Kitchen Tips: ഗ്രാമ്പൂ വാങ്ങുമ്പോൾ ഇവ ശ്രദ്ധിക്കാറുണ്ടോ? ഈ തെറ്റുകൾ ഇനി വരുത്തരുത്!
How to Identify Fresh Cloves: ബിരിയാണിയിലും കറികളിലുമെല്ലാം രുചിക്കും മണത്തിനും സ്ഥിരമായി ഉപയോഗിക്കുന്ന ഒന്നാണ് ഗ്രാമ്പൂ. എന്നാൽ കടകളിൽ നിന്ന് വാങ്ങുന്ന എല്ലാ ഗ്രാമ്പൂവും ഒരുപോലെ ഗുണനിലവാരമുള്ളവയാകണമെന്നില്ല. പലപ്പോഴും പഴയതോ, എണ്ണ വേർതിരിച്ചെടുത്ത ശേഷമുള്ളതോ , വ്യാജമോ ആയ ഗ്രാമ്പൂകളാണ് വിപണിയിൽ ലഭിക്കാറുള്ളത്. അതുകൊണ്ട് തന്നെ ഗ്രാമ്പൂ വാങ്ങിക്കുമ്പോൾ ചില കാര്യങ്ങൾ ശ്രദ്ധിക്കേണ്ടതുണ്ട്.
പൊടിഞ്ഞതും തലയില്ലാത്തതുമായ ഗ്രാമ്പൂ വാങ്ങുന്നതാണ് നിങ്ങൾ വരുത്തുന്ന ആദ്യത്തെ തെറ്റ്. പാക്കറ്റിന്റെ അടിയിൽ ഗ്രാമ്പൂ പൊടിഞ്ഞതും തല ഭാഗം വേർപെട്ടതുമായ ഭാഗങ്ങൾ ഉണ്ടെങ്കിൽ അത് ഗുണനിലവാരം കുറഞ്ഞതും പഴയതുമായ ചരക്കാണ്. (Image Credit: Getty Images)
അതുപോലെ, വളരെ മങ്ങിയതോ വെണ്ണീർ നിറത്തിലുള്ളതോ ആയ ഗ്രാമ്പൂവിൽ ആവശ്യത്തിന് സുഗന്ധതൈലം ഉണ്ടാകില്ല. മുഴുവൻ ഗ്രാമ്പൂവിനേക്കാൾ വേഗത്തിൽ ഗ്രാമ്പൂ പൊടിയുടെ വീര്യവും സുഗന്ധവും നഷ്ടപ്പെടും. അതിനാൽ ആവശ്യാനുസരണം മുഴുവൻ ഗ്രാമ്പൂ വാങ്ങി ആവശ്യമുള്ളപ്പോൾ മാത്രം പൊടിക്കുന്നതാണ് നല്ലത്.
നല്ല ഗ്രാമ്പൂവിന് മുകൾഭാഗത്തെ ചെറിയ ഉരുണ്ട മൊട്ട് കൃത്യമായി ഉണ്ടായിരിക്കും. കടും തവിട്ടുനിറവും നേരിയ തിളക്കവും ഉണ്ടായിരിക്കും. മെലിഞ്ഞുണങ്ങിയതിന് പകരം നല്ല മാംസളവും ദൃഢവുമായ ഗ്രാമ്പൂ തിരഞ്ഞെടുക്കുക.
ഗ്രാമ്പൂവിന്റെ തണ്ടിൽ നിങ്ങളുടെ നഖം അമർത്തി പരിശോധിക്കുക. നല്ല ഗ്രാമ്പൂവാണെങ്കിൽ നഖം അമർത്തുമ്പോൾ ചെറുതായി എണ്ണമയം പുറത്തുവരികയും പെട്ടെന്ന് തന്നെ നല്ല കടുപ്പമുള്ള സുഗന്ധം വരികയും ചെയ്യും. വരണ്ടതും പെട്ടെന്ന് ഒടിഞ്ഞുപോകുന്നതുമായ ഗ്രാമ്പൂവിൽ എണ്ണമയം കുറവായിരിക്കും.
ഒരു ഗ്ലാസ് പച്ചവെള്ളത്തിൽ കുറച്ച് ഗ്രാമ്പൂ ഇടുക. എണ്ണമയം കൂടുതലുള്ളതിനാൽ വെള്ളത്തിൽ താഴുകയോ, തലഭാഗം മുകളിലേക്ക് വരുന്ന രീതിയിൽ ലംബമായി പൊങ്ങിനിൽക്കുകയോ ചെയ്യും. എണ്ണ വറ്റിയതോ പഴക്കമുള്ളതോ ആയ ഗ്രാമ്പൂ വെള്ളത്തിൽ തിരശ്ചീനമായി പൊങ്ങിക്കിടക്കും.
