Sanju Samson: അവസരങ്ങള് നശിപ്പിച്ചു, ഒരിക്കല് കൂടി പിഴച്ചാല് പുറത്ത്? രണ്ടാം ടി20 സഞ്ജുവിന് നിര്ണായകം
Sanju Samson vs Vaibhav Sooryavanshi : സഞ്ജു സാംസണ് രണ്ടാം ടി20യിലും അവസരം ലഭിക്കാനാണ് സാധ്യത. ആദ്യ മത്സരത്തില് ഏഴു പന്ത് നേരിട്ട സഞ്ജു നേടിയത് ഒരു റണ്സ് മാത്രം. രണ്ടാം ടി20യില് അവസരം ലഭിച്ചാല് സഞ്ജുവിന് അത് നിര്ണായകമാകും.
ഇന്ത്യ-ഇംഗ്ലണ്ട് ടി20 പരമ്പരയിലെ രണ്ടാം മത്സരം നാളെ നടക്കും. ആദ്യ മത്സരം മഴ മൂലം ഉപേക്ഷിച്ചിരുന്നു. ആദ്യം ബാറ്റു ചെയ്ത ഇന്ത്യ 20 ഓവറില് ഏഴു വിക്കറ്റിന് 189 റണ്സെടുത്തു. ഇംഗ്ലണ്ടിന് ബാറ്റ് ചെയ്യാനായില്ല (Image Credit Source: PTI).
ഇന്ത്യന് സമയം വൈകിട്ട് ഏഴിന് ഓള്ഡ് ട്രാഫോര്ഡ് ക്രിക്കറ്റ് ഗ്രൗണ്ടിലാണ് മത്സരം. അയര്ലന്ഡ് പരമ്പരയിലും, ഇംഗ്ലണ്ടിനെതിരായ ആദ്യ മത്സരത്തിലും നിരാശപ്പെടുത്തിയ സഞ്ജു സാംസണ് രണ്ടാം ടി20യിലും അവസരം ലഭിക്കാനാണ് സാധ്യത. ആദ്യ മത്സരത്തില് ഏഴു പന്ത് നേരിട്ട സഞ്ജു നേടിയത് ഒരു റണ്സ് മാത്രം. രണ്ടാം ടി20യില് അവസരം ലഭിച്ചാല് സഞ്ജുവിന് അത് നിര്ണായകമാകും.
15-കാരന് വൈഭവ് സൂര്യവംശി അവസരം കാത്തിരിക്കുന്നതിനാല് സ്ഥാനം നിലനിര്ത്താന് സഞ്ജു മികച്ച പ്രകടനം പുറത്തെടുക്കേണ്ടി വരും. ടി20 ലോകകപ്പിലെ പ്ലെയര് ഓഫ് ദ ടൂര്ണമെന്റായിരുന്ന സഞ്ജുവിനെ ഒന്നോ രണ്ടോ മത്സരങ്ങളിലെ മോശം പ്രകടനത്തിന്റെ പേരില് പുറത്താക്കില്ല. എന്നാല് മോശം പ്രകടനം തുടര്ക്കഥയായാല് വൈഭവ് സൂര്യവംശിക്ക് അവസരം നല്കാന് മാനേജ്മെന്റ് നിര്ബന്ധിതരാകും. നിലവില് സഞ്ജുവിന് തന്നെയാണ് പ്രഥമ പരിഗണന.
അതേസമയം, വൈഭവ് സൂര്യവംശിക്ക് അവസരം ലഭിക്കാത്തതില് വിമര്ശനമുയരുന്നുണ്ട്. ഇക്കാര്യത്തില് ബിസിസിഐയും മൗനം വെടിഞ്ഞു. താരത്തിന് അവസരം ലഭിക്കുമെന്നും എപ്പോൾ കളിക്കണമെന്ന് തീരുമാനിക്കാനുള്ള പൂർണ്ണ അധികാരം മാനേജ്മെന്റിന് മാത്രമാണെന്നും ബിസിസിഐ വൈസ് പ്രസിഡന്റ് രാജീവ് ശുക്ല പറഞ്ഞു. വൈഭവിന്റെ കഴിവിലുള്ള വിശ്വാസം കൊണ്ടാണ് ടീമിലെടുത്തതെന്നും അദ്ദേഹം വ്യക്തമാക്കി.
വൈഭവ് അന്താരാഷ്ട്ര മത്സരം കളിക്കാന് പൂര്ണ സജ്ജനാണെന്ന് ഇന്ത്യന് ടീമിന്റെ അസിസ്റ്റന്റ് കോച്ച് റയാന് ടെന് ഡോഷെറ്റ് പറഞ്ഞു. വൈഭവ് രാജ്യാന്തര മത്സരം കളിക്കാന് സജ്ജനാണെന്നതില് സംശയമില്ല. എന്നാൽ നമുക്ക് ലോകകപ്പ് നേടിത്തരുന്നതിൽ വലിയ പങ്കുവഹിച്ച കളിക്കാരനാണ് സഞ്ജുവെന്നും സഹപരിശീലകന് പറഞ്ഞു. സഞ്ജു പ്ലേയിങ് ഇലവനില് തുടര്ന്നുമുണ്ടാകുമെന്ന സൂചന നല്കുന്നതാണ് ഈ വാക്കുകള്.
