പാണ്ഡ്യയെ ​കൊടുക്കും, രോഹിത് ഇല്ല; മും​ബൈ ഇന്ത്യൻസിന് ക്യാപ്റ്റനാകാൻ പിന്നെയാര്!

Rohit Sharma May Not Return As Mumbai Indians Captain

മും​ബൈ ഇന്ത്യൻസിന്റെ എക്കാലത്തെയും മികച്ച നായകനായ രോഹിത് ശർമ ക്യാപ്റ്റൻ സ്ഥാനത്തേക്ക് മടങ്ങിയെത്തും എന്ന നിലയ്ക്കുള്ള അ‌ഭ്യൂഹങ്ങൾ ഫ്രാഞ്ചൈസി തള്ളിയെന്ന് റിപ്പോർട്ട്. മുംബൈ ഇന്ത്യൻസ് ക്യാപ്റ്റൻ സ്ഥാനത്തേക്ക് രോഹിത് ശർമ്മയെ തിരികെ കൊണ്ടുവരുന്നുവെന്ന വാർത്തകളിൽ യാതൊരു സത്യവുമില്ലെന്ന് ഫ്രാഞ്ചൈസി വൃത്തങ്ങൾ പറഞ്ഞതായി എൻഡിടിവി റിപ്പോർട്ട് ചെയ്യുന്നു. അടുത്ത ഐപിഎൽ സീസണിലെ ക്യാപ്റ്റനെ സംബന്ധിച്ച് ഇതുവരെ ആഭ്യന്തര ചർച്ചകളൊന്നും നടന്നിട്ടില്ലെന്ന് ഫ്രാഞ്ചൈസി വ്യക്തമാക്കിയതായും റിപ്പോർട്ടിൽ പറയുന്നുണ്ട്. അ‌തേസമയം ഹാർദിക് പാണ്ഡ്യയെ ട്രേഡ് ചെയ്യുന്നതിനുള്ള സാധ്യതകൾ പരിശോധിക്കുന്നുണ്ടെന്നും, ഇതുമായി ബന്ധപ്പെട്ട നിർദ്ദേശങ്ങൾ പരിഗണിക്കുമെന്നും ഫ്രാഞ്ചൈസി സ്ഥിരീകരിച്ചു എന്ന് എൻഡിടിവി റിപ്പോർട്ട് പറയുന്നു.

2027-ലെ ഐപിഎല്ലിന് മുമ്പ് ഹാർദിക് ടീം വിടുകയാണെങ്കിൽ, രോഹിത്തിനെ പരിഗണിച്ചില്ലെങ്കിൽ പോലും മുംബൈ ഇന്ത്യൻസിന് മുന്നിൽ ക്യാപ്റ്റൻ സ്ഥാനത്തേക്ക് മറ്റ് പല മികച്ച ഓപ്ഷനുകളുമുണ്ട്. എന്നാൽ, ഹാർദിക്കിനെ ട്രേഡ് ചെയ്യുന്നതിനായി ഇതുവരെ അനുയോജ്യമായ ഒരു കരാർ കണ്ടെത്താനായിട്ടില്ലെന്നും ഫ്രാ​ഞ്ചൈസി പ്രതികരിച്ചതായി റിപ്പോർട്ടിൽ പറയുന്നുണ്ട്.

Also Read: വിരാട് കോലി മാത്രം പോരാ, ലോകകപ്പിന് ഷമിയും വേണം; കൈഫിന്റെ നിർദേശം

ഐപിഎല്ലിൽ മുംബൈ ഇന്ത്യൻസിന് അഞ്ച് കിരീടങ്ങൾ നേടിക്കൊടുത്ത ഇതിഹാസ നായകനാണ് രോഹിത് ശർമ്മ. എന്നാൽ 2024 ലെ ഐപിഎല്ലിന് മുന്നോടിയായി ഗുജറാത്ത് ടൈറ്റൻസിൽ നിന്ന് ട്രേഡ് വഴി തിരിച്ചെത്തിയ ഹാർദിക് പാണ്ഡ്യയെ മും​ബൈ ഇന്ത്യൻസ് ക്യാപ്റ്റനായി നിയമിക്കുകയായിരുന്നു. ഇതിനെതിരേ ആരാധകർ പ്രതിഷേധവുമായി രംഗത്തെത്തിയിരുന്നു.

ഹാർദിക് പാണ്ഡ്യക്ക് കീഴിൽ മും​ബൈ ഇന്ത്യൻസിന് കാര്യമായ നേട്ടങ്ങൾ ഒന്നും സൃഷ്ടിക്കാൻ കഴിഞ്ഞില്ല. മുംബൈ ഇന്ത്യൻസിന്റെ നായകനായി പാണ്ഡ്യ ചുമതലയേറ്റ ആദ്യ സീസണിൽ പോയിന്റ് പട്ടികയിൽ അവസാന സ്ഥാനത്താണ് (10-ാം സ്ഥാനം) ടീം ഫിനിഷ് ചെയ്തത്. 2025 സീസണിൽ ഭേദപ്പെട്ട പ്രകടനം ഉണ്ടായെങ്കിലും 2026-ൽ 9-ാം സ്ഥാനത്തേക്ക് വീണു.

ഹോം ഗ്രൗണ്ടായ വാങ്കഡെ സ്റ്റേഡിയത്തിൽ മുൻകാലങ്ങളിൽ പുലർത്തിയിരുന്ന ആധിപത്യം നിലനിർത്തുന്നതിൽ ഉൾപ്പെടെ പാണ്ഡ്യയുടെ ക്യാപ്റ്റൻസി കാലയളവിൽ ടീം തിരിച്ചടി നേരിട്ടു. ഈ സാഹചര്യത്തിലാണ് പാണ്ഡ്യയെ ​കൈമാറാനുള്ള ചർച്ചകൾ പുരോഗമിച്ചുകൊണ്ടിരിക്കുന്നത്. ഹാർദിക് ഫ്രാഞ്ചൈസി വിടുകയാണെങ്കിൽ മുംബൈ ഇന്ത്യൻസിനെ നയിക്കാൻ സൂര്യകുമാർ യാദവും തിലക് വർമ്മയുമാണ് പ്രധാനമായും പരിഗണിക്കപ്പെടുന്നത്. മിച്ചൽ സാന്റ്നറും ഈ സ്ഥാനത്തേക്ക് പരിഗണനയിലുണ്ട്.

ഇന്ത്യൻ ടി20 ടീമിന്റെ വൈസ് ക്യാപ്റ്റൻ കൂടിയായ തിലക് വർമ മും​ബൈ ഇന്ത്യൻസിന്റെ ഭാവി വാഗ്ദാനമായി വിലയിരുത്തപ്പെടുന്ന താരമാണ്. ന്യൂസിലാൻഡ് ഓൾറൗണ്ടറായ സാന്റ്നർ, തന്റെ രാജ്യത്തിന്റെ വൈറ്റ്-ബോൾ ടീമുകളെ നയിക്കുന്ന താരം കൂടിയാണ്. സൂര്യകുമാർ 2026-ലെ ടി20 ലോകകപ്പ് കിരീടം ഇന്ത്യയ്ക്ക് നേടിക്കൊടുത്ത ക്യാപ്റ്റനാണ്, എങ്കിലും മോശം ഫോം സൂര്യകുമാർ യാദവിന് തിരിച്ചടിയാണ്.

English Summary

Reports citing franchise sources state there is no truth to the rumors about Rohit Sharma returning as Mumbai Indians captain. However, indications suggest the franchise has confirmed it is exploring the possibility of trading Hardik Pandya and will consider proposals regarding the same.