വെറുംവയറ്റിൽ കാപ്പി കുടിക്കുന്ന ശീലമുണ്ടോ? ശരീരത്തിൽ സംഭവിക്കുന്ന മാറ്റങ്ങളും ശ്രദ്ധിക്കേണ്ട കാര്യങ്ങളും!
What Happens When You Drink Coffee on an Empty Stomach?: ഉറക്കച്ചടവ് മാറ്റി ഉന്മേഷം നേടാൻ ഒരു കപ്പ് കാപ്പിയോടെ ദിവസം തുടങ്ങുന്നവരാണ് നമ്മളിൽ പലരും. രാവിലെ എഴുന്നേറ്റ ഉടൻ വെള്ളം പോലും കുടിക്കാതെ വെറുംവയറ്റിൽ കാപ്പി കുടിക്കുന്നവരുണ്ട്. കാപ്പിയിലെ കഫീൻ തലച്ചോറിനെയും നാഡീവ്യൂഹത്തെയും ഉത്തേജിപ്പിച്ച് ഉണർവ് നൽകും എന്നത് ശരിതന്നെ. എന്നാൽ വെറുംവയറ്റിൽ കാപ്പി കുടിക്കുന്നത് ദഹനപ്രക്രിയയെയും ശരീരത്തിൻ്റെ മൊത്തത്തിലുള്ള ആരോഗ്യത്തെയും എങ്ങനെ ബാധിക്കുമെന്ന് ചിന്തിച്ചിട്ടുണ്ടോ ?
ചിലരിൽ ഇത് അസിഡിറ്റിക്കും വയറുവേദനയ്ക്കും കാരണമാകാറുണ്ട്. വെറുംവയറ്റിൽ കാപ്പി കുടിക്കുന്നത് ആമാശയത്തിലെ ആസിഡ് ഉത്പാദനം വർധിപ്പിക്കാൻ കാരണമാകും. ഭക്ഷണം ദഹിപ്പിക്കാൻ ഈ ആസിഡ് സഹായിക്കുമെങ്കിലും, വയറ്റിൽ ആഹാരമില്ലാത്തപ്പോൾ ഇത് പലരിലും അസ്വസ്ഥതകൾ ഉണ്ടാക്കും. ആസിഡ് റിഫ്ലക്സ് ഉള്ളവരിൽ കാപ്പി കുടിക്കുന്നത് നെഞ്ചെരിച്ചിൽ കൂട്ടാൻ ഇടയാക്കും. (Image Credit source: Unsplash)
ഉറക്കത്തിന് സഹായിക്കുന്ന അഡിനോസിൻ എന്ന രാസവസ്തുവിനെ തടഞ്ഞുകൊണ്ടാണ് കഫീൻ ശരീരത്തിന് പെട്ടെന്ന് ഊർജ്ജം നൽകുന്നത്. എന്നാൽ ഭക്ഷണം കഴിക്കാതെ കാപ്പി കുടിക്കുമ്പോൾ കഫീൻ വളരെ വേഗത്തിൽ രക്തത്തിൽ കലരും. ഇത് ചിലരിൽ അമിതമായ ഉത്കണ്ഠ, വെപ്രാളം എന്നിവ സൃഷ്ടിക്കും. ഹൃദയമിടിപ്പും വർധിപ്പിക്കാം.
അമിതമായി കഫീൻ ഉള്ളിലെത്തുന്നത് പിന്നീട് കടുത്ത ക്ഷീണത്തിനും തലവേദനയ്ക്കും രാത്രിയിലെ ഉറക്കക്കുറവിനും വഴിവെക്കും. രാവിലെ കാപ്പി കുടിച്ച ഉടൻ തന്നെ ടോയ്‌ലറ്റിൽ പോകാൻ തോന്നുന്നത് പലരിലും കണ്ടുവരുന്ന ഒരു സ്വാഭാവിക പ്രതികരണമാണ്. ദഹനത്തിന് സഹായിക്കുന്ന ഹോർമോണുകളായ ഗ്യാസ്ട്രിൻ, കോളിസിസ്റ്റോകൈനിൻ എന്നിവയെ കാപ്പി ഉത്തേജിപ്പിക്കുന്നതാണ് ഇതിന് കാരണം.
വെറുംവയറ്റിൽ കാപ്പി കുടിക്കുന്നത് ആമാശയത്തിൽ അൾസർ ഉണ്ടാക്കുമെന്നൊരു പൊതുധാരണ പലർക്കുമുണ്ട്. എന്നാൽ കാപ്പി നേരിട്ട് അൾസറിന് കാരണമാകുമെന്നതിന് ശാസ്ത്രീയ തെളിവുകളില്ല. എങ്കിലും നിലവിൽ അൾസറോ മറ്റ് ദഹനപ്രശ്നങ്ങളോ ഉള്ളവർ വെറുംവയറ്റിൽ കാപ്പി കുടിക്കുന്നത് രോഗലക്ഷണങ്ങൾ കൂടുതൽ വഷളാക്കാൻ കാരണമാകും എന്നതിനാൽ ജാഗ്രത പാലിക്കണം.
ചെറിയ മാറ്റങ്ങൾ വരുത്തിയാൽ രാവിലെയുള്ള കാപ്പികുടി ആരോഗ്യകരമാക്കാം. കാപ്പിക്ക് മുൻപ് മുട്ട, ഓട്സ് അല്ലെങ്കിൽ ബ്രെഡ് പോലുള്ള ലഘുഭക്ഷണങ്ങൾ കഴിക്കുന്നത് ശീലമാക്കുക. കാപ്പിയിൽ അമിതമായി പഞ്ചസാര ചേർക്കുന്നത് ഒഴിവാക്കുകയും ദിവസേനയുള്ള കഫീൻ്റെ അളവ് 400 മില്ലിഗ്രാമിൽ താഴെയായി നിയന്ത്രിക്കുകയും ചെയ്യുക. ശരീരത്തിൽ ജലാംശം നിലനിർത്താൻ ധാരാളം വെള്ളം കുടിക്കാനും, നെഞ്ചെരിച്ചിലോ അസ്വസ്ഥതയോ തോന്നിയാൽ കാപ്പിയുടെ അളവ് കുറയ്ക്കാനും ശ്രദ്ധിക്കണം.
