Viral Video: ലൂണയുടെ മനസ് ബ്ലാസ്റ്റേഴ്‌സിനൊപ്പം; ഉടന്‍ കാണാമെന്ന് ഉറപ്പു നല്‍കി താരം; വൈകാരികമായി പ്രതികരിച്ച് ആരാധകര്‍

ഐഎസ്എല്‍ സീസണ്‍ ആരംഭിക്കാനിരിക്കെ, കേരള ബ്ലാസ്റ്റേഴ്‌സിന് ആശംസകള്‍ നേര്‍ന്ന് അഡ്രിയാന്‍ ലൂണ. ലൂണ ആശംസകള്‍ നേരുന്ന വീഡിയോ ബ്ലാസ്‌റ്റേഴ്‌സ് ഫേസ്ബുക്ക് പേജില്‍ പങ്കുവച്ചു. കേരള ബ്ലാസ്റ്റേഴ്‌സിന്റെ താരങ്ങള്‍, കോച്ചിങ് സ്റ്റാഫ്, മാനേജ്, ആരാധകര്‍ എന്നിവര്‍ക്ക് ആശംസകള്‍ നേരുന്നുവെന്ന് താരം പറഞ്ഞു. ബ്ലാസ്റ്റേഴ്‌സിന് ഇത് നല്ല സീസണ്‍ ആയിരിക്കുമെന്ന് പ്രതീക്ഷിക്കുന്നുവെന്നും ലൂണ വ്യക്തമാക്കി.

‘മത്സരങ്ങള്‍ താന്‍ കാണും. ഉടന്‍ കാണാം’ എന്നും പറഞ്ഞാണ് ലൂണ വീഡിയോ അവസാനിപ്പിക്കുന്നത്.വീഡിയോയ്ക്ക് വൈകാരികമായാണ് ആരാധകര്‍ കമന്റ് ചെയ്യുന്നത്. ലൂണയെ ‘മിസ്’ ചെയ്യുന്നുവെന്നാണ് പല കമന്റുകളും. താരത്തിന്റെ തിരിച്ചുവരവിനായി കാത്തിരിക്കുന്നുവെന്നും ആരാധകര്‍ പറയുന്നു.

വീഡിയോ കാണാം

ഐഎസ്എല്‍ സീസണ്‍ അനിശ്ചിതത്വത്തിലായ പശ്ചാത്തലത്തിലാണ് ലൂണ ലോണടിസ്ഥാനത്തില്‍ ടീം വിട്ടത്. ലൂണയ്‌ക്കൊപ്പം, നോവ സദൂയിയും ലോണില്‍ ക്ലബ് വിട്ടിരുന്നു. അനിശ്ചിതത്വങ്ങള്‍ക്ക് വിരാമമിട്ട് ഐഎസ്എല്‍ ആരംഭിക്കാന്‍ തീരുമാനിച്ചെങ്കിലും, അതിന് മുമ്പേ ലൂണയും സദൂയിയും ക്ലബ് വിട്ടത് ആരാധകരെ നിരാശയിലാഴ്ത്തി. ഇരുവരും ഇന്തോനേഷ്യന്‍ ക്ലബുകളിലേക്കാണ് പോയത്. ലോണ്‍ കാലാവധി കഴിയുമ്പോള്‍ ഇരുവരും തിരിച്ചെത്തുമെന്നാണ് ആരാധകരുടെ പ്രതീക്ഷ.

Also Read: ISL 2025-26: ഐഎസ്എല്‍ എങ്ങനെ കാണാമെന്ന് ഇനി ആശങ്കപ്പെടേണ്ട; 8.62 കോടി രൂപയ്ക്ക്‌ ബ്രോഡ്കാസ്റ്ററെ തീരുമാനിച്ചു

ഫെബ്രുവരി 14-നാണ് ഐഎസ്എല്‍ ആരംഭിക്കുനന്നത്. അന്ന് വൈകുന്നേരം അഞ്ച് മണിക്ക് നടക്കുന്ന മത്സരത്തില്‍ ബ്ലാസ്റ്റേഴ്‌സ് മോഹന്‍ ബഗാനെ നേരിടും. അതേസമയം, ചന്ദ്രശേഖര്‍ ചിന്തയെ പുതിയ സഹപരിശീലകനായി കേരള ബ്ലാസ്റ്റേഴ്‌സ് നിയമിച്ചു.

സോഷ്യല്‍ മീഡിയയില്‍ പങ്കുവച്ച കുറിപ്പിലൂടെയാണ് ബ്ലാസ്റ്റേഴ്‌സ് ഇക്കാര്യം സ്ഥിരീകരിച്ചത്. നിലവില്‍ തകര്‍പ്പന്‍ പരിശീലനത്തിലാണ് ടീം. ഇത്തവണയും കൊച്ചി ജവഹര്‍ലാല്‍ നെഹ്‌റു സ്റ്റേഡിയമാകും ബ്ലാസ്റ്റേഴ്‌സിന്റെ ഹോം ഗ്രൗണ്ട്. ഹോം ഗ്രൗണ്ട് കോഴിക്കോട്ടേക്ക് മാറ്റാന്‍ ആലോചനയുണ്ടായിരുന്നു.