ലണ്ടനിൽ രണ്ട് പാസഞ്ചർ ട്രെയിനുകൾ കൂട്ടിയിടിച്ചു; ഒരു മരണം, 11 പേരുടെ നില ഗുരുതരം, നിരവധിപേർക്ക് പരുക്ക്
Train collision in Bedford: വടക്കൻ ലണ്ടനിലെ ബെഡ്ഫോർഡിന് സമീപം രണ്ട് ട്രെയിനുകൾ കൂട്ടിയിടിച്ച് ഒരാൾ മരിച്ചു. 11 പേരുടെ നില ഗുരുതരമാണ്, ഏകദേശം 89 പേർക്ക് പരുക്കേറ്റിട്ടുണ്ട്. യുകെ തലസ്ഥാനത്തിന് 90 കിലോമീറ്റർ വടക്ക് മാറിയുള്ള ഒരു നഗരമാണ് ബെഡ്ഫോർഡ്. വെള്ളിയാഴ്ച ഉച്ച കഴിഞ്ഞ് ഈസ്റ്റ് മിഡ്ലാൻഡ്സ് റെയിൽവേയുടെ രണ്ട് പാസഞ്ചർ ട്രെയിനുകൾ കൂട്ടിയിടിച്ചാണ് അപകടം.
ലണ്ടൻ: വടക്കൻ ലണ്ടനിലെ ബെഡ്ഫോർഡിന് സമീപം രണ്ട് ട്രെയിനുകൾ കൂട്ടിയിടിച്ച് ഒരാൾ മരിച്ചു. 11 പേരുടെ നില ഗുരുതരമാണ്, ഏകദേശം 89 പേർക്ക് പരുക്കേറ്റിട്ടുണ്ട്. യുകെ തലസ്ഥാനത്തിന് 90 കിലോമീറ്റർ വടക്ക് മാറിയുള്ള ഒരു നഗരമാണ് ബെഡ്ഫോർഡ്. വെള്ളിയാഴ്ച ഉച്ച കഴിഞ്ഞ് ഈസ്റ്റ് മിഡ്ലാൻഡ്സ് റെയിൽവേയുടെ രണ്ട് പാസഞ്ചർ ട്രെയിനുകൾ കൂട്ടിയിടിച്ചാണ് അപകടം. ഒരേ ട്രാക്കിൽ ലണ്ടനിലേക്ക് പോകുന്ന രണ്ട് ട്രെയിനുകൾ തമ്മിൽ കൂട്ടിയിടിക്കുകയായിരുന്നു എന്നാണ് ഈസ്റ്റ് മിഡ്ലാൻഡ്സ് റെയിൽവേ (EMR) അറിയിച്ചിരിക്കുന്നത്. കൂട്ടിയിടി എങ്ങനെ സംഭവിച്ചുവെന്ന് കണ്ടെത്താൻ അന്വേഷണം പുരോഗമിക്കുകയാണെന്ന് അധികൃതർ പറഞ്ഞു. അപകടത്തിൽപ്പെട്ടവരെ സഹായിക്കാനും അപകടത്തെ ചുറ്റിപ്പറ്റിയുള്ള സാഹചര്യങ്ങൾ സ്ഥാപിക്കാനും എമർജൻസി റെസ്പോൺസ് ടീം പ്രവർത്തിക്കുന്നുണ്ടെന്ന് ഡെപ്യൂട്ടി ചീഫ് കോൺസ്റ്റബിൾ സ്റ്റുവർട്ട് കണ്ടി പറഞ്ഞു.
അപകടത്തിൽപ്പെട്ട ട്രെയിനുകളിലൊന്നിന്റെ ഡ്രൈവറാണ് മരിച്ചത് എന്ന് പുതിയ റിപ്പോർട്ടുകൾ സ്ഥിരീകരിച്ചിട്ടുണ്ട്. A421 നും A6 നും ഇടയിലുള്ള എൽസ്റ്റോ ഇന്റർചേഞ്ചിന് തൊട്ടു തെക്ക് ഭാഗത്താണ് കൂട്ടിയിടി ഉണ്ടായത്, തുടർന്ന് എയർ ആംബുലൻസ് ഹെലികോപ്റ്ററുകൾ ഉൾപ്പെടെ സ്ഥലത്തെത്തി. പരുക്കേറ്റവരിൽ 11 പേർക്ക് “വളരെ ഗുരുതരമായ” പരുക്കും 22 പേർക്ക് ഗുരുതര പരിക്കും 56 പേർക്ക് നിസാര പരുക്കുമേറ്റതായി ഈസ്റ്റ് ഓഫ് ഇംഗ്ലണ്ട് ആംബുലൻസ് സർവീസ് അറിയിച്ചു.
Also Read: ഹോർമുസ് തുറന്നു; ഇറാൻ തുറമുഖങ്ങൾക്ക് മേലുള്ള എല്ലാ നിയന്ത്രണങ്ങളും നീക്കിയെന്ന് അമേരിക്ക
സോഷ്യൽ മീഡിയ വഴി പുറത്തുവന്ന ചിത്രങ്ങളിൽ ഒരു ട്രെയിനിന്റെ മുൻഭാഗം മറ്റൊന്നിന്റെ പിന്നിൽ ഇടിച്ചുയറിയതായി കാണാം. രക്ഷാപ്രവർത്തനം തുടരുന്നതിനാൽ ഈ പ്രദേശം ഒഴിവാക്കാൻ ഈസ്റ്റ് ഓഫ് ഇംഗ്ലണ്ട് ആംബുലൻസ് സർവീസ് ആളുകളോട് അഭ്യർത്ഥിച്ചു. പ്രധാനമന്ത്രി കെയർ സ്റ്റാർമർ മരിച്ചയാളുടെ കുടുംബത്തിന് അനുശോചനം രേഖപ്പെടുത്തുകയും സംഭവത്തിൽ ഗുരുതരമായി പരുക്കേറ്റവർക്ക് എല്ലാ സഹായവും വാഗ്ദാനം ചെയ്യുകയും ചെയ്തു.
ലണ്ടൻ സെന്റ് പാൻക്രാസിനും ലെസ്റ്ററിനും ഇടയിലുള്ള പാതയിലാണ് അപകടം നടന്നതെന്ന് ഈസ്റ്റ് മിഡ്ലാൻഡ്സ് റെയിൽവേ സ്ഥിരീകരിച്ചു. ലൂട്ടണും ബെഡ്ഫോർഡിനും ഇടയിലുള്ള എല്ലാ ട്രെയിൻ സർവീസുകളും താൽക്കാലികമായി നിർത്തിവെച്ചിരിക്കുകയാണ്. അപകടത്തിൽപ്പെട്ട ട്രെയിനുകളിൽ ഒന്ന് കോർബിയിൽ നിന്നും മറ്റൊന്ന് മധ്യ ഇംഗ്ലണ്ടിലെ നോട്ടിംഗ്ഹാമിൽ നിന്നും പുറപ്പെട്ടവയാണ്.
“മുന്നിലെ കസേരയിലേക്ക് ഒരു നിമിഷം ഇടിച്ചുകയറി, തുടർന്ന് ഞാൻ പുക കണ്ടു. ആളുകൾ കരയുകയും നിലവിളിക്കുകയും ചെയ്തു, ആളുകൾ വളരെ ഭയന്ന് ആശയക്കുഴപ്പത്തിലായി,” എന്ന് അപകടത്തിൽപ്പെട്ട യാത്രക്കാരിലൊരാൾ സംഭവം വിവരിച്ചു. “ഒരു വലിയ ശബ്ദം” ഉണ്ടായതായും തുടർന്ന് തല മുന്നിലുള്ള സീറ്റിൽ ഇടിച്ചതായും മറ്റൊരു യാത്രക്കാരനും വിവരിച്ചു.
“ഏതെങ്കിലും കൂട്ടിയിടിയുടെ സൂചനയില്ലായിരുന്നു, സൈറണുകളോ അലാറങ്ങളോ ഇല്ല. പെട്ടെന്ന് ഒരു ആഘാതം ഉണ്ടായി. അതൊരു ബോംബാണെന്ന് ഞാൻ കരുതി, ധാരാളം പുകയും തറയിൽ ആളുകളും, രക്തം പുരണ്ട മുഖങ്ങളും കണ്ടു. ധാരാളം ആളുകൾ കരയുകയും നിലവിളിക്കുകയും ചെയ്തു. ഞാൻ വാതിലുകൾ തുറന്ന് പുറത്തേക്ക് വന്നപ്പോൾ ഞെട്ടി, എന്റെ കണ്ണട ഊരിപ്പോയി. ഞങ്ങൾ ഒരു വയലിൽ ഒന്നും കാണാനാകാത്ത അവസ്ഥയിലായിരുന്നു.” എന്ന് മറ്റൊരു യാത്രക്കാരൻ അപകടം വിവരിച്ചു.
ബ്രിട്ടനിൽ ട്രെയിൻ അപകടങ്ങൾ പൊതുവിൽ കുറവാണ്. ഈ നൂറ്റാണ്ടിൽ ഒരു ബ്രിട്ടീഷ് മെയിൻലൈനിൽ രണ്ട് പാസഞ്ചർ ട്രെയിനുകൾ തമ്മിൽ ഉണ്ടാകുന്ന ആദ്യത്തെ മാരകമായ കൂട്ടിയിടിയാണിത്, രണ്ട് പതിറ്റാണ്ടുകൾക്കിടെ യുകെയിൽ ഏറ്റവും കൂടുതൽ പേർക്ക് ഗുരുതരമായി പരിക്കേറ്റ അപകടവും ഇതാണ്. ട്രെയിനപകടത്തിൽ ഒരാൾ മരിച്ചതായി ഏറ്റവുമൊടുവിൽ റിപ്പോർട്ട് ചെയ്യപ്പെട്ടത് 2024-ൽ പവീസിലെ ടാലെർഡിഗിൽ ഒരു സിംഗിൾ-ട്രാക്ക് ലൈനിൽ അപകടമുണ്ടായപ്പോഴായിരുന്നു.
English Summary
One person has died after two trains collided near Bedford, north London. Eleven people are in a critical condition and about 89 others have been injured. Bedford is a town about 90km north of the UK capital. The accident occurred after two East Midlands Railway passenger trains collided on Friday afternoon. Authorities said an investigation was underway to determine how the collision happened.
