Kerala Rain Alert: കുട മാറ്റിവെക്കേണ്ട, മഴ തുടരും! രണ്ട് ജില്ലകളില് ഓറഞ്ച് അലര്ട്ട്, ജാഗ്രതാ നിർദ്ദേശം
Kerala District-Wise Rain Alert July 6 : കേരളത്തില് ഇന്ന് രണ്ട് ജില്ലകളില് ഓറഞ്ച് അലര്ട്ട്. കണ്ണൂര്, കാസര്കോട് ജില്ലകളിലാണ് മുന്നറിയിപ്പ്. എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടുണ്ട്. മറ്റ് ജില്ലകളില് ഗ്രീന് അലര്ട്ടാണ്.
Rain Alert Offshore Trough
സംസ്ഥാനത്ത് കണ്ണൂര്, കാസര്കോട് ജില്ലകളില് ഇന്ന് ഓറഞ്ച് അലര്ട്ട് (Orange alert) മാറ്റമില്ലാതെ തുടരുന്നു. എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടുണ്ട്. മറ്റ് ജില്ലകളില് ഗ്രീന് അലര്ട്ടാണ്. നാളെ (ജൂലൈ ഏഴ്) മലപ്പുറം മുതല് കാസര്കോട് വരെയുള്ള ജില്ലകളില് യെല്ലോ അലര്ട്ടും, മറ്റ് ജില്ലകളില് ഗ്രീന് അലര്ട്ടുമാണ് നിലവില് പ്രഖ്യാപിച്ചിരിക്കുന്നത്. ജൂലൈ എട്ടിന് ആലപ്പുഴ, കോട്ടയം, എറണാകുളം, കോഴിക്കോട്, കണ്ണൂര്, കാസര്കോട് ജില്ലകളില് മാത്രമാണ് യെല്ലോ അലര്ട്ട്.
ജൂലൈ ഒമ്പത്, 10 തീയതികളില് എല്ലാ ജില്ലകളിലും ഗ്രീന് അലര്ട്ടാണ് പ്രഖ്യാപിച്ചിരിക്കുന്നത്. ഇന്ന് ഉച്ചയ്ക്ക് ഒരു മണിക്ക് പുറത്തുവിട്ട മുന്നറിയിപ്പുകളാണ്. വരും മണിക്കൂറുകളില് അപ്ഡേറ്റുകളില് മാറ്റം വരാം. ഔദ്യോഗിക സ്രോതസുകളില് നിന്നുള്ള വിവരങ്ങള് മാത്രം പിന്തുടരുക.
ജാഗ്രത വേണം
ഓറഞ്ച് അലര്ട്ടുള്ള ജില്ലകളില് ഒറ്റപ്പെട്ടയിടങ്ങളില് 24 മണിക്കൂറില് 115.6 മില്ലിമീറ്റര് മുതല് 204.4 മില്ലിമീറ്റര് വരെ മഴയ്ക്ക് സാധ്യതയുണ്ട്. യെല്ലോ അലര്ട്ടുള്ള ജില്ലകളില് ഒറ്റപ്പെട്ടയിടങ്ങളില് 24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെയും മഴ പ്രതീക്ഷിക്കാം. ഗ്രീന് അലര്ട്ടുള്ള ജില്ലകളില് നേരിയത് മുതല് മിതമായ തോതില് വരെ മഴ ലഭിക്കാനുള്ള സാഹചര്യമുണ്ട്.
സംസ്ഥാനത്ത് ജൂലൈ എട്ട് വരെ ഒറ്റപ്പെട്ടയിടങ്ങളില് ശക്തമായ കാറ്റിനും സാധ്യതയുണ്ട്. മണിക്കൂറില് 40-50 കി.മീ വേഗതയില് കാറ്റിന് സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ശക്തമായ കാറ്റില് മരങ്ങള് കടപുഴകിയും, ചില്ലകള് ഒടിഞ്ഞും അപകടങ്ങളുണ്ടാകാന് സാധ്യതയുള്ളതിനാല് പൊതുജനങ്ങള് ജാഗ്രത പാലിക്കണം. ഒരു കാരണവശാലും മരങ്ങളുടെ ചുവട്ടില് നില്ക്കുകയോ, വാഹനങ്ങള് പാര്ക്ക് ചെയ്യുകയോ പാടില്ല.
Also Read: Bengaluru Weather: ബെംഗളൂരുവില് മഴയെത്തി, ശക്തമായ കാറ്റില് പറന്നുപോകല്ലേ; ഇടിമിന്നലും കൂടെയുണ്ട്
കാറ്റ് വീശി തുടങ്ങുമ്പോള് ജനാലകളും വാതിലുകളും അടച്ചിടണം. ജനലുകളുടെയും വാതിലുകളുടെയും സമീപത്ത് നില്ക്കരുത്. വീടിന്റെ ടെറസില് നില്ക്കുന്നതും ഒഴിവാക്കണം. അടച്ചുറപ്പില്ലാത്ത കെട്ടിടങ്ങളില് താമസിക്കുന്നവര് അധികൃതര് നിര്ദ്ദേശിക്കുന്നതുപ്രകാരം സുരക്ഷിതമായ കെട്ടിടങ്ങളിലേക്ക് മാറണം.
ശക്തമായ കാറ്റില് വൈദ്യുതി കമ്പികളും, പോസ്റ്റുകളും പൊട്ടിവീഴാന് സാധ്യതയുണ്ട്. ഇത്തരത്തിലുള്ള അപകടങ്ങള് ശ്രദ്ധയില്പെട്ടാല് ഉടന് കെഎസ്ഇബിയുടെ 1912 എന്ന കണ്ട്രോള് റൂമിലോ, 1077 എന്ന നമ്പറില് ജില്ലാ ദുരന്ത നിവാരണ അതോറിറ്റിയുടെ കണ്ട്രോള് റൂമിലോ വിവരം അറിയിക്കണം.
തീരദേശ ന്യൂനമർദ്ദ പാത്തി
തെക്കന് ഗുജറാത്ത് തീരം മുതല് വടക്കന് കേരള തീരം വരെ സമുദ്രനിരപ്പില് തീരദേശ ന്യൂനമര്ദ്ദ പാത്തി സ്ഥിതി ചെയ്യുന്നുണ്ട്. തെക്കന് ജാര്ഖണ്ഡിനും, അതിനോട് ചേര്ന്നുള്ള വടക്കന് ഒഡീഷയുടെ ഉള്പ്രദേശങ്ങള്ക്കും മുകളിലായി തീവ്രന്യൂനമര്ദ്ദവുമുണ്ട്.
ഇത് അടുത്ത 24 മണിക്കൂറില് ജാര്ഖണ്ഡ്, വടക്കന് ഛത്തീസ്ഗഡ്, അതിനോട് ചേര്ന്നുള്ള കിഴക്കന് മധ്യപ്രദേശ് എന്നിവിടങ്ങളിലൂടെ വടക്ക്-പടിഞ്ഞാറ് ദിശയിലേക്ക് നീങ്ങിയേക്കും. ഇത് മൂലം ജൂലൈ 10 വരെ കേരളം, മാഹി എന്നിവിടങ്ങളില് നേരിയ, ഇടത്തരം മഴയ്ക്ക് സാധ്യതയുണ്ട്. ഇന്ന് ഒറ്റപ്പെട്ട അതിശക്തമായ മഴയ്ക്കും, ജൂലൈ എട്ട് വരെ ഒറ്റപ്പെട്ട ശക്തമായ മഴയ്ക്കും സാധ്യതയുണ്ടെന്നാണ് മുന്നറിയിപ്പ്.
English Summary
The Indian Meteorological Department (IMD) has issued an Orange Alert for Kannur and Kasaragod, predicting very heavy rainfall up to 204.4 mm. Yellow alerts are active for Ernakulam, Kozhikode, Wayanad, and other districts. Read the full 5-day Kerala rain forecast here
