India vs South Africa: 13 പന്തുകൾ നീണ്ട മാരത്തൺ ഓവറുമായി അർഷ്ദീപ്; നാണക്കേടിൽ റെക്കോർഡിട്ട് ഇന്ത്യൻ പേസർ
Arshdeep Singh 13 Ball Over: ദക്ഷിണാഫ്രിക്കക്കെതിരെ 13 പന്തുകൾ നീണ്ട ഓവറുമായി അർഷ്ദീപ് സിംഗ്. ഏഴ് വൈഡുകളെറിഞ്ഞ താരം ലോക റെക്കോർഡിലുമെത്തി.
ദക്ഷിണാഫ്രിക്കക്കെതിരായ രണ്ടാം ടി20യിൽ അർഷ്ദീപ് സിംഗിന് നാണക്കേടിൻ്റെ റെക്കോർഡ്. ഒരു ഓവറിൽ 13 പന്തുകളെറിഞ്ഞാണ് അർഷ്ദീപ് റെക്കോർഡ് ബുക്കിൽ ഇടം നേടിയത്. ഏഴ് വൈഡുകളാണ് താരം ഈ ഓവറിൽ വഴങ്ങിയത്. മത്സരത്തിൽ ദക്ഷിണാഫ്രിക്ക 51 റൺസിന് വിജയിച്ചു. (Image Credits- PTI)
നാല് ഓവർ എറിഞ്ഞ അർഷ്ദീപ് വഴങ്ങിയത് 54 റൺസ്. ആകെ 9 വൈഡുകളും താരം എറിഞ്ഞു. ഇന്ത്യൻ ടീം ആകെ എറിഞ്ഞത് 16 വൈഡുകളാണ്. ഇതോടെ രാജ്യാന്തര ടി20യിൽ ഇന്ത്യ ഏറ്റവുമധികം വൈഡുകൾ വഴങ്ങുന്ന രണ്ടാമത്തെ മത്സരമായി ഇത്.
മുൻപ് 2009ൽ ശ്രീലങ്കക്കെതിരെ ഇന്ത്യ 17 വൈഡുകൾ എറിഞ്ഞിട്ടുണ്ട്. 2018ൽ വെസ്റ്റ് ഇൻഡീസിനെതിരെയും ഇന്ത്യ 16 വൈഡുകൾ വഴങ്ങി. ഇന്ത്യ ഏറ്റവുമധികം വൈഡുകളെറിഞ്ഞ മത്സരത്തിൽ ഇതോടെ ദക്ഷിണാഫ്രിക്കക്കെതിരായ രണ്ടാം ടി20 രണ്ടാം സ്ഥാനം പങ്കിടുകയാണ്.
ദക്ഷിണാഫ്രിക്കൻ ഇന്നിംഗ്സിലെ 11ആം ഓവറാണ് നാണക്കേടിൻ്റെ റെക്കോർഡിലെത്തിയത്. ഓവറിൽ ഏഴ് വൈഡുകളടക്കം 13 പന്തെറിഞ്ഞ താരം ആകെ ഓവറിൽ 18 റൺസ് വഴങ്ങി. വൈഡിൻ്റെ എണ്ണത്തിൽ അർഷീപ് സിംഗ് ഇതോടെ ലോക റെക്കോർഡ് നേട്ടവും സ്ഥാപിച്ചു.
രാജ്യാന്തര ടി20യിലെ ഒരു ഓവറിൽ എറ്റവുമധികം വൈഡ് വഴങ്ങുന്ന ബൗളർ എന്ന റെക്കോർഡിലാണ് അർഷ്ദീപ് എത്തിയത്. അഫ്ഗാനിസ്ഥാൻ്റെ നവീനുൽ ഹഖും നേരത്തെ ഒരു ഓവറിൽ ഏഴ് വൈഡുകൾ എറിഞ്ഞിട്ടുണ്ട്. അർഷ്ദീപ് ഈ റെക്കോർഡ് പങ്കിടുകയാണ്.
