chikungunya India: 50 ലക്ഷത്തിലധികം ഇന്ത്യക്കാർ ചിക്കുൻ ഗുനിയ ഭീഷണിയിലോ?
50 lakh Indians at long-term risk of Chikungunya: ഇന്ത്യയിൽ പ്രതിവർഷം 51 ലക്ഷത്തിലധികം ആളുകൾക്ക് ചിക്ക്ഗുനിയ പിടിപെടാൻ സാധ്യതയുണ്ട്.
ന്യൂഡൽഹി: കൊതുകുജന്യ രോഗമായ ചിക്കുൻ ഗുനിയയുടെ ( Chikungunya ) ദീർഘകാല പ്രത്യാഘാതം ഏറ്റവും കൂടുതൽ ബാധിക്കാൻ സാധ്യതയുള്ള രാജ്യമായി ഇന്ത്യയെ തിരിച്ചറിഞ്ഞതായി പുതിയ പഠനം. ലണ്ടൻ സ്കൂൾ ഓഫ് ഹൈജീൻ & ട്രോപ്പിക്കൽ മെഡിസിൻ, നാഗസാക്കി യൂണിവേഴ്സിറ്റി ഉൾപ്പെടെയുള്ള സ്ഥാപനങ്ങൾ നടത്തിയ ആഗോള വിശകലനത്തിലാണ് ഈ മുന്നറിയിപ്പ്.
ഇന്ത്യയിൽ പ്രതിവർഷം 51 ലക്ഷത്തിലധികം ആളുകൾക്ക് ചിക്ക്ഗുനിയ പിടിപെടാൻ സാധ്യതയുണ്ട്. രോഗം കൂടുതൽ പ്രദേശങ്ങളിലേക്ക് വ്യാപിക്കുകയാണെങ്കിൽ ഈ എണ്ണം 1.21 കോടിയായി ഉയരും. ദീർഘകാലാടിസ്ഥാനത്തിൽ ചിക്ക്ഗുനിയ ബാധിക്കാൻ സാധ്യതയുള്ള രാജ്യങ്ങളിൽ ഇന്ത്യ, ബ്രസീൽ, ഇന്തോനേഷ്യ എന്നിവയാണ് ആദ്യ മൂന്ന് സ്ഥാനങ്ങളിൽ.
ഈഡിസ് ഈജിപ്തി, ഈഡിസ് ആൽബോപിക്റ്റസ് കൊതുകുകൾ പരത്തുന്ന ഈ രോഗം കടുത്ത സന്ധി വേദനയുണ്ടാക്കും. രോഗം ഭേദമായവരിൽ 50% പേർക്കും ദീർഘകാല സന്ധി വേദനയും വൈകല്യവും ഉണ്ടാകാൻ സാധ്യതയുണ്ടെന്ന് പഠനം പറയുന്നു.
അപകടസാധ്യത കണക്കാക്കാൻ മെഷീൻ ലേണിംഗ് സാങ്കേതികവിദ്യയാണ് ഉപയോഗിച്ചത്. കോടിക്കണക്കിന് ആളുകൾക്ക് അപകടസാധ്യതയുള്ളതിനാൽ, തുടർച്ചയായ നിരീക്ഷണം, പൊതു വിദ്യാഭ്യാസം, ഫലപ്രദമായ വാക്സിനേഷനുകൾ എന്നിവ ഇന്ത്യയിൽ അനിവാര്യമാണെന്ന് ഗവേഷകർ ചൂണ്ടിക്കാട്ടുന്നു.
