Kerala Assembly Election 2026: അനുഗ്രഹവും പിന്തുണയും തേടി മോഹനനെത്തി, വാക്കുപാലിച്ചെന്നു മറുപടി പറഞ്ഞ് കെ സുധാകരൻ
Kannur Congress candidate TO Mohanan visits K Sudhakaran's house : മണ്ഡലത്തിലെ സുധാകരൻ അനുകൂലികളുടെ പൂർണപിന്തുണ ഉറപ്പാക്കുക എന്നതായിരുന്നു ഈ സന്ദർശനത്തിന്റെ പ്രധാന ലക്ഷ്യം. താൻ സ്ഥാനാർത്ഥിയാകുന്നതിൽ യാതൊരു എതിർപ്പും ഇല്ലെന്ന് കെ സുധാകരൻ വ്യക്തമാക്കിയിട്ടുണ്ടെന്ന് കൂടിക്കാഴ്ചയ്ക്ക് ശേഷം മോഹൻ മാധ്യമങ്ങളോട് പറഞ്ഞു.
കണ്ണൂർ: പല ദിവസങ്ങളായി തുടർന്നുവന്ന നാടകീയ സംഭവങ്ങൾക്കും അനിശ്ചിതത്ത്വത്തിനും വിരാമമിട്ട് യുഡിഎഫ് സ്ഥാനാർത്ഥി ടി ഒ മോഹനൻ കെപിസിസി പ്രസിഡന്റും എംപിയുമായ കെ സുധാകരനെ സന്ദർശിച്ചു. ഔദ്യോഗിക പ്രചാരണത്തിന് തുടക്കം കുറിക്കുന്നതിന്റെ ഭാഗമായിട്ടായിരുന്നു മോഹനൻ സുധാകരന്റെ നടാലിലെ വീട്ടിലെത്തിയത്. സ്ഥാനാർത്ഥിയായി എത്തിയ മോഹനനെ ഷോൾ അണിയിച്ചാണ് കെ സുധാകരൻ സ്വീകരിച്ചത്. പിന്നീട് എന്റെ വാക്ക് ഞാൻ പാലിച്ചു എന്ന് അദ്ദേഹം പ്രതികരിച്ചു.
സ്വീകരണത്തിനു ശേഷം ഇരു നേതാക്കളും ഏറെനേരം അടച്ചിട്ട മുറിയിൽ സംസാരിച്ചു. മണ്ഡലത്തിലെ സുധാകരൻ അനുകൂലികളുടെ പൂർണപിന്തുണ ഉറപ്പാക്കുക എന്നതായിരുന്നു ഈ സന്ദർശനത്തിന്റെ പ്രധാന ലക്ഷ്യം. താൻ സ്ഥാനാർത്ഥിയാകുന്നതിൽ യാതൊരു എതിർപ്പും ഇല്ലെന്ന് കെ സുധാകരൻ വ്യക്തമാക്കിയിട്ടുണ്ടെന്ന് കൂടിക്കാഴ്ചയ്ക്ക് ശേഷം മോഹൻ മാധ്യമങ്ങളോട് പറഞ്ഞു. കണ്ണൂർ മണ്ഡലം തിരിച്ചുപിടിക്കുക എന്നതാണ് ഞങ്ങളുടെ പ്രധാന ദൗത്യം അതിനായി ഒരു ടീമായി ഞങ്ങൾ മുന്നോട്ടു പോകും എന്ന് മോഹനൻ കൂട്ടിച്ചേർത്തു
സീറ്റ് വിഭജനവുമായി ബന്ധപ്പെട്ട ഉയർന്ന തർക്കങ്ങൾ പരിഹരിക്കപ്പെട്ടതോടെ സുധാകരൻ ജില്ലയിൽ സജീവമാകാൻ ആണ് തീരുമാനം. മറ്റന്നാൾ ഇരിക്കൂർ മണ്ഡലത്തിലെ സ്ഥാനാർത്ഥി സജീവ് ജോസഫിന്റെ പ്രചാരണ പരിപാടികളിൽ അദ്ദേഹം പങ്കെടുക്കും എന്നാണ് വിവരം. തുടർന്ന് ജില്ലയിലെ മറ്റു മണ്ഡലങ്ങളിലും അദ്ദേഹം യുഡിഎഫിനായി പ്രചാരണത്തിന് ഇറങ്ങും
