EPS Pension: ഇപിഎസ് പെൻഷൻ; 25,000 ശമ്പളമുള്ളവർക്ക് എത്ര പെൻഷൻ ലഭിക്കും?
EPS Pension Eligibility and Calculation What a 25,000 Salary Means for Your Pension: പെന്‍ഷന്‍ കണക്കാക്കുന്നതില്‍ പെന്‍ഷന്‍ ലഭിക്കാവുന്ന ശമ്പളവും സര്‍വീസ് കാലയളവും പ്രധാന പങ്കുവഹിക്കുന്നു. നിലവിലെ പെന്‍ഷന്‍ കണക്കാക്കാനുള്ള ശമ്പളപരിധി പ്രതിമാസം 15,000 ആണ്. അതിനാല്‍ ഒരാളുടെ യഥാര്‍ഥ ശമ്പളം 25,000 ആണെങ്കിലും പെന്‍ഷന്‍ കണക്കാക്കുമ്പോള്‍ മുഴുവന്‍ തുകയും പരിഗണിക്കണമെന്നില്ല.
എംപ്ലോയീസ് പെന്‍ഷന്‍ സ്‌കീമിന് (ഇപിഎസ്) കീഴില്‍ വിരമിച്ച ശേഷം ലഭിക്കുന്ന പെന്‍ഷന്‍ തുക എത്രയാണെന്ന് അറിയാന്‍ ആഗ്രഹിക്കുന്നവരാണ് നിരവധി ജീവനക്കാര്‍. പ്രതിമാസം 25,000 ശമ്പളം ലഭിക്കുന്ന ഒരാള്‍ക്ക് എത്ര പെന്‍ഷന്‍ ലഭിക്കുമെന്നത് പല ഘടകങ്ങളെയും ആശ്രയിച്ചിരിക്കുന്നു. പെന്‍ഷന്‍ കണക്കാക്കുന്നതില്‍ പെന്‍ഷന്‍ ലഭിക്കാവുന്ന ശമ്പളവും സര്‍വീസ് കാലയളവും പ്രധാന പങ്കുവഹിക്കുന്നു. (Image Credit Source: Getty Images)
ഉയര്‍ന്ന ശമ്പളത്തിന്റെ അടിസ്ഥാനത്തില്‍ പെന്‍ഷന്‍ ലഭിക്കുന്നതിനുള്ള പ്രത്യേക വ്യവസ്ഥകള്‍ക്ക് അര്‍ഹരായവരുടെ കാര്യത്തില്‍ കണക്കുകള്‍ വ്യത്യസ്തമായേക്കാം. പെന്‍ഷന്‍ കണക്കാക്കാന്‍ സാധാരണയായി ഉപയോഗിക്കുന്ന ഫോര്‍മുല പ്രതിമാസ പെന്‍ഷന്‍ = പെന്‍ഷന്‍ കണക്കാക്കാവുന്ന ശമ്പളം × പെന്‍ഷന്‍ സര്‍വീസ് കാലയളവ് ÷ 70 എന്നതാണ്. ഉദാഹരണത്തിന്, പെന്‍ഷന്‍ കണക്കാക്കാവുന്ന ശമ്പളം 15,000 ആണെന്നും പെന്‍ഷന്‍ സര്‍വീസ് 30 വര്‍ഷമാണെന്നും കരുതുക. ചില നിബന്ധനകള്‍ക്ക് വിധേയമായി രണ്ട് വര്‍ഷത്തെ വെയ്‌റ്റേജ് കൂടി ലഭിക്കുന്ന സാഹചര്യത്തില്‍ കണക്കാക്കുന്ന സര്‍വീസ് 32 വര്‍ഷമാകും. അങ്ങനെയെങ്കില്‍ പെന്‍ഷന്‍ ഏകദേശം 6,857 ആയി വരും.
എന്നാല്‍ ഇത് ഉദാഹരണത്തിന് വേണ്ടിയുള്ള കണക്കുമാത്രമാണ്. യഥാര്‍ഥ പെന്‍ഷന്‍ തുക അംഗത്തിന്റെ സര്‍വീസ് രേഖകള്‍, യോഗ്യത, ബാധകമായ ഇപിഎസ് ചട്ടങ്ങള്‍ എന്നിവ അനുസരിച്ച് മാറാം. 58 വയസിന് മുമ്പ് പെന്‍ഷന്‍ ലഭിക്കുമോ? ചില നിബന്ധനകള്‍ പാലിക്കുന്ന അംഗങ്ങള്‍ക്ക് 58 വയസിന് മുമ്പ് തന്നെ പെന്‍ഷന്‍ ലഭിക്കാന്‍ അര്‍ഹതയുണ്ടാകാം. എന്നാല്‍ നേരത്തേ പെന്‍ഷന്‍ വാങ്ങുമ്പോള്‍ തുക കുറയും. 58 വയസിന് മുമ്പുള്ള ഓരോ വര്‍ഷത്തിനും നാല് ശതമാനം വീതം പെന്‍ഷനില്‍ കുറവ് കണക്കാക്കുന്ന രീതിയാണ് ഇവിടെ നല്‍കിയിരിക്കുന്നത്.
ഉദാഹരണത്തില്‍ 58 വയസില്‍ ലഭിക്കാവുന്ന പെന്‍ഷന്‍ 6,857 ആണെങ്കില്‍, 50 വയസില്‍ പെന്‍ഷന്‍ വാങ്ങുന്ന സാഹചര്യത്തില്‍ 32 ശതമാനം കുറവ് കണക്കാക്കിയാല്‍ പ്രതിമാസ തുക ഏകദേശം 4,663 ആകും. 55 വയസില്‍ പെന്‍ഷന്‍ ആരംഭിക്കുകയാണെങ്കില്‍ 12 ശതമാനം കുറവും 56 വയസില്‍ ആരംഭിച്ചാല്‍ എട്ട് ശതമാനം കുറവും വരും. 58 വയസില്‍ പെന്‍ഷന്‍ വാങ്ങുന്നതിന് പകരം പിന്നീട് വാങ്ങാന്‍ തീരുമാനിക്കുന്നവര്‍ക്ക് ചില നിബന്ധനകള്‍ക്ക് വിധേയമായി അധിക പെന്‍ഷന്‍ ലഭിക്കാം. 58 വയസിന് ശേഷമുള്ള ഓരോ പൂര്‍ത്തിയായ വര്‍ഷത്തിനും നാല് ശതമാനം വര്‍ധന ലഭിക്കുന്ന സാഹചര്യം പരിഗണിക്കുമ്പോള്‍, 60 വയസുവരെ പെന്‍ഷന്‍ മാറ്റിവെച്ചാല്‍ എട്ട് ശതമാനം വര്‍ധനയുണ്ടാകും.
മുകളില്‍ നല്‍കിയ ഉദാഹരണത്തിലെ 6,857 എന്ന പെന്‍ഷന്‍ തുകയില്‍ എട്ട് ശതമാനം വര്‍ധന കണക്കാക്കിയാല്‍ പ്രതിമാസം ഏകദേശം 7,406 ലഭിക്കാം. എന്നാല്‍ പെന്‍ഷന്‍ മാറ്റിവെക്കുന്നതിനുള്ള അര്‍ഹതയും ബാധകമായ വ്യവസ്ഥകളും പരിശോധിച്ച ശേഷമേ അന്തിമ തുക കണക്കാക്കാനാകൂ. വിരമിക്കല്‍ സമയത്ത് എത്ര പെന്‍ഷന്‍ ലഭിക്കുമെന്നറിയാന്‍ ഇപിഎഫ്ഒ രേഖകളിലെ സര്‍വീസ് കാലയളവ്, പെന്‍ഷന്‍ കണക്കാക്കാവുന്ന ശമ്പളം, പെന്‍ഷന്‍ ആരംഭിക്കുന്ന പ്രായം എന്നിവ പരിശോധിക്കണം. ശമ്പളം 25,000 ആണെന്ന കാരണത്താല്‍ അതിന്റെ അടിസ്ഥാനത്തില്‍ തന്നെ പെന്‍ഷന്‍ കണക്കാക്കുമെന്ന് കരുതരുത്. വ്യക്തിഗത യോഗ്യതയും ബാധകമായ ചട്ടങ്ങളും അനുസരിച്ചായിരിക്കും അന്തിമ പെന്‍ഷന്‍ തുക നിശ്ചയിക്കുക.
