Kerala Weather Update: നിങ്ങളുടെ നാട്ടിൽ മഴയുണ്ടോ? ഇന്ന് ചൂടും കനക്കും; കാലാവസ്ഥ പ്രവചനം

തിരുവനന്തപുരം: കേരളത്തിൽ ചൂട് കനക്കുന്നു. വരും മണിക്കൂറുകളിൽ സംസ്ഥാനത്തെ പകൽ താപനില ഗണ്യമായി വർദ്ധിക്കാൻ സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിൻ്റെ മുന്നറിയിപ്പ്. എന്നാൽ പകൽ സമയത്തെ കത്തുന്ന വെയിലിനിടയിലും ആശ്വാസമായി ചില ജില്ലകളിൽ നേരിയ മഴ പെയ്യാൻ സാധ്യതയുണ്ടെന്ന പ്രവചനവും പുറത്തുവന്നിട്ടുണ്ട്. അന്തരീക്ഷം പൊതുവെ വരണ്ടതാണെങ്കിലും ആലപ്പുഴ, കോട്ടയം, ഇടുക്കി, എറണാകുളം, പാലക്കാട്, മലപ്പുറം ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ട്.

മഴയുടെ സാധ്യത നിലനിൽക്കുമ്പോഴും കേരളത്തിലെ ഭൂരിഭാഗം പ്രദേശങ്ങളിലും ചൂട് സാധാരണയേക്കാൾ ഉയർന്ന നിലയിലായിരിക്കും. വടക്കൻ ജില്ലകളിൽ വെയിൽ കഠിനമാകാനാണ് സാധ്യത. ശരാശരി 34°C വരെ താപനില ഉയരാൻ സാധ്യതയുണ്ടെന്നാണ് പ്രവചനം. അതുകൊണ്ട് തന്നെ പൊതുജനങ്ങൾ ഉച്ചസമയങ്ങളിൽ സൂര്യപ്രകാശം നേരിട്ട് ഏൽക്കുന്നത് ഒഴിവാക്കുന്നതാണ് നല്ലത്. ഉയർന്ന ചൂട് സൂര്യാഘാതം പോലുള്ള ആരോഗ്യപ്രശ്നങ്ങൾക്ക് കാരണമായേക്കാം.

ALSO READ: ചൂടിനിടെ കുളിരായി മഴ വരുന്നു, ഈ ജില്ലകളിൽ മാത്രം; കാലാവസ്ഥ പ്രവചനം

ഇനി കേരളക്കരയ്ക്ക് വേനൽമഴയിൽ മാത്രമാണ് പ്രതീക്ഷയുള്ളത്. സാധാരണ ജനുവരി മാസങ്ങളിൽ ലഭിക്കേണ്ട മഴ പോലും കേരളത്തിന് ലഭിച്ചിട്ടില്ല എന്നത് വലിയ ആശങ്കാജനകമാണ്. മഴയുടെ പൂർണമായ പിൻവാങ്ങൽ സംസ്ഥാനത്തുടനീളമുള്ള കർഷകരെയും കാര്യമായി ബാധിച്ചേക്കും. മാർച്ച് മുതൽ മെയ് വരെ ലഭിക്കേണ്ട വേനൽമഴ കൃത്യസമയത്ത് എത്തിയാൽ മാത്രമേ സംസ്ഥാനത്തെ കുടിവെള്ള ക്ഷാമത്തിൽ നിന്നും കൃഷിനാശത്തിൽ നിന്നും ഒരു പരിധിവരെ രക്ഷിക്കാൻ കഴിയൂ. എങ്കിലും, ജനുവരിയിലെ മഴയുടെ അഭാവം വരും മാസങ്ങളിൽ ചൂട് റെക്കോർഡ് തലത്തിലേക്ക് ഉയരാൻ കാരണമായേക്കും.

ചൂട് വർദ്ധിക്കുന്ന സാഹചര്യത്തിൽ പൊതുജനങ്ങൾ ശ്രദ്ധിക്കേണ്ടത്

ദാഹം തോന്നിയില്ലെങ്കിലും ധാരാളം വെള്ളം കുടിക്കുക.

യാത്രകളിൽ കയ്യിൽ ഒരു കുപ്പി വെള്ളം കരുതുക.

ഒആർഎസ് (ORS), നാരങ്ങ വെള്ളം, കഞ്ഞിവെള്ളം, ഇളനീർ തുടങ്ങിയ പാനീയങ്ങൾ ഉത്തമമാണ്.

ഉച്ചയ്ക്ക് 11 മണി മുതൽ മൂന്ന് മണി വരെ നേരിട്ട് വെയിലേൽക്കുന്നത് പരമാവധി ഒഴിവാക്കുക.

പുറത്തിറങ്ങുമ്പോൾ കുടയോ തൊപ്പിയോ നിർബന്ധമായും ഉപയോഗിക്കുക.

കനം കുറഞ്ഞതും ഇളം നിറത്തിലുള്ളതുമായ പരുത്തി വസ്ത്രങ്ങൾ ധരിക്കാൻ ശ്രദ്ധിക്കുക.