസ് ബ്രിഡ്ജുമുണ്ട്. ഇടിമിന്നലുള്ളപ്പോൾ മൊട്ടക്കുന്നുകളിൽ കയറുന്നത് കഴിവതും ഒഴിവാക്കുക.

വയനാട്

മഴക്കാലം അതിൻ്റെ പൂർണ്ണതയിൽ തന്നെ ആസ്വദിക്കണമെങ്കിൽ വയനാട്ടിലേക്ക് വണ്ടി വിടുന്നതാണ് നല്ലത്. പശ്ചിമഘട്ട മലനിരകളുടെ വന്യമായ ഭംഗി മഴക്കാലത്ത് കാണണമെങ്കിൽ വയനാടിൻ്റെ മണ്ണിലെത്തണം. ബാണാസുര ഡാമും പൂക്കോട് തടാകവും വെള്ളത്താൽ മൂടപ്പെട്ട് കിടക്കുന്നത് കാണാൻ ഒരു പ്രത്യേക ഭംഗിയാണ്. ലക്കിടി വ്യൂ പോയിന്റിൽ നിന്നും ചുരമിറങ്ങി വരുന്ന കോടയുടെ കുളിർ അത് വാക്കുകൾക്ക് അതീതമാണ്.

നെല്ലിയാമ്പതി

പാലക്കാട് ജില്ലയിൽ സ്ഥിതി ചെയ്യുന്ന നെല്ലിയാമ്പതി അധികമാരും തിരഞ്ഞെടുക്കാത്ത സ്ഥലമാണ്. എന്നാൽ മഴ ആസ്വദിക്കാൻ പറ്റിയ ഒരിടവും. പോത്തുണ്ടി ഡാമിൻ്റെ ദൃശ്യങ്ങളും കാപ്പി, തേയില എന്നിവയുടെ തോട്ടങ്ങളും പിന്നിട്ടുള്ള ചുരം റൂട്ടുകളും മഴക്കാലത്ത് മറക്കാനാകാത്ത അനുഭവമാണ് നമുക്ക് നൽകുന്നത്.

മൺസൂൺ യാത്രകളിൽ ശ്രദ്ധിക്കേണ്ട മുൻകരുതലുകൾ

• കനത്ത മഴയുള്ളപ്പോൾ ഉൾക്കാടുകളിലേക്കുള്ള യാത്രയും വഴുക്കലുള്ള മലനിരകളിലെ ട്രെക്കിംഗും ഒഴിവാക്കുക.
• മലയോര മേഖലകളിൽ കനത്ത മഞ്ഞും മണ്ണിടിച്ചിൽ സാധ്യതയും ഉള്ളതിനാൽ രാത്രി ശേഷമുള്ള ഡ്രൈവിംഗ് ഒഴിവാക്കുന്നതാണ് സുരക്ഷിതം.
• യാത്ര തിരിക്കുന്നതിന് മുൻപ് അതത് സ്ഥലങ്ങളിലെ ജില്ലാ ഭരണകൂടത്തിന്റെയോ ദുരന്തനിവാരണ അതോറിറ്റിയുടെയോ നിർദ്ദേശങ്ങളും കാലാവസ്ഥാ പ്രവചനങ്ങളും നിർബന്ധമായും പരിശോധിക്കുക.
• കടലിലും പുഴകളിലും ഇറങ്ങുമ്പോൾ പ്രത്യേകം ശ്രദ്ധിക്കണം. മഴക്കാലത്ത് അപ്രതീക്ഷിതമായി ജലനിരപ്പ് ഉയർന്നേക്കാം.
• ഇടിമിന്നൽ ഉള്ള സമയ്ത്ത മലമുകളിലേക്കോ തുറസായ സ്ഥലങ്ങളിലോ നിൽക്കരുത്.

English Summary:

Check out here is the ultimate Kerala Rainy Season Travel Guide 2026. Discover the most beautiful, greeny hill stations and coastal escapes alongside crucial safe routes and driving tips to enjoy the rainy season.

ഗോവ എന്ന് കേൾക്കുമ്പോൾ ഭൂരിഭാഗം പേരുടെയും മനസ്സിലേക്ക് ഓടിയെത്തുക അലയടിക്കുന്ന കടൽത്തീരങ്ങളും, പാർട്ടികളും, നൈറ്റ് ലൈഫുമൊക്കെയാണ്. എന്നാൽ ബീച്ചുകൾക്കപ്പുറം പച്ചപ്പുനിറഞ്ഞ കാടുകളും ഒട്ടനവധി പ്രകൃതി ഒളിപ്പിച്ചു വെച്ചിരിക്കുന്ന അത്ഭുതങ്ങളും ​ഗോവയിലുണ്ട്. അത്തരത്തിൽ സഞ്ചാരികളെയും ശാസ്ത്രലോകത്തെയും ഒരേപോലെ അത്ഭുതപ്പെടുത്തുന്ന ഒന്നാണ് ദക്ഷിണ ഗോവയിലെ 'നെത്രാവലി കുമിള തടാകം' (Netravali Bubbling Lake). സൗത്ത് ഗോവയിലെ സാംഗ്വേ താലൂക്കിലാണ് ഈ തടാകം സ്ഥിതി ചെയ്യുന്നത്. 'ബുഡ്ബുദ്യഞ്ചി താലി’ എന്നാണ് ഈ പ്രതിഭാസത്തെ സഞ്ചാരികൾ വിശേഷിപ്പിക്കുന്നത്. അതായത് 'കുമിളകളുടെ തടാകം' എന്നാണ് അർത്ഥം.

നമ്മൾ കൈയടിക്കുകയോ ഉറക്കെ ശബ്ദമുണ്ടാക്കുകയോ ചെയ്താൽ ഈ തടാകത്തിൻ്റെ അടിത്തട്ടിൽ നിന്നും വലിയ കുമിളകൾ പൊന്തിവരും. കേട്ടാൽ ആർക്കും അത്ഭുതം തോന്നുന്ന ഒരു പ്രതിഭാസമാണ് ഇവിടെ നടക്കുന്നത്. ഈ തടാകത്തിന് ഏകദേശം 400 വർഷത്തിലേറെ പഴക്കമുണ്ടെന്നാണ് പ്രദേശവാസികൾ അഭിപ്രായപ്പെടുന്നത്.

ALSO READ: മഴയത്ത് ഗവി കാണാൻ പോയാലോ?; ഇപ്പോൾ പോയാൽ കാണാം ഈ കാഴ്ച്ചകൾ

തടാകത്തിന്റെ പ്രത്യേകത

ദക്ഷിണ ഗോവയിലെ സാങ്കേം താലൂക്കിലെ നെത്രാവലി എന്ന മനോഹരമായ ഗ്രാമത്തിലാണ് ഗോപിനാഥ് ക്ഷേത്രത്തോട് ചേർന്നുള്ള ഈ കുളം സ്ഥിതി ചെയ്യുന്നത്. പച്ചക്കല്ല് പാകിയതുപോലെ തെളിഞ്ഞ ശാന്തമായ ജലമാണ് ഈ കുളത്തിന്റെ മറ്റൊരു പ്രത്യേകത. എന്നാൽ ഈ തടാകക്കരയിൽ നിന്ന് നമ്മൾ ഉറക്കെ കൈയടിക്കുകയോ, കൂവുകയോ, അല്ലെങ്കിൽ തറയിൽ ശക്തമായി ചവിട്ടുകയോ ചെയ്താൽ നിമിഷങ്ങൾക്കകം കുളത്തിൻ്റെ അടിത്തട്ടിൽ നിന്നും കുമിളകൾ മുകളിലേക്ക് വരുന്നത് കാണാം.

നമ്മൾ ഉണ്ടാക്കുന്ന ശബ്ദത്തിന്റെ തീവ്രത കൂടുന്നതിനനുസരിച്ച് കുമിളകളുടെ എണ്ണവും വേഗതയും കൂടും. ഒരു ചെറിയ കൈയടി പോലും വെള്ളത്തിൽ ചലനങ്ങളുണ്ടാക്കുമെന്നതാണ് പ്രത്യേകത. പലരും ഇതിനെ ഒരു മാന്ത്രിക പ്രതിഭാസമായോ ദൈവീക ശക്തിയായോ ഒക്കെയാണ് കാണാൻ ആ​ഗ്രഹിക്കുന്നത്. എന്നാൽ ഇതിന് പിന്നിൽ വലിയൊരു ശാസ്ത്രമുണ്ട്.

കുമിളകൾക്ക് പിന്നിലെ ശാസ്ത്രം

തടാകത്തിൻ്റെ അടിത്തട്ടിലെ മണ്ണിൽ വൻതോതിൽ മീഥെയ്ൻ അല്ലെങ്കിൽ കാർബൺ ഡയോക്സൈഡ് പോലുള്ള വാതകങ്ങൾ രൂപപ്പെടുന്നുണ്ട്. ഇവ പുറന്തള്ളപ്പെടാൻ കാത്തുനിൽക്കുകയാണ്. നമ്മൾ കൈയടിക്കുമ്പോഴോ ശബ്ദമുണ്ടാക്കുമ്പോഴോ ഉണ്ടാകുന്ന വായുവിലെ ചലനങ്ങളും ശബ്ദതരംഗങ്ങളും തടാകത്തിലെ വെള്ളത്തിനടിയിലേക്ക് പ്രകമ്പനങ്ങൾ എത്തിക്കുന്നു. ഈ പ്രകമ്പനങ്ങൾ അടിത്തട്ടിൽ നിന്നും പുറത്തേക്ക് വരാൻ കാത്തുനിൽക്കുന്ന വാതകങ്ങളെ പെട്ടെന്ന് പുറതെത്തിക്കാൻ പ്രേരിപ്പിക്കുകയും, അവ ജലനിരപ്പിലേക്ക് കുമിളകളായി രൂപപ്പെടുകയും ചെയ്യുന്നു.

നാട്ടുകാരുടെ വിശ്വാസം മറ്റൊരു തരത്തിലാണ്. തടാകത്തിനടിയിൽ ഒരു ദൈവമുണ്ടെന്നും കൈയടിക്കുമ്പോൾ ആ ദൈവം പ്രതികരിക്കുന്നതാണെന്നുമാണ് പ്രദേശവാസികളിൽ ചിലർ വിശ്വസിക്കുന്നത്. ഗോപിനാഥ് ക്ഷേത്രത്തിന്റെ സാമീപ്യം കാരണം ഇതിനെ ശ്രീകൃഷ്ണനുമായി ബന്ധപ്പെടുത്തി കാണുന്നവരും ചെറുതല്ല. കൃത്യമായ ഒരു വിശദീകരണം ഇല്ലാത്തതുകൊണ്ട് തന്നെ ഈ നിഗൂഢത ആസ്വദിക്കാനാണ് പലർക്കും ഇഷ്ടം.

എങ്ങനെ എത്തിച്ചേരാം?

മഡ്ഗാവ് റെയിൽവേ സ്റ്റേഷനിൽ നിന്നും ഏകദേശം 45 കിലോമീറ്റർ ദൂരമുണ്ട് നെത്രാവലിയിലേക്ക്. പനാജിയിൽ നിന്നും ഏകദേശം 70 കിലോമീറ്ററോളം യാത്ര ചെയ്യേണ്ടിവരും. കാടുകൾക്കും തോട്ടങ്ങൾക്കും നടുവിലൂടെയുള്ള മനോഹരമായ യാത്രയാണ് ഇവിടേക്ക് ആളുകളെ ആകർഷിക്കുന്ന മറ്റൊരു ഘടകം. ഗോവയിലെ വന്യജീവി സങ്കേതങ്ങളായ നേത്രാവലി വൈൽഡ് ലൈഫ് സാങ്ച്വറി, പ്രശസ്തമായ സാവരി വെള്ളച്ചാട്ടം എന്നിവയും ഇതിന് അടുത്തുള്ളതാണ്.

English Summary:

With names like Budbud, Budbudyachi Tali, and simply Bubble Lake, Netravali Lake in South Goa already hints at the mystery it holds. Tucked away in the sleepy village of Netravali. Clap your hands or make a sound nearby, and the water suddenly comes alive with fizzing bubbles.

മഴത്തുള്ളികൾ ഇലകളിലും പുൽത്തരികളിലും വീഴുന്ന മനോഹരമായ കാഴ്ച്ചയാണ് മൺസൂൺ കാലം നമുക്ക് സമ്മാനിക്കുന്നത്. കണ്ണെത്താ ദൂരത്തോളം പച്ചപ്പരവതാനി വിരിച്ച കാനനഭംഗി, ജനൽപ്പാളികളിലേക്ക് അരിച്ചുകയറുന്ന തണുത്ത കോടമഞ്ഞ് ഇതെല്ലാം ആസ്വദിക്കാൻ മലയോരമേഖലകൾ തന്നെയാണ് നല്ലത്. ഈ മഴക്കാലത്ത് ചിലവ് കുറഞ്ഞ ഒരു യാത്രയ്ക്കായി ഗവിയിലേക്ക് പോയാലോ. പത്തനംതിട്ട ജില്ലയിലെ പെരിയാർ ടൈഗർ റിസർവിൻ്റെ ഭാഗമായ ഈ സുന്ദരമായ പ്രകൃതിയെ കാണാൻ ഏറ്റവും ഭം​ഗി മഴക്കാലത്താണ്. പക്ഷേ നിങ്ങൾ യാത്ര പോകുന്നതിന് മുമ്പ് അറിയേണ്ടതും പോകേണ്ടതുമായ സ്ഥലങ്ങളെക്കുറിച്ചും വിശദമായി പരിശോധിക്കാം.

ALSO READ: നല്ല മഴയും മഞ്ഞും… ഇഡുക്കി ഡാം കാണാൻ പോയാലോ; സമയവും, ടിക്കറ്റ് നിരക്കും അറിയാം

​ഗവിയിൽ കാണേണ്ട കാഴ്ച്ചകൾ

ഡാമുകളും മൂഴിയാർ വനപാതയും: പത്തനംതിട്ടയിൽ നിന്ന് ആങ്ങമൂഴി വഴി കാടുകയറുമ്പോൾ കക്കി, ആനത്തോട്, മൂഴിയാർ, പമ്പ, ഗവി തുടങ്ങിയ ഡാമുകളുടെ സംഭരണ പ്രദേശങ്ങൾ നമുക്ക് കാണാനാകും. മഴക്കാലത്ത് വെള്ളത്താൽ നിറഞ്ഞുനിൽക്കുന്ന ആ അതിമനോഹരമായ ദൃശ്യം ഏതൊരാൾക്കും മറക്കാനാകാത്ത അനുഭവമാണ്.

വെള്ളച്ചാട്ടങ്ങൾ: വേനലിൽ വറ്റി വരണ്ട കാട്ടരുവികളെല്ലാം മഴ പെയ്യുന്നതോടെ പതഞ്ഞൊഴുകാൻ തുടങ്ങും. വനപാതയിലുടനീളം നിരവധി ചെറുതും വലുതുമായി വെള്ളച്ചാട്ടങ്ങൾ കാണാനാകും. വാഹനങ്ങൾ പോകുന്ന റോഡിലേക്ക് മലവെള്ളപ്പാച്ചിലായി പതിക്കുന്ന വെള്ളച്ചാട്ടം കാണാൻ പ്രത്യേക ഭം​ഗിയാണ്.

കോടമഞ്ഞ് മൂടിയ ഏലത്തോട്ടങ്ങൾ: ഗവിയിലെത്തിയാൽ നിങ്ങളെ സ്വീകരിക്കുക ഏക്കറുകളോളം പരന്നുകിടക്കുന്ന ഏലത്തോട്ടങ്ങളാണ്. മഴപെയ്തു തോരുമ്പോൾ ഇതിനിടയിലൂടെ കോടമഞ്ഞ് അരിച്ചെറങ്ങുന്ന കാഴ്ച കണ്ണുകൾക്ക് വലിയൊരു വിസ്മയമാണ്.

വന്യമൃഗങ്ങളെ കാണാം: മഴക്കാലത്ത് വനത്തിനുള്ളിലെ തടാകങ്ങളിലും മറ്റും വെള്ളം കുടിക്കാനായി ആനക്കൂട്ടങ്ങൾ, കാട്ടുപോത്തുകൾ, അപൂർവ്വ ഇനത്തിൽപ്പെട്ട സിംഹവാലൻ കുരങ്ങുകൾ, മലയണ്ണാൻ എന്നിവ എത്തിപ്പെടാറുണ്ട്. ഇവ പാതയോരങ്ങളിലേക്ക് ഇറങ്ങിവരാനുള്ള സാധ്യത വളരെ കൂടുതലാണ്.

ഗവിയിലേക്ക് എങ്ങനെ എത്തിച്ചേരാം?

യഥാർത്ഥ വന്യത ആസ്വദിക്കാൻ ആ​ഗ്രഹിക്കുന്നവർ ആങ്ങമൂഴി - ഗവി റൂട്ടിലൂടെ പോകണം. പത്തനംതിട്ടയിൽ നിന്ന് ആങ്ങമൂഴി വഴി മൂഴിയാർ കാനനപാതയിലൂടെ ഗവിയിലെത്തിച്ചേരാം. പൂർണ്ണമായും വനത്തിലൂടെയുള്ള യാത്രയാണിത്. സ്വന്തം വാഹനങ്ങൾക്ക് വനംവകുപ്പിന്റെ കർശനമായ നിയന്ത്രണങ്ങളുണ്ട്. ഇനി ഇടുക്കി ഭാഗത്ത് നിന്നും കുമിളിയിൽ നിന്നും വരുന്നവർക്ക് വണ്ടിപ്പെരിയാർ വഴി വള്ളക്കടവ് ചെക്ക്‌പോസ്റ്റ് കടന്ന് എളുപ്പത്തിൽ ഗവിയിലെത്താം. റോഡ് സൗകര്യം താരതമ്യേന മെച്ചപ്പെട്ടത് ഈ റൂട്ടിലാണ്.

പ്രവേശനവും നിയന്ത്രണവും

ഗവി ഒരു സംരക്ഷിത വനമേഖലയായതിനാൽ പാസ് എടുത്ത് വേണം പ്രവേശിക്കാൻ. വനം വകുപ്പിൻ്റെ മുൻകൂട്ടിയുള്ള അനുമതി നിർബന്ധമാണ്. പത്തനംതിട്ട, കുമിലി ഡിപ്പോകളിൽ നിന്ന് ദിവസേന ഗവി വഴി കെഎസ്ആർടിസി സർവീസുകളുണ്ട്. ഇതിൽ പോകുന്നവർക്ക് പ്രത്യേക വനംവകുപ്പിൻ്റെ അനുമതി ആവശ്യമില്ല. ഏറ്റവും ബഡ്ജറ്റ് ഫ്രണ്ട്‌ലിയായി ​ഗവിയിലെത്താനുള്ള മാർ​ഗമാണിത്. സ്വന്തം വാഹനത്തിലാണ് യാത്രയെങ്കിൽ, കേരള വനംവകുപ്പിൻ്റെ ഔദ്യോഗിക വെബ്‌സൈറ്റ് വഴി മുൻകൂട്ടി ബുക്ക് ചെയ്ത് പാസ്സ് സ്വന്തമാക്കണം. ദിവസേന പരിമിതമായ വാഹനങ്ങൾക്ക് മാത്രമെ പ്രവേശനം അനുവദിക്കൂ.

മഴക്കാല യാത്രയിൽ ശ്രദ്ധിക്കേണ്ടത്

• മഴക്കാലത്ത് ഗവിയിൽ അട്ടകളുടെ ശല്യം കൂടുതലായിരിക്കും. ട്രെക്കിംഗിന് ഇറങ്ങുമ്പോൾ ഇവയെ അകറ്റാനുള്ളത് കൈയ്യിൽ കരുതണം.
• വനത്തിനുള്ളിൽ കടകളോ ഹോട്ടലുകളോ ഉണ്ടാവണമെന്നില്ല. കൗണ്ടറിലോ കെഎഫ്ഡിസി സെന്ററിലോ മാത്രമേ ഭക്ഷണം ലഭിക്കൂ.
• പ്ലാസ്റ്റിക് വിമുക്ത മേഖലയാണ് ഗവി. പ്ലാസ്റ്റിക് കുപ്പികളും കവറുകളും കാട്ടിൽ വലിച്ചെറിയുന്നത് കടുത്ത ശിക്ഷാർഹമായ കുറ്റമാണ്.

English Summary:

Pathanamthitta district of Kerala, Gavi is part of the Periyar Tiger Reserve. In this Gavi travel guide, we talk about the best spot and time to visit this place. Here is the complete travel guide and precuations before rainy trip.

മനസ്സിനെ കുളിരണിയിക്കുന്ന മഞ്ഞും തണുത്ത കാറ്റും പെയ്തു തോരാത്ത മഴച്ചാറ്റലും. ഈ ഭം​ഗി ആസ്വദിക്കാൻ മലയോര മേഖലകൾ തന്നെയാണ് എപ്പോഴും നല്ലത്. എന്നാൽ ഈ മഴക്കാലത്ത് ഇടുക്കിയിലെ മലനിരകളിലൂടെ ഒരു യാത്ര പോകുമ്പോൾ ഡാം കൂടി ഒന്ന് കണ്ടാലോ. പ്രകൃതിഭംഗി തുളുമ്പുന്ന ഇടുക്കിയിലേക്ക് ടൂറിസ്റ്റുകളെ ആകർഷിക്കുന്ന ഏറ്റവും പ്രധാനപ്പെട്ട കാഴ്ച്ചകളിലൊന്നാണ് ഏഷ്യയിലെ ആദ്യത്തെ കമാന അണക്കെട്ടായ ഇടുക്കി ഡാം.

സാധാരണയായി വർഷത്തിൽ ചില പ്രത്യേക സീസണുകളിൽ മാത്രമാണ് ഇടുക്കി ഡാമിലേക്ക് പൊതുജനങ്ങൾക്ക് പ്രവേശനം അനുവദിക്കാറുള്ളത്. എന്നാൽ മൺസൂൺ സമയത്ത് പച്ചപ്പണിഞ്ഞ് നിൽക്കുന്ന ഈ സുന്ദരമായ ഡാം സന്ദർശിക്കാൻ നിങ്ങൾക്ക് ഒരു അവസരം ലഭിച്ചാൽ അത് മിസ്സാക്കരുത്. ഈ വരുന്ന ദിവസങ്ങളിൽ ഇഡുക്കി ഡാം കാണാൻ നിങ്ങൾക്ക് പൂർണമായും അനുവാദം ലഭിച്ചിരിക്കുകയാണ്. യാത്രയ്ക്ക് മുമ്പായി അറിഞ്ഞിരിക്കേണ്ട സമയക്രമം, ടിക്കറ്റ് നിരക്കുകൾ, യാത്രാ വിവരങ്ങൾ എന്നിവ നോക്കാം.

ALSO READ: ആനവണ്ടിയിൽ ഒരു ‘മഴയാത്ര’; 14 ജില്ലകളിലെയും വിസ്മയങ്ങൾ കാണാം കെഎസ്ആർടിസിയിൽ

നാളെ മുതൽ മെയ് 31 വരെ നാല് ദിവസത്തേക്കാണഅ ഇടുക്കി, ചെറുതോണി അണക്കെട്ടുക്കൾ സന്ദർശിക്കാൻ അധികൃതർ അനുവാദം നൽകിയിരിക്കുന്നത്. അണക്കെട്ടിൽ അറ്റകുറ്റപ്പണികൾ നടക്കുന്നതിനാൽ ബഗ്ഗി കാർ സൗകര്യമുണ്ടാവില്ല എന്നത് ശ്രദ്ധിക്കണം. അതിനാൽ അണക്കെട്ട് നടന്നു കാണാൻ മാത്രമെ അനുവാദമുണ്ടാകു. രാവിലെ 10 മുതൽ വൈകിട്ട് മൂന്ന് വരെയാണ് സന്ദർശകർക്ക് അണകെട്ടിലേക്ക് പ്രവേശനം.

പാറേമാവിൽ കൊലുമ്പൻ സമാധിക്ക് മുന്നിലൂടെയുള്ള വഴിയിലൂടെയാണ് അണകെട്ടിലേക്ക് പ്രവേശനം അനുവദിക്കുന്നത്. ചെറുതോണി അണക്കെട്ടിൻ്റെ കവാടത്തിനു സമീപമുള്ള പാർക്കിങ് ഏരിയയിൽ സ്വകാര്യ വാഹനങ്ങളുമായി എത്തുന്നവർ പാർക്ക് ചെയ്യാനുള്ള സൗകര്യം ഒരുക്കിയിട്ടുണ്ട്. സുരക്ഷാ കാരണങ്ങളാൽ മണിക്കൂറിൽ പരമാവധി 500 പേരെ മാത്രമേ അണക്കെട്ടിലേക്ക് കടത്തിവിടുകയുള്ളൂ. ഒരു ദിവസം 3000 പേർക്ക് അവസരമുണ്ടാകും.

ഇനി ടിക്കറ്റ് മുൻകൂട്ടി ബുക്ക് ചെയ്യണമെന്നുണ്ടെങ്കിൽ അതിനുള്ള അവസരവുമുണ്ട്. ഓൺലൈനായി https://www.keralahydeltourism.com attractions/link/5/16 എന്ന ഓൺലൈൻ സൈറ്റിലൂടെ പ്രവേശനത്തിനുള്ള ടിക്കറ്റ് മുൻകൂട്ടി ബുക്ക് ചെയ്യാവുന്നതാണ്. സ്പോട്ട് ബുക്കിങ് സൗകര്യവുമുണ്ട്. മുതിർന്നവർക്ക് 50 രൂപയാണ് ടിക്കറ്റ് നിരക്ക്, കുട്ടികൾക്ക് 25ഉം. ക്യാമറകളും ഇലക്ട്രോണിക്സ് ഉപകരണങ്ങളും മറ്റും അണക്കെട്ടിലേക്കു കൊണ്ടുപോകാൻ അനുവാദം ഉണ്ടാവില്ല. ഇവ സൂക്ഷിക്കാൻ അണക്കെട്ടിന്റെ കവാടത്തിൽ തന്നെ സൗകര്യം ഒരുക്കിയിട്ടുണ്ട്.

ഡാം സന്ദർശകർക്കായി സുരക്ഷാ നിർദ്ദേശങ്ങൾ

• ഡാമിന് മുകളിലേക്ക് മൊബൈൽ ഫോണുകൾ, ക്യാമറകൾ, മറ്റ് ഇലക്ട്രോണിക് ഉപകരണങ്ങൾ എന്നിവ ഒന്നുംതന്നെ കൊണ്ടുപോകാൻ സാധിക്കില്ല. ഇവ കൗണ്ടറുകളിൽ സൂക്ഷിക്കുക.
• രണ്ട് ഡാമുകളും കണ്ട് തീർക്കാൻ ഏകദേശം 2 മുതൽ 3 കിലോമീറ്റർ വരെ നടക്കേണ്ടി വരും. മഴയായതിനാൽ കുടയോ റെയിൻ കോട്ടുകളും കൈയ്യിൽ കരുതണം.
• ഡാം പരിസരം പൂർണ്ണമായും പ്ലാസ്റ്റിക് നിരോധിത മേഖലയാണ്. പ്ലാസ്റ്റിക് കുപ്പികളോ കവറുകളോ ഉള്ളിലേക്ക് കൊണ്ടുപോകാതിരിക്കുക.
• സുരക്ഷാ കാരണങ്ങളും മഴ മുന്നറിയിപ്പും പരിശോധിച്ച ശേഷം മാത്രമെ യാത്ര തിരിക്കാവൂ. ഇടുക്കി ഡാമിലേക്ക് പോകുന്നതിന് മുൻപ് നിലവിൽ ഡാം പൊതുജനങ്ങൾക്കായി തുറന്നു കൊടുത്തിട്ടുണ്ടോ എന്ന് പരിശോധിക്കണം.
• കാലാവസ്ഥ പ്രവചനങ്ങളും ഡാം തുറന്നുവിട്ടിട്ടുണ്ടോ എന്നടക്കമുള്ള കാര്യങ്ങൾ പരിശോധിക്കുന്നത് നല്ലതാണ്.

English Summary:

Authorities allowed travellers to visit Idukki Dam From Tomorrow on May 28 to 31st. Here is the safety precaution tips and restricts in Idukki Dam area. Also check weather update before your trip.

മഴക്കാലത്ത് കോടമഞ്ഞ് മൂടിയ മലനിരകളും, നിറഞ്ഞൊഴുകുന്ന വെള്ളച്ചാട്ടങ്ങളും, പച്ചപ്പുതച്ച കാടുകളും ആനവണ്ടിയുടെ സൈഡ് സീറ്റിലിരുന്ന കണ്ടുതീർക്കാൻ കൊതിക്കാത്തവർ ആരാണുള്ളത്. ഇതാ സഞ്ചാരികളുടെ ആ കാത്തിരിപ്പിന് വിരാമമിട്ടുകൊണ്ട് കെഎസ്ആർടിസി ബഡ്ജറ്റ് ടൂറിസം സെൽ (KSRTC Budget Tourism Cell) ഭാ​ഗമായി കേരളത്തിലെ 14 ജില്ലകളിലെയും പ്രകൃതിവിസ്മയങ്ങൾ നിങ്ങൾക്ക് കണ്ട് ആസ്വദിക്കാൻ അവസരമൊരുക്കിയിട്ടുണ്ട്. പോക്കറ്റ് ചോരാതെ, സുരക്ഷിതമായി മഴക്കാലത്തിന്റെ ഭംഗി ആസ്വദിക്കാൻ ഇതിലും മികച്ചൊരു അവസരം ഇനി ലഭിക്കാനില്ല.

സാധാരണക്കാർക്ക് താങ്ങാനാവുന്ന വളരെ കുറഞ്ഞ നിരക്കിൽ പോയിവരാം എന്നതാണ് കെഎസ്ആർടിസിയുടെ ഏറ്റവും വലിയ പ്രത്യേകത. ഫ്രണ്ട്സിനും കുടുംബത്തിനും ഒരുമിച്ചിരുന്ന് പാട്ടും കഥകളുമായി യാത്ര ചെയ്യാൻ പറ്റിയ അന്തരീക്ഷമാണ് കെഎസ്ആർടിസിയുടെ ബഡ്ജറ്റ് യാത്രയിൽ നിങ്ങളെ കാത്തിരിക്കുന്നത്. ഓരോ ജില്ലയിലെയും ഒളിഞ്ഞിരിക്കുന്ന മനോഹരമായ കാഴ്ച്ചകളിലേക്ക് നിങ്ങളെ കൊണ്ടെത്തിക്കാൻ നമ്മുടെ ആനവണ്ടി യാത്രയെക്കാൾ മികച്ചത് വേറെയില്ല.

ALSO READ: പാൽക്കടൽ പോലെ കുത്തിയൊഴുകുന്ന ദൂത്‌സാഗർ; മഴക്കാല യാത്രയിൽ ഇത് മിസ്സാക്കല്ലേ

എങ്ങനെ ബുക്ക് ചെയ്യാം?

കെഎസ്ആർടിസിയുടെ യാത്രകളിൽ മുൻകൂട്ടി സീറ്റുകൾ ഉറപ്പാക്കാൻ നമുക്ക് ഓൺലൈനിലൂടെ ബുക്ക് ചെയ്യാവുന്നതാണ്. കെഎസ്ആർടിസി ബഡ്ജറ്റ് ടൂറിസത്തിന്റെ ഔദ്യോഗിക പോർട്ടൽ വഴി സീറ്റുകൾ ഓൺലൈനായി ബുക്ക് ചെയ്യാവുന്നതാണ്. അല്ലെങ്കിൽ നിങ്ങളുടെ അടുത്തുള്ള കെഎസ്ആർടിസി ഡിപ്പോയിലെ ബഡ്ജറ്റ് ടൂറിസം സെല്ലിന്റെ (BTC) വാട്സാപ്പ് നമ്പറുകളിലേക്ക് മെസ്സേജ് അയച്ചോ വിളിച്ച് ചോദിച്ചോ വിവരങ്ങൾ മനസ്സിലാക്കാൻ സാധിക്കും.

ശനി, ഞായർ തുടങ്ങിയ അവധി ദിവസങ്ങളിൽ വൻ തിരക്ക് അനുഭവപ്പെടാറുള്ളതിനാൽ ഒന്നുരണ്ടാഴ്ച മുൻപ് തന്നെ ബുക്ക് ചെയ്ത് വയ്ക്കുന്നത് അപ്പോഴത്തെ തിരക്ക് ഒഴിവാക്കാനാകും. ഓരോ ജില്ലയിലും നിന്നും ഇത്തരം പാക്കേജ് കെഎസ്ആർടിസി ഒരുക്കുന്നുണ്ട്. വിവിധ റൂട്ടുകളിലേക്ക് പല നിരക്കിലാണ് യാത്ര നടത്തുന്നത്. അതിനാൽ വിശദമായി ചോദിച്ചറിഞ്ഞ ശേഷം മാത്രം യാത്ര ബുക്ക് ചെയ്യുക.

ഓരോ ജില്ലയിലും കാണേണ്ട കാഴ്ച്ചകൾ

• തിരുവനന്തപുരം- പൊന്മുടി താഴ്‌വര, കോവളം ബീച്ച്, നേപ്പിയർ മ്യൂസിയം, നെയ്യാർ ഡാം തുടങ്ങിയ സ്ഥലങ്ങളാണ് ഏറ്റവും മനോഹരമായി മഴക്കാലത്ത് കാണാൻ സാധിക്കുക.
• കൊല്ലം - മൺറോതുരുത്തിലെ കായൽ സവാരി, ജടായുപാറ, കൊല്ലം ബീച്ച്
• പത്തനംതിട്ട – മഴ നനഞ്ഞ ഗവിയിലേക്ക്, കോന്നി ആനക്കൂട്, ആറന്മുള തുടങ്ങിയ സ്ഥലങ്ങളിലേക്ക്.
• ആലപ്പുഴ – മഴയുടെയും കാറ്റിൻ്റെയും ഓളത്തിൽ അലതല്ലുന്ന പുന്നമടക്കായൽ, ആതിരപ്പുഴ ബീച്ച്.
• കോട്ടയം – ഇലവീഴാപൂഞ്ചിറയിലെ കാറ്റ്, ഇല്ലിക്കൽ‍ കല്ല്, കുമരകം തുടങ്ങിയവയാണ് പ്രധാന സ്ഥലങ്ങൾ.
• ഇടുക്കി – വാഗമൺ മൊട്ടക്കുന്നുകൾ, പരുന്തുംപാറ, മൂന്നാർ.
• എറണാകുളം– മറൈൻ ഡ്രൈവ്, ഭൂതത്താൻകെട്ട്, മാമലക്കണ്ടം.
• തൃശൂർ– ആർത്തലയ്ക്കുന്ന അതിരപ്പിള്ളി, പീച്ചി ഡാം, ചാവക്കാട്.
• പാലക്കാട് – നെല്ലിയാമ്പതി, പറമ്പിക്കുളം, മലമ്പുഴ ഡാം.
• മലപ്പുറം - നിലമ്പൂർ തേക്ക് മ്യൂസിയം, കടലുണ്ടി ബീച്ച്.
• കോഴിക്കോട് – മിഠായിത്തെരുവ്, കോഴിക്കോട് ബീച്ച്.
• വയനാട് – എടക്കൽ ഗുഹ, പൂക്കോട് തടാകം, ലക്കിടി ചുരം.
• കണ്ണൂർ – പയ്യാമ്പലം ബീച്ച്, ധർമ്മടം തുരുത്ത്.
• കാസർഗോഡ് – ബേക്കൽ കോട്ട, അഴീത്തല ബീച്ച്.

English Summary:

KSRTC Monsoon Budget Friendly Package Gives You Most Beautiful Travel In This Rainy Season. KSRTC Budget Tourism Cell Operates Highly Affordable Trip Across Kerala. Check The Complete List Of Routes Fare And Timings Here.

കടലിരമ്പുന്ന തിരമാലകളും നൈറ്റ് ലൈഫും മാത്രമാണ് ​ഗോവ എന്ന് കേൾക്കുമ്പോൾ പലരുടെയും ഉള്ളിലേക്ക് ഓടിയെത്തുന്നത്. മൺസൂൺ മഴ എത്തി‍തുടങ്ങുന്നതോടെ ഗോവയിലേക്കുള്ള യാത്ര മറ്റൊരു അനുഭവമാണ് നിങ്ങൾക്ക് നൽകുന്നത്. പശ്ചിമഘട്ട മലനിരകൾ പച്ചപ്പട്ടുടുക്കുന്ന ഈ സമയത്ത് ഗോവയിലെ ഏറ്റവും വലിയ വിസ്മയം കാടിനുള്ളിൽ മറഞ്ഞിരിക്കുന്ന ദൂത്‌സാഗർ വെള്ളച്ചാട്ടമാണ്. കനത്ത മഴയിൽ നാല് തട്ടുകളായി, ഏകദേശം 310 മീറ്റർ (1017 അടി) ഉയരത്തിൽ നിന്ന് ഒരു പാൽക്കടൽ പോലെ പതഞ്ഞൊഴുകുന്ന ദൂത്‌സാഗർ കാണാൻ സാധിക്കുന്നത് ജീവിതത്തിൽ ഒരിക്കലെങ്കിലും അനുഭവിച്ചറിയേണ്ട ഒന്നാണ്. മൺസൂൺ കാലത്ത് ദൂത്‌സാഗറിലേക്ക് ഒരു സാഹസിക യാത്ര പ്ലാൻ ചെയ്യുമ്പോൾ ശ്രദ്ധിക്കേണ്ട കാര്യങ്ങളെക്കുറിച്ച് നമുക്ക് നോക്കാം.

ALSO READ: ഫാമിലി ട്രിപ്പുകൾക്ക് ഏറ്റവും അനുയോജ്യമായ മൂന്നാറിലെ സ്ഥലങ്ങൾ; മിസ്സാക്കരുതേ

ദൂത്‌സാഗർ മൺസൂണിൽ

ഗോവ-കർണാടക അതിർത്തിയിലെ ഭഗവാൻ മഹാവീർ വൈൽഡ് ലൈഫ് സാങ്ച്വറിക്ക് ഉള്ളിലാണ് ദൂത്‌സാഗർ എന്ന മഹാവിസ്മയം സ്ഥിതി ചെയ്യുന്നത്. മൺസൂൺ മഴ ശക്തമായി പെയ്യുമ്പോൾ വെള്ളച്ചാട്ടത്തിൻ്റെ ശക്തിയും ഭം​ഗിയും ഇരട്ടിക്കും. പച്ചപ്പുനിറഞ്ഞ വനത്തിന് നടുവിലൂടെ, വെള്ളച്ചാട്ടത്തിന് കുറുകെ പോകുന്ന റെയിൽവേ പാലവും അതിലൂടെ വെള്ളച്ചാട്ടത്തിൻ്റെ പശ്ചാതലത്തിൽ കൂകി പായുന്ന തീവണ്ടിയും ദൂത്‌സാഗറിനെ ലോകത്തിലെ തന്നെ ഏറ്റവും മനോഹരമായ കാഴ്ചകളിലൊന്നാക്കി മാറ്റുന്നു.

യാത്രയിൽ ശ്രദ്ധിക്കേണ്ട പ്രധാന കാര്യങ്ങൾ

മഴക്കാലത്ത് ദൂത്‌സാഗർ കാണാൻ പോകുമ്പോൾ സാധാരണ ടൂറിസ്റ്റ് സീസണിൽ പോകുന്നതുപോലെയല്ല. വനംവകുപ്പിൻ്റെയും റെയിൽവേയുടെയും കടുത്ത നിയന്ത്രണങ്ങൾ ഇവിടെ ഉണ്ടാകാറുണ്ട്. ഒക്ടോബർ മുതൽ മെയ് വരെയുള്ള സമയത്താണ് കാടിനുള്ളിലൂടെയുള്ള ഔദ്യോഗിക ജീപ്പ് സർവീസുകൾ ഉണ്ടാകാറുള്ളത്. മഴക്കാലത്ത് പുഴകളിൽ വെള്ളം ഉയരുന്നതിനാൽ ജീപ്പ് റൂട്ട് പൂർണ്ണമായി വനംവകുപ്പ് അടയ്ക്കും.

മഴക്കാലത്ത് ദൂത്‌സാഗറിന് ഏറ്റവും അടുത്തുള്ള കുലേം അല്ലെങ്കിൽ കാസൽ റോക്ക് റെയിൽവേ സ്റ്റേഷനുകളിൽ എത്തിച്ചേരുന്നതാണ് ഏറ്റവും അടുത്തുള്ള വഴി. ഇവിടെ നിന്നും ട്രെയിൻ വഴി കാഴ്ചകൾ ആസ്വദിക്കുകയോ വനംവകുപ്പ് അനുവദിക്കുന്ന സുരക്ഷിതമായ പാതകൾ ഉപയോഗിക്കുകയോ ചെയ്യാം.

സുരക്ഷാ കാരണങ്ങളാൽ റെയിൽവേ ട്രാക്കിലൂടെ ദൂത്‌സാഗറിലേക്ക് നേരിട്ട് ട്രെക്ക് ചെയ്യുന്നത് കർശനമായി നിരോധിച്ചിട്ടുണ്ട്. നിയമങ്ങൾ ലംഘിച്ചാൽ പിഴ ഈടാക്കുമെന്ന കാര്യം ഓർക്കണം. മൺസൂൺ ഭംഗി ആസ്വദിക്കാൻ ഏറ്റവും നല്ല സമയം ജൂൺ മുതൽ സെപ്റ്റംബർ വരെ മാസങ്ങളിലാണ്. എൻട്രി പാസ്സ് വനംവകുപ്പിൻ്റെ ചെക്ക് പോസ്റ്റുകളിൽ നിന്ന് നേരിട്ടോ ഓൺലൈനായോ ലഭിക്കുന്നതാണ്.

യാത്രക്കാർ ശ്രദ്ധിക്കേണ്ട മറ്റൊരു പ്രധാന കാര്യം, ദൂത്‌സാഗർ സ്ഥിതി ചെയ്യുന്നത് വനത്തിനുള്ളിലായതുകൊണ്ട് അവിടെ ഭക്ഷണശാലകളോ മൊബൈൽ നെറ്റ്‌വർക്കോ ലഭ്യമായിരിക്കില്ല. ആവശ്യത്തിന് വെള്ളവും ലഘുഭക്ഷണങ്ങളും കയ്യിൽ കരുതാൻ ശ്രദ്ധിക്കണം. കൂടാതെ പ്ലാസ്റ്റിക് അവശിഷ്ടങ്ങൾ കാട്ടിൽ വലിച്ചെറിയാതെ പ്രകൃതിയെ സംരക്ഷിച്ചുകൊണ്ടാകണം നിങ്ങളുടെ യാത്ര.

എങ്ങനെ എത്തിച്ചേരാം?

കേരളത്തിൽ നിന്നും മംഗലാപുരം വഴി പോകുന്ന മിക്ക ട്രെയിനുകളും ഗോവയിലെ പ്രധാന സ്റ്റേഷനായ മഡ്ഗാവിൽ നിർത്തുന്നതാണ്. മഡ്ഗാവ് സ്റ്റേഷനിൽ ഇറങ്ങിയ ശേഷം അവിടെ നിന്നും കുലേമിലേക്ക് പോകുന്ന ലോക്കൽ പാസ്സഞ്ചർ ട്രെയിനുകളിലോ അല്ലെങ്കിൽ ടാക്സി/ബസ് മാർഗ്ഗമോ കുലേമിൽ എത്തിച്ചേരാം. മഡ്ഗാവിൽ നിന്നും ഏകദേശം 35 കിലോമീറ്ററാണ് കുലേമിലേക്കുള്ള ദൂരം. അവിടെയെത്തിയാൽ ദൂത്‌സാഗർ വെള്ളച്ചാട്ടത്തിലേക്കുള്ള എൻട്രി പോയിൻ്റ് കാണാനാകും.

English Summary:

Dudhsagar waterfall located in the state of Goa. India appears as flowing milk, hence its name Dudhsagar which means sea of milk. This waterfall is formed on the Mandovi river before it meets the sea inside Bhagwan Mahavir Sanctuary and Mollem National Park in Goa.

പച്ചപുതച്ച തെയിലത്തോട്ടങ്ങളും കോടമഞ്ഞും കുളിർക്കാറ്റുമേറ്റ് സഞ്ചാരികളെ മാടിവിളിക്കുന്ന മനോഹരമായ മലനിരകളും മൂന്നാറിൻ്റെ വശ്യമായ ഭം​ഗിയാണ്. അതുകൊണ്ട് തന്നെ ഏത് സീസണിലും സഞ്ചാരികളുടെ പ്രിയപ്പെട്ട ഇടമാണ് മൂന്നാർ. ദിവസേന പതിനായരക്കണക്കിന് ആളുകളാണ് ഇവിടേക്ക് എത്തിച്ചേരുന്നത്. എന്നാൽ, സുഹൃത്തുക്കൾക്കൊപ്പം പോകുന്നതുപോലെയല്ല കുടുംബത്തോടൊപ്പം ഒരു യാത്ര പ്ലാൻ ചെയ്യുന്നത്. കുട്ടികൾക്കും മുതിർന്നവർക്കും ഒരുപോലെ സുരക്ഷിതമായി ആസ്വദിക്കാൻ പറ്റുന്നതും, അപകടസാധ്യതകൾ ഇല്ലാത്തതുമായ സ്ഥലങ്ങളാണ് ഫാമിലി ട്രിപ്പുകൾക്ക് തിരഞ്ഞെടുക്കേണ്ടത്. അങ്ങനെയെങ്കിൽ കുടുംബവുമൊത്ത് മൂന്നറിലെത്തുന്ന നിങ്ങൾ പോകേണ്ടതും കാണേണ്ടതുമായ സ്ഥലങ്ങൾ ഏതെല്ലാമെന്ന് നമുക്ക് നോക്കാം.

ALSO READ: മൺസൂൺ യാത്രകൾ ട്രാജഡിയാകരുത്; കാടും മലയും കയറാൻ പ്ലാനുണ്ടെങ്കിൽ ഇതറിഞ്ഞിരിക്കണം

ഇരവികുളം നാഷണൽ പാർക്ക്

മൂന്നാറിലെത്തുന്ന കുടുംബങ്ങൾ ആദ്യം തിരഞ്ഞെടുക്കേണ്ട സ്ഥലമാണിത്. വരയാടുകളുടെ താവളമായ ഇവിടം കുട്ടികൾക്ക് വളരെയധികം കൗതുകവും ഇഷ്ടവും തോന്നുന്ന സ്ഥലമാണ്. രാജമലയുടെ മുകളിലേക്ക് സഞ്ചാരികളെ കൊണ്ടുപോകുന്നത് വനംവകുപ്പിൻ്റെ പ്രത്യേക ബസുകളിലാണ്. സ്വന്തം വാഹനങ്ങൾ താഴെ പാർക്ക് ചെയ്താണ് ഇവിടേക്ക് പ്രവേശിക്കേണ്ടത്. അതുകൊണ്ട് തന്നെ മലയോര പാതകളിലൂടെയുള്ള ഡ്രൈവിംഗിലെ അപകട സാധ്യത കുറയ്ക്കാം.

മാട്ടുപ്പെട്ടി ഡാം

മൂന്നാർ ടൗണിൽ നിന്നും ഏകദേശം 13 കിലോമീറ്റർ സഞ്ചരിച്ചാൽ മനോഹരമായ മാട്ടുപ്പെട്ടി അണക്കെട്ട് കാണാം. മലനിരകൾക്ക് നടുവിലെ വലിയ തടാകം കാണാൻ പ്രത്യേക ഭം​ഗിയാണ്. ഡാമിന് ചുറ്റും ശക്തമായ സുരക്ഷാ വേലികളും ​ഗൈഡുകളും ഉണ്ടാകും. അതിനാൽ കുട്ടികളെ പേടിക്കേണ്ട. സ്പീഡ് ബോട്ട്, മോട്ടോർ ബോട്ട് സർവീസുകൾ എന്നിവയും ഇവിടെ ലഭ്യമാണ്. കുട്ടികൾക്കും മുതിർന്നവർക്കും ലൈഫ് ജാക്കറ്റുകൾ നിർബന്ധമായതിനാൽ പേടിക്കാതെ ബോട്ടിംഗ് ആസ്വദിക്കാം.

ബ്ലോസം ഹൈഡ്രെൽ പാർക്ക്

മുതിർന്നവർക്ക് വിശ്രമിക്കാനും കുട്ടികൾക്ക് ഓടിക്കളിക്കാനും പറ്റിയ മൂന്നാറിലെ ഏറ്റവും മികച്ച പാർക്കാണ് ബ്ലോസം ഹൈഡ്രെൽ പാർക്ക്. മുതിർന്നവർക്ക് നടക്കാൻ പ്രകൃതിരമണീയമായ വഴികളും ഇവിടെ ഒരുക്കിയിട്ടുണ്ട്. കുട്ടികൾക്കായി പ്രത്യേക പ്ലേ ഏരിയ, അക്വാട്ടിക്കൽ വാക്ക്, സൈക്ലിംഗ് എന്നിവ ഇവിടെയുണ്ട്.

വട്ടവട

മൂന്നാറിൻ്റെ തിരക്കുകളിൽ നിന്നും മാറി സമാധാനപരമായ ഒരു അന്തരീക്ഷം ആഗ്രഹിക്കുന്ന കുടുംബങ്ങൾക്ക് വട്ടവട നല്ലൊരു ഓപ്ഷനാണ്. കേരളത്തിൻ്റെ 'പച്ചക്കറി ഗ്രാമം' എന്നാണ് വട്ടവട സഞ്ചാരികൾക്കിടയിൽ അറിയപ്പെടുന്നത്. കനത്ത മൂടൽമഞ്ഞുള്ള അപകടകരമായ വളവുകളോ ഇല്ലാത്ത ശാന്തമായ ഒരു താഴ്‌വരയാണിത്. വട്ടവടയിലേക്കുള്ള യാത്രയിൽ മാട്ടുപ്പെട്ടി, കുണ്ടള ഡാമുകളും കാണാം.

കുടുംബവുമായി പോകുമ്പോൾ ശ്രദ്ധിക്കേണ്ടത്

• ഇരവികുളം നാഷണൽ പാർക്കിലേക്കുള്ള ടിക്കറ്റുകൾ ഓൺലൈൻ വഴി മുൻകൂട്ടി ബുക്ക് ചെയ്താൽ ക്യൂ നിൽക്കുന്നത് ഒഴിവാക്കാം.
• മലയോര പാതകളിലൂടെ യാത്ര ചെയ്യുമ്പോൾ കുട്ടികൾക്കും മുതിർന്നവർക്കും തലകറക്കമോ ഛർദ്ദിയോ ഉണ്ടാകാൻ സാധ്യതയുണ്ട്. ഇതിനുള്ള മരുന്നുകൾ കയ്യിൽ കരുതേണ്ടതാണ്.
• മൂന്നാറിൽ ഏതു സമയത്തും കാലാവസ്ഥ മാറിമറിയാം. കുട്ടികൾക്കും മുതിർന്നവർക്കും ആവശ്യമായ സ്വെറ്ററുകളും റെയിൻ കോട്ടുകളും എപ്പോഴും വാഹനത്തിൽ കരുതുക. അസുഖങ്ങൾ തടയാൻ ഇത് നല്ലതാണ്.
• തിരക്കുള്ള സമയങ്ങളിൽ കഴിവതും മുൻകൂട്ടി റൂമുകൾ ബുക്ക് ചെയ്യുന്നതാണ് നല്ലത്. അല്ലാത്തപക്ഷം അവിടെയെത്തിയാൽ റൂം കിട്ടണമെന്നില്ല.

English Summary:

Are you planning a family holiday to Munnar, Discover the safest, most accessible tourist spots. Mattupetty Dam, Eravikulam National Park, and Blossom Park that are perfect for kids and elderly parents.

മഴക്കാലത്ത് പ്രകൃതി അതിൻ്റെ ഏറ്റവും മനോഹരമായ ഭാവത്തിലായി നിൽക്കുന്നത് കാണാൻ ഒരു പ്രത്യേക ഭം​ഗിയാണ്. മലയോര മേഖലകളിലാണെങ്കിൽ മഞ്ഞും ഇരമ്പിയാർക്കുന്ന വെള്ളച്ചാട്ടങ്ങളും പച്ചപ്പുതച്ച മലനിരകളും കാണാൻ മൺസൂൺ കാലത്ത് തന്നെ പോകണം. കാടും മലയും കയറാൻ ഇഷ്ടപ്പെടുന്നവർക്ക് ഏറ്റവും നല്ല കാലാവസ്ഥ മൺസൂൺ സീസണിലാണ്. എന്നാൽ, ഒരല്പം ശ്രദ്ധക്കുറവ് ഉണ്ടായാൽ ഈ സുന്ദരമായ യാത്രകൾ വലിയ ദുരന്തമായി മാറാൻ അധികം സമയം വേണ്ട എന്നതും നമ്മൾ ഓർക്കണം. മഴക്കാലമായാൽ ഉരുൾപൊട്ടൽ, മലവെള്ളപ്പാച്ചിൽ, റോഡിലെ വഴുക്കൽ, മഞ്ഞുമൂടിയ പാതകൾ തുടങ്ങി നിരവധി കടമ്പകൾ വലിയ വെല്ലുവിളിയാകാറുണ്ട്.

ഈ മൺസൂൺ കാലത്ത് നിങ്ങളും യാത്ര പോകാൻ തയ്യാറെടുക്കുകയാണെങ്കിൽ സുരക്ഷിതവും സന്തോഷകരവുമായി മടങ്ങി വരാൻ കാടും മലയും കയറും മുൻപ് നിർബന്ധമായും അറിഞ്ഞിരിക്കേണ്ട ചില സുരക്ഷാ മുൻകരുതലുകൾ ഉണ്ട്. അത്തരത്തിൽ നിങ്ങളുടെ യാത്രകൾ മനോഹരമാക്കാൻ അറിഞ്ഞിരിക്കേണ്ടതും കരുതിയിരിക്കേണ്ടതുമായ കാര്യങ്ങൾ എന്തെല്ലാമെന്ന് നോക്കാം.

ALSO READ: മൺസൂൺ എത്തി മക്കളേ; മഴക്കാലത്ത് കേരളത്തിലെ ഈ സ്ഥലങ്ങളിലേക്ക് പോകല്ലേ, വൻ അപകടമാണ്

നിർബന്ധമായും അറിയേണ്ടത്

അലേർട്ടുകൾ അവഗണിക്കരുത്: യാത്ര പുറപ്പെടുന്നതിന് മുൻപ് ആദ്യം തന്നെ കേന്ദ്ര കാലാവസ്ഥാ വകുപ്പിൻ്റെയും (IMD) സംസ്ഥാന ദുരന്തനിവാരണ അതോറിറ്റിയുടെയും മുന്നറിയിപ്പുകൾ കൃത്യമായി പരിശോധിക്കണം. ഓറഞ്ച്, റെഡ് അലേർട്ടുകൾ പ്രഖ്യാപിച്ച ജില്ലകളിലേക്കുള്ള യാത്രകൾ പൂർണ്ണമായും ഒഴിവാക്കുക.

ഡിസ്ട്രിക്റ്റ് ടൂറിസം പ്രൊമോഷൻ കൗൺസിൽ (DTPC) അല്ലെങ്കിൽ വനംവകുപ്പ് ഏതെങ്കിലും ടൂറിസം കേന്ദ്രങ്ങൾ താൽക്കാലികമായി അടച്ചിട്ടുണ്ടോ എന്ന് മുൻകൂട്ടി അന്വേഷിക്കുന്നത് നല്ലതാണ്.

മലവെള്ളപ്പാച്ചിൽ: മഴക്കാലത്ത് കാട്ടിലെ അരുവികളിലും വെള്ളച്ചാട്ടങ്ങളിലും ഇറങ്ങുന്നത് ഒഴിവാക്കണം. മലമുകളിൽ കനത്ത മഴ പെയ്താൽ മിനിറ്റുകൾക്കുള്ളിൽ താഴെ മലവെള്ളപ്പാച്ചിൽ ഉണ്ടാകാം. അതിനാൽ വെള്ളത്തിന്റെ ഒഴുക്കും ശ്രദ്ധിക്കണം.

പാറക്കെട്ടുകൾ: മലമുകളിലെ വഴുക്കലുള്ള പാറക്കെട്ടുകളിൽ കയറി സെൽഫിയെടുക്കാൻ ശ്രമിക്കരുത്. വഴുതി വീഴാനുള്ള സാധ്യത വളരെ കൂടുതലാണ്.

രാത്രി യാത്ര വേണ്ട: മൂന്നാർ, വയനാട്, ഇടുക്കി, വാഗമൺ തുടങ്ങിയ മലയോര മേഖലകളിലേക്ക് മൺസൂൺ കാലത്ത് രാത്രി യാത്ര ചെയ്യുന്നത് അപകടമാണ്. കനത്ത മഴയുള്ളപ്പോൾ മലയോര പാതകളിൽ കടുത്ത മൂടൽമഞ്ഞ് അനുഭവപ്പെടാൻ സാധ്യതയുണ്ട്. കാഴ്ച്ച മങ്ങാനും യാത്രയിൽ ബുദ്ധിമുട്ടുണ്ടാകാനും സാധ്യത ഏറെയാണ്.

മണ്ണിടിച്ചിൽ: രാത്രികാലങ്ങളിൽ മണ്ണിടിച്ചിലോ മരം കടപുഴകി വീഴാനുമുള്ള സാധ്യതയുള്ളതിനാൽ പെട്ടെന്ന് തിരിച്ചറിയാൻ കഴിയില്ല എന്നതിനൊപ്പം രക്ഷാപ്രവർത്തനവും ദുഷ്കരമാകും. അതിനാൽ മലയോര യാത്രകൾ പകൽ സമയത്തേക്ക് മാത്രമായി ചുരുക്കുക.

കാട്ടുപാതകൾ ശ്രദ്ധിക്കാം: മഴക്കാലത്ത് വനമേഖലകളിലൂടെ യാത്ര ചെയ്യുമ്പോൾ വന്യമൃഗങ്ങൾ റോഡിലേക്ക് ഇറങ്ങാനുള്ള സാധ്യത കൂടുതലാണ്. വണ്ടിയുടെ വേഗത എപ്പോഴും കുറയ്ക്കുക. കാട്ടുമൃഗങ്ങളെ കണ്ടാൽ ഹോൺ അടിക്കുകയോ വെളിച്ചം അടിക്കുകയോ ചെയ്ത് അവയെ ശല്ല്യപ്പെടുത്തരുത്.

മൺസൂൺ ബാഗിൽ ഇവ കരുതാം

റെയിൻകോട്ടോ കുടയോ കൈയ്യിൽ കരുതുന്നത് നല്ലതാണ്.

മൊബൈൽ ഫോണും പവർ ബാങ്കും നനയാതിരിക്കാൻ വാട്ടർപ്രൂഫ് പൗച്ചുകളിൽ സൂക്ഷിക്കുക.

അടിയന്തിര സാഹചര്യങ്ങളിൽ ഉപയോഗിക്കാൻ ഒരു ഫസ്റ്റ് എയ്ഡ് കിറ്റും ആവശ്യമായ മരുന്നുകളും കരുതുക.

ടോർച്ച് ലൈറ്റ് കരുതാം.

English Summary:

Monsoon Travel Guidelines 2026, Essential Safety Tips While Driving on a Hair pin roads and Hill Station. Check The Safety Rules And Precuations Before Your Trip. Here Is The Complete Step By Step Guide How To Travel In Rainy Season.

ഇന്ത്യൻ റെയിൽവേയുടെ അഭിമാനമായ 'ഭാരത് ഗൗരവ് ടൂറിസ്റ്റ് ട്രെയിൻ' ആദ്യമായി അന്താരാഷ്ട്ര അതിർത്തി കടന്ന് ഒരു സർവീസിന് ഒരുങ്ങുകയാണ്. മധ്യപ്രദേശിലെ ഇൻഡോറിൽ നിന്നും അയൽരാജ്യമായ നേപ്പാളിലേക്കാണ് ഈ വിനോദയാത്ര ഒരുക്കുന്നത്. വരും ദിവസങ്ങളിൽ വിനോദസഞ്ചാരികൾക്കും തീർത്ഥാടകർക്കും വലിയൊരു സുവർണ്ണാവസരമാണ് ഇന്ത്യൻ റെയിൽവേ കാറ്ററിങ് ആന്റ് ടൂറിസം കോർപറേഷൻ (ഐആർസിടിസി) ഒരുക്കുന്നത്. നേപ്പാളിലേക്കുള്ള ഭാരത് ഗൗരവ് ടൂറിസ്റ്റ് ട്രെയിൻ ജൂൺ 12ന് പുറപ്പെടും. പശുപതിനാഥ് നേപ്പാൾ ദർശൻ യാത്ര എന്നാണ് വിനോദ യാത്രക്ക് പേരിട്ടിരിക്കുന്നത്.

ഇന്ത്യയുടെ അതിർത്തിക്കപ്പുറത്തേക്ക് സർവീസ് നടത്തുന്ന ആദ്യ ഭാരത് ഗൗരവ് ട്രെയിനെന്ന ഖ്യാതിയും ഈ യാത്രയ്ക്ക് സ്വന്തമാകും. സഞ്ചാരികൾക്കായി പ്രത്യേകം തയാറാക്കിയ ടൂറിസം പാക്കേജാണിതെന്ന് ഐആർസിടിസി അറിയിച്ചു. യാത്ര, താമസം, സഞ്ചാരികൾക്ക് കാഴ്ചകൾ കാണാനുള്ള സൗകര്യം, ഭക്ഷണം എന്നിയെല്ലാം ഉൾപ്പെടുന്നതാണ് പാക്കേജ്. തീർഥാടകർക്കും വിനോദസഞ്ചാരികൾക്കും ഒരുപോലെ സുരക്ഷിതമായി നേപ്പാൾ കണ്ടുവരാൻ ഇതിലും മികച്ചൊരു അവസരം ഉണ്ടാകില്ല.

ALSO READ: കെഎസ്ആർടിസി ‌സൗജന്യ യാത്ര; എല്ലാ സ്ത്രീകൾക്കും ലഭിക്കുമോ, എസി ബസുകളിൽ അനുവദിക്കുമോ?

ഒമ്പത് രാത്രിയും പത്തു പകലും നീളുന്നതാണ് നേപ്പാളിലേക്കുള്ള ഭാരത് ഗൗരവ് യാത്ര. നേപ്പാളിലെ പ്രസിദ്ധമായ വിനോദ സഞ്ചാര, തീർഥാടന കേന്ദ്രങ്ങൾ ഉൾപ്പെടുത്തിയാണ് യാത്ര. കാഠ്മണ്ഡു, പശുപതിനാഥ് ക്ഷേത്രം, പൊഖാറ, ചിത്വാൻ ദേശീയ ഉദ്യാനം, മനകമന ക്ഷേത്രം എന്നിവിടങ്ങളിലേക്കും യാത്ര ഒരുക്കും. മനകമനയിലേക്കുള്ള റോപ് വേയും ചിത്വാൻ ദേശീയ ഉദ്യാനത്തിലെ ജീപ്പ് സഫാരിയും പാക്കേജിന്റെ ഭാഗമാണെന്നത് പ്രധാന ആകർഷണമാണ്.

യാത്ര ഇവിടങ്ങളിലൂടെ

1. കാഠ്മണ്ഡു: നേപ്പാളിന്റെ തലസ്ഥാന നഗരിയുടെ ചരിത്രവും സംസ്കാരവും അടുത്തറിയാനുള്ള അവസരമാണ് ഇതിലൂടെ ലഭിക്കുന്നത്.

2. പശുപതിനാഥ് ക്ഷേത്രം: ലോകപ്രശസ്തമായ ഈ ശിവക്ഷേത്രം സന്ദർശിക്കാം.

3. പൊഖാറ: മനോഹരമായ തടാകങ്ങളും ഹിമാലയൻ കാഴ്ചകളും ഒരുക്കുന്ന ന​ഗരം.

4. ചിത്വാൻ നാഷനൽ പാർക്ക്: പ്രകൃതിസ്നേഹികൾക്കായി വന്യജീവികളെ അടുത്തറിയാനുള്ള അവസരം.

5. മണകാമന ക്ഷേത്രം: കുന്നിൻമുകളിലെ ഈ പ്രശസ്ത ക്ഷേത്രത്തിലേക്ക് റോപ്‌വേ റൈഡും പാക്കേജിൽ ഉൾപ്പെടുത്തിയിട്ടുണ്ട്.

മധ്യപ്രദേശിലെ ഇൻഡോർ, ഉജ്ജയിൻ, സുജയ്പൂർ, ഭോപാൽ, ഇറ്റാർസി, നർസിങ്പൂർ, ജബൽപൂർ, കറ്റ്‌നി, സത്‌ന എന്നീ റെയിൽവേ സ്റ്റേഷനുകളിൽ നിന്നും ഈ ട്രെയിനിൽ കയറാനാവും. 14 കോച്ചുകളാണ് ഈ ഡിലക്‌സ് എസി ടൂറിസ്റ്റ് ട്രെയിനിലുള്ളത്. ഫസ്റ്റ് എസി, സെക്കൻഡ് എസി, തേർഡ് എസി വിഭാഗങ്ങളിലാണ് ടിക്കറ്റുകൾ.

യാത്രാ നിരക്കുകളും പാക്കേജും

തേർഡ് എസി കംഫർട്ട് - 62,710 രൂപ

സെക്കൻഡ് എസി ഡീലക്സ് - 76,550 രൂപ

ഫസ്റ്റ് എസി സുപ്പീരിയർ - 90,400 രൂപ

പാക്കേജിൽ ഉൾപ്പെട്ടിരിക്കുന്നത്

ഈ തുകയിൽ ടിക്കറ്റ് നിരക്ക് മാത്രമല്ല, യാത്രയിലുടനീളമുള്ള എല്ലാ പ്രധാന ചെലവുകളും ഉൾപ്പെടുന്നു എന്നത് മറ്റൊരു ആകർഷണമാണ്. നേപ്പാളിലെ പ്രശസ്തമായ ത്രീ-സ്റ്റാർ ഹോട്ടലുകളിലെ താമസം, ഭക്ഷണം, എസി ബസ് സർവീസ്, യാത്രക്കാർക്ക് ട്രാവൽ ഇൻഷുറൻസ് എന്നിവയും ഉൾപ്പെടുന്നുണ്ട്. യാത്രയിലുടനീളം സഹായിക്കാനായി പ്രത്യേക ടൂർ ​ഗൈഡുകളഉം ഉണ്ടാകും.

English Summary:

Bharat Gaurav Train on its first cross-border journey from Indore, India to Nepal. Marking a significant milestone for Indian Railways. This tourism package, named Pashupatinath Nepal Darshan Yatra. Here is the complete details of timings, date and route.

ന്യൂഡൽഹി: കർണാടകയ്ക്കും മഹാരാഷ്ട്രയ്ക്കും ഇടയിലുള്ള യാത്രാ സൗകര്യങ്ങൾ വർധിപ്പിക്കുന്നതിനായി ബെംഗളൂരുവിനും മുംബൈയ്ക്കും ഇടയിൽ പുതിയ ട്രെയിൻ സർവീസ് ആരംഭിച്ച് ഇന്ത്യൻ റെയിൽവേ. ആഴ്ചയിൽ രണ്ട് തവണയാണ് സർവീസ് ഉള്ളത്. മെയ് 17-ന് കേന്ദ്ര റെയിൽവേ മന്ത്രി അശ്വിനി വൈഷ്ണവാണ് പുതിയ ട്രെയിനിന്റെ ഉദ്ഘാടന സർവീസ് വെർച്വലായി ഫ്ലാഗ് ഓഫ് ചെയ്തത്. ബെംഗളൂരു,ഹുബ്ബള്ളി-ധാർവാഡ് മേഖല, ബെലഗാവി, പൂനെ, മുംബൈ എന്നിവിടങ്ങൾക്കിടയിൽ യാത്ര ചെയ്യുന്ന യാത്രക്കാർക്ക് റെയിൽ കണക്റ്റിവിറ്റി കൂടുതൽ മെച്ചപ്പെടുത്താൻ പുതിയ സർവീസ് സഹായിക്കുമെന്നാണ് പ്രതീക്ഷ.

കൂടാതെ, ബിസിനസ്സ് ആവശ്യങ്ങൾക്കായി യാത്ര ചെയ്യുന്നവർ, വിദ്യാർത്ഥികൾ, വിനോദസഞ്ചാരികൾ, ജീവനക്കാർ എന്നിവർക്കെല്ലാം ഈ പുതിയ സർവീസ് ഏറെ പ്രയോജനപ്പെടും. സർവീസ് സൗത്ത് വെസ്റ്റേൺ റെയിൽവേയാണ് ട്രെയിൻ സർവീസ് നിയന്ത്രിക്കുന്നത്.

ബെംഗളൂരു-മുംബൈ എക്സ്പ്രസ് സർവീസ്

ബെംഗളൂരുവിലെ സർ എം. വിശ്വേശ്വരയ്യ ടെർമിനലിനും ലോകമാന്യ തിലക് ടെർമിനസിനും ഇടയിലാണ് 16553/16554 ട്രെയിൻ സർവീസ് നടത്തുന്നത്. 1,210 കിലോമീറ്റർ ദൂരം 24 മണിക്കൂറും 5 മിനിറ്റും കൊണ്ടാണ് ട്രെയിൻ പിന്നിടുന്നത്. മെയ് 23 മുതൽ ബെംഗളൂരുവിൽ നിന്നും മെയ് 24 മുതൽ മുംബൈയിൽ നിന്നും കൃത്യമായ സർവീസുകൾ ആരംഭിക്കുമെന്ന് അധികൃതർ അറിയിച്ചു. യാത്രയ്ക്കിടയിൽ ഇരുവശങ്ങളിലേക്കുമായി 15 സ്റ്റേഷനുകളിൽ ട്രെയിനിന് സ്റ്റോപ്പ് അനുവദിച്ചിട്ടുണ്ട്.

ALSO READ: ഇന്ത്യയുടെ ബുള്ളറ്റ് ട്രെയിന്‍ സൂപ്പറാകും; ലോകം തോല്‍ക്കും ഈ അതിവേഗ ട്രെയിനിന് മുന്നിൽ

സ്റ്റേഷനുകൾ

SMVT ബെംഗളൂരു-ലോകമാന്യ തിലക് ടെർമിനസ് എക്‌സ്‌പ്രസ് തുംകുരു, ദാവൻഗെരെ, എസ്എസ്എസ് ഹുബ്ബള്ളി, ധാർവാർ, ബെലഗാവി, മിറാജ്, സാംഗ്ലി, കരാഡ്, സത്താറ, ലോണാണ്ട്, പൂനെ, ലോണാവാല, കർജാത്ത്, കല്യാണ്, താനെ എന്നിങ്ങനെ 15 സ്റ്റേഷനുകളിലാണ് നിർത്തുന്നത്.

ട്രെയിൻ നമ്പർ 16553 (SMVT ബെംഗളൂരു - ലോകമാന്യ തിലക് ടെർമിനസ്) എല്ലാ ചൊവ്വാഴ്ചയും ശനിയാഴ്ചയും രാത്രി 08:35 ന് ബെംഗളൂരുവിൽ നിന്ന് പുറപ്പെടും. അടുത്ത ദിവസം (ബുധൻ, ഞായർ) രാത്രി 08:40-ന് മുംബൈയിൽ എത്തിച്ചേരുന്നതാണ്.

ട്രെയിൻ നമ്പർ 16554 ലോകമാന്യ തിലക് ടെർമിനസ്–എസ്എംവിടി ബെംഗളൂരു എക്സ്പ്രസ് എല്ലാ ഞായറാഴ്ചയും ബുധനാഴ്ചയും രാത്രി 11:15 ന് ലോകമാന്യ തിലക് ടെർമിനസിൽ നിന്ന് പുറപ്പെട്ട് തിങ്കൾ, വ്യാഴാഴ്ച ദിവസങ്ങളിൽ യഥാക്രമം രാത്രി 11:30 ന് ബെംഗളൂരുവിൽ എത്തിച്ചേരും.

കോച്ച്, ടിക്കറ്റ് നിരക്ക്

ഒരു എസി ടു-ടയർ കോച്ച്, നാല് എസി ത്രീ-ടയർ കോച്ചുകൾ, ആറ് സ്ലീപ്പർ ക്ലാസ് കോച്ചുകൾ, നാല് ജനറൽ സെക്കൻഡ് ക്ലാസ് കോച്ചുകൾ, ഒരു ലഗേജ് കം ബ്രേക്ക് വാൻ, ഒരു ലഗേജ്-കം-ജനറേറ്റർ കാർ-കം-ബ്രേക്ക് വാൻ എന്നിവയാണ് ട്രെയിനിൽ ഉള്ളത്. സ്ലീപ്പർ ക്ലാസിന് 750 രൂപയും എസി 3-ടയറിന് 1,880 രൂപയും എസി 2-ടയറിന് 2,575 രൂപയുമാണ് ടിക്കറ്റ് നിരക്ക്.

English Summary:

Indian Railways has launched a new bi-weekly express train service between Bengaluru and Mumbai. New SMVT Bengaluru–Lokmanya Tilak Terminus Express will connect Bengaluru, Hubballi-Dharwad, Belagavi, Pune, and Mumbai, improving travel convenience for passengers in Karnataka and Maharashtra.

അയൽ സംസ്ഥാനങ്ങളായ തമിഴ്‌നാട്ടിലും കർണാടകത്തിലും സർക്കാർ ബസുകളിൽ സ്ത്രീകൾക്ക് സൗജന്യ യാത്ര പ്രഖ്യാപിച്ചത് മുതൽ കേരളത്തിലും വലിയ രീതിയിൽ ചർച്ചയാകുന്ന ഒന്നാണ് കെഎസ്ആർടിസിയിലെ (KSRTC) സ്ത്രീകളുടെ സൗജന്യ യാത്ര. യുഡിഎഫിൻ്റെ തിരഞ്ഞെടുപ്പ് വാഗ്ദാനങ്ങളിൽ ഏറ്റവും പ്രധാനപ്പെട്ട ഒന്നായിരുന്നു കെഎസ്ആർടിസി ബസുകളിൽ സ്ത്രീകൾക്കുള്ള സൗജന്യ യാത്ര. വി ഡി സതീശൻ സർക്കാർ വലിയ ഭൂരിപക്ഷം നേടി വിജയിച്ചതോടെ സോഷ്യൽ മീഡിയയിലും മറ്റും കേരളത്തിലും സ്ത്രീകൾക്ക് കെഎസ്ആർടിസി യാത്ര ഫ്രീയായി എന്ന രീതിയിലുള്ള പ്രചാരണങ്ങൾ ആരംഭിച്ചു.

ഇതുമായി ബന്ധപ്പെട്ട നിർണായകമായ ഒരു തീരുമാനമാണ് ഇന്ന് പുറത്തുവന്നത്. വരുന്ന ജൂൺ 15 മുതൽ സ്ത്രീകൾക്ക് കെഎസ്ആർടിസി ബസുകളിൽ സൗജന്യമായി യാത്ര ചെയ്യാമെന്നാണ് തീരുമാനം. എന്നാൽ ഈ വാർത്ത പുറത്തുവരുമ്പോൾ പലരുടെയും ഉള്ളിൽ വിവിധ സംശയങ്ങളും ഉണ്ടായേക്കാം. എല്ലാ സ്ത്രീകൾക്കും സൗജന്യ യാത്ര ലഭിക്കുമോ, അതുപോലെ എല്ലാ ബസുകളിലും സൗജന്യമായി യാത്ര ചെയ്യാമോ എന്നിങ്ങനെ നൂറുകൂട്ടം സംശയങ്ങളും നമുക്കുള്ളിലുണ്ട്.

ALSO READ: കൊട്ടിയൂർ ക്ഷേത്രദർശനം 2026: ഭക്തർക്ക് ആശ്വാസമായി കെഎസ്ആർടിസി, യാത്രയ്ക്ക് മുൻപ് അറിയേണ്ടത്

വരുമാന പരിധിയില്ലാതെ തന്നെ എല്ലാ സ്ത്രീകൾക്കും സൗജന്യ യാത്ര അനുവദിക്കും എന്നതാണ് പ്രഖ്യാപനത്തിലെ ഏറ്റവും വലിയ ആകർഷണം. കർണാടക, പഞ്ചാബ്, തെലങ്കാന, ആന്ധ്രപ്രദേശ് എന്നീ സംസ്ഥാനങ്ങൾ സ്ത്രീകൾക്ക് ഓർഡിനറി ബസുകളിൽ സൗജന്യ യാത്ര നടപ്പാക്കിയപ്പോൾ സ്ത്രീകൾക്ക് പ്രത്യേക കാർഡുകൾ അനുവദിച്ചിരുന്നു. എന്നാൽ കേരളത്തിൽ ഇതില്ലാതെ തന്നെ എല്ലാ സ്ത്രീകൾക്കും സൗജന്യമായ യാത്ര ചെയ്യാമെന്നാണ് സർക്കാർ പറയുന്നത്. തമിഴ്നാട്ടിലെ അതേ മാതൃകയാണ് ഇപ്പോൾ കേരളത്തിലും പിന്തുടരുന്നത്.

എല്ലാ ബസുകളിലും സൗജന്യ യാത്ര പറ്റുമോ?

യുഡിഎഫ് പ്രഖ്യാപിച്ച ഇന്ദിരാ ഗ്യാരണ്ടി പ്രകാരം ഉള്ള കെഎസ്ആർടിസിയിലെ ഓർഡിനറി ബസുകളിൽ മാത്രമായിരിക്കും സ്ത്രീകൾക്ക് സൗജന്യ യാത്ര ഉണ്ടാവുക. സംസ്ഥാനത്തിൽ ആകെ 4700 ഓളം കെഎസ്ആർടിസി ബസ്സുകൾ ആണുള്ളത് ഇതിൽ മൂവായിരത്തോളം ഓർഡിനറി ബസുകളാണുള്ളത്. ഇവയിൽ 300 സിറ്റി ഫാസ്റ്റുകൾ ഒഴികെയുള്ള ബസ്സുകളിൽ ആവും സ്ത്രീകൾക്ക് സൗജന്യ യാത്ര നൽകുക. എത്ര സ്ത്രീകൾ യാത്രയ്ക്കായി കെഎസ്ആർടിസിയെ ആശ്രയിക്കുന്നുണ്ട് എന്ന് നേരത്തെ തന്നെ കണക്കെടുത്തിരുന്നു. കണക്കുകൾ അനുസരിച്ച്, പ്രതിദിനം പന്ത്രണ്ട് ലക്ഷത്തോളം സ്ത്രീ യാത്രക്കാർ കെഎസ്ആർടിസിയെ ആശ്രയിക്കുന്നുണ്ടെന്നാണ് വ്യക്തമാക്കുന്നത്.

കെഎസ്ആർടിസി ടൂർ പാക്കേജ്

സ്ത്രീകൾക്ക് സൗജന്യ യാത്ര അനുവദിക്കുന്നതിലൂടെ വലിയ കടബാധ്യത സർക്കാരിന്റെ തലയിലാകുമെന്നാണ് വിലയിരുത്തൽ. എന്നാൽ ഇതിനെയെല്ലാം കെഎസ്ആർടിസി ബജറ്റ് ടൂറിസം ഉപയോ​ഗിച്ച് നികത്താനാകോ എന്നൊരു സംസാരവും പൊതുവെയുണ്ട്. സംസ്ഥാത്ത് ഓരോ മാസവും കെഎസ്ആർടിസി പ്രത്യേക ടൂർ പാക്കേജുകൾ ഒരുക്കുന്നുണ്ട്. ഇപ്പോഴിതാ, ബസിലുള്ള വിനോദയാത്രകൾക്കു പിന്നാലെ തീവണ്ടിയിലും വിമാനത്തിലും കപ്പലിലും കയറിയുള്ള ടൂർ പാക്കേജുകളും കൂടെ കെഎസ്ആർടിസി ഉൾപ്പെടുത്തുമെന്നാണ് വിവരം.

ടൂറിസം പാക്കേജിൻ്റെ ഭാ​ഗമായി കെഎസ്ആർടിസി വൻ ഡിമാൻഡിലാണ് പ്രവർത്തിക്കുന്നത്. ഇന്ത്യയിലുടനീളവും ഗൾഫ് രാജ്യങ്ങൾ ഉൾപ്പെടെ അന്താരാഷ്ട്രതലത്തിലേക്കും വിനോദസഞ്ചാരികളെയെത്തിക്കാൻ കെഎസ്ആർടിസി പദ്ധതിയിടുന്നത്. കഴിഞ്ഞ വർഷം മാത്രം ബജറ്റ് ടൂറിസംവഴി കെഎസ്ആർടിസി നേടിയത് 42 കോടി രൂപയാണ്. ഈ വർഷം മേയ് 17 വരെയുള്ള കണക്കുകൾ പരിശോധിച്ചാൽ 23 കോടി രൂപയാണ് നേടിയത്. അഞ്ചുമാസമാകും മുൻപേ കഴിഞ്ഞവർഷത്തിൻ്റെ പാതിയിലേറെയായി വരുമാനമെന്നതാണ് പ്രത്യേകത.

English Summary:

Kerala now implement travel entirely free for all female citizens. According to official guidelines, travel is not universally free for all women in Kerala. No concessions or free transits are permitted on premium, long-distance, or luxury bus.

ഉത്തരമലബാറിലെ ദക്ഷിണകാശി എന്നറിയപ്പെടുന്ന കണ്ണൂരിലെ കൊട്ടിയൂർ വൈശാഖ മഹോത്സവത്തിന് (Kottiyoor Vaishakha Mahotsavam 2026) തുടക്കമാവുകയാണ്. മെയ് 23-ന് ആരംഭിച്ച് ജൂൺ 24-ന് സമാപിക്കുന്ന 28 ദിവസം നീണ്ടുനിൽക്കുന്ന ഈ ഉത്സവ നഗരിയിലേക്ക് ലക്ഷക്കണക്കിന് തീർത്ഥാടകരാണ് എത്തിച്ചേരാൻ ഒരുങ്ങുന്നത്. ഇത്തവണ കൊട്ടിയൂരിലേക്ക് യാത്ര തിരിക്കുന്ന ഭക്തർക്ക് ഏറ്റവും വലിയ ആശ്വാസമാകുന്നത് കെഎസ്ആർടിസി (KSRTC) ഒരുക്കുന്ന വിപുലമായ യാത്രാ സൗകര്യങ്ങളുണ്ട്. എല്ലാ വർഷത്തെയും പോലെ തന്നെ ഇക്കൊല്ലവും കെഎസ്ആർടിസി സർവീസുണ്ടാകും.

തീർത്ഥാടകരുടെ തിരക്ക് കണക്കിലെടുത്ത് മലബാറിലെ വിവിധ ഡിപ്പോകളിൽ നിന്ന് കൊട്ടിയൂരിലേക്ക് കെഎസ്ആർടിസി പ്രത്യേക ബസ് സർവീസുകൾ ഒരുക്കുന്നതായിരിക്കും. കണ്ണൂർ, തലശ്ശേരി, പയ്യന്നൂർ, കാഞ്ഞങ്ങാട്, കോഴിക്കോട്, മാനന്തവാടി, സുൽത്താൻ ബത്തേരി എന്നിവിടങ്ങളിൽ നിന്നാണ് സാധാരണയായി കൊട്ടിയൂർ ക്ഷേത്ര പരിസരത്തേക്ക് നേരിട്ട് പ്രത്യേക ചെയിൻ സർവീസുകൾ ഉണ്ടായിരിക്കുന്നത്. ഇതുകൂടാതെ വിവിധ ജില്ലകളിൽ നിന്ന് കെഎസ്ആർടിസി ബഡ്ജറ്റ് ടൂറിസം സെൽ വഴി കൊട്ടിയൂർ സ്പെഷ്യൽ പാക്കേജുകളും ഒരുക്കുന്നുണ്ട്.

ALSO READ: മൺസൂൺ എത്തി മക്കളേ; മഴക്കാലത്ത് കേരളത്തിലെ ഈ സ്ഥലങ്ങളിലേക്ക് പോകല്ലേ, വൻ അപകടമാണ്

സ്ത്രീ പ്രവേശനത്തിനുള്ള തീയതികളും സമയക്രമവും

കൊട്ടിയൂർ ഉത്സവത്തിൻ്റെ ഏറ്റവും വലിയ പ്രത്യേകതയാണ് ചില ദിവസങ്ങളിൽ സ്ത്രീകൾക്ക് ക്ഷേത്രത്തിലേക്ക് പ്രവേശനമില്ല എന്നത്. ചില പ്രത്യേക ചടങ്ങുകൾ നടക്കുന്ന ദിവസങ്ങളിലാണ് സ്ത്രീകൾക്ക് അക്കരെ കൊട്ടിയൂർ ക്ഷേത്രത്തിലേക്ക് പ്രവേശനം അനുവദിക്കാത്തത്. ഉത്സവത്തിന്റെ ആദ്യ ദിവസങ്ങളിലും അവസാന ദിവസങ്ങളായ മകം നക്ഷത്ര പൂജ, ഒടുക്കത്തെ അടിയന്തിരം എന്നിവ നടക്കുമ്പോഴും സ്ത്രീകൾക്ക് പ്രവേശനമുണ്ടാകില്ല. ഈ ദിവസങ്ങളിൽ ഇക്കരെ കൊട്ടിയൂർ ക്ഷേത്രത്തിൽ മാത്രമേ സ്ത്രീകൾക്ക് ദർശനം നടത്താനാകു.

ഭക്തർ അറിയാൻ

വനമേഖലയോട് ചേർന്നുള്ള ക്ഷേത്രമായതിനാൽ കൊട്ടിയൂരിൽ കർശനമായ പ്ലാസ്റ്റിക് നിരോധനം ഏർപ്പെടുത്തിയിട്ടുണ്ട്. ഭക്തർ യാതൊരു കാരണവശാലും പ്ലാസ്റ്റിക് കവറുകളോ കുപ്പികളോ ബാവലി പുഴയിലോ വനത്തിലോ ഉപേക്ഷിക്കരുതെന്ന് അധികൃതരുടെ പ്രത്യേക നിർദ്ദേശമുണ്ട്. പരിസ്ഥിതി സൗഹൃദപരമായ രീതിയിൽ മാത്രമേ ദർശനം നടത്താവൂ എന്ന് മലബാർ ദേവസ്വം ബോർഡും വനംവകുപ്പും അറിയിച്ചിട്ടുണ്ട്.

ദക്ഷയാഗ ഭൂമിയിലൂടെ ഒഴുകുന്ന ബാവലി പുഴയിൽ മുങ്ങി നിവർന്നാണ് ഭക്തർ അക്കരെ കൊട്ടിയൂരിലേക്ക് ദർശനത്തിന് എത്തുന്നത്. എന്നാൽ മഴക്കാലമായതിനാൽ പുഴയിലെ അടിയൊഴുക്കുകൾ ശ്രദ്ധിക്കണമെന്നും വനംവകുപ്പിൻ്റെയും ലൈഫ് ഗാർഡുകളുടെയും നിർദ്ദേശങ്ങൾ പാലിക്കണമെന്നും അറിയിപ്പുണ്ട്.

കൊട്ടിയൂരിൻ്റെ ഐതിഹ്യം

മുപ്പത്തിമുക്കോടി ദേവകളും ഒന്നിച്ച് കൂടിയ ദക്ഷയാഗം നടന്ന സ്ഥലമാണ് കൊട്ടിയൂർ എന്നാണ് വിശ്വാസികൾക്കിടയിൽ അറിയപ്പെടുന്നത്. അതിനാൽ ഇവിടെ എത്താൻ കഴിയുന്നത് പുണ്യകർമ്മമായി കണക്കാക്കപ്പെടുന്നു. പരമശിവനെ സതി വിവാഹം ചെയ്തത് ഇഷ്ടപ്പെടാത്ത സതിയുടെ പിതാവായ ദക്ഷൻ 14 ലോകത്തെയും ശിവനൊഴികെ എല്ലാ ദേവകളെയും ക്ഷണിച്ച് യാഗം നടത്തി. ക്ഷണിച്ചില്ലെങ്കിലും സതി യാഗം കാണാൻ എത്തി. അവിടെവച്ച് പരമശിവനെ ദക്ഷൻ അവഹേളിച്ചതിൽ ദുഃഖിതയായ സതി യാഗാഗ്നിയിൽ ചാടി ജീവൻ ഹനിച്ചു.

കൈലാസത്തിലിരുന്ന പരമശിവൻ ഇതറിഞ്ഞ് കോപാകുലനായി ജഡ പറിച്ചെടുത്ത് നിലത്തടിച്ചു. അതിൽ നിന്നുമാണ് വീരഭദ്രൻ ജനിച്ചത്. വീരഭദ്രൻ യാഗശാലയിലെത്തി ദക്ഷന്റെ താടി പറിച്ചെടുത്ത്, ശിരസറുത്തു. ശിവൻ സംഹാരരുദ്രനായി താണ്ഡവമാടി. ദേവൻമാരും ഋഷിമാരും ബ്രഹ്മവിഷ്ണുമാരും ശിവനെ സമീപിച്ചാണ് ഒടുവിൽ ശാന്തനാക്കിയത്. ദക്ഷന്റെ തല അതിനിടയിൽ ചിതറി പോയതിനാൽ ആടിന്റെ തല ചേർത്ത് ശിവൻ ദക്ഷനെ വീണ്ടും ജനിപ്പിച്ചു. യാഗം പൂർത്തിയാക്കി പിന്നീട് ആ പ്രദേശം വനമായി മാറി എന്നാണ് ഐതിഹ്യം പറയുന്നത്.

English Summary:

Kottiyoor Temple Visit 2026, Conduct On May 23 To June 24th. In This Occation KSRTC Special Service For Devotees. Check The Details Before Your Travel And Know The Restrictions.

കേരളം ഇക്കൊല്ലത്തെ കാലവർഷത്തെ വരവേൽക്കാൻ ഒരുങ്ങിക്കഴിഞ്ഞു. സംസ്ഥാനത്തിൻ്റെ വിവിധ പ്രദേശങ്ങളിലായി ശക്തമായ മഴ മെയ് പാതിയോടെ തന്നെ ലഭിച്ച് തുടങ്ങിയിരുന്നു. മഴ ആരംഭിക്കുന്നതോടെ പ്രകൃതി അതിൻ്റെ പൂർണതയിലേക്ക് എത്താൻ തുടങ്ങുന്നു. കൊടും ചൂടിൽ ഉണങ്ങിയ മരങ്ങളിൽ തളിരിലകൾ മുളക്കുന്നതും, വരണ്ടുണങ്ങിയ പുഴകൾ ആർത്തലച്ച് ഒഴുകുന്നതും, പതഞ്ഞൊഴുകുന്ന വെള്ളച്ചാട്ടങ്ങളും വശ്യതയോടെ നോക്കി നിൽക്കുന്ന കാടും കടലുമെല്ലാം കേരളത്തിൻ്റെ മാത്രം വിസ്മയകാഴ്ച്ചകളാണ്.

കനത്ത മഴ പെയ്തു തുടങ്ങുന്നതോടെ പ്രകൃതി കൂടുതൽ പച്ചപ്പണിഞ്ഞ് അതീവ സുന്ദരിയാകുന്നത് കാണാൻ വിനോദ സഞ്ചാരികളും എത്താറുണ്ട്. ഈ സമയത്ത് പ്രകൃതി കാണാൻ എത്ര സുന്ദരമാണെങ്കിലും കേരളത്തിലെ ചില വിനോദസഞ്ചാര കേന്ദ്രങ്ങൾ കടുത്ത മരണക്കെണികളായി മാറാറുണ്ട്. അപ്രതീക്ഷിതമായ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ, ശക്തമായ അടിയൊഴുക്കുകൾ എന്നിവ മുന്നിൽക്കണ്ട് മഴക്കാലത്ത് നമ്മൾ നിർബന്ധമായും ഒഴിവാക്കേണ്ട ചില പ്രധാന ടൂറിസ്റ്റ് സ്പോട്ടുകൾ നമ്മുടെ നാട്ടിൽ തന്നെയുണ്ട്. മൺസൂൺ ഭംഗി ആസ്വദിക്കാനെത്തുന്ന സഞ്ചാരികൾ അറിഞ്ഞിരിക്കേണ്ട കാര്യങ്ങളും പോകാൻ പാടില്ലാത്ത സ്ഥലങ്ങളും ഏതെല്ലാമെന്ന് നമുക്ക് അറിയാം.

ALSO READ: മൺറോ തുരുത്തിലേക്ക് വിട്ടാലോ….; ഈ സ്ഥലങ്ങളൊന്നും മിസ്സാക്കല്ലേ

മലയോര പാതകളും ചുരങ്ങളും

മഴക്കാലത്ത് ഏറ്റവും കൂടുതൽ അപകടങ്ങൾ റിപ്പോർട്ട് ചെയ്യപ്പെടുന്നത് മലയോര മേഖലകളിലാണ്. വയനാട് ചുരം, മൂന്നാർ ഗ്യാപ്പ് റോഡ്, ഇടുക്കിയിലെ മറ്റ് മലയോര പാതകൾ, നിലമ്പൂർ-ഊട്ടി റോഡ് തുടങ്ങിയ പ്രദേശങ്ങളിലൂടെയുള്ള യാത്ര മഴക്കാലത്ത് കഴിവതും ഒഴിവാക്കുന്നതാണ് നല്ലത്. കനത്ത മഴയിൽ ഈ റൂട്ടുകളിൽ കല്ലുകളും മണ്ണും ഇടിഞ്ഞുവീഴാൻ വൻ സാധ്യതയുണ്ട്. കൂടാതെ പകൽ സമയങ്ങളിൽ പോലും കാഴ്ച പൂർണ്ണമായി മറയ്ക്കുന്ന മൂടൽമഞ്ഞുണ്ടാകാറുണ്ട്. അതിനാൽ അപകടങ്ങൾ പതുങ്ങിയിരിക്കുന്ന സ്ഥലങ്ങളാണ് ഇതെല്ലാം.

പുഴകളും വെള്ളച്ചാട്ടങ്ങളും

വേനൽക്കാലത്ത് നമ്മൾ ഏറെ ആസ്വദിച്ച കാണാൻ പോകുന്നത് വെള്ളച്ചാട്ടങ്ങളും പുഴകളുമാണ്. പക്ഷേ ഈ സമയത്ത് ഏറ്റവും കൂടുതൽ രൗദ്രഭാവത്തിൽ കാണപ്പെടുന്നതും പുഴയും വെള്ളച്ചാട്ടങ്ങളുമാണ്. അതിരപ്പിള്ളി-വാഴച്ചാൽ, തൊമ്മൻകുത്ത്, തുഷാരഗിരി, വളഞ്ഞങ്ങാനം തുടങ്ങിയ വെള്ളച്ചാട്ടങ്ങളിലേക്ക് പോവുകയോ അധികൃതരുടെ നിർദ്ദേശങ്ങൾ അവ​ഗണിച്ച് ഇറങ്ങുകയോ ചെയ്യരുത്. കേരളത്തിൽ മഴക്കാലത്ത് അപകടം പതുങ്ങിയിരിക്കുന്ന നിരവധി വെള്ളച്ചാട്ടങ്ങളുണ്ട്. പുഴകളിലും ഇറങ്ങുമ്പോൾ സൂക്ഷിക്കണം. പല സ്ഥലങ്ങളിലും അപ്രതീക്ഷിതമായി മലവെള്ളപ്പാച്ചിൽ ഉണ്ടാകാനുള്ള സാധ്യത ഏറെയാണ്.

കടൽത്തീരങ്ങളും ജലാശയങ്ങളും

മൺസൂൺ കാലത്ത് കടൽ ദൂരെ നിന്ന് കാണാൻ ഭംഗിയാണെങ്കിലും വെള്ളത്തിലേക്ക് ഇറങ്ങുന്നത് അതീവ അപകടകരമാണ്. ശംഖുമുഖം ബീച്ച്, കോഴിക്കോട് ബീച്ച്, ഫോർട്ട് കൊച്ചി, ആലപ്പുഴ ബീച്ച് തുടങ്ങിയ സ്ഥലങ്ങളിൽ മഴക്കാലത്ത് ഇറങ്ങുന്നതും കുളിക്കുന്നതും ഒവിവാക്കേണ്ടതാണ്. മഴയുള്ള സമയങ്ങളിൽ കടൽ അതീവ പ്രക്ഷുബ്ധമായിരിക്കും. ശക്തമായ കാറ്റും വലിയ തിരമാലകളും കടലാക്രമണവും പതിവായതിനാൽ അധികൃതരുടെ നിർദ്ദേശങ്ങൾ പാലിക്കണം. ട്രാഫിക് പോലീസിന്റെയോ ലൈഫ് ഗാർഡുകളുടെയോ മുന്നറിയിപ്പുകൾ അവഗണിച്ച് ബീച്ചുകളിലിറങ്ങാൻ ശ്രമിക്കരുത്.

മഴക്കാല യാത്രകളിൽ ശ്രദ്ധിക്കേണ്ടത്

• യാത്ര തിരിക്കും മുൻപ് കാലാവസ്ഥാ വകുപ്പിൻ്റെ അലർട്ടുകൾ പരിശോധിക്കുക. ഡാമുകളുടെയും ഷട്ടറുകൾ തുറക്കുന്നതുൾപ്പെടെ അറിഞ്ഞിരിക്കണം.
• പരിചയമുള്ള സ്ഥലമാണെങ്കിൽ പോലും മഴക്കാലത്ത് പുഴകളിലോ തോടുകളിലോ കുളിക്കാനോ മറ്റോ ഇറങ്ങുന്നത് പൂർണമായും ഒഴിവാക്കുക.
• കനത്ത മഴയുള്ളപ്പോൾ വനമേഖലകളിലേക്കോ മൊട്ടക്കുന്നുകളിലേക്കോ പോകരുത്. ഇടിമിന്നൽ സാധ്യതയുള്ളതിനാൽ അപകടം വളരെ വലുതാണ്.

English Summary:

Planning a trip to Kerala this Monsson rainy season. Here Is the essential monsoon travel guide detailing high-risk zones, dangerous waterfalls, landslide areas, and safety rules. Also says how to travel in rainy season safety.

അഷ്ടമുടിക്കായലും കല്ലടയാറും ചേർന്ന് തീർത്ത മനോഹരമായ ഒരു പച്ചത്തുരുത്താണ് കൊല്ലം ജില്ലയിലെ മൺറോ തുരുത്ത് (Munroe Island). ന​ഗരത്തിലെ തിരക്കുകളിൽ നിന്നെല്ലാം ഓടിയൊളിക്കാൻ പറ്റിയ ഒരിടമാണ് മൺറോ തുരുത്ത്. കായൽക്കാറ്റും ചീനവലകളും കണ്ടൽക്കാടുകളും നിറഞ്ഞ ഇവിടേക്ക് ഒരു യാത്ര പ്ലാൻ ചെയ്യുന്നുണ്ടെങ്കിൽ അറിഞ്ഞിരിക്കേണ്ട കുറച്ച് കാര്യങ്ങളുണ്ട്. മൺറോ തുരുത്തിൽ എത്തിയാൽ വഞ്ചിയിൽ കയറുന്നത് മാത്രമല്ല വേറെയുമുണ്ട് കാര്യങ്ങൾ. അവിടെയെത്തിയാലും ഒരിക്കലും മിസ്സ് ചെയ്യാൻ പാടില്ലാത്ത ചില കാഴ്ചകളും സ്ഥലങ്ങളും ഏതെല്ലാമെന്ന് നമുക്ക് മനസ്സിലാക്കാം.

1. കനാലുകളിലൂടെയുള്ള വഞ്ചി യാത്ര

മൺറോ തുരുത്തിൻ്റെ യഥാർത്ഥ ഭംഗി ആസ്വദിക്കണമെങ്കിൽ വലിപ്പമേറിയ ബോട്ടുകളല്ല, മറിച്ച് കൊച്ചു വഞ്ചികൾ അവിടെയുണ്ടാകും. അതല്ലെങ്കിൽ കുട്ടത്തോണികൾ തിരഞ്ഞെടുക്കാവുന്നതാണ്. വീടുകളുടെ തൊട്ടുമുന്നിലൂടെയുള്ള ചെറിയ കനാലുകളിലൂടെ, കൈതപ്പൂക്കളുടെയും കണ്ടൽച്ചെടികളുടെയും തണലിലൂടെയുള്ള ആ യാത്ര നിങ്ങൾക്ക് ഒരിക്കലും മറക്കാനാകാത്ത അനുഭവമാണ് നൽകുന്നത്.

ALSO READ: ഇനി പൂക്കളുടെ വിസ്മയക്കാഴ്ച! ഊട്ടി പുഷ്പമേള ഉടൻ ആരംഭിക്കും; തീയതിയും, ടിക്കറ്റ് നിരക്കും

2. കണ്ടൽക്കാടുകൾക്കിടയിലൂടെ

കനാലുകളുടെ ഇരുവശത്തുമായി വളർന്നുനിൽക്കുന്ന കണ്ടൽക്കാടുകളാണ് ഇവിടുത്തെ പ്രധാന ആകർഷണം. വഞ്ചിയിൽ പോകുമ്പോൾ നമുക്ക് കൈകൊണ്ട് തൊട്ടുരുമ്മാൻ സാധിക്കുന്ന വിധത്തിലാണഅ കണ്ടൽ കാടുകൾ വളർന്ന് നിൽക്കുന്നത്. കണ്ടൽകാടിനിടയിലൂടെ വഞ്ചിയിലൂടെ യാത്ര ചെയ്യുന്നത് ഒരു പ്രത്യേക അനുഭവം തന്നെയാണ്.

3. കാണാം സൂര്യാസ്തമയം

അഷ്ടമുടിക്കായലിൻ്റെ പശ്ചാത്തലത്തിൽ മൺറോ തുരുത്തിലെ സൂര്യാസ്തമയം കാണാനായി വൈകുന്നേരം തന്നെ പോകണം. ഏതൊരാൾക്കും കണ്ണിന് കുളിർമയേകുന്ന കാഴ്ചയാണിത്. വൈകുന്നേരങ്ങളിൽ കായൽക്കരയിലിരുന്ന് ഭൂമിയോട് യാത്ര പറഞ്ഞ് പോകുന്ന സൂര്യൻ കായലിലേക്ക് താഴ്ന്നുപോകുന്നത് കാണാൻ നിരവധി സഞ്ചാരികൾ ഇവിടെയെത്താറുള്ളത്.

4. കായൽ വിഭവങ്ങൾ

മൺറോ തുരുത്തിലെത്തിയാൽ സഞ്ചാരികൾ ഏറെ ആസ്വദിക്കുന്ന ഒന്നാണ് കായൽ വിഭവങ്ങൾ. യാത്രകൾ എപ്പോഴും പൂർണ്ണമാകുന്നത് നമ്മൾ പോകുന്ന നാടിൻ്റെ ഭക്ഷണം കൂടി കഴിക്കുമ്പോഴാണ്. മൺറോ തുരുത്തിലെ നാടൻ ഷാപ്പുകളിലെയും ഹോം സ്റ്റേകളിലെയും കരിമീൻ പൊള്ളിച്ചതും, കൊഞ്ച് ഫ്രൈയും, കപ്പയും മീൻകറിയും കഴിക്കാൻ ദൂരദേശങ്ങളിൽ നിന്ന് പോലും ആളുകൾ എത്താറുണ്ട്. നാടൻ രുചികൾ ഇഷ്ടപ്പെടുന്നവർ ഇതൊരിക്കലും മിസ്സാക്കരുത്.

5. പ്രകൃതിയോട് ചേർന്ന് ഒരു താമസം

തുരുത്തിൻ്റെ ഭംഗി പൂർണ്ണമായി ആസ്വദിക്കാൻ ഒരു ദിവസമെങ്കിലും ഇവിടെ താമസിക്കുന്നത് വളരെ നല്ലതാണ്. കായലിനോട് ചേർന്നുള്ള ഒട്ടനവധി ബഡ്ജറ്റ് ഫ്രണ്ട്ലി ഹോം സ്റ്റേകളും റിസോർട്ടുകളും ഇവിടെ ലഭ്യമാണ്. രാവിലെ എഴുന്നേൽക്കുമ്പോൾ കാണുന്ന കായലിലെ സൗന്ദര്യം മനസ്സിന് വലിയ ആശ്വാസം നൽകും.

യാത്ര പ്ലാൻ ചെയ്യുമ്പോൾ ശ്രദ്ധിക്കാൻ

മികച്ച സമയം: സെപ്റ്റംബർ മുതൽ മാർച്ച് വരെയുള്ള മാസങ്ങളിലാണ് ഇവിടം സന്ദർശിക്കാൻ ഏറ്റവും അനുയോജ്യമായ സമയം.

സമയം പ്രധാനം: വഞ്ചി യാത്രയ്ക്കായി ഒന്നുകിൽ അതിരാവിലെ അല്ലെങ്കിൽ വൈകുന്നേരം സമയം തിരഞ്ഞെടുക്കുന്നതാണ് ഏറ്റവും നല്ലത്. ഉച്ചസമയത്ത് കടുത്ത വെയിലിൽ അവിടേക്ക് പോകാതിരിക്കുക.

എങ്ങനെ എത്തിച്ചേരാം: കൊല്ലം ടൗണിൽ നിന്നും ഏകദേശം 25 കിലോമീറ്റർ ദൂരമാണ് മൺറോ തുരുത്തിലേക്കുള്ളത്. മൺറോ തുരുത്തിലേക്ക് ട്രെയിൻ മാർഗ്ഗവും റോഡ് മാർഗ്ഗവും എളുപ്പത്തിൽ എത്തിച്ചേരാം.

English Summary:

Munroe Island (Munroe Thuruth), a major tourism landmark in Kollam. ​It got a fresh lease of life as tourists started coming in the last leg of the summer holidays. Shikara boats have been in high demand this year.