Bengaluru Metro: ബെംഗളൂരു മെട്രോയ്ക്ക് പുതിയ റൂട്ട് പരിഗണനയില്; ബിഎംആര്സിഎല്ലിന്റെ വമ്പന് നീക്കം
Bengaluru Namma Metro Extension: ബെംഗളൂരുവിലെ ആനേക്കലിൽ നിർമ്മിക്കാൻ ഉദ്ദേശിക്കുന്ന സ്പോർട്സ് കോംപ്ലക്സിലേക്ക് നമ്മ മെട്രോ കണക്ഷൻ വിപുലീകരിക്കുന്നത് ബിഎംആർസിഎല്ലിന്റെ പരിഗണനയിലെന്ന് റിപ്പോര്ട്ട്
ബെംഗളൂരു: ബെംഗളൂരുവിലെ ആനേക്കലിൽ നിർമ്മിക്കാൻ ഉദ്ദേശിക്കുന്ന പുതിയ ക്രിക്കറ്റ് സ്റ്റേഡിയം ഉൾപ്പെടെയുള്ള സ്പോർട്സ് കോംപ്ലക്സിലേക്ക് മെട്രോ കണക്ഷൻ വിപുലീകരിക്കുന്നത് ബെംഗളൂരു മെട്രോ റെയില് കോര്പറേഷന്റെ (ബിഎംആർസിഎൽ) പരിഗണനയിലെന്ന് റിപ്പോര്ട്ട്. ബന്നാർഘട്ട റോഡിൽ നിന്ന് (കലേന അഗ്രഹാര) അനേക്കലിനടുത്തുള്ള പുതിയ അന്താരാഷ്ട്ര സ്പോർട്സ് കോംപ്ലക്സിലേക്കാണ് പുതിയ പാത വിഭാവനം ചെയ്യുന്നത്.
ജിഗാനി, ആറ്റിബെലെ, സർജാപൂർ തുടങ്ങിയ മേഖലകളെ ബന്ധിപ്പിക്കാനും ഇത് സഹായകരമാകുമെന്നാണ് പ്രതീക്ഷ. പദ്ധതി പ്രാവര്ത്തികമാകുമ്പോള് പുതിയ സ്പോര്ട്സ് കോംപ്ലക്സിലേക്ക് മെട്രോയിലൂടെ ജനങ്ങള്ക്ക് എളുപ്പത്തില് എത്താനാകും.
കഴിഞ്ഞ ജൂണിൽ ചിന്നസ്വാമി സ്റ്റേഡിയത്തിലുണ്ടായ ദുരന്തത്തെ തുടര്ന്നാണ് നഗരത്തിന് പുറത്ത് വലിയൊരു സ്പോർട്സ് കോംപ്ലക്സ് എന്ന ആശയം ശക്തമായത്. ആനേക്കൽ താലൂക്കിലെ സൂര്യനഗർ ഫേസ് 4-ൽ 75 ഏക്കർ സ്ഥലത്ത് ഏകദേശം 1650 കോടി രൂപ ചെലവിലാണ് സ്പോർട്സ് കോംപ്ലക്സ് നിർമ്മിക്കുന്നത്.
ഡൽഹി ആസ്ഥാനമായുള്ള ‘ഇട്രോസോഫ്റ്റ് സൊല്യൂഷൻസ് പ്രൈവറ്റ് ലിമിറ്റഡ്’ എന്ന സ്ഥാപനം മെട്രോ കണക്ഷനുള്ള സാധ്യതാ റിപ്പോർട്ട് തയ്യാറാക്കിയിട്ടുണ്ട്. പാതയുടെ വിന്യാസം, യാത്രക്കാരുടെ എണ്ണം, ഭൂമി ഏറ്റെടുക്കൽ, നിർമ്മാണച്ചെലവ് തുടങ്ങിയ വിശദാംശങ്ങള് അടങ്ങുന്നതാണ് ഈ റിപ്പോര്ട്ട്. 3.5 കിലോ മീറ്ററാണ് പുതിയ പാതയുടെ നീളം. ഇതോടെ ലൈനിന്റെ ആകെ നീളം 72 കിലോമീറ്റർ ആയി വര്ധിക്കും.
അതേസമയം, ചൈന റെയിൽവേ റോളിംഗ് സ്റ്റോക്ക് കോർപ്പറേഷൻ (സിആര്ആര്സി) നല്കിയ 21 പുതിയ ആറ് കോച്ച് ട്രെയിനുകളുടെ മുഴുവൻ ഫ്ലീറ്റും ഗ്രീൻ ലൈനിൽ വിന്യസിക്കാൻ ബിഎംആർസിഎൽ പദ്ധതിയിടുന്നതായി റിപ്പോര്ട്ട്. പർപ്പിൾ ലൈനിലെ തിരക്ക് ഗണ്യമായി കുറയ്ക്കുന്നതിന് ഈ നീക്കം സഹായിക്കുമെന്നാണ് പ്രതീക്ഷ.
പർപ്പിൾ ലൈനിൽ യാത്രക്കാരുടെ എണ്ണം ക്രമാതീതമായി വർധിക്കുന്ന പശ്ചാത്തലത്തില് ട്രെയിനുകളുടെ പുനര്വിന്യാസത്തിലൂടെ തിരക്ക് കുറയുമെന്നാണ് പ്രതീക്ഷയെന്ന് ബിഎംആർസിഎൽ വൃത്തങ്ങള് വ്യക്തമാക്കി. ഈ ട്രെയിനുകള് പര്പ്പിള് ലൈനില് ഉള്പ്പെടുത്താനാണ് ആദ്യം ഉദ്ദേശിച്ചിരുന്നത്.
