Hibiscus Oil: ചെമ്പരത്തി എണ്ണ മാത്രം മതി, മുടിക്കൊഴിച്ചിൽ പമ്പ കടക്കും; തയ്യാറാക്കേണ്ടത് ഇങ്ങനെ
How to Make Hibiscus Oil: തലമുടിസംരക്ഷണത്തിന് പണ്ട് മുതലേ ഉപയോഗിച്ച് വരുന്ന ഒന്നാണ് ചെമ്പരത്തി. മുടി കൊഴിച്ചിൽ മാറാനും മുടിക്ക് നല്ല കറുപ്പ് നിറവും തിളക്കവും ലഭിക്കാനും ചെമ്പരത്തി എണ്ണ സഹായിക്കും. എന്നാൽ ഇന്ന് തലമുടിക്കൊഴിച്ചിൽ അകറ്റാൻ പലതും ചെയ്യുമ്പോൾ ചെമ്പരത്തി എണ്ണയെ അവഗണിക്കുകയാണ്. ചെമ്പരത്തി എണ്ണ തയ്യാറാക്കുന്നത് എങ്ങനെയെന്ന് നോക്കിയാലോ...
ചെമ്പരത്തി പൂവ്: 8-10 എണ്ണം, ചെമ്പരത്തി ഇല: ഒരു പിടി, വെളിച്ചെണ്ണ ഇവ മൂന്നുമാണ് എണ്ണ തയ്യാറാക്കാൻ ആവശ്യം. ആദ്യം ചെമ്പരത്തി പൂവും ഇലയും നന്നായി കഴുകി വെള്ളം പൂർണ്ണമായും ഉണക്കിയെടുക്കേണ്ടതാണ്. വെള്ളത്തിന്റെ അംശം ഉണ്ടെങ്കിൽ പെട്ടെന്ന് കേടാകാൻ സാധ്യതയുണ്ട്.
ഇനി ചെമ്പരത്തി പൂവും ഇലയും ചേർത്ത് മിക്സിയിൽ നന്നായി അരച്ച് പേസ്റ്റ് രൂപത്തിലാക്കുക. ശേഷം ഒരു ചീനച്ചട്ടിയിലോ പാത്രത്തിലോ വെളിച്ചെണ്ണ ഒഴിച്ച് ചെറുതീയിൽ ചൂടാക്കി എടുക്കുക. എണ്ണ ചൂടായി വരുമ്പോൾ ചെമ്പരത്തി പേസ്റ്റ് ഇതിലേക്ക് ചേർക്കുക.
എണ്ണയുടെ നിറം മാറുന്നത് വരെ കുറഞ്ഞ തീയിൽ എണ്ണ ചൂടാക്കേണ്ടതാണ്. ഇലയിലെയും പൂവിലെയും സത്ത് പൂർണമായും എണ്ണയിലേക്ക് ഇറങ്ങണം, എണ്ണ പരുവമായി വരുമ്പോൾ തീ ഓഫ് ചെയ്യാം. ചൂടാറിയ ശേഷം അരിച്ചെടുത്ത് ഒരു കുപ്പിയിൽ സൂക്ഷിച്ചു വെക്കാം.
ആഴ്ചയിൽ രണ്ടോ മൂന്നോ തവണ കുളിക്കുന്നതിന് മുമ്പ് തലയോട്ടിയിൽ ഈ എണ്ണ തേച്ച് പിടിപ്പിക്കാവുന്നതാണ്. ശേഷം വിരലുകൾ ഉപയോഗിച്ച് പത്ത് മിനിറ്റ് നന്നായി മസാജ് ചെയ്യുക. ഇത് രക്തയോട്ടം വർദ്ധിക്കാൻ സഹായിക്കും. അര മണിക്കൂറിന് ശേഷം വീര്യം കുറഞ്ഞ ഷാംപൂവോ താളിയോ ഉപയോഗിച്ച് കുളിക്കാം.
ചെമ്പരത്തി എണ്ണയ്ക്ക് ധാരാളം ഗുണങ്ങളുണ്ട്. ചെമ്പരത്തിയിലെ അമിനോ ആസിഡുകൾ മുടിയുടെ വളർച്ചയെ വേഗത്തിലാക്കും. തലയോട്ടിയിലെ ചൊറിച്ചിലും താരനും കുറയ്ക്കാനും സ്വാഭാവികമായ കറുപ്പ് നിറം നൽകാനും ഇത് സഹായിക്കും. (Image Credit: Getty)
