Kerala Weather Update: മഴയൊഴിഞ്ഞു… ഇനി പൊള്ളുന്ന വേനൽ, ഈ ജില്ലകളിൽ ചൂട് കടുക്കും; ഇന്നത്തെ കാലാവസ്ഥാ പ്രവചനം

Kerala Weather Update

തിരുവനന്തപുരം: സംസ്ഥാനത്ത് മഴ പൂർണമായും പിൻവാങ്ങിയ സ്ഥിതിയാണ് നിലവിൽ. കേരള കർണാടക തീരത്തിന് മുകളിലെ ന്യൂന മർദ്ദ പാത്തി ദുർബലമായതായാണ് കാലാവസ്ഥ വകുപ്പ് പ്രവചിക്കുന്നത്. വടക്കൻ കേരളത്തിന് മുകളിൽ ചക്രവാത ചുഴി നിലനിൽക്കുന്നുണ്ടെങ്കിലും മഴ മുന്നറിയിപ്പൊന്നും ഒരു ജില്ലയിലും നൽകിയിട്ടില്ല. സംസ്ഥാനത്ത് ഇന്നും വരണ്ട കാലാവസ്ഥ തുടരാനാണ് സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിക്കുന്നു. മഴയുടെ സാന്നിധ്യം കുറവായതിനാൽ പകൽ സമയങ്ങളിൽ ചൂട് ഉയരാനും സാധ്യതയുണ്ട്.

കേരള – കർണാടക – ലക്ഷദ്വീപ് തീരങ്ങളിൽ ഇന്ന് മത്സ്യബന്ധനത്തിന് പോകുന്നതിന് തടസ്സമില്ലെന്നാണ് അറിയിപ്പ്. എന്നാൽ തെക്കൻ തമിഴ്‌നാട് തീരം, ഗൾഫ് ഓഫ് മന്നാർ, കന്യാകുമാരി പ്രദേശം എന്നിവിടങ്ങളിൽ മണിക്കൂറിൽ 35 മുതൽ 55 കിലോമീറ്റർ വരെ വേഗതയിൽ ശക്തമായ കാറ്റിന് സാധ്യതയുള്ളതിനാൽ ഈ പ്രദേശങ്ങളിൽ മത്സ്യബന്ധനത്തിന് പോകരുത്.

ALSO READ: പെയ്യും, ഇന്ന് 7 ജില്ലകളിൽ ഇടിവെട്ടി മഴ പെയ്യും, പക്ഷെ നാളെയോ?

അടുത്ത മൂന്ന്, നാല് ദിവസങ്ങളിൽ കേരളത്തിൽ മഴയ്ക്കുള്ള സാധ്യത വളരെ കുറവാണെന്നാണ് കാലാവസ്ഥ വകുപ്പിൻ്റെ മുന്നറിയിപ്പുകളിൽ നിന്ന് വ്യക്തമാകുന്നത്. ഭൂരിഭാഗം ജില്ലകളിലും വരണ്ട കാലാവസ്ഥയും ഉയർന്ന ചൂടും അനുഭവപ്പെടാനാണ് സാധ്യത. പകൽ സമയങ്ങളിൽ താപനില സാധാരണയേക്കാൾ 2 മുതൽ 4 ഡിഗ്രി സെൽഷ്യസ് വരെ ഉയരാൻ സാധ്യതയുണ്ട്.

ചൂട് കൂടുമ്പോൾ നിങ്ങൾ ശ്രദ്ധിക്കേണ്ടത്

ദാഹം തോന്നിയില്ലെങ്കിലും ധാരാളം വെള്ളം കുടിക്കുക. ഒപ്പം ഒആർഎസ്, നാരങ്ങാവെള്ളം, കഞ്ഞിവെള്ളം എന്നിവ കുടിക്കുന്നത് നല്ലതാണ്.

ഉച്ചയ്ക്ക് 11 മണി മുതൽ മൂന്ന് മണി വരെ നേരിട്ട് സൂര്യപ്രകാശം ഏൽക്കുന്നത് പരമാവധി ഒഴിവാക്കുക.

കട്ടി കുറഞ്ഞതും വെളുത്തതോ ഇളം നിറത്തിലുള്ളതോ ആയ കോട്ടൺ വസ്ത്രങ്ങൾ ധരിക്കാൻ ശ്രദ്ധിക്കുക. പുറത്തിറങ്ങുമ്പോൾ കുടയോ തൊപ്പിയോ ഉപയോഗിക്കുക.

ചെറിയ കുട്ടികൾ, പ്രായമായവർ, ​ഗർഭിണികൾ എന്നിവരെ വെയിലത്ത് കൊണ്ടുപോകുന്നത് ഒഴിവാക്കുക. നിർജ്ജലീകരണം ഉണ്ടാകാതെ ശ്രദ്ധിക്കുക.