മൂന്നാറിന്റെ ഭംഗി ആസ്വദിക്കാൻ ആഗ്രഹിക്കുന്നവരാണ് നമ്മളിൽ ഏറെയും. ദിവസേന ലക്ഷകണക്കിന് സഞ്ചാരികൾ ഒഴുകിയെത്തുന്ന കേരളത്തിൻ്റെ കശ്മീരാണ് നമ്മുടെ സ്വന്തം ഇടുക്കിയിലെ മൂന്നാർ. ഇക്കഴിഞ്ഞ രണ്ടുമാസം മൂന്നാറിലേക്ക് പോകാൻ സഞ്ചാരികൾക്ക് കാരണങ്ങൾ നിരവധിയായിരുന്നു. ഒന്ന് നീലകുറിഞ്ഞി രണ്ട് യാത്രയ്ക്ക് അനുയോജ്യമായ കാലാവസ്ഥ. എന്നാൽ മിക്ക സ്ഥലങ്ങളിലും നീലക്കുറിഞ്ഞി വസന്തം കഴിഞ്ഞ മാസം അവസാനത്തോടെ തന്നെ അവസാനിച്ചിരുന്നു. എന്നാൽ ഇപ്പോഴിതാ നിലക്കുറിഞ്ഞി കാണാൻ കഴിയാത്തവർക്ക് വീണ്ടുമൊരു സന്തോഷ വാർത്ത എത്തിയിരിക്കുകയാണ്.

പ്രകൃതിസ്നേഹികൾക്കും ട്രെക്കിംഗ് പ്രേമികൾക്കും ഒന്നാന്തരം അവസരമൊരുക്കുകയാണ് നമ്മുടെ സ്വന്തം ചാർളി സിനിമയിലൂടെ പ്രശസ്തമായ മീശപ്പുലിമല. മഞ്ഞിൻ താഴ്‌വരകളെ നീലപ്പട്ടു ചാർത്തുന്ന നീലക്കുറിഞ്ഞി വസന്തം കാണാനും സമുദ്രനിരപ്പിൽ നിന്ന് 8,640 അടി ഉയരമുള്ള കൊടുമുടി കീഴടക്കാനും ആഗ്രഹിക്കുന്നവർക്ക് നേരെ മീശപ്പുലിമലയിലേക്ക് വണ്ടിവിടാം. എട്ട് മലനിരകളിലൂടെയുള്ള മനോഹരമായ ട്രെക്കിംഗിന് പേരുകേട്ട, പശ്ചിമഘട്ടത്തിലെ രണ്ടാമത്തെ ഏറ്റവും ഉയർന്ന ഈ കൊടുമുടിയാണ് മീശപ്പുലിമല.

ALSO READ: വന്ദേ ഭാരതും അമൃത് ഭാരതും തമ്മിലുള്ള വ്യത്യാസം എന്ത്?

ട്രെക്കിംഗ് വിവരങ്ങളും ടിക്കറ്റ് നിരക്കും

സാധാരണ മൂന്നാറിലേക്ക് പോകുന്നതുപോലെയല്ല മീശപ്പുലിമലയിലേക്കുള്ള യാത്ര. അവിടെ സർക്കാരിൻ്റെയും ഫോറസ്റ്റ് ഡിപ്പാർട്ട്മെൻ്റിൻ്റെയും കർശനമായ നിർദ്ദേശങ്ങൾ പാലിക്കണം. സൈലന്റ് വാലി എസ്റ്റേറ്റ് വഴിയുള്ള, കേരള ഫോറസ്റ്റ് ഡെവലപ്‌മെന്റ് കോർപ്പറേഷൻ ഒരുക്കുന്ന വാഹനത്തിൽ വിനോദസഞ്ചാരികൾക്ക് മീശപ്പുലിമല ബേസ് ക്യാമ്പിലെത്താം. അവിടെ നിന്നാണ് കാഴ്ചകൾ ആസ്വദിച്ചുകൊണ്ടുള്ള യാത്ര തുടങ്ങുന്നത്. ഏകദേശം അഞ്ച് കിലോമീറ്റർ ദൂരം ഓഫ്‌റോഡ് യാത്രയുണ്ട്. ഇതിനായി 1,416 രൂപ നിരക്കിൽ 4 മണിക്കൂർ ദൈർഘ്യമുള്ള ഒരു പ്രത്യേക പാക്കേജ് വനം വകുപ്പ് ഒരുക്കിയിട്ടുണ്ട്.

യാത്ര, ലഘുഭക്ഷണം, ഗൈഡിന്റെ സേവനം എന്നിവ ഇതിൽ ഉൾപ്പെടുന്നതാണ് ഈ നിരക്ക്. ഏത് പ്രായത്തിലുള്ളവർക്കും ഈ ട്രെക്കിങ്ങിൽ പങ്കെടുക്കാമെന്നുള്ളത് വളരെ വലിയ പ്രത്യേകതയാണ്. നിലവിൽ നീലക്കുറിഞ്ഞി കാണുന്നതിനായി ഒരു ദിവസം പരമാവധി 750 പേർക്ക് മാത്രമേ മീശപ്പുലിമലയിലേക്ക് പ്രവേശനം അനുവദിക്കൂ. രാവിലെ ആറ് മണി മുതൽ ബേസ് ക്യാമ്പിൽ നിന്നും റോഡോ വാലിയിൽ നിന്നും ട്രെക്കിംഗ് ആരംഭിക്കും.

യാത്രക്കാർ ശ്രദ്ധിക്കേണ്ടത്

12 വർഷത്തിലൊരിക്കൽ വിരിഞ്ഞ് മലനിരകളെ നീലപ്പട്ടു ചാർത്തുന്ന നീലക്കുറിഞ്ഞി പശ്ചിമഘട്ടത്തിന്റെ അപൂർവ്വമായ ജൈവസമ്പത്തുകൂടിയാണ്. ഓരോ തവണ പൂത്തതിനു ശേഷവും വിത്തുകൾ വിതറി സ്വയം നശിച്ചുപോകുന്ന കുറിഞ്ഞി ചെടികൾ വീണ്ടും മുളച്ചുവരാൻ നീണ്ട 12 വർഷങ്ങൾ കാത്തിരിക്കണം. ഈ അപൂർവ്വ സസ്യത്തെ സംരക്ഷിക്കുന്നതിനായി വനംവകുപ്പും ഗവൺമെന്റും കർശനമായ നിയമങ്ങൾ ഏർപ്പെടുത്തിയിട്ടുണ്ട്.

സഞ്ചാരികൾ നീലക്കുറിഞ്ഞി ചെടികൾ വേരോടെ പിഴുതെടുക്കുകയോ, പൂക്കൾ പറിച്ചെടുക്കുകയോ ചെയ്യുന്നത് കർശനമായി നിരോധിച്ചിരിക്കുന്ന കാര്യമാണ്. വന്യജീവി സംരക്ഷണ നിയമപ്രകാരം ഷെഡ്യൂൾ വണ്ണിൽ പെട്ട സസ്യമാണ് നീലക്കുറിഞ്ഞി. പൂക്കളും ചെടികളും പറിക്കുന്നതും നശിപ്പിക്കുന്നതും 25,000 രൂപ പിഴയും മൂന്ന് വർഷം വരെ തടവും ലഭിക്കാവുന്ന കുറ്റമാണ്. ചെടികൾ നശിപ്പിച്ചാൽ കർശന നടപടിയെടുക്കുമെന്ന കാര്യം ഉറപ്പാണ്.

English Summary:

The second-highest peak in the Western Ghats, known for its 8-hill panoramic high-altitude trek, Meeshapulimala. Now, it has another spectacle for visitors, the rare neelakurinji flowers.

ഇന്ത്യൻ റെയിൽവേയുടെ ആധുനികീകരണ പാതയിൽ വിപ്ലവകരമായ മാറ്റങ്ങൾ സൃഷ്ടിച്ച രണ്ട് പ്രീമിയം-ബജറ്റ് സർവീസുകളാണ് വന്ദേ ഭാരത് എക്സ്പ്രസും (Vande Bharat Express) അമൃത് ഭാരത് എക്സ്പ്രസും (Amrit Bharat Express). വേഗതയേറിയതും സുരക്ഷിതവും സുഖപ്രദവുമായ യാത്രാനുഭവം നൽകാൻ രൂപകൽപ്പന ചെയ്ത ഈ രണ്ട് ട്രെയിനുകളും തികച്ചും വ്യത്യസ്തമായ യാത്രാവിഭാഗങ്ങളെയാണ് സമ്മാനിക്കുന്നത്. അതുകൊണ്ട് തന്നെ ഇവ തമ്മിൽ പല കാര്യങ്ങളിലും വലിയ വ്യത്യാസവുമുണ്ട്. നിങ്ങൾ വരും ദിവസങ്ങളിൽ ഇവയിലേതിലെങ്കിലും യാത്ര ചെയ്യാൻ പ്ലാൻ ചെയ്യുന്നുണ്ടെങ്കിൽ തീർച്ചയായും അറിഞ്ഞിരിക്കേണ്ട ചില കാര്യങ്ങൾ നമുക്ക് നോക്കാം.

ALSO READ: ബെംഗളൂരു നമ്മ മെട്രോയിലെ ആദ്യ യാത്രയിൽ അബദ്ധം പറ്റരുത്; ഇക്കാര്യങ്ങൾ അറിഞ്ഞിരിക്കണം

വന്ദേ ഭാരതും അമൃത് ഭാരതും തമ്മിലുള്ള വ്യത്യാസം

വന്ദേ ഭാരത്: ബിസിനസ്സ് യാത്രക്കാർ, വേഗത്തിൽ ലക്ഷ്യസ്ഥാനത്ത് എത്തേണ്ടവർ, എയർ കണ്ടീഷൻഡ് യാത്രാസൗകര്യം ആഗ്രഹിക്കുന്നവർ എന്നിവരെ ലക്ഷ്യമിട്ടുള്ളതാണ് വന്ദേ ഭാരത് എക്സ്പ്രസ്. പ്രത്യേക എൻജിനില്ലാത്ത സെൽഫ് പ്രൊപ്പൽഡ് സാങ്കേതികവിദ്യ ഉപയോ​ഗിച്ചാണ് ഇതിൻ്റെ പ്രവർത്തനം. ഇതിൻ്റെ പരമാവധി വേഗത 160 - 180 km/h ആണ്. പൂർണ്ണമായും എയർ കണ്ടീഷൻഡ് ആണ് അതായത് എല്ലാ കോച്ചുകളും എസിയിലാണ് പ്രവർത്തിക്കുന്നത്. ഓട്ടോമാറ്റിക് സ്ലൈഡിങ് വാതിലുകൾ, റിക്ലൈനിങ് സീറ്റുകൾ എന്നിവയാണ് ഇതിലെ എടുത്തുപറയേണ്ട മറ്റൊരു പ്രത്യേകത.

പ്രീമിയം സേവനങ്ങളും ഭക്ഷണവും ഉൾപ്പെടുന്നതിനാൽ വന്ദേ ഭാരതിലെ ടിക്കറ്റ് നിരക്കുകളും ഉയർന്നതാണ്. പുതുതായി റെയിൽവേ ദീർഘദൂര യാത്രയ്ക്കായി അവതരിപ്പിച്ച വന്ദേ ഭാരത് സ്ലീപ്പർ പതിപ്പിൽ എസി സ്ലീപ്പർ ബെർത്തുകളുമുണ്ട്. 2026 ജൂലൈയിലെ കണക്കുകൾ പ്രകാരം, ഇന്ത്യൻ റെയിൽവേയിൽ 162 വന്ദേ ഭാരത് ചെയർ കാർ സർവീസുകളും, രണ്ട് വന്ദേ ഭാരത് സ്ലീപ്പർ സർവീസുകളുമുണ്ട്.

അമൃത് ഭാരത്: ഇനി അമൃത് ഭാരത് എക്സ്പ്രസിലേക്ക് വന്നാൽ, സാധാരണക്കാർ, ഇടത്തരം വരുമാനക്കാർ, കുറഞ്ഞ ചിലവിൽ ദീർഘദൂര അന്യസംസ്ഥാന യാത്രകൾ നടത്തുന്ന തൊഴിലാളികൾ എന്നിവർക്ക് അനുയോജ്യമായ സർവീസാണിത്. കാരണം പൂർണ്ണമായും നോൺ-എസി കോച്ചുകളാണ് ഇതിൽ ഉൾപ്പെടുത്തിയിരിക്കുന്നത്. സ്ലീപ്പർ ക്ലാസ്, സെക്കൻഡ് ക്ലാസ് അൺറിസർവ്ഡ് കോച്ചുകളാണ് ഇതിലുള്ളത്. മുന്നിലും പിന്നിലും ഇലക്ട്രിക്/ഡീസൽ ലോക്കോമോട്ടീവുകൾ ഘടിപ്പിച്ച പുഷ്-പുൾ സാങ്കേതികവിദ്യയിലാണ് പ്രവർത്തനം. ഇതിൻ്റെ പരമാവധി വേഗത 130 km/h ആണ്.

സാധാരണക്കാർക്ക് എളുപ്പത്തിൽ താങ്ങാനാവുന്ന ബജറ്റ് ഫ്രണ്ട്‌ലി നിരക്കുകൾ ആണ് അമൃത് ഭാരത് എക്സ്പ്രസിലെ ഏറ്റവും വലി. പ്രത്യേകത. എസി സൗകര്യത്തേക്കാൾ ടിക്കറ്റ് നിരക്കിന് പ്രാധാന്യം നൽകുന്ന യാത്രക്കാർക്ക് അമൃത് ഭാരത് പ്രയോജനകരമാണ്. ജൂലൈയിലെ കണക്കുകൾ പ്രകാരം, രാജ്യത്ത് 72 അമൃത് ഭാരത് സർവീസുകളും നിലവിലുണ്ട്.

വേഗതയിൽ ആരാണ് കേമൻ?

വന്ദേ ഭാരത് എക്സ്പ്രസും അമൃത് ഭാരത് എക്സ്പ്രസും വേഗതയുടെ കാര്യത്തിൽ വ്യത്യസ്തമായ ലക്ഷ്യങ്ങളോടെയാണ് സർവീസ് നടത്തുന്നത്. വന്ദേ ഭാരത് ട്രെയിനുകൾ മണിക്കൂറിൽ 180 കിലോമീറ്റർ വേഗത കൈവരിക്കാൻ ശേഷിയുള്ള സെമി-ഹൈ-സ്പീഡ് ട്രെയിനുകളായാണ് രൂപകൽപ്പന ചെയ്തിട്ടുള്ളത്. അനുയോജ്യമായ ട്രാക്കുകളിൽ ഇവയ്ക്ക് മണിക്കൂറിൽ 160 കിലോമീറ്റർ വരെ പ്രവർത്തനവേഗം സാധ്യമാണ്. എന്നാൽ സുരക്ഷ മുൻനിർത്തി എല്ലാ റൂട്ടുകളിലും ഈ വേഗതയിൽ ട്രെയിൻ സഞ്ചരിക്കാറില്ല.

സാധാരണ ട്രെയിനുകളെ അപേക്ഷിച്ച് മെച്ചപ്പെട്ട യാത്രാസമയം നൽകാൻ ലക്ഷ്യമിട്ടാണ് അമൃത് ഭാരത് സർവീസുകൾ അവതരിപ്പിച്ചിട്ടുള്ളത്. എന്നാൽ വന്ദേ ഭാരതിന്റെ അതേ 160 കിലോമീറ്റർ പ്രവർത്തനവേഗം അമൃത് ഭാരതിനും ഉണ്ടെന്ന് കരുതരുത്. പുഷ്-പുൾ സാങ്കേതികവിദ്യയിലൂടെ പരമാവധി 130 കി.മീ/മണിക്കൂർ വേഗതയാണ് ഈ ബജറ്റ് ട്രെയിനുകൾ ലക്ഷ്യമിടുന്നത്. യാത്ര ചെയ്യുന്ന പ്രത്യേക റൂട്ടിന്റെ ഘടന, സ്റ്റോപ്പുകളുടെ എണ്ണം, ട്രാക്കിലെ തിരക്ക്, സമയക്രമം എന്നിവ ആശ്രയിച്ചായിരിക്കും ഏത് ട്രെയിനാണ് വേഗത്തിൽ ലക്ഷ്യസ്ഥാനത്ത് എത്തുക എന്ന് തീരുമാനിക്കപ്പെടുന്നത്.

English Summary:

Vande Bharat services are positioned as semi-high-speed modern trainsets, while Amrit Bharat services were introduced primarily to provide an affordable modern long-distance travel option for low- and middle-income passengers.

ബെംഗളൂരു നഗരത്തിലെ സമയത്തെ കൊല്ലുന്ന ഗതാഗതക്കുരുക്കാണുള്ളത്. സ്ഥിരതാമസക്കാരായ ആളുകൾക്ക് ഈ തിരക്ക് പരിചിതമാണ്. എന്നാൽ ആദ്യമായി ബെം​ഗളൂരുവിൽ എത്തുന്ന ഒരു വ്യക്തിയെ സംബന്ധിച്ച് ഈ തിരക്ക് നല്ല ബുദ്ധിമുട്ട് ഉണ്ടാക്കാറുണ്ട്. തിരക്കിൽ പെടാതെ ലക്ഷ്യസ്ഥാനത്ത് വേഗത്തിൽ എത്തിച്ചേരാൻ ഏറ്റവും അനുയോജ്യമായ മാർഗ്ഗമാണ് ബെം​ഗളൂരുവിലെ നമ്മ മെട്രോ (Bengaluru Namma Metro). എന്നാൽ ആദ്യമായി നമ്മ മെട്രോയിൽ യാത്ര ചെയ്യുന്നവർക്ക് ടിക്കറ്റെടുക്കുന്നതിലും പ്ലാറ്റ്‌ഫോം മാറുന്നതിലും ചെറിയ അബദ്ധങ്ങൾ പറ്റാൻ സാധ്യതയുണ്ട്. യാത്ര തടസ്സമില്ലാതെ സുഗമമാക്കാൻ ആദ്യമായി യാത്ര ചെയ്യുന്നവർ അറിഞ്ഞിരിക്കേണ്ട ചില കാര്യങ്ങൾ നമുക്ക് നോക്കിയാലോ.

ALSO READ: ബെംഗളൂരുവിൽ നിന്ന് ഒരു റോഡ് ട്രിപ്പ് പ്ലാൻ ചെയ്യുകയാണോ? ഈ സ്ഥലങ്ങൾ വിട്ടുപോവരുത്

നമ്മ മെട്രോ ആദ്യ യാത്രയിൽ ശ്രദ്ധിക്കേണ്ടത്

സ്റ്റേഷനിലെ ടിക്കറ്റ് കൗണ്ടറുകളിൽ മണിക്കൂറുകളോളം വരി നിൽക്കാതെ ഫോൺ ഉപയോഗിച്ച് തന്നെ ടിക്കറ്റ് എടുക്കാനാകും എന്നത് ആദ്യമായി എത്തുന്നവർക്ക് അറിയണമെന്നില്ല. അതുകൊണ്ട് തന്നെ പലരും സ്റ്റേഷനിൽ നീണ്ട വരിയിൽ പെടാറുണ്ട്. ബിഎംആർസിഎല്ലിന്റെ ഒഫീഷ്യൽ നമ്പർ ആയ 8105556677 എന്നതിലേക്ക് 'Hi' എന്ന് സന്ദേശം അയച്ച് ലൊക്കേഷൻ തിരഞ്ഞെ‍ടുത്ത് QR ടിക്കറ്റ് സ്വന്തമാക്കാനാകും. അതുപോലെ നമ്മ മെട്രോയുടെ ഔദ്യോഗിക ആപ്പ്, Paytm, PhonePe, Rapido എന്നീ ആപ്പുകൾ വഴിയും ടിക്കറ്റുകൾ ബുക്ക് ചെയ്യാനാകും. ടിക്കറ്റ് നിരക്കിൽ 5 ശതമാനം ഇളവും ഇതിലൂടെ ലഭിക്കും.

പ്ലാറ്റ്‌ഫോമുകൾ കൃത്യമായി തിരിച്ചറിയുക

നിലവിൽ രണ്ടു പ്രധാന പാതകളാണ് നമ്മ മെട്രോയ്ക്കുള്ളത്. ഒന്ന് പർപ്പിൾ ലൈനും രണ്ടാമത്തേത് ​ഗ്രീൻ ലൈനും. പർപ്പിൾ ലൈൻ വൈറ്റ്‌ഫീൽഡ് മുതൽ ചെല്ലഘട്ട വരെയാണുള്ളത്. ഗ്രീൻ ലൈൻ മാദവാര മുതൽ സിൽക്ക് ഇൻസ്റ്റിറ്റ്യൂട്ട് വരെയും ഉണ്ട്. പ്ലാറ്റ്‌ഫോമിൽ നിൽക്കുമ്പോൾ ട്രെയിൻ പോകുന്ന അവസാന സ്റ്റേഷന്റെ പേര് ഡിസ്‌പ്ലേ ബോർഡുകളിൽ നോക്കി ഉറപ്പുവരുത്തി വേണം ട്രെയിനിൽ കയറാൻ.

മജസ്റ്റിക് ഇന്റർചേഞ്ച് സ്റ്റേഷനിലെ ലൈൻ മാറ്റം

പർപ്പിൾ ലൈനിൽ നിന്ന് ഗ്രീൻ ലൈനിലേക്കോ തിരിച്ചോ മാറേണ്ടി വരുമ്പോൾ നാദപ്രഭു കെംപഗൗഡ ഇന്റർചേഞ്ച് സ്റ്റേഷൻ ഉപയോഗിക്കണം. ഏഷ്യയിലെ തന്നെ വലിയ അണ്ടർഗ്രൗണ്ട് സ്റ്റേഷനുകളിൽ ഒന്നാണെന്ന പ്രത്യേകതയും ഇതിനുണ്ട്. ഇവിടെ വഴി തെറ്റാതിരിക്കാൻ തറയിലും വശങ്ങളിലുമുള്ള പർപ്പിൾ, ഗ്രീൻ കളർ സൂചനകളെ വ്യക്തമായി നോക്കി മനസ്സിലാക്കുക. QR ടിക്കറ്റോ സ്മാർട്ട് കാർഡോ ഓട്ടോമാറ്റിക് ഫെയർ കളക്ഷൻ ഗേറ്റിന് മുകളിലെ സ്കാനറിൽ കാണിച്ച് വേണം ഉള്ളിലേക്കും പുറത്തേക്കും കടക്കാൻ.

ഒരു സ്റ്റേഷനിൽ പ്രവേശിച്ചാൽ പരമാവധി 2 മണിക്കൂറിനുള്ളിൽ യാത്ര പൂർത്തിയാക്കി പുറത്തുകടക്കണം. അല്ലാത്തപക്ഷം നിശ്ചിത തുക പിഴ നൽകേണ്ടി വരും. മെട്രോ ട്രെയിനുകൾക്കോ സ്റ്റേഷൻ പരിസരത്തോ വച്ച് ഭക്ഷണപദാർത്ഥങ്ങൾ കഴിക്കുന്നതും മദ്യപിച്ച് യാത്ര ചെയ്യുന്നതും വൻ തുക പിഴ ഈടാക്കാവുന്ന കുറ്റമാണ്. ട്രെയിനിന്റെ ആദ്യത്തെ കോച്ച് സ്ത്രീകൾക്കായി സംവരണം ചെയ്തിട്ടുള്ളതാണ്. സെക്യൂരിറ്റി പരിശോധന ഉള്ളതിനാൽ ബാഗുകളിൽ നിരോധിത വസ്തുക്കളോ മൂർച്ചയുള്ള ആയുധങ്ങളോ കരുതാതിരിക്കുക.

English Summary:

Namma Metro passengers in Bengaluru can now say no to long queues to buy metro travel tokens. The Bangalore Metro Rail Corporation Ltd (BMRCL) has enabled QR ticketing service on WhatsApp.

കേരളത്തിൽ തുലാമഴയും ബംഗാൾ ഉൾക്കടലിലെ ന്യൂനമർദ്ദ സാന്നിധ്യവും കാരണം കനത്ത മഴ തുടരുന്ന സാഹചര്യമാണ് നിലവിലുള്ളത്. ഇതേതുടർന്ന മലയോര മേഖലകളിലും പ്രധാന വിനോദസഞ്ചാര കേന്ദ്രങ്ങളിലും ദുരന്തനിവാരണ അതോറിറ്റിയും വനം വകുപ്പും കർശന യാത്രാവിലക്കാണ് ഏർപ്പെടുത്തിയിരിക്കുന്നത്. തിരുവനന്തപുരം ജില്ലയിലെ പൊന്മുടി ഇക്കോ ടൂറിസം കേന്ദ്രം, ഇടുക്കി, വയനാട്, ഗവി, വാഗമൺ തുടങ്ങിയ പ്രധാന മലയോര ടൂറിസ്റ്റ് കേന്ദ്രങ്ങളിലെ പ്രവേശനം താത്കാലികമായി നിർത്തിവെച്ചു.

മണ്ണിടിച്ചിലിനും മരം വീണ് അപകടമുണ്ടാകാനും സാധ്യതയുള്ളതിനാൽ രാത്രി 7 മണി മുതൽ രാവിലെ 7 മണി വരെ മലയോര പാതകളിലൂടെയുള്ള യാത്രകൾക്ക് സംസ്ഥാന ദുരന്തനിവാരണ അതോറിറ്റി കടുത്ത നിരോധനമേർപ്പെടുത്തിയിട്ടുണ്ട്. ഇന്നലെ രാത്രി സംസ്ഥാനത്തെ മിക്ക മലയോര മേഖലയിലും ശക്തമായ മഴ പെയ്തതിനെ തുടർന്ന് വിവിധയിടങ്ങളിൽ മണ്ണിടിച്ചിൽ റിപ്പോർട്ട് ചെയ്തിട്ടുണ്ട്.

ALSO READ: ബെംഗളൂരുവിൽ നിന്ന് ഒരു റോഡ് ട്രിപ്പ് പ്ലാൻ ചെയ്യുകയാണോ? ഈ സ്ഥലങ്ങൾ വിട്ടുപോവരുത്

വിലക്കേർപ്പെടുത്തിയ വിനോദ സഞ്ചാര കേന്ദ്രങ്ങൾ

ശക്തമായ മഴയും പ്രതികൂല കാലാവസ്ഥയും കണക്കിലെടുത്ത് തിരുവനന്തപുരം ജില്ലയിലെ പൊന്മുടി ഇക്കോ ടൂറിസത്തിലേക്കുള്ള പ്രവേശനം താൽക്കാലികമായി നിർത്തിവച്ചു. ഒക്ടോബർ 25 ഞായറാഴ്‌ച 11:30 മുതൽ ഇനി ഒരു അറിയിപ്പ് ഉണ്ടാകുന്നതുവരെ പൊൻമുടി അടച്ചിടുമെന്ന് അധികൃതർ അറിയിച്ചു. സംസ്ഥാനത്തെ വിവിധ ടൂറിസം കേന്ദ്രങ്ങൾ പുതിയ കാലാവസ്ഥാ സാഹചര്യത്തിൽ അടയ്ക്കുന്നതായി അധികൃതർ പ്രഖ്യാപിച്ചിട്ടുണ്ട്.

കല്ലാർ-പൊന്മുടി റോഡിൽ പന്ത്രണ്ടാം വളവിലും ഇരുപത്തിരണ്ടാം വളവിന് അടുത്ത് ഇടിയകോവിലിന് സമീപത്ത് മണ്ണിടിച്ചിൽ റിപ്പോർട്ട് ചെയ്തിരുന്നു. കഴിഞ്ഞ ​ദിവസം രാത്രി മലയോര മേഖലയിൽ ശക്തമായ മഴ പെയ്തതിനെ തുടർന്നാണ് മണ്ണിടിച്ചിലുണ്ടായത്. അതിനാൽ പ്രദേശവാസികൾക്ക് അടക്കം ജാ​ഗ്രത നിർദ്ദേശം പുറപ്പെടുവിച്ചിട്ടുണ്ട്.

വയനാട് ജില്ലയിൽ റെഡ് അലേർട്ട് പ്രഖ്യാപിച്ചതിന്റെ പശ്ചാത്തലത്തിൽ ജില്ലയിലെ വിനോദസഞ്ചാര കേന്ദ്രങ്ങൾക്ക് പൂർണ്ണ നിരോധനം ഏർപ്പെടുത്തി ജില്ലാ കളക്ടർ വി ചെൽസാസിനി ഉത്തരവിട്ടിട്ടുണ്ട്. ജില്ലയിലെ റിസോർട്ടുകൾ, ഹോംസ്റ്റേകൾ, സാഹസിക ടൂറിസം കേന്ദ്രങ്ങൾ, ട്രക്കിങ് തുടങ്ങിയവയെല്ലാം നിർത്തി വെച്ചിരിക്കുകയാണ്. ഇനിയൊരു അറിയിപ്പുണ്ടാകുന്നതു വരെ ഇവ പ്രവർത്തിക്കില്ല.

സംസ്ഥാനത്ത് ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം ജില്ലകളിൽ മാത്രമാണ് യെല്ലോ അലർട്ട് നൽകിയിരിക്കുന്നത്. മറ്റെല്ലാ ജില്ലകളിലും ​ഗ്രീൻ അലർട്ടാണ്. പത്തനംതിട്ട, ഇടുക്കി, പാലക്കാട്, മലപ്പുറം ജില്ലകളിൽ നിലവിലുണ്ടായിരുന്ന ഓറഞ്ച് അലർട്ട് പിൻവലിച്ചിട്ടുണ്ട്. തെക്കുകിഴക്കൻ അറബിക്കടലിലും കേരളം തീരത്തിനും മുകളിലായി ന്യൂനമർദ്ദം സ്ഥിതിചെയ്യുന്നതാണ് നിലവിലെ മഴയ്ക്ക് കാരണം.

ഊട്ടിയിലേക്ക് യാത്ര വിലക്ക്

തമിഴ്നാട്ടിലെ നീലഗിരി ജില്ലയിൽ കനത്ത മഴയെ തുടർന്ന് വ്യാപക മണ്ണിടിച്ചിലാണ് റിപ്പോർട്ട് ചെയ്യുന്നത്. സാഹചര്യം കണക്കിലെടുത്ത് ഒക്ടോബർ 26 വരെ നീലഗിരി ജില്ലയിൽ വിനോദസഞ്ചാരത്തിന് നിയന്ത്രണം ഏർപ്പെടുത്തിയിരിക്കുകയാണ്. മേട്ടുപ്പാളയത്തുനിന്ന് ഊട്ടിയിലേക്ക് വാഹനങ്ങൾ കടത്തിവിടുന്നില്ല. ജില്ലയിലേക്കുള്ള പ്രവേശന പാതകളിലും സുരക്ഷാ നിയന്ത്രണങ്ങൾ ഏർപ്പെടുത്തിയിട്ടുണ്ട്. മഴ തുടരാൻ സാധ്യതയുള്ളതിനാൽ ഊട്ടിയിലേക്കുള്ള യാത്ര മാറ്റിവയ്‌ക്കണമെന്ന് അധികൃതർ നിർദേശിച്ചു.

English Summary:

Landslide risks, falling debris, and overflowing streams have prompted district administrations to ban trekking, water sports, and night driving across high-range routes for public safety. Check the list of travel ban tourist Area in kerala.

ഐടി നഗരത്തിലെ തിരക്കുകളിൽ നിന്നും റോഡിലെ തീരാ ബ്ലോക്കുകളിൽ നിന്നും അൽപ്പം മാറി ആശ്വാസം കണ്ടെത്താൻ ആഗ്രഹിക്കുന്നവർക്ക് അനുയോജ്യമായ വഴിയാണ് ബെംഗളൂരുവിൽ നിന്നുള്ള റോഡ് ട്രിപ്പുകൾ (Road Trips from Bengaluru). ചുരുങ്ങിയ സമയം കൊണ്ട് ഡ്രൈവ് ചെയ്തെത്താവുന്ന നന്ദി ഹിൽസ് മുതൽ പച്ചപ്പും കാപ്പിയുടെ സുഗന്ധവും നിറഞ്ഞ ചിക്കമഗളൂരു വരെയുള്ള കിടിലൻ ഡെസ്റ്റിനേഷനുകളാണ് ബെംഗളൂരുവിനെ ചുറ്റിപ്പറ്റി കിടക്കുന്നത്. ഒരു വീക്കെൻഡ് കിട്ടിയാൽ എങ്ങോട്ട് പോകണമെന്ന് ഓർത്ത് വിഷമിച്ചിരിക്കുകയാണെങ്കിൽ നമുക്കൊരു റോഡ് ട്രിപ്പ് പ്ലാൻ ചെയ്താലോ. ബെം​ഗളൂരുവിൽ നിന്ന് പോകാൻ പറ്റുന്ന ചില കിടലൻ റൂട്ടുകൾ ഏതെല്ലാമെന്ന് നോക്കാം.

ALSO READ: രാവിലെ 9 മുതൽ കെഎസ്ആർടിസി ഡബിൾ ഡെക്കർ ബസ്, മൂന്നാർ യാത്ര കലക്കും

നന്ദി ഹിൽസ്: എല്ലാവർക്കും അറിയാവുന്ന ഒരു സ്പോട്ടാണ് നന്ദി ഹിൽസ്. ബെംഗളൂരു നഗരത്തിൽ നിന്ന് വെറും 60 കിലോമീറ്റർ മാത്രം അകലെയുള്ള നന്ദി ഹിൽസ് ഒരൊറ്റ ദിവസത്തെ യാത്രയ്ക്ക് പറ്റിയ മികച്ച സ്ഥലങ്ങളിൽ ഒന്നാണ്. അതിരാവിലെ മഞ്ഞുമൂടിയ കുന്നിൻനിരകളിലൂടെയുള്ള ഡ്രൈവും സൂര്യൻ ഉദിച്ചുവരുന്ന വിസ്മയ കാഴ്ചകളും ഏറെ മനോഹരമാണ്. നന്ദി ഹിൽസിലേക്കുള്ള റൂട്ടും അതിമനോഹരമാണ്.

ചിക്കമഗളൂരു: ബെം​ഗളൂരുവിൽ നിന്ന് ഏകദേശം 240 കിലോമീറ്റർ ദൂരമുള്ള ചിക്കമഗളൂരു പ്രകൃതിസ്നേഹികൾക്ക് ആസ്വദിക്കാൻ പറ്റിയ ഒരിടമാണ്. മുല്ലയനഗിരി പീക്ക്, ബാബ ബുഡൻഗിരി, വിശാലമായ കാപ്പിത്തോട്ടങ്ങൾ എന്നിവയാണ് ഇവിടുത്തെ പ്രധാന ആകർഷണങ്ങൾ. നിരവധി ആളുകളാണ് ദിവസേന ഇവിടെ വന്നുപോകുന്നത്. ഏറ്റവും കൂടുതൽ കാപ്പിത്തോട്ടങ്ങളും നിങ്ങൾക്കിടിവിടെ കാണാൻ സാധിക്കും. മനസ്സിനും ശരീരത്തിനും ഒരുപോലെ ശാന്തത നൽകാൻ ഈ റൂട്ടിലേക്കുള്ള യാത്ര നിങ്ങളെ ഉറപ്പായും സഹായിക്കും.

കൂർഗ്: ബെംഗളൂരുവിൽ നിന്ന് 265 കിലോമീറ്റർ യാത്ര ചെയ്താൽ കൂർഗ് എന്ന സ്ഥലത്ത് എത്തിച്ചേരാനാകും. പച്ചപ്പ നിറഞ്ഞ കൊടുമുടികളും വെള്ളച്ചാട്ടങ്ങളും കൊണ്ട് സമ്പന്നമാണ് ഈ സ്ഥലം. രാജാസ് സീറ്റ്, അബ്ബി വെള്ളച്ചാട്ടം, ദുബാരെ എലിഫന്റ് ക്യാമ്പ് എന്നിവയാണ് ഈ സ്ഥലത്തെ പ്രധാന ആകർഷണം. ഒറ്റദിവസത്തെ യാത്ര കൊണ്ട് കണ്ട് തീർക്കാൻ കഴിയുന്ന കാഴ്ച്ചകളല്ല ഇവിടെയുള്ളത്. മറിച്ച് രണ്ട് ദിവസം നിൽക്കാൻ തയ്യാറാണെങ്കിൽ കൂർ​ഗിനെ കൂടുതൽ അടുത്തറിയാനാകും.

മൈസൂരു- വയനാട് റോഡ്: ബെംഗളൂരു- മൈസൂരു എക്സ്പ്രസ് വേ വഴി മൈസൂ കൊട്ടാരം കണ്ട്, ബാന്ദിപ്പൂർ വനപാതയിലൂടെ വയനാട്ടിലേക്ക് നീളുന്ന യാത്ര വൈൽഡ് ലൈഫ് സ്നേഹികൾക്ക് അവിസ്മരണീയ അനുഭവം സമ്മാനിക്കും. നിങ്ങളുടെ ജീവിതത്തിൽ ഒരിക്കലും മറക്കാനാകാത്ത ഒരു യാത്രയാകും ഈ വനപാതയിലൂടെയുള്ളത്. എന്നാൽ രാത്രി സമയത്ത് ഈ റൂട്ടിലൂടെ വാഹനം ഓടിക്കാൻ സുരക്ഷിതമല്ല എന്ന കാര്യം മറക്കരുത്. കാരണം ഈ സമയത്ത് ഈ റൂട്ടിൽ വന്യമൃ​ഗങ്ങൾ ഇറങ്ങാനുള്ള സാധ്യതയുണ്ട്.

English Summary:

Planning a road trip from bengaluru, If you are looking to escape your weekend routine, unwind amid nature and explore some of Karnataka’s most beautiful landscapes, a road trip through the Western Ghats could be the perfect getaway.

മഞ്ഞണിഞ്ഞ മൂന്നാറിന്റെ മനോഹരമായ കാഴ്ചകൾ കാണാൻ കൊതിക്കുന്ന സഞ്ചാരികൾക്ക് ഇനി അവിസ്മരണീയമായ അനുഭവമൊരുക്കി കെഎസആർടിസി. മൂന്നാറിന്റെ കുളിരും മഞ്ഞുനിറഞ്ഞ തേയിലത്തോട്ടങ്ങളുടെ ഹരിത ഭം​ഗിയും തൊട്ടറിഞ്ഞ് യാത്ര ചെയ്യാവുന്ന ഓപ്പൺ ടോപ്പ് ഡബിൾ ഡെക്കർ ബസ് സർവീസ് സഞ്ചാരികൾക്കിടയിൽ വൻ ഹിറ്റായി മാറുകയാണ്. രാവിലെ 9 മണി മുതൽ ആരംഭിക്കുന്ന ഈ സർവീസിലൂടെ മൂന്നാറിലെ പ്രധാന കാഴ്ചകൾ കുറഞ്ഞ ചെലവിൽ കണ്ടസ്വദിക്കാം. കുളിർക്കാറ്റേറ്റ്, മലനിരകളുടെ മേൽത്തട്ടിലൂടെയുള്ള യാത്ര ഏതൊരു സഞ്ചാരിയുടെയും സ്വപ്നമാണ്. ഡബിൾ ഡെക്കർ ബസിന്റെ ഓപ്പൺ ഏരിയയിൽ ഇരുന്ന മൂന്നാർ കാഴ്ചകൾ കാണാം എന്നതാണ് ഇതിന്റെ പ്രത്യേകത.

ALSO READ: മധുര-ഗുരുവായൂർ ട്രെയിനിൽ വിസ്റ്റാഡോം യാത്രയ്ക്ക് എത്ര ചെലവാകും?

ദിവസവും ആയിരക്കണക്കിന് വിനോദഞ്ചാരികളെത്തുന്ന മൂന്നാറിൽ ഇത്തവണത്തെ പൂജ അവധിക്ക് കെഎസ്ആർടിസി ഡബിൾ ഡെക്കർ നേടിയത് 4,06,000 രൂപയുടെ വരുമാനമാണ്. പൂജ അവധിയോടനുബന്ധിച്ച് ഒക്ടോബർ 17 മുതൽ 21 വരെയുള്ള അഞ്ചുദിവസത്തിനിടെ 1191 പേരാണ് ഡബിൾ ഡെക്കർ ബസുകളിൽ യാത്ര ചെയ്തത്. നിലവിൽ രണ്ടു ഡബിൾ ഡെക്കർ ബസുകളാണ് മൂന്നാറിലെ പ്രധാന വിനോദ സഞ്ചാര മേഖലകളിലേക്ക് സർവീസ് നടത്തുന്നത്.

മൂന്നാറിൽ നിന്നു കൊച്ചി - ധനുഷ്‌കോടി ദേശീയപാതയിലൂടെ സഞ്ചാരികൾ ഏറെയെത്തുന്ന ആനയിറങ്കൽ ഡാമിനു സമീപം വരെയാണ് യാത്ര. യാത്രയിൽ കിടിലൻ സ്പോട്ടുകളായ അഞ്ചിടങ്ങളിലാണ് ബസ് നിർത്തുക. ഈ സമയം സഞ്ചാരികൾക്ക് പ്രകൃതി സൗന്ദര്യം ആസ്വദിക്കുന്നതിന് കൂടുതൽ അവസരമുണ്ട്.

പ്രധാന റൂട്ടുകളും ടിക്കറ്റ് നിരക്കും

കുറഞ്ഞ നിരക്കിൽ കെഎസ്ആർടിസിയുടെ റോയൽ വ്യൂ ഡബിൾ ഡെക്കർ ബസിൽ യാത്ര ചെയ്യാമെന്നതാണ് ഇതിൻ്റെ ഏറ്റവും വലിയ പ്രത്യേകത. മുകൾ നിലയിലിരുന്ന യാത്ര ചെയ്യാൻ ഒരാൾക്ക് 400 രൂപയും താഴത്തെ നിലയിൽ 200 രൂപയാണ് ടിക്കറ്റ് നിരക്കായി ഈടാക്കുന്നത്. മുകൾ നിലയിൽ 38 സീറ്റും താഴത്തെ നിലയിൽ 12 സീറ്റുകളും ഉണ്ട്. 2025 ഫെബ്രുവരി എട്ടിനാണ് റോയൽ വ്യൂ ഡബിൾ ഡെക്കർ മൂന്നാറിൽ സർവീസ് ആരംഭിച്ചത്.

ഈ വർഷം ജനുവരി നാലിന് രണ്ടാമത്തെ ബസും സർവീസ് തുടങ്ങിയതോടെ കൂടുതൽ സഞ്ചാരികൾക്ക് ഡബിൾ ഡക്കർ ബസ് യാത്ര ആസ്വദിക്കാനായി. കെഎസ്ആർടിസിയുടെ റോയൽ വ്യൂ ഡബിൾ ഡെക്കർ ബസ് രാവിലെ 9 മുതൽ വൈകുന്നേരം 4.30 വരെയാണ് സർവീസ് നടത്തുന്നത്. ദിവസേന ആറ് സർവീസുകളാണ് രണ്ടു ബസുകളും കൂടി നടത്തുക. ഡബിൾ ഡെക്കറിൽ യാത്ര ചെയ്യാൻ ആഗ്രഹിക്കുന്നവർക്ക് നേരിട്ടും കെഎസ്ആർടിസി വെബ്സൈറ്റിലൂടെയും (https://onlineksrtcswift.com/) ആപ്പിലൂടെയും മുൻകൂട്ടി യാത്ര ബുക്ക് ചെയ്യാൻ സാധിക്കും.

മൂന്നാർ ടൗണിലുള്ള കെഎസ്ആർടിസി ബസ് സ്റ്റാൻഡിൽ നിന്നാണ് എല്ലാ സർവീസുകളും ആരംഭിക്കുന്നത്. അവധിക്കാലത്തും വാരാന്ത്യങ്ങളിലും വലിയ തിരക്ക് അനുഭവപ്പെടുന്നതിനാൽ കെഎസ്ആർടിസി യാത്ര ഔദ്യോഗിക വെബ്‌സൈറ്റ് വഴി മുൻകൂട്ടി ബുക്ക് ചെയ്യുന്നതാണ് ഏറ്റവും നല്ലത്. മൂന്നാർ ടൗൺ, മാട്ടുപ്പെട്ടി പാതയിലെ പ്രധാന കാഴ്ചകൾ, വ്യൂ പോയിന്റുകൾ, തേയിലത്തോട്ടങ്ങൾ എന്നിവ കണ്ടുകൊണ്ട് ഒരു മണിക്കൂറോളം നീളുന്ന മനോഹരമായ യാത്ര ആസ്വദിക്കാം.

English Summary:

Munnar can now easily explore the misty hill station aboard KSRTC’s popular open-top double decker bus. Here is a step-by-step guide on ticket prices, daily schedules, and seat reservation tips for your next trip.

കേരളത്തിന്റെ മനോഹരമായ പ്രകൃതിഭംഗിയും പച്ചപ്പും ആവോളം ആസ്വദിച്ചുകൊണ്ട് ഒരു രാജകീയ ട്രെയിൻ യാത്രയാണ് നിങ്ങൾ ആഗ്രഹിക്കുന്നതെങ്കിൽ അതിന് പറ്റിയ ഒരു ട്രെയിൻ സർവീസാണ് റെയിൽവേ പുറത്തിറക്കിയിരിക്കുന്നത്. മധുര - ഗുരുവായൂർ എക്സ്പ്രസ്സിൽ (Madurai - Guruvayur Express) അവതരിപ്പിച്ചിരിക്കുന്ന വിസ്റ്റാഡോം (Vistadome) കോച്ച് യാത്രയാണ് ഇപ്പോൾ സമൂഹ മാധ്യമങ്ങളിലെ ചർച്ചാവിഷയം. യാത്രാപ്രേമികൾക്കിടയിൽ ഈ പുതിയ മാറ്റം വലിയ തരംഗമായി മാറിയിരിക്കുകയാണ്. മധുര-ഗുരുവായൂർ വിസ്റ്റാഡോം കോച്ച് യാത്രയ്ക്ക് ഒരാളുടെ ചെലവ്, അതിൻ്റെ സവിശേഷതകൾ, ബുക്കിംഗ് വിവരങ്ങൾ എന്നിവ നമുക്ക് വിശദമായി പരിശോധിക്കാം.

ALSO READ: ബാഗ് പാക്ക് ചെയ്തോളൂ… താഴ്‌വരകളിൽ മഞ്ഞുവീണു തുടങ്ങി; സീസൺ തിരക്കുകൾക്ക് മുൻപ് യാത്ര തിരിക്കാൻ 5 കിടിലൻ സ്ഥലങ്ങൾ!

കേരളത്തിൽ ആദ്യമായി അവതരിപ്പിക്കുന്ന ഒന്നാണ് മധുര - ഗുരുവായൂർ എക്സ്പ്രസ്സിലെ വിസ്റ്റഡോം കോച്ച്. ഇക്കഴിഞ്ഞ വ്യാഴാഴ്ച്ച മുതലാണ് ചെങ്കോട്ട - പുനലൂർ - കൊല്ലം റൂട്ടിലൂടെ സർവീസ് ആരംഭിച്ചത്. വ്യാഴാഴ്ച രാവിലെ 11.35-ന് മധുരയിൽ നിന്ന് യാത്ര തിരിച്ച ഈ ട്രെയിൻ ഇന്ന് രാവിലെ 2.15 ഓടെ ​ഗുരുവായൂരിൽ എത്തിച്ചേരുകയും ചെയ്തു. ആദ്യ യാത്രയിൽ മുഴുവൻ സീറ്റിലും ആളുകളുടെ തിരക്കായിരുന്നു. വ്യാഴം, വെള്ളി, ശനി, ഞായർ ദിവസങ്ങളിൽ മാത്രമായിരിക്കും ഈ ട്രെയിൻ സർവീസ് നടത്തുക. മനോഹരമായ കാഴ്ചകളാൽ സമ്പന്നമായ ചെങ്കോട്ട - പുനലൂർ - കൊല്ലം റൂട്ടിലൂടെയാണ് ട്രെയിൻ കടന്നുപോകുന്നത്. ഏകദേശം ഒരാൾക്ക് 1,875 രൂപയാണ് യാത്രാ ചിലവ് വരുന്നത്.

എന്താണ് വിസ്റ്റാഡോം കോച്ച്?

വളരെ വലിയ ജനലുകളും സുതാര്യമായ ഗ്ലാസ് മേൽക്കൂരയുമുള്ള, എയർകണ്ടീഷൻ ചെയ്ത ഒരു പാസഞ്ചർ കോച്ചാണ് വിസ്റ്റാഡോം കോച്ച്. ട്രെയിനിനുള്ളിലിരുന്നുകൊണ്ട് തന്നെ ആകാശവും വനമേഖലകളും പച്ചപ്പും കാണാൻ കഴിയുന്ന രീതിയിലുള്ള ഗ്ലാസ് മേൽക്കൂരയാണ് ഇതിന്റെ പ്രധാന ആകർഷണം. യാത്രക്കാർക്ക് പുറത്തെ കാഴ്ചകൾ എളുപ്പത്തിൽ ആസ്വദിക്കുന്നതിനായി 360 ഡിഗ്രി തിരിക്കാൻ കഴിയുന്ന പുഷ്-ബാക്ക് സീറ്റുകളാണ് ഇതിൽ സജ്ജീകരിച്ചിരിക്കുന്നത്.

സാധാരണ ട്രെയിനുകളെ അപേക്ഷിച്ച് വളരെ വലിപ്പമുള്ള വിശാലമായ ഗ്ലാസ് ജനലുകൾ പുറത്തെ കാഴ്ചകൾ വ്യക്തമായി കാണാൻ സഹായിക്കുന്നു. വൈഫൈ കണക്റ്റിവിറ്റി, ജിപിഎസ് അടിസ്ഥാനമാക്കിയുള്ള എന്റർടൈൻമെന്റ് ഡിസ്‌പ്ലേകൾ, ഓട്ടോമാറ്റിക് സ്ലൈഡിംഗ് വാതിലുകൾ, അത്യാധുനിക ടോയ്‌ലറ്റ് സംവിധാനങ്ങൾ എന്നിവയുടെ ലഭ്യതയും ഇതിൽ സാധാരണമാണ്. 360-ഡിഗ്രി പനോരമിക് കാഴ്ചകൾ നൽകുന്ന ഇത്തരം കോച്ചുകൾ ാദ്യമായി 1944-ൽ അമേരിക്കയിലാണ് അവതരിപ്പിച്ചത്.

നമ്മുടെ രാജ്യത്ത് 2017-ൽ ആന്ധ്രാപ്രദേശിലെ വിശാഖപട്ടണം റൂട്ടിലാണ് ഈ കോച്ചുകൾ ഉൾപ്പെടുത്തിയ ട്രെയിനുകൾ സർവീസ് ആരംഭിച്ചത്. ആന്ധ്രാപ്രദേശിലെ ഏറ്റവും ജനപ്രിയമായ വിനോദസഞ്ചാര അനുഭവങ്ങളിലൊന്നുകൂടിയാണിത്.

മധുര-ഗുരുവായൂർ വിസ്റ്റാഡോം കോച്ച് എങ്ങനെ ബുക്ക് ചെയ്യാം

RailOne പോലുള്ള ആപ്പുകളിൽ, മറ്റ് കോച്ചുകൾക്കൊപ്പം വിസ്റ്റാഡോം കോച്ചുകളെ 'EV' എന്ന് പ്രത്യേകം അടയാളപ്പെടുത്തിയിരിക്കുന്നു. ഒരു സീറ്റിന് 1,875 രൂപയാണ് നിരക്ക്. ബുക്കിംഗ് ആപ്പുകളിലെ വിവരങ്ങൾ പ്രകാരം, ആദ്യത്തെ ഏതാനും ആഴ്ചകളിലേക്കുള്ള സീറ്റുകളെല്ലാം ഇതിനകം ബുക്ക് ചെയ്യപ്പെട്ടു കഴിഞ്ഞു. വിസ്റ്റാഡോം കോച്ചുകൾക്ക് സാധാരണയായി തത്കാൽ ബുക്കിംഗ് സൗകര്യം ലഭ്യമല്ല.

English Summary:

Madurai–Guruvayur Express Vistadome coach Service Starts. The 44 seats of the Vistadome coach, each of which costs ₹1,875, have been fully sold out on the first trip.

കൊച്ചി– ധനുഷ്കോടി ദേശീയപാത 85-ലെ അടിമാലി– മൂന്നാർ റൂട്ടിൽ ​ഗതാ​ഗതം താൽക്കാലികമായി നിരോധിച്ചു. റോഡിലേക്ക് കൂറ്റൻ പാറ അടർന്നു വീണതിനെത്തുടർന്നാണ് ഈ റൂട്ടിലെ ഗതാഗതം പൂർണ്ണമായും നിരോധിച്ചത്. കഴിഞ്ഞ ദിവസം രാത്രിയോടെയാണ് മൂന്നാർ രണ്ടാം മൈൽ ഭാഗത്ത് ദേശീയപാത വികസനത്തിനായി മണ്ണുമാന്തുന്നതിനിടെ കൂറ്റൻ പാറ റോഡിലേക്ക് പതിച്ചത്. റോഡിലെയും പരിസരത്തെയും എല്ലാ സുരക്ഷാ ഭീഷണികളും ഒഴിവാക്കുന്നത് വരെ ഈ റൂട്ടിലെ ഗതാഗത നിരോധനം തുടരുമെന്ന് ഇടുക്കി ജില്ലാ കളക്ടർ ഡോ. ദിനേശൻ ചെറുവത്ത് അറിയിച്ചു.

ഈ പ്രദേശത്ത് അപകടകരമായ നിലയിലുള്ള മറ്റ് പാറകളും വലിയ മരങ്ങളും ഉണ്ട്. അതിനാൽ താൽക്കാലികമായി റോഡ് നിരോധനം തുടരാനാണ് അധികൃതരുടെ നീക്കം. ഇവ സുരക്ഷിതമായി നീക്കം ചെയ്യുന്നതിനും വീണുകിടക്കുന്ന പാറ മറ്റൊരു സ്ഥാനത്തേക്ക് നീക്കുന്നതിനുമായിട്ടാണ് നിലവിൽ റോഡ് ​ഗതാ​ഗതം തടസ്സപ്പെടുത്തിയിരിക്കുന്നത്. ഇതിന് മൂന്ന് ദിവസം വേണ്ടിവരുമെന്നാണ് അധികൃതർ കണക്കാക്കുന്നത്. യാത്രക്കാരുടെ സുരക്ഷ മുൻനിർത്തിയാണ് ഗതാഗത നിരോധനം ഏർപ്പെടുത്തിയിരിക്കുന്നത്.

ALSO READ: ബെംഗളൂരു- മുംബൈ വന്ദേഭാരത് സ്ലീപ്പർ എന്ന്? പ്രത്യേകതയും യാത്രാ ​ഗൈഡും

വാഹനം വഴിതിരിച്ചുവിടുന്നത് ഈ റൂട്ടിൽ

1. മൂന്നാറിൽ നിന്ന് അടിമാലിയിലേക്ക് പോകുന്ന വാഹനങ്ങൾ രണ്ടാം മൈലിൽ നിന്ന് അനച്ചാൽ, ഇരുട്ടുക്കാനം വഴിയുള്ള പാതയിലൂടെ തിരിഞ്ഞ് അടിമാലിയിലേക്ക് പോകേണ്ടതാണ്.
2. അടിമാലിയിൽ നിന്ന് മൂന്നാറിലേക്ക് പോകുന്ന വാഹനങ്ങൾ ഇരുട്ടുക്കാനത്ത് നിന്ന് അനച്ചാൽ വഴി രണ്ടാം മൈലിലെത്തി, അവിടെ നിന്ന് മൂന്നാറിലേക്ക് പോകാവുന്നതാണ്.
3. മാങ്കുളത്തേക്ക് പോകുന്ന വാഹനങ്ങൾ ഇരുട്ടുക്കാനത്ത് നിന്ന് കല്ലാർ ജംഗ്ഷനിലെത്തി, അവിടെ നിന്ന് മാങ്കുളത്തേക്കുള്ള വഴിയിലേക്ക് തിരിയേണ്ടതാണ്.

പ്രദേശത്തെ തടസ്സങ്ങൾ നീക്കി മൂന്ന് ദിവസത്തിനുള്ളിൽ പണികൾ പൂർത്തിയാക്കാൻ ജില്ലാ കളക്ടർ, നാഷണൽ ഹൈവേ അതോറിറ്റി ഓഫ് ഇന്ത്യ പ്രോജക്ട് ഡയറക്ടർക്ക് നിർദ്ദേശം നൽകിയിട്ടുണ്ട്. അപകടസാധ്യതയുള്ള പ്രദേശം പൂർണ്ണമായും സുരക്ഷിതമാണെന്ന് വിദഗ്ദ്ധ സാങ്കേതിക സമിതി സ്ഥിരീകരിച്ചതിന് ശേഷം മാത്രമേ ഗതാഗതം പുനഃസ്ഥാപിക്കുകയുള്ളൂ. ആവശ്യമായ മുന്നറിയിപ്പ് ബോർഡുകൾ, ബാരിക്കേഡുകൾ, രാത്രികാല സുരക്ഷാ ക്രമീകരണങ്ങൾ എന്നിവ ഒരുക്കുന്നതിനുള്ള ചുമതല ജില്ലാ പോലീസ് മേധാവിക്കും മറ്റ് ഉദ്യോഗസ്ഥർക്കും നൽകിയിട്ടുണ്ട്.

ഭാവിയിൽ സമാനമായ അപകടങ്ങൾ ഒഴിവാക്കുന്നതിനായി, കുത്തനെയുള്ള മൺപ്രദേശങ്ങൾ നീക്കം ചെയ്യുമ്പോൾ ലംബമായി വെട്ടിമാറ്റുന്നതിന് പകരം ശാസ്ത്രീയമായ ബെഞ്ച് കട്ടിംഗ് രീതികൾ അവലംബിക്കണമെന്ന് ദുരന്തനിവാരണ അതോറിറ്റിയും ശുപാർശ ചെയ്തിട്ടുണ്ട്. മൂന്നാറിലേക്ക് പോകുന്നവരും തിരിച്ചുവരുന്നവരും ആനച്ചാൽ - ഇരുട്ടുകാനം വഴിയുള്ള ബദൽ റൂട്ട് ഉപയോഗിക്കുന്നതാണ് നിലവിൽ സുരക്ഷിതം. കഴിഞ്ഞ ദിവസം ശക്തമായ മഴ ലഭിച്ചതിനാൽ വിനോദ സഞ്ചാരികളും ഈ റൂട്ടുകൾ തിരഞെ്ഞെടുക്കുമ്പോൾ പ്രത്യേകം ശ്രദ്ധിക്കണം.

English Summary:

Traffic along the Adimali-Munnar section of the Kochi-Dhanushkodi National Highway (NH 85) has been banned for now after a massive boulder collapse at Second Mile disrupted transport.

ഇന്ത്യൻ റെയിൽവേയുടെ ഏറ്റവും വിപ്ലവകരമായ മാറ്റങ്ങളിലൊന്നായ വന്ദേഭാരത് സ്ലീപ്പർ ട്രെയിനുകൾ (Vande Bharat Sleeper Train) പാളത്തിലിറങ്ങാൻ ഒരുങ്ങുന്നു. ടെക് സിറ്റിയായ ബെംഗളൂരുവിനെയും രാജ്യത്തിന്റെ സാമ്പത്തിക തലസ്ഥാനമായ മുംബൈയെയും ബന്ധിപ്പിച്ചുകൊണ്ടുള്ള ബെംഗളൂരു - മുംബൈ വന്ദേഭാരത് സ്ലീപ്പർ ട്രെയിനാണ് യാത്രാപ്രേമികൾ ഏറെ പ്രതീക്ഷയോടെ കാത്തിരിക്കുന്നത്. അത്യാധുനിക സൗകര്യങ്ങളും വിമാന യാത്രയ്ക്ക് സമാനമായ അനുഭവവും കുറഞ്ഞ സമയത്തിനുള്ളിൽ ലക്ഷ്യസ്ഥാനത്ത് എത്തിക്കുന്ന വന്ദേഭാരത് സ്ലീപ്പറിന്റെ വിശദമായ വിവരങ്ങൾ പരിശോധിക്കാം.

ഇന്ത്യൻ റെയിൽവേ തദ്ദേശീയമായി നിർമ്മിച്ച ആദ്യ സ്ലീപ്പർ ട്രെയിൻ സെറ്റുകളുടെ പരീക്ഷണ ഓട്ടങ്ങൾ അവസാന ഘട്ടത്തിലാണ്. 2026-ഓടെ പ്രധാന റൂട്ടുകളിൽ വന്ദേഭാരത് സ്ലീപ്പർ സർവീസുകൾ പൂർണ്ണതോതിൽ ആരംഭിക്കാനാണ് റെയിൽവേ ലക്ഷ്യമിടുന്നത്. ഈ നിരയിൽ ആദ്യഘട്ടത്തിൽ തന്നെ ബെംഗളൂരു - മുംബൈ സർവീസ് ആരംഭിക്കും. ഈ മാസം അവസാനത്തോടെയോ നവംബർ ആദ്യവാരമോ സർവീസ് ആരംഭിക്കാനാണ് റെയിൽവേ ലക്ഷ്യമിടുന്നത്.

ALSO READ: ‘പാട്ടൊന്ന് പതുക്കെ വെക്കാമോ… ഇല്ലെങ്കിൽ ആയിരം പോകും, ജയിലിലും കിടക്കാം’; കർശന നിർദ്ദേശവുമായി ദക്ഷിണ റെയിൽവേ

വന്ദേഭാരത് സ്ലീപ്പർ പ്രത്യേകത

മുംബൈയ്ക്കും ബെംഗളൂരുവിനും ഇടയിലുള്ള യാത്രാനുഭവത്തെത്തന്നെ മാറ്റിമറിക്കാൻ പോകുന്ന വന്ദേ ഭാരത് സ്ലീപ്പർ ട്രെയിനിന്റെ വരവ് യാത്രക്കാർക്ക് വലിയൊരു ആശ്വാസമാവുകയാണ്. നിലവിലുള്ള ട്രെയിൻ യാത്രയിലെ സമയനഷ്ടത്തിന് പരിഹാരമായാണ് അതിവേഗതയേറിയ ഈ പ്രീമിയം സ്ലീപ്പർ സർവീസ് റെയിൽവേ യാഥാർത്ഥ്യമാക്കുന്നത്. മുംബൈയിൽ നിന്ന് ബെംഗളൂരുലേക്കോ തിരിച്ചോ ഉള്ള സാധാരണ എക്സ്പ്രസ് ട്രെയിൻ യാത്ര പൂർത്തിയാക്കാൻ നിലവിൽ 20 മുതൽ 24 മണിക്കൂർ വരെ സമയമെടുക്കുന്നുണ്ട്.

എന്നാൽ മണിക്കൂറിൽ 160 കിലോമീറ്റർ വരെ വേഗതയിൽ സഞ്ചരിക്കാൻ ശേഷിയുള്ള വന്ദേ ഭാരത് സ്ലീപ്പർ ട്രെയിനുകൾ യാത്രാ സമയം 12 മുതൽ 16 മണിക്കൂറായി കുറയ്ക്കുമെന്നാണ് അധികൃതർ പറയുന്നത്. ഈ വേഗതയിലൂടെ യാത്രക്കാർക്ക് ഏകദേശം 8 മണിക്കൂർ വരെ വിലയേറിയ സമയം ലാഭിക്കാൻ സാധിക്കും. മുംബൈയിലെ പ്രാദേശിക ട്രെയിൻ ഗതാഗതത്തെ ബാധിക്കാത്ത രീതിയിലാണ് മുംബൈ-ബെംഗളൂരു വന്ദേ ഭാരത് സ്ലീപ്പർ ട്രെയിനിന്റെ സമയക്രമവും റൂട്ടും റെയിൽവേ ആസൂത്രണം ചെയ്യുന്നത്.

മുംബൈയിലെ അതിതീവ്രമായ സബർബൻ ലോക്കൽ ട്രെയിൻ ഗതാഗതത്തെ തടസ്സപ്പെടുത്താതിരിക്കാൻ ഛത്രപതി ശിവാജി മഹാരാജ് ടെർമിനസിൽ നിന്ന് രാത്രി വൈകി പുറപ്പെടുന്ന രീതിയിലാണ് സമയക്രമം ക്രമീകരിക്കുന്നത്. മുംബൈ – പൂനെ – സോലാപൂർ – വാഡി വഴി കർണാടകയിലെ ഹുബ്ബള്ളിയിലെത്തി ബെംഗളൂരുവിൽ എത്തിച്ചേരുന്ന രീതിയിലാണ് റൂട്ട് മാപ്പ് തയ്യാറാക്കിയിരിക്കുന്നത്. ഈ വന്ദേ ഭാരത് സ്ലീപ്പർ ട്രെയിൻ ആഴ്ചയിൽ എത്ര ദിവസങ്ങളിൽ സർവീസ് നടത്തുമെന്ന കാര്യത്തിൽ വരും ദിവസങ്ങളിൽ ഔദ്യോഗിക തീരുമാനമുണ്ടാകും.

ആധുനിക കുഷ്യൻ ബെർത്തുകൾ, ഓട്ടോമാറ്റിക് വാതിലുകൾ, ടച്ച്-ഫ്രീ ബയോ ടോയ്‌ലറ്റുകൾ എന്നിവ യാത്രയെ മികച്ചതാക്കുന്നു. അഡ്വാൻസ്ഡ് സസ്പെൻഷൻ സംവിധാനം ഉള്ളതിനാൽ ട്രെയിൻ വേഗത്തിൽ സഞ്ചരിക്കുമ്പോഴും ശബ്ദമോ കുലുക്കമോ അനുഭവപ്പെടില്ല. കൂട്ടിയിടികൾ ഒഴിവാക്കാൻ അത്യാധുനിക 'കവച്' സാങ്കേതികവിദ്യയും ട്രെയിനിൽ സജ്ജീകരിച്ചിട്ടുണ്ട്.

English Summary:

Indian Railways prepares to launch the new Vande Bharat sleeper train on Mumbai to Bengaluru Route. The high-speed overnight service is set to drastically reduce travel time between the two major cities.

തിരുവനന്തപുരത്തിന്റെ തനത് ഭം​ഗി ആസ്വദിക്കണമെങ്കിൽ പൊന്മുടിയിലേക്ക് വണ്ടി കയറണം. മഞ്ഞും മഴയും കാറ്റും നിറഞ്ഞ മലയോര വിനോദസഞ്ചാര കേന്ദ്രമായ പൊന്മുടിയിലേക്ക് യാത്ര ചെയ്യുന്ന സഞ്ചാരികൾക്ക് ഏറ്റവും സുരക്ഷിതവും ലാഭകരവുമായ മാർഗ്ഗമാണ് കെഎസ്ആർടിസി സർവീസുകൾ. പ്രത്യേകിച്ചും സ്ത്രീകൾക്ക് സൗജന്യ യാത്ര ഉറപ്പുനൽകുന്ന പ്രിയദർശിനി ബസുകളിലും സാധാരണ കെഎസ്ആർടിസി സർവീസുകളിലും സമയബന്ധിതമായി പൊന്മുടിയിലേക്ക് എത്തിച്ചേരാനാകും.

പ്രിയദർശിനി വനിതാ സൗജന്യ യാത്ര പദ്ധതി വന്നതോടെ പൊന്മുടിയിലേക്ക് സഞ്ചാരികളുടെ വലിയ ഒഴുക്കാണ് അനുഭവപ്പെടുന്നത്. ഓർഡിനറി ബസ്സുകളിൽ തിരക്കേറിയ സാഹചര്യത്തിൽ പൊന്മുടിയിലേക്ക് കെഎസ്ആർടിസി കൂടുതൽ സർവ്വീസുകൾ ആരംഭിക്കുകയും ചെയ്തിരുന്നു. ഇതോടെ ഏവർക്കും ഒരുപോലെ യാത്ര സു​ഗമമാക്കാൻ സാധിച്ചു. തമ്പാനൂർ, വർക്കല എന്നിവിടങ്ങളിൽനിന്നു പൊന്മുടിയിലേക്ക് ഫാസ്റ്റ് ബസ് ഉൾപ്പെടെ സർവീസ് നടത്തുന്നുണ്ട്.

ALSO READ: വേളാങ്കണ്ണി തീർത്ഥാടനത്തിന് കെഎസ്ആർടിസി; കോട്ടയത്തുനിന്ന് പുതിയ സർവീസ്

ഞായറാഴ്ചകളിൽ ഷട്ടിൽ ട്രിപ്പുകളും പൊന്മുടിയിലേക്കുണ്ട്. പൊന്മുടിയുടെ വികസന പ്രവർത്തനങ്ങൾക്കുവേണ്ടി ഇത്തവണത്തെ ബജറ്റിൽ നാലുകോടി രൂപ വകയിരുത്തിയിട്ടുണ്ട്. ജില്ലയുടെ വിവിധ ഭാഗങ്ങളിൽനിന്ന് അവധി ദിവസങ്ങളിൽ പൊന്മുടിയിലേക്ക് നേരിട്ടുള്ള ബസ്സിനുവേണ്ടി കാത്തുനിൽക്കാതെ, നേരെ വിതുര ഡിപ്പോയിലേക്ക് വന്നാൽ കൂടുതൽ സർവീസ് ലഭ്യമാണ്. രാവിലെ 9.30- നെടുമങ്ങാട്- വിതുര- പൊന്മുടി ബസ്, 11.50ന് പൊന്മുടി- വിതുര, 1.30ന് വിതുര- പൊന്മുടി, 3.15ന് പൊന്മുടി- വിതുര, 4.40ന് വിതുര- പൊന്മുടി, 6.00ന് പൊന്മുടി-വിതുര എന്നിങ്ങനെയാണ് വിതുര ഡിപ്പോയിൽ നിന്നുള്ള ബസുകളുടെ സമയക്രമം.

മറ്റ് സർവീസുകളുടെ വിവരങ്ങൾ

തമ്പാനൂർ കെഎസ്ആർടിസി ബസ് സ്റ്റാൻഡിൽ നിന്ന് പൊന്മുടിയിലേക്ക് രാവിലെ സർവീസുകൾ, 05:30 AM, 06:30 AM, 08:15 AM എന്നീ സമയങ്ങളിൽ സർവീസ് ലഭ്യമാണ്. പിന്നീട് 11.30, 01:30, 03:00 എന്നീ സമയങ്ങളിലാണ് സർവീസുള്ളത്. നെടുമങ്ങാട് നിന്നും വിതുരയിൽ നിന്നും പൊന്മുടിയിലേക്ക് ഓരോ മണിക്കൂർ ഇടവിട്ടും പ്രാദേശിക സർവീസുകൾ ലഭ്യമാണ്. പ്രിയദർശിനി പദ്ധതി പ്രകാരം അർഹരായ സ്ത്രീകൾക്ക് സൗജന്യ യാത്രാ ആനുകൂല്യം ലഭ്യമാണ്. സ്വന്തം വാഹനം എടുക്കാതെ കുറഞ്ഞ ചെലവിൽ കുടുംബത്തോടൊപ്പവും കൂട്ടുകാരോടൊപ്പവും യാത്ര ചെയ്യാൻ കെഎസ്ആർടിസി ഏറ്റവും അനുയോജ്യമാണ്.

പൊന്മുടി യാത്ര

ജൂലൈ 1 മുതൽ പൊന്മുടിയിലേക്കുള്ള പ്രവേശന നിരക്കുകൾ പുതുക്കിയിരുന്നു. ജിഎസ്ടി ഉൾപ്പെടെയുള്ള പുതുക്കിയ നിരക്കുകളാണ് ഇപ്പോൾ ഈടാക്കുന്നത്. പുതിയ നിരക്കുകൾ പ്രകാരം മുതിർന്നവർക്കുള്ള പ്രവേശന ഫീസ് 50 രൂപ ആയും കുട്ടികൾക്കുള്ളത് 25 രൂപ ആയും നിശ്ചയിച്ചു. വിദേശ സഞ്ചാരികളുടെ ഫീസിലും വർദ്ധനവുണ്ട്. വിദേശികളായ മുതിർന്നവർക്ക് 400 രൂപ, കുട്ടികൾക്ക് 300 രൂപ എന്നിങ്ങനെയാണ് പുതിയ നിരക്ക്. വിദ്യാർത്ഥികൾക്കുള്ള പ്രവേശന ഫീസ് 30 രൂപ ആയി തുടരും.

വാഹന നിരക്കുകളിലും മാറ്റമുണ്ട്. ടൂവീലറുകൾക്ക് 25 രൂപ, ത്രീവീലറുകൾക്ക് 35 രൂപ, ലൈറ്റ് മോട്ടോർ വെഹിക്കിൾ പാർക്കിംഗിന് 50 രൂപ, മീഡിയം മോട്ടോർ വാഹനങ്ങളുടെ പാർക്കിംഗിന് 200 രൂപ, ഹെവി വാഹനങ്ങളുടെ പാർക്കിംഗിന് 120 രൂപ എന്നിങ്ങനെയാണ് പുതുക്കിയ നിരക്കുകൾ. സ്റ്റിൽ ക്യാമറയ്ക്ക് 85 രൂപയും മൂവി ക്യാമറയ്ക്ക് 600 രൂപയും ഈടാക്കും.

English summary:

Planning a budget-friendly trip to the misty heights of Ponmudi from Thiruvananthapuram? KSRTC’s Priyadarshini and regular bus services offer a safe and convenient way to navigate the 22 scenic hairpin bends.

കോട്ടയത്തു നിന്ന് കുറവിലങ്ങാട് വഴി പ്രസിദ്ധമായ വേളാങ്കണ്ണി തീർത്ഥാടന കേന്ദ്രത്തിലേക്ക് പുതിയ കെഎസ്ആർടിസി (KSRTC) ബസ് സർവീസ്. മന്ത്രി മോൻസ് ജോസഫും മന്ത്രി സി പി ജോണും തമ്മിൽ നടത്തിയ നിർണ്ണായകമായ ഉന്നതതല ചർച്ചകളെത്തുടർന്നാണ് ദീർഘകാലമായുള്ള യാത്രാപ്രേമികളുടെയും തീർത്ഥാടകരുടെയും ആവശ്യം യാഥാർത്ഥ്യമാകുന്നത്. കോട്ടയം ജില്ലയിലെ തീർത്ഥാടകർക്കും പൊതുജനങ്ങൾക്കും ഏറെ ആശ്വാസകരമായ പ്രഖ്യാപനമാണിത്. കോട്ടയത്തുനിന്ന് കുറവിലങ്ങാട് വഴിയാണ് തമിഴ്നാട്ടിലെ പ്രശസ്തമായ വേളാങ്കണ്ണിയിലേക്ക് ബസ് സർവീസ് നടത്തുക.

കോട്ടയം ഭാഗത്തുനിന്ന് വേളാങ്കണ്ണിയിലേക്ക് നേരിട്ടുള്ള യാത്രാസൗകര്യങ്ങൾ പരിമിതമായിരുന്ന സാഹചര്യത്തിലാണ് പുതിയ സർവീസ് ആരംഭിക്കുന്നത്. വിശേഷ ദിവസങ്ങളിലും വാരാന്ത്യങ്ങളിലും വേളാങ്കണ്ണിയിലേക്ക് യാത്ര തിരിക്കുന്ന നിരവധി വിശ്വാസികൾക്കും സാധാരണക്കാർക്കും ഈ പുതിയ കെഎസ്ആർടിസി സർവീസ് വലിയൊരു ആശ്വാസമാകും. കുറവിലങ്ങാട് ഉൾപ്പെടെയുള്ള പ്രധാന പ്രദേശങ്ങളിലൂടെ കടന്നുപോകുന്നതിനാൽ നിരവധി ആളുകൾക്കാണ് ഇത് ഉപകാരമാകുക.

ALSO READ: ഒരാഴ്ച അവധിയില്ലേ? വീട്ടിലിരുന്ന് സമയം കളയേണ്ട; അധികമാരും കാണാത്ത കിടിലൻ സ്പോട്ടുകൾ

സർവീസ് റൂട്ട് മാറ്റി സ്ഥാപിച്ചു

കുറവിലങ്ങാട്, കൂത്താട്ടുകുളം വഴി ഓടിയിരുന്ന കെഎസ്ആർടിസി വേളാങ്കണ്ണി ബസിന്റെ റൂട്ട് മാറ്റിയതുമായി ബന്ധപ്പെട്ട് പൊതുജനങ്ങൾക്കിടയിൽ നിലനിന്നിരുന്ന കടുത്ത അതൃപ്തിക്കും പ്രതിഷേധത്തിനും ഒടുവിലാണ് ഇത് പരിഹാരമാകുന്നത്. 25 വർഷത്തിലേറെയായി ചങ്ങനാശ്ശേരിയിൽ നിന്ന് കുറവിലങ്ങാട്, കൂത്താട്ടുകുളം വഴി തടസ്സമില്ലാതെ സർവീസ് നടത്തിയിരുന്ന ചങ്ങനാശ്ശേരി–വേളാങ്കണ്ണി സൂപ്പർ ഡീലക്സ് ബസ് സർവീസ് ഏതാനും മാസങ്ങൾക്ക് മുമ്പാണ് പെട്ടെന്ന് പാലാ, തൊടുപുഴ വഴിയാക്കി പുനഃക്രമീകരിച്ചത്. നിർണ്ണായകമായ ഈ റൂട്ട് മാറ്റം കുറവിലങ്ങാട്, കൂത്താട്ടുകുളം മേഖലയിലെ ആയിരക്കണക്കിന് ദിനസഞ്ചാരികളെയും വേളാങ്കണ്ണി തീർത്ഥാടകരെയും കടുത്ത യാത്രാദുരിതത്തിലാക്കി.

പഴയ റൂട്ടിലേക്ക് തന്നെ സർവീസ് പുനഃസ്ഥാപിക്കാമെന്ന് അധികൃതർ തത്വത്തിൽ സമ്മതിച്ചിരുന്നെങ്കിലും, അവസാന നിമിഷം കെഎസ്ആർടിസി ഈ തീരുമാനത്തിൽ നിന്ന് പിന്മാറുകയായിരുന്നു. ഇതോടെ പ്രദേശവാസികളുടെയും ജനപ്രതിനിധികളുടെയും നേതൃത്വത്തിൽ ശക്തമായ പ്രതിഷേധമാണ് ഉയർന്നുവന്നത്. യാത്രക്കാരുടെ കടുത്ത അമർഷവും പരാതികളും പരിഗണിച്ച്, അധികൃതർ നടത്തിയ ഇടപെലിലാണ് ഇപ്പോൾ ഇക്കാര്യത്തിൽ തീരുമാനമായിരിക്കുന്നത്.

യാത്രാക്രമവും തീർത്ഥാടന പാതയും

പുതുതായി പ്രഖ്യാപിച്ച ഈ സർവീസ് ഉച്ചയ്ക്ക് മൂന്ന് മണിക്ക് കുറവിലങ്ങാട് നിന്ന് പുറപ്പെടും. തീർത്ഥാടകരെ ലക്ഷ്യമിട്ടുള്ള ഈ സർവീസ്, മധുര, തഞ്ചാവൂർ, വേളാങ്കണ്ണി തുടങ്ങിയ പ്രധാന മതപരവും സാംസ്കാരികവുമായ കേന്ദ്രങ്ങളിലേക്ക് നേരിട്ടുള്ള യാത്രാസൗകര്യം ഒരുക്കുമെന്ന് മന്ത്രി മോൻസ് ജോസഫ് അറിയിച്ചു. ആദ്യഘട്ടത്തിൽ, വെള്ളിയാഴ്ചകളിലും ശനിയാഴ്ചകളിലും ആഴ്ചയിൽ രണ്ടുതവണയായിരിക്കും ബസ് സർവീസ് നടത്തുക. യാത്രക്കാരുടെ എണ്ണം വർദ്ധിച്ചാൽ, ഈ സർവീസ് ദിവസേനയുള്ള സർവീസായി മാറ്റുമെന്ന് മന്ത്രി മോൻസ് ജോസഫ് വ്യക്തമാക്കി. പൊതുജനങ്ങൾക്ക് പരമാവധി സൗകര്യപ്രദമാകും വിധം യാത്രാക്രമം ക്രമീകരിക്കാൻ മന്ത്രി സിപി ജോൺ കെഎസ്ആർടിസി ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്.

English Summary:

Government has decided to launch a new Kerala State Road Transport Corporation (KSRTC) bus service connecting Kottayam to the famed pilgrimage destination of Velankanni via Kuravilangad.

കേരളത്തിൽ ശനിയാഴ്ച (ഒക്ടോബർ 17- ഇന്ന്) മുതൽ നീണ്ട അവധിക്കാലം ആരംഭിക്കുകയാണ്. ഞായറാഴ്ചയ്ക്ക് പിന്നാലെ, നവരാത്രി പ്രമാണിച്ചുള്ള സർക്കാർ അവധിയും, തുടർന്ന് മഹാനവമി, വിജയദശമി ദിവസങ്ങളും വരുന്നതോടെ ഒരാഴ്ച്ച നീണ്ട അവധിയാണ് നമുക്ക് മുന്നിലുള്ളത്. ഈ ദിവസങ്ങൾ ഏറ്റവും മികച്ച രീതിയിൽ പ്രയോജനപ്പെടുത്താൻ ആഗ്രഹിക്കുന്നവരാണ് നിങ്ങളെങ്കിൽ വെറുതെ വീട്ടിലിരുന്ന് സമയം കളയരുത്.

നീണ്ട അവധി ദിവസങ്ങൾ വീടിനുള്ളിൽത്തന്നെ ചെലവഴിച്ച് ബോറടിക്കുന്നതിന് പകരം, തിരക്കുകളൊഴിഞ്ഞ് പ്രകൃതി ശാന്തമായി നിലകൊള്ളുന്ന മനോഹരമായ അനുഭവങ്ങളിലേക്ക് യാത്ര തിരിക്കാം. പതിവ് ടൂറിസ്റ്റ് കേന്ദ്രങ്ങളിൽ പോയി ട്രാഫിക്കിലും തിരക്കിലും പെട്ട് മടുകാതെ, ഈ അവധിക്കാലത്ത് ശാന്തമായ അന്തരീക്ഷവും മനോഹരമായ കാഴ്ചകളും സമ്മാനിക്കുന്ന, സഞ്ചാരികൾ അധികമെത്താത്ത ചില സ്ഥലങ്ങളിലേക്ക് നമുക്ക് യാത്ര പ്ലാൻ ചെയ്യാം.

ALSO READ: വിസ്റ്റാഡോം ട്രെയിൻ ആദ്യമായി കേരളത്തിൽ എത്തുന്നു: സർവീസ് ഈ റൂട്ടിൽ ഒക്ടോബർ 22 മുതൽ

എറണാകുളത്തെ പനിയേലിപ്പോര്

എറണാകുളം ജില്ലയിലെ വെങ്ങൂർ പഞ്ചായത്തിൽ, മലയാറ്റൂർ ഫോറസ്റ്റ് ഡിവിഷന് കീഴിൽ വരുന്ന ഈ ഇക്കോ ടൂറിസം കേന്ദ്രം, ശാന്തവും എന്നാൽ ഒട്ടേറെ കാഴ്ചകളും അനുഭവങ്ങളും നിറഞ്ഞതുമായ ഒരു യാത്രയ്ക്ക് ഏറ്റവും അനുയോജ്യമായ സ്ഥലമാണ്. പെരുമ്പാവൂരിൽ നിന്ന് 23 കിലോമീറ്റർ അകലെയുള്ള പനിയേലിപ്പോരിന്റെ പ്രധാന ആകർഷണം, പാറക്കെട്ടുകളും ചെറിയ വെള്ളച്ചാട്ടങ്ങളും നിറഞ്ഞ പെരിയാർ നദിയുടെ മനോഹരമായ ഒരു ഭാഗമാണ്. മരക്കൊമ്പുകളിൽ നിർമ്മിച്ച ചെറിയ കുടിലുകൾ, മുളയിൽ തീർത്ത പാലങ്ങൾ, ചെറിയ വെള്ളച്ചാട്ടം, കൂടാതെ വനപ്രദേശത്തിന്റെ ശാന്തമായ അന്തരീക്ഷം എന്നിവയും ഇവിടെ സന്ദർശകർക്ക് ആസ്വദിക്കാം.

രാത്രിയിൽ ഇവിടെ കാട്ടാനകൾ എത്താറുണ്ട്, എന്നാൽ പകൽ സമയം സുരക്ഷിതമാണ്. സ്ത്രീകൾക്ക് അനുയോജ്യമായ രീതിയിൽ സജ്ജീകരിച്ചിരിക്കുന്ന ഇവിടെ, ശുചിത്വമുള്ള ടോയ്‌ലറ്റുകളും വസ്ത്രം മാറാനുള്ള മുറികളും ഉണ്ട്. കൂടാതെ, സുരക്ഷാ ജീവനക്കാരെയും ശുചീകരണ തൊഴിലാളികളെയും ഇവിടെ നിയോഗിച്ചിട്ടുണ്ട്. രാവിലെ 9 മണിക്കും വൈകുന്നേരം 4 മണിക്കും ഇടയിൽ സന്ദർശനം അനുവദിക്കുന്നതാണ്.

കൊല്ലത്തെ 'സീ അഷ്ടമുടി' ‌

കേരളത്തിലെ രണ്ടാമത്തെ വലിയ തടാകമായ കൊല്ലത്തെ അഷ്ടമുടി, തണ്ണീർത്തട ആവാസവ്യവസ്ഥ, മനോഹരമായ ദ്വീപുകൾ, ചീനവലകൾ, സമ്പന്നമായ ജൈവവൈവിധ്യം എന്നിവയ്ക്ക് പേരുകേട്ടതാണ്. ഇവിടെ ചുറ്റിക്കാണാൻ ഏറ്റവും മികച്ച മാർഗ്ഗം അഷ്ടമുടി തടാകത്തിലൂടെ 5 മണിക്കൂർ നീളുന്ന 'സീ അഷ്ടമുടി' ഹൗസ്‌ബോട്ട് യാത്ര ബുക്ക് ചെയ്യാം എന്നുള്ളതാണ്. വെള്ളത്തിലിറങ്ങാനുള്ള അനുഭവം നൽകുന്നതും കണ്ടൽക്കാടുകളാൽ സമ്പന്നവുമായ ഇക്കോ-ടൂറിസം ദ്വീപായ സംബ്രാനിക്കോടി, മൺറോ തുരുത്ത്, പെരുമൺ പാലം, കാക്കത്തുരുത്ത് ഇങ്ങനെ നിരവധി കാഴ്ചകളും അനുഭവങ്ങളും ഈ യാത്രയിൽ സഞ്ചാരികൾക്കായി കാത്തിരിക്കുന്നു. താൽപ്പര്യമുള്ളവർക്ക് 9400050387 എന്ന നമ്പറിൽ വിളിച്ച് ഈ യാത്ര ബുക്ക് ചെയ്യാവുന്നതാണ്.

വയനാട്ടിലെ നെട്ടറ ഗ്രാമം

ദക്ഷിണ കാശി എന്നറിയപ്പെടുന്ന പ്രശസ്തമായ തിരുനെല്ലി മഹാവിഷ്ണു ക്ഷേത്രത്തിൽ നിന്ന് ഏകദേശം 1.5 കിലോമീറ്റർ അകലെയായാണ് വയനാട്ടിലെ ഈ ഗ്രാമം സ്ഥിതി ചെയ്യുന്നത്. മനോഹരമായ നെട്ടറ പാലം, നെൽപ്പാടങ്ങളും കവുങ്ങിൻ തോട്ടങ്ങളും, ആദിവാസി ജീവിതശൈലി, കാളിന്ദി നദി, തേയിലത്തോട്ടങ്ങൾ എന്നിവയെല്ലാം ചേർന്ന്, പഴമയുടെ തനിമ ഒട്ടും ചോർന്നുപോകാത്ത ഒരു ഗ്രാമീണ അന്തരീക്ഷം ഇവിടെ സന്ദർശകർക്കായി ഒരുക്കുന്നു.

പശ്ചിമഘട്ടത്തിലെ പ്രധാന മലനിരകളിലൊന്നായ ബ്രഹ്മഗിരി മലനിരകളുടെ മനോഹരമായ കാഴ്ചയും ഇവിടെ നിന്ന് ആസ്വദിക്കാം. ദേശാടന പക്ഷികളുടെ സങ്കേതമായ പക്ഷിപാതാളത്തിലേക്കുള്ള ട്രെക്കിംഗ് പാതയും, മുനികൽ ഗുഹകൾ എന്നറിയപ്പെടുന്ന ഗുഹാ തുരങ്കങ്ങളും ഇവിടെ നിന്ന് ഏകദേശം 7 കിലോമീറ്റർ അകലെയായാണ് സ്ഥിതി ചെയ്യുന്നത്.

English Summary:

A long holiday begins on Saturday in Kerala. Followed by Sunday, the weekend is extended by the government holiday for Navaratri (Oct 19), followed by Mahanavami and Vijayadasami (Oct 21 and 22). How to plan a trip this week.

പ്രകൃതിമനോഹരമായ ദൃശ്യങ്ങൾ ആസ്വദിച്ച് കണ്ണാടിക്കൂട്ടിലിരുന്ന് യാത്ര ചെയ്യാൻ ആഗ്രഹിക്കുന്ന സഞ്ചാരികൾക്കും ട്രെയിൻ യാത്രയെ സ്നേഹിക്കുന്നവർക്കും ഒരു സന്തോഷവാർത്തയുമായിട്ടാണ് റെയിൽവേ എത്തിയിരിക്കുന്നത്. കേരളത്തിൽ ആദ്യമായി വിസ്റ്റാഡോം (Vistadome) കോച്ചുകളുള്ള പ്രത്യേക ട്രെയിൻ സർവീസ് ആരംഭിക്കാൻ പോകുന്നതായി റെയിൽവേ കഴിഞ്ഞ ദിവസം അറിയിച്ചിരുന്നു. പ്രകൃതിഭംഗിയാൽ സമൃദ്ധമായ പുനലൂർ - ചെങ്കോട്ട റൂട്ടിലാണ് ഈ വിസ്റ്റാഡോം ട്രെയിൻ കേരളത്തിൽ ആദ്യമായി സർവീസ് നടത്തുന്നത്. ഒക്ടോബർ 22 മുതൽ ജനുവരി 16 വരെയാണ് ഈ പ്രത്യേക സർവീസ് ദക്ഷിണ റെയിൽവേ ക്രമീകരിച്ചിരിക്കുന്നത്.

പടിഞ്ഞാറൻ ഘട്ട മലനിരകളുടെയും തുരങ്കങ്ങളുടെയും പാലങ്ങളുടെയും പച്ചപ്പിന്റെയും വശ്യമായ ഭംഗി പൂർണ്ണമായി ആസ്വദിക്കാൻ സാധിക്കുന്ന രീതിയിലാണ് വിസ്റ്റാഡോം കോച്ചുകൾ രൂപകൽപ്പന ചെയ്തിരിക്കുന്നത്. 360-ഡിഗ്രി റിവോൾവിംഗ് സീറ്റുകളാണ് വിസ്റ്റാഡോം ട്രെയിനിൻ്റെ ഏറ്റവും വലിയ പ്രത്യേകത. വശങ്ങളിലെ വലിയ ഗ്ലാസ് ജനലുകൾക്ക് പുറമെ ട്രെയിനിന്റെ മേൽക്കൂരയിലും സുതാര്യമായ ഗ്ലാസ് പാനലുകൾ നൽകിയിട്ടുണ്ട്. ഓട്ടോമാറ്റിക് സ്ലൈഡിംഗ് വാതിലുകൾ, വൈഫൈ, ഡിജിറ്റൽ ഡിസ്‌പ്ലേ ബോർഡുകൾ, മിനി പാൻട്രി, എൽ.ഇ.ഡി ലൈറ്റുകൾ തുടങ്ങിയവും ഈ ട്രെയിനിൻ്റെ പ്രത്യേകതയാണ്.

ALSO READ: അവധി വെറുതെ കളയേണ്ട; ഇന്ത്യയുടെ 'ബട്ടർ സിറ്റി' കാണാൻ പോയാലോ?

മധുര-ഗുരുവായൂർ എക്സ്പ്രസിൽ വിസ്റ്റാഡോം കോച്ച് അനുവദിച്ചതായി കൊടിക്കുന്നിൽ സുരേഷ് എംപി തൻ്റെ സോഷ്യൽ മീഡിയിൽ പറഞ്ഞിരുന്നു. ഇതാദ്യമായാണ് കേരളത്തിൽ ഒരു ട്രെയിനിൽ വിസ്റ്റാഡോം കോച്ച് യാഥാർത്ഥ്യമാകുന്നത്. യാത്രക്കാർക്ക് പ്രകൃതിഭംഗി ആസ്വദിച്ചുകൊണ്ട് യാത്ര ചെയ്യാൻ അവസരമൊരുക്കുന്ന ഈ സംവിധാനം കേരളത്തിലെ റെയിൽവേ യാത്രാനുഭവത്തിന് പുതിയ വഴിയൊരുക്കും എന്നാണ് പ്രതീക്ഷ.

സർവീസുമായി ബന്ധപ്പെട്ട മറ്റ് വിവരങ്ങൾ

മധുരയിൽ നിന്ന് പുനലൂർ കൊട്ടാരക്കര വഴി ഗുരുവായൂരിലേക്കുള്ള 16327-ാം നമ്പർ എക്സ്പ്രസ് വ്യാഴം, വെള്ളി, ശനി, ഞായർ ദിവസങ്ങളിലാകും സർവീസ് നടത്തുക. നിലവിലുള്ള 13 എൽഎച്ച്ബി കോച്ചുകളിൽ 13 എണ്ണം നിലനിർത്തിക്കൊണ്ടാണ് വിസ്റ്റാഡോം കോച്ച് ഉൾപ്പെടുത്തിയുള്ള താൽക്കാലിക പുനഃക്രമീകരണം നടപ്പാക്കുന്നത്. നിരന്തര ഇടപെടലുകളുടെ ഫലമാമായിട്ടാണ്ണ് ഇപ്പോൾ വിസ്റ്റാഡോം കോച്ച് അനുവദിച്ചിരിക്കുന്നതെന്ന് എംപി പറയുന്നു.

ഈ ആവശ്യം യാഥാർത്ഥ്യമാക്കുന്നതിനായി റെയിൽവേ മന്ത്രി തലത്തിലും റെയിൽവേ ബോർഡ് തലത്തിലും ദക്ഷിണ റെയിൽവേ തലത്തിലും നിരന്തരമായ ഇടപെടലുകളാണ് നടത്തിയത്. യാത്രക്കാർക്ക് കൂടുതൽ മികച്ച യാത്രാസൗകര്യങ്ങൾ ഉറപ്പാക്കുന്നതിനും കേരളത്തിന്റെ വിനോദസഞ്ചാര സാധ്യതകൾ റെയിൽവേയിലൂടെ പ്രയോജനപ്പെടുത്തുന്നതിനുമായി നടത്തിയ ഈ ശ്രമങ്ങൾക്ക് ഫലം കണ്ടതിൽ സന്തോഷമുണ്ടെന്നും അദ്ദേഹം അറിയിച്ചു.

വിസ്തൃതമായ ഗ്ലാസ് ജനാലകളിലൂടെ പ്രകൃതിഭംഗി ആസ്വദിച്ചുകൊണ്ട് യാത്ര ചെയ്യാൻ കഴിയുന്ന വിസ്റ്റാഡോം കോച്ച് വിനോദസഞ്ചാരികൾക്കും കുടുംബങ്ങൾക്കും പുതിയൊരു യാത്രാനുഭവം സമ്മാനിക്കും. പുനലൂർ, കൊട്ടാരക്കര വഴിയുള്ള മധുര–ഗുരുവായൂർ റെയിൽ യാത്രയെ കൂടുതൽ ആകർഷകമാക്കുന്നതിനും കേരളത്തിന്റെ പ്രകൃതിസൗന്ദര്യം യാത്രക്കാർക്ക് അടുത്തറിയുന്നതിനും ഈ സംവിധാനം സഹായകരമാകും.

കൊടിക്കുന്നിൽ സുരേഷ് എംപിയുടെ പോസ്റ്റ്

English Summary:

Indian Railways is introducing Kerala's first Vistadome train service, running from October 22 through January 16 on Punalur–Shenkottai route. The special service features glass-roofed coaches with 360-degree rotating seats, offering passengers panoramic views of the Western Ghats.

നവരാത്രി ആഘോഷങ്ങളുടെ ഭാഗമായി ഇത്തവണ നാല് ദിവസത്തെ അവധിയാണ് ലഭിച്ചിരിക്കുന്നത്. ഒക്ടോബർ 18, 19, 20, 21 തീയതികളിലെ ആ നീണ്ട അവധി വെറുതെ തള്ളിനീക്കണോ, ഒരടിപൊളി ട്രിപ്പ് പോകണോ? ഒരു ചെറിയ യാത്രയാണ് തീരുമാനമെങ്കിൽ ഇന്ത്യയുടെ 'ബട്ടർ സിറ്റി'യിലേക്ക് പോയാലോ... ബട്ടർ അല്ലെങ്കിൽ വെണ്ണ ഏറെ സുപരിചിതമാണെങ്കിലും ഒരു പ്രദേശം തന്നെ ബട്ടറിന്റെ പേരിൽ അറിയപ്പെടുന്നത് കേട്ടിട്ടുണ്ടോ? ആ മനോഹര സ്ഥലത്തെ കുറിച്ച് കൂടുതൽ അറിഞ്ഞാലോ...

ഇന്ത്യയുടെ ബട്ടർ സിറ്റി

ഇന്ത്യയുടെ സ്വാതന്ത്ര്യ പ്രസ്ഥാനത്തെ രൂപപ്പെടുത്താൻ സഹായിച്ച സത്യാഗ്രഹ പട്ടണമായിട്ടാണ് മിക്കവർക്കും ബർദോളി പരിചയം. എന്നാൽ, ഗുജറാത്ത് സൂറത്തിലെ ഈ ചെറിയ പട്ടണത്തിന് ഇന്ത്യയുടെ ചരിത്ര പുസ്തകങ്ങളിൽ മാത്രമല്ല, ക്ഷീര വ്യവസായത്തിലും പ്രത്യേക സ്ഥാനമുണ്ട്. 'ഇന്ത്യയുടെ ബട്ടർ സിറ്റി' എന്ന് പരക്കെ അറിയപ്പെടുന്ന ബർദോളി കർഷക കരുത്തിന്റെയും സഹകരണ പ്രസ്ഥാനത്തിന്റെ വിജയത്തിന്റെയും സ്വാതന്ത്ര്യസമര പാരമ്പര്യത്തിന്റെയും തെളിവാണ്.

ഇന്ത്യയിലെ വലിയൊരു പങ്ക് വെണ്ണ എവിടെ നിന്നാണ് വരുന്നതെന്ന് ചിന്തിച്ചിട്ടുണ്ടെങ്കിൽ, അതിനുള്ള ഉത്തരവും ബർദോളിയിലേക്കാണ് വിരൽ ചൂണ്ടുന്നത്. പതിറ്റാണ്ടുകളായി മികച്ച രീതിയിലുള്ള ഡെയറി ശൃംഖലയാണ് ഈ പട്ടണം കെട്ടിപ്പടുത്തിട്ടുള്ളത്. ബാർദോളിയിൽ നിന്നും സമീപ ഗ്രാമങ്ങളിൽ നിന്നുമുള്ള ആയിരക്കണക്കിന് ക്ഷീരകർഷകർ പ്രതിദിനം സഹകരണ സംഘങ്ങൾക്കും സംസ്കരണ കേന്ദ്രങ്ങൾക്കുമായി പാൽ എത്തിച്ചുനൽകുന്നു. ഇവിടെവച്ച് ഈ പാൽ വെണ്ണ, ചീസ്, മിൽക്ക് പൗഡർ, നെയ്യ്, മറ്റ് ഡെയറി ഉൽപ്പന്നങ്ങൾ എന്നിവയാക്കി മാറ്റി ഇന്ത്യയിലുടനീളമുള്ള ഉപഭോക്താക്കളിലേക്ക് എത്തിക്കുന്നു. വർഷങ്ങൾ കടന്നുപോയതോടെ, വെണ്ണ ഉൽപ്പാദനം ഈ നഗരവുമായി അത്രമേൽ ആഴത്തിൽ ബന്ധപ്പെടുകയും, ഇന്ത്യയുടെ ബട്ടർ സിറ്റി എന്ന പേര് വരികയും ചെയ്തു.

ALSO READ: സെല്ലുലാർ ജയിലും രാധാനഗർ ബീച്ചും കാണാം; കുറഞ്ഞ നിരക്കിൽ ആൻഡമാൻ യാത്രയുമായി ഐ.ആർ.സി.ടി.സി

ഇന്ത്യയ്ക്ക് ഒരു 'സർദാറിനെ' നൽകിയ പട്ടണം

ബർദോളി ഡെയറി വ്യവസായത്തിൽ മാത്രം ഒതുങ്ങുന്ന ഒന്നല്ല.  1928-ൽ ഇന്ത്യയുടെ സ്വാതന്ത്ര്യസമരത്തിലെ നിർണായകമായ ഒരു സംഭവത്തിന് ബർദോളി സാക്ഷ്യം വഹിച്ചു, ബർദോളി സത്യാഗ്രഹം. ബ്രിട്ടീഷ് അധികാരികൾ ചുമത്തിയ അന്യായമായ നികുതി വർദ്ധനവിനെതിരെ ബർഡോലിയിലെ കർഷകർ നടത്തിയ ശക്തമായ അഹിംസാത്മക പ്രതിഷേധമായിരുന്നു അത്. ഈ സമരത്തിന് നേതൃത്വം നൽകിയത് വല്ലഭ്ഭായ് പട്ടേൽ ആയിരുന്നു. സമരം വൻ വിജയമായതിനെത്തുടർന്ന്,  അദ്ദേഹത്തിന് നേതാവ് അല്ലെങ്കിൽ തലവൻ എന്നർത്ഥം വരുന്ന "സർദാർ" എന്ന പദവി നൽകി ആദരിച്ചു.

ബർദോളി-ടൂറിസം

ഒക്ടോബർ മുതൽ മാർച്ച് വരെയുള്ള മാസങ്ങൾ ഈ പട്ടണം സന്ദർശിക്കാൻ അനുയോജ്യമായ സമയമാണ്. ബാർദോളി സത്യഗ്രഹവുമായി ബന്ധപ്പെട്ട സ്വാരാജ് ആശ്രമം, സർദാർ പട്ടേൽ മ്യൂസിയം, പ്രാദേശിക ഉദ്യാനങ്ങളും ബാബെൻ തടാകവും തുടങ്ങിയവ ഇവിടത്തെ പ്രധാന ആകർഷണങ്ങളാണ്. സൂറത്ത് റെയിൽവേ സ്റ്റേഷനിൽ നിന്ന് ഏകദേശം 30 കിലോമീറ്ററും, സൂറത്ത് വിമാനത്താവളത്തിൽ നിന്ന് 45 കിലോമീറ്ററും ദൂരത്തിലാണ് ബാർഡോളി സ്ഥിതി ചെയ്യുന്നത്.

English Summary:

Bardoli, a town in Gujarat, is popularly known as the Butter City of India because of its association with dairy production and the butter industry. Located in the Surat district, Bardoli has a strong connection with the dairy cooperative movement in South Gujarat.

ദസറ ആഘോഷങ്ങളുടെ ഭാഗമായി വർണ്ണാഭമായ ദീപാലങ്കാരങ്ങളാൽ തിളങ്ങിനിൽക്കുന്ന കണ്ണൂർ നഗരത്തിന്റെ മനോഹരമായ രാത്രിദൃശ്യങ്ങൾ ഇനി തൊട്ടടുത്ത് കണ്ടു ആസ്വദിക്കാം. നഗരത്തിലെ കണ്ണഞ്ചിപ്പിക്കുന്ന വർണ കാഴ്ചകൾ ഒരു ഓപ്പൺ- ടോപ്പ് ഡബിൾ ഡെക്കർ ബസിന്റെ മുകളിലിരുന്ന് കണ്ടുമടങ്ങാൻ സഞ്ചാരികൾക്കായി മികച്ച അവസരമൊരുക്കുകയാണ് കെഎസ്ആർടിസി. കണ്ണൂർ കോർപ്പറേഷനുമായി സഹകരിച്ച് കെഎസ്ആർടിസിയുടെ ബജറ്റ് ടൂറിസം സെല്ലാണ് 10 ദിവസം നീണ്ടുനിൽക്കുന്ന ഈ പ്രത്യേക നൈറ്റ് ടൂർ സർവീസിന് തുടക്കമിട്ടിരിക്കുന്നത്.

കെഎസ്ആർടിസി ഡബിൾ ഡെക്കർ ബസിന്റെ മുകളിലത്തെ നിലയിലിരുന്ന് നഗരത്തിലെ ദീപാലങ്കാരങ്ങളും കടൽക്കാറ്റും കൺകുളിർക്കെ കണ്ട് ആസ്വദിച്ച് യാത്ര ചെയ്യാനുള്ള നല്ലൊരു അവസരമാണിത്. കുടുംബത്തോടും കൂട്ടുകാരോടുമൊപ്പം കുറഞ്ഞ ചിലവിൽ നഗരം ചുറ്റിക്കാണാൻ പറ്റിയ നിരക്കിാണ് കെഎസ്ആർടിസി ഈ സർവീസ് ഒരുക്കുന്നത്. ദസറ ആഘോഷ ദിനങ്ങളോട് അനുബന്ധിച്ച് 10 ദിവസം മാത്രമാണ് ഈ പ്രത്യേക സർവീസ് ലഭ്യമാകുന്നത്.

ALSO READ: ബെംഗളൂരുവിലെ ഡൈനോസർ പാർക്ക് ടിക്കറ്റ് നിരക്കും സ്ഥലവും

റൂട്ടും ടിക്കറ്റ് നിരക്കും

40 മിനിറ്റ് നീളുന്ന ഈ യാത്ര ഓൾഡ് ബസ് സ്റ്റാൻഡിൽ നിന്നാണ് ആരംഭിക്കുന്നത്. ശേഷം എകെജി ഹോസ്പിറ്റൽ, താന, പ്ലാസ, മുനീശ്വരൻ കോവിൽ എന്നിവ വഴി സഞ്ചരിച്ച് തിരികെ അതേ സ്ഥലത്ത് തന്നെ എത്തിച്ചേരുന്നു. ഒരാൾക്ക് 100 രൂപയാണ് ടിക്കറ്റ് നിരക്ക് ഈടാക്കുന്നത്. എല്ലാ ദിവസവും വൈകുന്നേരം അഞ്ച് മുതൽ രാത്രി 10 വരെയാണ് ബസ് സർവീസ് നടത്തുന്നത്. എന്നാൽ തിരക്ക് കൂടുതലാണെങ്കിൽ സർവീസ് സമയം അർദ്ധരാത്രി വരെ നീട്ടുമെന്ന് കെഎസ്ആർടിസി ഡിടിഒ പിഇ രഞ്ജിത്ത് അറിയിച്ചിട്ടുണ്ട്.

തിരുവനന്തപുരം, കൊച്ചി, കോഴിക്കോട് എന്നിവിടങ്ങളിലെ നിലവിലുള്ള നൈറ്റ് ടൂറുകൾക്ക് സമാനമായി, കണ്ണൂരിലും ഈ ഡബിൾ ഡെക്കർ സർവീസ് സ്ഥിരമാക്കുന്ന കാര്യം പൊതുജനങ്ങളുടെ പ്രതികരണം കണക്കിലെടുത്ത് കെഎസ്ആർടിസി പരിഗണിച്ചേക്കും. പത്ത് ദിവസം നീണ്ടുനിൽക്കുന്ന കണ്ണൂർ ദസറ ആഘോഷങ്ങളുടെ ഉദ്ഘാടനം മേയർ പി ഇന്ദിരയാണ് നിർവഹിച്ചത്.

കണ്ണൂർ ദസറ ആഘോഷം

പത്തുനാൾ നീണ്ടുനിൽക്കുന്ന കണ്ണൂർ ദസറ ആഘോഷങ്ങൾക്ക് കഴിഞ്ഞ ദിവസമാണ് തുടക്കമായത്. നവരാത്രി കാലയളവിലാണ് കണ്ണൂർ ദസറ ആഘോഷിക്കുന്നത്. തിന്മയ്‌ക്കെതിരായ നന്മയുടെ വിജയത്തെ അടയാളപ്പെടുത്തുന്ന ഈ ആഘോഷവേളയിൽ നാടൻ കലകൾ, ശാസ്ത്രീയ നൃത്തങ്ങൾ, പരമ്പരാഗത ആയോധന കലകൾ, സംഗീത പരിപാടികൾ എന്നിവ അരങ്ങേറും. ഒക്ടോബർ 21-ന് സമാപന ദിവസം കണ്ണൂർ ടൗൺ സ്ക്വയറിൽ നടക്കുന്ന മെഗാ ഡ്രോൺ ഷോയും ഈ പരിപാടിയുടെ ഭാഗമായിരിക്കും.

മൈസൂർ ദസറയുടെ സാംസ്കാരിക പൈതൃകവും കണ്ണൂരിൻ്റെ തനത് കലാരൂപങ്ങളും സമന്വയിപ്പിച്ചാണ് ഇത്തവണത്തെ പരിപാടികൾ ആസൂത്രണം ചെയ്തിരിക്കുന്നത്. കണ്ണൂർ നഗരത്തിലെ വാണിജ്യ മേഖലയെക്കൂടി ഉത്തേജിപ്പിച്ചിരുന്ന വ്യാപാര ഉത്സവം കൂടിയാണ് ദസറ ആഘോഷം. കണ്ണൂരിലെ ജനങ്ങൾ ഏറെ ആവേശത്തോടെയാണ് കഴിഞ്ഞ വർഷങ്ങളിലെ ദസറ ആഘോഷം ഏറ്റെടുത്തത്.

English Summary:

Kannur city has put on its finest festive sparkle for the annual Dasara festival, and visitors can now enjoy the illuminated streets from an open-top double-decker bus. KSRTC launched a special 10-day tour service to give festival-goers.

ഐടി നഗരമായ ബെംഗളൂരുവിൽ സഞ്ചാരികളെയും കുട്ടികളെയും ഒരേപോലെ ആവേശഭരിതരാക്കാൻ അത്യാധുനിക ഡൈനോസർ പാർക്ക് ഒരുങ്ങിയിരിക്കുന്നു. ജുറാസിക് വേൾഡിന്റെ അന്തരീക്ഷം അനുഭവിച്ചറിയാൻ അവസരമൊരുക്കുന്ന ഈ റിയലിസ്റ്റിക് ഡൈനോസർ തീം പാർക്ക് നഗരവാസികൾക്കും അവധിക്കാലം ആഘോഷിക്കാൻ എത്തുന്നവർക്കും വലിയൊരു ആകർഷണമായി മാറുകയാണ്. ലക്ഷക്കണക്കിന് വർഷങ്ങൾക്ക് മുൻപ് ഭൂമി ഭരിച്ചിരുന്ന ഭീമാകാരന്മാരായ ഡൈനോസറുകളുടെ യഥാർത്ഥ വലുപ്പത്തിലുള്ള അനിമട്രോണിക്സ് മോഡലുകളാണ് ഇവിടെ സജ്ജീകരിച്ചിരിക്കുന്നത്.

ജോളിവുഡ് സ്റ്റുഡിയോസ് ആൻ്റ് അഡ്വഞ്ചേഴ്സ് സ്ഥിതി ചെയ്യുന്ന ഈ പാർക്ക് നഗരവാസികൾക്കിടയിൽ വലിയ ശ്രദ്ധ നേടിയിരിക്കുകയാണ്. വനത്തിന്റെ പ്രതീതി ജനിപ്പിക്കുന്ന രീതിയിൽ രൂപകൽപ്പന ചെയ്തിരിക്കുന്ന ഈ പാർക്ക് ഏവരെയും ഒരുപോലെ ആകർഷിക്കുന്നു. യഥാർത്ഥ വലുപ്പത്തിലുള്ളതും ചലിക്കുന്നതുമായ ഡൈനോസറുകളെയാണ് ഇവിടെ ഒരുക്കിയിട്ടുള്ളത്. ഡൈനോസർ പാർക്ക് രാവിലെ 11 മുതൽ വൈകുന്നേരം 6:30 വരെ തുറന്ന് പ്രവർത്തിക്കും. എല്ലാ വിനോദങ്ങളും ഉൾപ്പെടെ 1200 രൂപയാണ് ഒരാൾക്ക് ടിക്കറ്റ് നിരക്ക്.

ALSO READ: ഇനി മൂന്നാറിലേക്ക് പോയാൽ നീലക്കുറിഞ്ഞി കാണാമോ? യാത്രക്കാർ അറിയാൻ

എങ്ങനെ എത്തിച്ചേരാം?

സെൻട്രൽ ബെംഗളൂരുവിൽ നിന്ന് ഏകദേശം 35 മുതൽ 40 കിലോമീറ്റർ വരെയാണ് ഇവിടേക്കുള്ള ദൂരം. ബെംഗളൂരു-മൈസൂരു എക്സ്പ്രസ് വേ വഴി കാറിലോ ബസിലോ എളുപ്പത്തിൽ എത്തിച്ചേരാം. ബിദദി റെയിൽവേ സ്റ്റേഷനും മെട്രോ കണക്റ്റിവിറ്റിയും സമീപത്തുണ്ട്. രാമനഗര ജില്ലയിലെ ബിഡാഡോ വ്യാവസായിക മേഖലയ്ക്ക് സമീപമുള്ള ബിർമംഗള ക്രോസിലാണ് ജോളിവുഡ് സ്റ്റുഡിയോസ് സ്ഥിതി ചെയ്യുന്നത്. ഈ റൂട്ടിൽ മെട്രോ, ക്യാബ്, ഓട്ടോ, ബസ് തുടങ്ങിയ യാത്രാ സൗകര്യങ്ങൾ ലഭ്യമാണ്.

ബുക്ക് മൈ ഷോ അല്ലെങ്കിൽ ഔദ്യോഗിക വെബ്‌സൈറ്റ് വഴി മുൻകൂട്ടി ബുക്ക് ചെയ്യുമ്പോൾ വിദ്യാർത്ഥികൾക്ക് പ്രത്യേക ഡിസ്കൗണ്ടുകൾ ലഭ്യമാണ്. വാരാന്ത്യങ്ങളിൽ വലിയ തിരക്ക് അനുഭവപ്പെടാൻ സാധ്യതയുള്ളതിനാൽ ഓൺലൈൻ വഴി ടിക്കറ്റുകൾ മുൻകൂട്ടി ബുക്ക് ചെയ്ത് രാവിലെ തന്നെ എത്തുന്നതാണ് ഉചിതം.

പാർക്കിലെ പ്രധാന ആകർഷണങ്ങൾ?

ലൈഫ്-സൈസ് അനിമട്രോണിക് ഡൈനോസറുകൾ: യഥാർത്ഥ ശബ്ദവും ചലനങ്ങളുമുള്ള ടി-റെക്സ് , ബ്രാക്കിയോസോറസ്, വെലോസിറാപ്റ്റർ തുടങ്ങിയ വിവിധ ഇനം ഡൈനോസറുകളെ അടുത്തറിയാം.

ഫോട്ടോ-വീഡിയോ സ്പോട്ടുകൾ: കുട്ടികൾക്കും സിനിമാ പ്രേമികൾക്കും ചിത്രങ്ങൾ പകർത്താൻ പ്രകൃതിദത്ത കാടിന്റെ അന്തരീക്ഷത്തിലുള്ള ഫോട്ടോ സോണുകൾ.

ഇന്ററാക്ടീവ് ലേണിംഗ് സോൺ: ഡൈനോസറുകളുടെ ഉത്ഭവവും വംശനാശവും വിവരിക്കുന്ന പ്രദർശനങ്ങൾ.

മറ്റ് അഡ്വഞ്ചർ റൈഡുകൾ: വാട്ടർ പാർക്ക്, അമ്യൂസ്‌മെന്റ് റൈഡുകൾ, മൂവി എക്സ്പീരിയൻസ് സോണുകൾ എന്നിവയും ഇതോടൊപ്പം ആസ്വദിക്കാം.

English Summary:

Bengaluru has opened the doors to its first dinosaur park, offering visitors a chance to step into the prehistoric world of fascinating creatures. The park at Jollywood Studios has gained massive attention from the people of the city.

പന്ത്രണ്ട് വർഷത്തിലൊരിക്കൽ മൂന്നാറിലെ നീലപ്പട്ടുടുപ്പിക്കുന്ന വസന്തം കാണാൻ എല്ലാവർഷവും സഞ്ചാരികളുടെ വലിയൊരു പ്രവാഹമാണ് മലയോര മേഖലയിലേക്ക് ഉണ്ടാകാറുള്ളത്. ഇക്കൊല്ലവും പതിവ് തെറ്റിയില്ല. നാനാ ഭാ​ഗങ്ങളിൽ നിന്ന് ദിവസേന ആയിരക്കണക്കിന് ആളുകളാണ് മൂന്നാറിലേക്ക് വന്നുകൊണ്ടിരുന്നത്. എന്നാൽ ഇപ്പോൾ മൂന്നാറിലേക്ക് പോയാൽ നീലക്കുറിഞ്ഞി കാണാൻ സാധിക്കുമോ? എന്നത് പല യാത്രാപ്രേമികളുടെയും പ്രധാന സംശയമാണ്. ഇടുക്കിയിലേക്ക് വണ്ടി കയറും മുൻപ് നീലക്കുറിഞ്ഞി സീസൺ അവസാനിച്ചോ എന്നത് കൃത്യമായി അറിഞ്ഞിരിക്കേണ്ടത് പ്രധാനമാണ്.

ALSO READ: ഊട്ടിയിലേക്ക് ഓടാൻ വരട്ടെ; വഴിയിൽ വൻ ബ്ലോക്ക്, യാത്രാക്കുരുക്കിനെക്കുറിച്ച് അറിയാം

ചൊക്രമുടിയിലെ നീലക്കുറിഞ്ഞി

മൂന്നാർ ചൊക്രമുടിയിലെ നീലക്കുറിഞ്ഞി വസന്തം അവസാനിച്ചതായാണ് അധികാരികൾ പറയുന്നത്. കഴിഞ്ഞ ഓഗസ്റ്റ് 24 മുതലാണ് ചൊക്രാമുടിയിലെ നീലക്കുറിഞ്ഞി ഉദ്യാനം സന്ദർശകർക്കായി തുറന്നു കൊടുത്തത്. ചൊക്രമുടി മലനിരകളിൽ നീലപട്ടുടുത്ത് 12 വർഷത്തിന് ശേഷമാണ് നീലക്കുറിഞ്ഞി പൂത്തത്. മഴ പെയ്തതോടെ പൂക്കൾ ആകെ കൊഴിഞ്ഞു തുടങ്ങി. ഇതോടെ നീലക്കുറിഞ്ഞി വസന്തം അവസാനിച്ചതായി അധികൃതർ അറിയിച്ചു.

പ്രദേശത്തെ കൂടുതൽ പൂക്കളും നശിച്ചെങ്കിലും കുറിഞ്ഞി കാണാനെത്തുന്നവരെ നിരാശപ്പെടുത്താതെ ഏതാനും ദിവസങ്ങൾകൂടി അതിന് അനുവദിക്കുമെന്ന് അധികൃതർ പറഞ്ഞു. 48 ദിവസം നീണ്ട കുറിഞ്ഞിക്കാാലമാണ് ഇത്തവണ കാണാൻ കഴിഞ്ഞത്. കുറഞ്ഞി വസന്തത്തിലൂടെ മാത്രം ഇക്കൊലം വനം വകുപ്പിന് 75 ലക്ഷത്തിലധികം രൂപയുടെ വരുമാനമാണ് ടിക്കറ്റ് വിൽപനയിലൂടെ ലഭിച്ചത്. അരലക്ഷത്തിലധികം പേർ ഇക്കാലയളവിൽ കുറിഞ്ഞി കാണാനെത്തിയെന്നാണ് കണക്ക്.

10-18 വയസ്സുകാർക്ക് 100 രൂപയും 18ന് മുകളിൽ പ്രായമുള്ളവർക്ക് 200 രൂപയുമായിരുന്നു കുറിഞ്ഞി സന്ദർശനത്തിന് ചൊക്രാമുടിയിലെ ടിക്കറ്റ് നിരക്ക്. ചൊക്രമുടി കൂടാതെ മാട്ടുപ്പെട്ടി , കൊരണ്ടക്കാട് ചിന്നക്കനാൽ അറുപതേക്കർ, മീശപ്പുലിമല എന്നിവിടങ്ങളിലാണ് ഇത്തവണ കൂടുതൽ കുറിഞ്ഞിച്ചെടികൾ പൂവിട്ടത്. മഴ കാരണമാണ് നിലവിലെ നീലക്കുറിഞ്ഞി വസന്തം അവസാനിക്കാൻ കാരണം. പന്ത്രണ്ട് വർഷത്തെ നീണ്ട ഇടവേളയ്ക്ക് ശേഷം പ്രകൃതി ഒരുക്കിയ ഈ അപൂർവ പ്രതിഭാസത്തിനാണ് ഇപ്പോൾ ‌സമാപനമാകുന്നത്. കുറിഞ്ഞിക്കാലം അവസാനിച്ചെങ്കിലും വനം വകുപ്പിൻ്റെ നേതൃത്വത്തിലുള്ള ചൊക്രമുടി ട്രക്കിങ് പതിവുപോലെ തുടരുമെന്ന് അധികൃതർ അറിയിച്ചു.

വിനോദസഞ്ചാരികൾ അറിയാൻ

വന്യജീവി സംരക്ഷണ നിയമപ്രകാരം ഷെഡ്യൂൾ വണ്ണിൽ പെട്ട സസ്യമാണ് നീലക്കുറിഞ്ഞി. പൂക്കളും ചെടികളും പറിക്കുന്നതും നശിപ്പിക്കുന്നതും 25,000 രൂപ പിഴയും മൂന്ന് വർഷം വരെ തടവും ലഭിക്കാവുന്ന കുറ്റമാണ്. ചെടികൾ നശിപ്പിച്ചാൽ കർശന നടപടിയെടുക്കുമെന്ന് ദേവികുളം റേഞ്ചർ ഇഡി അരുൺകുമാർ മുന്നറിയിപ്പ് നൽകിയിട്ടുണ്ട്. സാധാരണക്കാർക്ക് വളരെ കുറഞ്ഞ ചെലവിൽ കുടുംബത്തോടൊപ്പം മൂന്നാറിലേക്ക് പോകാൻ കെഎസ്ആർടിസി പാക്കേജും നിലവിലുണ്ട്. നീലക്കുറിഞ്ഞി പൂത്തുനിൽക്കുന്ന ചൊക്രമുടിയിലേക്ക് ജില്ലയിലെ ഒൻപത് കെഎസ്ആർടിസി യൂണിറ്റുകളിൽ നിന്നാണ് സർവീസുള്ളത്.

English Summary:

Authorities state that the Neelakurinji bloom at Chokramudi in Munnar has come to an end. With the onset of rain, the flowers began to shed, leading officials to announce the conclusion of the blooming season.

ട്രെയിൻ യാത്രകളിൽ സാധാരണയായി ലോവർ ബെർത്ത്, മിഡിൽ ബെർത്ത്, അല്ലെങ്കിൽ അപ്പർ ബെർത്ത് എന്നിവയിൽ ഒന്ന് തിരഞ്ഞെടുക്കേണ്ടി വരാറുണ്ട്. എന്നാൽ ട്രെയിനിൽ തന്നെ വ്യത്യസ്ത നിലകൾ ഉണ്ടെങ്കിലോ? ചെന്നൈയ്ക്കും ബെംഗളൂരുവിനും ഇടയിൽ സർവീസ് നടത്തുന്ന എസി ഡബിൾ ഡെക്കർ എക്സ്പ്രസ് യാത്രക്കാർക്ക് രണ്ട് നിലകളിലായുള്ള സവിശേഷമായ സൗകര്യമാണ് നൽകുന്നത്.

ഈ എസി ചെയർ കാർ ട്രെയിൻ ആഴ്ചയിൽ ഏഴ് ദിവസവും സർവീസ് നടത്തുന്നു എന്നത് മറ്റൊരു പ്രത്യേകതയാണ്. ഡബിൾ ഡെക്കർ ട്രെയിനിൽ യാത്ര ചെയ്യാൻ ആ​ഗ്രഹിക്കുന്നവർക്ക് നല്ലൊരു അവസരമാണിത്. എംജിആർ ചെന്നൈ സെൻട്രൽ-കെഎസ്ആർ ബെംഗളൂരു റൂട്ടിലാണ് ഈ ട്രെയിൻ യാത്ര. ഏകദേശം 5 മണിക്കൂർ 45 മിനിറ്റുകൊണ്ട് ചെന്നൈയിൽ നിന്ന് ബെം​ഗളൂരുവിൽ എത്തിച്ചേരാനാകും.

ALSO READ: ഊട്ടിയിലേക്ക് ഓടാൻ വരട്ടെ; വഴിയിൽ വൻ ബ്ലോക്ക്, അറിയാം

ട്രെയിൻ സമയവും മറ്റ് വിവരങ്ങളും

ചെന്നൈ - ബെംഗളൂരു ഡബിൾ ഡെക്കർ ട്രെയിൻ സമയക്രമം

ഈ ട്രെയിൻ രാവിലെ 7:25-ന് എംജിആർ ചെന്നൈ സെൻട്രലിൽ നിന്ന് പുറപ്പെട്ട് ഉച്ചയ്ക്ക് 1:10-ന് കെഎസ്ആർ ബെംഗളൂരു സിറ്റി ജംഗ്ഷനിൽ എത്തിച്ചേരുന്നു. ഏകദേശം 5 മണിക്കൂറും 45 മിനിറ്റും ആണ് യാത്രാസമയം. മടക്കയാത്രയിൽ, ഉച്ചയ്ക്ക് 1:30-ന് കെഎസ്ആർ ബെംഗളൂരുവിൽ നിന്ന് പുറപ്പെടുന്ന ട്രെയിൻ വൈകുന്നേരം 7:45-ന് ചെന്നൈ സെൻട്രലിൽ എത്തിച്ചേരുന്നു. ബുക്കിംഗ് വിവരങ്ങളും ബാധകമായ നിരക്കുകളും അനുസരിച്ച്, ഒരാൾക്കുള്ള ഏകദേശം 575 രൂപയാണ് ടിക്കറ്റ് നിരക്ക്.

തിരുവള്ളൂർ , ആരക്കോണം, കാട്പാടി ജംഗ്ഷൻ, അമ്പൂർ, വാണിയമ്പാടി, ജോലാർപേട്ട ജംഗ്ഷൻ, കുപ്പം, ബംഗാരപേട്ട് ജംഗ്ഷൻ, കൃഷ്ണരാജപുരം, ബംഗളൂരു കാൻ്റ് തുടങ്ങിയ റൂട്ടുകളിലൂടെയാണ് ട്രെയിൻ യാത്ര. ഈ ട്രെയിനിൽ എട്ട് എസി ചെയർ കാറുകളും, അഞ്ച് നോൺ-എസി സെക്കൻഡ് ക്ലാസ് റിസർവ്ഡ് കോച്ചുകളും, രണ്ട് പവർ കാറുകളും ഉൾപ്പെടുന്നു. ഭക്ഷണസൗകര്യവും ലഭ്യമാണ്. തക്കാളി സൂപ്പ്, വെജിറ്റബിൾ കട്ട്ലറ്റ്, ബ്രെഡ് ഓംലെറ്റ്, മസാല ദോശ തുടങ്ങിയ ലഘുഭക്ഷണങ്ങൾ വിൽക്കുന്നവരും ഇതിലെ പ്രധാന മെനുവാണ്.

പൂർണ്ണമായും എയർ കണ്ടീഷൻ ചെയ്ത കോച്ചുകളിൽ സുഖകരമായ സീറ്റുകളും ചാർജിംഗ് പോയിന്റുകളും സജ്ജീകരിച്ചിരിക്കുന്നു. കോച്ചുകൾക്കുള്ളിൽ നൽകിയിട്ടുള്ള പടികൾ ഉപയോഗിച്ച് യാത്രക്കാർക്ക് താഴത്തെയും മുകളിലത്തെയും നിലകളിലേക്ക് സഞ്ചരിക്കാം. ബിസിനസ്സ് ആവശ്യങ്ങൾക്കോ ബെംഗളൂരു സന്ദർശനങ്ങൾക്കോ ആയി പെട്ടെന്ന് പോയിവരാൻ അനുയോജ്യമായ സമയക്രമവും കുറഞ്ഞ ടിക്കറ്റ് നിരക്കുമാണ് ഇതിന്റെ പ്രധാന ആകർഷണം.

English summary:

AC Double Decker Express between Chennai and Bengaluru is offering passengers a unique two-level seating experience. The train has several stops between MGR Chennai Central and KSR Bengaluru City Junction.

വാരാന്ത്യങ്ങളിലോ അവധി ദിവസങ്ങളിലോ അല്പം വിശ്രമത്തിനും പ്രകൃതി ആസ്വദിക്കാനും മലയാളികളുടെ പ്രിയപ്പെട്ട ഡെസ്റ്റിനേഷനാണ് ഊട്ടി (Ooty). മൂന്നാർ കഴിഞ്ഞാൽ പിന്നെ നമ്മുടെ മനസ്സിലുള്ള സ്ഥാനം ഊട്ടിക്കാണ്. എന്നാൽ ഇനി വണ്ടിയെടുത്ത് നേരെ ഊട്ടിയിലേക്ക് വിടും മുൻപ് ഒന്നു ശ്രദ്ധിക്കുന്നത് നന്നായിരിക്കും. പ്രധാന പാതകളിലെല്ലാം മണിക്കൂറുകൾ നീളുന്ന രൂക്ഷമായ ഗതാഗതക്കുരുക്കാണ് സഞ്ചാരികളെ കാത്തിരിക്കുന്നത്. അവധി ആഘോഷത്തിനായി എത്തുന്ന സഞ്ചാരികളുടെ തിരക്കിൽ ഗൂഡല്ലൂർ –ഊട്ടി ദേശീയ പാതയിലാണ് ഏറ്റവും കൂടുതൽ ബ്ലോക്ക് അനുഭവപ്പെടുന്നത്.

നവരാത്രി അവധി കൂടി വരാനിരിക്കുന്ന സാഹചര്യത്തിൽ ​ഗതാ​ഗതകുരുക്ക് ഇനിയും വർദ്ധിക്കുമെന്നാണ് പ്രദേശവാസികളും അധികാരികളും പറയുന്നത്. വാരാന്ത്യങ്ങളിലും അവധി ദിവസങ്ങളിലും കേരളം, കർണാടക, തമിഴ്‌നാട് എന്നീ സംസ്ഥാനങ്ങളിൽ നിന്ന് ആയിരക്കണക്കിന് വാഹനങ്ങളാണ് ഒരേസമയം ഊട്ടിയിലേക്ക് എത്തുന്നത്.

ALSO READ: കെഎസ്ആർടിസിക്കൊപ്പം ഈ മാസം പോക്കറ്റ് കാലിയാകാതെ കറങ്ങാം

ഊട്ടിയിലേക്ക് പോകും മുമ്പ് അറിയാൻ

സഞ്ചാരികളുടെ ക്രമാതീതമായ വരവ് കാരണം 200 വാഹനങ്ങൾ മാത്രമാണ് ഒരു ദിവസം കല്ലട്ടി ചുരത്തിലൂടെ കടന്നു പോകാൻ അനുവദിക്കുകയുള്ളൂ. ഇത് നിയന്ത്രിക്കുന്നതിനായി മാവനഹള്ളയിൽ വനംവകുപ്പ് ചെക്ക് പോസ്റ്റ് സ്ഥാപിച്ചിട്ടുണ്ട്. ചെന്നൈ ഹൈക്കോടതി ഉത്തരവിനെ തുടർന്നാണ് നടപടി. കാലാവസ്ഥ അനുകൂലമായതും നിലവിലെ തിരക്കിന് കാരണമായിട്ടുണ്ട്.

ശ്രദ്ധിക്കേണ്ട പ്രധാന റൂട്ടുകൾ

മേട്ടുപ്പാളയം - കൂനൂർ - ഊട്ടി റൂട്ട്: തമിഴ്‌നാട് ഭാഗത്ത് നിന്ന് വരുന്ന ഏറ്റവും പ്രധാന പാതയിൽ കനത്ത ബ്ലോക്കാണ് അനുഭവപ്പെടുന്നത്.

ഗുഡല്ലൂർ - ഊട്ടി റൂട്ട്: വയനാട്, നിലമ്പൂർ വഴി പോകുന്നവർ ഉപയോഗിക്കുന്ന ഈ റൂട്ടിലും ചെക്ക്‌പോസ്റ്റുകളിലെ പരിശോധനയും വാഹനപ്പെരുപ്പവും കാരണം മിനിറ്റുകളോളം കിടക്കേണ്ടി വരുന്നു.

ബന്ദിപ്പൂർ - മുതുമലൈ റൂട്ട്: മൈസൂർ/ ബെംഗളൂരു വഴി വരുന്നവർ രാത്രികാല യാത്രാവിലക്കും രാവിലെ ചെക്ക്‌പോസ്റ്റിലുണ്ടാകുന്ന തിരക്കും കണക്കിലെടുക്കണം.

യാത്ര പ്ലാൻ ചെയ്യുമ്പോൾ

ഇ-പാസ് നിർബന്ധം: തമിഴ്‌നാട് സർക്കാരിന്റെ നിബന്ധനപ്രകാരം നീലഗിരി/ ഊട്ടി മേഖലയിലേക്ക് പ്രവേശിക്കുന്ന വാഹനങ്ങൾക്ക് ഇ-പാസ് നിർബന്ധമാണ്. യാത്ര തിരിക്കും മുൻപ് തന്നെ ഔദ്യോഗിക പോർട്ടൽ വഴി ഇ-പാസ് എടുത്തിട്ടുണ്ടെന്ന് ഉറപ്പാക്കുക.

യാത്രാ സമയം മാറ്റുക: ശനി, ഞായർ ദിവസങ്ങൾക്ക് പകരം പ്രവൃത്തിദിവസങ്ങളിൽ യാത്ര പ്ലാൻ ചെയ്താൽ വലിയ ​ഗതാ​ഗത തിരക്ക് ഒഴിവാക്കി സ്ഥലങ്ങൾ അസ്വദിക്കാം.

നേരത്തെ എത്തുക: ചുരം പാതകളിൽ രാവിലെ ഏഴ് മണിക്ക് മുൻപായി പ്രവേശിക്കാൻ സാധിച്ചാൽ വലിയ ബ്ലോക്കിൽപ്പെടാതെ ടൗണിലെത്തിച്ചേരാനാകും.

പൊതുഗതാഗതം ഉപയോഗിക്കുക: മേട്ടുപ്പാളയത്ത് നിന്ന് ടോയ് ട്രെയിൻ വഴിയോ, KSRTC / TNSTC ബസുകൾ വഴിയോ ഉള്ള യാത്ര ബ്ലോക്കിൽപ്പെടാതെ രക്ഷപ്പെടുത്തും.

സുരക്ഷിതമായ ഡ്രൈവിംഗ്: ചുരത്തിലും മലയോര പാതകളിലും ഓവർടേക്കിംഗ് പൂർണ്ണമായും ഒഴിവാക്കുക. ചെറിയൊരു അപകടമോ വാഹനം കേടാകലൊ ഉണ്ടായാൽ പോലും മണിക്കൂറുകളോളം ഗതാഗതം സ്തംഭിക്കും.

English Summary;

Ooty traffic is experiencing a significant surge with the ongoing holiday rush. This causing congestion on the Gudalur-Ooty National Highway. Check Ooty travel guidelines for private vehicles.

സാധാരണക്കാർക്ക് താങ്ങാനാവുന്ന ചെലവിൽ സുരക്ഷിതമായി യാത്ര ചെയ്യാൻ അവസരമൊരുക്കുന്ന കിടിലൻ പാക്കേജുകളാണ് ഓരോ മാസവും കെഎസ്ആർടിസി ബജറ്റ് ടൂറിസം സെൽ (KSRTC Budget Tourism Cell) പുറത്തിറക്കുന്നത്. ഈ മാസത്തെ ആകർഷകമായ യാത്രാ പാക്കേജുകളാണ് ഇപ്പോൾ ആളുകളെ ആകർഷിക്കുന്നത്. സംസ്ഥാനത്തെ വിവിധ ഡിപ്പോകളിൽ നിന്നായി ഗവി ജംഗിൾ സഫാരി, മൂന്നാർ മലനിരകൾ, മലക്കപ്പാറ, വയനാട്, നെല്ലിയാമ്പതി തുടങ്ങി നിരവധി പ്രകൃതിരമണീയമായ കേന്ദ്രങ്ങളിലേക്കാണ് ഈ മാസം യാത്രകൾ ക്രമീകരിച്ചിരിക്കുന്നത്.

മൂന്നാറിലെ നീലക്കുറിഞ്ഞി വസന്തം കാണാനും മൂകാംബിക ക്ഷേത്രദർശനം നടത്താനും ഉൾപ്പെടെ ആകർഷകമായ ഒട്ടേറെ പാക്കേജുകളാണ് ഇത്തവണ ഒരുക്കിയിരിക്കുന്നത്. മൂന്നാറിൽ നീലക്കുറിഞ്ഞി പൂത്തത് കാണാൻ കെഎസ്ആർടിസി ഒക്ടോബറിൽ പ്രത്യേക യാത്രകളാണ് ഒരുക്കിയിട്ടുള്ളത്. വെറും 720 രൂപയ്ക്ക് മൂന്നാർ തേയിലത്തോട്ടങ്ങളും മലനിരകളും കണ്ട് മടങ്ങാനാകുന്ന ഈ പാക്കേജാണ് ജനശ്രദ്ധ പിടിച്ചുപറ്റുന്നത്.

ALSO READ: കെഎസ്ആർടിസിയുടെ പ്രീമിയം വോൾവോ ബസിലെ സൗകര്യങ്ങൾ

കോടമഞ്ഞും കാറ്റും നിറഞ്ഞ ഇലവീഴാപൂഞ്ചിറയുടെയും ഇല്ലിക്കൽ കല്ലിന്റെയും മനോഹരമായ കാഴ്ചകൾ കാണാൻ സാധിക്കുന്ന 520 രൂപയുടെ പാക്കേജും കെഎസ്ആർടിസി ഈ മാസം ഒരുക്കിയിട്ടുണ്ട്. ഭക്തജനങ്ങൾക്കായി ആലപ്പുഴ ഡിപ്പോയിൽ നിന്ന് മൂകാംബികാ ദർശനത്തിനായി പ്രത്യേക ബജറ്റ് സർവീസുകൾ ലഭ്യമാണ്. ഏറ്റവും കൂടിയ ടിക്കറ്റ് നിരക്ക് മൂകാംബികയിലേക്കുള്ളതാണ്. 3020 രൂപയാണ് ഈ യാത്രയ്ക്ക് ഈടാക്കുന്നത്.

ബജറ്റ് ടൂറിസം ട്രിപ്പുകൾ ഇങ്ങനെ

1. ഒക്ടോബർ 10 ശനിയാഴ്ച്ച: കല്ലാർ – മീൻമുട്ടി – പൊന്മുടി യാത്ര. ടിക്കറ്റ് നിരക്ക് 1000 രൂപ.
2. ഒക്ടോബർ 11 ഞായറാഴ്ച്ച: ഇഞ്ചത്തൊട്ടി യാത്ര. ടിക്കറ്റ് നിരക്ക് 750 രൂപ.
3. ഒക്ടോബർ 12 തിങ്കളാഴ്ച്ച: മൂകാംബിക യാത്ര. ടിക്കറ്റ് നിരക്ക് 3020 രൂപ.
4. ഒക്ടോബർ 17 ശനിയാഴ്ച്ച: ഗുരുവായൂർ യാത്ര. ടിക്കറ്റ് നിരക്ക് 830 രൂപ.
5. ഒക്ടോബർ 18 ഞായറാഴ്ച്ച: മാമലക്കണ്ടം യാത്ര. ടിക്കറ്റ് നിരക്ക് 1110 രൂപ.
6. ഒക്ടോബർ 20 ചൊവ്വാഴ്ച്ച: മലക്കപ്പാറ യാത്ര. ടിക്കറ്റ് നിരക്ക് 890 രൂപ.
7. ഒക്ടോബർ 21 ബുധനാഴ്ച്ച: കല്ലാർ – മീൻമുട്ടി – പൊന്മുടി യാത്ര. ടിക്കറ്റ് നിരക്ക് 1000 രൂപ.
8. ഒക്ടോബർ 22 വ്യാഴാഴ്ച്ച: അടവി – ഗവി – പരുന്തുംപാറ യാത്ര. ടിക്കറ്റ് നിരക്ക് 1800 രൂപ.
9. ഒക്ടോബർ 24 ശനിയാഴ്ച്ച: ചതുരംഗപ്പാറ യാത്ര. ടിക്കറ്റ് നിരക്ക് 830 രൂപ.
10. ഒക്ടോബർ 25 ഞായറാഴ്ച്ച: അഞ്ചുരുളി – രാമക്കൽമേട് യാത്ര. ടിക്കറ്റ് നിരക്ക് 720 രൂപ. ‌

English Summary:

Explore the complete KSRTC October Budget Travel List for 2026. Discover affordable KSRTC tour packages to Gavi, Munnar, Malakkappara, and Wayanad.

കേരളത്തിലെ പൊതുഗതാഗത രംഗത്ത് വിപ്ലവകരമായ മാറ്റ കുറിച്ചുകൊണ്ട് കേരള സ്റ്റേറ്റ് റോഡ് ട്രാൻസ്‌പോർട്ട് കോർപ്പറേഷൻ (KSRTC) പുതിയ പ്രീമിയം ലക്ഷ്വറി വോൾവോ എസി എക്സിക്യൂട്ടീവ് ബസ് സർവീസ് ആരംഭിച്ചു. തലസ്ഥാന നഗരമായ തിരുവനന്തപുരത്തെയും വാണിജ്യ കേന്ദ്രമായ എറണാകുളത്തെയും ബന്ധിപ്പിക്കുന്ന ഈ സർവീസ്, സാധാരണക്കാർക്ക് മിതമായ നിരക്കിൽ വിമാനങ്ങളിലെ ബിസിനസ് ക്ലാസ് യാത്രയ്ക്ക് സമാനമായ അത്യാധുനിക അനുഭവമാണ് ഉറപ്പുനൽകുന്നത്. കെഎസ്ആർടിസി പുറത്തിറക്കിയ പുതിയ പ്രീമിയം വോൾവോ എക്സിക്യൂട്ടീവ് ബസുകൾ, റോഡ് യാത്രയെക്കുറിച്ചുള്ള സങ്കൽപ്പങ്ങൾ തന്നെ തിരുത്തിക്കുറിക്കുന്നതാണ്.

ALSO READ: മലബാറിൻ്റെ ഊട്ടിയിലേക്ക് ഒരു യാത്ര; കൊടിക്കുത്തിമലയിലേക്ക് പോകുമ്പോൾ അറിയേണ്ടത്

വിമാന സമാനമായ സൗകര്യങ്ങൾ

യാത്രക്കാരുടെ സുഖസൗകര്യങ്ങൾക്കും വിനോദത്തിനും മുൻഗണന നൽകുന്ന ഈ ബസിലെ പ്രധാന സവിശേഷതകൾ അതിലെ സീറ്റിംങ് തന്നെയാണ്. ബസിൽ ആകെ 36 പ്രീമിയം റിക്ലൈനിംഗ് സീറ്റുകൾ മാത്രമാണുള്ളത്. ഇത് ഓരോ യാത്രക്കാരനും ആവശ്യമായ സ്ഥലസൗകര്യം ഉറപ്പാക്കുന്നു. കാലുകൾ പൂർണ്ണമായും നീട്ടിവെക്കാനുള്ള വിശാലമായ ലെഗ്‌റൂം സൗകര്യവും ഇതിൻ്റെ എടുത്തുപറയേണ്ട പ്രത്യേകതയാണ്. യാത്രക്കാർക്ക് ലഘുഭക്ഷണങ്ങളും പാനീയങ്ങളും കഴിക്കുന്നതിനായി ഓരോ സീറ്റിലും പ്രത്യേകം ട്രേ-ടേബിളുകൾ സജ്ജീകരിച്ചിട്ടുണ്ട്.

ഓരോ യാത്രക്കാരനും ആസ്വദിക്കാൻ സീറ്റുകൾക്ക് മുൻപിൽ സ്മാർട്ട് സ്‌ക്രീനുകൾ ഒരുക്കിയിരിക്കുന്നു. ഹെഡ്‌ഫോണുകൾ ഉപയോഗിക്കാൻ പ്രത്യേക ഹെഡ്‌ഫോൺ പോർട്ടുകൾ. യാത്രയിലുടനീളം തടസ്സമില്ലാത്ത ഡിജിറ്റൽ സേവനങ്ങൾ അസ്വദിക്കാൻ 1 GB സൗജന്യ വൈ- ഫൈയും ലഭ്യമാണ്. മൊബൈലുകളും ലാപ്ടോപ്പുകളും ചാർജ് ചെയ്യാൻ ഓരോ യാത്രകാർക്കും പ്രത്യേകം യുഎസ്ബി ചാർജിംഗ് പോയിന്റുകൾ സീറ്റിനരികിൽ നൽകിയിട്ടുണ്ട്.

വിമാനങ്ങളിലെ ക്യാബിൻ ക്രൂവിനെപ്പോലെ‌, യാത്രക്കാരെ സഹായിക്കാനും ആതിഥ്യമരുളാനുമായി പ്രത്യേകം പരിശീലനം ലഭിച്ച ഒരു ബസ് ഹോസ്റ്റസ് ബസിലുണ്ടാകും. യാത്രയിലുടനീളം ലഘുഭക്ഷണങ്ങളും വെള്ളവും നൽകുന്നതിനും യാത്രക്കാരുടെ ആവശ്യങ്ങൾ അന്വേഷിക്കുന്നതുമാണ് ബസ് ഹോസ്റ്റസിന്റെ പ്രധാന ചുമതല. വിശാലമായ സീറ്റുകളും ലെഗ്‌റൂമും ദീർഘദൂര യാത്രകളിലെ ശാരീരികക്ഷീണം കുറയ്ക്കുന്നു. ദൂരയാത്രകൾ തടസ്സരഹിതമാക്കുന്നതിനായി ഈ ബസ്സിൽ ഒരു കെമിക്കൽ ടോയ്‌ലറ്റ് സജ്ജീകരിച്ചിട്ടുണ്ട്.

കോഫി മേക്കറും ചെറിയ റഫ്രിജറേറ്ററും അടങ്ങിയ ഒരു മിനി-പാൻട്രിയും ഇതിൽ ഒരുക്കിയിട്ടുണ്ട്. സിസിടിവി നിരീക്ഷണവും അത്യാധുനിക സുരക്ഷാ സംവിധാനങ്ങളും ഉൾപ്പെടെയുള്ള മെച്ചപ്പെട്ട സുരക്ഷാ ക്രമീകരണങ്ങളും ബസിലെ പ്രത്യേകതകളാണ്. ഏകദേശം 200 മുതൽ 227 കിലോമീറ്റർ വരെ ദൂരം നാല് മണിക്കൂറിനുള്ളിൽ പിന്നിടുന്ന ഈ നോൺ-സ്റ്റോപ്പ് പ്രീമിയം സർവീസ് തിങ്കൾ മുതൽ വെള്ളി വരെ പ്രവർത്തിക്കുന്നു. രാവിലെ 5.30-ന് തിരുവനന്തപുരത്ത് നിന്ന് പുറപ്പെടുന്ന സർവീസ്, കൊല്ലം, ആലപ്പുഴ, എറണാകുളം ഹൈക്കോടതി വഴി രാവിലെ 9.30-ഓടെ ലക്ഷ്യസ്ഥാനത്ത് എത്തിച്ചേരുന്നു.

English Summary:

KSRTC is redefining public road transport with the launch of its new premium luxury Volvo AC Executive bus service. Connecting the capital city of Thiruvananthapuram to the commercial hub of Ernakulam.

മലപ്പുറം ജില്ലയിലെ പെരിന്തൽമണ്ണയിൽ സ്ഥിതിചെയ്യുന്ന മനോഹരമായ ഹിൽ സ്റ്റേഷനാണ് കൊടിക്കുത്തിമല (Kodikuthimala). മലബാറിലെ ഊട്ടി എന്നറിയപ്പെടുന്ന കൊടികുത്തിമലയിൽ സൂര്യോദയം കാണാനും പ്രകൃതിഭംഗി ആസ്വദിക്കാനുമായി സഞ്ചാരികളുടെ വൻ തിരക്കാണ് അനുഭവപ്പെടുന്നത്. സഞ്ചാരികൾക്കായി സൂര്യോദയവും സൂര്യാസ്തമയവും കാണാനുള്ള സൗകര്യം ഒരുക്കി കൊടികുത്തിമല ഇക്കോ ടൂറിസം കേന്ദ്രത്തിലെ പ്രവേശന സമയം കഴിഞ്ഞ ദിവസം പുനഃക്രമീകരിച്ചിരുന്നു. ഇതിന് പിന്നാലെ സ്ഥലത്തേക്കുള്ള വിനോദസഞ്ചാരികളുടെ തിരക്കും ഇരട്ടിയായി.

സമുദ്ര നിരപ്പിൽ നിന്ന് ഏകദേശം 2000 അടി ഉയരത്തിലാണ് കൊടികുത്തിമല സ്ഥിതി ചെയ്യുന്നത്. മലപ്പുറം ജില്ലയിൽ പ്രകൃതിഭംഗി ആസ്വദിക്കാൻ എത്തുന്നവരുടെ പ്രധാന കേന്ദ്രങ്ങളിലൊന്നാണ് കൊടികുത്തിമല. മലയിൽനിന്നുള്ള മനോഹരമായ സൂര്യോദയക്കാഴ്ചയും കോടമഞ്ഞും തണുത്ത കാലാവസ്ഥയും തന്നെയാണ് ഇവിടേക്ക് ആളുകളെ ആകർഷിക്കുന്നത്. പുലർച്ചെ എത്തി അതിമനോഹരമായ സൂര്യോദയം കാണാനാകും.

ALSO READ: കെഎസ്ആർടിസി കൂടെ ഉണ്ട്… നീലക്കുറിഞ്ഞി ഇനിയും കാണാത്തവർ വേ​ഗം വിട്ടോ

കൊടികുത്തിമലയിലേക്കുള്ള പുതിയ സമയക്രമം

നേരത്തെ രാവിലെ എട്ട് മുതൽ വൈകുന്നേരം അഞ്ച് വരെയായിരുന്നു സന്ദർശകർക്ക് പ്രവേശനം. എന്നാൽ ഇപ്പോൾ പുലർച്ചെ 4.30 മുതൽ ഇവിടേക്ക് നിങ്ങൾക്ക് എത്തിച്ചേരാനാകും. തിങ്കളാഴ്ച ഒഴികെയുള്ള എല്ലാ ദിവസങ്ങളിലും പ്രവേശനം അനുവദിക്കും. പുതിയ സമയക്രമം നിലവിൽ വന്നതോടെ വരാനിരിക്കുന്ന അവധി ദിവസങ്ങളിലും മറ്റും കൊടികുത്തിമലയിലേക്ക് കൂടുതൽ സഞ്ചാരികൾ എത്തുമെന്നാണ് പ്രതീക്ഷ. മലയുടെ താഴെ ഭാഗത്ത് വിശാലമായ പാർക്കിംഗ് ഏരിയ ലഭ്യമാണ്.

മലപ്പുറം ജില്ലയിലെ പെരിന്തൽമണ്ണയ്ക്ക് അടുത്തുള്ള താഴെക്കോട് ഗ്രാമപഞ്ചായത്തിലാണ് കോടിക്കുത്തിമല സ്ഥിതിചെയ്യുന്നത്. കോഴിക്കോട് - പാലക്കാട് ദേശീയപാത വഴി മേലാറ്റൂർ / താഴെക്കോട് റോഡിലൂടെ ഏകദേശം 10-12 കി.മീ. സഞ്ചരിച്ചാൽ ഇവിടെയെത്താം. വള്ളുവമ്പ്രം - മഞ്ചേരി വഴി ഏകദേശം 30 കി.മീ. ദൂരമാണുള്ളത്. മലമുകളിലെ വാച്ച് ടവറിൽ കയറിയാൽ മലപ്പുറത്തിന്റെയും വള്ളുവനാടിന്റെയും വിശാലമായ കാഴ്ചയും ചുറ്റുമുള്ള പച്ചപ്പുനിറഞ്ഞ മലനിരകളും വ്യക്തമായി കാണാം.

വൻ ടിക്കറ്റ് വില്പന

കഴിഞ്ഞ ദിവസമാണ് കൊടികുത്തിമലയിലേക്കുള്ള പ്രവേശനം പുലർച്ചെ 4.30 മുതലാക്കിയത്. ഇതിനുശേഷമുള്ള ആദ്യ ഞായറാഴ്ചയായിൽ ടിക്കറ്റ് വിൽപന കണക്കുകൾ പ്രകാരം 1,370 മുതിർന്നവരും 57 കുട്ടികളും ഉൾപ്പെടെ 1,427 പേരാണ് സൂര്യോദയം കാണാൻ കൊടികുത്തിമല സന്ദർശിച്ചത്. കൂടാതെ മൂന്ന് സ്റ്റിൽ ക്യാമറകൾക്കുള്ള ടിക്കറ്റും ലഭിച്ചു. ആകെ 70,525 രൂപയുടെ ടിക്കറ്റ് വരുമാനമാണു ലഭിച്ചത്. കൊടികുത്തിമലയിൽ കൂടുതൽ അടിസ്ഥാന സൗകര്യങ്ങളും സന്ദർശക സൗഹൃദ സംവിധാനങ്ങളും ഒരുക്കിയാൽ വരും ദിവസങ്ങളിൽ സഞ്ചാരികളുടെ എണ്ണം ഇനിയും ഉയരുമെന്നാണ് വിലയിരുത്തൽ.

English Summary:

Explore Kodikuthimala Hill Station in Malappuram, the Ooty of Malabar. Check complete travel guide details, including entry fees, visiting hours, trekking routes, and how to reach.

നീലക്കുറിഞ്ഞിയുടെ നീലവസന്തം തീർത്ത മൂന്നാറിന്റെ സുന്ദര ദൃശ്യങ്ങൾ ഇനിയും കണ്ടുതീർക്കാത്തവർ വേ​ഗം വിട്ടോളൂ. ഇനി ഈ വസന്തം നേരിൽ കാണണമെങ്കിൽ 12 വർഷമെടുക്കും. അപ്രതീക്ഷിതമായി വിരിഞ്ഞ നീലവസന്തം മൂന്നാർ ടൂറിസത്തെ അടിമുടി മാറ്റിയിരിക്കുകയാണ്. പൊതുജനങ്ങൾക്ക് ഏറ്റവും കുറഞ്ഞ ചെലവിൽ മൂന്നാർ സന്ദർശിക്കാൻ കെഎസ്ആർടിസി ബജറ്റ് ടൂറിസം സെൽ പ്രത്യേക യാത്രാ പാക്കേജുകൾ ഒരുക്കിയിട്ടുണ്ട്. മഞ്ഞുമൂടിയ മലനിരകളും കുറിഞ്ഞിപ്പൂക്കളുടെ ഭംഗിയും നേരിട്ടനുഭവിച്ചറിയാൻ കേരളത്തിലെ പ്രമുഖ ഡിപ്പോകളിൽ നിന്ന് ദിവസേന പ്രത്യേക ബസ് സർവീസുകൾ ലഭ്യമാണ്.

നീലക്കുറിഞ്ഞി കാണാനായി വിനോദസഞ്ചാരികളുടെ വരവ് വർധിച്ചതോടെ ആനച്ചാൽ, മൂന്നാർ ഉൾപ്പെടെയുള്ള പ്രദേശങ്ങളിൽ ഗതാഗതക്കുരുക്ക് രൂക്ഷമായിരിക്കുകയാണ്. ‌കുറിഞ്ഞിപ്പൂക്കാലം അവസാനിക്കാറായതോടെ സന്ദർശകത്തിരക്ക് വർധിച്ചതും കൊച്ചി - ധനുഷ്കോടി ദേശീയപാതയിലെ അനധികൃത പാർക്കിങ്ങും വഴിയോരക്കടകളും വർധിച്ചതുമാണ് മൂന്നാർ മേഖലയിൽ ഗതാഗതക്കുരുക്ക് രൂക്ഷമാകാൻ കാരണം. അതിനാൽ സ്വകാര്യ വാഹനങ്ങൾ നിശ്ചിത സ്ഥലത്ത് പാർക്ക് ചെയ്ത് കെഎസ്ആർടിസി പോലുള്ള പൊതു​ഗതാ​ഗതത്തെ ആശ്രയിക്കുന്നതാണ് ഏറ്റവും ഉചിതമായ മാർ​ഗം.

ALSO READ: കെഎസ്ആർടിസി ട്രാവൽ കാർഡ് എങ്ങനെ ഉപയോ​ഗിക്കാം?

കെഎസ്ആർടിസി സർവീസിൻ്റെ പൂർണ വിവരം

സാധാരണക്കാർക്ക് വളരെ കുറഞ്ഞ ചെലവിൽ കുടുംബത്തോടൊപ്പം മൂന്നാറിലെ മനോഹരമായ മലനിരകളും അപൂർവ്വമായ നീലക്കുറിഞ്ഞി കാഴ്ചകൾ ആസ്വദിക്കാൻ കെഎസ്ആർടിസി പാക്കേജിലൂടെ അവസരമൊരുങ്ങുന്നത്. നീലക്കുറിഞ്ഞി പൂത്തുനിൽക്കുന്ന ചൊക്രമുടിയിലേക്ക് ജില്ലയിലെ ഒൻപത് കെഎസ്ആർടിസി യൂണിറ്റുകളിൽ നിന്നാണ് സർവീസുള്ളത്. ദിവസവും രാവിലെ അഞ്ച് മുതൽ സർവീസ് നടത്തുന്നുണ്ട്. ഓഫ് റോഡ് സഫാരിയുമായി ചതുരംഗപ്പാറ വ്യൂ പോയിന്റും മൂന്നാറിലെ ഗ്യാപ് റോഡിന്റെ കാഴ്ചകളും ഉൾപ്പെടുന്ന യാത്രയാണ് കെഎസ്ആർടിസി ഒരുക്കുന്നത്.

ഗ്യാപ് റോഡിന് സമീപമുള്ള ചൊക്രമുടിക്ക് പിന്നാലെ മാട്ടുപ്പെട്ടി കൊറണ്ടിക്കാട് മലനിരകളിലും നീലക്കുറിഞ്ഞി വ്യാപകമായി പൂത്തുനിൽക്കുന്നുണ്ട്. സമുദ്രനിരപ്പിൽ നിന്ന് 1800 മീറ്ററോളം ഉയരത്തിലുള്ള മലമുകളിൽ വിരിഞ്ഞു നിൽക്കുന്ന ഈ നീലവസന്തം കാണാൻ പൊതുജനങ്ങൾക്കായി എല്ലാവിധ സൗകര്യങ്ങളഉം ഇവിടെയുണ്ട്. മൂന്നാർ പട്ടണം, നല്ലതണ്ണി, ഇക്ക നഗർ എന്നിവിടങ്ങളിലും പൂക്കൾ വിരിഞ്ഞുതുടങ്ങിയതായി അധികൃതർ പറയുന്നു. കെഎസ്ആർടിസി ബജറ്റ് ടൂറിസത്തിന്റെ ഔദ്യോഗിക പോർട്ടൽ വഴി ഓൺലൈനായി ടിക്കറ്റുകൾ മുൻകൂട്ടി ബുക്ക് ചെയ്യാനാകും. ഇത് യാത്ര കൂടുതൽ സൗകര്യപ്രദമാക്കുകയും ചെയ്യും.

വിനോദസഞ്ചാരികൾ അറിയാൻ

വന്യജീവി സംരക്ഷണ നിയമപ്രകാരം ഷെഡ്യൂൾ വണ്ണിൽ പെട്ട സസ്യമാണ് നീലക്കുറിഞ്ഞി. പൂക്കളും ചെടികളും പറിക്കുന്നതും നശിപ്പിക്കുന്നതും 25,000 രൂപ പിഴയും മൂന്ന് വർഷം വരെ തടവും ലഭിക്കാവുന്ന കുറ്റമാണ്. ചെടികൾ നശിപ്പിച്ചാൽ കർശന നടപടിയെടുക്കുമെന്ന് ദേവികുളം റേഞ്ചർ ഇഡി അരുൺകുമാർ മുന്നറിയിപ്പ് നൽകിയിട്ടുണ്ട്.

English Summary:

Planning to see the Neelakurinji bloom in Chokramudi, Munnar. Check KSRTC Budget Tourism package ticket fares, bus timings, depot schedules, and contact details for hassle-free booking!

കെഎസ്ആർടിസി ബസ്സുകളിൽ യാത്ര ചെയ്യുന്നവർക്ക് ഇനി പേഴ്‌സിൽ ചില്ലറപ്പണം തപ്പി ബുദ്ധിമുട്ടേണ്ടതില്ല. യാത്രക്കാർക്കായി അത്യാധുനിക രീതിയിലുള്ള റീചാർജബിൾ സ്മാർട്ട് ട്രാവൽ കാർഡ് (KSRTC Smart Travel Card) സംവിധാനം നേരത്തെ തന്നെ കെഎസ്ആർടിസി അവതരിപ്പിച്ചിരിക്കുകയാണ്. മെട്രോ കാർഡുകൾക്ക് സമാനമായി മുൻകൂട്ടി തുക റീചാർജ് ചെയ്ത് ഉപയോഗിക്കാവുന്ന പ്രീപേഡ് കാർഡുകളാണ് കെഎസ്ആർടിസി അവതരിപ്പിച്ചിരിക്കുന്നത്. ബസിലെ ഇലക്ട്രോണിക് ടിക്കറ്റിംഗ് മെഷീനിൽ (ETM) കാർഡ് ടാപ്പ് ചെയ്യുന്നതോടെ ടിക്കറ്റ് തുക തൽസമയം കിഴിവ് ചെയ്യപ്പെടും.

ALSO READ: വാഗമൺ ഗ്ലാസ് ബ്രിഡ്ജ് തുറന്നു; സമയവും ടിക്കറ്റ് നിരക്കും

എന്താണ് കെഎസ്ആർടിസി സ്മാർട്ട് ട്രാവൽ കാർഡ്?

100 രൂപയാണ് കാർഡിന്റെ വില. 50 രൂപ മുതൽ 2,000 രൂപയ്ക്ക് വരെ ഈ കാർഡിൽ റീചാർജ് ചെയ്യാനാകുമെന്നത് ഇതിൻ്റെ ഏറ്റവും വലിയ പ്രത്യേകതയാണ്. പൂർണ്ണമായും കൈമാറ്റം ചെയ്യാവുന്ന കാർഡ് കുടുംബത്തിനും സുഹൃത്തുക്കൾക്കും ഒരുപോലെ ഉപയോഗിക്കാം. യാത്ര ചെയ്യുന്നതിന് അനുസരിച്ച് ബാലൻസ് കുറയും. കണ്ടക്ടറെ സമീപിച്ചാൽ കാർഡ് റീ ചാർജ് ചെയ്യാനും സാധിക്കും. ചലോ ആപ് വഴിയും റീ ചാർജിന് സൗകര്യമുണ്ട്. തിരുവനന്തപുരം, കൊല്ലം ജില്ലകളിലാണ് ഒന്നാം ഘട്ടത്തിൽ കാർഡുകൾ ലഭ്യമായിരുന്നതെങ്കിൽ ഇപ്ോൾ എവിടെയും ലഭ്യമാണ്.

കെഎസ്ആർടിസിയുടെ എല്ലാ ബസുകളിലും ഈ കാർഡ് ഉപയോഗിച്ച് യാത്ര ചെയ്യാം എന്നതാണ് മറ്റൊരു സവിശേഷത. പുതിയ കാർഡ് എടുക്കുന്നതിനും റീചാർജ് ചെയ്യുന്നതിനുമുള്ള സൗകര്യം അതാത് ഡിപ്പോകളിലും ഒരുക്കിയിട്ടുണ്ട്. കണ്ടക്ടർക്കും യാത്രക്കാർക്കും ഒരുപോലെ ബുദ്ധിമുട്ടുണ്ടാക്കുന്ന ബാക്കി പൈസ പ്രശ്നം പൂർണ്ണമായും ഒഴിവാകുക എന്നതാണ് ഇതിലൂടെ ലക്ഷ്യമിടുന്നത്.

കാർഡ് എങ്ങനെ സ്വന്തമാക്കാം?

പ്രധാന കെഎസ്ആർടിസി ഡിപ്പോകൾ, ബസ് സ്റ്റാൻഡുകളിലെ കൗണ്ടറുകൾ, അല്ലെങ്കിൽ ബസിലെ കണ്ടക്ടർമാരുടെ പക്കൽ നിന്ന് കാർഡ് സ്വന്തമാക്കാം. തുടക്കത്തിൽ നിശ്ചിത സെക്യൂരിറ്റി ഡെപ്പോസിറ്റ് തുക നൽകി കാർഡ് വാങ്ങാവുന്നതാണ്. പിന്നീട് നിങ്ങളുടെ ആവശ്യാനുസരണം, ഡിപ്പോ കൗണ്ടറുകൾ വഴിയോ KSRTC ഔദ്യോഗിക വെബ്‌സൈറ്റ് / മൊബൈൽ ആപ്പ് വഴിയോ ഡിജിറ്റലായി തുക റീചാർജ് ചെയ്യാം.

അതേസമയം, കാർഡ് നഷ്ടപ്പെട്ടാൽ അതിന്റെ ഉത്തരവാദിത്വം ഉടമയ്ക്ക് മാത്രമായിരിക്കും. കാർഡ് പ്രവർത്തിക്കാതെ വരികയാണെങ്കിലും അധികൃതരുടെ പക്കൽ പരിഹാരമുണ്ട്. ഏറ്റവും അടുത്തുള്ള ഡിപ്പോയിൽ പേരും വിലാസവും ഫോൺ നമ്പറും സഹിതം അപേക്ഷ നൽകിയാൽ അഞ്ച് ദിവസത്തിനുള്ളിൽ പുതിയ കാർഡ് ലഭിക്കുകയും ചെയ്യും. പഴയ കാർഡിലുണ്ടായിരുന്ന തുക പുതിയ കാർഡിൽ ഉൾപ്പെടുത്തുകയും ചെയ്യും.

കാർഡിന് കേടുപാട് സംഭവിച്ച് പ്രവർത്തനരഹിതമായാൽ പകരം പുതിയ കാർഡ് ലഭിക്കില്ല. ബസിൽ കയറുമ്പോൾ കണ്ടക്ടറുടെ ടിക്കറ്റ് മെഷീനിൽ കാർഡ് സ്വൈപ്പ് ചെയ്താൽ യാത്രാക്കൂലി ഓട്ടോമാറ്റിക്കായി കാർഡിൽനിന്ന് കുറയും. ടിക്കറ്റ് മെഷീനിൽ തന്നെ കാർഡിലെ ബാലൻസ് തുക എത്രയാണെന്ന് അറിയാനും സാധിക്കും.

English Summary:

KSRTC Digital Travel Card enables cashless travel on KSRTC buses. The rechargeable card can be purchased for ₹100 and used across all KSRTC buses for up to a year.

വിനോദസഞ്ചാരികൾ ഏറെ ആകാംക്ഷയോടെ കാത്തിരുന്ന വാഗമൺ അഡ്വഞ്ചർ പാർക്കിലെ കാന്റിലിവർ ഗ്ലാസ് ബ്രിഡ്ജ് ഒൻപതു മാസത്തെ ഇടവേളയ്ക്ക് ശേഷം വീണ്ടും തുറന്നുകൊടുക്കുന്നു. സുരക്ഷാ ക്രമീകരണങ്ങളും അറ്റകുറ്റപ്പണികളും പൂർത്തിയാക്കിയ ശേഷമാണ് സഞ്ചാരികൾക്കായി പാലം വീണ്ടും പ്രവർത്തനസജ്ജമാക്കുന്നത്. വിദഗ്ദ്ധ സമിതിയുടെ നേതൃത്വത്തിൽ പാലത്തിന്റെ സുരക്ഷാ പരിശോധനകളും ഭാരപരിശോധനയും വിജയകരമായി പൂർത്തിയാക്കി. സഞ്ചാരികളുടെ സുരക്ഷയ്ക്ക് മുൻഗണന നൽകിയാണ് വീണ്ടും പാലം പുനരാരംഭിക്കുന്നത്.

സുരക്ഷ മുൻനിർത്തി ഒരേസമയം നിശ്ചിത എണ്ണം ആളുകളെ മാത്രമേ പാലത്തിലേക്ക് കടത്തിവിടുകയുള്ളൂ. കാലാവസ്ഥാ വ്യതിയാനമനുസരിച്ച് പ്രവേശനത്തിൽ നിയന്ത്രണമുണ്ടാകാനുള്ള സാധ്യതയുമുണ്ട്. കനത്ത മഴയോ മൂടൽമഞ്ഞോ ഉള്ള സമയങ്ങളിൽ സുരക്ഷ മുൻനിർത്തി ഗ്ലാസ് ബ്രിഡ്ജിലേക്കുള്ള പ്രവേശനം താൽക്കാലികമായി നിർത്തിവെച്ചേക്കാം. അതിനാൽ വാഗമണ്ണിലേക്ക് എത്തുന്ന സഞ്ചാരികൾ കാലാവസ്ഥ മുൻകൂട്ടി മനസ്സിലാക്കി യാത്ര പ്ലാൻ ചെയ്യുക.

ALSO READ: കെഎസ്ആർടിസി ആല്ലാത് മറ്റാര്...; നീലക്കുറിഞ്ഞി യാത്രയ്ക്ക് 720

​ഗ്ലാസ് ബ്രിഡ്ജിൻ്റെ മറ്റ് വിവരങ്ങൾ

വാഗമൺ അഡ്വഞ്ചർ പാർക്കിലെ പ്രധാന ആകർഷണമാണ് കാന്റിലിവർ ഗ്ലാസ് ബ്രിഡ്ജ്. പാലത്തിന്റെ ഘടന കൂടുതൽ ബലപ്പെടുത്തുന്നതിനായി എൻഐടി വിദഗ്ധ സമിതി നിർദേശിച്ച ആധുനിക സാങ്കേതിക തിരുത്തലുകളും അറ്റകുറ്റപ്പണികളുമാണ് ഇപ്പോൾ നടക്കുന്നത്. വാഗമണ്ണിലെ സാഹസിക ടൂറിസത്തിന് വൻ ജനപ്രീതി നൽകിയ ഗ്ലാസ് ബ്രിജ് സുരക്ഷാ കാരണങ്ങളാലാണ് താൽക്കാലികമായി നിർത്തിവെച്ചത്. കഴിഞ്ഞ ഒൻപതു മാസമായി ഗ്ലാസ് ബ്രിഡ്ജ് അടച്ചിട്ടിരിക്കുകയായിരുന്നു.

ഇടുക്കി ജില്ലയിലെ വാഗമൺ കോലാഹലമേട്ടിലാണ് ഈ പാലം സ്ഥിതി ചെയ്യുന്നത്. 40 മീറ്റർ (120 അടി) ആണ് ഈ പാലത്തിന്റെ നീളം. സമുദ്രനിരപ്പിൽ നിന്ന് ഏകദേശം 3500 അടി ഉയരത്തിലാണ് പാലം സ്ഥിതി ചെയ്യുന്നത്. ജർമ്മനിയിൽ നിന്ന് ഇറക്കുമതി ചെയ്ത 5 പാളികളുള്ള 40 എംഎം ഗ്ലാസും 35 ടൺ സ്റ്റീലും ഉപയോഗിച്ചാണ് നിർമിതി. നേരത്തെ എല്ലാ ദിവസവും രാവിലെ 9 മണി മുതൽ വൈകുന്നേരം 5:30 വരെയാണ് പ്രവേശനം അനുവദിച്ചിരുന്നത്. തിരക്കുള്ള ദിവസങ്ങളിൽ വൈകുന്നേരം 6 മണി വരെ നീട്ടാറുണ്ടായിരുന്നു.

കോട്ടയത്തു നിന്നും ഏകദേശം 65 കിലോമീറ്ററും, വാഗമൺ ടൗണിൽ നിന്നും 10 കിലോമീറ്ററുമാണ് ​ഗ്ലാസ് ബ്രിഡ്ജ് നിൽകുന്ന സ്ഥലത്തേക്കുള്ള ദൂരം. ഏറ്റവും അടുത്തുള്ള പ്രധാന റെയിൽവേ സ്റ്റേഷൻ കോട്ടയം ആണ്. ഏറ്റവും അടുത്തുള്ള വിമാനത്താവളം കൊച്ചി അന്താരാഷ്ട്ര വിമാനത്താവളമാണ്. വാഗമൺ പൈൻ ഫോറസ്റ്റ്, വാഗമൺ കുരിശുമല, മൊട്ടക്കുന്ന് തുടങ്ങിയ സ്ഥലങ്ങളും ഇതിന് തൊട്ടടുത്താണ്.

English Summary:

The glass bridge at Vagamon Adventure Park is set to reopen to tourists, with work to strengthen the structure already underway. The ongoing work is expected to take about a month.

തിരുവനന്തപുരം: തിരുവനന്തപുരത്തുനിന്ന് റിയാദിലേക്കും ബഹ്റൈനിലേക്കും പുതിയ വിമാന സർവീസുകൾ ആരംഭിക്കുന്നു. ഈ മാസം 27 മുതൽ സർവീസുകൾ ആരംഭിക്കുന്ന എയർ ഇന്ത്യ എക്സ്പ്രസ്സിന്റെ ടിക്കറ്റ് ബുക്കിംഗ് ഇതിനോടകം ആരംഭിച്ച കഴിഞ്ഞതായി റിപ്പോർട്ട്.

സൗദി യാത്രക്കാർക്ക് ആശ്വാസം

സൗദി അറേബ്യയിലേക്ക് നേരിട്ടുള്ള വിമാന സർവീസുകൾ വേണമെന്ന് യാത്രക്കാരുടെ ദീർഘകാലമായിട്ടുള്ള ആവശ്യമാണ് ഇതോടുകൂടി യാഥാർത്ഥ്യമാകുന്നത് തുടക്കത്തിൽ ചൊവ്വാഴം ശനി ദിവസങ്ങളിലാണ് അറിയാതെ സർവീസ് ഉണ്ടായിരിക്കുക. നിലവിലുള്ള ദമാമിലേക്കുള്ള ദിവസത്തിന് പുറമേയാണ് ഇത് സൗദി അറേബ്യയിലെ ജോലി ചെയ്യുന്ന തെക്കൻ കേരളത്തിലെയും തമിഴ്നാട്ടിലെയും യാത്രക്കാർക്ക് ഈ പുതിയ സർവീസ് വളരെയധികം പ്രയോജനം ആയിരിക്കും.

ALSO READ:ബെംഗളൂരു മെട്രോ സർവീസ് നീട്ടി; രാത്രി വൈകിയും സർവീസ്; സമയമിങ്ങനെ

ബഹ്റൈൻ സർവീസിന്റെ വിവരങ്ങൾ....

ബഹ്റൈനിലേക്ക് വ്യാഴം ശനി ദിവസങ്ങളിലാണ് പുതിയ സർവീസ് ക്രമീകരിച്ചിരിക്കുന്നത് ഗൾഫ് എയർ റൂട്ടിൽ ഇതിനകം തന്നെ എല്ലാ ദിവസവും സർവീസ് നടത്തുന്നുണ്ട് എന്നാണ് നിലവിൽ ലഭിക്കുന്ന റിപ്പോർട്ട്.ദുബായ്, അബുദാബി, ഷാർജ, ദോഹ, മസ്കറ്റ്, കുവൈറ്റ്, ദമ്മാം തുടങ്ങിയ പ്രധാന നഗരങ്ങളെ ബന്ധിപ്പിച്ചുകൊണ്ട്, ഗൾഫ് മേഖലയിലേക്ക് നിലവിൽ ആഴ്ചയിൽ 250-ലധികം വിമാന സർവീസുകൾ തിരുവനന്തപുരത്തുനിന്നുണ്ട്.

പുതിയ സർവീസുകൾ തിരുവനന്തപുരത്തുനിന്നുള്ള അന്താരാഷ്ട്ര ശൃംഖല വിപുലീകരിക്കുകയും കേരളവും ഗൾഫ് മേഖലയും തമ്മിലുള്ള വ്യോമ ബന്ധം ശക്തിപ്പെടുത്തുകയും ചെയ്യുന്നതിനൊപ്പം യാത്രക്കാർക്ക് കൂടുതൽ തിരഞ്ഞെടുപ്പുകളും സൗകര്യങ്ങളും നൽകുന്നു.സൗദി അറേബ്യയിൽ ജോലി ചെയ്യുകയും താമസിക്കുകയും ചെയ്യുന്ന തെക്കൻ കേരളത്തിൽ നിന്നും അയൽ സംസ്ഥാനമായ തമിഴ്‌നാട്ടിൽ നിന്നുമുള്ള വലിയൊരു വിഭാഗം പ്രവാസികൾക്ക് പുതിയ റിയാദ് സർവീസ് പ്രത്യേക പ്രയോജനം നൽകുമെന്ന് പ്രതീക്ഷിക്കുന്നു; തിരുവനന്തപുരത്തിനും റിയാദിനും ഇടയിൽ കൂടുതൽ സൗകര്യപ്രദമായ യാത്രാമാർഗ്ഗം ഇത് ഒരുക്കുന്നു.

ENGLISH SUMMARY

New flight services are being launched from Thiruvananthapuram to Riyadh and Bahrain. Reports indicate that ticket bookings have already commenced for Air India Express, which is set to begin operations on the 27th of this month.

വിമാന യാത്രയ്ക്കായി ടിക്കറ്റ് ബുക്ക് ചെയ്യുമ്പോൾ അബദ്ധത്തിൽ പേരിലുണ്ടാകുന്ന ചെറിയൊരു അക്ഷരത്തെറ്റ് പോലും യാത്രാ തടസ്സങ്ങൾക്ക് വഴിവെച്ചേക്കാം. വിമാനത്താവളത്തിലെ ചെക്ക്-ഇൻ കൗണ്ടറിലോ ഇമിഗ്രേഷനിലോ വെച്ച് ടിക്കറ്റിലെ പേരും പാസ്‌പോർട്ട് അല്ലെങ്കിൽ ഐഡി കാർഡിലെ പേരും തമ്മിൽ പൊരുത്തക്കേട് കണ്ടാൽ ബോർഡിംഗ് പാസ്സ് നിഷേധിക്കപ്പെടാൻ സാധ്യതയേറെയാണ്. ടിക്കറ്റിൽ പേര് മാറുകയോ അക്ഷരത്തെറ്റുകൾ വരികയോ ചെയ്താൽ വിമാനക്കമ്പനികളുടെ നിയമങ്ങൾ എന്തൊക്കെയാണെന്നും ഇത് എങ്ങനെ തിരുത്താമെന്നും നമുക്ക് വായിച്ചറിയാം.

ബോർഡിംഗ് നിയമങ്ങൾ ഇങ്ങനെ

യാത്രക്കാർ തങ്ങളുടെ ടിക്കറ്റിലെ പേരും തിരിച്ചറിയൽ രേഖയിലെ പേരും ഒന്നുതന്നെയാണെന്ന് യാത്രയ്ക്ക് മുമ്പ് തന്നെ ഉറപ്പാക്കണമെന്നാണ് എയർലൈൻ നിയമങ്ങൾ അനുശാസിക്കുന്നത്. ഇവ തമ്മിൽ പൊരുത്തക്കേടുണ്ടെങ്കിൽ, യാത്രക്കാരനെ വിമാനത്തിൽ കയറാനോ വിമാനത്താവളത്തിനുള്ളിൽ പ്രവേശിക്കാനോ അനുവദിക്കില്ല. ഇത്തരം സാഹചര്യങ്ങളിൽ നിലവിലെ ടിക്കറ്റ് റദ്ദാക്കി പുതിയ ടിക്കറ്റ് എടുക്കേണ്ടി വരും.

ALSO READ: കെഎസ്ആർടിസി ആല്ലാത് മറ്റാര്...; നീലക്കുറിഞ്ഞി യാത്രയ്ക്ക് 720

ആഭ്യന്തര യാത്രക്കാരാണ് നിങ്ങളെങ്കിൽ, ബുക്കിംഗിലെ പേര് ആധാർ കാർഡിലോ അല്ലെങ്കിൽ അംഗീകൃതമായ മറ്റേതെങ്കിലും തിരിച്ചറിയൽ രേഖയിലോ ഉള്ള പേരുമായി പൊരുത്തപ്പെടേണ്ടതുണ്ട്. അന്താരാഷ്ട്ര യാത്രക്കാരാണെങ്കിൽ, പാസ്‌പോർട്ടിലെ മുഴുവൻ പേരും (ആദ്യ പേര്, മധ്യനാമം - ഉണ്ടെങ്കിൽ, അവസാന പേര് എന്നിവ ഉൾപ്പെടെ) ടിക്കറ്റിലെ പേരുമായി പൊരുത്തപ്പെടണം.

ഫസ്റ്റ് നെയിമും ലാസ്റ്റ് നെയിമും പരസ്പരം മാറിപ്പോകുന്ന സാഹചര്യങ്ങളിൽ വിമാനക്കമ്പനിയുടെ കസ്റ്റമർ കെയറുമായി ബന്ധപ്പെട്ടാൽ യാത്രയ്ക്ക് മുൻപ് തിരുത്തലുകൾ വരുത്താനാകും. പേരിൽ 1 മുതൽ 3 അക്ഷരങ്ങൾ വരെ മാത്രമാണ് തെറ്റിയതെങ്കിൽ മിക്ക വിമാനക്കമ്പനികളും നിസ്സാരമായ നെയിം കറക്ഷൻ ഫീ ഈടാക്കിയോ ചിലപ്പോൾ സൗജന്യമായോ പേര് തിരുത്തി പുതിയ ബോർഡിംഗ് പാസ്സ് നൽകും.

ടിക്കറ്റ് ബുക്ക് ചെയ്ത് 24 മണിക്കൂറിനുള്ളിൽ അക്ഷരത്തെറ്റുകൾ ശ്രദ്ധയിൽപ്പെട്ടാൽ എയർ ഇന്ത്യ, ഇൻഡിഗോ, എമിറേറ്റ്സ് ഉൾപ്പെടെയുള്ള പ്രമുഖ വിമാനക്കമ്പനികൾ സൗജന്യമായോ വളരെ കുറഞ്ഞ സർവീസ് ചാർജിലോ പേര് തിരുത്താൻ അവസരം നൽകുന്നു. വിവാഹശേഷമുള്ള ഇനിഷ്യൽ/പേരുമാറ്റം കാരണമാണ് ടിക്കറ്റിലെ വ്യത്യാസമെങ്കിൽ, ഔദ്യോഗിക വിവാഹ സർട്ടിഫിക്കറ്റോ ഗസറ്റ് വിജ്ഞാപനത്തിന്റെ പകർപ്പോ വിമാനത്താവളത്തിൽ ഹാജരാക്കേണ്ടി വരും.

ടിക്കറ്റ് തുക തിരികെ നൽകുന്നതുമായി ബന്ധപ്പെട്ട്, വിമാനക്കമ്പനികൾക്കുള്ള മാനദണ്ഡങ്ങൾ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ ഈ വർഷം ഫെബ്രുവരിയിൽ പരിഷ്കരിച്ചിരുന്നു. ചില നിബന്ധനകൾക്ക് വിധേയമായി, ടിക്കറ്റ് ബുക്ക് ചെയ്ത് 48 മണിക്കൂറിനുള്ളിൽ അധിക നിരക്കുകളൊന്നും കൂടാതെ യാത്രക്കാർക്ക് ടിക്കറ്റ് റദ്ദാക്കാനോ മാറ്റം വരുത്താനോ സാധിക്കും. അന്താരാഷ്ട്ര യാത്രകളിൽ ടിക്കറ്റിലെ പേര് പാസ്‌പോർട്ടിലെ വിവരങ്ങളുമായി കൃത്യമായി ഒത്തുപോകണം. ഒരൊറ്റ അക്ഷരത്തിന്റെ വ്യത്യാസം പോലും ഇമിഗ്രേഷൻ തടസ്സങ്ങൾക്ക് കാരണമാകാം.

English Summary:

Guide on flight ticket name correction and refund rules in Malayalam. Know what to do if there is a spelling mistake on your airline ticket before boarding.

നമ്മൾ മലയാളികൾക്ക് യാത്ര എന്നുപറഞ്ഞാൽ അതൊരു വികാരമാണ്. ആഴ്ച്ചയിൽ ഒരിക്കൽ മുതൽ വർഷത്തിൽ ഒരിക്കൽ പോലും യാത്ര ചെയ്യുന്നവരാണ് നമ്മൾ. യാത്രയെ സ്നേഹിക്കുന്നവർക്ക് കുറഞ്ഞ ബജറ്റിൽ പോയിവരിക എന്നുപറയുന്നത് വലിയൊരു ആശ്വാസമാണ്. പോക്കറ്റ് കാലിയാകാതെ വയൽക്കാറ്റും മലനിരകളും ആസ്വദിക്കാൻ കെഎസ്ആർടിസിയുടെ വൻ പാക്കേജുകളാണ് ഒക്ടോബർ മാസത്തിലേക്ക് പ്രഖ്യാപിച്ചിരിക്കുന്നത്.

മൂന്നാറിലെ വസന്തമായ നീലക്കുറിഞ്ഞി കാണാനും മൂകാംബിക ക്ഷേത്രദർശനം നടത്താനും ഉൾപ്പെടെ ആകർഷകമായ ഒട്ടേറെ പാക്കേജുകളാണ് ഇത്തവണ ഒരുക്കിയിരിക്കുന്നത്. കെഎസ്ആർടിസി ബജറ്റ് ടൂറിസം സെല്ലിന്റെ നേതൃത്വത്തിൽ ഒക്ടോബർ മാസത്തിലെ ട്രിപ്പുകളുടെയും ടിക്കറ്റ് നിരക്കുകളുടെയും പൂർണ്ണ വിവരങ്ങൾ നമുക്ക് നോക്കാം. ഏറ്റവും കുറഞ്ഞ ചെലവിൽ നടത്തിവരുന്ന ഏകദിന യാത്രയാണിത്. കോടമഞ്ഞും കാറ്റും നിറഞ്ഞ ഇലവീഴാപൂഞ്ചിറയുടെയും ഇല്ലിക്കൽ കല്ലിന്റെയും മനോഹരമായ കാഴ്ചകൾ കാണാനും ഈ യാത്രയിൽ നിങ്ങൾക്ക് അവസരമുണ്ടാകും.

ALSO READ: കെഎസ്ആർടിസിയിൽ ടിക്കറ്റ് എങ്ങനെ നേരത്തെ ബുക്ക് ചെയ്യാം?

യാത്രകളുടെ വിശദമായ വിവരങ്ങൾ

മൂന്നാറിൽ നീലക്കുറിഞ്ഞി പൂത്തത് കാണാൻ കെഎസ്ആർടിസി ഒക്ടോബറിൽ പ്രത്യേക യാത്രകളാണ് ഒരുക്കിയിട്ടുള്ളത്. മൂന്നാർ തേയിലത്തോട്ടങ്ങളും മലനിരകളും കണ്ട് മടങ്ങാനാകുന്ന ഈ പാക്കേജിന് വെറും 720 രൂപ മാത്രമാണ് ഈടാക്കുക. ഒക്ടോബറിൽ മൂന്ന് സർവീസുകളാകും ഉണ്ടാവുക. അതുപോല കോടമഞ്ഞും കാറ്റും നിറഞ്ഞ ഇലവീഴാപൂഞ്ചിറയുടെയും ഇല്ലിക്കൽ കല്ലിന്റെയും മനോഹരമായ കാഴ്ചകൾ കാണാൻ സാധിക്കുന്ന യാത്രയ്ക്ക് 520 രൂപ മാത്രമാണ് വേണ്ടത്.

ഭക്തജനങ്ങൾക്കായി ആലപ്പുഴ ഡിപ്പോയിൽ നിന്ന് മൂകാംബികാ ദർശനത്തിനായി പ്രത്യേക ബജറ്റ് സർവീസുകൾ ലഭ്യമാണ്. ഏറ്റവും കൂടിയ ടിക്കറ്റ് നിരക്ക് മൂകാംബികയിലേക്കുള്ളതാണ്. 3020 രൂപയാണ് ഈ യാത്രയ്ക്ക് ഈടാക്കുന്നത്. ഇതുകൂടാതെ അടവി - ഗവി - പരുന്തുംപാറ ട്രിപ്പും സംഘടിപ്പിക്കുന്നുണ്ട്. ഈ യാത്രയ്ക്ക് ഏകദേശം 1800 രൂപയാണ് ടിക്കറ്റ് നിരക്ക്. കെഎസ്ആർടിസിയുടെ ബജറ്റ് ടൂറിസം പാക്കേജുകളിൽ സീറ്റുകൾ മുൻകൂട്ടി ബുക്ക് ചെയ്യുന്നതിനായി ആലപ്പുഴ കെഎസ്ആർടിസി ബജറ്റ് ടൂറിസം സെല്ലുമായി ബന്ധപ്പെടാവുന്നതാണ്.

കെഎസ്ആർടിസി ബജറ്റ് ടൂറിസം ട്രിപ്പുകൾ ഇങ്ങനെ

ഒക്ടോബർ രണ്ട് വെള്ളിയാഴ്ച്ച: മൂന്നാർ - നീലക്കുറിഞ്ഞി യാത്ര. ടിക്കറ്റ് നിരക്ക് 720 രൂപ.

ഒക്ടോബർ മൂന്ന് ശനിയാഴ്ച്ച: മൂന്നാർ - നീലക്കുറിഞ്ഞി യാത്ര. ടിക്കറ്റ് നിരക്ക് 720 രൂപ.

ഒക്ടോബർ നാല് ഞായറാഴ്ച്ച: ഇല്ലിക്കൽ കല്ല് - ഇലവീഴാപൂഞ്ചിറ യാത്ര. ടിക്കറ്റ് നിരക്ക് 520 രൂപ.

ഒക്ടോബർ ആറ് ചൊവ്വാഴ്ച്ച: മൂന്നാർ - നീലക്കുറിഞ്ഞി യാത്ര. ടിക്കറ്റ് നിരക്ക് 720 രൂപ.

ഒക്ടോബർ 10 ശനിയാഴ്ച്ച: കല്ലാർ - മീൻമുട്ടി - പൊന്മുടി യാത്ര. ടിക്കറ്റ് നിരക്ക് 1000 രൂപ.

ഒക്ടോബർ 11 ഞായറാഴ്ച്ച: ഇഞ്ചത്തൊട്ടി യാത്ര. ടിക്കറ്റ് നിരക്ക് 750 രൂപ.

ഒക്ടോബർ 12 തിങ്കളാഴ്ച്ച: മൂകാംബിക യാത്ര. ടിക്കറ്റ് നിരക്ക് 3020 രൂപ.

ഒക്ടോബർ 17 ശനിയാഴ്ച്ച: ഗുരുവായൂർ യാത്ര. ടിക്കറ്റ് നിരക്ക് 830 രൂപ.

ഒക്ടോബർ 18 ഞായറാഴ്ച്ച: മാമലക്കണ്ടം യാത്ര. ടിക്കറ്റ് നിരക്ക് 1110 രൂപ.

ഒക്ടോബർ 20 ചൊവ്വാഴ്ച്ച: മലക്കപ്പാറ യാത്ര. ടിക്കറ്റ് നിരക്ക് 890 രൂപ.

ഒക്ടോബർ 21 ബുധനാഴ്ച്ച: കല്ലാർ - മീൻമുട്ടി - പൊന്മുടി യാത്ര. ടിക്കറ്റ് നിരക്ക് 1000 രൂപ.

ഒക്ടോബർ 22 വ്യാഴാഴ്ച്ച: അടവി - ഗവി - പരുന്തുംപാറ യാത്ര. ടിക്കറ്റ് നിരക്ക് 1800 രൂപ.

ഒക്ടോബർ 24 ശനിയാഴ്ച്ച: ചതുരംഗപ്പാറ യാത്ര. ടിക്കറ്റ് നിരക്ക് 830 രൂപ.

ഒക്ടോബർ 25 ഞായറാഴ്ച്ച: അഞ്ചുരുളി - രാമക്കൽമേട് യാത്ര. ടിക്കറ്റ് നിരക്ക് 720 രൂപ.

English Summary:

Discover affordable KSRTC budget tourism packages from Alappuzha for October. Complete guide on Munnar Neelakurinji, Mookambika And Ilaveezhapoonchira trips.