Vishu 2026 Kanikonna: കൊന്ന നേരത്തേ അങ്ങു പൂത്തോ… ഇനി കണികാണാൻ കിട്ടില്ലേ? ആശങ്കയോടെ മലയാളികൾ

തൃശൂർ: മേടമാസപ്പുലരിയിൽ വിഷുക്കണി ഒരുക്കാൻ കാത്തുനിൽക്കാതെ സംസ്ഥാനത്ത് കണിക്കൊന്നകൾ നേരത്തെ പൂത്തുലയുന്നു. മീനമാസം പകുതിയോടെ പൂവിടാറുള്ള കൊന്നകൾ ഇത്തവണ മാർച്ച് ആദ്യവാരത്തോടെ തന്നെ മഞ്ഞപ്പട്ടുടുത്ത ദൃശ്യവിരുന്നൊരുക്കി നിൽക്കുകയാണ്. ഈ മാറ്റം പരിസ്ഥിതി സ്നേഹികളെയും വിഷു ആഘോഷത്തിനായി കാത്തിരിക്കുന്നവരെയും ഒരുപോലെ ആശങ്കയിലാഴ്ത്തുന്നു.

അന്തരീക്ഷത്തിലെ അമിതമായ ചൂടും മണ്ണിലെ ഈർപ്പക്കുറവുമാണ് കൊന്നകൾ നേരത്തെ പൂവിടാൻ പ്രധാന കാരണമായി സസ്യശാസ്ത്രജ്ഞർ ചൂണ്ടിക്കാട്ടുന്നത്. സാധാരണയായി 32 ഡിഗ്രി സെൽഷ്യസിൽ താപനില എത്തുമ്പോഴാണ് കൊന്നകൾ പൂക്കാറുള്ളത്. എന്നാൽ കഴിഞ്ഞ കുറച്ചു വർഷങ്ങളായി ഫെബ്രുവരി, മാർച്ച് മാസങ്ങളിൽ താപനില ഗണ്യമായി ഉയരുന്നത് ചെടികളിലെ ഹോർമോണുകളെ ഉത്തേജിപ്പിക്കുകയും നേരത്തെ പൂവിടാൻ പ്രേരിപ്പിക്കുകയും ചെയ്യുന്നു.

Also Read – പാചകവാതകക്ഷാമം കടുക്കുമ്പോൾ അടുക്കളയിൽ കയറാൻ മടിയോ? ഓൺലൈനിൽ ഭക്ഷണത്തിന് ആവശ്യക്കാർ കൂടുന്നു

കാലാവസ്ഥാ വ്യതിയാനം കാരണം സസ്യങ്ങൾക്ക് ലഭിക്കുന്ന പ്രകാശത്തിന്റെ തീവ്രതയിലും കാലയളവിലും മാറ്റം വന്നിട്ടുണ്ട്. ഇത് ചെടികളുടെ ബയോളജിക്കൽ ക്ലോക്ക് തെറ്റാൻ കാരണമാകുന്നു. മണ്ണിലെ ജലാംശം വല്ലാതെ കുറയുമ്പോൾ സസ്യങ്ങൾ സ്വീകരിക്കുന്ന ഒരു അതിജീവന തന്ത്രമായും ഇതിനെ കാണാം. പ്രതികൂല സാഹചര്യങ്ങളിൽ വംശവർധനവിനായുള്ള സ്വാഭാവിക പ്രതികരണമാണിത്.

വിഷുവിന് പൂവുണ്ടാകുമോ?

വിഷുവിന് ഇനിയും ഒരു മാസത്തിലേറെ ബാക്കിയുണ്ട്. ഇപ്പോൾ തന്നെ കൊന്നകൾ പൂത്തുലഞ്ഞു നിൽക്കുന്നതിനാൽ ഏപ്രിൽ പകുതിയോടെ കണി വെക്കാൻ പൂക്കൾ ബാക്കിയുണ്ടാകുമോ എന്നാണ് സാധാരണക്കാരുടെ ആശങ്ക. ആഗോള താപനം കേരളത്തിന്റെ കാലാവസ്ഥയെ എത്രത്തോളം ബാധിച്ചിരിക്കുന്നു എന്നതിന്റെ സൂചനയാണിതെന്ന് പരിസ്ഥിതി പ്രവർത്തകർ മുന്നറിയിപ്പ് നൽകുന്നു.