Oman Rain Alert: വരും മണിക്കൂറുകളില്‍ മഴ തകര്‍ക്കും, വാഹനയാത്രക്കാര്‍ക്ക് ജാഗ്രതാ നിര്‍ദ്ദേശം നല്‍കി ഒമാന്‍ പോലീസ്

മസ്‌കറ്റ്: ഒമാനിൽ വരും മണിക്കൂറുകളിൽ ശക്തമായ മഴ പെയ്യുമെന്ന് അധികൃതർ മുന്നറിയിപ്പുനൽകി. ഈ കാലാവസ്ഥാ പ്രവചനത്തെത്തുടർന്ന് സുരക്ഷാ മുൻകരുതലിന്റെ ഭാഗമായി അമറാത്ത് – ബൗഷർ റോഡ് താൽക്കാലികമായി അടച്ചു. റോയൽ ഒമാൻ പോലീസാണ് ഇക്കാര്യം അറിയിച്ചത്. യാത്രക്കാർ പകരം പാതകൾ ഉപയോഗിക്കണമെന്നും അനാവശ്യ യാത്രകൾ ഒഴിവാക്കണമെന്നും അധികൃതർ നിർദ്ദേശിച്ചു.

മസ്‌കറ്റ്, അൽ ബുറേമി, വടക്കൻ-തെക്കൻ അൽ ബാത്തിന, അൽ ദാഹിറ, അൽ ദാഖിലിയ, വടക്കൻ-തെക്കൻ അൽ ശർഖിയ എന്നീ ഗവർണറേറ്റുകളിൽ ശക്തമായ മഴയും ഇടിമിന്നലും കാറ്റും പ്രതീക്ഷിക്കുന്നു. മണിക്കൂറിൽ 28 മുതൽ 46 കിലോമീറ്റർ വരെ വേഗതയിൽ ശക്തമായ കാറ്റ് വീശാൻ സാധ്യതയുണ്ട്. ഇത് ദൂരക്കാഴ്ച കുറയാൻ കാരണമാകും.

മുന്നറിയിപ്പുകൾ

• ഇടിമിന്നൽ സമയത്ത് കടലിൽ പോകുന്നത് ഒഴിവാക്കുക. പുഴകൾ മുറിച്ചുകടക്കാൻ ശ്രമിക്കരുത്. താഴ്ന്ന പ്രദേശങ്ങളിൽ പെട്ടെന്നുള്ള പ്രളയത്തിന് സാധ്യതയുണ്ട്.
• വിവിധ തീവ്രതകളിലുള്ള മഴയ്‌ക്കൊപ്പം ചിലയിടങ്ങളിൽ മഞ്ഞുവീഴ്ചയ്ക്കും സാധ്യതയുണ്ടെന്ന് നാഷണൽ മൾട്ടി-ഹസാർഡ് ഏർലി വാർണിംഗ് സെന്റർ അറിയിച്ചു.
• മുസന്ദം, അൽ വുസ്ത, ദോഫാർ എന്നീ പ്രദേശങ്ങളിൽ നേരിയതോ മിതമായതോ ആയ മഴ ലഭിക്കാനാണ് സാധ്യത. പൊതുജനങ്ങൾ ഔദ്യോഗിക അറിയിപ്പുകൾ കൃത്യമായി പിന്തുടരണമെന്ന് സിവിൽ ഏവിയേഷൻ അതോറിറ്റി അഭ്യർത്ഥിച്ചു.