ദുബായ്: ഈ വർഷത്തെ ദീപാവലി ആഘോഷിക്കാൻ യു.എ.ഇയിലെ ചില ഇന്ത്യൻ കരിക്കുലം സ്കൂളുകളിലെ വിദ്യാർത്ഥികൾക്ക് നീണ്ട അവധി ലഭിക്കും. വാരാന്ത്യ അവധികൾ കൂടി ചേരുമ്പോൾ നാല് മുതൽ അഞ്ച് ദിവസം വരെയാണ് പല സ്കൂളുകൾക്കും അവധി ലഭിക്കുന്നത്. ഇത് വിദ്യാർത്ഥികൾക്കും രക്ഷിതാക്കൾക്കും നാട്ടിലേക്ക് യാത്ര ചെയ്യാനും കുടൂംബത്തിലെ പ്രിയപ്പെട്ടവർക്കൊപ്പം ആഘോഷങ്ങളിൽ പങ്കുചേരാനും അവസരമൊരുക്കും.

ഈ വർഷം നവംബർ 8-ന് ഞായറാഴ്ചയാണ് ദീപാവലി വരുന്നത്. ആഘോഷങ്ങളുടെ ഭാഗമായി മിക്ക ഇന്ത്യൻ സ്കുളുകളും അവധി പ്രഖ്യാപിച്ചിട്ടുണ്ടെങ്കെലും ചില സ്കൂളുകൾ അവധി നൽകുന്നതിന് പകരം കാമ്പസിൽ തന്നെ വിവിധ പരിപാടികളൊടെ ദീപാവലി ആഘോഷിക്കാനാണ് തീരുമാനിച്ചിരിക്കുന്നത്. ദുബായിലെ ജെംസ് ആവർ ഓൺ ഇന്ത്യൻ സ്കൂളിലെ വിദ്യാർത്ഥികൾക്ക് വാരാന്ത്യം ഉൾപ്പടെ നാല് ദിവസത്തെ അവധിയാണ് ലഭിക്കുക. അതേസമയം ഇന്ത്യൻ ഹൈഗ്രൂപ്പ് ഓഫ് സ്കൂളുകളിലെ വിദ്യാർത്ഥികൾക്ക് നവംബർ 7 മുതൽ 11 വരെ അഞ്ച് ദിവസത്തെ നീണ്ട അവധി ലഭിക്കും.

Also Read: ഡ്രൈവിംഗ് ടെസ്റ്റിൽ 75 ശതമാനം മാർക്ക് കിട്ടിയാലും കാര്യമില്ല; യു.എ.ഇയിൽ ലൈസൻസ് നേടാൻ ഇനി പുതിയ കടമ്പകൾ

ദുബായ് നോളജ് ആൻഡ് ഹ്യൂമൻ ഡെവലപ്മെൻ്റ് അതോറിറ്റിയുടെ മാനദണ്ഡങ്ങൾ പ്രകാരം എമിറേറ്റിലെ സ്വകാര്യ സ്കൂളുകൾക്ക് ഒരു അധ്യായന വർഷം കുറഞ്ഞത് 182 പ്രവർത്തി ദിനങ്ങൾ ഉണ്ടായിരിക്കണം. യു.എ.ഇ വിദ്യാഭ്യാസ മന്ത്രാലയത്തിൻ്റെ നിയമപ്രകാരം ഇത് 185 ദിവസമാണ്. എങ്കിലും സി.ബി.എസ്.ഇ, ഐ.സി.എസ്.ഇ സിലബസുകൾ പിന്തുടരുന്ന സ്വകാര്യ ഇന്ത്യൻ സ്കൂളുകൾക്ക് പ്രാദേശിക വകുപ്പിൻ്റെ പ്രത്യേക അനുമതിയോടെ ദീപാവലി സമയത്ത് പ്രത്യേകം അവധി ക്രമീകരിക്കാൻ സാധിക്കും. ഇന്ത്യൻ കരിക്കുലം പിന്തുടരുന്ന സ്കൂളുകളിൽ ഏപ്രിൽ മാസത്തിലാണ് അധ്യായന വർഷം ആരംഭിക്കുന്നത്. അതിനാൽ എമിറേറ്റുകളിലെ വിദ്യാഭ്യാസ മന്ത്രാലയങ്ങളുടെ നിർദ്ദേശങ്ങൾ പാലിച്ച് അവധി ദിനങ്ങളിൽ മാറ്റം വരുത്താൻ ഈ സ്കൂളുകൾക്ക് സാധിക്കും.

എന്നാൽ യു.എ.ഇയിലെ എല്ലാ ഇന്ത്യൻ സ്കൂളുകൾക്കും ഒരുപോലെ അവധി ഉണ്ടായിരിക്കില്ല എന്ന കാര്യം പ്രത്യേകം ശ്രദ്ധിക്കുക. ഓരോ സ്കൂളുകൾക്കും അവധി ദിനങ്ങൾ വ്യത്യസ്തമായിരിക്കും എന്നതിനാൽ രക്ഷിതാക്കൾ സ്കൂളുകളിലെ അക്കാദമിക് കലണ്ടർ പരിശോധിക്കുകയോ, അധികൃതരുമായി ബന്ധപ്പെട്ട് തിയതികൾ ഉറപ്പുവരുത്തുകയോ ചെയ്യേണ്ടതുണ്ട്. ഐ.ബി, ബ്രിട്ടീഷ്, അമേരിക്കൻ പാഠ്യപദ്ധതികൾ പിന്തുടരുന്ന മറ്റു അന്താരാഷ്ട്ര സ്കൂളുകൾക്ക് ദീപവലിക്ക് പ്രത്യേക അവധി ഉണ്ടായിരിക്കില്ല. എങ്കിലും മിക്ക സ്കൂളുകളും വിദ്യാർത്ഥികൾക്കായി കാമ്പസുകളിൽ ദീപാവലി ആഘോഷങ്ങൾ സംഘടിപ്പിക്കാറുണ്ട്.

English Summary

Students at some Indian curriculum schools in the UAE will get an extended 4 to 5-day break for Diwali this year. Holidays vary by school, aligned with KHDA and MOE guidelines.

തിംഫു: ഭൂട്ടാനിലെ വടക്കുപടിഞ്ഞാറൻ മേഖലയായ ഗാസ ജില്ലയിലെ ഷിൻ്റഫു ഹിമ തടാകം പൊട്ടി ശക്തമായ മിന്നൽ പ്രളയം. വ്യാഴാഴ്ച വൈകുന്നേരത്തോടെയാണ് അപ്രതീക്ഷിതമായി തടാകം പൊട്ടിയൊഴുകിയത്. ഇതിന് പിന്നാലെ ഇന്ത്യയിലെ അതിർത്തി സംസ്ഥാനങ്ങളായ അസമിലും പശ്ചിമ ബംഗാളിലും അധികൃതർ കനത്ത ജാഗ്രതാ നിർദ്ദേശം നൽകി. മോ ചു നദിയുടെ തീരത്ത് സ്ഥിതി ചെയ്യുന്ന പ്രശസ്തമായ് ‘ഗാസ സാച്ചു’ ഹോട്ട് സ്പ്രിംഗും, അവിടുത്തെ സംവിധാനങ്ങളും പ്രളയത്തിൽ പുർണമായും ഒലിച്ചുപോയി. അപകട സാധ്യത മുൻകൂട്ടി കണ്ട് പ്രദേശത്ത് നിന്ന് ആളുകളെ നേരത്തെ തന്നെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചിരുന്നതിനാൽ വലിയ ദുരന്തം ഒഴിവായി. നിലവിൽ ആളപായമൊന്നും റിപ്പോർട്ട് ചെയ്തിട്ടില്ല.

പശ്ചിമ ബംഗാളിലും, അസമിലും ജാഗ്രത

ഭൂട്ടാനിലെ പ്രളയജലം അതിത്തികടന്നെത്താൻ സാധ്യതയുള്ളതിനാൽ പശ്ചിമ ബംഗാൾ, അസം സർക്കാരുകൾക്ക് ഭൂട്ടാൻ ഭരണകൂടം അടിയന്തര മുന്നറിയിപ്പ് നൽകിയിട്ടുണ്ട്. അസമിലെ ധുബ്രി, പശ്ചിമ ബംഗാളിൽ ഡാർജലിംഗിലെ മലയോര പ്രദേശങ്ങൾ, അലിപുർദുവാർ, ജൽപായ്ഗുരി എന്നീ അതിർത്തി ജില്ലകളിലാണ് മിന്നൽ പ്രളയത്തിന് ഏറ്റവും കൂടുതൽ സാധ്യതയുള്ളത്. പശ്ചിമബംഗാളിലെ കൂച്ച് ബെഹാറിൽ സങ്കോഷ് നദീതീരത്ത് താമസിക്കുന്ന ജനങ്ങൾക്ക് പ്രാദേശിക ഭരണകൂടം കർശന ജാഗ്രതാ നിർദ്ദേശം നൽകിയിട്ടുണ്ട്. ഭൂട്ടാനിൽ നിന്നുമുള്ള മോ ചു, ഫോ ചു, എന്നീ നദികൾ സംഗമിച്ചുണ്ടാകുന്ന സങ്കോഷ് നദി പിന്നീട് അതിർത്തി കടന്ന് അസമിലെ ബ്രഹ്മപുത്രയിലാണ് ചെന്നുചേരുന്നത്.

Also Read: ഗോവധം: ഗുജറാത്തിൽ മൂന്ന് പേർക്ക് ജിവപര്യന്തം കഠിനതടവ് വിധിച്ച് കോടതി; മനുസ്മൃതി പരാമർശിച്ച് വിധിന്യായം

ഭൂട്ടാനിലെ ഏറ്റവും അപകട സാധ്യതയുള്ള 17 ഹിമതടാകങ്ങളുടെ പട്ടികയിലുള്ളതാണ് മോ ചു നദിയുടെ ഉത്ഭവസ്ഥാനത്തുള്ള ഷിൻ്റഫു തടാകം. നിലവിൽ പുനഖ സോംഗിൽ നിന്ന് എട്ട് കിലോമീറ്റർ അകലെയുള്ള അതിർത്തി പ്രദേശമായ ശ്രീഗാംഗ് വരെ കുത്തിയൊഴുകുന്ന പ്രളയജലം എത്തിയിട്ടുണ്ട്. ഇതിന് മുൻപ് 2021 ആഗസ്റ്റ് 26-നും ഗാസ സാച്ചുവിൽ നദി ഗതിമാറി ഒഴുകി വലിയ നാശനഷ്ടങ്ങൾ സംഭവിച്ചിരുന്നു.

കാലാവസ്ഥാ വ്യതിയാനവും ആഗോള താപനവും കാരണം ഹിമാനികൾ ഉരുകി രൂപപ്പെടുന്ന തടാകങ്ങളിൽ വെള്ളം അമിതമായി നിറയുകയും അവ പെട്ടന്ന് പൊട്ടി ഒഴുകുകയും ചെയ്യുന്ന അപകടകരമായ അവസ്ഥയാണ് ഗ്ലേഷ്യർ ലേക്ക് ഔട്ട്ബേസ്റ്റ് ഫ്ലഡ്. ഭൂകമ്പവും ഉരുൾപൊട്ടലും മഞ്ഞുമലകൾ തകർന്നു വീഴുന്നതും, ശക്തമായ മഴയുമെല്ലാം ഇത്തരം ഹിമതടാകളുടെ തകർച്ചയ്ക്കും പിന്നാലെ മിന്നൽ പ്രളയത്തിനും കാരണമാകാറുണ്ട്.

English Summary

A glacial lake outburst flood at Shintaphu Lake in Bhutan washed away the Gasa Tshachu hot springs. Following the incident, high alerts for flash floods have been issued in parts of West Bengal and Assam in India.

വാഷിംഗ്ടൺ: അഞ്ചാം വർഷത്തിലേക്ക് കടന്ന ഉക്രെയ്ൻ യുദ്ധം അവസാനിപ്പിക്കുന്നതിൻ്റെ ഭാഗമായി റഷ്യയുമായി വമ്പൻ വാണിജ്യ കരാറുകൾക്ക് അമേരിക്കൻ പ്രസിഡൻ്റ് ഡൊണാൾഡ് ട്രംപ് തയ്യാറെടുക്കുന്നതായി റിപ്പോർട്ട്. ഫിനാൻഷ്യൽ ടൈംസാണ് ഈ വാർത്ത പുറത്തുവിട്ടത്. യുദ്ധം അവസാനിച്ചാൽ റഷ്യൻ എണ്ണ വ്യവസായ രംഗത്തേക്ക് അമേരിക്കൻ കമ്പനികളെ തിരികെ കൊണ്ടുവരുന്നതും, യൂറോപ്പിലേക്കുള്ള റഷ്യൻ എണ്ണ വിതരണം പുനരാരംഭിക്കുന്നതും ഉൾപ്പെടെയുള്ള നിർണായക വിഷയങ്ങളാണ് വാഷിംഗ്ടണും മോസ്കോയും തമ്മിൽ പ്രധാനമായും ചർച്ച ചെയ്യുന്നത് എന്നാണ് വിവരം.

റഷ്യയുടെ കിഴക്കൻ തീരത്തെ സഖാലിൻ എണ്ണ പദ്ധതി പുനരാരംഭിക്കുക, ദ്രുഷ്ബ പൈപ്പ്ലൈൻ വഴി യൂറോപ്പിലേക്ക് വീണ്ടും എണ്ണ എത്തിക്കുക എന്നിവയാണ് പ്രധാന നിർദ്ദേശങ്ങൾ. ഇതിന് പുറമെ വിമാന നിർമ്മാണത്തിന് വ്യാപകമായി ഉപയോഗിക്കുന്ന ടൈറ്റാനിയം ഉൽപ്പാദനത്തിൽ അമേരിക്കൻ കമ്പനികൾ റഷ്യയുമായി സഹകരിക്കാനും, അമേരിക്കൻ വിമാനങ്ങൾക്ക് റഷ്യൻ വ്യോമപാത വീണ്ടും ഉപയോഗിക്കാനുമുള്ള ചർച്ചകളും നടക്കുന്നുണ്ട്. ട്രംപിൻ്റെ പ്രത്യേക പ്രതിനിധിയായ സ്റ്റീവ് വിറ്റ്‌കോഫ് കഴിഞ്ഞ സെപ്റ്റംബറിൽ റഷ്യൻ പ്രസിഡൻ്റ് വ്ളാഡിമിർ പുടിനുമായി നടത്തിയ കൂടിക്കാഴ്ചയിൽ ഈ വിഷയങ്ങൾ ചർച്ച ചെയ്തിരുന്നു എന്നാണ് റിപ്പോർട്ടുകൾ.

Also Read: US Iran Conflict: പ്രസിഡൻ്റ് ട്രംപിൻ്റെ ഉത്തരവ് ലഭിച്ചാൽ 96 മണിക്കൂറിനുള്ളിൽ ഇറാനെ ആക്രമിക്കാൻ തയ്യാറെന്ന് യു.എസ് സേന

എന്നാൽ വിറ്റ്‌കോഫിൻ്റെ റഷ്യൻ അനുകൂല നിലപാടുകൾക്കെതിരെ അമേരിക്കയിൽ ഡെമോക്രാറ്റുകളിൽ നിന്നും റിപ്പബ്ലിക്കൻ പാർട്ടിയിൽ നിന്നും വലിയ വിമർശനങ്ങളും ഉയരുന്നുണ്ട്. അതേസമയം, അമേരിക്കയുടെ ഈ പുതിയ നീക്കം ഉക്രെയ്നുമായുള്ള ബന്ധം കൂടുതൽ വഷളാക്കിയിട്ടുണ്ട്. റഷ്യൻ എണ്ണ ശുദ്ധീകരണശാലകൾക്ക് നേരെയുള്ള ആക്രമണങ്ങൾ അവസാനിപ്പിക്കാൻ അമേരിക്ക ഉക്രെയ്നിൽ കടുത്ത സമ്മർദ്ദം ചെലുത്തുന്നുണ്ട്. എന്നാൽ ഡ്രോൺ ആക്രമണങ്ങൾ നിർത്തില്ലെന്ന ഉറച്ച നിലപാടിലാണ് ഉക്രെയ്ൻ പ്രസിഡൻ്റ് വ്ളാഡിമർ സെലെൻസ്കി. ഇതോടെ ഉക്രെയ്ന് ഇൻ്റലിജൻസ് വിവരങ്ങൾ കൈമാറുന്നതിലും സ്റ്റാർലിങ്ക് സേവനങ്ങൾ നൽകുന്നതിലും അമേരിക്ക നിയന്ത്രണങ്ങൾ കൊണ്ടുവന്നതായും റിപ്പോർട്ടുകളുണ്ട്.

അടുത്തിടെ റഷ്യയിൽ നിന്ന് ഡീസൽ ഇറക്കുമതി ചെയ്യാൻ ട്രംപ് അനുമതി നൽകിയതും റഷ്യൻ എണ്ണ കയറ്റുമതിക്ക് മേലുള്ള പുതിയ ഉപരോധങ്ങൾ അമേരിക്ക മരവിപ്പിച്ചതും ഉക്രെയ്നെയും മറ്റ് യൂറോപ്യൻ സഖ്യകക്ഷികളെയും വലിയ രീതിയിൽ ചൊടിപ്പിച്ചിട്ടുണ്ട്. അടുത്ത മാസം അബുദാബിയിൽ വെച്ച് അമേരിക്ക, റഷ്യ, ഉക്രെയ്ൻ പ്രതിനിധികൾ പങ്കെടുക്കുന്ന സമാധാന ചർച്ചകൾ നടക്കാനിരിക്കെയാണ് ഈ പുതിയ സംഭവവികാസങ്ങൾ. സമാധാന ചർച്ചകളുടെ ഭാഗമായി കൊണ്ടുവരുന്ന വാണിജ്യ കരാറുകൾ യുദ്ധം അവസാനിച്ചതിന് ശേഷം മാത്രമേ പ്രാബല്യത്തിൽ വരൂ എന്ന് അമേരിക്കൻ ഉദ്യോഗസ്ഥർ വ്യക്തമാക്കിയതായും റിപ്പോർട്ടിൽ പറയുന്നു.

English Summary

The Trump administration is exploring major oil and business deals with Russia, including restarting the Sakhalin project, to end the Ukraine war. However, this move is further straining US-Ukraine relations.

ദുബായ്: യു.എ.ഇയിൽ പുതിയ ഫെഡറൽ ട്രാഫിക് നിയമങ്ങൾ 2027 ജനുവരി ഒന്ന് മുതൽ പ്രാബല്യത്തിൽ വരുന്നതോടെ ഡ്രൈവിംഗ് ലൈസൻസ് ടെസ്റ്റുകൾ കൂടുതൽ കർശനമാകും. പുതിയ നിയമ പ്രകാരം പ്രാക്ടിക്കൽ പരീക്ഷയിൽ 75 ശതമാനം മാർക്ക് നേടിയാലും ലൈസൻസ് ലഭിക്കുമെന്ന് ഉറപ്പിച്ച് പറയാനാകില്ല. ടെസ്റ്റിനിടെ അപേക്ഷകർ അപകടകരമായ തെറ്റുകൾ വരുത്തുകയോ അപകടം ഒഴിവാക്കാൻ എക്സാമിനർക്ക് ഇടപെടേണ്ടി വരികയോ ചെയ്താൽ പ്രാക്ടിക്കൽ പരീക്ഷയിൽ പരാജയപ്പെട്ടതായി കണക്കാക്കും. എക്സാമിനറുടെ ഇടപെടൽ ഫിസിക്കലാകണം എന്നുപോലുമില്ല, അപകടം ഒഴിവാക്കാനായി വാക്കാലുള്ള നിർദ്ദേശങ്ങൾ നൽകേണ്ടതായി വന്നാലും ടെസ്റ്റിൽ പരാജയപ്പെടും

2026 ഒക്ടോബർ 6-ന് യു.എ.ഇ ഫെഡറൽ ഒഫീഷ്യൽ ഗസറ്റിൽ പ്രസിദ്ധീകരിച്ച് 2024-ലെ ഫെഡറൽ ഡിക്രി ലോ നമ്പർ 14-ൻ്റെ എക്സിക്യൂട്ടീവ് റഗുലേഷന് അംഗീകാരം നൽകുന്ന 2026-ലെ കാബിനറ്റ് തീരുമാനത്തിലാണ് ഈ പുതിയ നിബന്ധനകൾ വ്യക്തമാക്കിയിരിക്കുന്നത്. 75 ശതമാനം മാർക്ക് നേടിയാലും ടെസ്റ്റിൽ പരാജയപ്പെടാനുള്ള സാധ്യതകളെ കുറിച്ച് പഴയ നിയമത്തിലും പരമർശിച്ചിരുന്നു എങ്കിലും, ടെസ്റ്റിൽ പരാജയപ്പെടാൻ ഇടയാക്കുന്ന കാരണങ്ങൾ പുതിയ നിയമത്തിൽ കൃത്യമായി നിർവചിച്ചിട്ടുണ്ട്.

Also Read: UAE November 2026 Updates: നവംബർ മുതൽ യു.എ.ഇ മാറുന്നു; ദുബായിലെ വേഗപരിധി ഉൾപ്പെടെയുള്ള പ്രധാന മാറ്റങ്ങളറിയാം

പുതിയ നിയമത്തിലെ ആർട്ടിക്കിൾ 68 പ്രകാരം അപേക്ഷകർ 75 ശതമാനത്തിന് മുകളിൽ മാർക്ക് നേടിയാലും ചില പ്രത്യേക തെറ്റുകൾ വരുത്തിയാൽ പരീക്ഷയിൽ പരാജയപ്പെടും. വാഹനത്തിൻ്റെ ബോഡിയോ, ടയറോ ബാരിക്കെടുകളിൽ തട്ടുക, വാഹനം സ്റ്റാർട്ട് ചെയ്യുമ്പോൾ നിയന്ത്രണം നഷ്ടപ്പെടുക, ഗിയർ മാറ്റുന്നതിൽ വീഴ്ചകൾ വരുത്തുക, വാഹനം കൃത്യമല്ലാത്ത രീതിയിൽ പാർക്ക് ചെയ്യുക, ട്രാഫിക് ചിഹ്നങ്ങളും നിയമങ്ങളും ലംഘിക്കുക എന്നിവ ഇതിൽ ഉൾപ്പെടുന്നു. ഇതുകൂടാതെ മൊട്ടോർസൈക്കിൽ ലൈസൻസ് ടെസ്റ്റിനിടെ കാലുകൾ നിലത്ത് മുട്ടിയാലും പരാജയപ്പെട്ടതായി കണക്കാക്കും. ഈ തെറ്റുകൾ വരുത്തിയൽ ഉയർന്ന മാർക്ക് പരിഗണിക്കില്ല.

ആർട്ടിക്കിൾ 66 പ്രകാരം തിയറി പരീക്ഷ വിജയിച്ച അപേക്ഷകർ നിർബന്ധമായും പ്രാക്ടിക്കൽ ടെസ്റ്റ് പൂർത്തിയാക്കണം. കയറ്റങ്ങളിലും ഇറക്കങ്ങളിലും വാഹനം സുരക്ഷിതമായി മുന്നോട്ടും പിന്നോട്ടും എടുക്കുക, ഗിയറുകൾ കൃത്യമായി മാറ്റുക. സാധാരണ സമയത്തും എമേർജെൻസി സാഹചര്യങ്ങളിലും വാഹനം സുരക്ഷിതമായി നിർത്തുക, പാരലൽ പാർക്കിംഗ്, രണ്ട് വാഹനങ്ങൾക്കിടയിൽ പാർക്ക് ചെയ്യുക, ലൈൻ ചേഞ്ചിംഗ്, ഇൻഡിക്കേറ്ററുകളുടെ ഉപയോഗം, റൗണ്ട് എബൗട്ടുകളിലൂടെയും ഇൻ്റർസെക്ഷനുകളിലൂടെയുമുള്ള ഡ്രൈവിംഗ് തുടങ്ങി എല്ലാ കാര്യങ്ങളും ടെസ്റ്റിൽ കർശനമായി വിലയിരുത്തും. ആവശ്യമെങ്കിൽ കൂടുതൽ മാനദണ്ഡങ്ങൾ ഉൾപ്പെടുത്താനും അധികൃതർക്ക് സാധിക്കും.

English Summary

Under the UAE's new traffic law taking effect in 2027, scoring 75% on a driving test won't guarantee a pass. Applicants will fail immediately for dangerous mistakes or examiner interventions.

വാഷിംഗ്ടൺ: അമേരിക്കൻ പ്രസിഡൻ്റ് ഡൊണാൾഡ് ട്രംപിൻ്റെ ഉത്തരവ് ലഭിച്ചാൽ 96 മണിക്കൂറിനുള്ളിൽ ഇറാനെതിരെ വലിയ സൈനിക നീക്കങ്ങൾ ആരംഭിക്കാൻ പശ്ചിമേഷ്യയിലെ യു.എസ് സേന തയ്യാറാണെന്ന് സി.എൻ.എൻ റിപ്പോർട്ട് ചെയ്തു. രണ്ട് യു.എസ് ഉദ്യോഗസ്ഥരെ ഉദ്ധരിച്ചാണ് സി.എൻ.എൻ ഈ വാർത്ത പുറത്തുവിട്ടത്. പുതിയ ആക്രമണത്തിൻ്റെ കാര്യത്തിൽ ട്രംപ് ഇതുവരെ അന്തിമ തീരുമാനമെടുത്തിട്ടില്ലെങ്കിലും, ആക്രമണം നടത്താൻ ആവശ്യമായ സൈനികരെ അമേരിക്കൻ സേന മേഖലയിൽ ഇതിനകം തന്നെ വിന്യസിച്ചിട്ടുണ്ട്.

ഇറാൻ്റെ റഡാറുകൾ, മിസൈൽ ലോഞ്ചറുകൾ, മറ്റ് സൈനിക കേന്ദ്രങ്ങൾ എന്നിവയ്ക്ക് നേരെയുള്ള ആക്രമണങ്ങൾക്കപ്പുറം വലിയ സൈനിക നീക്കങ്ങൾക്കാണ് തയ്യാറെടുക്കുന്നത് എന്നാണ് റിപ്പോർട്ടുകൾ ഇറാൻ്റെ ഊർജ്ജ അടിസ്ഥാന സൗകര്യങ്ങൾ, സൈനിക ക്യാമ്പുകൾ, ആണവ കേന്ദ്രങ്ങൾ എന്നിവയുൾപ്പെടെയുള്ള പട്ടിക യു.എസ് സെൻട്രൽ കമാൻഡും, പെൻ്റഗണും തയ്യാറാക്കിയതായി റിപ്പോർട്ടിൽ പറയുന്നു.

Also Read: റിയാദിൽ നിന്ന് ഇന്ത്യയിലേക്കുള്ള വിമാനങ്ങൾ സർവീസ് തുടങ്ങി; ഹെൽപ്പ് ലൈൻ നമ്പറുകൾ പുറത്തുവിട്ട് ഇന്ത്യൻ എംബസി

അമേരിക്കയിലെ ഇടക്കാല തിരഞ്ഞെടുപ്പിന് ശേഷമായിരിക്കും പുതിയ ആക്രമണങ്ങളിൽ അന്തിമ തീരുമാനമുണ്ടാവുക എന്നാണ് മുൻ സൈനിക ഉദ്യോഗസ്ഥരുടെ വിലയിരുത്തൽ എന്നും റിപ്പോർട്ടുകളുണ്ട്, ഇത്തരം സൈനിക നടപടികൾക്ക് അനുകൂല നിലപാട് സ്വീകരിക്കുകയും അവസാന നിമിഷം അതിൽ നിന്ന് പിന്മാറുകയും ചെയ്യുന്ന ട്രംപിൻ്റെ മുൻകാല രീതികളും ഉദ്യോഗസ്ഥർ മുന്നറിയിപ്പായി ചൂണ്ടിക്കാട്ടുന്നുണ്ട്. പ്രതിരോധ വകുപ്പ് ഒരു പ്ലാനിംഗ് ഓർഗനൈസേഷനാണെന്നും, പ്രസിഡൻ്റ് നിർദ്ദേശിക്കുന്ന സൈനിക സൈനിക നടപടികൾക്ക് പദ്ധതികൾ തയ്യാറാക്കുകയും നടപ്പിലാക്കുകയും ചെയ്യുക എന്നതാണ് വകുപ്പിൻ്റെ ജോലി എന്നും പെൻ്റഗണിലെ ഒരു മുതിർന്ന ഉദ്യോഗസ്ഥൻ പ്രതികരിച്ചതായി സി.എൻ.എൻ നിർപ്പോർട്ട് ചെയ്യുന്നുണ്ട്

തിരിച്ചടിക്കാൻ ഇറാനും ഹൂതികളും

അമേരിക്കയോ ഇസ്രായേലോ വീണ്ടും ആക്രമണം നടത്തിയാൽ ഇറാനും യെമനിലെ ഹൂതി വിമതരും ശക്തമായി തിരിച്ചടിക്കുമെന്ന യു.എസ് രഹസ്യാന്വേഷണ വിഭാഗത്തിൻ്റെ വിലയിരുത്തലുകളും പുറത്തുവരുന്നുണ്ട്. പുതിയ അമേരിക്കൻ ആക്രമണത്തിനുള്ള സാധ്യതയെ ഇറാനും ഹൂതികളും ഗൗരവത്തോടെയാണ് കാണുന്നതെന്ന് സോഴ്സുകളെ ഉദ്ധരിച്ച് സി.എൻ.എൻ റിപ്പോർട്ട് ചെയ്യുന്നു. ആക്രമിക്കപ്പെട്ടാൽ, മേഖലയിലുടനീളമുള്ള അമേരിക്കൻ ഉദ്യോഗസ്ഥർക്കും കേന്ദ്രങ്ങൾക്കും നേരെ ഇറാനും ഹൂതികളും അതിവേഗം പ്രത്യാക്രമണം നടത്തിയേക്കാം. ഇതിൻ്റെ പ്രത്യാഘാതങ്ങൾ പശ്ചിമേഷ്യയ്ക്ക് പുറത്തേക്കും വ്യാപിച്ചേക്കാം എന്നാണ് വിലയിരുത്തൽ.

English Summary

US forces in the Middle East are prepared to strike Iran within 96 hours if ordered by President Trump. Meanwhile, Iran and Houthi rebels threaten massive retaliation against any US-Israeli attacks.

സൗദി അറേബ്യയിലെ റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ നിന്ന് ഇന്ത്യയിലേക്കുള്ള സർവീസ് ഭാഗികമായി പുനരാരംഭിച്ചു. ദമ്മാം, ജിദ്ദ, മദീന എന്നിവിടങ്ങളിൽ നിന്ന് ഇന്ത്യയിലേക്കുള്ള വിമാന സർവീസുകൾ സൗദി എയർലൈനുകൾ സാധാരണ നിലയിൽ തുടരുന്നുണ്ടെന്നും സൗദിയിലെ ഇന്ത്യൻ എംബസി പുറത്തിറക്കിയ പ്രത്യേക വാർത്താക്കുറിപ്പിൽ അറിയിച്ചു. വിമാന സർവീസുകളിൽ പലപ്പോഴും മാറ്റങ്ങൾ ഉണ്ടാകാൻ സാധ്യതയുള്ളതിനാൽ യാത്രക്കാർ അതീവ ജാഗ്രത പാലിക്കണം. എയർപോർട്ടിലേക്ക് പുറപ്പെടുന്നതിന് മുൻപായി വിമാനങ്ങളുടെ സമയക്രമം, ടിക്കറ്റ് ബുക്കിംഗ് എന്നിവയെക്കുറിച്ചുള്ള ഏറ്റവും പുതിയ വിവരങ്ങൾ അതത് എയർലൈനുകളുമായി ബന്ധപ്പെട്ട് യാത്രക്കാർ ഉറപ്പുവരുത്തണമെന്ന് എംബസി കർശന നിർദ്ദേശം നൽകിയിട്ടുണ്ട്.

മിസൈൽ ആക്രമണങ്ങൾ തടയുന്നതിൻ്റെയോ അവ പതിക്കുന്ന സ്ഥലങ്ങളുടെയോ ചിത്രങ്ങളും വീഡിയോകളും പകർത്തുന്നതിനും സമൂഹമാധ്യമങ്ങളിൽ പങ്കുവെയ്ക്കുന്നതിനും സൗദിയിൽ കർശന വിലക്കുണ്ട്. ഇത്തരം നിയമവിരുദ്ധമായ കാര്യങ്ങൾ ചെയ്യുന്നവർക്കെതിരെ ശക്തമായ നിയമനടപടികൾ സ്വീകരിക്കുമെന്ന് സൗദി സിവിൽ ഡിഫൻസ് മുന്നറിയിപ്പ് നൽകിയിട്ടുണ്ട്. അതിനാൽ രാജ്യത്തെ നിയമങ്ങൾ പാലിക്കാൻ ഇന്ത്യക്കാർ പ്രത്യേകം ശ്രദ്ധിക്കണം. അടിയന്തര സാഹചര്യങ്ങളിൽ സൗദി അറേബ്യയുടെ നാഷണൽ ഏർലി വാണിംഗ് പ്ലാറ്റ്‌ഫോമിൽ നിന്നുള്ള മുന്നറിയിപ്പുകൾ ലഭിക്കുന്നവർ പരിഭ്രാന്തരാകാതെ ഔദ്യോഗികമായി നൽകുന്ന സുരക്ഷാ നിർദ്ദേശങ്ങൾ കൃത്യമായി പാലിക്കുകയും, അപകടസാധ്യതകൾ പൂർണ്ണമായും ഒഴിയുന്നത് വരെ സുരക്ഷിതമായ സ്ഥലങ്ങളിലേക്ക് മാറിനിൽക്കുകയും വേണമെന്നും അധികൃതർ അറിയിച്ചു.

Also Read: UAE November 2026 Updates: നവംബർ മുതൽ യു.എ.ഇ മാറുന്നു; ദുബായിലെ വേഗപരിധി ഉൾപ്പെടെയുള്ള പ്രധാന മാറ്റങ്ങളറിയാം

ഉംറ തീർത്ഥാടകർക്ക് താമസവും മറ്റ് സേവനങ്ങളുമായി ബന്ധപ്പെട്ട് എന്തെങ്കിലും ബുദ്ധിമുട്ടുകൾ നേരിട്ടാൽ സൗദി ഹജ്ജ്-ഉംറ മന്ത്രാലയത്തിൻ്റെ ഹെൽപ്പ് ലൈൻ നമ്പറായ 1966-ൽ ബന്ധപ്പെടാവുന്നതാണ്. പരാതികൾ രജിസ്റ്റർ ചെയ്യുമ്പോൾ ലഭിക്കുന്ന റഫറൻസ് നമ്പർ ഇന്ത്യൻ കോൺസുലേറ്റിൻ്റെ കൺട്രോൾ റൂമുകളിൽ അറിയിച്ചാൽ കൂടുതൽ സഹായങ്ങൾ ലഭിക്കും. ഇതിനായി ജിദ്ദയിലും മക്കയിലും 24 മണിക്കൂറും പ്രവർത്തിക്കുന്ന കോൺസുലേറ്റ് കൺട്രോൾ റൂമുകൾ സജ്ജമാക്കിയിട്ടുണ്ട്.

നിലവിൽ സർവീസ് നടത്തുന്ന വിമാന കമ്പനികളുമായി ഉംറ ടൂർ ഓപ്പറേറ്റർമാരെ ബന്ധിപ്പിക്കാൻ കോൺസുലേറ്റ് ആവശ്യമായ സൗകര്യങ്ങൾ ഒരുക്കുന്നുണ്ട്. ടിക്കറ്റ് റദ്ദാക്കൽ, റീഫണ്ട്, പുതിയ ടിക്കറ്റ് ബുക്കിംഗ് എന്നിവയുമായി ബന്ധപ്പെട്ട് യാത്രക്കാർ എയർലൈനുകളുമായും ട്രാവൽ ഏജൻ്റുമാരുമായും നിരന്തരം ബന്ധപ്പെടണം. പ്രതിസന്ധിയിലായ ഇന്ത്യക്കാരെ സുരക്ഷിതരായി നാട്ടിലെത്തിക്കാൻ ബന്ധപ്പെട്ട ഉദ്യോഗസ്ഥരുമായും സന്നദ്ധപ്രവർത്തകരുമായും ചേർന്ന് എംബസി പൂർണ്ണ പിന്തുണ നൽകുമെന്നും വ്യക്തമാക്കിയിട്ടുണ്ട്.

English Summary

The Indian Embassy in Saudi Arabia announced the partial resumption of India-bound flights from Riyadh. It urged citizens to verify flight details and warned against filming missile interceptions to avoid legal action.

ടെഹ്റാൻ: സൗദിക്ക് മേൽ ഹൂതി വിമതർ ആക്രമണം കടുപ്പിക്കുന്നതിനിടെ, വെടിനിർത്തലിനായി സൗദി അറേബ്യ 100 കോടി ഡോളർ (ഏകദേശം 8,300 കോടിയിലധികം രൂപ) വിമതർക്ക് സാമ്പത്തിക സഹായം വാഗ്ദാനം ചെയ്തതായി അന്താരാഷ്ട്ര മാധ്യമ റിപ്പോർട്ട്. ഇറാൻ വഴിയാണ് ഹൂതി വിമതർക്ക് സൗദി പണം വാഗ്ദാനം ചെയ്തത് എന്നാണ് ഇസ്രായേലി പത്രമായ 'ഇസ്രായേൽ ഹയോം' ഗൾഫ് നയതന്ത്ര കേന്ദ്രങ്ങളെ ഉദ്ധരിച്ച് പുറത്തുവിട്ട വാർത്തയിൽ പറയുന്നത്. എന്നാൽ ഇത്തരം ഒരു ഡീൽ ചർച്ച നടന്നതായി ഔദ്യോഗികമായി സ്ഥിരീകരണങ്ങളൊന്നുമില്ല. മാത്രമല്ല, സൗദിക്ക് നേരേ ഹൂതി വിമതരുടെ ആക്രമണം തുടരുകയുമാണ്. റിയാദിലെ സൗദി പ്രതിരോധ മന്ത്രാലയത്തിന് നേരെ മിസൈലാക്രമണം നടത്തിയെന്ന വാദവുമായി ഹൂതികൾ രംഗത്തെത്തിയിട്ടുണ്ട്.

റിയാദിലെ പ്രതിരോധ മന്ത്രാലയത്തെ തങ്ങളുടെ സായുധസേന ലക്ഷ്യമിട്ടെന്നും ബാലസ്റ്റിക് മിസൈലുകൾ ലക്ഷ്യസ്ഥാനത്ത് പതിച്ചതായും ഹൂതി സൈനിക വക്താവ് യഹ്യ സരീ അവകാശപ്പെട്ടു. ഹൂതികളുടെ രണ്ട് മിസൈലുകൾ വിജയകരമായി തടുത്തെന്ന സൗദിയുടെ പ്രസ്താവനക്ക് പിന്നാലെയാണ് ഹൂതികളുടെ അവകാശവാദം. ഒരു വശത്ത് ഹൂതികൾ ആക്രമണം തുടരുന്നതിനിടെ മറുവശത്ത് ഏത് വിധേനയും ആക്രമണം നിർത്താൻ സൗദി നീക്കങ്ങൾ നടത്തുന്നതായാണ് സൂചന.

Also Read: നവംബർ മുതൽ യു.എ.ഇ മാറുന്നു; ദുബായിലെ വേഗപരിധി ഉൾപ്പെടെയുള്ള പ്രധാന മാറ്റങ്ങളറിയാം

100 കോടി ഡോളർ ഓഫർ

ടെഹ്റാനിലേക്ക് നടത്തിയ അപ്രതീക്ഷിത സന്ദർശനത്തിൽ സൗദി പ്രതിരോധ മന്ത്രി ചാൾസ്/ ഖാലിദ് ബിൻ സൽമാൻ രാജകുമാരൻ 100 കോടി ഡോളർ ഓഫർ നിർദ്ദേശം മുന്നോട്ടുവച്ചു എന്നാണ് ഇസ്രായേൽ ഹയോം അ‌വകാശപ്പെടുന്നത്. സൗദി പ്രതിരോധ മന്ത്രിക്കൊപ്പം പാകിസ്ഥാൻ സൈനിക മേധാവി ഫീൽഡ് മാർഷൽ അസിം മുനീർ, തുർക്കി രഹസ്യാന്വേഷണ മേധാവി ഇബ്രാഹിം കലിൻ എന്നിവരും ടെഹ്റാനിലെ ചർച്ചകളിൽ പങ്കെടുത്തു എന്ന് ഈ റിപ്പോർട്ടിൽ പറയുന്നു.

ഹൂതികളുടെ നിയന്ത്രണത്തിലുള്ള പ്രദേശങ്ങളിലെ അടിസ്ഥാന സൗകര്യ വികസനത്തിനും പൊതുമേഖലാ ജീവനക്കാരുടെ ശമ്പള വിതരണത്തിനുമായി സൗദി നൽകുന്ന തുക വിനിയോഗിക്കും. പകരം സൗദി വിമാനത്താവളങ്ങൾക്കും എണ്ണ മേഖലകൾക്കുമെതിരെയുള്ള ആക്രമണങ്ങൾ ഹൂതികൾ പൂർണ്ണമായും നിർത്തണം എന്ന ഡീലിനാണ് ശ്രമം. ഇപ്പോൾ സൗദി വിമാനത്താവളങ്ങൾക്കും എണ്ണ ശേഖരണ ശാലകൾക്കും നേരെ ഹൂതികൾ നടത്തിവരുന്ന ഡ്രോൺ-മിസൈൽ ആക്രമണങ്ങൾ കനത്ത സാമ്പത്തിക നഷ്ടമാണ് സൗദിക്ക് വരുത്തിവയ്ക്കുന്നത്.

എന്നാൽ ഇത്തരമൊരു ഡീൽ ചർച്ച നടന്നതായി സൗദിയുടെ ഭാഗത്തുനിന്ന് സ്ഥിരീകരണം ഉണ്ടായിട്ടില്ല. മാത്രമല്ല, സൗദിയിൽ ഹൂതി ആക്രമണങ്ങൾ തുടരുകയുമാണ്. ബാബ് എൽ-മന്ദേബ് കടലിടുക്കിന്റെ തെക്കൻ മേഖലയിൽ സൗദി അനുകൂല സേനയുടെ മുന്നേറ്റത്തെ ചെറുത്തുതോൽപ്പിച്ചതായും നിരവധി സൈനിക വാഹനങ്ങൾ തകർത്തതായും ഹൂതികൾ അവകാശപ്പെട്ടു.

പ്രതിരോധ മന്ത്രാലയത്തിന് പുറമെ നജ്‌റാൻ വിമാനത്താവളത്തിലും ഖമീസ് മുശൈത്തിലെ കിങ് ഖാലിദ് എയർബേസിലുമുണ്ടായിരുന്ന രണ്ട് സൈനിക വിമാനങ്ങളെ തങ്ങൾ ആക്രമിച്ചെന്ന് ഹൂതി വക്താവ് അറിയിച്ചു. ഹോർമുസ് കടലിടുക്കിന് പടിഞ്ഞാറ് സ്ഥിതിചെയ്യുന്ന സൗദിയിലെ ഏറ്റവും വലിയ എണ്ണശുദ്ധീകരണ ശാലയായ റാസ് തനൂറയ്ക്ക് നേരെയും ബാലസ്റ്റിക് മിസൈൽ ആക്രമണം നടത്തിയതായി ഹൂതികൾ അവകാശപ്പെട്ടു. എന്നാൽ സൗദി അധികൃതർ ഇത് സ്ഥിരീകരിച്ചിട്ടില്ല.

English Summary

Amidst intensifying attacks by Houthi rebels against Saudi Arabia, international media reports suggest that Saudi Arabia has offered $1 billion (over 83 billion rupees) in financial aid to the rebels in exchange for a ceasefire. The Israeli newspaper 'Israel Hayom' reported that this offer was extended to the Houthi rebels via Iran.

ദുബായ്: തണുപ്പുകാലം ആരംഭിക്കുന്നതോടെ യു.എ.ഇയിൽ നവംബർ മാസം മുതൽ നിരവധി സുപ്രധാന മാറ്റങ്ങളാണ് പ്രാബല്യത്തിൽ വരുന്നത്. ഗതാഗത രംഗത്തെ മാറ്റങ്ങൾക്കൊപ്പം ശൈത്യകാല ക്യാമ്പിംഗും പുതിയ യാത്രാ സംവിധാനങ്ങളും ഉൾപ്പെടുന്നതാണ് നവംബറിലെ കലണ്ടർ. യു.എ.ഇ നിവാസികൾ തീർച്ചയായും അറിഞ്ഞിരിക്കേണ്ട ചില പ്രധാന കാര്യങ്ങളാണ് ഇനി പറയുന്നത്.

ദുബായിലെ അഞ്ച് റോഡുകളിൽ വേഗപരിധി മാറും

• ദുബായിലെ അഞ്ച് പ്രധാന റോഡുകളിലെ വേഗപരിധിയിൽ മാറ്റം വരുത്തിയത് നവംബർ 1 മുതൽ പ്രാബല്യത്തിൽ വരും. വാഹനമോടിക്കുന്നവർ ഈ മാറ്റങ്ങൾ പ്രത്യേകം ശ്രദ്ധിക്കണം.
• അൽ റീബാത്ത് സ്ട്രീറ്റ്: മാരക്കേഷ് സ്ട്രീറ്റിനും ഷെയ്ഖ് മുഹമ്മദ് ബിൻ സായിദ് റോഡിനും ഇടയിൽ വേഗപരിധി മണിക്കൂറിൽ 100 കിലോമീറ്ററിൽ നിന്ന് 90 കിലോമീറ്ററായി കുറച്ചു.
• ഷെയ്ഖ് സബാഹ് അൽ അഹമ്മദ് അൽ ജാബർ അൽ സബാഹ് സ്ട്രീറ്റ്: സെക്കൻഡ് ഡിസംബർ സ്ട്രീറ്റിനും ഖാലിദ് ബിൻ അൽ വലീദ് സ്ട്രീറ്റിനും ഇടയിൽ വേഗപരിധി 80ൽ നിന്ന് 70 ആയി കുറച്ചിട്ടുണ്ട്.
• അൽ അസായൽ സ്ട്രീറ്റ്: ഔദ് മേത്ത സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിലുള്ള വേഗപരിധി 60-ൽ നിന്ന് 80 കിലോമീറ്ററായി ഉയർത്തി.
• അൽ മുസ്തഖ്ബാൽ സ്ട്രീറ്റ്: ഷെയ്ഖ് റാഷിദ് സ്ട്രീറ്റിനും അൽ മെയ്ദാൻ സ്ട്രീറ്റിനും ഇടയിൽ വേഗപരിധി 60-ൽ നിന്ന് 70 ആയി വർധിപ്പിച്ചു.
• ലത്തീഫ ബിൻത് ഹംദാൻ സ്ട്രീറ്റ്: ഷെയ്ഖ് സായിദ് റോഡിനും അൽ ഖൈൽ റോഡിനും ഇടയിലുള്ള ഭാഗത്ത് വേഗപരിധി 60ൽ നിന്ന് 70 കിലോമീറ്ററായി കൂട്ടിയിട്ടുണ്ട്.

Also Read: Dubai Traffic Alert: ദുബായിൽ എമിറേറ്റ്സ് റോഡിലും എയർപോർട്ട് ടണലിലും ഗതാഗത നിയന്ത്രണം: അറിയേണ്ടതെല്ലാം

ദുബായിൽ വിൻ്റർ ക്യാമ്പിംഗ് സീസൺ

ദുബായ് മുൻസിപ്പാലിറ്റിയുടെ നേതൃത്വത്തിലുള്ള 2026–2027 ശൈത്യകാല ക്യാമ്പിംഗ് സീസണിന് നവംബർ 1-ന് തുടക്കമാകും. അൽ റുവയ്യയിൽ ഒരുക്കിയിരിക്കുന്ന ക്യാമ്പിംഗ് 2027 ഏപ്രിൽ 30 വരെ നീണ്ടുനിൽക്കും. 600 ക്യാമ്പുകൾക്ക് പുറമെ, കാരവൻ പ്ലോട്ടുകളും ഡെയ്‌ലി റെൻ്റൽ ക്യാമ്പുകളും പുതിയതായി ഉൾപ്പെടുത്തിയിട്ടുണ്ട്.

പുതിയ ഇത്തിഹാദ് റെയിൽ സ്റ്റേഷനുകൾ

അബുദാബി അൽ ദഫ്ര മേഖലയിലേക്ക് യാത്ര ചെയ്യുന്നവർക്കായി ഇത്തിഹാദ് റെയിലിൻ്റെ രണ്ട് പുതിയ പാസഞ്ചർ സ്റ്റേഷനുകൾ നവംബർ 30-ന് പ്രവർത്തനമാരംഭിക്കും. സായിദ് സിറ്റി, ലിവാ എന്നിവിടങ്ങളിലാണ് പുതിയ സ്റ്റേഷനുകൾ വരുന്നത്. ഈ പ്രദേശത്തെ ഉത്സവ സീസണോട് അനുബന്ധിച്ച് നേരത്തെ തുറക്കുന്ന ഈ സ്റ്റേഷനുകൾ അബുദാബിയുടെ പടിഞ്ഞാറൻ മേഖലകളിലേക്കുള്ള യാത്രാസൗകര്യം കൂടുതൽ സുഗമമാക്കും.

English Summary

The UAE introduces major changes this November, including revised speed limits on five Dubai roads, the start of winter camping, two new Etihad Rail stations

ആര്‍ട്ടിഫിഷ്യല്‍ ഇന്റലിജന്‍സ് (എഐ) മേഖലയിലെ നിക്ഷേപം ശക്തമാക്കുന്നതിനിടെ ചെലവുകള്‍ നിയന്ത്രിക്കാനുള്ള നീക്കവുമായി ടെക് ഭീമനായ മൈക്രോസോഫ്റ്റ്. കമ്പനിയിലെ ഏകദേശം 60,000 ജീവനക്കാര്‍ക്ക് സ്വമേധയാ ജോലി വിടാനുള്ള അവസരമാണ് മൈക്രോസോഫ്റ്റ് പ്രഖ്യാപിച്ചിരിക്കുന്നത്. ആഗോളതലത്തിലെ കമ്പനിയുടെ ആകെ ജീവനക്കാരുടെ ഏകദേശം 27 ശതമാനത്തോളം പേര്‍ക്ക് ഈ പദ്ധതിയുടെ ഭാഗമാകാന്‍ അര്‍ഹതയുണ്ടാകുമെന്നാണ് റിപ്പോര്‍ട്ട്.

ഇന്ത്യയിലെ ജീവനക്കാര്‍ക്കും അവസരം

അമേരിക്ക, കാനഡ, ഇന്ത്യ, ബ്രിട്ടന്‍ എന്നിവിടങ്ങളിലെ തിരഞ്ഞെടുത്ത വിഭാഗങ്ങളിലുള്ള ജീവനക്കാര്‍ക്കാണ് ഈ ആനുകൂല്യം ലഭിക്കുക. വൈസ് പ്രസിഡന്റ് പദവിയിലും അതിന് താഴെയുമുള്ള ജീവനക്കാരെ പദ്ധതിയില്‍ ഉള്‍പ്പെടുത്തിയിട്ടുണ്ട്. എന്നാല്‍ കമ്പനിയിലെ എല്ലാ ജീവനക്കാര്‍ക്കും ഈ അവസരം ലഭിക്കില്ല. ഡാറ്റാ സെന്ററുകളുമായി ബന്ധപ്പെട്ട ചില വിഭാഗങ്ങള്‍, സെയില്‍സ്, മാര്‍ക്കറ്റിങ് തുടങ്ങിയ മേഖലകളിലെ ജീവനക്കാരെ പദ്ധതിയില്‍നിന്ന് ഒഴിവാക്കിയിട്ടുണ്ട്.

ജീവനക്കാര്‍ക്ക് സാമ്പത്തിക പിന്തുണയോടെയും കരിയര്‍ ആസൂത്രണത്തിനുള്ള സഹായത്തോടെയും കമ്പനിയില്‍നിന്ന് മാറാന്‍ അവസരമൊരുക്കുകയാണ് പദ്ധതിയുടെ ലക്ഷ്യമെന്ന് മൈക്രോസോഫ്റ്റ് ചീഫ് പീപ്പിള്‍ ഓഫീസര്‍ ആമി കോള്‍മാന്‍ ജീവനക്കാര്‍ക്കയച്ച സന്ദേശത്തില്‍ വ്യക്തമാക്കി. കമ്പനിയുടെ മാറിവരുന്ന ആവശ്യങ്ങള്‍ക്കനുസരിച്ച് തൊഴില്‍സംഘടനയില്‍ കൂടുതല്‍ വഴക്കമുള്ള സമീപനം സ്വീകരിക്കുന്നതിന്റെ ഭാഗമായാണ് ഈ നീക്കം.

ഈ വര്‍ഷം രണ്ടാമത്തെ സ്വമേധയാ വിരമിക്കല്‍ പദ്ധതി

2026ല്‍ ജീവനക്കാര്‍ക്ക് സ്വമേധയാ ജോലി വിടാനുള്ള അവസരം മൈക്രോസോഫ്റ്റ് നല്‍കുന്നത് ഇത് രണ്ടാം തവണയാണ്. നേരത്തെ ഏപ്രിലില്‍ അമേരിക്കയിലെ ജീവനക്കാരില്‍ ഒരു വിഭാഗത്തിന് നേരത്തേ വിരമിക്കാനുള്ള പദ്ധതി കമ്പനി അവതരിപ്പിച്ചിരുന്നു. അന്ന് അര്‍ഹതയുണ്ടായിരുന്നവരില്‍ ഏകദേശം 30 ശതമാനം പേര്‍ പദ്ധതി സ്വീകരിച്ചതായാണ് റിപ്പോര്‍ട്ടുകള്‍.

Also Read: Dubai Traffic Alert: ദുബായിൽ എമിറേറ്റ്സ് റോഡിലും എയർപോർട്ട് ടണലിലും ഗതാഗത നിയന്ത്രണം: അറിയേണ്ടതെല്ലാം

എഐ നിക്ഷേപവും ചെലവ് നിയന്ത്രണവും

കമ്പനിയുടെ ജീവനക്കാരുടെ എണ്ണത്തില്‍ കഴിഞ്ഞ കുറച്ചുകാലമായി മാറ്റങ്ങള്‍ സംഭവിക്കുന്നുണ്ട്. 2025 അവസാനത്തോടെ ആഗോളതലത്തില്‍ 2,28,000 ജീവനക്കാരുണ്ടായിരുന്ന മൈക്രോസോഫ്റ്റില്‍ 2026 ജൂണ്‍ അവസാനത്തോടെ ഇത് 2,23,000 ആയി കുറഞ്ഞു. അതേസമയം, എഐ സാങ്കേതികവിദ്യയിലും അതിന് ആവശ്യമായ ഡാറ്റാ സെന്റര്‍ അടിസ്ഥാനസൗകര്യങ്ങളിലും കമ്പനി വന്‍തോതില്‍ നിക്ഷേപം നടത്തിവരികയാണ്.

എഐ മേഖലയിലെ വളര്‍ച്ചയ്ക്കായി കൂടുതല്‍ വിഭവങ്ങള്‍ വിനിയോഗിക്കുമ്പോള്‍ ജീവനക്കാരുമായി ബന്ധപ്പെട്ട ചെലവുകള്‍ നിയന്ത്രിക്കാനുള്ള ശ്രമമായും ഈ നീക്കത്തെ വിലയിരുത്താം. എന്നാല്‍ എഐയുടെ വരവ് മാത്രമാണ് ഈ പദ്ധതിക്ക് പിന്നിലെ കാരണമെന്ന് കമ്പനി വ്യക്തമാക്കിയിട്ടില്ല.

English Summary

Microsoft is reportedly offering voluntary exit packages to around 60,000 eligible employees as the company increases its investments in artificial intelligence. The initiative is part of its workforce planning strategy, with selected employees in several countries, including India, eligible for the scheme.

ദുബായ്: ദുബായിലെ എമിറേറ്റ്സ് റോഡിലും (E611), അൽ മക്തൂം അന്താരാഷ്ട്ര വിമാനത്താവളത്തിലേക്കുള്ള ടണലിലും ആറ് ദിവസത്തെ ഗതാഗത നിയന്ത്രണം ഏർപ്പെടുത്തി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി. ഡ്രൈവറില്ലാ ടാക്സികളുടെ പരീക്ഷണയോട്ടം നടക്കുന്നതിനാലാണ്. ഗതാഗത നിനിയന്ത്രണം എന്ന് ആർ.ടി,എ വ്യക്തമാക്കി. ഒക്ടോബർ 26 തിങ്കളാഴ്ച മുതൽ ഒക്ടോബർ 31 ശനിയാഴ്ച വരെ എല്ലാ ദിവസവും രാവിലെ 9 മണി മുതൽ വൈകുന്നേരം 4 മണി വരെയാണ് നിയന്ത്രണം ഏർപ്പെടുത്തിയിരിക്കുന്നത്.

അൽ മക്തും വിമാനത്താവളത്തിന് എതിർവശത്തുള്ള എമിറേറ്റ് റോഡിലെ (E611) മൂന്ന് ട്രാക്കുകളും അടച്ചിടും. കൂടാതെ അൽ മക്തൂം ഇൻ്റർനാഷ്ണൽ എയർ പോർട്ട് ടണൽ ഇരുദിശകളിലേക്കും പൂർണമായും അടച്ചിടുമെന്നും ആർ.ടി.എ അറിയിച്ചു. ഈ റോഡുകൾ പതിവായി ഉപയോഗിക്കുന്നവരും. അൽ മക്തും അന്താരാഷ്ട്ര വിമാനത്താവളത്തിലേക്ക് യാത്ര ചെയ്യുന്നവരും നിയന്ത്രണങ്ങളുടെ പശ്ചാത്തലത്തിൽ തങ്ങളുടെ യാത്ര മുൻകുട്ടി പ്ലാൻ ചെയ്യണമെന്നും യാത്രക്കായി അധിക സമയം കണക്കാക്കണമെന്നും അധികൃതർ നിർദ്ദേശം നൽകിയിട്ടൂണ്ട്.

Also Read: Umrah Pilgrims: സൗദിയിൽ കുടുങ്ങിയ ഉംറ തീർഥാടകർക്ക് ആശ്വാസം; താമസവും ഭക്ഷണവും ഉറപ്പാക്കാൻ ഇന്ത്യ

യാത്രകൾക്കായി ബദൽ പാതകളായി ഷെയ്ഖ് മുഹമ്മദ് ബിസ് സായിദ് റോഡ് (E311), അൽ ഖൈർ റോഡ് (E44), ഷെയ്ഖ് സായിദ് റോഡ് (E11) തുടങ്ങിയ മറ്റു പ്രധാന പാതകൾ ഉപയോഗിക്കാവുന്നതാണ്. എന്നാൽ യാത്ര പുറപ്പെടുന്നതിന് മുൻപ് ലൈവ് നാവിഗേഷൻ വഴി ഗതാഗതക്കുരുക്കുകൾ പരിശോധിച്ച് അനുയോജ്യമായ പാത തിരഞ്ഞെടുക്കാൻ പ്രത്യേകം ശ്രദ്ധിക്കണം. വിമാനത്താവളത്തിലേക്ക് പുറപ്പെടുന്നവർ യാത്ര നെരത്തെ ആരംഭിക്കൻ ശ്രദ്ധിക്കണം. മെട്രോ ബസ് തുടങ്ങിയ പൊതുഗതാഗത സംവിധാനങ്ങൾ ഉപയോഗിക്കുന്നത് ഗതാഗതക്കുരുക്ക് ഒഴിവാക്കാൻ സഹായിക്കും

എന്നാൽ അൽ മക്തും വിമാനത്താവളത്തിലേക്ക് നേരിട്ട് മെട്രോ സർവീസ് ഇല്ലാത്തതിനാൽ യാത്രക്കാർ മറ്റു കണക്ടിവിറ്റികൾ മുൻകൂട്ടി ഉറപ്പാക്കേണ്ടതുണ്ട്. ദുബായിലെ ഗതാഗത സംവിധാനങ്ങളെ സ്മാർട്ട് മൊബിലിറ്റിയിലേക്ക് മാറ്റുന്നതിൻ്റെ ഭാഗമായാണ് ഡ്രൈവറില്ലാ ടാക്സികൾ ഹൈവേകളിൽ പരീക്ഷിക്കുന്നത്. ഉമ്മു സുഖീം, ജുമൈറ തുടങ്ങിയ പ്രദേശങ്ങളിൽ ഡ്രൈവറില്ലാ ടാക്സികൾ ഇതിനകം തന്നെ സർവീസ് ആരംഭിച്ചിട്ടുണ്ട്. ‘അപ്പോളോ ഗോ ആപ്പ്’, ‘യൂബർ’ എന്നിവ വഴി യാത്രക്കാർക്ക് ഡ്രൈവറില്ലാ വാഹനങ്ങളുടെ സേവനം പ്രയോജനപ്പെടുത്താവുന്നതാണ്. 2030-ഓടെ ദുബായിലെ ഗതാഗതത്തിൻ്റെ 25 ശതമാനം ഡ്രൈവറില്ലാ വാഹനങ്ങളാക്കി മാറ്റുക എന്നതാണ് ലക്ഷ്യം.

English Summary

Dubai’s RTA announced traffic restrictions on Emirates Road (E611) and the Al Maktoum Airport Tunnel from October 26 to 31 for autonomous taxi testing, urging motorists to seek alternative routes.

യെമനിലെ ഹൂതി വിമതരുടെ തുടര്‍ച്ചയായ ആക്രമണ ഭീഷണികള്‍ക്കിടെ സൗദി അറേബ്യയിലെ റിയാദിലുള്ള കിങ് ഖാലിദ് അന്താരാഷ്ട്ര വിമാനത്താവളം വീണ്ടും തുറന്നു. രണ്ടാഴ്ചയിലേറെ നീണ്ട അടച്ചിടലിന് ശേഷമാണ് ഒക്ടോബര്‍ 25 ഞായറാഴ്ച വിമാനത്താവളത്തിലെ രണ്ട് ടെര്‍മിനലുകള്‍ പ്രവര്‍ത്തനം പുനരാരംഭിച്ചത്. എന്നാല്‍ സുരക്ഷാ ആശങ്കകള്‍ നിലനില്‍ക്കുന്നതിനാല്‍ വിമാനസര്‍വീസുകള്‍ സാധാരണ നിലയിലായിട്ടില്ല.

സര്‍വീസുകള്‍ക്ക് പ്രത്യേക ടെര്‍മിനലുകള്‍

വിമാനത്താവള അധികൃതരുടെ അറിയിപ്പ് പ്രകാരം ടെര്‍മിനല്‍ ഒന്നിലൂടെ ആഭ്യന്തര സര്‍വീസുകളും ടെര്‍മിനല്‍ രണ്ടിലൂടെ സൗദി വിമാനക്കമ്പനികള്‍ നടത്തുന്ന അന്താരാഷ്ട്ര സര്‍വീസുകളുമാണ് ക്രമീകരിച്ചിരിക്കുന്നത്. വിമാനത്താവളം വീണ്ടും തുറന്നെങ്കിലും ഞായറാഴ്ച വളരെ കുറച്ച് വിമാനങ്ങള്‍ മാത്രമാണ് സര്‍വീസ് നടത്തിയതെന്ന് വിമാന നിരീക്ഷണ സംവിധാനമായ ഫ്‌ളൈറ്റ്റഡാര്‍24-ന്റെ വിവരങ്ങള്‍ വ്യക്തമാക്കുന്നു. യാത്രക്കാര്‍ വിമാനത്താവളത്തിലേക്ക് പുറപ്പെടുന്നതിന് മുമ്പ് ടിക്കറ്റ് ബുക്ക് ചെയ്ത വിമാനക്കമ്പനിയുമായി ബന്ധപ്പെട്ട് സര്‍വീസിന്റെ നിലവിലെ സ്ഥിതി ഉറപ്പാക്കണമെന്ന് അധികൃതര്‍ നിര്‍ദേശിച്ചിട്ടുണ്ട്.

ഒക്ടോബര്‍ 10ലെ ആക്രമണത്തിന് പിന്നാലെ അടച്ചിട്ടു

ഒക്ടോബര്‍ 10ന് വിമാനത്താവളത്തിന് നേരെയുണ്ടായ ആക്രമണത്തെ തുടര്‍ന്നാണ് പ്രവര്‍ത്തനം നിര്‍ത്തിവെച്ചത്. ഹൂതികള്‍ ഉത്തരവാദിത്തം ഏറ്റെടുത്ത ആക്രമണത്തില്‍ 13 പേര്‍ കൊല്ലപ്പെടുകയും 300ലധികം പേര്‍ക്ക് പരിക്കേല്‍ക്കുകയും ചെയ്തതായി റിപ്പോര്‍ട്ടുകളുണ്ട്. സൗദി അറേബ്യയില്‍ ഒരു ദശാബ്ദത്തിലേറെയായി ഉണ്ടായ ഏറ്റവും മാരകമായ ആക്രമണങ്ങളിലൊന്നായിരുന്നു ഇത്.

Also Read: Umrah Pilgrims: സൗദിയിൽ കുടുങ്ങിയ ഉംറ തീർഥാടകർക്ക് ആശ്വാസം; താമസവും ഭക്ഷണവും ഉറപ്പാക്കാൻ ഇന്ത്യ

ഈ മാസം ആദ്യം മുതല്‍ വിമാനത്താവളത്തെ ലക്ഷ്യമിട്ട് നിരവധി ഡ്രോണ്‍, മിസൈല്‍ ആക്രമണങ്ങള്‍ നടന്നതായി സൗദിയുടെ നേതൃത്വത്തിലുള്ള സഖ്യസേനയും അറിയിച്ചിരുന്നു. കഴിഞ്ഞയാഴ്ച പരിമിതമായ ആഭ്യന്തര സര്‍വീസുകള്‍ പുനരാരംഭിച്ചെങ്കിലും അന്താരാഷ്ട്ര സര്‍വീസുകള്‍ക്കായി ടെര്‍മിനലുകള്‍ തുറന്നത് ഞായറാഴ്ചയാണ്.

ആക്രമണം നടത്തുമെന്ന് ഹൂതികളുടെ മുന്നറിയിപ്പ്

വിമാനത്താവളം തുറന്നതിന് പിന്നാലെയും ആക്രമണ ഭീഷണി പിന്‍വലിക്കാന്‍ ഹൂതികള്‍ തയാറായിട്ടില്ല. റിയാദ് വിമാനത്താവളം സുരക്ഷിതമല്ലെന്നും അത് സൈനിക ലക്ഷ്യമാണെന്നും ഹൂതി സൈനിക വക്താവ് യഹ്യ സരീ മുന്നറിയിപ്പ് നല്‍കി. വിമാനക്കമ്പനികളും ജീവനക്കാരും യാത്രക്കാരും വിമാനത്താവളം ഉപയോഗിക്കുന്നത് ഒഴിവാക്കണമെന്നും അദ്ദേഹം ആവശ്യപ്പെട്ടു.

അതേസമയം, റിയാദിനെ ലക്ഷ്യമാക്കി എത്തിയ ഡ്രോണുകളും മിസൈലുകളും പ്രതിരോധ സംവിധാനങ്ങള്‍ ഉപയോഗിച്ച് തടഞ്ഞതായി സൗദി അധികൃതര്‍ അറിയിച്ചു. തെക്കന്‍ സൗദിയിലെ ഖമീസ് മുഷൈത്ത്, അഹദ് റഫീദ എന്നിവിടങ്ങളില്‍ തടഞ്ഞ ബാലിസ്റ്റിക് മിസൈലുകളുടെ അവശിഷ്ടങ്ങള്‍ പതിച്ചതിനെ തുടര്‍ന്ന് രണ്ടുപേര്‍ക്ക് പരിക്കേല്‍ക്കുകയും വീടുകള്‍ക്കും വാഹനങ്ങള്‍ക്കും കേടുപാടുകള്‍ സംഭവിക്കുകയും ചെയ്തതായി സിവില്‍ ഡിഫന്‍സ് വ്യക്തമാക്കി.

English Summary

Riyadh’s King Khalid International Airport has reopened after a temporary closure amid Houthi attack threats. Flight operations remain limited as security concerns persist, while travellers are advised to check with airlines for the latest service updates.

സൗദി അറേബ്യയില്‍ വിമാന സര്‍വീസുകള്‍ റദ്ദാക്കിയതിനെ തുടര്‍ന്ന് യാത്രാപ്രതിസന്ധി നേരിടുന്ന ഇന്ത്യന്‍ പൗരന്മാര്‍ക്കും ഉംറ തീര്‍ഥാടകര്‍ക്കും സഹായം ഉറപ്പാക്കാന്‍ ഇന്ത്യയുടെ പുതിയ ഇടപെടല്‍. തീര്‍ഥാടകരുടെ മടക്കയാത്ര വേഗത്തിലാക്കുന്നതിനായി സൗദി അധികൃതരുമായും വിമാനക്കമ്പനികളുമായും ഇന്ത്യന്‍ കോണ്‍സുലേറ്റ് ഏകോപനം നടത്തിവരികയാണ്. ഭക്ഷണം, അവശ്യ മരുന്നുകള്‍, മറ്റ് അടിയന്തര സഹായങ്ങള്‍ എന്നിവയും ലഭ്യമാക്കുന്നുണ്ട്. പശ്ചിമേഷ്യയിലെ സംഘര്‍ഷാവസ്ഥയും വിമാന സര്‍വീസുകളിലെ തടസങ്ങളും തുടരുന്ന സാഹചര്യത്തിലാണ് പുതിയ നിര്‍ദേശം.

ജിദ്ദയിലും മക്കയിലും 24 മണിക്കൂര്‍ സഹായകേന്ദ്രങ്ങള്‍

ജിദ്ദയിലെ ഇന്ത്യന്‍ കോണ്‍സുലേറ്റിന്റെ നേതൃത്വത്തില്‍ ജിദ്ദയിലും മക്കയിലും പ്രവര്‍ത്തിക്കുന്ന 24 മണിക്കൂര്‍ സഹായകേന്ദ്രങ്ങള്‍ വഴി പ്രതിസന്ധിയിലായ ഇന്ത്യക്കാര്‍ക്ക് സഹായം നല്‍കുന്നുണ്ട്. ഇന്ത്യന്‍ പ്രവാസി സംഘടനകളുടെയും സന്നദ്ധപ്രവര്‍ത്തകരുടെയും സഹകരണത്തോടെയാണ് ഭക്ഷണം, അവശ്യ മരുന്നുകള്‍, മറ്റ് അടിയന്തര ആവശ്യങ്ങള്‍ എന്നിവ ലഭ്യമാക്കുന്നത്.

വിമാനങ്ങള്‍ റദ്ദാക്കിയതുമൂലം മടക്കയാത്ര മുടങ്ങിയവരെ നാട്ടിലെത്തിക്കുന്നതിനായി സൗദി അറേബ്യയുടെ ഹജ്ജ്, ഉംറ മന്ത്രാലയവുമായും വിദേശകാര്യ മന്ത്രാലയവുമായും കോണ്‍സുലേറ്റ് നിരന്തരം ബന്ധപ്പെടുന്നുണ്ട്. വിസയുടെ കാലാവധി, യാത്ര വൈകുന്നത് തുടങ്ങിയ പ്രശ്‌നങ്ങള്‍ പരിഹരിക്കാനും ശ്രമം തുടരുകയാണ്.

Also Read: Houthi Attack: മക്കയിലും മദീനയിലും മിസൈൽ അവശിഷ്ടങ്ങൾ പതിച്ചു; സൗദിയിൽ ആശങ്ക

താമസസൗകര്യത്തിന് ബുദ്ധിമുട്ടുണ്ടോ?

വിമാനങ്ങള്‍ റദ്ദാക്കിയതിനെ തുടര്‍ന്ന് സൗദിയില്‍ കൂടുതല്‍ ദിവസം തങ്ങേണ്ടിവരുന്ന ഉംറ തീര്‍ഥാടകര്‍ക്ക് താമസസൗകര്യമോ മറ്റ് സേവനങ്ങളോ ലഭിക്കുന്നതില്‍ ബുദ്ധിമുട്ടുണ്ടെങ്കില്‍ സൗദി ഹജ്ജ്, ഉംറ മന്ത്രാലയത്തിന്റെ പില്‍ഗ്രിം കെയര്‍ സെന്ററുമായി ബന്ധപ്പെടാം. 1966 എന്ന നമ്പറില്‍ വിളിച്ച് പരാതി രജിസ്റ്റര്‍ ചെയ്യാനും പരാതിയുടെ റഫറന്‍സ് നമ്പര്‍ നേടാനും നിര്‍ദേശമുണ്ട്.

ബദല്‍ വിമാനസര്‍വീസുകള്‍

ഇന്ത്യയിലേക്ക് സര്‍വീസ് നടത്തുന്ന വിമാനക്കമ്പനികളുമായി കോണ്‍സുലേറ്റ് ബന്ധപ്പെടുന്നുണ്ട്. ലഭ്യമായ സീറ്റുകള്‍, ടിക്കറ്റ് നിരക്ക്, വിമാനക്കമ്പനികളുടെ മറ്റ് നിബന്ധനകള്‍ എന്നിവയ്ക്ക് വിധേയമായി ബദല്‍ യാത്രാസൗകര്യങ്ങള്‍ ഒരുക്കുന്നതിനായി ഇന്ത്യന്‍ ഉംറ ടൂര്‍ ഓപ്പറേറ്റര്‍മാരെയും സര്‍വീസ് നടത്തുന്ന വിമാനക്കമ്പനികളെയും തമ്മില്‍ ബന്ധിപ്പിക്കുന്നുണ്ട്.

English Summary

India has announced support measures for Umrah pilgrims stranded in Saudi Arabia amid flight disruptions. The Indian Consulate in Jeddah is coordinating with Saudi authorities and airlines to help pilgrims access accommodation, food, essential medicines and alternative travel arrangements.

സൗദി അറേബ്യയിലെ മക്കയിലും മദീനയിലും മിസൈല്‍ അവശിഷ്ടങ്ങള്‍ വീണതായി റിപ്പോര്‍ട്ട്. യെമനിലെ ഹൂതി വിമതര്‍ നടത്തിയ ആക്രമണത്തിനിടെ രണ്ട് ബാലിസ്റ്റിക് മിസൈലുകള്‍ സൗദി പ്രതിരോധസേന തകര്‍ത്തതിന് പിന്നാലെയാണ് വിവിധ പ്രദേശങ്ങളില്‍ അവശിഷ്ടങ്ങള്‍ പതിച്ചത്. മക്കയ്ക്ക് പുറമെ ജിദ്ദ, ത്വാഇഫ് തുടങ്ങിയ മേഖലകളിലും അവശിഷ്ടങ്ങള്‍ വീണതായാണ് വിവരം. സംഭവത്തെക്കുറിച്ച് സൗദി അധികൃതര്‍ കൂടുതല്‍ അന്വേഷണം നടത്തിവരികയാണ്.

മക്കയ്ക്ക് സമീപവും ജിദ്ദയിലും ത്വാഇഫിലും അവശിഷ്ടങ്ങള്‍

സൗദി സിവില്‍ ഡിഫന്‍സിന്റെ അറിയിപ്പ് പ്രകാരം, മക്ക, മദീന മേഖലകളിലേക്ക് ഹൂതി വിമതര്‍ വിക്ഷേപിച്ച രണ്ട് ബാലിസ്റ്റിക് മിസൈലുകളാണ് പ്രതിരോധ സംവിധാനങ്ങള്‍ തടഞ്ഞത്. തുടര്‍ന്ന് മിസൈലുകളുടെ ഭാഗങ്ങള്‍ വിവിധ ഇടങ്ങളില്‍ പതിക്കുകയായിരുന്നു.

മക്കയ്ക്ക് പുറത്തുള്ള വാദി അല്‍ മുഗമ്മസ്, ജിദ്ദയിലെ അല്‍ നുസ്ഹ പ്രദേശം, ത്വാഇഫിലെ വാദി ജലീല്‍, റാബിഖ് മേഖലയിലെ മസ്തൂറ എന്നിവിടങ്ങളിലാണ് അവശിഷ്ടങ്ങള്‍ കണ്ടെത്തിയത്. സംഭവത്തില്‍ ആളപായമോ നാശനഷ്ടങ്ങളോ ഉണ്ടായതിനെക്കുറിച്ച് വ്യക്തമായ വിവരങ്ങള്‍ അധികൃതര്‍ പുറത്തുവിട്ടിട്ടില്ല.

നാല് പ്രവിശ്യകളില്‍ ജാഗ്രതാ നിര്‍ദേശം

സംഭവത്തിന് മണിക്കൂറുകള്‍ക്ക് മുമ്പ് സൗദി അറേബ്യയുടെ പടിഞ്ഞാറന്‍ മേഖലയിലെ നാല് പ്രവിശ്യകളില്‍ അപകടസാധ്യതയുണ്ടെന്ന് സിവില്‍ ഡിഫന്‍സ് മുന്നറിയിപ്പ് നല്‍കിയിരുന്നു. മക്ക, ജിദ്ദ, ത്വാഇഫ്, യാന്‍ബു എന്നിവിടങ്ങളിലെ ജനങ്ങളോട് സുരക്ഷിതമായ സ്ഥലങ്ങളിലേക്ക് മാറാനും നിര്‍ദേശിച്ചിരുന്നു. പിന്നീട് അപകടസാധ്യത അവസാനിച്ചതായി അധികൃതര്‍ അറിയിച്ചു.

Also Read: ഇറാൻ യുദ്ധത്തിന് പിന്നാലെ ക്യൂബയിലേക്ക് കണ്ണുനട്ട് ട്രംപ്; അമേരിക്കൻ യുദ്ധക്കപ്പലുകൾ തീരത്തെത്തുമെന്ന് സൂചന

അതേസമയം, സൗദിയിലെ വിമാനത്താവളങ്ങള്‍, എണ്ണസംസ്‌കരണ കേന്ദ്രങ്ങള്‍, സൈനിക താവളങ്ങള്‍ എന്നിവ ലക്ഷ്യമിട്ട് ആക്രമണം നടത്തിയതായി ഹൂതി സൈനിക വക്താവ് യഹ്യ സരീ അവകാശപ്പെട്ടു. റിയാദിലെ കിങ് ഖാലിദ് അന്താരാഷ്ട്ര വിമാനത്താവളം, ദമ്മാം, നജ്‌റാന്‍ മേഖലകളിലെ വിമാനത്താവളങ്ങള്‍, ഖമീസ് മുഷൈത്തിലെ വ്യോമതാവളം എന്നിവ ലക്ഷ്യങ്ങളില്‍ ഉള്‍പ്പെട്ടതായാണ് ഹൂതികളുടെ വാദം. എണ്ണ പമ്പിങ് കേന്ദ്രങ്ങളും കിഴക്ക്-പടിഞ്ഞാറന്‍ എണ്ണ പൈപ്പ്ലൈനും ലക്ഷ്യമിട്ടതായും അവര്‍ അവകാശപ്പെട്ടു. എന്നാല്‍ ഈ ലക്ഷ്യങ്ങളില്‍ എത്രത്തോളം നാശനഷ്ടമുണ്ടായെന്ന് സ്ഥിരീകരിച്ചിട്ടില്ല.

മക്കയെയും മദീനയെയും ലക്ഷ്യമിട്ടിട്ടില്ലെന്ന് ഹൂതികള്‍

മക്കയിലേക്കും മദീനയിലേക്കും ആക്രമണം നടത്തിയെന്ന ആരോപണം ഹൂതികള്‍ നിഷേധിച്ചതായും റിപ്പോര്‍ട്ടുകളുണ്ട്. സൗദിയിലെ എണ്ണ അടിസ്ഥാനസൗകര്യങ്ങളും സൈനിക കേന്ദ്രങ്ങളുമാണ് തങ്ങളുടെ ആക്രമണങ്ങളുടെ ലക്ഷ്യമെന്നാണ് അവര്‍ വ്യക്തമാക്കിയത്.

English Summary

Saudi Arabia reported that missile debris fell in Mecca, Medina and other areas after its defence systems intercepted two ballistic missiles linked to a Houthi attack. Authorities issued security warnings in several regions amid rising tensions in the region.

വാഷിങ്ടണ്‍: ഇറാനുമായുള്ള യുദ്ധത്തിന് പിന്നാലെ ക്യൂബയുടെ കാര്യത്തില്‍ ഇടപെടുമെന്ന സൂചന നല്‍കി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഇറാനില്‍ നിന്ന് മടങ്ങുന്ന അമേരിക്കന്‍ യുദ്ധക്കപ്പലുകള്‍ ക്യൂബയുടെ തീരത്തിന് സമീപം നിര്‍ത്തിയേക്കുമെന്നും തുടര്‍ന്ന് യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ കരാര്‍ പൂര്‍ത്തിയാക്കാന്‍ ഇടപെടുമെന്നുമാണ് ട്രംപിന്റെ പരാമര്‍ശം. ഫ്‌ളോറിഡയില്‍ നടന്ന തിരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം. ക്യൂബയുമായി ബന്ധപ്പെട്ട അമേരിക്കയുടെ നിലപാട് കൂടുതല്‍ കടുപ്പിക്കുന്നതിന്റെ സൂചനയായാണ് ഈ പ്രസ്താവന വിലയിരുത്തപ്പെടുന്നത്.

ഇറാനില്‍ നിന്ന് മടങ്ങിവരുമ്പോള്‍ ക്യൂബയ്ക്കരികില്‍ ഒരു ചെറിയ ഇടവേളയുണ്ടാകുമെന്നായിരുന്നു അദ്ദേഹത്തിന്റെ പരാമര്‍ശം. അമേരിക്കന്‍ യുദ്ധക്കപ്പലുകള്‍ ക്യൂബയുടെ തീരത്തുകൂടി കടന്നുപോകുമെന്നും അതിലൊന്ന് തീരത്തുനിന്ന് ഏകദേശം 50 യാര്‍ഡ് അകലെ നിര്‍ത്തുമെന്നും ട്രംപ് പറഞ്ഞു. തുടര്‍ന്ന് മാര്‍ക്കോ റൂബിയോയെ അയച്ച് കരാര്‍ പൂര്‍ത്തിയാക്കുമെന്നും അദ്ദേഹം കൂട്ടിച്ചേര്‍ത്തു.

ക്യൂബയ്‌ക്കെതിരെ സമ്മര്‍ദം ശക്തമാക്കി ട്രംപ്

ക്യൂബയിലെ നിലവിലെ ഭരണസംവിധാനത്തിനെതിരെ ട്രംപും മാര്‍ക്കോ റൂബിയോയും നേരത്തെയും കടുത്ത നിലപാടുകള്‍ സ്വീകരിച്ചിട്ടുണ്ട്. ക്യൂബയുടെ സാമ്പത്തിക പ്രതിസന്ധിയും അമേരിക്കയുടെ എതിരാളികളുമായുള്ള ബന്ധവും ചൂണ്ടിക്കാട്ടിയാണ് വാഷിങ്ടണ്‍ സമ്മര്‍ദം ശക്തമാക്കുന്നത്. ക്യൂബയില്‍ രാഷ്ട്രീയ മാറ്റം വേണമെന്ന നിലപാടും അമേരിക്കന്‍ ഭരണകൂടം ആവര്‍ത്തിക്കുന്നുണ്ട്.

Also Read: Tibet Earthquake: ടിബറ്റിൽ അതിശക്തമായ ഭൂചലനം: 18 മരണം, മുന്നൂറോളം വീടുകൾ തകർന്നു

ക്യൂബയുമായി ചര്‍ച്ചകള്‍ നടത്തിവരുന്നതായി ട്രംപ് നേരത്തേ വ്യക്തമാക്കിയിരുന്നു. ഇരുരാജ്യങ്ങള്‍ക്കും ഒരു ധാരണയിലെത്താന്‍ കഴിയുമെന്ന പ്രതീക്ഷയും അദ്ദേഹം പ്രകടിപ്പിച്ചിട്ടുണ്ട്. എന്നാല്‍ നിലവിലെ ക്യൂബന്‍ നേതൃത്വവുമായി നയതന്ത്രപരമായ പരിഹാരം കണ്ടെത്താനാകുമോ എന്ന കാര്യത്തില്‍ അമേരിക്കന്‍ ഭരണകൂടത്തിന് സംശയങ്ങളുണ്ട്.

ട്രംപിന്റെ പ്രസംഗത്തിന് പിന്നാലെ മാര്‍ക്കോ റൂബിയോയും ക്യൂബയെക്കുറിച്ച് സമൂഹമാധ്യമങ്ങളില്‍ പ്രതികരിച്ചു. രാജ്യത്ത് മാറ്റം ആഗ്രഹിക്കുന്നവര്‍ക്ക് അതിനുള്ള അവസരം ഉപയോഗപ്പെടുത്താമെന്നായിരുന്നു അദ്ദേഹത്തിന്റെ സന്ദേശം. സിഐഎയുമായി രഹസ്യമായ സഹകരണം സ്ഥാപിക്കുന്നതിലൂടെ മാറ്റത്തിനായി പ്രവര്‍ത്തിക്കാമെന്നും റൂബിയോ സൂചിപ്പിച്ചു. എന്നാല്‍ ഇതുമായി ബന്ധപ്പെട്ട് കൂടുതല്‍ വിശദാംശങ്ങള്‍ അദ്ദേഹം നല്‍കിയിട്ടില്ല.

ചര്‍ച്ചകള്‍ക്കൊപ്പം ഉപരോധവും

ക്യൂബയുമായുള്ള ബന്ധം മെച്ചപ്പെടുത്തുന്നതിനായി ഇരുരാജ്യങ്ങളിലെയും പ്രതിനിധികള്‍ അടുത്ത മാസങ്ങളില്‍ ചര്‍ച്ചകള്‍ നടത്തിയിട്ടുണ്ട്. എന്നാല്‍ ചര്‍ച്ചകളില്‍നിന്ന് പ്രതീക്ഷിച്ച പുരോഗതി ഉണ്ടായില്ലെന്നാണ് അമേരിക്കയുടെ നിലപാട്. ഇതിന് പിന്നാലെ ക്യൂബന്‍ സര്‍ക്കാരിനെതിരായ സാമ്പത്തിക ഉപരോധങ്ങളും നിയന്ത്രണങ്ങളും കൂടുതല്‍ ശക്തമാക്കിയിട്ടുണ്ട്.

English Summary

US President Donald Trump has hinted at a possible move against Cuba after the Iran war, suggesting that American warships could stop near the island on their return. However, no official military action against Cuba has been announced.

ബീജിംഗ്: ചൈനയിലെ ടിബറ്റ് മേഖലയിൽ വ്യാഴാഴ്ച രാത്രിയുണ്ടായ അതിശക്തമായ ഭൂചലനത്തിൽ 18 പേർ മരിച്ചു. റികടർ സ്കെയിൽ 7.0 തീവ്രത രേഖപ്പെടുത്തിയ ഭൂചലനത്തിൽ നിരവധി പേർക്ക് പരിക്കേറ്റിടുണ്ട്. വ്യാഴാഴ്ച രാത്രി 10:33-നാണ് ഭൂകമ്പം അനുഭവപ്പെട്ടത്. ടിബറ്റിൻ്റെ തലസ്ഥാനമായ ലാസയിൽ നിന്ന് 390 കിലോമീറ്റർ വടക്ക് കിഴക്കായുള്ള പർവ്വത പ്രദേശമാണ് ഭൂചനലത്തിൻ്റെ പ്രഭവകേന്ദ്രമെന്ന് യു.എസ് ജിയോളജിക്കൾ സർവ്വേ അറിയിച്ചു.

ഭൂചനലത്തിൽ 65 പേർക്ക് പരിക്കേറ്റതായി പ്രാദേശിക ഉദ്യോഗസ്ഥരെ ഉദ്ധരിച്ച് ബി.ബി.സി റിപ്പോർട്ട് ചെയ്തു ഇതിൽ 11 പേരുടെ നില ഗുരുതരമാണ് എന്നാണ് വിവരം. 12,000-ലധികം ആളുകളെ മാറ്റിപ്പാപ്പിച്ചതായും പ്രദേശിക മാധ്യമങ്ങളെ ഉദ്ധരിച്ച് ബി.ബി.സി റിപ്പോർട്ട് ചെയ്യുന്നു. ഭൂകമ്പത്തെ തുടർഭൂകമ്പത്തെ തുടർന്ന് 339 വീടുകൾ പൂർണമായോ ഭാഗികമായോ തകർന്നിട്ടുണ്ട്. പ്രദേശത്ത് രക്ഷപ്രവർത്തനം ഊർജ്ജിതമായി പുരോഗമിക്കുകയാണ്. കുടുങ്ങിക്കിടക്കുന്നവരെ പുറത്തെടുക്കുന്നതിനും രക്ഷാപ്രവർത്തനങ്ങൾക്കുമായി മുന്നൂറിലധികം പൊലീസുകാരെ ദുരന്തബാധിത പ്രദേശത്ത് വിന്യസിച്ചിട്ടുണ്ട്.

Also Read: ‘മുൻ പ്രസിഡൻ്റുമാർ ചെയ്യേണ്ടിയിരുന്നത് ഞാൻ ചെയ്യുന്നു’; ഇറാന് നേരെ ഇനിയും കനത്ത ആക്രമണം നടത്തിയേക്കുമെന്ന് ട്രംപ്

ഭൂചലനത്തിൻ്റെ ഭീകരത വ്യക്തമാക്കുന്ന നിരവധി വീഡിയോകൾ സാമൂഹിക മാധ്യമങ്ങളിൽ പ്രചരിക്കുന്നുണ്ട്. കടകളിലെയും സൂപ്പർമാർക്കറ്റുകളിലെയും ഷെൽഫുകളിൽ വച്ച സാധനങ്ങൾ താഴേക്ക് പതിക്കുന്നതും, റെസ്റ്റോറൻ്റുകളിൽ നിന്നും കെട്ടിടങ്ങളിൽ നിന്നും പരിഭ്രാന്തരായി ജനങ്ങൾ ജീവരക്ഷാർത്ഥം പുറത്തേക്കോടുന്നതും ദൃശ്യങ്ങളിൽ വ്യക്തമാണ്.

അതിനിടെ വ്യാഴാഴ്ച രാത്രി ചൈനയിൽ മറ്റൊരു ഭൂകമ്പം കൂടി റിപ്പോർട്ട് ചെയ്തു. ഇന്ത്യൻ സമയം രാത്രി 8.29-ന് റിക്ടർ സ്കെയിലിൽ 5.2 തിവ്രത രേഖപ്പെടുത്തിയ ഭൂചലനമാണ് അനുഭവപ്പെട്ടത്. അരുണാചൽ പ്രദേശിലെ പാങ്ങിനിൽ നിന്നും വടക്കുപടിഞ്ഞാറ് 15 കിലോമീറ്റർ താഴ്ചയിലാണ് ഭൂചലനത്തിൻ്റെ പ്രഭവകേന്ദ്രമെന്ന് നാഷ്ണൽ സെൻ്റർ ഫോർ സീസ്മോളജി അറിയിച്ചു.

2026 ജനുവരിയിലും ടിബറ്റിൽ വലിയ ഭൂചലനം ഉണ്ടായിരുന്നു. ഗ്രാമീണ മേഖലയായ ടിംഗ്രി കൗണ്ടിയിൽ ഉണ്ടായ ഭൂചലനത്തിൽ അന്ന് 126 പേർക്കാണ് ജീവൻ നഷ്ടമായത്. കൂടാതെ കഴിഞ്ഞ ഓഗസ്റ്റിൽ നേപ്പാൽ- ടിബറ്റ് അതിർത്തിയിലുണ്ടായ മിന്നൽ പ്രളയത്തിൽ 1400-ലധികം ആളുകൾ മരണപ്പെട്ടിരുന്നു..ഈ വലിയ ദിരന്തങ്ങളുടെ നടുക്കം മാറുന്നതിന് മുൻപാണ് ഇപ്പോൾ വീണ്ടും ശക്തമായ ഭൂചനലനം ഉണ്ടായിരിക്കുന്നത്.

English Summary

A powerful 7.0-magnitude earthquake struck China's remote Tibet region, killing at least 18 people and injuring dozens. Over 300 houses collapsed, prompting massive rescue operations involving hundreds of police officers.

ദുബായ്: യു.എ.ഇയിലെ നാല് ഇന്ത്യൻ കോൺസുലാർ അപ്ലിക്കേഷൻ സെൻ്ററുകൾ പ്രവർത്തനം അവസാനിപ്പിച്ചതായി ഇന്ത്യൻ എംബസി അറിയിച്ചതിന് പിന്നാലെ പാസ്പോർട്ട് വിതരണവുമായി ബന്ധപ്പെട്ട് പുതിയ അറിയിപ്പ് പുറത്തിറക്കി നിലവിലെ സേവനദാതാക്കളായ അൽഹിന്ദ് ടൂർസ് ആൻഡ് ട്രാവൽസ്. അടച്ചുപൂട്ടിയ നാല് കേന്ദ്രങ്ങളിൽ മൂന്നിടത്തും പാസ്പോർട്ട് നേരിട്ട് കൈപറ്റാനുള്ള കൗണ്ടറുകൾ തുടർന്നും തുറന്ന് പ്രവർത്തിക്കുമെന്ന് അൽഹിന്ദ് ടൂർസ് ആൻഡ് ട്രാവൽസ് വ്യക്തമാക്കി. എന്നാൽ പുതിയ അപേക്ഷകൾ ഇനിമുതൽ ഈ കേന്ദ്രങ്ങൾ വഴി സമർപ്പിക്കാനാകില്ല

അൽഹിന്ദ് ട്രാവൽസ് പുറത്തിറക്കിയ പുതിയ അറിയിപ്പ് പ്രകാരം അടച്ചുപൂട്ടിയ കേന്ദ്രങ്ങളിൽ അബുദാബിയിലെ മുസഫ, ദുബായിലെ ദുബായ് ഇൻവെസ്റ്റ്മെൻ്റ് പാർക്ക്, ഷാർജയിലെ അൽ മജാസ് എന്നിവിടങ്ങളിൽ പാസ്പോർട്ട് വിതരണം തുടരും. അടച്ചുപൂട്ടിയ അൽ റീം സെൻ്ററിൽ നിന്നുള്ള പാസ്പോർട്ടുകൾ ഇനി മുതൽ അൽ ദാന സെൻ്ററിൽ നിന്നായിരിക്കും ലഭിക്കുക. അൽ റീം സെൻ്റർ വഴി അപേക്ഷിച്ചവർ പാസ്പോർട്ട് കൈപ്പറ്റാൻ അൽ ദാന സെൻ്റർ സന്ദർശിക്കേണ്ടതാണ്. പാസ്പോർട്ടിനായി അപേക്ഷിക്കുന്ന സമയത്ത് നേരിട്ടെത്തി കൈപ്പറ്റുന്നതിനുള്ള ഓപ്ഷൻ നൽകിയവർക്ക് മാത്രമേ ഈ സെൻ്ററുകൾ വഴി പാസ്പോർട്ട് ലഭ്യമാകു എന്ന കാര്യം പ്രത്യേകം ശ്രദ്ധിക്കുക.

Also Read: യു.എ.ഇയിൽ പാസ്‌പോർട്ട്, വിസ സേവനങ്ങളിൽ സുപ്രധാന മാറ്റങ്ങൾ; നാല് കേന്ദ്രങ്ങൾ അടച്ചു, സേവനം ഇനി 12 കേന്ദ്രങ്ങളിൽ

ഒക്ടോബർ 22 മുതൽ യു.എ.ഇയിലെ നാല് കോൺസുലാർ അപ്ലിക്കേഷൻ സെൻ്ററുകളുടെ പ്രവർത്തിക്കുമെന്ന് അബുദാബിയിലെ ഇന്ത്യൻ എംബസി കഴിഞ്ഞ ദിവസം എക്സിലൂടെ അറിയിച്ചിരുന്നു. എന്നാൽ പാസ്പോർട്ട്, വിസ അറ്റസ്റ്റേഷൻ ഉൾപ്പടെ നിലവിൽ ലഭ്യമാകുന്ന എല്ലാ കോൺസുലാർ സേവനങ്ങളും യു.എ.യിൽ ഉടനീളമുള്ള മറ്റു 12 സേവന കേന്ദ്രങ്ങളിലൂടെ തടസമില്ലാതെ ലഭ്യമാകുമെന്നും ഇന്ത്യൻ എംബസി വ്യക്തമാക്കിയിരുന്നു.

സേവനങ്ങൾ ലഭ്യമാകുന്ന 12 കേന്ദ്രങ്ങൾ

അൽ ദാന (അൽ ഗെയ്ത്ത് ടവർ), അൽ ഐൻ (അൽ ഖിബീസി), മദീനത്ത് സായിദ് (ബിൽഡിംഗ് 55), ഗയാത്തി (ഗയാത്തി മാൾ) എന്നിവയാണ് അബുദാബി, മേഖലകളിലെ സേവന കേന്ദ്രങ്ങൾ

ബർ ദുബായ് (യുഡബ്ല്യു മാൾ, അൽ മൻഖൂൽ), ഷാർജ (ഇന്ത്യൻ അസോസിയേഷൻ), അജ്മാൻ (ഇന്ത്യൻ അസോസിയേഷൻ), ഉമ്മുൽ ഖുവൈൻ (ഇന്ത്യൻ അസോസിയേഷൻ), റാസൽഖൈമ (ഇന്ത്യൻ റിലീഫ് കമ്മിറ്റി), ഫുജൈറ (ഇന്ത്യൻ സോഷ്യൽ ക്ലബ്), കൽബ (ഇന്ത്യൻ സോഷ്യൽ & കൾച്ചറൽ ക്ലബ്), ഖോർഫക്കാൻ (സറൂനി ബിൽഡിംഗ്) എന്നീ സേവന കേന്ദ്രങ്ങൾ ദുബായിലും വടക്കൻ എമിറേറ്റുകളിലും പ്രവർത്തനം തുടരും.

English Summary

Following the closure of four Indian Consular Application Centres in the UAE, Alhind issued an advisory confirming that passport collection will remain available at three of the closed locations.

വാഷിംഗ്ടൺ: ഇറാന് നേരെ ഇനിയും ശക്തമായ സൈനിക ആക്രമണങ്ങൾ ഉണ്ടാകാൻ സാധ്യതയുണ്ടെന്ന് അമേരിക്കൻ പ്രസിഡൻ്റ് ഡൊണാൾഡ് ട്രംപ്. ഇതിനോടകം തന്നെ അമേരിക്കൻ സൈന്യം ഇറാന് കനത്ത പ്രഹരം ഏൽപ്പിച്ച് കഴിഞ്ഞുവെന്നും അദ്ദേഹം അവകാശപ്പെട്ടു. മുൻ അമേരിക്കൻ പ്രസിഡൻ്റുമാർ വളരെ മുൻപ് തന്നെ ചെയ്യേണ്ടിയിരുന്ന കാര്യമാണ് താൻ ഇപ്പോൾ ചെയ്യുന്നതെന്നും ട്രംപ് കൂട്ടിച്ചേർത്തു.

വ്യാഴാഴ്ച വൈറ്റ് ഹൗസിൽ വെച്ച് മാധ്യമപ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. “ഇറാനുമായുള്ള യുദ്ധത്തിൽ അവർക്ക് ഇതിനോടകം തന്നെ വലിയ തിരിച്ചടിയാണ് നൽകിയത്. എങ്കിലും ആവശ്യമെങ്കിൽ ഇനിയും കൂടുതൽ ശക്തമായ ആക്രമണങ്ങൾ അമേരിക്കയുടെ ഭാഗത്ത് നിന്നും ഉണ്ടായേക്കാം," ട്രംപ് മാധ്യമങ്ങളോട് വ്യക്തമാക്കി.

ഇറാന് നേരെയുള്ള യുദ്ധത്തോടുള്ള ജനങ്ങളുടെ പ്രതികരണത്തെക്കുറിച്ചുള്ള മാധ്യമപ്രവർത്തകരുടെ ചോദ്യത്തിനും ട്രംപ് മറുപടി നൽകി. "മുൻ പ്രസിഡൻ്റുമാർ ചെയ്യേണ്ടിയിരുന്ന കാര്യം ഞാൻ ഇപ്പോൾ ചെയ്യുന്നതുകൊണ്ട് ജനങ്ങൾക്ക് ഒരുപക്ഷേ അത് ഇഷ്ടമാകാം. ചിലപ്പോൾ അവർക്കത് ഇഷ്ടപ്പെട്ടില്ലെന്നും വരാം. വലിയ വില നൽകേണ്ടി വരുമെന്ന് യുദ്ധം തുടങ്ങിയപ്പോൾ തന്നെ എനിക്ക് കൃത്യമായി അറിയാമായിരുന്നു. എന്നാൽ എന്ത് സംഭവിച്ചാലും ഇറാന് ആണവായുധം സ്വന്തമാക്കാൻ \ അനുവദിക്കാനാകില്ല," ട്രംപ് പറഞ്ഞു.

Also Read: സൗദിയിൽ ഹൂതി ആക്രമണങ്ങളിൽ മൂന്ന് മരണം, ഇന്ത്യക്കാരന് പരിക്ക്; ഉദ്യോഗസ്ഥരോട് രാജ്യം വിടാൻ നിർദ്ദേശം നൽകി അമേരിക്ക

നിലവിൽ ഇറാനുമായി വാഷിംഗ്ടൺ യാതൊരുവിധ സമാധാന ചർച്ചകളും നടത്തുന്നില്ലെന്നും, അധികം വൈകാതെ തന്നെ നിർണായകമായ ചില കാര്യങ്ങൾ സംഭവിക്കുമെന്നും അദ്ദേഹം ബുധനാഴ്ച വ്യക്തമാക്കിയിരുന്നു. അതിനിടെ, അമേരിക്കൻ ഇടക്കാല തിരഞ്ഞെടുപ്പിന് ശേഷം ഇറാന് നേരെ വീണ്ടും സംയുക്ത ആക്രമണം നടത്താൻ അമേരിക്കൻ സൈന്യവും ഇസ്രായേൽ സൈന്യവും ചേർന്ന് പുതിയ പദ്ധതികൾ തയ്യാറാക്കിയതായി പ്രമുഖ മാധ്യമമായ 'ന്യൂയോർക്ക് ടൈംസ്' റിപ്പോർട്ട് ചെയ്തു.

കഴിഞ്ഞ ഫെബ്രുവരി 28-നാണ് അമേരിക്കയും ഇസ്രായേലും സംയുക്തമായി ഇറാന് നേരെ യുദ്ധം ആരംഭിച്ചത്. ഇതിന് ശക്തമായ മറുപടിയായി ഇറാൻ മേഖലയിൽ വലിയ രീതിയിലുള്ള മിസൈൽ-ഡ്രോൺ ആക്രമണങ്ങൾ നടത്തിയിരുന്നു. കൂടാതെ ആഗോള ഊർജ്ജ വിതരണത്തിൻ്റെ ഏറ്റവും പ്രധാനപ്പെട്ട പാതയായ ഹോർമുസ് കടലിടുക്ക് ഇറാൻ അടച്ചുപൂട്ടുകയും ചെയ്തു. ഇരു രാജ്യങ്ങളും തമ്മിലുള്ള അന്തിമ സമാധാന കരാറിന് വഴിയൊരുക്കുന്നതിനായി കഴിഞ്ഞ ജൂണിൽ ഒരു ധാരണാപത്രം ഒപ്പുവെച്ചിരുന്നു. എന്നാൽ ഹോർമുസ് കടലിടുക്കിലൂടെയുള്ള ഗതാഗതം ഉൾപ്പെടെയുള്ള നിർണായക വിഷയങ്ങളിലെ കടുത്ത വിയോജിപ്പുകളെ തുടർന്ന് ആ ശ്രമം പരാജയപ്പെടുകയായിരുന്നു.

English Summary

US President Donald Trump warned of further military strikes against Iran, vowing to prevent Tehran from acquiring nuclear weapons, amid reports of planned US-Israel operations after the midterm elections.

അബുദാബി: യു.എ.ഇയിലെ പ്രവാസി ഇന്ത്യക്കാർക്കുള്ള കോൺസുലാർ, പാസ്‌പോർട്ട്, വിസ, അറ്റസ്റ്റേഷൻ സേവനങ്ങളിൽ സുപ്രധാന മാറ്റങ്ങൾ നിലവിൽ വന്നു. പുതിയ മാറ്റത്തിൻ്റെ ഭാഗമായി നിലവിലുണ്ടായിരുന്ന നാല് സേവന കേന്ദ്രങ്ങളുടെ പ്രവർത്തനം ഇന്ന് അവസാക്കും. പകരം യു,എ.ഇയിലെ 12 ഇന്ത്യൻ കോൺസുലാർ ആപ്ലിക്കേഷൻ സെൻ്ററുകളിലൂടെയാകും സേവനങ്ങൾ ലഭ്യമാക്കുക. 'അൽ ഹിന്ദ് ടൂർസ് ആൻഡ് ട്രാവൽസി'ലൂടെ തന്നെയാണ് തുടർന്നും സേവനം ലഭ്യമാവുകയെന്ന് അബുദാബിയിലെ ഇന്ത്യൻ എംബസി അറിയിച്ചു.

രാവിലെ 8 മണി മുതൽ വൈകിട്ട് 6 മണി വരെയാണ് ഈ 12 കേന്ദ്രങ്ങളുടെയും പ്രവർത്തന സമയം. അനുവദിച്ചിട്ടുള്ള സമയത്തിന് 15 മിനിറ്റ് മുമ്പ് മാത്രമേ അപേക്ഷകരെ കേന്ദ്രത്തിനുള്ളിലേക്ക് പ്രവേശിപ്പിക്കുകയുള്ളൂ. ബർ ദുബായിലെ കേന്ദ്രത്തിൽ തിരക്ക് കുറയ്ക്കുന്നതിനായി 45 കൗണ്ടറുകൾ സജ്ജീകരിച്ചിട്ടുണ്ട്. അതേസമയം, അടിയന്തര സേവനങ്ങൾ ആവശ്യമുള്ള തത്കാൽ പാസ്‌പോർട്ട് അപേക്ഷകർ, നവജാത ശിശുക്കൾ, എമർജൻസി സർട്ടിഫിക്കറ്റ് ആവശ്യമുള്ളവർ, 60 വയസ്സിന് മുകളിലുള്ള മുതിർന്ന പൗരന്മാർ എന്നിവർക്ക് മുൻകൂർ അപ്പോയിൻ്റ് ഇല്ലാതെ തന്നെ ഈ കേന്ദ്രങ്ങളിൽ സേവനം ലഭിക്കും. ആദ്യം വരുന്നവർക്ക് ആദ്യം എന്ന അടിസ്ഥാനത്തിലായിരിക്കും ഇത് പരിഗണിക്കുക.

Also Read: ദുബായ്-ഷാർജ അതിർത്തി മുതൽ റാസൽഖൈമ വരെ; യു.എ.ഇയിൽ ഗതാഗതക്കുരുക്കിന് പരിഹാരമായി പുതിയ ഹൈവേ

മുസഫ (ക്യാപിറ്റൽ മാൾ, അബുദാബി), അൽ റീം (വഫ്ര സ്ക്വയർ ഓഫീസസ്, അബുദാബി), ദുബായ് ഇൻവെസ്റ്റ്മെൻ്റ്സ് പാർക്ക് (ബയാൻ, ഗ്രീൻ കമ്മ്യൂണിറ്റി വില്ലേജ്), അൽ മജാസ് (ബെൽ റാഷിദ് ടവേഴ്സ്, ഷാർജ) എന്നിവയാണ് പ്രവർത്തനം അവസാനിപ്പിച്ച കേന്ദ്രങ്ങൾ

സേവനങ്ങൾ ലഭ്യമാകുന്ന 12 കേന്ദ്രങ്ങൾ

അൽ ദാന (അൽ ഗെയ്ത്ത് ടവർ), അൽ ഐൻ (അൽ ഖിബീസി), മദീനത്ത് സായിദ് (ബിൽഡിംഗ് 55), ഗയാത്തി (ഗയാത്തി മാൾ) എന്നിവയാണ് അബുദാബി, മേഖലകളിലെ സേവന കേന്ദ്രങ്ങൾ

ബർ ദുബായ് (യുഡബ്ല്യു മാൾ, അൽ മൻഖൂൽ), ഷാർജ (ഇന്ത്യൻ അസോസിയേഷൻ), അജ്മാൻ (ഇന്ത്യൻ അസോസിയേഷൻ), ഉമ്മുൽ ഖുവൈൻ (ഇന്ത്യൻ അസോസിയേഷൻ), റാസൽഖൈമ (ഇന്ത്യൻ റിലീഫ് കമ്മിറ്റി), ഫുജൈറ (ഇന്ത്യൻ സോഷ്യൽ ക്ലബ്), കൽബ (ഇന്ത്യൻ സോഷ്യൽ & കൾച്ചറൽ ക്ലബ്), ഖോർഫക്കാൻ (സറൂനി ബിൽഡിംഗ്) എന്നീ സേവന കേന്ദ്രങ്ങൾ ദുബായിലും വടക്കൻ എമിറേറ്റുകളിലും പ്രവർത്തനം തുടരും.

English Summary

Starting October 22, Indian consular, passport, and visa services in the UAE will operate through 12 centers, closing four centers

റിയാദ്: സൗദി അറേബ്യയിൽ യെമനിലെ ഹൂതി വിമതർ നടത്തുന്ന ആക്രമണങ്ങൾ രൂക്ഷമാകുന്നു. സൗദിയുടെ തെക്കുകിഴക്കൻ മേഖലയിലുള്ള അരാംകോയുടെ ഷെയ്ബ ഓയിൽ ഫീൽഡിലും ദമ്മാമിലെ വിമാനത്താവളത്തിലുമായി ബുധനാഴ്ച നടന്ന രണ്ട് വ്യത്യസ്ത ആക്രമണങ്ങളിൽ മൂന്ന് പേർ കൊല്ലപ്പെട്ടു. ഒരു ഇന്ത്യക്കാരൻ ഉൾപ്പെടെ പത്തോളം പേർക്ക് പരിക്കേറ്റിട്ടുണ്ട്. ഹൂതികളുടെ നിരന്തരമായ ആക്രമണങ്ങളുടെ പശ്ചാത്തലത്തിൽ, അടിയന്തര ചുമതലകളില്ലാത്ത അമേരിക്കൻ എംബസി ഉദ്യോഗസ്ഥരോടും അവരുടെ കുടുംബങ്ങളോടും ഉടൻ സൗദി അറേബ്യ വിടാൻ അമേരിക്കൻ സ്റ്റേറ്റ് ഡിപ്പാർട്ട്മെൻ്റ് നിർദ്ദേശം നൽകി.

ഷെയ്ബ എണ്ണപ്പാടത്തിന് നേരെ വന്ന ഡ്രോൺ സൈന്യം തകർക്കുകയായിരുന്നു. എന്നാൽ ഇതിൻ്റെ അവശിഷ്ടങ്ങൾ താഴേക്ക് പതിച്ചാണ് അപകടമുണ്ടായത്. ഈ സംഭവത്തിൽ ഒരു നേപ്പാൾ പൗരനും ഫിലിപ്പീൻസ് പൗരനുമാണ് കൊല്ലപ്പെട്ടത് എന്ന് സൗദി ഊർജ്ജ മന്ത്രാലയം പുറത്തിറക്കിയ പ്രസ്താവന വ്യക്തമാക്കുന്നു, പരിക്കേറ്റ രണ്ട് പേരിൽ ഒരാൾ ഇന്ത്യക്കാരനും മറ്റൊരാൾ പാകിസ്ഥാൻ സ്വദേശിയുമാണ്. ഡ്രോൺ അവശിഷ്ടങ്ങൾ വീണ് എണ്ണപ്പാടത്തെ ഒരു വാഹനത്തിന് തീപിടിക്കുകയും ചെയ്തു.

കഴിഞ്ഞ മാസം, സമാനമായ രീതിയിൽ ഡ്രോൺ അവശിഷ്ടങ്ങൾ പതിച്ച് ഒരു യെമൻ പൗരൻ കൊല്ലപ്പെട്ടിരുന്നു. സൗദിയിലെ കപ്പൽ ഗതാഗതത്തിനും എണ്ണ ശുദ്ധീകരണ ശാലകൾക്കും നേരെയുള്ള ആക്രമണങ്ങൾ ഹൂതികൾ ശക്തമാക്കിയതിന് ശേഷം റിപ്പോർട്ട് ചെയ്യപ്പെട്ട ആദ്യത്തെ സിവിലിയൻ മരണമായിരുന്നു അത്.

Also Read: Israel-Iran Conflict: ട്രംപിന്റെ എതിർപ്പ്; ഇറാനെതിരായ ഇസ്രയേലിന്റെ ആക്രമണപദ്ധതി മാറ്റിവെച്ചു

ഇതിന് പുറമെ, ബുധനാഴ്ച വൈകുന്നേരം കിഴക്കൻ സൗദിയിലെ ദമ്മാമിലുള്ള കിംഗ് ഫഹദ് അന്താരാഷ്ട്ര വിമാനത്താവളത്തിന് നേരെയും ആക്രമണമുണ്ടായി. ഇവിടെ ഒരാൾ കൊല്ലപ്പെടുകയും എട്ട് പേർക്ക് പരിക്കേൽക്കുകയും ചെയ്തതായി സിവിൽ ഏവിയേഷൻ അതോറിറ്റി അറിയിച്ചു. പരിക്കേറ്റവരിൽ ചിലരുടെ നില ഗുരുതരമാണെന്നും, വിമാനത്താവളത്തിലുണ്ടായ നാശനഷ്ടങ്ങൾ വിലയിരുത്തി വരികയാണെന്നും അധികൃതർ വ്യക്തമാക്കി. കഴിഞ്ഞ കുറച്ചു ദിവസങ്ങളായി സൗദിയിലെ വിമാനത്താവളങ്ങൾ ലക്ഷ്യമാക്കി ഹൂതികൾ നിരന്തരം ആക്രമണങ്ങൾ നടത്തുന്നുണ്ട്.

തുടർച്ചയായുള്ള ഈ ആക്രമണങ്ങളുടെ പശ്ചാത്തലത്തിലാണ് എംബസി ജീവനക്കാർക്ക് അമേരിക്ക കർശന നിർദ്ദേശം നൽകിയിരിക്കുന്നത്. ജീവനക്കാരുടെയും കുടുംബാംഗങ്ങളുടെയും സുരക്ഷയ്ക്കാണ് തങ്ങൾ പ്രഥമ പരിഗണന നൽകുന്നതെന്നും, അതിനാൽ അടിയന്തര ചുമതലകളില്ലാത്തവർ സൗദി വിടണമെന്നും യു.എസ് സ്റ്റേറ്റ് ഡിപ്പാർട്ട്മെൻ്റ് വക്താവ് ടോമി പിഗോട്ട് എക്സിലൂടെ അറിയിച്ചു. നിലവിൽ സൗദി അറേബ്യയിലെ ഉദ്യോഗസ്ഥർക്ക് മാത്രമാണ് ഇത്തരം ഒരു നിർദ്ദേശം നൽകിയിട്ടുള്ളത് എന്നും അദ്ദേഹം വ്യക്തമാക്കി.

English Summary

Houthi drone attacks on a Saudi Aramco oil field and King Fahd International Airport killed three people and injured several others. Consequently, the US ordered non-essential embassy staff to leave.

ഇറാന്റെ ആണവകേന്ദ്രങ്ങളും വൈദ്യുത നിലയങ്ങളും ലക്ഷ്യമിട്ട് ഒക്ടോബറില്‍ ആക്രമണം നടത്താന്‍ ഇസ്രായേല്‍ പദ്ധതിയിട്ടിരുന്നതായി റിപ്പോര്‍ട്ട്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ നിലപാടിനെത്തുടര്‍ന്ന് ഈ നീക്കം മാറ്റിവെച്ചെന്നാണ് വിവരം. അമേരിക്കയിലെ ഇടക്കാല തിരഞ്ഞെടുപ്പിന് മുമ്പ് ഇറാനുമായി വീണ്ടും യുദ്ധത്തിലേക്ക് നീങ്ങാന്‍ ട്രംപ് താല്‍പര്യപ്പെട്ടിരുന്നില്ലെന്നാണ് ഫിനാന്‍ഷ്യല്‍ ടൈംസ് റിപ്പോര്‍ട്ട് ചെയ്യുന്നത്.

ആണവകേന്ദ്രങ്ങളും വൈദ്യുത നിലയങ്ങളും ലക്ഷ്യം

ഇറാന്റെ ആണവകേന്ദ്രങ്ങള്‍, ഭരണകൂടവുമായി ബന്ധപ്പെട്ട സ്ഥാപനങ്ങള്‍, വൈദ്യുത നിലയങ്ങള്‍ എന്നിവ ലക്ഷ്യമിട്ട് ഒന്നിലധികം ദിവസം നീണ്ടുനില്‍ക്കുന്ന ബോംബാക്രമണത്തിനാണ് ഇസ്രായേല്‍ പദ്ധതിയിട്ടിരുന്നതെന്നാണ് റിപ്പോര്‍ട്ട്. ഈ വര്‍ഷം ഫെബ്രുവരിയില്‍ അമേരിക്കയും ഇസ്രായേലും ചേര്‍ന്ന് നടത്തിയ ആക്രമണത്തേക്കാള്‍ തീവ്രമായ സൈനികനീക്കമായിരുന്നു ലക്ഷ്യമിട്ടിരുന്നതെന്നും റിപ്പോര്‍ട്ടില്‍ പറയുന്നു.

ട്രംപിന്റെ നിലപാട് നിര്‍ണായകം

നവംബര്‍ മൂന്നിനാണ് അമേരിക്കയിലെ ഇടക്കാല തിരഞ്ഞെടുപ്പ് നടക്കുന്നത്. അതിന് മുമ്പ് ഇറാനെതിരെ പുതിയ ആക്രമണം ആരംഭിക്കുന്നത് ഒഴിവാക്കാനാണ് ട്രംപ് ശ്രമിച്ചതെന്നാണ് വിവരം. തിരഞ്ഞെടുപ്പ് വരെ ഇറാനെ ആക്രമിക്കില്ലെന്ന് ട്രംപ് നേരത്തേ വ്യക്തമാക്കിയിരുന്നു. എന്നാല്‍ ആക്രമണപദ്ധതി മാറ്റിവെച്ചെങ്കിലും ഇറാനെതിരായ സൈനികനടപടി പൂര്‍ണമായി ഉപേക്ഷിച്ചിട്ടില്ലെന്നാണ് റിപ്പോര്‍ട്ടിലെ സൂചന.

Also Read: France Protest: ഫ്രാൻസ് തീവ്ര ഇസ്‌ലാമിന് കീഴടങ്ങിയെന്ന് നെതന്യാഹു; മാക്രോണിനെതിരെ വിമർശനം

അമേരിക്ക നേരിട്ട് പുതിയ ആക്രമണത്തില്‍ പങ്കുചേരുമായിരുന്നോ എന്ന കാര്യത്തില്‍ വ്യക്തതയില്ല. വരും ആഴ്ചകളില്‍ അമേരിക്കയും ഇസ്രായേലും സംയുക്തമായി വീണ്ടും ആക്രമണം നടത്തിയേക്കാമെന്ന സാധ്യതയും റിപ്പോര്‍ട്ടില്‍ പരാമര്‍ശിക്കുന്നുണ്ട്. ഹോര്‍മുസ് കടലിടുക്കുമായി ബന്ധപ്പെട്ട തര്‍ക്കങ്ങളും ഇറാന്റെ ആണവപദ്ധതിയെച്ചൊല്ലിയുള്ള ഭിന്നതകളും ഇരുരാജ്യങ്ങള്‍ക്കുമിടയിലെ സംഘര്‍ഷം തുടരാന്‍ കാരണമാകുന്നു.

പുതിയ ലക്ഷ്യം

അമേരിക്കന്‍ പ്രതിരോധ സെക്രട്ടറി പീറ്റ് ഹെഗ്‌സെത്ത് ഇസ്രായേല്‍ സന്ദര്‍ശിച്ച് പ്രധാനമന്ത്രി ബെഞ്ചമിന്‍ നെതന്യാഹുവുമായും മറ്റ് മുതിര്‍ന്ന ഉദ്യോഗസ്ഥരുമായും ചര്‍ച്ച നടത്തിയിരുന്നു. ഈ കൂടിക്കാഴ്ചയില്‍ നേരത്തേ ആക്രമിക്കാത്ത കേന്ദ്രങ്ങള്‍ ഉള്‍പ്പെടുന്ന പുതിയ ലക്ഷ്യങ്ങളുടെ പട്ടിക ഇസ്രായേല്‍ അവതരിപ്പിച്ചതായും റിപ്പോര്‍ട്ടുണ്ട്.

അമേരിക്കയും ഇസ്രായേലും ഭാവിയില്‍ സംയുക്ത സൈനികനടപടി സ്വീകരിക്കാനുള്ള സാധ്യതയും റിപ്പോര്‍ട്ടില്‍ പരാമര്‍ശിക്കുന്നുണ്ട്. ഇറാന്റെ ആണവപദ്ധതിയും ഹോര്‍മുസ് കടലിടുക്കുമായി ബന്ധപ്പെട്ട തര്‍ക്കങ്ങളും മേഖലയില്‍ സംഘര്‍ഷം തുടരാന്‍ കാരണമാകുന്നുണ്ട്.

English Summary

Israel reportedly planned a major attack on Iran in October, targeting nuclear facilities and power plants. According to a report, Donald Trump’s opposition and concerns over the US midterm elections influenced the decision to postpone the planned strike.

ദുബായ്: യു.എ.ഇയിലെ ഗതാഗത സൗകര്യങ്ങൾ കൂടുതൽ മെച്ചപ്പെടുത്തുന്നതിൻ്റെ ഭാഗമായി ദുബായ്-ഷാർജ അതിർത്തിയെ റാസൽഖൈമയുമായി ബന്ധിപ്പിച്ചുകൊണ്ട് പുതിയ ഫെഡറൽ ഹൈവേ വരുന്നു. E-911 എന്നാണ് 68 കിലോമീറ്റർ ദൈർഘ്യമുള്ള നാലാമത്തെ ഫെഡറൽ ഹൈവേ കോറിഡോറിന് പേര് നൽകിയിരിക്കുന്നത്. ഈ പദ്ധതിയുടെ പ്രാരംഭ പഠനത്തിനും ഡിസൈൻ തയ്യാറാക്കുന്നതിനുമായിു ഊർജ്ജ, അടിസ്ഥാന സൗകര്യ വികസന മന്ത്രാലയം എഞ്ചിനീയറിംഗ് കൺസൾട്ടൻസി സ്ഥാപനങ്ങളിൽ നിന്ന് ടെൻഡർ ക്ഷണിച്ചു.

കാറ്റഗറി എ വിഭാഗത്തിൽപ്പെടുന്ന കൺസൾട്ടൻസി സ്ഥാപനങ്ങൾക്ക് മാത്രമാണ് ഈ കരാറിനായി അപേക്ഷിക്കാൻ അർഹതയുള്ളതെന്ന് മന്ത്രാലയം ഔദ്യോഗിക എക്‌സ് അക്കൗണ്ടിലൂടെ അറിയിച്ചു. എഞ്ചിനീയറിംഗ് പഠനങ്ങൾ, ഡിസൈൻ, മേൽനോട്ട സേവനങ്ങൾ എന്നിവ ഉൾപ്പെടുന്നതാണ് ഈ കരാർ. ഒക്ടോബർ 15-നാണ് ടെൻഡർ പുറത്തിറക്കിയത്. താല്പര്യമുള്ള സ്ഥാപനങ്ങൾക്ക് ഒക്ടോബർ 23 വെള്ളിയാഴ്ച വരെ തങ്ങളുടെ അപേക്ഷകൾ സമർപ്പിക്കാവുന്നതാണ്.

ദുബായ്-ഷാർജ അതിർത്തിയിൽ നിന്ന് ആരംഭിച്ച് റാസൽഖൈമയിലെ അൽ ശുഹദ റോഡ് വരെ നീളുന്നതാണ് നിർദ്ദിഷ്ട ഹൈവേ. ഇതിനുപുറമെ, പുതിയ കോറിഡോറിനെ ഉമ്മുൽ ഖുവൈനിലെ എമിറേറ്റ്‌സ് റോഡുമായി ബന്ധിപ്പിക്കുന്ന 8 കിലോമീറ്റർ നീളമുള്ള മറ്റൊരു റോഡും ഈ പദ്ധതിയുടെ ഭാഗമായി നിർമ്മിക്കുന്നുണ്ട്. യാത്രക്കാരുടെ സൗകര്യാർത്ഥം വിവിധ ഭാഗങ്ങളിലായി ഇരുവശത്തേക്കുമായി 12 മുതൽ 16 വരികൾ വരെ ഉൾപ്പെടുന്ന വമ്പൻ പാതയായിരിക്കും ഇത്. അതേസമയം, പദ്ധതിയുടെ ആകെ നിർമ്മാണ ചിലവോ എന്ന് പൂർത്തിയാകുമെന്ന വിവരങ്ങളോ മന്ത്രാലയം ഇതുവരെ വെളിപ്പെടുത്തിയിട്ടില്ല.

Also Read: ദുബായിൽ ഡ്രൈവിംഗ് ടെസ്റ്റ് പരാജയപ്പെട്ടോ ? വീണ്ടും അപേക്ഷിക്കുന്നതിന് മുൻപ് ഇക്കാര്യങ്ങൾ അറിഞ്ഞിരിക്കുക

ഇതിന് പുറമെ കഴിഞ്ഞ മാസം ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി 80 കിലോമീറ്റർ ദൈർഘ്യമുള്ള മറ്റൊരു 'നാലാം കോറിഡോർ' പദ്ധതിയും പ്രഖ്യാപിച്ചിരുന്നു. ഷാർജ, ദുബായ്, അബുദാബി എന്നീ എമിറേറ്റുകളെ തമ്മിൽ ബന്ധിപ്പിക്കുന്നതാണ് ഈ പാത. 350 കോടി ദിർഹം ചിലവ് പ്രതീക്ഷിക്കുന്ന ഈ പാതയുടെ ആദ്യഘട്ടം ഷാർജയിലെ അൽ ഷനൂഫ് റോഡ് മുതൽ ദുബായ്-അൽ ഐൻ റോഡ് വരെയാണ്. രണ്ടാം ഘട്ടം ദുബായ്-അൽ ഐൻ റോഡിൽ നിന്ന് ആരംഭിച്ച് അബുദാബിയിലെ അൽ ഫായ റോഡ് വരെ നീളും.

ഫെഡറൽ സർക്കാർ പ്രഖ്യാപിച്ച 68 കിലോമീറ്റർ ദൈർഘ്യമുള്ള ഇ-911 ഹൈവേ ദുബായ്-ഷാർജ അതിർത്തിയെ വടക്കൻ എമിറേറ്റായ റാസൽഖൈമയുമായി ബന്ധിപ്പിക്കുമ്പോൾ, ദുബായിയുടെ 80 കിലോമീറ്റർ കോറിഡോർ പദ്ധതി അബുദാബിയിലേക്കുള്ള യാത്രാസൗകര്യങ്ങളാണ് എളുപ്പമാക്കുന്നത്. ഈ രണ്ട് വമ്പൻ റോഡ് വികസന പദ്ധതികളും പൂർത്തിയാകുന്നതോടെ യുഎഇയിലെ ഗതാഗതക്കുരുക്കിന് വലിയൊരു പരിഹാരമാകുമെന്നും, എമിറേറ്റുകൾ തമ്മിലുള്ള യാത്രാസമയം ഗണ്യമായി കുറയുമെന്നുമാണ് വിലയിരുത്തപ്പെടുന്നത്.

English Summary

The UAE's Ministry of Energy and Infrastructure has invited tenders for a new 68-kilometre highway (E-911) linking the Dubai-Sharjah border to Ras Al Khaimah, aiming to significantly ease regional traffic.

ഫ്രാന്‍സില്‍ നടന്ന പ്രതിഷേധങ്ങളും അക്രമസംഭവങ്ങളും ചര്‍ച്ചയാകുന്നതിനിടെ ഫ്രഞ്ച് സര്‍ക്കാരിനെതിരെ രൂക്ഷവിമര്‍ശനവുമായി ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. ഫ്രാന്‍സ് തീവ്ര ഇസ്ലാമിക ശക്തികളുടെ കടന്നുകയറ്റത്തിന് ഇരയായെന്നാണ് അദ്ദേഹത്തിന്റെ ആരോപണം. രാജ്യത്തെ അക്രമസംഭവങ്ങള്‍ നേരിടുന്നതില്‍ ഫ്രഞ്ച് നേതൃത്വം പരാജയപ്പെട്ടെന്നും അദ്ദേഹം കുറ്റപ്പെടുത്തി. നെതന്യാഹുവിന്റെ പ്രസ്താവന അന്താരാഷ്ട്ര തലത്തില്‍ പുതിയ രാഷ്ട്രീയ ചര്‍ച്ചകള്‍ക്ക് വഴിയൊരുക്കിയിരിക്കുകയാണ്.

ഫ്രാന്‍സിലെ വിവിധ നഗരങ്ങളില്‍ നടന്ന പ്രതിഷേധങ്ങള്‍ക്കിടെ കടകള്‍ കൊള്ളയടിക്കുകയും പൊതുമുതല്‍ നശിപ്പിക്കുകയും ചെയ്ത സംഭവങ്ങള്‍ റിപ്പോര്‍ട്ട് ചെയ്തിരുന്നു. ഇതിന് പിന്നാലെയാണ് ഫ്രഞ്ച് നേതൃത്വത്തിന്റെ നടപടികളെ വിമര്‍ശിച്ച് നെതന്യാഹു രംഗത്തെത്തിയത്. എന്നാല്‍ അക്രമസംഭവങ്ങള്‍ക്ക് പിന്നില്‍ തീവ്ര ഇസ്ലാമിക ശക്തികളാണെന്നതിന് വ്യക്തമായ തെളിവുകള്‍ അദ്ദേഹം മുന്നോട്ടുവെച്ചിട്ടില്ല.

ഫ്രഞ്ച് നേതൃത്വത്തിനെതിരെ വിമര്‍ശനം

ഫ്രാന്‍സിലെ ഒരു വാര്‍ത്താ ചാനലിന് നല്‍കിയ അഭിമുഖത്തിലാണ് നെതന്യാഹു വിവാദ പരാമര്‍ശം നടത്തിയത്. അക്രമങ്ങളെ നേരിടാന്‍ ഫ്രഞ്ച് നേതൃത്വം സമയബന്ധിതമായി തയാറായില്ലെന്നും തീവ്ര ഇസ്ലാമിക ശക്തികള്‍ക്ക് മുന്നില്‍ രാജ്യം ദുര്‍ബലമായ നിലപാടാണ് സ്വീകരിച്ചതെന്നുമായിരുന്നു അദ്ദേഹത്തിന്റെ ആരോപണം.

തീവ്രവാദത്തിനെതിരെ ശക്തമായ നടപടികള്‍ സ്വീകരിക്കണമെന്നും വിട്ടുവീഴ്ചയുടെ സമീപനം അവസാനിപ്പിക്കണമെന്നും നെതന്യാഹു ആവശ്യപ്പെട്ടു. എന്നാല്‍ ഫ്രാന്‍സില്‍ നടന്ന പ്രതിഷേധങ്ങളില്‍ പങ്കെടുത്തവരെല്ലാം തീവ്രവാദികളാണെന്നതിന് തെളിവുകളൊന്നും അദ്ദേഹം നല്‍കിയിട്ടില്ല. പ്രതിഷേധങ്ങളില്‍ വിവിധ വിഭാഗങ്ങളില്‍പ്പെട്ട ആളുകള്‍ പങ്കെടുത്തിരുന്നുവെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

Also Read: France Unrest: കലാപഭൂമിയായി ഫ്രാൻസ്; തെരുവുകളിൽ അക്രമവും കൊള്ളയും; കുടിയേറ്റത്തെ പഴിച്ച് ട്രംപ്‌

ഇസ്രയേലില്‍ 2023 ഒക്ടോബര്‍ ഏഴിന് ഹമാസ് നടത്തിയ ആക്രമണത്തിന് പിന്നാലെ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന് മുന്നറിയിപ്പ് നല്‍കിയിരുന്നുവെന്നും നെതന്യാഹു അവകാശപ്പെട്ടു. തീവ്രവാദത്തെ തടയാന്‍ നടപടിയെടുത്തില്ലെങ്കില്‍ സമാനമായ ഭീഷണി ഫ്രാന്‍സിനും നേരിടേണ്ടിവരുമെന്ന് അന്ന് മുന്നറിയിപ്പ് നല്‍കിയിരുന്നുവെന്നാണ് അദ്ദേഹത്തിന്റെ വാദം.

ഫ്രാന്‍സിലെ പ്രതിഷേധങ്ങള്‍ക്ക് പിന്നിലെ കാരണങ്ങള്‍

ജീവിതച്ചെലവിലെ വര്‍ധന, പൊതുസേവനങ്ങളുമായി ബന്ധപ്പെട്ട പ്രശ്‌നങ്ങള്‍, സര്‍ക്കാര്‍ നയങ്ങളോടുള്ള എതിര്‍പ്പ് തുടങ്ങിയ വിഷയങ്ങളാണ് ഫ്രാന്‍സിലെ പ്രതിഷേധങ്ങളില്‍ ഉയര്‍ന്നുവന്നത്. പല സ്ഥലങ്ങളിലും പ്രതിഷേധങ്ങള്‍ സമാധാനപരമായിരുന്നെങ്കിലും ചിലയിടങ്ങളില്‍ അക്രമസംഭവങ്ങള്‍ അരങ്ങേറി. കടകള്‍ക്കും പൊതുകെട്ടിടങ്ങള്‍ക്കും നാശനഷ്ടങ്ങളുണ്ടായതായും റിപ്പോര്‍ട്ടുകളുണ്ട്.

അക്രമങ്ങള്‍ക്ക് പിന്നില്‍ തീവ്ര ഇടതുപക്ഷ സംഘങ്ങള്‍ക്ക് പങ്കുണ്ടെന്നാണ് ഫ്രഞ്ച് നേതൃത്വത്തിന്റെ ആരോപണം. പ്രതിഷേധങ്ങളെ നേരിടുന്നതില്‍ സുരക്ഷാ സംവിധാനങ്ങളുടെ പ്രവര്‍ത്തനവും പരിശോധിക്കുന്നുണ്ട്.

English Summary

Israeli Prime Minister Benjamin Netanyahu has sparked controversy by claiming that France is facing an invasion by radical Islamist forces amid protests and unrest. He criticised the French leadership for its response to the violence. His remarks have renewed debate over extremism, immigration and security in Europe.

ദുബായ്: ദുബായിൽ റോഡ് ആൻഡ് ട്രാൻസ്പോർട്ട് അതോറിറ്റിയുടെ ഡ്രൈവിംഗ് ടെസ്റ്റിൽ ഒരിക്കൽ പരാജയപ്പെട്ടു എന്ന് കരുതി നിരാശപ്പെടേണ്ട കാര്യമില്ല. അടുത്ത ടെസ്റ്റിനായി നിങ്ങൾക്ക് വീണ്ടും ബുക്ക് ചെയ്യാനും വിജയിക്കാനും അവസരമുണ്ട്. എന്നാൽ വീണ്ടും ടെസ്റ്റിനായിൽ ഡ്രൈവിംഗ് സീറ്റിലേക്ക് എത്തുന്നതിന് മുൻപായി ചില കാര്യങ്ങൾ ശ്രദ്ധിക്കേണ്ടതുണ്ട്. ആർ.ടി.ഒ ഡ്രൈവിംഗ് ടെസ്റ്റിൽ പരാജയപ്പെടുന്നവർ അടുത്ത ടെസ്റ്റിന് മുന്നോടിയായി നിർബ്ബന്ധമായും ഡ്രൈവിംഗ് ഇൻസ്റ്റിറ്റ്യൂട്ടിൽ നിന്നും വീണ്ടും പരിശീലന ക്ലാസുകൾ പൂർത്തുയാക്കിയിരിക്കണം. ഇതിന് ശേഷം മാത്രമേ അടുത്ത ടെസ്റ്റിനായി അപേക്ഷിക്കാനാകു.

വീണ്ടും ടെസ്റ്റിന് അപേക്ഷിക്കുമ്പോൾ ആകെ 220 ദിർഹമാണ് ഫീസായി നൽകേണ്ടത്. ഇതിൽ 200 ദിർഹം റോഡ് ടെസ്റ്റിനുള്ള ഫീസും 20 ദിർഹം നോളജ് ആൻഡ് ഇന്നോവേഷൻ ഫീസുമാണ്. ഇതിന് പുറമെ നാല് നിർബ്ബന്ധിത പരിശീലന ക്ലാസിനുള്ള ഫീസും അടയ്ക്കേണ്ടതുണ്ട്. ഇത് ഓരോ ഡ്രൈവിംഗ് ഇൻസ്റ്റിറ്റ്യൂട്ടുകൾക്കും അനുസരിച്ച് വ്യത്യാസപ്പെട്ടിരിക്കും. പെട്ടന്ന് ലൈസൻസ് ആവശ്യമുള്ളവർക്ക് 2,260 ദിർഹം നൽകി വി.ഐ.പി ഡ്രൈവിംഗ് ടെസ്റ്റ് സേവനവും ആർ.ടി.എ ഒരുക്കിയിട്ടുണ്ട്. വീണ്ടും പരിശീലനം പൂർത്തിയാക്കിയ ശേഷം 14 പ്രവർത്തി ദിവസങ്ങൾക്കുള്ളിൽ പുതിയ ടെസ്റ്റിനുള്ള തീയതി ലഭിക്കും.

Also Read: UAE Expats Guide: എമിറേറ്റ്സ് ഐ.ഡി നഷ്ടപ്പെട്ടോ? ഫോണിൽ ഡിജിറ്റൽ കോപ്പി ഡൗൺലോഡ് ചെയ്യാനുള്ള എളുപ്പവഴികൾ ഇതാ

ആവശ്യമെങ്കിൽ ഓൺലൈനായോ, ഇൻസ്റ്റിറ്റ്യൂട്ട് വഴിയോ ടെസ്റ്റിനായി ലഭിച്ച തീയതിയിൽ മാറ്റം വരുത്താം. ടെസ്റ്റിന് 24 മണിക്കൂർ മുൻപ് വരെ ഈ രീതിയിൽ തീയതിയിൽ മാറ്റം വരുത്താവുന്നതാണ്. നിലവിൽ ലഭിച്ച തീയതിയേക്കാൾ മുൻപ് ടെസ്റ്റ് പുർത്തിയാക്കണം എങ്കിൽ 320 ദിർഹം അധിക ഫീസ് നൽകി തീയതി നേരത്തെയാക്കാവുന്നതാണ്. എന്നാൽ അനുവദിച്ച സമയത്ത് ടെസ്റ്റിന് ഹാജരായില്ല എങ്കിൽ വീണ്ടും ഫീസ് അടച്ച് അപ്പോയിൻമെൻ്റ് എടുക്കേണ്ടതായിവരും എന്ന കാര്യം പ്രത്യേകം ഓർക്കുക.

അപ്പോയിൻമെൻ്റ് എടുത്ത് ആറുമാസത്തിനുള്ളിൽ. നോളജ് ടെസ്റ്റോ, യാർഡ് ടെസ്റ്റോ, റോഡ് ടെസ്റ്റോ പൂർത്തിയാക്കിയില്ല എങ്കിൽ ട്രെയിനിംഗ് ഫയൽ താൽക്കാലികമായി റദ്ദാക്കുന്നതായിരിക്കും. റോഡ് ടെസ്റ്റിൽ വിജയിച്ച ശേഷം ഒരു വർഷത്തിനുള്ളിൽ ലൈസൻസ് ഇഷ്യൂ ചെയ്തില്ല എങ്കിൽ പിന്നീട് വീണ്ടും ഇവാലുവേഷൻ ടെസ്റ്റിന് വിധേയരാകേണ്ടിവരും എന്നതും പ്രത്യേകം ഓർക്കുക.

English Summary

If you fail your Dubai RTA driving test, you must complete mandatory practical lessons before rebooking. The retest costs Dh220. Ensure you follow RTA deadlines to avoid file suspension.

വാഷിങ്ടണ്‍: ദക്ഷിണ അമേരിക്കന്‍ രാജ്യമായ കൊളംബിയയില്‍ അനധികൃത സ്വര്‍ണഖനിയില്‍ ഉണ്ടായ മണ്ണിടിച്ചിലില്‍ 14 പേര്‍ മരിച്ചു. അപകടത്തില്‍ ഏഴ് പേര്‍ക്ക് പരിക്കേറ്റു. രാജ്യത്തിന്റെ തെക്കുപടിഞ്ഞാറന്‍ മേഖലയിലെ നരിനോ പ്രവിശ്യയിലുള്ള സാന്താ ബാര്‍ബറ ഡി ഇസ്‌കുവാന്‍ഡെ മുനിസിപ്പാലിറ്റിയിലാണ് ദുരന്തമുണ്ടായത്. ഖനനപ്രവര്‍ത്തനങ്ങള്‍ക്കിടെ മണ്ണ് ഇടിഞ്ഞുവീണതിനെ തുടര്‍ന്ന് നിരവധി പേര്‍ അപകടത്തില്‍പ്പെടുകയായിരുന്നു.

ഖനനത്തിനിടെ മണ്ണിടിഞ്ഞു

സ്വര്‍ണം ഖനനം ചെയ്യുന്നതിനിടെയാണ് അപകടമുണ്ടായത്. ഖനിയുടെ ഭാഗങ്ങള്‍ തകര്‍ന്നുവീണതോടെ തൊഴിലാളികള്‍ അപകടത്തില്‍പ്പെടുകയായിരുന്നു. സംഭവമറിഞ്ഞ് രക്ഷാപ്രവര്‍ത്തകര്‍ സ്ഥലത്തെത്തി തിരച്ചില്‍ നടത്തി. മണ്ണിനടിയില്‍ കുടുങ്ങിയവരെ കണ്ടെത്തുന്നതിനും അപകടത്തില്‍പ്പെട്ടവരെ പുറത്തെടുക്കുന്നതിനുമുള്ള ശ്രമങ്ങള്‍ നടന്നു. അപകടത്തില്‍ 14 പേര്‍ മരിച്ചതായും ഏഴ് പേര്‍ക്ക് പരിക്കേറ്റതായും പ്രാദേശിക അധികൃതര്‍ അറിയിച്ചു. രക്ഷാപ്രവര്‍ത്തനത്തിനിടെ പ്രദേശത്തെ സാഹചര്യങ്ങളും ഖനിയുടെ ഘടനയുമായി ബന്ധപ്പെട്ട ബുദ്ധിമുട്ടുകളും വെല്ലുവിളിയായതായി റിപ്പോര്‍ട്ടുകളുണ്ട്.

ദുരന്തമുണ്ടായത് ചേംബര്‍റോ മേഖലയില്‍

നരിനോ പ്രവിശ്യയിലെ ചേംബര്‍റോ എന്ന ഗ്രാമീണ മേഖലയിലാണ് അപകടം നടന്നത്. വിദൂരപ്രദേശമായതിനാല്‍ രക്ഷാപ്രവര്‍ത്തകരുടെ ഇടപെടലും അടിയന്തര സഹായം എത്തിക്കുന്നതും വെല്ലുവിളി നിറഞ്ഞതായിരുന്നു. അപകടത്തിന്റെ പശ്ചാത്തലത്തില്‍ ഖനനമേഖലയിലെ സുരക്ഷാ ക്രമീകരണങ്ങള്‍ ശക്തമാക്കേണ്ടതിന്റെ ആവശ്യകത വീണ്ടും ഉയര്‍ന്നിട്ടുണ്ട്.

ചെറുകിട ഖനനമേഖലയില്‍ സുരക്ഷാ ആശങ്ക

കൊളംബിയയിലെ ഗ്രാമീണ മേഖലകളില്‍ അനൗദ്യോഗികവും നിയന്ത്രണമില്ലാത്തതുമായ ഖനനപ്രവര്‍ത്തനങ്ങള്‍ വ്യാപകമാണ്. ആവശ്യമായ സുരക്ഷാ സംവിധാനങ്ങളോ സാങ്കേതിക സൗകര്യങ്ങളോ ഇല്ലാതെ പ്രവര്‍ത്തിക്കുന്ന ഖനികളില്‍ മണ്ണിടിച്ചില്‍ ഉള്‍പ്പെടെയുള്ള അപകടങ്ങള്‍ പതിവാണ്. ഖനനത്തിനിടെ മണ്ണിന്റെ ഘടനയില്‍ മാറ്റമുണ്ടാകുന്നതും സുരക്ഷാ മാനദണ്ഡങ്ങള്‍ പാലിക്കാത്തതും തൊഴിലാളികളുടെ ജീവന് ഭീഷണിയാകുന്നു.

Also Read: France Unrest: കലാപഭൂമിയായി ഫ്രാൻസ്; തെരുവുകളിൽ അക്രമവും കൊള്ളയും; കുടിയേറ്റത്തെ പഴിച്ച് ട്രംപ്‌

സമാന ദുരന്തം ഓഗസ്റ്റിലും

നരിനോ പ്രവിശ്യയില്‍ സമാനമായ ഖനനദുരന്തം ഓഗസ്റ്റിലും സംഭവിച്ചിരുന്നു. അന്ന് പോളികാര്‍പയിലെ അനധികൃത സ്വര്‍ണഖനി തകര്‍ന്ന് 13 പേര്‍ മരിക്കുകയും ഏഴ് പേര്‍ക്ക് പരിക്കേല്‍ക്കുകയും ചെയ്തു. മാസങ്ങള്‍ക്കുള്ളില്‍ വീണ്ടും സമാനമായ അപകടം ഉണ്ടായത് മേഖലയിലെ ഖനനസുരക്ഷയെക്കുറിച്ചുള്ള ആശങ്ക വര്‍ധിപ്പിച്ചിട്ടുണ്ട്.

ചെറുകിട, അനധികൃത ഖനനപ്രവര്‍ത്തനങ്ങളെ നിയമപരമായ സംവിധാനത്തിലേക്ക് കൊണ്ടുവരുന്നതിനുള്ള നടപടികള്‍ വേഗത്തിലാക്കണമെന്ന് നരിനോ ഗവര്‍ണര്‍ ലൂയിസ് അല്‍ഫോന്‍സോ എസ്‌കോബാര്‍ ആവശ്യപ്പെട്ടു. ദേശീയ സര്‍ക്കാര്‍, ദേശീയ ഖനന ഏജന്‍സി, ഖനന-ഊര്‍ജ മന്ത്രാലയം എന്നിവയുടെ ഇടപെടലിലൂടെ തൊഴിലാളികള്‍ക്ക് മെച്ചപ്പെട്ട തൊഴില്‍സാഹചര്യങ്ങളും സുരക്ഷയും ഉറപ്പാക്കണമെന്നാണ് ആവശ്യം.

English Summary

A landslide at an illegal gold mine in Colombia's Nariño province killed 14 people and injured seven others. The tragedy has renewed concerns over mining safety and the risks associated with illegal mining operations.

യു,എ.ഇയിലെ പൗരൻമാർക്കും പ്രവാസികൾക്കും ഒരുപോലെ ഒഴിവാക്കാനാകാത്ത രേഖയാണ് ഏമിറേറ്റ്സ് ഐ.ഡി. എവിടെ പോകുമ്പോഴും ഇത് കയ്യിൽ കരുതേണ്ടത് നിർബ്ബന്ധമാണ്. എന്നാൽ കാർഡ് നഷ്ടപ്പെടുകയോ, പുതുക്കാൻ നൽകുകയോ ചെയ്യുന്ന സാഹചര്യങ്ങളിൽ പലരും ബുദ്ധിമുട്ടാറുണ്ട്. ഇത്തരം പ്രതിസന്ധികൾ ഒഴിവാക്കുന്നതിനായി കാർഡിൻ്റെ ഡിജിറ്റൽ പതിപ്പ് ഫോണിൽ സൂക്ഷിക്കുന്നതാണ് ഏറ്റവും മികച്ച മാർഗം.

ഐഡി നഷ്ടപ്പെട്ടാൽ ഉടൻ തന്നെ ഫെഡറൽ അതോറിറ്റി ഫോർ ഐഡൻ്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി അധികൃതരെ വിവരമറിയിക്കുകയും പുതിയ കാർഡിനായി അപേക്ഷിക്കുകയും ചെയ്യണം. എന്നാൽ പുതിയ കാർഡ് ലഭിക്കുന്നത് വരെ തികച്ചും സൗജന്യമായി ഉപയോഗിക്കാവുന്ന ഡിജിറ്റൽ സംവിധാനങ്ങളെ കുറിച്ചാണ് ഇനി പറയുന്നത്.

യു.എ.ഇ.ഐ.സി.പി ആപ്പ്

യു.എ.ഇ ഐ.സി.പി ആപ്പിലൂടെ എമിറേറ്റ്സ് ഐ.ഡി ഉപയോഗിക്കാവുന്നതാണ്. ആപ്പിൽ യു.എ.ഇ പാസ്സ് ഉപയോഗിച്ച് ലോഗിൻ ചെയ്ത ശേഷം ഹോം പേജിലെ എമിറേറ്റ്സ് ഐ.ഡി എന്ന ഓപ്ഷനിൽ ക്ലിക്ക് ചെയ്താൽ ഡിജിറ്റൽ എമിറേറ്റ്സ് ഐഡി കാണാനാകും. ഇൻ്റർനെറ്റ് ഇല്ലാത്ത സമയങ്ങളിൽ ഉപയോഗപ്പെടുത്തുന്നതിനായി ഐ.ഡിയുടെ പി.ഡി.എഫ് കോപ്പി ഡൗൺലോഡ് ചെയ്ത് സൂക്ഷിക്കാവുന്നതുമാണ്.

Also Read: ഷാർജയിലെ അൽ ദൈദ് എത്തിഹാദ് റെയിൽ സ്റ്റേഷനിലേക്ക് മുന്ന് ബസ് സർവിസുകൾ; റൂട്ടുകളും സമയക്രമവും അറിയൂ!

ആപ്പിൾ വാലറ്റ്

ആപ്പിൾ ഡിവൈസുകൾ ഉപയോഗിക്കുന്നവർക്ക് ഐ.സി.പിയുടെ ഔദ്യോഗിക ആപ്പായ ‘UAEICP’ വഴി എമിറേറ്റ്സ് ഐ.ഡി ആപ്പിൾ വാലറ്റിലേക്ക് സുരക്ഷിതമായി മാറ്റാം. യു.എ.ഇ പാസ്സ് ഉപയോഗിച്ച് ആപ്പിൽ ലോഗിൻ ചെയ്ത ശേഷം പേരിൽ ക്ലിക്ക് ചെയ്യുന്നതോടെ ഡിജിറ്റൽ ഐഡി കാണാനാകും. ഇതിൽ കാണുന്ന 'Add to Apple Wallet' എന്ന ഓപ്ഷനിലൂടെ ഒറ്റ ക്ലിക്കിൽ തന്നെ ഐ.ഡി വാലറ്റിലേക്ക് സേവ് ചെയ്യാവുന്നതാണ്.

യു.എ.ഇ.പാസ്സ് ആപ്പ്

യു,എ.ഇയിലെ ഒട്ടുമിക്ക സർക്കാർ സേവനങ്ങൾക്കും ഉപയോഗിക്കുന്ന യു.എ.ഇ പാസ്സ് ആപ്പാണ് മറ്റൊരു മാർഗ്ഗം. ആൻഡ്രോയിഡ്, ഐ.ഒ.എസ് ഉപയോക്താക്കൾക്ക് ഒരുപോലെ ഈ സേവനം ലഭ്യമാണ്. ആപ്പിൽ ലോഗിൻ ചെയ്ത് ‘ആഡ് ഡോക്യുമെൻ്റ്’ എന്ന ഓപ്ഷനിൽ ക്ലിക്ക് ചെയ്ത ‘പേഴ്സണൽ’ എന്ന ഭാഗത്ത് നിന്നും എമിറേറ്റ്സ് ഐ.ഡി തിരഞ്ഞെടുക്കാം. ഇതോടെ അപ്പിലെ ഡോക്യുമെൻ്റ്സ് സെക്ഷനിൽ എമേറേറ്റ്സ് ഐ.ഡി ലഭ്യമാകും.

ക്യു.ആർ കോഡ്

‘UAEICP’ ആപ്പിൽ കാണുന്ന ‘Emirates ID QR Code’ എന്ന ഓപ്ഷനിൽ ക്ലിക്ക് ചെയ്യുക. തുടർന്ന് മൊബൈൽ നമ്പരോ, പാസ്പോർട്ട് വിവരങ്ങളോ നൽകിയാൽ എമിറേറ്റ്സ് ഐഡിയിലെ പൂർണ വിവരങ്ങൾ അടങ്ങിയ ഒരു ക്യു.ആർ കോഡ് ലഭ്യമാകും. ഫിസിക്കൽ കാർഡ് ഇല്ലാത്ത സാഹചര്യങ്ങളിൽ സർക്കാർ ഓഫീസുകളിലോ മറ്റു പരിശോധനകൾക്കോ ഈ ക്യു.ആർ കോഡ് നൽകാവുന്നതാണ്.

English Summary

If you lose your Emirates ID or it's under renewal, the UAE provides easy ways to download a temporary digital copy or QR code using official smartphone apps.

പാരീസ്/വാഷിങ്ടണ്‍: ഫ്രാന്‍സില്‍ കത്തിപ്പടരുന്ന പ്രതിഷേധത്തില്‍ കുടിയേറ്റത്തെ കുറ്റപ്പെടുത്തി യുഎസ് പ്രസിഡന്റ് ഡൊണാള്‍ഡ് ട്രംപ്. ഹൃദയത്തിൽ വെറുപ്പുമായി വരുന്ന ആളുകളുടെ കുടിയേറ്റം മഹത്തായ രാജ്യമായിരുന്ന ഫ്രാൻസിനെ തകർത്തെന്ന് ട്രംപ്‌ 'ട്രൂത്ത് സോഷ്യലിൽ' കുറിച്ചു. ഫ്രാൻസ് കത്തുകയാണ്. വൈകുന്നതിന് മുൻപ് അതിർത്തികൾ അടയ്ക്കുകയും സ്ഥിതിഗതികൾ നിയന്ത്രണത്തിലാക്കുകയും ചെയ്യണമെന്നും ട്രംപ് പറഞ്ഞു. കുടിയേറ്റത്തെ പഴിച്ച് യുഎസ് വൈസ് പ്രസിഡന്റ് ജെഡി വാന്‍സും രംഗത്തെത്തി.

"വൈവിധ്യത്തിന്റെയും അനുകമ്പയുടെയും പേരിൽ പാശ്ചാത്യ ലിബറലുകൾ മൂന്നാം ലോക രാജ്യങ്ങളിൽ നിന്നുള്ളവരെ ഫ്രാൻസിലേക്കും മറ്റ് രാജ്യങ്ങളിലേക്കും കൊണ്ടുവന്നു. എന്നാൽ, ഇവർക്ക് ആ സമൂഹവുമായി എത്രത്തോളം ഇണങ്ങിപ്പോകാൻ കഴിയുമെന്നതടക്കമുള്ള അടിസ്ഥാനപരമായ ചോദ്യങ്ങളെ അവർ അവഗണിച്ചു"-വാന്‍സ് 'എക്‌സ്' പ്ലാറ്റ്‌ഫോമില്‍ കുറിച്ചു.

ഇങ്ങനെയൊരു അവസ്ഥയിലേക്ക് കാര്യങ്ങൾ നീങ്ങുമെന്ന് അവർക്ക് മുന്നറിയിപ്പ് നൽകിയിരുന്നതാണെന്നും പക്ഷേ അവർ അത് ചെവിക്കൊണ്ടില്ലെന്നും വാന്‍സ് വിമര്‍ശിച്ചു. മനോഹരമായ രാജ്യമായ ഫ്രാന്‍സിലെ ഇപ്പോഴത്തെ ഈ അവസ്ഥ അവസാനിക്കട്ടേയെന്ന് പ്രാര്‍ത്ഥിക്കുന്നു. അമേരിക്കക്കാരും ഈ വിഷയം ശ്രദ്ധിക്കണം. കാരണം ഡെമോക്രാറ്റുകള്‍ യുഎസില്‍ ആഗ്രഹിക്കുന്നത് ഇത്തരമൊരു ഭാവിയാണെന്നും വാന്‍സ് പറഞ്ഞു.

Also Read: ഹൂതി ആക്രമണങ്ങളെ നേരിടാൻ സൗദി അറേബ്യ ഇസ്രായേലിൻ്റെ സഹായം തേടണമെന്ന് ട്രംപ്

കൂടുതൽ അധ്യാപകരെയും മെച്ചപ്പെട്ട സ്കൂൾ സൗകര്യങ്ങളും ആവശ്യപ്പെട്ട് വിദ്യാർത്ഥികൾ തുടങ്ങിയ പ്രക്ഷോഭമാണ് ഫ്രാൻസിൽ പ്രക്ഷോഭങ്ങള്‍ക്ക്‌ തുടക്കമിട്ടത്. പിന്നീട് അത് വര്‍ധിച്ചുവരുന്ന ജീവിതച്ചെലവുകള്‍ക്കെതിരെയുള്ള പ്രക്ഷോഭത്തിലേക്ക് രൂപം മാറി. വിവിധ യൂണിയനുകളടക്കം പ്രതിഷേധത്തിന്റെ ഭാഗമായതോടെ ഇത് കലാപമായി ആളിക്കത്തി. ഉയർന്ന പണപ്പെരുപ്പത്തിനും ജീവിതച്ചെലവിനും എതിരെ രാജ്യവ്യാപകമായി പ്രക്ഷോഭങ്ങള്‍ അരങ്ങേറി.

വ്യാപക അക്രമം!

5.50 ലക്ഷം പേര്‍ പ്രക്ഷോഭത്തില്‍ പങ്കെടുത്തെന്നാണ് ഫ്രഞ്ച് ആഭ്യന്തര മന്ത്രാലയത്തിന്റെ കണക്ക്. എന്നാല്‍ എട്ട് ലക്ഷം പേര്‍ പങ്കെടുത്തതായി സിജിടി യൂണിയന്‍ അവകാശപ്പെട്ടു. സമാധാനപരമായി തുടങ്ങിയ മാർച്ചുകൾ പിന്നീട് തീവെപ്പിലേക്കും കൊള്ളയടിക്കലിലേക്കും പൊതു കെട്ടിടങ്ങൾക്കു നേരെയുള്ള ആക്രമണങ്ങളിലേക്കും വഴിമാറി. രാജ്യവ്യാപകമായി നടന്ന പ്രതിഷേധങ്ങൾക്കിടയിലാണ് ഈ അക്രമസംഭവങ്ങൾ അരങ്ങേറിയത്.

"ഏകദേശം 1,800 പേരെ അറസ്റ്റ് ചെയ്തിട്ടുണ്ട്‌. കുറ്റവാളികളെ കണ്ടെത്തി നിയമത്തിന് മുന്നിൽ കൊണ്ടുവരുന്നതിനുള്ള അന്വേഷണം നടന്നുവരികയാണ്‌"-ആഭ്യന്തര മന്ത്രി ലോറന്റ് നുനെസ് 'എക്സ്' പ്ലാറ്റ്‌ഫോമിലൂടെ അറിയിച്ചു.

പാരീസിൽ മാത്രം റെക്കോർഡ് അളവിൽ 855 പേരെ അറസ്റ്റ് ചെയ്തതായി പൊലീസ് അറിയിച്ചു. വിവിധയിടങ്ങളില്‍ കടകള്‍ക്ക് നേരെ ആക്രമണമുണ്ടായി. വാഹനങ്ങളും കത്തിനശിച്ചു. പാരീസിലും മറ്റ് നഗരങ്ങളിലുമായി മുഖംമൂടി ധരിച്ച യുവാക്കൾ നിരവധി കടകൾ കൊള്ളയടിച്ചു. അഞ്ഞൂറിലധികം പൊലീസുകാരും അഗ്നിശമന സേനാംഗങ്ങളും പാരാമെഡിക്കൽ ജീവനക്കാരും പരിക്കേറ്റവരിൽ ഉൾപ്പെടുന്നു.

English Summary

Widespread protests over high inflation and cost of living turned violent across France, leading to looting and arson. French authorities arrested around 1,800 people, including 855 in Paris alone, following a night of heavy damage. US President Donald Trump blamed the unrest on immigration and urged France to close its borders.

ദുബായ്: മുപ്പതിനായിരം അടി ഉയരത്തിൽ പറക്കുന്ന വിമാനത്തിൻ്റെ കോക്പിറ്റിൽ വെച്ച് സഹപൈലറ്റിൽ നിന്ന് നേരിട്ട ആക്രമണത്തിൻ്റെയും, രക്തം വാർന്നൊഴുകുമ്പോഴും ജീവനുവേണ്ടി നടത്തിയ പോരാട്ടത്തിൻ്റെയും നടുക്കുന്ന ഓർമ്മകൾ പങ്കുവെച്ച് ഫ്ലൈദുബായ് വിമാനത്തിലെ ഇന്ത്യൻ ക്യാപ്റ്റൻ സ്മിത് മച്ഛർ. സെപ്റ്റംബർ 30-ന് ദുബായിൽ നിന്ന് ടെൽ അവീവിലേക്ക് പറന്ന വിമാനത്തിലാണ് സംഭവം നടന്നത്. 'സ്കൈ ന്യൂസ് അറേബ്യ'ക്ക് നൽകിയ അഭിമുഖത്തിലാണ് യു.എ.ഇയിൽ ചികിത്സയിൽ കഴിയുന്ന ക്യാപ്റ്റൻ സ്മിത് ലോകത്തെ തന്നെ നടുക്കിയ സംഭവം വിവരിച്ചത്.:

യാത്ര തുടങ്ങിയപ്പോൾ എല്ലാം സാധാരണ നിലയിലായിരുന്നു. വിമാനം പറന്നുയർന്ന് രണ്ട് മണിക്കൂർ കഴിഞ്ഞപ്പോഴാണ് കാര്യങ്ങൾ മാറിമറിഞ്ഞത് എന്ന് ക്യാപ്റ്റൻ സ്മിത് പറയുന്നു. ടെൽ അവീവിൽ നിന്നുള്ള മടക്കയാത്രയിൽ വിമാനം പറത്തേണ്ട മറ്റൊരു ക്യാപ്റ്റൻ കൂടി ഞങ്ങൾക്കൊപ്പം കോക്പിറ്റിലുണ്ടായിരുന്നു. എന്നാൽ തനിക്ക് പ്രാർത്ഥിക്കണമെന്ന് പറഞ്ഞ് സഹപൈലറ്റ് അദ്ദേഹത്തോട് കോക്പിറ്റിൽ നിന്ന് പുറത്തുപോകാൻ ആവശ്യപ്പെട്ടു. സഹപൈലറ്റ് പ്രാർത്ഥിക്കുന്ന സമയത്ത് വിമാനം ലാൻഡ് ചെയ്യേണ്ട സമയവും ബാക്കിയുള്ള ഇന്ധനവും കാലാവസ്ഥയും കമ്പ്യൂട്ടറിൽ പരിശോധിക്കുകയായിരുന്നു താൻ. പെട്ടെന്നാണ് മൂർച്ചയേറിയ എന്തോ ഒന്ന് തലയുടെ പിൻഭാഗത്ത് ശക്തമായി പറ്റിച്ചത് എന്ന് ക്യാപ്റ്റൻ ഓർക്കുന്നു.

Also Read: സൗദിക്ക് നേരെയെത്തിയ നാല് ഡ്രോണുകൾ തകർത്തു; യെമനിൽ ഹൂതികളുടെ മിസൈൽ കേന്ദ്രങ്ങൾ ആക്രമിച്ച് സഖ്യസേന

അടിയുടെ ആഘാതത്തിൽ താൻ മുന്നോട്ട് ആഞ്ഞുവീണു. വിമാനത്തിൻ്റെ മുകൾഭാഗത്തുനിന്ന് എന്തോ പൊട്ടിവീണതാണെന്നും വിമാനത്തിന് വലിയ തകരാർ സംഭവിച്ചുവെന്നുമാണ് അദ്യം കരുതിയത്. ഉടൻ തന്നെ സമനില വീണ്ടെടുത്ത് എഴുന്നേൽക്കാനും വിമാനത്തിൻ്റെ സിസ്റ്റങ്ങൾ പരിശോധിക്കാനും ശ്രമിച്ചു. എന്നാൽ സെക്കൻഡുകൾക്കുള്ളിൽ വീണ്ടും അടിയേറ്റു. അപ്പോഴാണ് ഇതൊരു ആക്രമണമാണെന്ന് തിരിച്ചറിഞ്ഞത്. തിരിഞ്ഞുനോക്കിയപ്പോൾ സഹപൈലറ്റ് എന്തൊക്കെയോ വിളിച്ചുപറഞ്ഞുകൊണ്ട് തുടർച്ചയായി അടിക്കുകയായിരുന്നു. ആദ്യത്തെ അടിയിൽ തന്നെ കാഴ്ചശക്തി തകരാറിലായിരുന്നു എന്നും സ്മിത് മച്ചാർ പറഞ്ഞു.

പെട്ടെന്ന് സീറ്റ് ബെൽറ്റ് അഴിച്ചുമാറ്റി തിരിഞ്ഞ് തടുക്കാൻ ശ്രമിക്കുന്നതിനിടെ കൈയ്ക്കും പരിക്കേറ്റു. പുറത്തുണ്ടായിരുന്ന ക്യാപ്റ്റനെ ഉച്ചത്തിൽ വിളിച്ചു. തൊട്ടടുത്തുണ്ടായിരുന്ന ഡോർ സ്വിച്ചിൽ അമർത്തി വാതിൽ തുറക്കാൻ ശ്രമിച്ചു. ഈ പിടിവലിക്കിടെയാണ് ആദ്യമായി തൻ്റെ ബോധം മറയുന്നത്. വാതിൽ തുറന്നതും പുറത്തുനിന്ന് ആളുകളുടെ ബഹളവും നിലവിളിയും കേട്ടത് അവ്യക്തമായി ഓർമ്മയുണ്ട്. എന്നാൽ മറ്റുള്ളവരെയും ആക്രമിക്കുമെന്ന് ഭീഷണിപ്പെടുത്തി സഹപൈലറ്റ് വാതിൽ വീണ്ടും അടയ്ക്കുകയായിരുന്നു

“രക്തം വാർന്നൊഴുകിയതോടെ ശരീരം തളരാനും ഇടയ്ക്കിടെ ബോധം നഷ്ടപ്പെടാനും തുടങ്ങി. ഇതിനിടയിലാണ് വിമാനം താഴേക്ക് പതിക്കുന്നതായി ബോധ്യപ്പെട്ടത്. ബോധം മറയുമ്പോഴും, ജീവനുവേണ്ടി പോരാടിയേ മതിയാകൂ എന്ന് നമ്മൾ നമ്മളോട് തന്നെ പറയുന്ന ഒരു നിമിഷമുണ്ട്. അവിടെയാണ് അതിജീവനത്തിനായുള്ള പോരാട്ടം തുടങ്ങിയത്” സ്മിത് മച്ചാർ പറഞ്ഞു. സൗദി അറേബ്യയിൽ വിമാനം സുരക്ഷിതമായി നിലത്തിറങ്ങുന്നതുവരെ തനിക്ക് സമാധാനമുണ്ടായിരുന്നില്ല എന്നും മരണമുഖത്തുനിന്ന് രക്ഷപ്പെട്ട് താഴെയിറങ്ങിയ ശേഷം ആദ്യം സംസാരിച്ചത് തൻ്റെ രണ്ട് വയസ്സുള്ള കുഞ്ഞിനോടായിരുന്നു എന്നും. സ്മിത്ത് മച്ഛർ വ്യക്തമാക്കി.

English Summary

Flydubai captain Smit Machchhar recounted a terrifying mid-air cockpit attack by his co-pilot on a Dubai-Tel Aviv flight, describing how he fought for survival while bleeding and losing consciousness.

റിയാദ്: സൗദി അറേബ്യയുടെ വിവിധ ഭാഗങ്ങൾ ലക്ഷ്യമിട്ടെത്തിയ നാല് ഡ്രോണുകൾ സൈന്യം ആകാശത്തുവെച്ച് തകർത്തു. തലസ്ഥാനമായ റിയാദ്, കിഴക്കൻ പ്രവിശ്യകൾ, രാജ്യത്തിൻ്റെ തെക്കൻ മേഖല എന്നിവിടങ്ങളിലേക്ക് തൊടുത്തുവിട്ട ഡ്രോണുകളാണ് സൗദി പ്രതിരോധ സേന തകർത്തത്. ഇതിനുപുറമെ യെമനിലെ സഅദ ഗവർണറേറ്റിൽ ഹൂതി വിമതരുടെ രണ്ട് ബാലസ്റ്റിക് മിസൈൽ വിക്ഷേപണ കേന്ദ്രങ്ങൾ സൗദിയുടെ നേതൃത്വത്തിലുള്ള സഖ്യസേന തകർത്തതായും റിപ്പോർട്ടുണ്ട്. കഴിഞ്ഞ 24 മണിക്കൂറിനുള്ളിൽ ഹൂതികളെ ലക്ഷ്യമിട്ട് 1,417 ആക്രമണങ്ങൾ നടത്തിയതായി യെമൻ സൈന്യവും അറിയിച്ചു.

കഴിഞ്ഞയാഴ്ച റിയാദ് അന്താരാഷ്ട്ര വിമാനത്താവളത്തിന് നേരെയുണ്ടായ വൻ ആക്രമണത്തിൽ 13 പേർ കൊല്ലപ്പെട്ടിരുന്നു. കടലിലും സുരക്ഷാ ഭീഷണി രൂക്ഷമായി തുടരുകയാണ്. സൗദിയിലെ അൽ ജുബൈലിന് വടക്കുകിഴക്കായി അജ്ഞാത മിസൈൽ പതിച്ച് ഒരു ടാങ്കറിന് കേടുപാടുകൾ സംഭവിച്ചു. ഹോർമുസിൽ മൈനുകളിൽ തട്ടി രണ്ട് എണ്ണക്കപ്പലുകൾക്ക് തീപിടിച്ചതായി ഇറാൻ്റെ റെവല്യൂഷണറി ഗാർഡ്സ് അറിയിച്ചു.

സൗദി അറേബ്യ ആവശ്യപ്പെട്ടാൽ സൈനിക സഹായം നൽകുന്നതിനായി ഈജിപ്ഷ്യൻ പ്രസിഡൻ്റ് അബ്ദുൽ ഫത്താഹ് അൽ സിസി പാർലമെൻ്റിൻ്റെ അനുമതി തേടിയിട്ടുണ്ട്. അതേസമയം, സൗദിയും ഹൂതികളും തമ്മിലുള്ള പ്രശ്നം പരിഹരിക്കാനായുള്ള ചർച്ചകളെ പിന്തുണയ്ക്കുമെന്ന് ഇറാൻ വിദേശകാര്യ മന്ത്രി അബ്ബാസ് അരാഗ്ചി ബാഗ്ദാദിൽ നടന്ന ഒ.ഐ.സി യോഗത്തിൽ വ്യക്തമാക്കി.

Also Read: ഹൂതി ആക്രമണങ്ങളെ നേരിടാൻ സൗദി അറേബ്യ ഇസ്രായേലിൻ്റെ സഹായം തേടണമെന്ന് ട്രംപ്

തുടർച്ചയായ മിസൈൽ, ഡ്രോൺ ആക്രമണങ്ങളുടെ പശ്ചാത്തലത്തിൽ വിമാന സർവീസുകൾക്കും യാത്രകൾക്കും കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ട്. കൊളംബോയിൽ നിന്ന് ദമ്മാമിലേക്കും റിയാദിലേക്കുമുള്ള വിമാന സർവീസുകൾ ഒക്ടോബർ 24 വരെ നിർത്തിവെച്ചതായി ശ്രീലങ്കൻ എയർലൈൻസ് അറിയിച്ചു. സൗദിയിലെ വിമാനത്താവളങ്ങൾക്ക് നേരെ ഇനിയും ആക്രമണങ്ങൾ ഉണ്ടാകാൻ സാധ്യതയുള്ളതിനാൽ അമേരിക്കൻ പൗരന്മാർ അതീവ ജാഗ്രത പുലർത്തണമെന്നും സൗദി സിവിൽ ഡിഫൻസിൻ്റെ നിർദ്ദേശങ്ങൾ പാലിക്കണമെന്നും യു.എസ് നിർദ്ദേശിച്ചു.

സൗദിയിലേക്കും യെമൻ അതിർത്തിയുടെ 10 കിലോമീറ്റർ പരിധിയിലേക്കുമുള്ള അനാവശ്യ യാത്രകൾ ഒഴിവാക്കാൻ ബ്രിട്ടനും പൗരന്മാരോട് ആവശ്യപ്പെട്ടിട്ടുണ്ട്. ഇതിനിടെ, യുദ്ധത്തെ തുടർന്ന് ആഗോളതലത്തിൽ ഇന്ധനവില ഉയരുന്നത് നിയന്ത്രിക്കാനായി അമേരിക്ക തങ്ങളുടെ തന്ത്രപ്രധാനമായ പെട്രോളിയം ശേഖരത്തിൽ നിന്ന് 1.7 കോടി ബാരൽ ക്രൂഡ് ഓയിൽ കൂടി പുറത്തിറക്കാൻ നടപടി തുടങ്ങി. യു.എസ്-ഇറാൻ സംഘർഷം ആരംഭിച്ച ശേഷം ഇതുവരെ 13.25 കോടി ബാരൽ എണ്ണയാണ് അമേരിക്ക വിപണിയിലിറക്കിയത്.

English Summary

Saudi Arabia intercepted four drones over Riyadh and other regions, while the Saudi-led coalition destroyed two Houthi ballistic missile launch platforms in Yemen amid escalating maritime threats and travel disruptions.

അബുദാബി: യുഎഇയുടെ കിഴക്കൻ മേഖലകളിൽ ഇന്ന് ഉച്ചയ്ക്ക് ശേഷം മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ആകാശം പൊതുവെ തെളിഞ്ഞതോ ഭാഗികമായി മേഘാവൃതമോ ആയിരിക്കും. ഉച്ചയ്ക്ക് ശേഷം കിഴക്കൻ പ്രദേശങ്ങളിൽ മഴമേഘങ്ങൾ രൂപപ്പെടാനും മഴ ലഭിക്കാനും സാധ്യതയുണ്ട്. രാത്രിയിൽ അന്തരീക്ഷ ഈർപ്പം വർധിക്കുന്നതിനാൽ ഞായറാഴ്ച രാവിലെ തീരദേശങ്ങളിലും ഉൾപ്രദേശങ്ങളിലും മൂടൽമഞ്ഞ് രൂപപ്പെടാൻ സാധ്യതയുണ്ടെന്നും കാലാവസ്ഥാ കേന്ദ്രം വ്യക്തമാക്കി.

ഉൾപ്രദേശങ്ങളിൽ 37 ഡിഗ്രി സെൽഷ്യസിനും 42 ഡിഗ്രി സെൽഷ്യസിനും ഇടയിലായിരിക്കും താപനില. തീരദേശങ്ങളിലും ദ്വീപുകളിലും 35 മുതൽ 40 ഡിഗ്രി സെൽഷ്യസ് വരെയും, പർവത മേഖലകളിൽ 28 മുതൽ 33 ഡിഗ്രി സെൽഷ്യസ് വരെയും താപനില രേഖപ്പെടുത്തും. രാത്രിയിലും ഞായറാഴ്ച രാവിലെയും അന്തരീക്ഷ ഈർപ്പം 90 ശതമാനം വരെ ഉയരാൻ സാധ്യതയുള്ളതിനാൽ മൂടൽമഞ്ഞ് ശക്തമാകും. മണിക്കൂറിൽ 10 മുതൽ 25 കിലോമീറ്റർ വരെയും, ചില സമയങ്ങളിൽ 40 കിലോമീറ്റർ വരെയും വേഗതയിൽ കാറ്റ് വീശാൻ സാധ്യതയുണ്ട്. പൊടിക്കാറ്റിന് സാധ്യതയുള്ളതിനാൽ ജനങ്ങൾ ജാഗ്രത പാലിക്കണം. അറേബ്യൻ ഗൾഫിലും ഒമാൻ കടലിലും കടൽ പൊതുവെ ശാന്തമായിരിക്കും എന്നും മുന്നറിയിപ്പിൽ പറയുന്നു.

Also Read: ഗ്ലോബൽ വില്ലേജിലേക്ക് യാത്ര ചെയ്യാൻ ഇനി വെറും 10 ദിർഹം മതി; പ്രത്യേക ബസ് സർവീസുകളുടെ പൂർണ വിവരങ്ങൾ ഇതാ!

രാജ്യത്ത് ബുധനാഴ്ച വരെ മഴയ്ക്ക് സാധ്യതയുണ്ടെന്നാണ് പ്രവചനം. ഒക്ടോബർ 18 ഞായറാഴ്ച വടക്ക്, കിഴക്ക് മേഖലകളിൽ ഉച്ചയ്ക്ക് ശേഷം മഴ ലഭിച്ചേക്കും. തിങ്കളാഴ്ച രാവിലെ മൂടൽമഞ്ഞിനും മണിക്കൂറിൽ 40 കിലോമീറ്റർ വേഗതയിൽ കാറ്റിനും സാധ്യതയുണ്ട്. ഒക്ടോബർ 19 തിങ്കളാഴ്ച കിഴക്ക് തെക്ക് മേഖലകളിലാണ് മഴയ്ക്ക് സാധ്യതയുള്ളത്. തുടർന്ന് ചൊവ്വാഴ്ച രാവിലെ പടിഞ്ഞാറൻ മേഖലകളിൽ മൂടൽമഞ്ഞ് അനുഭവപ്പെടാം. തുറസ്സായ സ്ഥലങ്ങളിൽ പൊടിക്കാറ്റിനും സാധ്യതയുണ്ട്..

ചൊവ്വ, ബുധൻ ദിവസങ്ങളിലും കിഴക്കൻ, തെക്കൻ പ്രദേശങ്ങളിൽ ഉച്ചയ്ക്ക് ശേഷം മഴ തുടരും. ചൊവ്വാഴ്ച കാറ്റിൻ്റെ വേഗത മണിക്കൂറിൽ 50 കിലോമീറ്റർ വരെ ഉയരാൻ സാധ്യതയുള്ളതിനാൽ ശക്തമായ പൊടിക്കാറ്റുണ്ടാകും. ബുധനാഴ്ച രാത്രി മുതൽ വ്യാഴാഴ്ച രാവിലെ വരെ തീരദേശങ്ങളിലും ഉൾപ്രദേശങ്ങളിലും വീണ്ടും മൂടൽമഞ്ഞിന് സാധ്യതയുണ്ട്. കഴിഞ്ഞ ദിവസങ്ങളിലും യു,എ.ഇയുടെ വിവിധ ഭാഗങ്ങളിൽ മഴ ലഭിച്ചിരുന്നു. തുടർന്ന് മലയോര മേഖകളിൽ മിന്നൽ പ്രളയത്തിനുള്ള സാധ്യത കണക്കിലെടുത്ത് എൻ.സി.എം പ്രത്യേക ജാഗ്രതാ നിർദ്ദേശം പുറപ്പെടുവിച്ചിരുന്നു.

English Summary

The UAE’s National Centre of Meteorology has forecast rainfall in eastern and southern areas from Saturday through Wednesday, alongside high overnight humidity, morning fog, and strong winds causing blowing dust.

വാഷിംഗ്ടൺ: പശ്ചിമേഷ്യയിൽ സംഘർഷം രൂക്ഷമായി തുടരുന്ന സാഹചര്യത്തിൽ, ഹൂതി വിമതർക്കെതിരായ പോരാട്ടത്തിൽ ഇസ്രായേൽ വാഗ്ദാനം ചെയ്ത സഹായം സൗദി അറേബ്യ സ്വീകരിക്കണമെന്ന് യു.എസ് പ്രസിഡൻ്റ് ഡോണൾഡ് ട്രംപ്. ജോർജിയയിലെ റാലിക്ക് മുന്നോടിയായി വൈറ്റ് ഹൗസിൽ മാധ്യമപ്രവർത്തകരോട് സംസാരിക്കവെയാണ് സൗദിക്ക് ഇസ്രായേൽ നൽകുന്ന പിന്തുണ ഏറെ സഹായകരമാണെന്ന് അദ്ദേഹം വ്യക്തമാക്കിയത്. ഇസ്രായേലും അറബ് രാജ്യങ്ങളും തമ്മിലുള്ള നയതന്ത്രബന്ധം സാധാരണ നിലയിലാക്കാനുള്ള 2020-ലെ 'എബ്രഹാം അക്കോർഡ്സ്' കരാറിൽ സൗദി അറേബ്യ ഭാഗമാകാനുള്ള സാധ്യത ഇപ്പോൾ കൂടുതലാണെന്നും ട്രംപ് പറഞ്ഞു.

പശ്ചിമേഷ്യയിൽ തങ്ങളുടെ സഹായം തേടാത്ത രാജ്യങ്ങൾ വളരെ ചുരുക്കമാണെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവും കഴിഞ്ഞ ദിവസം വ്യക്തമാക്കിയിരുന്നു. 2023 ഒക്ടോബർ ഏഴിലെ ഹമാസ് ആക്രമണത്തിന് മുൻപ് ഇസ്രായേലും സൗദിയും കരാറിനോട് അടുത്തിരുന്നെങ്കിലും, സ്വതന്ത്ര പലസ്തീൻ രാഷ്ട്രം രൂപീകരിക്കുന്നതിനുള്ള വ്യക്തമായ നടപടികൾ സ്വീകരിക്കാതെ ഇസ്രായേലുമായി നയതന്ത്രബന്ധം സ്ഥാപിക്കില്ലെന്നാണ് സൗദിയുടെ നിലപാട്.

Also Read: ഇറാനെതിരെ ‘മദർ ഓഫ് ഓൾ ബോംബ്’ പ്രയോഗിക്കാൻ അമേരിക്ക? ആണവ-ഊർജ്ജ കേന്ദ്രങ്ങളെ ലക്ഷ്യമിട്ട് പെൻ്റഗൺ നീക്കമെന്ന് റിപ്പോർട്ട്

അതേസമയം, സൗദി അറേബ്യയ്ക്ക് നേരെയുള്ള ഹൂതി ആക്രമണങ്ങളിൽ തങ്ങൾക്ക് പങ്കില്ലെന്ന് ഇറാൻ വ്യക്തമാക്കി. ഇരുവിഭാഗങ്ങളും ആവശ്യപ്പെട്ടാൽ പ്രശ്നങ്ങൾ സമാധാനപരമായി പരിഹരിക്കാനും സംഘർഷം അവസാനിപ്പിക്കാനും ഇടപെടാൻ തയ്യാറാണെന്ന് ഇറാൻ വിദേശകാര്യ മന്ത്രാലയ വക്താവ് ഇസ്മായിൽ ബഘായി അറിയിച്ചു. ഹൂതികൾ സ്വന്തം താല്പര്യപ്രകാരമാണ് പ്രവർത്തിക്കുന്നതെന്നും സംഘർഷം വർധിക്കുന്നത് ആർക്കും ഗുണം ചെയ്യില്ലെന്നും ഇറാൻ വ്യക്തമാക്കി.

തുടർച്ചയായ മിസൈൽ, ഡ്രോൺ ആക്രമണങ്ങളുടെ പശ്ചാത്തലത്തിൽ സൗദിയിലെ യു.എസ് എംബസി അമേരിക്കൻ പൗരന്മാർക്ക് കർശന ജാഗ്രതാ നിർദ്ദേശം നൽകിയിട്ടുണ്ട്. വിമാനത്താവളങ്ങൾക്ക് നേരെ ആക്രമണ സാധ്യതയുള്ളതിനാലും വിമാന സർവീസുകൾ റദ്ദാക്കാൻ ഇടയുള്ളതിനാലും യാത്രക്കാർ അതീവ ജാഗ്രത പാലിക്കണമെന്നും സൗദി സിവിൽ ഡിഫൻസിൻ്റെ നിർദ്ദേശങ്ങൾ പിന്തുടരണമെന്നും എംബസി അറിയിച്ചു.

അതേസമയം ഹൂതികൾ ഏഡൻ അന്താരാഷ്ട്ര വിമാനത്താവളം ആക്രമിച്ചതായി യെമൻ വാർത്താവിതരണ മന്ത്രി മുഅമ്മർ അൽ-ഇർയാനി ആരോപിച്ചു. കെയ്‌റോയിലേക്ക് പുറപ്പെടാൻ തയ്യാറെടുക്കുകയായിരുന്ന യെമനിയ എയർലൈൻസ് വിമാനത്തിന് സമീപമാണ് രണ്ട് മിസൈലുകൾ പതിച്ചത് എന്നും അദ്ദേഹം പറഞ്ഞു. കഴിഞ്ഞ 24 മണിക്കൂറിനുള്ളിൽ തലസ്ഥാനമായ സന ഉൾപ്പെടെ യെമനിലെ വിവിധ പ്രദേശങ്ങളിലായി സൗദി യുദ്ധവിമാനങ്ങൾ 101 വ്യോമാക്രമണങ്ങളും മിസൈൽ ആക്രമണങ്ങളും നടത്തിയതായി ഹൂതി സൈനിക വക്താവ് യഹ്യ സരി ആരോപിച്ചു.

English Summary

US President Donald Trump stated that Saudi Arabia should accept Israel's help against Houthi rebels and could soon join the Abraham Accords, while Iran denied involvement in the escalating conflict.

ദുബായ്: ദുബായ് ഗ്ലോബൽ വില്ലേജിലേക്കുള്ള യാത്രയ്ക്ക് തയ്യാറെടുക്കയാണോ നിങ്ങൾ. ടക്സി ചാർജിനെ കുറിച്ച് ആലോചിച്ച് ഇനി ടെൻഷനടിക്കേണ്ട. ഗ്ലോബൽ വില്ലേജ് സന്ദർശകർക്കായി കുറഞ്ഞ നിരക്കിൽ പ്രത്യേക ബസ് സർവീസുകൾ ആർ.ടി.എ ആരംഭിച്ചിട്ടുണ്ട്. ഗ്ലോബൽ വില്ലേജിലേക്ക് നേരിട്ടുള്ള നാല് ബസ് റൂട്ടുകളാണ് പുനരാരംഭിച്ചിരിക്കുന്നത്. ഇതിനുപുറമെ അജ്മാൻ, റാസൽഖൈമ എന്നിവിടങ്ങളിൽ നിന്നുള്ള സന്ദർശകർക്കായും പ്രത്യേക ബസ് സർവീസുകൾ ഏർപ്പെടുത്തിയിട്ടുണ്ട്. ദുബായിൽ നിന്ന് ഗ്ലോബൽ വില്ലേജിലേക്കുള്ള ആർ.ടി.എ ബസുകളിൽ ഒരാൾക്ക് ഒരു വശത്തേക്ക് 10 ദിർഹമാണ് ടിക്കറ്റ് നിരക്ക്. നോൾ കാർഡ് ഉപയോഗിച്ച് യാത്രക്കാർക്ക് തുക നൽകാം.

ദുബായിലെ പ്രധാനപ്പെട്ട നാല് സ്റ്റേഷനുകളിൽ നിന്നാണ് ആർ.ടി.എ ബസുകൾ സർവീസ് നടത്തുന്നത്. അൽ റാഷിദിയ ബസ് സ്റ്റേഷനിൽ നിന്നുള്ള റൂട്ട് 102, അൽ ഗുബൈബ ബസ് സ്റ്റേഷനിൽ നിന്നുള്ള റൂട്ട് 104, മാൾ ഓഫ് ദി എമിറേറ്റ്സ് ബസ് സ്റ്റേഷനിൽ നിന്നുള്ള റൂട്ട് 106 എന്നീ ബസുകൾ ഓരോ 60 മിനിറ്റ് ഇടവിട്ടും, യൂണിയൻ ബസ് സ്റ്റേഷനിൽ നിന്നുള്ള റൂട്ട് 103 ബസ് ഓരോ 40 മിനിറ്റ് ഇടവിട്ടും സർവീസ് നടത്തും.

Also Read: ഷാർജയിലെ അൽ ദൈദ് എത്തിഹാദ് റെയിൽ സ്റ്റേഷനിലേക്ക് മുന്ന് ബസ് സർവിസുകൾ; റൂട്ടുകളും സമയക്രമവും അറിയൂ!

അജ്മാനിൽ നിന്നുള്ള സന്ദർശകർക്ക് അൽ മുസല്ല സ്റ്റേഷനിൽ നിന്നുള്ള ഇൻ്റർസിറ്റി ബസ് സർവീസ് ഉപയോഗിക്കാം. ഒരാൾക്ക് ഒരു വശത്തേക്ക് 25 ദിർഹമാണ് നിരക്ക്. പണമായോ മസാർ കാർഡ് വഴിയോ ടിക്കറ്റ് എടുക്കാം. പ്രവൃത്തിദിവസങ്ങളിലും വാരാന്ത്യങ്ങളിലും ഉച്ചയ്ക്ക് 2.15, വൈകുന്നേരം 4.45, 6.15 എന്നീ സമയങ്ങളിൽ അൽ മുസല്ല സ്റ്റേഷനിൽ നിന്ന് ഗ്ലോബൽ വില്ലേജിലേക്ക് ബസുണ്ടാകും. തിരികെ ഗ്ലോബൽ വില്ലേജിൽ നിന്ന് അജ്മാനിലേക്ക് പ്രവൃത്തിദിവസങ്ങളിൽ ഉച്ചയ്ക്ക് 3.45, രാത്രി 10.30, പുലർച്ചെ 12.30 എന്നീ സമയങ്ങളിലും, വാരാന്ത്യങ്ങളിൽ ഉച്ചയ്ക്ക് 3.45, രാത്രി 10.30, പുലർച്ചെ 1.30 എന്നീ സമയങ്ങളിലും ബസുകൾ പുറപ്പെടും.

റാസൽഖൈമയിൽ നിന്നുള്ളവർക്കായി വെള്ളി, ശനി, ഞായർ എന്നീ മൂന്ന് ദിവസങ്ങളിൽ പ്രത്യേക ബസ് സർവീസ് ഉണ്ടായിരിക്കും. ഒരാൾക്ക് ഒരു വശത്തേക്ക് 30 ദിർഹമാണ് നിരക്ക്. ഉച്ചയ്ക്ക് 3 മണിക്കും വൈകുന്നേരം 5 മണിക്കുമാണ് ഗ്ലോബൽ വില്ലേജിലേക്കുള്ള ബസുകൾ പുറപ്പെടുന്നത്. മടക്കയാത്രയുടെ സമയം ലഭ്യമല്ലാത്തതിനാൽ യാത്രക്കാർ അത് മുൻകൂട്ടി ചോദിച്ച് ഉറപ്പുവരുത്തേണ്ടതാണ്.

English Summary

Dubai's RTA has resumed four direct bus routes to Global Village with one-way fares starting at Dh10, alongside dedicated intercity bus services from Ajman and Ras Al Khaimah for visitors.

വാഷിംഗ്ടൺ: ഇറാനെതിരെ സൈനിക നടപടികൾ പുനരാരംഭിക്കാൻ യു.എസ് പ്രസിഡൻ്റ് ഡോണൾഡ് ട്രംപ് തയ്യാറെടുക്കുന്നതായി റിപ്പോർട്ട്. ഇതിൻ്റെ ഭാഗമായി അമേരിക്കയുടെ പക്കലുള്ള ഏറ്റവും വലിയ ആണവേതര ബോംബായ 'മദർ ഓഫ് ഓൾ ബോംബ്' ഇറാനെതിരെ പ്രയോഗിക്കുന്ന കാര്യം പെൻ്റഗൺ ആലോചിക്കുന്നതായി സി.എൻ.എൻ റിപ്പോർട്ട് ചെയ്തു. ഇറാനിലെ ഊർജ്ജ കേന്ദ്രങ്ങൾക്കും ആണവ നിലയങ്ങൾക്കും നേരെ ഈ ബോംഗ് പ്രയോഗിക്കാനാണ് ആലോചന എന്നാണ് റിപ്പോർട്ടുകൾ. ഇറാനെതിരെ ഇതുവരെ ഈ ബോംബ് അമേരിക്ക ഉപയോഗിച്ചിട്ടില്ല. ഇത് പ്രയോഗിച്ചാൽ യുദ്ധം കൂടുതൽ രൂക്ഷമായേക്കും.

അതേസമയം അമേരിക്ക ആഗ്രഹിക്കുന്ന തന്ത്രപരമായ നേട്ടങ്ങൾ ഇതിലൂടെ ലഭിക്കുമോ എന്ന കാര്യത്തിൽ വിദഗ്ധർക്കിടയിൽ സംശയങ്ങൾ നിലനിൽക്കുന്നുണ്ട്. വലിയ പ്രഹരശേഷിയുള്ള ആയുധമാണെങ്കിലും ഇറാനിലെ ഭൂമിക്കടിയിലുള്ള ആണവ കേന്ദ്രങ്ങളെ തകർക്കാൻ ഈ ബോംബ് അനുയോജ്യമാകില്ലെന്നാണ് സൈനിക വൃത്തങ്ങളുടെ വിലയിരുത്തൽ. ആഴത്തിലുള്ള ഭൂഗർഭ ബങ്കറുകളെ തുളച്ചുകയറി തകർക്കാൻ ശേഷിയുള്ള ബോംബല്ല ഇതെന്നും, മറിച്ച് ഉപരിതലത്തിലെ ഒരു വലിയ പ്രദേശത്തെ ഒരേസമയം തകർക്കാൻ മാത്രമാണ് ഇത് ഉപകരിക്കുകയെന്നും ഉദ്യോഗസ്ഥർ വ്യക്തമാക്കിയതായാണ് റിപ്പോർട്ടുകൾ.

Also Read: Saudi Attack: സൗദിയിൽ ആക്രമണങ്ങൾ; ഇന്ത്യക്കാർ പരിഭ്രാന്തരാകരുത്, നിർദേശവുമായി ഇന്ത്യൻ അംബാസഡർ

കഴിഞ്ഞ ഫെബ്രുവരിയിൽ യുഎസ്-ഇസ്രായേൽ സംയുക്ത ആക്രമണത്തോടെ ആരംഭിച്ച യുദ്ധം അവസാനിപ്പിക്കാനുള്ള നയതന്ത്ര ചർച്ചകളെല്ലാം നിലവിൽ വഴിമുട്ടി നിൽക്കുകയാണ്. അടുത്തിടെ സൈനിക നീക്കങ്ങൾ കുറച്ച അമേരിക്ക സാമ്പത്തിക സമ്മർദ്ദങ്ങളിൾ ശക്തമാക്കിയിരുന്നു. എന്നാൽ യുദ്ധത്തിൻ്റെ യഥാർത്ഥ ലക്ഷ്യങ്ങൾ പൂർത്തീകരിച്ചില്ലെങ്കിലും, വലിയൊരു ആക്രമണത്തിലൂടെ ശക്തി തെളിയിച്ച് യുദ്ധത്തിൽ നിന്ന് പിന്മാറാനുള്ള വഴികളാണ് സൈനിക ഉദ്യോഗസ്ഥർ ട്രംപിന് മുന്നിൽ വെക്കുന്നത് എന്ന് സി.എൻ.എൻ റിപ്പോർട്ട് ചെയ്യുന്നു.

നവംബറിൽ നടക്കാനിരിക്കുന്ന മിഡ്‌ടേം തിരഞ്ഞെടുപ്പിന് മുന്നോടിയായി ട്രംപിൻ്റെ ജനപ്രീതി കുറഞ്ഞുവരുന്നത് റിപ്പബ്ലിക്കൻ പാർട്ടിക്ക് വലിയ വെല്ലുവിളിയാകുന്നുണ്ട്. യുദ്ധം കാരണം ഉണ്ടായ ഇന്ധനവില വർധനയും വിലക്കയറ്റവും ജനങ്ങൾക്കിടയിൽ അസംതൃപ്തി ഉണ്ടാക്കിയിട്ടുണ്ട്. ഈ സാഹചര്യത്തിൽ പുതിയ ആക്രമണം നടത്തി അത് പരാജയപ്പെട്ടാൽ വലിയ രാഷ്ട്രീയ തിരിച്ചടിയുണ്ടാകും. കൂടാതെ ഇത്രയും പ്രഹരശേഷിയുള്ള ബോംബ് പ്രയോഗിച്ചാൽ സാധാരണക്കാരായ ജനങ്ങൾ കൊല്ലപ്പെടാൻ സാധ്യതയുണ്ടെന്ന ആശങ്കയും ശക്തമാണ്. ട്രംപിൻ്റെ ആദ്യ ഭരണകാലത്ത് 2017 ഏപ്രിലിൽ അഫ്ഗാനിസ്ഥാനിലെ ഐ.എസ് ഭീകരരുടെ തുരങ്കങ്ങൾക്കും ഒളിത്താവളങ്ങൾക്കും നേരെയാണ് യു.എസ് സൈന്യം ആദ്യമായി 'മദർ ഓഫ് ഓൾ ബോംബ്' പ്രയോഗിച്ചത്.

English Summary

The Pentagon is reportedly considering deploying the 'Mother Of All Bombs' (MOAB), America's largest non-nuclear weapon, against Iranian energy and nuclear facilities as President Donald Trump weighs new military action.

റിയാദ്: സൗദി അറേബ്യയില്‍ തുടരുന്ന ആക്രമണങ്ങളുടെ പശ്ചാത്തലത്തില്‍ രാജ്യത്ത് കഴിയുന്ന ഇന്ത്യന്‍ പൗരന്മാര്‍ക്ക് ജാഗ്രതാ നിര്‍ദേശവുമായി ഇന്ത്യന്‍ അംബാസഡര്‍. പരിഭ്രാന്തരാകാതെ ശാന്തരായിരിക്കണമെന്നും പ്രാദേശിക അധികൃതര്‍ നല്‍കുന്ന സുരക്ഷാ നിര്‍ദേശങ്ങള്‍ കൃത്യമായി പാലിക്കണമെന്നും വിപുല്‍ ആവശ്യപ്പെട്ടു. വ്യോമാക്രമണമുണ്ടാകുന്ന സാഹചര്യത്തില്‍ വീടിനുള്ളില്‍ തന്നെ കഴിയണം. ആക്രമണങ്ങളുമായി ബന്ധപ്പെട്ട ചിത്രങ്ങളും വീഡിയോകളും പകര്‍ത്തുകയോ സമൂഹമാധ്യമങ്ങളിലൂടെ പ്രചരിപ്പിക്കുകയോ ചെയ്യരുതെന്നും അദ്ദേഹം മുന്നറിയിപ്പ് നല്‍കി.

സൗദിയിലെ ഇന്ത്യന്‍ സമൂഹത്തെ അഭിസംബോധന ചെയ്ത് ഇന്ത്യന്‍ എംബസിയുടെ ഔദ്യോഗിക എക്‌സ് അക്കൗണ്ടില്‍ പങ്കുവെച്ച വീഡിയോ സന്ദേശത്തിലാണ് വിപുല്‍ ഇക്കാര്യം വ്യക്തമാക്കിയത്. സൗദിയിലെ സാധാരണ ജനങ്ങളെയും അടിസ്ഥാന സൗകര്യങ്ങളെയും ലക്ഷ്യമിട്ടുള്ള ആക്രമണങ്ങളെ ഇന്ത്യ അപലപിച്ചതായും സൗദി ജനതയ്ക്കും നേതൃത്വത്തിനുമൊപ്പം ഇന്ത്യ നിലകൊള്ളുന്നതായും അദ്ദേഹം പറഞ്ഞു. ആക്രമണങ്ങളില്‍ ജീവന്‍ നഷ്ടപ്പെട്ടവരുടെ കുടുംബങ്ങളുടെ ദുഃഖത്തില്‍ പങ്കുചേരുന്നതായും പരിക്കേറ്റവര്‍ വേഗത്തില്‍ സുഖം പ്രാപിക്കട്ടെയെന്നും അദ്ദേഹം കൂട്ടിച്ചേര്‍ത്തു.

ആക്രമണത്തില്‍ ഇന്ത്യക്കാരന് മരണം

ഒക്ടോബര്‍ 10ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലുണ്ടായ ആക്രമണത്തില്‍ ഒരു ഇന്ത്യക്കാരന്‍ കൊല്ലപ്പെടുകയും 11 പേര്‍ക്ക് പരിക്കേല്‍ക്കുകയും ചെയ്തതായി അംബാസഡര്‍ അറിയിച്ചു. മരിച്ചയാളുടെ കുടുംബവുമായി എംബസി അധികൃതര്‍ ബന്ധപ്പെടുന്നുണ്ട്. പരിക്കേറ്റ ഇന്ത്യക്കാര്‍ക്ക് ആവശ്യമായ സഹായം ലഭ്യമാക്കുന്നതിനായി ആശുപത്രി അധികൃതരുമായും അവരുടെ കുടുംബങ്ങളുമായും ഏകോപനം നടത്തുന്നുണ്ടെന്നും വിപുല്‍ വ്യക്തമാക്കി.

Also Read: Houthi Attack: ഇസ്രായേലിലേക്കും സൗദിയിലേക്കും മിസൈൽ ഭീഷണി; ചൈനീസ് സാങ്കേതികവിദ്യയിൽ ഹൂതികളുടെ നീക്കം

പരിക്കേറ്റവരുടെ ചികിത്സയും തുടര്‍പരിചരണവും ഉറപ്പാക്കുന്നതിനാണ് മുന്‍ഗണന നല്‍കുന്നത്. ആക്രമണത്തില്‍ പരിക്കേറ്റവരില്‍ ചിലര്‍ തീവ്രപരിചരണ വിഭാഗത്തിലും മറ്റുള്ളവര്‍ ആശുപത്രിയിലെ വിവിധ വാര്‍ഡുകളിലുമായി ചികിത്സയില്‍ കഴിയുന്നതായി ഇന്ത്യന്‍ എംബസിയുടെ ഒക്ടോബര്‍ 15ലെ അറിയിപ്പില്‍ വ്യക്തമാക്കിയിരുന്നു.

റിയാദ് വിമാനത്താവളം അടച്ചു

ആക്രമണത്തെത്തുടര്‍ന്ന് റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിലെ പ്രവര്‍ത്തനങ്ങള്‍ നിര്‍ത്തിവെച്ചിരിക്കുകയാണ്. ഇന്ത്യയില്‍നിന്ന് സൗദിയിലേക്കും തിരിച്ചുമുള്ള വിമാന സര്‍വീസുകള്‍ക്കും നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. എയര്‍ ഇന്ത്യ, എയര്‍ ഇന്ത്യ എക്‌സ്പ്രസ്, ആകാശ എയര്‍, ഇന്‍ഡിഗോ തുടങ്ങിയ ഇന്ത്യന്‍ വിമാനക്കമ്പനികള്‍ സര്‍വീസുകള്‍ താല്‍ക്കാലികമായി നിര്‍ത്തിവെച്ചതായി എംബസി അറിയിച്ചിരുന്നു.

English Summary

Indian Ambassador Vipul has issued a safety advisory for Indians in Saudi Arabia amid attacks. An Indian national was killed and 11 Indians were injured in an incident at Riyadh airport. The embassy has urged Indians to follow safety instructions, avoid sharing attack videos and check flight updates before travelling.

ദുബായ്: ഷാർജയിലെ അൽ ദൈദ് എത്തിഹാദ് ഋയിൽ സ്റ്റേഷനിലേക്കും തിരിച്ചും യാത്ര ചെയ്യുന്നവർക്കായി മൂന്ന് ബസ് സർവീസുകളുടെ റൂട്ടുകളും സമയക്രമവും ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി പുറത്തുവിട്ടു. ഇ.ആർ 1, ഇ.ആർ 2, ഇ.ആർ 3 എന്നിങ്ങനെ മൂന്ന് പ്രത്യേക സർവീസുകളാണ് യാത്രക്കാർക്കായി ഒരുക്കിയിരിക്കുന്നത്. അൽ ദൈദ് റെയിൽവേ സ്റ്റേഷനെ യഥാക്രമം അൽ മദാം, അൽ സജ, അൽ ജുബൈൽ ബസ് സ്റ്റേഷനുകളുമായി ബന്ധിപ്പിക്കുന്നതാണ് ഈ സർവീസുകൾ.

എമിറേറ്റ് റെയിൽ ശൃംഖലയിലേക്ക് പൊതുഗതാഗത സൗകര്യം എളുപ്പത്തിൽ ലഭ്യമാക്കുകയാണ് ഇതിലൂടെ ലക്ഷ്യമിടുന്നത്. 2026 സെപ്റ്റംബർ 30-നാണ് അൽ ദൈദ് ഉൾപ്പെടുന്ന എത്തിഹാദ് റെയിലിൻ്റെ പാസഞ്ചർ സർവീസുകൾ ആരംഭിച്ചത്.

ഇ.ആർ 1 അൽ മദാം - അൽ ദൈദ് സർവീസ്

അൽ മദാം ബസ് സ്റ്റേഷബെ അൽ ദൈദ് സ്റ്റേഷനുമായി ബന്ധിപ്പിക്കുന്നതാണ് ഇ.ആർ 1 സർവീസ്. ഏകദേശം ഒരു മണികൂറാണ് ഈ റൂട്ടിലെ യാത്രാസമയം. പാതയിലെ പ്രധാന സ്ഥലങ്ങളിൽ ബസ്സുന് സ്റ്റോപ്പുകൾ ഉണ്ടാകും. അൽ ദൈദ് സ്റ്റേഷനിൽ നിന്ന് രാവിലെ 6.40, 8.50, 9.50, 11.20 എന്നീ സമയങ്ങളിലും ഉച്ചയ്ക്ക് 12.30, 2.50, 3.20, വൈകുന്നേരം 5.00, 5.50, രാത്രി 8.00, 8.40, 10.50 എന്നീ സമയങ്ങളിലും ബസുകൾ പുറപ്പെടും.

Also Read: UAE Golden Visa: യു.എ.ഇ ഗോൾഡൻ വിസ സ്വന്തമാക്കണോ? നോമിനേഷനില്ലാതെ ഓൺലൈനായി അപേക്ഷിക്കാൻ അവസരം!

ഇ.ആർ 2 അൽ സജ - അൽ ദൈദ് സർവീസ്

അൽ സജ ബസ് സ്റ്റേഷനിൽ നിന്ന് അൽ ദൈദ് റെയിൽ സ്റ്റേഷനിലേക്കുള്ള സർവീസാണിത്. ഏകദേശം 43 മിനിറ്റാണ് ഈ റൂട്ടിലെ യാത്രാ സമയം. അൽ ദൈദ് സ്റ്റേഷനിൽ നിന്ന് രാവിലെ 6.40, 7.55, 9.50, 10.55 എന്നീ സമയങ്ങളിലും ഉച്ചയ്ക്ക് 12.30, 1.25, 2.40, 3.55, വൈകുന്നേരം 5.50, 6.55, രാത്രി 8.00, 8.55 എന്നീ സമയങ്ങളിലും ഈ റൂട്ടിൽ സർവീസുകൾ ലഭ്യമാണ്.

ഇ.ആർ 3 അൽ ജുബൈൽ - അൽ ദൈദ് സർവീസ്

ഷാർജ നഗരമധ്യത്തിൽ നിന്ന് അൽ ദൈദിലേക്ക് യാത്ര ചെയ്യുന്നവർക്ക് അൽ ജുബൈൽ ബസ് സ്റ്റേഷനുമായി ബന്ധിപ്പിക്കുന്ന ഇ.ആർ 3 സർവീസ് ഉപയോഗപ്പെടുത്താം. അൽ ദൈദ് സ്റ്റേഷനിൽ നിന്ന് രാവിലെ 6.40, 9.50, ഉച്ചയ്ക്ക് 12.30, 2.50, വൈകുന്നേരം 5.50, രാത്രി 8.00 എന്നീ സമയങ്ങളിലാണ് ബസുകൾ പുറപ്പെടുന്നത്.

English Summary

Sharjah RTA has released routes and schedules for three bus services—ER1, ER2, and ER3—linking Al Madam, Al Saja’a, and Al Jubail bus stations with the Al Dhaid Etihad Rail station.

വാഷിംഗ്ടൺ: അമേരിക്കയിലെ ഇല്ലിനോയിസിൽ ഹിന്ദു ആരാധനാലയത്തിന് നേരെ വെടിവയ്പ്പ് നടത്താൻ പദ്ധതിയിട്ട 19-കാരൻ അറസ്റ്റിൽ. ചിക്കാഗോയ്ക്ക് സമീപമുള്ള ഒറോറ മേഖലയിലെ ക്ഷേത്രം ലക്ഷ്യമിട്ട് ആക്രമണം നടത്താൻ ശ്രമിച്ച പാലറ്റൈൻ സ്വദേശി അലക്സാണ്ട്രോസ് പപ്പൊറാക്കിസ് ആണ് പിടിയിലായത്. ഇയാൾ ഇന്ത്യൻ വംശജർക്കെതിരെ അക്രമം നടത്താൻ പദ്ധതിയിട്ടിരുന്നതായും പോലീസ് കണ്ടെത്തി. ഒഹായോയിലെ സ്വാമിനാരായൺ ഹിന്ദു ക്ഷേത്രത്തിന് നേരെ ആക്രമണമുണ്ടായി രണ്ടാഴ്ച പിന്നിടുമ്പോഴുമാണ് ആശങ്കയുണർത്തുന്ന സംഭവം.

പാലറ്റൈനിലെ ടാക്കോ ബെൽ റെസ്റ്റോറൻ്റിലെ ജീവനക്കാരനാണ് അറസ്റ്റിലായ പപ്പൊറാക്കിസ്. വെടിവയ്പ്പിനുള്ള പദ്ധതി വിവരിക്കുന്ന രേഖകളുടെയും ആയുധങ്ങളുടെയും ചിത്രങ്ങൾ പ്രതി മറ്റൊരാൾക്ക് അയച്ചു നൽകിയിരുന്നു. ഇയാൾ നൽകിയ വിവരത്തിൻ്റെ അടിസ്ഥാനത്തിലാണ് പോലീസ് അന്വേഷണം ആരംഭിച്ചത്. ഒക്ടോബർ 11 ഞായറാഴ്ച ആക്രമണം നടത്താനായിരുന്നു പദ്ധതി. ഞായറാഴ്ച 'ഒരു പ്രത്യേക ദിവസമായിരിക്കും' എന്ന് ഇയാൾ സഹപ്രവർത്തകരോട് പറഞ്ഞിരുന്നു. എന്നാൽ അന്നേദിവസം തോക്ക് ജാമായതിനാൽ വേഗത്തിൽ അവിടെനിന്ന് രക്ഷപ്പെട്ടതായി ഇയാൾ ഒരു സഹപ്രവർത്തകനെ ഫോണിൽ വിളിച്ച് അറിയിച്ചിരുന്നു

Also Read: Houthi Attack: ഇസ്രായേലിലേക്കും സൗദിയിലേക്കും മിസൈൽ ഭീഷണി; ചൈനീസ് സാങ്കേതികവിദ്യയിൽ ഹൂതികളുടെ നീക്കം

തുടർന്ന് പോലീസ് നടത്തിയ നീക്കത്തിനൊടുവിൽ ഒക്ടോബർ 11-ന് വൈകുന്നേരം വീട്ടിൽ നിന്ന് പുറത്തിറങ്ങുന്നതിനിടെയാണ് പ്രതിയെ കസ്റ്റഡിയിലെടുത്തത്. ദക്ഷിണേഷ്യൻ വംശജർ, പ്രത്യേകിച്ച് ഇന്ത്യൻ വംശജർക്കെതിരെ അക്രമം നടത്തണമെന്ന തീവ്ര വംശീയ നിലപാടുകളാണ് ആക്രമണത്തിനായി പ്രതി തയ്യാറാക്കിയ മാനിഫെസ്റ്റോയിൽ ഉണ്ടായിരുന്നത്. പ്രതിയുടെ വീട്ടിൽ നടത്തിയ പരിശോധനയിൽ റൈഫിൾ, തിരകൾ നിറച്ച മാഗസിനുകൾ, നൂറുകണക്കിന് വെടിയുണ്ടകൾ, ബുള്ളറ്റ് പ്രൂഫ് ജാക്കറ്റ് തുടങ്ങിയവ പോലീസ് കണ്ടെടുത്തു.

സംഭവത്തിന് പിന്നാലെ ഒറോറ മേഖലയിലെ ഹിന്ദു ക്ഷേത്രങ്ങൾക്ക് പോലീസ് ജാഗ്രതാ നിർദ്ദേശം നൽകുകയും സുരക്ഷാ ഭീഷണിയെക്കുറിച്ച് ക്ഷേത്ര ഭാരവാഹികളെ അറിയിക്കുകയും ചെയ്തു. ഭീകരാക്രമണത്തിന് ഭീഷണി മുഴക്കൽ, അനധികൃതമായി ആയുധം കൈവശം വയ്ക്കൽ തുടങ്ങിയ കുറ്റങ്ങളാണ് പ്രതിക്കെതിരെ ചുമത്തിയിരിക്കുന്നത്. ബുധനാഴ്ച കുക്ക് കൗണ്ടി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഒക്ടോബർ 30-ന് കേസ് വീണ്ടും പരിഗണിക്കും. ആരാധനാലയങ്ങളുടെ സുരക്ഷയ്ക്ക് പ്രഥമ പരിഗണന നൽകുമെന്നും എഫ്.ബി.ഐയുമായി ചേർന്ന് വിശദമായ അന്വേഷണം നടത്തിവരികയാണെന്നും പാലറ്റൈൻ പോലീസ് അറിയിച്ചു.

English Summary

US police arrested 19-year-old Alexandros Paporakis in Illinois for plotting an attack on an Aurora Hindu temple. Authorities recovered a rifle, ammunition, and a manifesto targeting people of Indian descent.

യെമനിലെ ഇറാന്‍ അനുകൂല ഹൂതി വിമതര്‍ ചൈനയില്‍നിന്ന് ലഭിക്കുന്ന ഘടകങ്ങള്‍ ഉപയോഗിച്ച് കൂടുതല്‍ പ്രഹരശേഷിയുള്ള ബാലിസ്റ്റിക് മിസൈലുകള്‍ നിര്‍മിക്കാന്‍ ശ്രമിക്കുന്നതായി റിപ്പോര്‍ട്ട്. പദ്ധതി വിജയിച്ചാല്‍ സൗദി അറേബ്യയിലെയും ഇസ്രായേലിലെയും ലക്ഷ്യങ്ങളിലേക്ക് കൂടുതല്‍ ദൂരത്തില്‍ ആക്രമണം നടത്താന്‍ ഹൂതികള്‍ക്ക് സാധിച്ചേക്കും. ആയുധവ്യാപാരവും സംഘര്‍ഷമേഖലകളിലെ ആയുധങ്ങളുടെ ഉറവിടവും നിരീക്ഷിക്കുന്ന ബ്രിട്ടന്‍ ആസ്ഥാനമായുള്ള സംഘടനയായ കോണ്‍ഫ്‌ലിക്റ്റ് ആര്‍മമെന്റ് റിസര്‍ച്ചിന്റെ (സിഎആര്‍) അന്വേഷണത്തെ ഉദ്ധരിച്ചാണ് റിപ്പോര്‍ട്ട് പുറത്തുവന്നത്.

ഇറാന്റെ മിസൈല്‍ മാതൃക പിന്തുടരുന്നു

ഇറാന്‍ വികസിപ്പിച്ച ഖൈബര്‍ ഷെക്കാന്‍ എന്ന കൃത്യതയോടെ ലക്ഷ്യം ഭേദിക്കാന്‍ ശേഷിയുള്ള ബാലിസ്റ്റിക് മിസൈലിന്റെ മാതൃകയില്‍ പുതിയ ആയുധം നിര്‍മിക്കാനാണ് ഹൂതികളുടെ ശ്രമമെന്നാണ് റിപ്പോര്‍ട്ടിലെ കണ്ടെത്തല്‍. ഏകദേശം 1,200 മൈല്‍ അഥവാ 1,900 കിലോമീറ്റര്‍ വരെ സഞ്ചരിക്കാന്‍ ശേഷിയുള്ള മിസൈലാണ് ലക്ഷ്യമിടുന്നതെന്നാണ് വിലയിരുത്തല്‍. ഇത്തരമൊരു ദൂരപരിധി സൗദി അറേബ്യയിലെയും ഇസ്രായേലിലെയും വിവിധ പ്രദേശങ്ങളെ ആക്രമണപരിധിയില്‍ കൊണ്ടുവരും.

2022ലാണ് ഇറാന്‍ ഖൈബര്‍ ഷെക്കാന്‍ മിസൈല്‍ ആദ്യമായി അവതരിപ്പിച്ചത്. സഞ്ചാരപാതയില്‍ മാറ്റം വരുത്താന്‍ കഴിയുന്ന രൂപകല്‍പ്പനയും വേഗത്തില്‍ വിന്യസിക്കാനുള്ള ശേഷിയും ഈ ആയുധത്തിന്റെ പ്രധാന സവിശേഷതകളാണ്. ഇതുമൂലം പരമ്പരാഗത വ്യോമപ്രതിരോധ സംവിധാനങ്ങള്‍ക്ക് മിസൈലിനെ തടയുന്നത് കൂടുതല്‍ ബുദ്ധിമുട്ടായേക്കാം.

ചരക്കുകളില്‍ മിസൈല്‍ ഘടകങ്ങള്‍

യെമന്‍ അധികൃതര്‍ 2025ല്‍ തടഞ്ഞുവെച്ച രണ്ട് ചരക്കുകപ്പല്‍ ശേഖരങ്ങളുമായി ബന്ധപ്പെട്ട വിവരങ്ങളാണ് സിഎആര്‍ അന്വേഷണത്തിന് അടിസ്ഥാനം. മറ്റ് ഉല്‍പ്പന്നങ്ങള്‍ക്കൊപ്പം ഒളിപ്പിച്ച നിലയില്‍ മിസൈല്‍ നിര്‍മാണത്തിന് ഉപയോഗിക്കാവുന്ന ഉപകരണങ്ങളും ഭാഗങ്ങളും കണ്ടെത്തിയതായി റിപ്പോര്‍ട്ടില്‍ പറയുന്നു. മിസൈലിന്റെ റോക്കറ്റ് മോട്ടോറുമായി ബന്ധപ്പെട്ട ലോഹഭാഗങ്ങള്‍, പറക്കുന്നതിനിടെ സ്ഥിരത നിലനിര്‍ത്താന്‍ സഹായിക്കുന്ന ചിറകുകളുടെ ഘടകങ്ങള്‍, റോക്കറ്റ് മോട്ടോര്‍ ജ്വലിപ്പിക്കുന്നതിനുള്ള ഉപകരണങ്ങള്‍ എന്നിവ പിടിച്ചെടുത്ത വസ്തുക്കളില്‍ ഉള്‍പ്പെടുന്നു.

അതുപോലെ, മിസൈല്‍ പറക്കുമ്പോള്‍ ഉണ്ടാകുന്ന അതിശക്തമായ ചൂടില്‍നിന്ന് ചില ഭാഗങ്ങളെ സംരക്ഷിക്കാന്‍ ഉപയോഗിക്കുന്ന പ്രത്യേക വസ്തുക്കളും കണ്ടെത്തിയതായി റിപ്പോര്‍ട്ടുണ്ട്. ചരക്കുകളുമായി ബന്ധപ്പെട്ട രേഖകളില്‍ ചൈനീസ് കമ്പനിയുടെ വിവരങ്ങള്‍ ഉണ്ടായിരുന്നുവെന്നാണ് അന്വേഷണത്തിലെ മറ്റൊരു കണ്ടെത്തല്‍. എന്നാല്‍ കമ്പനിയുടെ പേര് റിപ്പോര്‍ട്ടില്‍ വെളിപ്പെടുത്തിയിട്ടില്ല. ചില ഉപകരണങ്ങള്‍ക്ക് സിവിലിയന്‍ ആവശ്യങ്ങള്‍ക്കും ഉപയോഗമുണ്ടാകാമെങ്കിലും മറ്റുചിലത് മിസൈല്‍ നിര്‍മാണത്തിനായി പ്രത്യേകം രൂപകല്‍പ്പന ചെയ്തതാണെന്നാണ് വിലയിരുത്തല്‍.

ചൈനയുടെ പങ്ക് ചര്‍ച്ചയാകുന്നു

ഹൂതികള്‍ക്കായി എത്തുന്ന ചരക്കുകളില്‍ ചൈനീസ് കമ്പനികളുമായി ബന്ധപ്പെട്ട ഉല്‍പ്പന്നങ്ങള്‍ കൂടുതലായി കണ്ടെത്തിയിട്ടുണ്ടെന്നാണ് ഐക്യരാഷ്ട്രസഭയുടെ റിപ്പോര്‍ട്ടുകളും ആയുധവിദഗ്ധരുടെ വിവരങ്ങളും സൂചിപ്പിക്കുന്നത്. ഹൂതികളുടെ ഡ്രോണ്‍, മിസൈല്‍ പദ്ധതികളുമായി ബന്ധമുണ്ടെന്ന ആരോപണത്തില്‍ ചില ചൈനീസ് വിതരണക്കാര്‍ക്കെതിരെ അമേരിക്ക നേരത്തെയും നടപടികള്‍ സ്വീകരിച്ചിട്ടുണ്ട്.

അതേസമയം, ഹൂതികള്‍ക്ക് ആയുധങ്ങള്‍ നല്‍കുന്നില്ലെന്നും യെമനുമായി ബന്ധപ്പെട്ട ഐക്യരാഷ്ട്രസഭയുടെ ആയുധ ഉപരോധം പാലിക്കുന്നുണ്ടെന്നും ചൈന വ്യക്തമാക്കിയിട്ടുണ്ട്. സാധാരണ വ്യാവസായിക ആവശ്യങ്ങള്‍ക്കും സൈനിക ആവശ്യങ്ങള്‍ക്കും ഉപയോഗിക്കാവുന്ന ഇരട്ട ഉപയോഗ ഉപകരണങ്ങളുടെ കൈമാറ്റം ഈ വിഷയത്തില്‍ പ്രധാന വെല്ലുവിളിയാണ്.

English Summary

Houthis are reportedly seeking to develop long-range ballistic missiles using Chinese components, potentially bringing targets in Israel and Saudi Arabia within range. The findings raise concerns about the group’s growing weapons capabilities and its international supply networks.

ദുബായ്: യു.എ.ഇ ഗോൾഡൻ വിസ സ്വന്തമാക്കാൻ ആഗ്രഹിക്കുന്നവർക്ക് അധികൃതരുടെ പ്രത്യേക നോമിനേഷൻ ഇല്ലാതെ തന്നെ സ്വന്തം നിലയിൽ അപേക്ഷിക്കാൻ ഇപ്പോൾ അവസരമുണ്ട്. ഐ.സി.പി ഒരുക്കിയിട്ടുള്ള ഓൺലൈൻ സേവനത്തിലൂടെ യോഗ്യതയുള്ളവർക്ക് സ്വയം നോമിനേഷൻ സമർപ്പിക്കാവുന്നതാണ്.

ആർക്കൊക്കെ അപേക്ഷിക്കാം?

യു.എ.ഇയിലെ പൊതു നിക്ഷേപങ്ങളിലോ റിയൽ എസ്റ്റേറ്റ് മേഖലയിലോ പണം മുടക്കുന്ന നിക്ഷേപകർക്കും, നിശ്ചിത മാനദണ്ഡങ്ങൾ പാലിക്കുന്ന ബിസിനസ് ഉടമകൾക്കും അപേക്ഷിക്കാം. കൂടാതെ ഡോക്ടർമാർ, ഗവേഷകർ, അധ്യാപകർ, ആരോഗ്യ പ്രവർത്തകർ, കലാകാരന്മാർ, കായികതാരങ്ങൾ, ഡിജിറ്റൽ സാങ്കേതിക വിദഗ്ധർ, മികച്ച വിജയം നേടിയ സ്കൂൾ-യൂണിവേഴ്സിറ്റി വിദ്യാർത്ഥികൾ, ജീവകാരുണ്യ പ്രവർത്തനങ്ങളിൽ വ്യക്തിമുദ്ര പതിപ്പിച്ചവർ എന്നിവർക്കും സ്വയം നോമിനേഷൻ സമർപ്പിക്കാൻ അർഹതയുണ്ട്.

ഓൺലൈനായി അപേക്ഷിക്കേണ്ട വിധം

ഐ.സി.പിയുടെ ഔദ്യോഗിക വെബ്സൈറ്റിൽ പ്രവേശിച്ച ശേഷം നിങ്ങളുടെ യോഗ്യതയ്ക്ക് അനുയോജ്യമായ വിഭാഗം തിരഞ്ഞെടുക്കുക. തുടർന്ന് യോഗ്യത പരിശോധിക്കുന്നതിനായുള്ള ചോദ്യങ്ങൾക്ക് കൃത്യമായ ഉത്തരം നൽകണം. ഉദാഹരണത്തിന്, സർവകലാശാലാ ബിരുദധാരികളാണെങ്കിൽ അവരുടെ ജി.പി.എ, പഠന വിഷയം, പഠനം പൂർത്തിയാക്കിയ വർഷം, വിദ്യാഭ്യാസ മന്ത്രാലയം സാക്ഷ്യപ്പെടുത്തിയ ബിരുദ സർട്ടിഫിക്കറ്റിൻ്റെ വിവരങ്ങൾ എന്നിവ നൽകേണ്ടിവരും. ഈ വിവരങ്ങൾ നൽകിക്കഴിയുമ്പോൾ നിങ്ങൾ ഏത് വിഭാഗത്തിലുള്ള ഗോൾഡൻ വിസയ്ക്കാണ് അർഹരെന്ന് സിസ്റ്റം കാണിച്ചുതരും.

Also Read: വിസ വാഗ്ദനം ചെയ്ത് വ്യാപക തട്ടിപ്പ്; യു.എ.ഇയിലെ പ്രവാസികൾക്ക് കർശന മുന്നറിയിപ്പുമായി ഇന്ത്യൻ എംബസി

പ്രാഥമിക യോഗ്യത ഉറപ്പാക്കിയ ശേഷം 'യുഎഇ പാസ്' ഉപയോഗിച്ച് ലോഗിൻ ചെയ്ത് വ്യക്തിഗത വിവരങ്ങൾ നൽകണം. എമിറേറ്റ്സ് ഐഡിയിലെ വിവരങ്ങളുടെ അടിസ്ഥാനത്തിൽ അപേക്ഷകൻ്റെ പേര്, പൗരത്വം, എമിറേറ്റ്, പാസ്‌പോർട്ട് നമ്പർ, ജനനത്തീയതി, ജന്മദേശം, യുണിഫൈഡ് നമ്പർ തുടങ്ങിയ വിവരങ്ങൾ സിസ്റ്റം തന്നെ പൂരിപ്പിക്കും. തുടർന്ന് എമിറേറ്റ്സ് ഐഡിയിൽ രേഖപ്പെടുത്തിയിട്ടുള്ള അതേ തൊഴിൽ തന്നെ ഡ്രോപ്പ്ഡൗൺ മെനുവിൽ നിന്ന് തിരഞ്ഞെടുക്കാൻ പ്രത്യേകം ശ്രദ്ധിക്കണം. അതിനുശേഷം ആവശ്യമായ രേഖകൾ അപ്‌ലോഡ് ചെയ്യാം.

അപേക്ഷാ ഫീസും തുടർനടപടികളും

ഇ-സർവീസ് ഫീസായ 29 ദിർഹവും ഐ.സി.പി ഫീസായ 122 ദിർഹവും ചേർത്ത് ആകെ 155 ദിർഹമാണ് നോമിനേഷൻ ഫീസായി വരുന്നത്. പണം അടച്ചുകഴിഞ്ഞാൽ ഒരു റഫറൻസ് നമ്പർ ലഭിക്കും. നോമിനേഷൻ അംഗീകരിക്കപ്പെട്ടാൽ ഐ.സി.പി വഴി തന്നെ ബാക്കി നടപടിക്രമങ്ങളിലേക്ക് കടക്കാവുന്നതാണ്. നോമിനേഷന് അംഗീകാരം ലഭിച്ചതുകൊണ്ട് മാത്രം വിസ ഉറപ്പാകുന്നില്ല. ബന്ധപ്പെട്ട അധികൃതരുടെ അന്തിമ പരിശോധനകൾക്ക് ശേഷം മാത്രമേ ഗോൾഡൻ വിസ അനുവദിക്കു.

English Summary

Foreign nationals can apply for a UAE Golden Visa without prior nomination through the ICP online portal. Eligible investors, professionals, and students can check eligibility and submit requests for Dh155.

റോം: ലിയോ പതിന്നാലാമൻ മാർപാപ്പയ്ക്ക് കാൻസർ സ്ഥിരീകരിച്ചതായി വത്തിക്കാൻ. ശ്വാസകോശത്തിൽ നടത്തിയ ശസ്ത്രക്രിയയ്ക്ക് പിന്നാലെ ശ്വാസകോശ കാൻസർ (ലങ് അഡിനോകാർസിനോമ) സ്ഥിരീകരിച്ചതായി വത്തിക്കാൻ മെഡിക്കൽ ബുള്ളറ്റിനിലൂടെ അറിയിച്ചു. 71 കാരനായ മാർപാപ്പയുടെ വലത് ശ്വാസകോശത്തിൻറെ താഴത്തെ ലോബ് (lower lobe) ചൊവ്വാഴ്ച നടത്തിയ 90 മിനിറ്റ് നീണ്ട ശസ്ത്രക്രിയയിലൂടെ നീക്കം ചെയ്തു. ചൊവ്വാഴ്ച റോമിലെ ജെമെല്ലി ആശുപത്രിയിൽ നടന്ന ശസ്ത്രക്രിയയിൽ ശ്വാസകോശത്തിൽ കണ്ടെത്തിയ മുഴ വിജയകരമായി നീക്കി. തുടർന്ന് മാർപാപ്പയെ മുറിയിലേക്ക് മാറ്റിയതായും വത്തിക്കാൻ വക്താവ് അറിയിച്ചു.

ശ്വാസകോശത്തിൽ മുഴ കണ്ടെത്തിയതായി ലിയോ പതിനാലാമൻ മാർപാപ്പ ദിവസങ്ങൾക്ക് മുൻപ് ലോകത്തെ അറിയിച്ചിരുന്നു. ഉടൻ ശസ്ത്രക്രിയയ്ക്ക് വിധേയനാകുമെന്നും മാർപാപ്പ അറിയിച്ചിരുന്നു. ഇതിന് പിന്നാലെ നടന്ന ശസ്ത്രക്രിയയ്ക്കിടെ എടുത്ത ടിഷ്യു പരിശോധനയിലാണ് കാൻസർ ബാധ സ്ഥിരീകരിച്ചത്. പ്രാരംഭ ഘട്ടത്തിൽ തന്നെ രോഗം കണ്ടെത്താനായത് ആശ്വാസകരമാണെന്ന് ഡോക്ടർമാർ അറിയിച്ചു.

Also Read: പുടിനുമായി ട്രംപിന്റെ ഡീസൽ ഇടപാട്; അമേരിക്കയിൽ പ്രതിഷേധം ശക്തം

സാധാരണ നിലയിൽ ബോധം വീണ്ടെടുത്ത മാർപാപ്പ ആശുപത്രിയിൽ വിശ്രമത്തിലാണെന്ന് മുഖ്യ സർജൻ പ്രൊഫസർ സ്റ്റെഫാനോ മാർഗരിറ്റോറ വ്യക്തമാക്കി. മുന്നറിയിപ്പ് എന്ന നിലയിൽ ഒക്ടോബർ 20 വരെ മാർപാപ്പയുടെ എല്ലാ പൊതുപരിപാടികളും കൂടിക്കാഴ്ചകളും റദ്ദാക്കിയിട്ടുണ്ട്. നവംബർ ആദ്യം നിശ്ചയിച്ചിട്ടുള്ള ലാറ്റിൻ അമേരിക്കൻ പര്യടനത്തെക്കുറിച്ചുള്ള വിവരങ്ങൾ പിന്നീട് അറിയിക്കും.

അമേരിക്കക്കാരനായ ലിയോ പതിനാലാമൻ മാർപാപ്പയ്ക്ക് ഇതിനു മുൻപ് ഗുരുതരമായ ആരോഗ്യപ്രശ്നങ്ങൾ ഒന്നും തന്നെ റിപ്പോർട്ട് ചെയ്തിരുന്നില്ല. 1955-ൽ ഷിക്കാഗോയിൽ ജനിച്ച റോബർട്ട് പ്രിവോസ്റ്റ് എന്ന ലിയോ പതിനാലാമൻ മാർപാപ്പ 2025-ൽ ആണ് കത്തോലിക്കാ സഭയുടെ തലവനായി ചുമതലയേറ്റത്. ഇപ്പോൾ രോഗവിവരം പുറത്തുവന്നതിന് പിന്നാലെ ലോകമെമ്പാടുമുള്ള ദശലക്ഷക്കണക്കിന് കത്തോലിക്കാ വിശ്വാസികൾ അ‌ദ്ദേഹത്തിന്റെ രോഗമുക്തിക്കായുള്ള പ്രാർഥനയിലാണ്.

English Summary

The Vatican has confirmed that Pope Leo XIV has been diagnosed with cancer. A medical bulletin issued by the Vatican stated that lung cancer (lung adenocarcinoma) was confirmed following surgery performed on his lung. The diagnosis was established through the examination of tissue samples taken during the surgery, which was conducted after a lung tumor was detected. Doctors noted that the early detection of the disease is a positive development.

വാഷിങ്ടണ്‍: റഷ്യന്‍ പ്രസിഡന്റ് വളാഡിമിര്‍ പുടിനുമായി അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഉണ്ടാക്കിയ ഡീസല്‍ കരാറിനെതിരെ ഭരണകക്ഷിയിലെയും പ്രതിപക്ഷത്തെയും സെനറ്റര്‍മാര്‍ രംഗത്ത്. യുക്രെയ്നുമായുള്ള യുദ്ധം തുടരുന്നതിനിടെ റഷ്യയ്ക്ക് ഇന്ധനം ആഗോള വിപണിയില്‍ വില്‍ക്കാന്‍ അവസരം നല്‍കുന്നത് മോസ്‌കോയുടെ യുദ്ധനീക്കങ്ങള്‍ക്ക് സാമ്പത്തിക സഹായമാകുമെന്നാണ് സെനറ്റര്‍മാരുടെ പ്രധാന വിമര്‍ശനം. ഇന്ധനവില കുറയ്ക്കുക എന്ന ലക്ഷ്യവും ഈ കരാറിലൂടെ കാര്യമായി നടപ്പാകില്ലെന്നും അവര്‍ ചൂണ്ടിക്കാട്ടുന്നു.

കരാര്‍ പിന്‍വലിക്കണമെന്ന് ആവശ്യം

റിപ്പബ്ലിക്കന്‍, ഡെമോക്രാറ്റിക് പാര്‍ട്ടികളില്‍ നിന്നുള്ള 12 സെനറ്റര്‍മാരാണ് കരാര്‍ പിന്‍വലിക്കണമെന്ന് ആവശ്യപ്പെട്ട് ട്രംപിന് കത്തയച്ചത്. ഡെമോക്രാറ്റിക് സെനറ്റര്‍ റിച്ചാര്‍ഡ് ബ്ലൂമെന്‍തലിന്റെ നേതൃത്വത്തിലാണ് കത്ത് തയാറാക്കിയത്. ട്രംപിന്റെ റിപ്പബ്ലിക്കന്‍ പാര്‍ട്ടിയില്‍ നിന്നുള്ള ആറ് അംഗങ്ങളും ഇതില്‍ ഒപ്പുവെച്ചിട്ടുണ്ട്.

റഷ്യന്‍ ഡീസല്‍ ആഗോള വിപണിയില്‍ സ്വതന്ത്രമായി വില്‍ക്കാന്‍ അനുവദിക്കുന്നത് അമേരിക്കയുടെ സുരക്ഷാ താല്‍പര്യങ്ങളെ ബാധിക്കുമെന്നും യുക്രെയ്നിലെ ജനങ്ങളോടും സഖ്യകക്ഷികളോടുമുള്ള വഞ്ചനയാണെന്നും സെനറ്റര്‍മാര്‍ കത്തില്‍ ആരോപിച്ചു. കരാര്‍ റദ്ദാക്കണമെന്നും റഷ്യയ്‌ക്കെതിരായ സാമ്പത്തിക സമ്മര്‍ദം വര്‍ധിപ്പിക്കണമെന്നും അവര്‍ ആവശ്യപ്പെട്ടു.

ഇന്ധനവില കുറയ്ക്കാന്‍ നീക്കം

അമേരിക്കയില്‍ പെട്രോള്‍, ഡീസല്‍ വില ഉയര്‍ന്ന സാഹചര്യത്തിലാണ് റഷ്യയില്‍നിന്നുള്ള ഇന്ധനവിതരണം വര്‍ധിപ്പിക്കാന്‍ ട്രംപ് ശ്രമിക്കുന്നത്. ഇറാനുമായുള്ള യുദ്ധം ഉള്‍പ്പെടെയുള്ള സാഹചര്യങ്ങള്‍ ഊര്‍ജവിലയില്‍ സമ്മര്‍ദം സൃഷ്ടിക്കുന്നതിനിടെ ഇന്ധനലഭ്യത കൂട്ടി വില നിയന്ത്രിക്കുകയാണ് ലക്ഷ്യം. റഷ്യന്‍ പ്രസിഡന്റ് പുടിന്‍ ഉടന്‍ 3 ലക്ഷം ടണ്ണിലധികം ഡീസല്‍ ലഭ്യമാക്കാമെന്നും നവംബറില്‍ അഞ്ച് ലക്ഷം ടണ്‍ കൂടി നല്‍കാമെന്നും സമ്മതിച്ചതായി ട്രംപ് അറിയിച്ചിരുന്നു. ഇതിന് പിന്നാലെ റഷ്യയില്‍ നിന്നുള്ള ഡീസലിന്റെ വില്‍പ്പനയും ഇറക്കുമതിയും ഉള്‍പ്പെടെയുള്ള ഇടപാടുകള്‍ക്ക് അമേരിക്കന്‍ ട്രഷറി വകുപ്പ് താല്‍ക്കാലിക അനുമതിയും നല്‍കി.

Also Read: Houthi Attack: ഹൂതി ആക്രമണ ഭീതി, കൊട്ടാരങ്ങൾ മാറി സൗദി കിരീടാവകാശി

എന്നാല്‍ ഈ നീക്കം അമേരിക്കയിലെ ഇന്ധനവിലയില്‍ വലിയ മാറ്റമുണ്ടാക്കില്ലെന്നാണ് സെനറ്റര്‍മാരുടെ വാദം. വില കുറയ്ക്കുന്നതിന്റെ പ്രയോജനം പരിമിതമായിരിക്കുമ്പോള്‍ റഷ്യയ്ക്ക് ലഭിക്കുന്ന അധിക വരുമാനം യുക്രെയ്നിലെ യുദ്ധം തുടരാന്‍ ഉപയോഗിക്കപ്പെടുമെന്നാണ് അവരുടെ ആശങ്ക.

റഷ്യയ്‌ക്കെതിരായ ഉപരോധം ശക്തമാക്കണം

റഷ്യയുടെ യുദ്ധനീക്കങ്ങളെ സാമ്പത്തികമായി ദുര്‍ബലപ്പെടുത്തുന്നതിനുള്ള നടപടികള്‍ തുടരണമെന്നാണ് സെനറ്റര്‍മാര്‍ ആവശ്യപ്പെടുന്നത്. കഴിഞ്ഞ മാസം കോണ്‍ഗ്രസ് അംഗീകരിച്ച പുതിയ ഉപരോധ നടപടികള്‍ ഉപയോഗിച്ച് റഷ്യയ്ക്കും യുദ്ധത്തെ പിന്തുണയ്ക്കുന്ന രാജ്യങ്ങള്‍ക്കും മേല്‍ സമ്മര്‍ദം വര്‍ധിപ്പിക്കണമെന്നും അവര്‍ ട്രംപിനോട് ആവശ്യപ്പെട്ടു. റഷ്യയുമായി വ്യാപാരബന്ധം പുലര്‍ത്തുന്ന ചൈനയെയും കത്തില്‍ പ്രത്യേകം പരാമര്‍ശിക്കുന്നുണ്ട്.

English Summary

US senators from both major parties have criticised President Donald Trump’s diesel deal with Russia and urged him to withdraw it. They argue that allowing Russian diesel sales could generate revenue for Moscow amid the Ukraine war, while doing little to reduce fuel prices in the United States.

ദുബായ്: യു.എ.ഉയുTe വിവിധ ഭാഗങ്ങളിൽ മഴ പെയ്ത് തുടങ്ങിയതോടെ ജാഗ്രതാ നിർദ്ദേശവുമായി അധികൃതർ. ചൊവ്വാഴ്ച ഉച്ചകഴിഞ്ഞാണ് പലയിടങ്ങളിലും മഴ ആരംഭിച്ചത്. ഷാർജയിലെ ഫിലി ഉൾപ്പെടെയുള്ള പ്രദേശങ്ങളിൽ ശക്തമായ മഴ ലഭിച്ചതായി ‘സ്റ്റോം സെൻ്റർ’ പുറത്തുവിട്ട ദൃശ്യങ്ങളിൽ നിന്നും വ്യക്തമാണ്. മലയോര മേഖലയോT ചേർന്ന് കിടക്കുന്ന പ്രദേശമാണിത്. വൈകുന്നേരത്തോടെ രാജ്യത്തിൻ്റെ കിഴക്കൻ മേഖലകളിൽ കൂടുതൽ മഴ ലഭിക്കാൻ സാധ്യതയുണ്ടെന്നും അതിനാൽ പൊതുജനങ്ങൾ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകിയിട്ടുണ്ട്.

الإمارات : الان هطول أمطار الخير على فلي في الشارقة #أخبار_الإمارات #مركز_العاصفة
13/10/2026 https://t.co/Aq4JJniu0o

— مركز العاصفة (@Storm_centre) October 13, 2026

വിവിധ പ്രദേശങ്ങളിൽ മഴമേഘങ്ങൾ രൂപപ്പെട്ടതിനാൽ യു,എ.ഇ ദേശീയ കാലാവസ്ഥാ കേന്ദ്രം യെല്ലോ അലേർട്ട് പ്രഖ്യാപിച്ചിട്ടുണ്ട്. ഒക്ടോബർ 13 ചൊവ്വാഴ്ച ഉച്ചക്ക് രണ്ട് മണി മുതൽ രാത്രി 9 മണിവരെയാണ് അലേർട്ട് ബാധകമാവുക. മഴ ആരംഭിച്ച പശ്ചാത്തലത്തിൽ വാഹനമോടിക്കുന്നവർ അതീവ ജാഗ്രത പാലിക്കണമെന്ന് അബുദാബി പൊലീസ് നിർദ്ദേശം നൽകിയിട്ടുണ്ട്. റോഡുകളിലെ ഇലക്ടോണിക് ഇൻഫർമേഷൻ ബോർഡുകളിൽ പ്രദർശിപ്പിച്ചിട്ടുള്ള വേഗപരിധി കൃത്യമായി പാലിക്കണമെന്നും പൊലീസ് എക്സിലൂടെ പങ്കുവച്ച അറിയിപ്പിൽ പറയുന്നു.

Also Read: വിസ വാഗ്ദനം ചെയ്ത് വ്യാപക തട്ടിപ്പ്; യു.എ.ഇയിലെ പ്രവാസികൾക്ക് കർശന മുന്നറിയിപ്പുമായി ഇന്ത്യൻ എംബസി

രാജ്യത്തിൻ്റെ കിഴക്കൻ ഭാഗത്ത്, അൽ ഐൻ മേഖലയിൽ നിന്ന് വടക്കോട്ട് പർവതപ്രദേശങ്ങളിലൂടെ ഫുജൈറയിലേക്കും കിഴക്കൻ തീരത്തേക്കും നീളുന്ന പ്രദേശവും, പടിഞ്ഞാറൻ അബുദാബിയിലെ അൽ ദഫ്ര മേഖലയിലുള്ള ഉൾനാടൻ പ്രദേശവുമാണ് പ്രധാനമായും ഈ മുന്നറിയിപ്പിൻ്റെ പരിധിയിൽ വരുന്നത്. ഈ പ്രദേശങ്ങളിൽ പെട്ടന്നുള്ള മഴയ്ക്കും, ഇടിമിന്നലിനും ശക്തമായ കാറ്റിനും സാധ്യതയുണ്ടെന്നും, മലയോര മേഖലകളിലും ഉൾനാടൻ പ്രദേശങ്ങളിലും കാലാവസ്ഥ അതിവേഗം മാറിയേക്കാമെന്നും മുന്നറിയിപ്പിൽ പറയുന്നു.

മിന്നൽ പ്രളയത്തിന് സാധ്യത

മലയോര മേഖലകളിൽ ചിലയിടങ്ങളിൽ പെട്ടന്നുള്ള വെള്ളപ്പൊക്കത്തിനും സാധ്യതയുണ്ട് എന്ന് എൻ.സി.എം മുന്നറിയിപ്പ് നൽകുന്നു. ഇന്ന് രാത്രി 9 മണിവരെയാണ് ഈ മുന്നറിയിപ്പ് ബാധകമാവുക. മഴയത്ത് പുറത്തിറങ്ങുന്നവർ ജാഗ്രത പാലിക്കണം. മഴവെള്ളപ്പാച്ചിലിന് സാധ്യതയുള്ള താഴ്വരകളിലേക്കും വാദികളിലേക്കും ഒരു കാരണവശാലും പോകരുത്. ഇവിടെ പെട്ടന്ന് വെള്ളം ഉയരാൻ സാധ്യതയുണ്ട്. വാഹനമോടിക്കുമ്പോൾ വേഗത കുറയ്ക്കുകയും മുന്നിലുള്ള വാഹനത്തിൽ നിന്നും സുരക്ഷിതമായ അകലം പാലിക്കുകയും വേണം. ഏറ്റവും പുതിയ കാലാവസ്ഥാ അറിയിപ്പുകൾക്കായി പൊലീസും അധികൃതരും നൽകുന്ന ഔദ്യോഗിക അറിയിപ്പുകൾ മാത്രമേ പിന്തുടരാവു എന്നും മുന്നറിയിപ്പിൽ വ്യക്തമാക്കുന്നു.

https://t.co/MbDAK6LCkH

— المركز الوطني للأرصاد (@ncmuae) October 13, 2026

English Summary

Rain showers hit parts of the UAE on Tuesday, prompting the NCM to issue yellow and flash flood alerts. Police advise motorists to drive safely and avoid flood-prone valleys.

സൗദി അറേബ്യയ്‌ക്കെതിരായ യെമനിലെ ഹൂതി വിമതരുടെ ആക്രമണങ്ങള്‍ ശക്തമാകുന്നതിനിടെ കിരീടാവകാശി മുഹമ്മദ് ബിന്‍ സല്‍മാന്റെ സുരക്ഷ വര്‍ധിപ്പിച്ചതായി റിപ്പോര്‍ട്ട്. അതീവ സുരക്ഷാ സംവിധാനങ്ങളും ബങ്കറുകളുമുള്ള രാജകീയ കൊട്ടാരങ്ങളിലേക്ക് അദ്ദേഹത്തെ മാറ്റിപ്പാര്‍പ്പിക്കുന്നതായാണ് പുറത്തുവരുന്ന വിവരം. പുറത്തുനിന്നുള്ള ഭീഷണികള്‍ വര്‍ധിക്കുന്ന സാഹചര്യത്തില്‍ പ്രത്യേകമായി നിയോഗിച്ച സുരക്ഷാ ഉദ്യോഗസ്ഥരുടെ സംരക്ഷണത്തിലാണ് മുഹമ്മദ് ബിന്‍ സല്‍മാന്‍ കഴിയുന്നതെന്നാണ് റിപ്പോര്‍ട്ടുകള്‍ വ്യക്തമാക്കുന്നത്.

കഴിഞ്ഞ ചൊവ്വാഴ്ച ദേശീയ രക്തദാന ക്യാംപെയിനിന്റെ ഭാഗമായി രക്തം ദാനം ചെയ്യാനെത്തിയപ്പോഴാണ് അദ്ദേഹം അവസാനമായി പൊതുവേദിയില്‍ പ്രത്യക്ഷപ്പെട്ടത്. അതിനുശേഷം അദ്ദേഹത്തിന്റെ പൊതുപരിപാടികളെക്കുറിച്ചുള്ള വിവരങ്ങള്‍ പുറത്തുവന്നിട്ടില്ല.

റിയാദ് വിമാനത്താവളത്തില്‍ ആക്രമണം

സൗദി തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ മിസൈല്‍ ആക്രമണമാണ് മേഖലയില്‍ ആശങ്ക വര്‍ധിപ്പിച്ചത്. സൗദി അധികൃതരുടെ കണക്കനുസരിച്ച് ആക്രമണത്തില്‍ 13 പേര്‍ കൊല്ലപ്പെടുകയും മുന്നൂറിലധികം പേര്‍ക്ക് പരിക്കേല്‍ക്കുകയും ചെയ്തു. ഒരു പതിറ്റാണ്ടിനിടെ രാജ്യം നേരിട്ട ഏറ്റവും ഗുരുതരമായ ആക്രമണങ്ങളിലൊന്നായാണ് ഇതിനെ വിലയിരുത്തുന്നത്.

ആക്രമണത്തെത്തുടര്‍ന്ന് വിമാനത്താവളത്തിന്റെ പ്രവര്‍ത്തനം തടസപ്പെട്ടു. തുടര്‍ച്ചയായ ആക്രമണങ്ങള്‍ സൗദിയുടെ വ്യോമപ്രതിരോധ സംവിധാനങ്ങള്‍ക്കും സുരക്ഷാ സംവിധാനങ്ങള്‍ക്കും വലിയ വെല്ലുവിളിയാണ് ഉയര്‍ത്തുന്നത്. രാജ്യത്തെ പ്രധാന അടിസ്ഥാന സൗകര്യങ്ങള്‍ ലക്ഷ്യമിട്ടുള്ള നീക്കങ്ങള്‍ കൂടുതല്‍ സംഘര്‍ഷാവസ്ഥയിലേക്ക് നയിക്കുമെന്ന ആശങ്കയും ശക്തമാണ്.

Also Read: തുടർച്ചയായ ആക്രമണം: റിയാദിലെ കിംഗ് ഖാലിദ് വിമാനത്താവളം പൂർണമായും അടച്ചു

ഹൂതികള്‍ക്കെതിരെ തിരിച്ചടിക്ക് സൗദി

ആക്രമണങ്ങള്‍ക്ക് ശക്തമായ മറുപടി നല്‍കുമെന്ന സൂചനയാണ് സൗദി നേതൃത്വം നല്‍കുന്നത്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപും ഹൂതികള്‍ക്കെതിരായ സൗദിയുടെ സൈനിക നീക്കങ്ങളില്‍ അമേരിക്ക നേരിട്ട് പങ്കുചേരാനുള്ള സാധ്യത പരിഗണിക്കുന്നതായി വ്യക്തമാക്കിയിട്ടുണ്ട്. സൗദിയുടെ സഖ്യരാജ്യങ്ങളും പിന്തുണ അറിയിച്ചിട്ടുണ്ട്. ഇതോടെ സംഘര്‍ഷം കൂടുതല്‍ വ്യാപിക്കാനുള്ള സാധ്യതയും ഉയരുന്നു.

യെമനിലെ ആഭ്യന്തരയുദ്ധത്തില്‍ സൗദി സര്‍ക്കാര്‍ അനുകൂല വിഭാഗത്തെ പിന്തുണച്ച് രാജ്യം ഇടപെട്ടതോടെയാണ് സൗദിയും ഹൂതികളും തമ്മിലുള്ള ഏറ്റുമുട്ടല്‍ ശക്തമായത്. 2022ല്‍ നിലവില്‍ വന്ന വെടിനിര്‍ത്തല്‍ ധാരണയ്ക്ക് പിന്നാലെ സംഘര്‍ഷത്തില്‍ കുറവുണ്ടായിരുന്നെങ്കിലും ഈ വര്‍ഷം ജൂലൈയില്‍ അത് തകരുകയും ആക്രമണങ്ങള്‍ വീണ്ടും രൂക്ഷമാകുകയുമായിരുന്നു.

English Summary

Saudi Crown Prince Mohammed bin Salman is reportedly moving between secure royal palaces amid growing Houthi attack threats. The reported security measures come as tensions rise in the region and concerns over Saudi Arabia's security increase.

റിയാദ്: ഹൂതി വിമതരുടെ തുടർച്ചയായ മിസൈൽ ആക്രമണങ്ങളുടെ പശ്ചാത്തലത്തിൽ സൗദി അറേബ്യയുടെ തലസ്ഥാനമായ റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളം ഒക്ടോബർ 17 വരെ പൂർണമായി അടച്ചു. ജനറൽ ഏവിയേഷൻ പൈലറ്റുമാർക്ക് നൽകിയ പുതിയ നോട്ടാം നിർദ്ദേശ പ്രകാരം ഒക്ടോബർ 17 ശനിയാഴ്ച രാത്രി 9 മണി വരെ കിംഗ് ഖാലിദ് വിമാനത്താവളം വഴിയുള്ള മുഴുവൻ വ്യോമ ഗതാഗതവും പൂർണമായും നിർത്തിവക്കാനാണ് തീരുമാനം. വിമാനത്താവളത്തിൻ്റെ പ്രവർത്തനങ്ങൾ താൽക്കാലികമായി നിർത്തിവക്കുന്നതായി സൗദി ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചതിന് പിന്നാലെയാണ് നോട്ടാം അറിയിപ്പ് ഉൾപ്പടെ പുറത്തുവന്നിരിക്കുന്നത്.

വിമാനത്താവളത്തിലെ സുരക്ഷാ ക്രമീകരണങ്ങൾ പൂർണമായും ഉറപ്പുവരുത്തുന്നതിന് വേണ്ടിയാണ് അടച്ചുപൂട്ടൽ നീട്ടിയതെന്ന് അധികൃതർ വ്യക്തമാക്കി. വിമാനത്താവളത്തിലെ കേടുപാടുകൾ വിലയിരുത്തുന്നതിനും, സർവീസുകൾ പുനരാരംഭിക്കുന്നതിന് മുൻപായി പ്രവർത്തനക്ഷമത പരിശോധിക്കുന്നതിനും ഈ സമയം അനിവാര്യമാണെന്നും സിവിൽ ഏവിയേഷൻ അതോരിറ്റി വിശദീകരിച്ചു. നിലവിൽ വിമാനത്താവളത്തിൽ സുരക്ഷാ പരിശോധനകൾ പുരോഗമിക്കുകയാണ്.

Also Read: റിയാദ് വിമാനത്താവളത്തിൽ ഹൂതികളുടെ മിസൈൽ ആക്രമണം: ഇന്ത്യൻ പൗരൻ കൊല്ലപ്പെട്ടു; ജാഗ്രതാ നിര്‍ദ്ദേശവുമായി എംബസി

വിമാനത്താവളം അടച്ചിടുന്നത് സൗദി അറേബ്യയുടെ വ്യോമയാന ഗതാഗതത്തെ കാര്യമായി തന്നെ ബാധിക്കും. പ്രതിദിനം 700-ഓളം വിമാന സർവീസുകളെയാണ് ഈ അടച്ചുപൂട്ടൽ ബാധിക്കുക എന്ന് ഫ്ലൈറ്റ് ട്രാക്കിംഗ് സംവിധാനമായ ഫ്ലൈറ്റ് റഡാർ 24 റിപ്പോർട്ട് ചെയ്യുന്നു. യാത്രാ തടസ്സങ്ങളും സുരക്ഷാ പ്രശ്നങ്ങളും കണക്കിലെടുത്ത് ഒക്ടോബർ 17 വരെ റിയാദിലേക്കും തിരിച്ചുമുള്ള തങ്ങളുടെ മുഴുവൻ സർവീസുകളും റദ്ദാക്കിയതായി ഗൾഫ് എയർ ഉൾപ്പടെയുള്ള പ്രമുഖ വിമാനക്കമ്പനികൾ അറിയിച്ചിട്ടുണ്ട്.

കഴിഞ്ഞ ദിവസങ്ങളിലായി കനത്ത ആക്രമണമാണ് കിംഗ് ഖാലിദ് വിമാനത്താവളത്തിന് നേരെ ഉണ്ടായത്. ശനിയാഴ്ച പാസഞ്ചർ ടെർമിനലിന് നേരെ ഉണ്ടായ ആക്രമണത്തിൽ ഒരു ഇന്ത്യക്കാരനുൾപ്പടെ 12 പേർ കൊല്ലപ്പെടുകയും മുന്നൂറിലധികം പേർക്ക് പരിക്കേൽക്കുകയും ചെയ്തിരുന്നു. പരുക്കേറ്റ മറ്റു 11 ഇന്ത്യക്കാരിൽ മൂന്ന് പേർ തീവ്ര പരിചരണ വിഭാഗത്തിലാണ്. ഇതിന് പിന്നാലെ ഞായറാഴ്ച നടന്ന ആക്രമണത്തിൽ ഒരു പാകിസ്ഥാൻ പൗരൻ കൊല്ലപ്പെടുകയും 11 പേർക്ക് പരിക്കേൽക്കുകയും ചെയ്തിരുന്നു.

English Summary

Saudi Arabia has extended the closure of Riyadh’s King Khalid International Airport until October 17 for safety checks following deadly Houthi missile attacks that killed thirteen people and disrupted flights.

അബുദാബി/ദുബായ്: കൃത്യമായ പരിശോധനകൾക്ക് ശേഷം മാത്രമേ വിസ മൈഗ്രേഷൻ ഏജസികൾക്ക് പണം നൽകാവു എന്ന് ഇന്ത്യൻ പൗരന്മാർക്ക് കർശന മുന്നറിയിപ്പ് നൽകി അബുദാബിയിലെ ഇന്ത്യൻ എംബസിയും, ദുബായിലെ ഇന്ത്യൻ കോൺസുലേറ്റും. വാഗ്ദാനം ചെയ്ത സേവനങ്ങൾ നൽകാതെ പണം തട്ടുന്ന ഏജൻസികൾക്കെതിരെ നിരവധി പരാതികൾ ലഭിച്ച സാഹചരത്തിലാണ് മുന്നറിയിപ്പുമായി അധികൃതർ രംഗത്തെത്തിയിരിക്കുന്നത്. തിങ്കളാഴ്ച തങ്ങളുടെ ഔദ്യോഗിക സോഷ്യൽ മിഡിയ അക്കൗണ്ടുകൾ വഴിയാണ് യു.എ.ഇയിലെ ഇന്ത്യൻ മിഷനുകൾ പ്രവാസികൾക്കായി ജാഗ്രതാ നിർദ്ദേശം പുറപ്പെടുവിച്ചത്.

ഇന്ത്യക്ക് പുറത്ത്, പ്രത്യേകിച്ച് യു.എ.ഇയിൽ പ്രവർത്തിക്കുന്ന ചില, വിസ, മൈഗ്രേഷൻ ഏജൻസികൾക്കെതിരെയാണ് പ്രധാനമായും പരാതികൾ ഉയർന്നിരിക്കുന്നത്. സാമൂഹ്യ മാധ്യമങ്ങളിലെ പരസ്യങ്ങൾ വഴിയാണ് ഇത്തരം വ്യാജ ഏജൻസികൾ ആളുകളെ വലയിലാക്കുന്നത്. മറ്റു രാജ്യങ്ങളിലേക്ക് തൊഴിൽ വിസയും റെസിഡൻ്റ് വിസയും സംഘടിപ്പിച്ച് നൽകാമെന്ന് ഇവർ വാഗ്ദാനം നൽകും. ഇത് വിശ്വസിച്ച് ഏജൻസികളെ സമീപിക്കുന്നവരിൽ നിന്നും വിസ പ്രോസസിംഗ് ഫീസ് എന്ന പേരിൽ വൻ തുകയാണ് ഇവർ മുൻകൂറായി ഈടാക്കുന്നത്. എന്നാൽ പണം കൈപ്പറ്റിയ ശേഷം ഇവർ വാഗ്ദാനം ചെയ്ത സേവനങ്ങൾ നൽകുകയോ, പണം തിരികെ നൽകുകയോ ചെയ്യുന്നില്ല എന്ന് ഇന്തൂൻ മിഷനുകൾ വ്യക്തമാക്കുന്നു.

Also Read: ദുബായ് ഗ്ലോബൽ വില്ലേജ് 31-ാം സീസൺ ഒക്ടോബർ 14-ന് ആരംഭിക്കും; പ്രവേശന നിരക്കുകൾ പ്രഖ്യാപിച്ചു

ഇത്തരം കാര്യങ്ങളിൽ പ്രവാസികൾ അതിവ ജാഗ്രത പാലിക്കണം എന്ന് ഇന്ത്യൻ മിഷനുകൾ മുന്നറിയിപ്പ് നൽകുന്നു. സാമൂഹ്യ മാധ്യമങ്ങളിലെ പരസ്യങ്ങൾ കണ്ട് മാത്രം ഇത്തരം ഏജൻസികളെ അന്ധമായി വിശ്വസിക്കരുത്. വിസ അനുവദിക്കുക എന്നത് പുർണമായും അതത് രാജ്യങ്ങളിൽ സർക്കാരുകളുടെ മാത്രം തീരുമാനമാണ്. അതിനാൽ വിസ ശരിയാക്കി നൽകാം എന്ന് ഉറപ്പ് നൽകുന്ന ഒരു ഏജൻസിക്കും പണം നൽകരുതെന്നും അധികൃതർ വ്യക്തമാക്കി. ഏതെങ്കിലും രാജ്യത്തേക്ക് പോകാൻ ആഗ്രഹിക്കുന്നു എങ്കിൽ വിസ സംബന്ധിച്ച വിവരങ്ങൾക്ക് ആ രാജ്യത്തിൻ്റെ ഔദ്യോഗിക എംബസിയുമായോ, കോൺസുലേറ്റുമായോ നേരിട്ട് ബന്ധപ്പെടുകയാണ് വേണ്ടത് എന്നും മുന്നറിയിപ്പിൽ വ്യക്തമാക്കുന്നു.

📢 IMPORTANT: ADVISORY ON FRAUDULENT VISA AND MIGRATION PROCESSING AGENCIES https://t.co/oBpe01rnns

— India in Dubai (@cgidubai) October 12, 2026

ഇതാദ്യമായല്ല യു.എ.യിലെ പ്രവാസികൾക്ക് ഇന്ത്യൻ മിഷനുകൾ ഇത്തരത്തിൽ മുന്നറിയിപ്പ് നൽകുന്നത്. കഴിഞ്ഞ ഓഗസ്റ്റിലും സമാനമായ രീതിയിൽ തട്ടിപ്പുകാർക്കെതിരെ അധികൃതർ ജാഗ്രതാ നിർദ്ദേശം നൽകിയിരുന്നു. സാധാരണ തൊഴിലാളികളെ ലക്ഷ്യമിട്ട് വിസയും മറ്റു സേവനങ്ങളും വാഗ്ദാനം ചെയ്ത് പ്രവാസികളുടെ പാസ്പോർട്ട് എമിറേറ്റ് ഐഡി, ബൈയോമെട്രിക് തുടങ്ങിയ വിവരങ്ങൾ കൈക്കലാക്കുന്ന സംഘങ്ങൾക്കെതിരെയായിരുന്നു അന്ന് മുന്നറിയിപ്പ് നൽകിയിരുന്നത്. പിന്നാലെ സെപ്റ്റംബർ 21 ന് ദുബായ് കോൺസുലേറ്റ് ഒരു പ്രത്യേക ക്യാമ്പും സംഘടിപ്പിച്ചിരുന്നു.

English Summary

Indian missions in the UAE have warned expats against fraudulent visa and migration agencies on social media. These scammers collect fees by falsely promising guaranteed employment and residency visas.

സ്റ്റോക്ക്ഹോം: 2026-ലെ സാമ്പത്തിക ശാസ്ത്രത്തിനുള്ള നൊബേൽ പുരസ്കാരം പ്രഖ്യാപിച്ചു. പ്രമുഖ അമേരിക്കൻ സാമ്പത്തിക ശാസ്ത്രജ്ഞരായ റോബർട്ട് ഇ. ഹാൾ, മൈക്കൽ വുഡ്ഫോർഡ്  എന്നിവരാണ് ഈ വർഷത്തെ പുരസ്കാരത്തിന് അർഹരായത്. മാക്രോ ഇക്കണോമിക്സിലെയും സാമ്പത്തിക സ്ഥിരതയുമായി ബന്ധപ്പെട്ട  ഗവേഷണങ്ങളിലെയും നിർണായക സംഭാവനകളാണ് ഇവരെ പുരസ്കാരത്തിന് അർഹരാക്കിയത്.

സ്റ്റോക്ക്ഹോമിലെ റോയൽ സ്വീഡിഷ് അക്കാദമി ഓഫ് സയൻസസാണ് പുരസ്കാരം പ്രഖ്യാപിച്ചത്. ആഗോളതലത്തിൽ സർക്കാരുകൾക്കും സെൻട്രൽ ബാങ്കുകൾക്കും സാമ്പത്തിക ആഘാതങ്ങളെ കൃത്യമായി നിയന്ത്രിക്കാനും നേരിടാനും സഹായിക്കുന്ന സാമ്പത്തിക മാതൃകകളാണ് ഇരുവരും ചേർന്ന് രൂപപ്പെടുത്തിയത്. സാമ്പത്തിക വളർച്ചയിലെ ചാഞ്ചാട്ടങ്ങളും മാന്ദ്യങ്ങളും ലഘൂകരിക്കുന്നതിലും വിപണിയിൽ സ്ഥിരത കൊണ്ടുവരുന്നതിലും ഇവരുടെ പഠനങ്ങൾ നിർണ്ണായക പങ്കുവഹിച്ചതായി അക്കാദമി വിലയിരുത്തി.

നൊബേൽ പുരസ്കരം

ആൽഫ്രഡ് നോബേലിന്റെ ഓർമ്മയ്ക്കായി സ്വീഡിഷ് സെൻട്രൽ ബാങ്ക്1968-ൽ ഏർപ്പെടുത്തിയതാണ് സാമ്പത്തിക ശാസ്ത്ര പുരസ്കാരം.  ഈ വർഷം പ്രഖ്യാപിക്കുന്ന അവസാനത്തെ നോബൽ സമ്മാനമാണ്. 12 ദശലക്ഷം സ്വീഡിഷ് ക്രൗൺ (ഏകദേശം 1.2 ദശലക്ഷം യു.എസ്. ഡോളർ) ആണ് ഇതിന്റെ സമ്മാനത്തുക.

ALSO READ: തമിഴ്നാടിന്റെ ‘കൊച്ചുമകൾ’! സമാധാന നൊബേൽ ഇന്ത്യൻ വംശജ നവനീതം നവി പിള്ളയ്ക്ക്

1895-ൽ ആൽഫ്രഡ് നോബേൽ തയ്യാറാക്കിയ വിൽപ്പത്രത്തിൽ ഉൾപ്പെട്ടിരുന്ന അഞ്ച് നോബേൽ പുരസ്കാരങ്ങളിൽ ഒന്നല്ലിതെങ്കിലും എല്ലാ വർഷവും ഡിസംബർ 10-ന് നൊബേൽ ചരമവാർഷിക ദിനത്തിൽ മറ്റ് പുരസ്കാരങ്ങൾക്കൊപ്പമാണ് ഇതും സമ്മാനിക്കുന്നത്. 1969-ലാണ് സാമ്പത്തിക ശാസ്ത്രത്തിനുള്ള ഈ പുരസ്കാരം ആദ്യമായി നൽകിത്തുടങ്ങിയത്.

ദക്ഷിണാഫ്രിക്കൻ നിയമജ്ഞയായ നവ നീതം നവി പിള്ളയ്ക്ക് സമാധാനത്തിനുള്ള നൊബേൽ പുരസ്കാരം ലഭിച്ച് മൂന്ന് ദിവസങ്ങൾക്ക് ശേഷമാണ് സാമ്പത്തിക ശാസ്ത്ര നൊബേൽ പ്രഖ്യാപിച്ചത്. മനുഷ്യാവകാശ സംരക്ഷണത്തിനും അന്താരാഷ്ട്ര നീതിന്യായ വ്യവസ്ഥയ്ക്കും നൽകിയ സമഗ്ര സംഭാവനകൾക്കാണ് പുരസ്കാരം ലഭിച്ചത്.

2025-ലെ പുരസ്കരാം

സാങ്കേതികവിദ്യ സാമ്പത്തിക വളർച്ചയെ എങ്ങനെ സ്വാധീനിക്കുന്നുവെന്നും നയിക്കുന്നുവെന്നുമുള്ള ഗവേഷണങ്ങൾക്ക്, 2025-ൽ അമേരിക്കൻ-ഇസ്രായേലി ഗവേഷകനായ ജോയൽ മോക്കിർ, ഫ്രാൻസിന്റെ ഫിലിപ്പ് അഗിയോൺ, കാനഡയുടെ പീറ്റർ ഹോവിറ്റ് എന്നിവർക്കാണ് ഈ പുരസ്കാരം ലഭിച്ചത്.  സമാധാന നൊബേൽ നേടിയ നവി പിള്ള, സാഹിത്യത്തിനുള്ള നൊബേൽ സ്വന്തമാക്കിയ കനേഡിയൻ-ഐസ്‌ലാൻഡിക് എഴുത്തുകാരി ആനി കാർസണും എന്നിങ്ങനെ ഈ വർഷത്തെ നൊബേൽ സീസണിൽ ഇതുവരെ രണ്ട് വനിതകളാണ് ആദരിക്കപ്പെട്ടത്.

English Summary:

American economists Robert E. Hall of Stanford University and Michael Woodford of Columbia University have been awarded the 2026 Nobel Prize in Economic Sciences for their pioneering research on the microeconomic foundations of macroeconomic stabilisation.

റിയാദ്: സൗദി അറേബ്യയിലെ റിയാദ്‌ ഖാലിദ് അന്താരാഷ്ട്ര വിമാനത്താവളത്തിലുണ്ടായ മിസൈൽ ആക്രമണത്തിൽ പരിക്കേറ്റ് ചികിത്സയിലായിരുന്ന ഇന്ത്യൻ പൗരൻ മരിച്ചു. ഹൈദരാബാദ് സ്വദേശിയായ മുഹമ്മദ് യൂസഫ് അലിയാണ് മരിച്ചത്. ഉംറ നിർവഹിക്കാനായി മദീനയിലേക്ക് യാത്ര ചെയ്യുന്നതിനിടെയാണ് സംഭവം നടന്നതെന്ന് എഐഎംഐഎം നേതാവ് അസദുദ്ദീൻ ഒവൈസി അറിയിച്ചു. ആക്രമണത്തിൽ യൂസഫ് അലിയുടെ ഭാര്യയ്ക്കും മക്കൾക്കും പരിക്കേറ്റിട്ടുണ്ടെന്ന് അദ്ദേഹം പറഞ്ഞു. യൂസഫ് അലിയുടെ മരണത്തോടെ മിസൈൽ ആക്രമണത്തിൽ മരിച്ചവരുടെ എണ്ണം 13 ആയി ഉയർന്നു. മുന്നൂറിലധികം പേർക്ക് പരിക്കേറ്റു.

യെമനിലെ ഇറാൻ പിന്തുണയുള്ള ഹൂതി വിമതരാണ് ഈ ആക്രമണത്തിന് പിന്നിലെന്ന് സൗദി നേതൃത്വത്തിലുള്ള സഖ്യസേന ആരോപിച്ചു. സൗദി അറേബ്യയിലെ ഇന്ത്യൻ എംബസി ഇന്ത്യൻ പൗരന്റെ മരണം സ്ഥിരീകരിച്ചു. മരിച്ചയാളുടെ കുടുംബവുമായി ബന്ധപ്പെടുന്നുണ്ടെന്നും മൃതദേഹം നാട്ടിലെത്തിക്കാൻ ആവശ്യമായ സഹായം നൽകുമെന്നും എംബസി അറിയിച്ചു.

"ഒക്ടോബർ 10-ന് റിയാദ് വിമാനത്താവളത്തിലുണ്ടായ ആക്രമണത്തിൽ പരിക്കേറ്റ ഇന്ത്യന്‍ പൗരന്‍ മരിച്ചു. മരിച്ചയാളുടെ കുടുംബാംഗങ്ങളെ അനുശോചനം അറിയിക്കുന്നു. കുടുംബവുമായി ഞങ്ങൾ ബന്ധപ്പെടുന്നുണ്ട്; മൃതദേഹം എത്രയും വേഗം നാട്ടിലെത്തിക്കുന്നതിനുള്ള എല്ലാ സഹായവും ഞങ്ങൾ നൽകും"-ഇന്ത്യൻ എംബസി എക്സ് പ്ലാറ്റ്‌ഫോമിൽ കുറിച്ചു.

യൂസഫിന്റെ മകന്റെ കാല്‍മുട്ടിന് ശസ്ത്രക്രിയ നടക്കുന്നുണ്ടെന്നും, ആശുപത്രിയിലുള്ള മറ്റൊരു മകന്റെ മൂന്ന് കാല്‍വിരലുകള്‍ മുറിച്ചുമാറ്റേണ്ടി വന്നതായും ഒവൈസി എക്‌സില്‍ കുറിച്ചു. അദ്ദേഹത്തിന്റെ ഭാര്യയും മകളും സുരക്ഷിതരാണ്. ഒപ്പമുണ്ടായിരുന്ന അദ്ദേഹത്തിന്റെ ബന്ധുവിന്‌ തലയ്ക്ക് പരിക്കേറ്റെങ്കിലും അവർ അപകടനില തരണം ചെയ്‌തെന്നും ഒവൈസി വ്യക്തമാക്കി.

Also Read: Iran War: റിയാദിൽ ആക്രമണം രൂക്ഷം; ഹൂതികൾക്കെതിരെ അമേരിക്കൻ സൈന്യവും, 12 മരണം

നേരത്തെ, ആക്രമണത്തെ ഇന്ത്യ ശക്തമായി അപലപിച്ചിരുന്നു. സാധാരണക്കാർക്കും അടിസ്ഥാന സൗകര്യങ്ങൾക്കും നേരെയുള്ള ഇത്തരം ആക്രമണങ്ങൾ അസ്വീകാര്യമാണെന്ന് ഇന്ത്യ വ്യക്തമാക്കി. റിയാദ്‌ ഖാലിദ് അന്താരാഷ്ട്ര വിമാനത്താവളത്തിന് നേരെ തുടർച്ചയായുണ്ടാകുന്ന ആക്രമണങ്ങളെ ശക്തമായി അപലപിക്കുന്നുവെന്നും വിദേശകാര്യമന്ത്രാലയം വ്യക്തമാക്കി.

ജാഗ്രതാ നിർദ്ദേശം

Further to our earlier Advisory, in addition to the 24/7 toll-free helpline 8002471234 (in Saudi Arabia only), the following numbers may be contacted, including for queries concerning Indian nationals injured in the Riyadh attack:

▪️ +966-11-488469
▪️ +966-536216082 (WhatsApp messages only)

@MEAIndia

— India in Saudi Arabia (@IndianEmbRiyadh) October 11, 2026

സൗദി അറേബ്യയിലുള്ള ഇന്ത്യൻ പൗരന്മാർക്കായി ഇന്ത്യൻ എംബസി പുതിയ ജാഗ്രതാ നിർദ്ദേശം പുറത്തിറക്കി. നിലവിലെ സാഹചര്യങ്ങൾ കണക്കിലെടുത്ത്, സൗദി അറേബ്യയിലുള്ള എല്ലാ ഇന്ത്യൻ പൗരന്മാരും ജാഗ്രത പാലിക്കണമെന്നും, ആവശ്യമെങ്കിൽ വീടുകളിൽ തന്നെ കഴിയണമെന്നും,ഔദ്യോഗിക മാർഗ്ഗങ്ങളിലൂടെ അധികൃതർ നൽകുന്ന നിർദ്ദേശങ്ങൾ പാലിക്കണമെന്നും അഡ്വൈസറിയിൽ പറയുന്നു.

English Summary

An Indian man from Hyderabad died following a Houthi missile attack on Riyadh's airport. Mohammad Yousuf Ali was traveling for Umrah when the missile struck Terminals. His wife and children were also injured in the strike, which killed 13 people in total. The Indian Embassy confirmed his death and issued a safety advisory for citizens in Saudi Arabia.

വാഷിങ്ടണ്‍: റഷ്യയും യുക്രെയ്നും തമ്മിലുള്ള യുദ്ധത്തില്‍ ഊര്‍ജമേഖലയെ ലക്ഷ്യമിട്ടുള്ള ആക്രമണങ്ങള്‍ അവസാനിപ്പിക്കാന്‍ ധാരണയായെന്ന് അവകാശപ്പെട്ട് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. ഞായറാഴ്ചയാണ് ഇരു രാജ്യങ്ങളും ഊര്‍ജ വെടിനിര്‍ത്തലിന് സമ്മതിച്ചതായി ട്രംപ് പ്രഖ്യാപിച്ചത്. എന്നാല്‍, ഇക്കാര്യത്തില്‍ വ്യക്തമായ വിവരങ്ങള്‍ ലഭിച്ചിട്ടില്ലെന്നും റഷ്യയുടെ ഭാഗത്തുനിന്നുള്ള ഉറപ്പ് ആവശ്യമാണ് എന്നുമാണ് യുക്രെയ്ന്‍ പ്രസിഡന്റ് വൊളോഡിമിര്‍ സെലന്‍സ്‌കിയുടെ പ്രതികരണം.

ട്രൂത്ത് സോഷ്യലിലൂടെയായിരുന്നു ട്രംപിന്റെ പ്രഖ്യാപനം. റഷ്യയും യുക്രെയ്നും തമ്മിലുള്ള യുദ്ധത്തില്‍ ഉടന്‍തന്നെ ഊര്‍ജ വെടിനിര്‍ത്തല്‍ നിലവില്‍ വരുമെന്നും ഇരു കക്ഷികളും ഇതിന് സമ്മതിച്ചിട്ടുണ്ടെന്നും അദ്ദേഹം കുറിച്ചു. ധാരണ ലംഘിക്കരുതെന്നും ട്രംപ് ഇരുരാജ്യങ്ങളോടും ആവശ്യപ്പെട്ടു. എന്നാല്‍ വെടിനിര്‍ത്തല്‍ എത്രകാലം തുടരുമെന്നോ അത് എങ്ങനെ നടപ്പാക്കുമെന്നോ അദ്ദേഹം വിശദീകരിച്ചില്ല. റഷ്യയുടെ ഭാഗത്തുനിന്നും വൈറ്റ് ഹൗസിന്റെ ഭാഗത്തുനിന്നും ഉടന്‍ ഔദ്യോഗിക സ്ഥിരീകരണവും ഉണ്ടായില്ല.

പ്രഖ്യാപനം അപ്രതീക്ഷിതമെന്ന് സെലന്‍സ്‌കി

ട്രംപിന്റെ പ്രഖ്യാപനം തനിക്ക് പുതിയ വാര്‍ത്തയാണെന്നായിരുന്നു സെലന്‍സ്‌കിയുടെ പ്രതികരണം. റഷ്യ ഊര്‍ജ വെടിനിര്‍ത്തലിന് സമ്മതിച്ചിട്ടുണ്ടെങ്കില്‍ യുക്രെയ്നും അതിന് തയാറാണെന്ന് അദ്ദേഹം വ്യക്തമാക്കി. റഷ്യന്‍ പ്രസിഡന്റ് വ്ളാഡിമിര്‍ പുടിനുമായി ട്രംപ് ഇക്കാര്യത്തില്‍ ധാരണയിലെത്തിയിട്ടുണ്ടെങ്കില്‍ വെടിനിര്‍ത്തല്‍ എപ്പോള്‍ ആരംഭിക്കുമെന്ന് അറിയിക്കണമെന്നും സെലന്‍സ്‌കി ആവശ്യപ്പെട്ടു. ഔദ്യോഗിക വിവരങ്ങള്‍ക്കായി കാത്തിരിക്കുകയാണെന്നും അദ്ദേഹം പറഞ്ഞു.

ഊര്‍ജ കേന്ദ്രങ്ങള്‍ക്ക് നേരെ ആക്രമണം തുടരുന്നു

വെടിനിര്‍ത്തല്‍ പ്രഖ്യാപനത്തിന് പിന്നാലെയും യുക്രെയ്നിലെ ഊര്‍ജ കേന്ദ്രങ്ങള്‍ക്ക് നേരെ റഷ്യന്‍ ആക്രമണം ഉണ്ടായതായി സെലന്‍സ്‌കി ആരോപിച്ചു. കീവിലെ ഒരു വൈദ്യുത നിലയത്തിന് നേരെ ഡ്രോണ്‍ ആക്രമണമുണ്ടായെന്നും ഖാര്‍കിവ് മേഖലയിലെ മറ്റ് ഊര്‍ജ കേന്ദ്രങ്ങളും ആക്രമിക്കപ്പെട്ടെന്നും അദ്ദേഹം പറഞ്ഞു.

Also Read: Iran War: റിയാദിൽ ആക്രമണം രൂക്ഷം; ഹൂതികൾക്കെതിരെ അമേരിക്കൻ സൈന്യവും, 12 മരണം

യുക്രെയ്നിലെ ഊര്‍ജ അടിസ്ഥാന സൗകര്യങ്ങള്‍ക്കും സാധാരണ ജനങ്ങളുടെ താമസസ്ഥലങ്ങള്‍ക്കും നേരെയുള്ള ആക്രമണങ്ങള്‍ തുടരുകയാണെന്നും സെലന്‍സ്‌കി ആരോപിച്ചു. അതേസമയം, റഷ്യന്‍ എണ്ണ ശുദ്ധീകരണശാലകള്‍ക്ക് നേരെയുള്ള ആക്രമണങ്ങള്‍ യുക്രെയ്ന്‍ അവസാനിപ്പിക്കാന്‍ തയാറാണെന്നും അതിന് പകരമായി യുക്രെയ്നിലെ ഊര്‍ജ കേന്ദ്രങ്ങള്‍ ആക്രമിക്കുന്നത് റഷ്യ നിര്‍ത്തണമെന്നും അദ്ദേഹം ആവശ്യപ്പെട്ടു.

യുക്രെയ്നില്‍ പുതിയ പ്രസിഡന്റ് വേണമെന്ന് ട്രംപ്

വെടിനിര്‍ത്തല്‍ പ്രഖ്യാപനത്തിന് തൊട്ടുമുമ്പ് യുക്രെയ്നില്‍ പുതിയ പ്രസിഡന്റ് വരേണ്ട സമയമായെന്ന് ട്രംപ് അഭിപ്രായപ്പെട്ടിരുന്നു. റഷ്യയുമായുള്ള യുദ്ധം അവസാനിപ്പിക്കുന്നതിനുള്ള കരാറിലെത്താന്‍ സെലന്‍സ്‌കിക്ക് കഴിയുന്നില്ലെന്നായിരുന്നു ട്രംപിന്റെ വിമര്‍ശനം. ഇതിന് മറുപടിയായി രാജ്യത്തിന്റെ നേതാവിനെ തിരഞ്ഞെടുക്കേണ്ടത് യുക്രെയ്ന്‍ ജനങ്ങളാണെന്ന് സെലന്‍സ്‌കി വ്യക്തമാക്കി.

English Summary

US President Donald Trump has announced an immediate energy ceasefire between Russia and Ukraine. Ukrainian President Volodymyr Zelensky has sought clarity on the announcement, while concerns remain over continued attacks on energy infrastructure.

കാ‍ഠ്മണ്ഡു: നേപ്പാളിനെ നടുക്കി വീണ്ടും മിന്നൽ പ്രളയം. നേപ്പാളിലെ ഗോർഖ മേഖലയിലാണ് ഞായറാഴ്ച മിന്നൽ പ്രളയം നാശംവിത‌ച്ചത്. അപ്രതീക്ഷിതമായുണ്ടായ ദുരന്തത്തിൽ 35-ലധികം വീടുകളും പാലങ്ങളും ഒലിച്ചുപോവുകയും പ്രദേശത്തെ പ്രധാന ജലവൈദ്യുത പദ്ധതിക്ക് കേടുപാടുകൾ സംഭവിക്കുകയും ചെയ്തു. ആഴ്ചകൾക്ക് മുമ്പ് നിരവധിപേരുടെ ജീവനെടുത്ത മറ്റൊരു ദുരന്തത്തിൽ നിന്ന് കരകയറും മുമ്പാണ് വീണ്ടും സമാനമായ മറ്റൊരു പ്രളയം കൂടി നേപ്പാളിൽ സംഭവിക്കുന്നത്.

ഓഗസ്റ്റ് 26-ന് ഉണ്ടായ മിന്നൽ പ്രളയത്തിൽ 1,457 പേർ മരിക്കുകയും ആയിരക്കണക്കിന് ആളുകളെ കാണാതാവുകയും ചെയ്ത സംഭവത്തിന് കാരണമായ പ്രദേശത്തിന് താഴെയായി, ത്രിശൂലി നദിയുടെ പോഷകനദിയായ ബുധി ഗണ്ഡകിയിലെ ജലനിരപ്പ് ഉയർന്നതാണ് ഇപ്പോഴുണ്ടായ ദുരന്തത്തിന് വഴിവെച്ചത്. ഗോർഖ ജില്ലയിലെ ചുമ്നുബ്രി ഗ്രാമത്തിലാണ് മിന്നൽ പ്രളയം നാശം വിതച്ചിരിക്കുന്നത്. നദിയിലെ ജലം പൂർണ്ണമായും കറുപ്പ് നിറത്തിലേക്ക് മാറുന്നതും, ചെളിയും അവശിഷ്ടങ്ങളും ഉൾപ്പെടെ ചേർന്ന് ഒഴുകിനീങ്ങുന്നതും കാണിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.

Also Read: റിയാദിൽ ആക്രമണം രൂക്ഷം; ഹൂതികൾക്കെതിരെ അമേരിക്കൻ സൈന്യവും, 12 മരണം

ഈ നദിയിൽ രാവിലെ 6:30-ന് 3.66 മീറ്ററായിരുന്ന ജലനിരപ്പ് 8:40-ഓടെ 8.43 മീറ്ററായി ഉയരുകയായിരുന്നു. നേപ്പാളിലെ നാഷണൽ ഡിസാസ്റ്റർ റിസ്ക് റിഡക്ഷൻ ആൻഡ് മാനേജ്‌മെന്റ് അതോറിറ്റിയാണ് (NDRRMA) ഇക്കാര്യം അറിയിച്ചത്. 5 മീറ്റർ ആണ് ഇവിടുത്തെ അപകട നിരക്ക് എന്നിരിക്കെയാണ് ജലം ഇത്രയും തോതിൽ ഉയർന്നത്. രാവിലെ 8:30 നും 8:40 നും ഇടയിലുള്ള 10 മിനിറ്റിനുള്ളിൽ ജലനിരപ്പ് രണ്ട് മീറ്ററിലധികമാണ് ഉയർന്നത്. പാലം ഉൾപ്പെടെയുള്ള ജലനിരപ്പ് അളക്കുന്ന കേന്ദ്രം കൂടി വെള്ളപ്പൊക്കത്തിൽ ഒലിച്ചുപോയതിനാൽ, കൂടുതൽ വിവരങ്ങൾ ലഭ്യമല്ല എന്ന് എൻഡിആർആർഎംഎ (NDRRMA) ഏറ്റവും ഒടുവിൽ പുറത്തിറക്കിയ പത്രക്കുറിപ്പിൽ പറയുന്നു. മഴയല്ല ഈ വെള്ളപ്പൊക്കത്തിന് കാരണമെന്നും ഏജൻസി വ്യക്തമാക്കുന്നു.

ഇതുവരെ ആളപായമൊന്നും റിപ്പോർട്ട് ചെയ്തിട്ടില്ലെന്നാണ് സൂചനകൾ. നദിയുടെ തീരപ്രദേശങ്ങളിലും താഴ്ന്ന പ്രദേശങ്ങളിലും താമസിക്കുന്നവരോട് ഞായറാഴ്ച വൈകുന്നേരം വരെ സുരക്ഷിതമായ സ്ഥലങ്ങളിൽ കഴിയാനും നദീതീരത്തുനിന്നും അപകടസാധ്യതയുള്ള വാസസ്ഥലങ്ങളിൽനിന്നും മാറാനും അധികൃതർ നിർ​ദേശിച്ചിട്ടുണ്ട്. രക്ഷാപ്രവർത്തനങ്ങൾക്കായി നേപ്പാൾ സൈന്യം കര-വ്യോമ സേനകളെ നിയോ​ഗിച്ചിട്ടുണ്ട്. ദുരന്ത ബാധിത പ്രദേശങ്ങളിൽ വ്യോമനിരീക്ഷണവും നേരിട്ടുള്ള പരിശോധനയും നടത്തിയ സൈന്യം, മണ്ണിടിച്ചിൽ ഭീഷണിയുള്ള ജഗത് എന്ന പ്രദേശത്തുനിന്ന് ആറ് പേരെ വ്യോമമാർഗ്ഗം സുരക്ഷിത സ്ഥാനത്തേക്ക് മാറ്റിപ്പാർപ്പിച്ചു.

English Summary

Flash floods have once again struck Nepal, wreaking havoc in the Gorkha region on Sunday. In this unexpected disaster, 35 lakh homes and bridges were washed away, and a major hydroelectric project in the area sustained damage.

റിയാദ്: പശ്ചിമേഷ്യയില്‍ സംഘര്‍ഷം രൂക്ഷമാകുന്നതിനിടെ സൗദി അറേബ്യയുടെ തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് നേരെയുണ്ടായ മിസൈല്‍ ആക്രമണത്തില്‍ 12 പേര്‍ കൊല്ലപ്പെട്ടതായി വിവരം. 300 ലധികം പേര്‍ക്ക് പരിക്കേറ്റതായും റിപ്പോര്‍ട്ടുകളുണ്ട്. ഇറാന്റെ പിന്തുണയുള്ള ഹൂതി വിമതരാണ് ആക്രമണത്തിന് പിന്നിലെന്നാണ് പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നത്. സംഭവത്തിന് പിന്നാലെ ഹൂതികള്‍ക്കെതിരായ സൗദി അറേബ്യയുടെ സൈനിക നടപടികളില്‍ അമേരിക്കയും പങ്കുചേര്‍ന്നേക്കുമെന്ന് പ്രസിഡന്റ് ഡൊണാള്‍ഡ് ട്രംപ് വ്യക്തമാക്കി.

റിയാദ് വിമാനത്താവളത്തില്‍ വീണ്ടും ആക്രമണം

ഒക്ടോബര്‍ 10 നാണ് റിയാദിലെ വിമാനത്താവളത്തെ ലക്ഷ്യമിട്ട് ആക്രമണമുണ്ടായത്. ഈ ആഴ്ച വിമാനത്താവളത്തിന് നേരെയുണ്ടായ മൂന്നാമത്തെ ആക്രമണമാണിത്. നേരത്തെയുണ്ടായ ആക്രമണങ്ങളിലും ആളപായവും നാശനഷ്ടങ്ങളും റിപ്പോര്‍ട്ട് ചെയ്തിരുന്നു.
പുതിയ ആക്രമണത്തെത്തുടര്‍ന്ന് വിമാനത്താവളത്തിലെ പ്രവര്‍ത്തനങ്ങള്‍ താല്‍ക്കാലികമായി നിര്‍ത്തിവെക്കുകയും ചില വിമാനങ്ങള്‍ വഴിതിരിച്ചുവിടുകയും ചെയ്തു.

മുന്നറിയിപ്പില്ലാതെയുണ്ടായ ആക്രമണത്തില്‍ പരിക്കേറ്റവരെ ആംബുലന്‍സുകളിലും ഹെലികോപ്റ്ററുകളിലുമായാണ് ആശുപത്രികളിലെത്തിച്ചത്. പരിക്കേറ്റവരില്‍ ചിലരുടെ നില ഗുരുതരമാണെന്നാണ് വിവരം. സൗദി അറേബ്യ, ബംഗ്ലാദേശ്, അമേരിക്ക, ജോര്‍ദാന്‍, പലസ്തീന്‍, സിറിയ, സുഡാന്‍, ഈജിപ്ത് തുടങ്ങിയ രാജ്യങ്ങളില്‍ നിന്നുള്ളവരും മരിച്ചവരിലുണ്ട്.

ആക്രമണത്തില്‍ അമേരിക്കയും ഇറങ്ങിയേക്കും

റിയാദ് വിമാനത്താവളത്തിലെ ആക്രമണത്തിന് പിന്നാലെ സൗദി അറേബ്യയ്‌ക്കൊപ്പം ചേര്‍ന്ന് ഹൂതികള്‍ക്കെതിരെ സൈനിക നടപടി സ്വീകരിക്കുന്ന കാര്യം പരിഗണിക്കുമെന്ന് ട്രംപ് പറഞ്ഞു. ഇതുസംബന്ധിച്ച തീരുമാനം വേഗത്തില്‍ കൈക്കൊള്ളുമെന്നും അദ്ദേഹം വ്യക്തമാക്കി. എന്നാല്‍ അമേരിക്ക നേരിട്ട് സൈനിക നടപടിയില്‍ പങ്കുചേരുമെന്ന കാര്യത്തില്‍ അന്തിമ തീരുമാനമായിട്ടില്ല.

Also Read: മിസൈൽ പതിച്ചത് പാസഞ്ചർ ടെർമിനലിൽ; റിയാദ് വിമാനത്താവളത്തിൽ വീണ്ടും ആക്രമണം

സൗദി അറേബ്യയിലെ സിവിലിയന്‍ അടിസ്ഥാനസൗകര്യങ്ങള്‍ ലക്ഷ്യമിട്ടുള്ള ആക്രമണങ്ങള്‍ നിരപരാധികളുടെ ജീവന് ഭീഷണിയാണെന്ന് അമേരിക്കന്‍ വിദേശകാര്യ സെക്രട്ടറി മാര്‍ക്കോ റൂബിയോ പ്രതികരിച്ചു. ഹൂതികള്‍ ആക്രമണങ്ങള്‍ അവസാനിപ്പിക്കണമെന്നും അവര്‍ക്ക് ഇറാന്‍ നല്‍കുന്ന പിന്തുണ അവസാനിപ്പിക്കണമെന്നും ഐക്യരാഷ്ട്രസഭയിലെ അമേരിക്കന്‍ പ്രതിനിധിയും ആവശ്യപ്പെട്ടു.

യെമനിലും പോരാട്ടം ശക്തമാകുന്നു

യെമനിലെ ഹൂതി വിമതരും അന്താരാഷ്ട്ര അംഗീകാരമുള്ള യെമന്‍ സര്‍ക്കാരിന്റെ സൈന്യവും തമ്മിലുള്ള പോരാട്ടം വീണ്ടും ശക്തമായിരിക്കുകയാണ്. സൗദി അറേബ്യയുടെ പിന്തുണയുള്ള യെമന്‍ സര്‍ക്കാര്‍ ഹൂതികളുടെ നിയന്ത്രണത്തിലുള്ള പ്രദേശങ്ങള്‍ തിരിച്ചുപിടിക്കാന്‍ സൈനിക നീക്കം ആരംഭിച്ചിട്ടുണ്ട്.

സനാ ഉള്‍പ്പെടെയുള്ള ഹൂതികളുടെ നിയന്ത്രണത്തിലുള്ള മേഖലകളില്‍ സൗദി സഖ്യസേന ആക്രമണം ശക്തമാക്കിയതായി റിപ്പോര്‍ട്ടുകളുണ്ട്. സൈനിക കേന്ദ്രങ്ങള്‍, മിസൈല്‍ വിക്ഷേപണ കേന്ദ്രങ്ങള്‍, റഡാര്‍ സംവിധാനങ്ങള്‍ എന്നിവ ലക്ഷ്യമിട്ടാണ് ആക്രമണങ്ങള്‍ നടത്തുന്നതെന്നാണ് സൗദി സഖ്യത്തിന്റെ വാദം.

English Summary

Tensions in the Middle East are escalating following reports of a missile attack in Riyadh that killed 12 people. The United States is reportedly considering joining Saudi Arabia in military action against Yemen's Houthi rebels. The potential move could widen the regional conflict and threaten security and international trade routes.

റിയാദ്: സൗദി അറേബ്യയുടെ തലസ്ഥാനമായ റിയാദിലെ വിമാനത്താവളത്തിന് നേരെ വീണ്ടും ആക്രമണം. ശനിയാഴ്ച നടന്ന ശക്തമായ മിസൈൽ ആക്രമണത്തെ തുടർന്ന് യാത്രക്കാരെയും ജീവനക്കാരെയും വിമാനത്താവളത്തിൽ നിന്നും അടിയന്തരമായി ഒഴിപ്പിച്ചു. വിമാനത്താവളത്തിലെ പാസഞ്ചർ ടെർമിനലിലാണ് മിസൈൽ വന്ന് പതിച്ചത് എന്നും നിരവധി പേർക്ക് പരിക്കേറ്റതായും ഔദ്യോഗിക വൃത്തങ്ങളെ ഉദ്ധരിച്ച് അന്താരാഷ്ട്ര വാർത്താ ഏജൻസികൾ റിപ്പോർട്ട് ചെയ്യുന്നു. സംഭവത്തിന് പിന്നാലെ നിരവധി ആംബുലൻസുകൾ വിമാനത്തവളത്തിലേക്ക് പാഞ്ഞെത്തുന്നതിൻ്റെ ദൃശ്യങ്ങൾ പുറത്തുവന്നിട്ടുണ്ട്.

ഒരു പൈലറ്റ് ഉൾപ്പടെ മൂന്ന് സൗദി പൗരന്മാർ കൊല്ലപ്പെട്ട് ദിവസങ്ങൾക്ക് ശേഷമാണ് വിണ്ടും ആക്രമണം ഉണ്ടായിരിക്കുന്നത്. ആക്രമണത്തിൻ്റെ പശ്ചാത്തലത്തിൽ കിംഗ് ഖാലിദ് അന്താരാഷ്ട്ര വിമാനത്താവളത്തിൻ്റെ പ്രവർത്തനം പൂർണമായും നിർത്തിവച്ചു. റിയാദിലേക്കുള്ള വിമാനങ്ങൾ മറ്റു വിമാനത്താവളങ്ങളിലേക്ക് തിരിച്ചുവിട്ടതായി ഫ്ലൈറ്റ് റഡാർ 24 റിപ്പോർട്ട് ചെയ്തു. കുവൈത്ത് എയർവേസ് ഉൾപ്പെടെയുള്ള കമ്പനികൾ സർവീസുകൾ റദ്ദാക്കിയിട്ടുണ്ട്. വിമാനങ്ങളുടെ സമയക്രമത്തിൽ മാറ്റം വരുത്തിയിട്ടുണ്ടോ എന്നത് വിമാനത്താവളത്തിലേക്ക് പുറപ്പെടുന്നതിന് മുൻപായി ഉറപ്പാക്കണം എന്ന് അധികൃതർ നിർദ്ദേശം നൽകിയിട്ടുണ്ട്.

Also Read: Panama Earthquake: പാനമയെ പിടിച്ചുലച്ച് രണ്ടാമത്തെ ഭൂചലനം; ആദ്യ ഭൂചലനത്തിൽ വ്യാപക നാശം

യമനിലെ ഹൂതി വിമതർക്കെതിരെ സൗദി സഖ്യസേന സൈനിക നടപടി ആരംഭിച്ചതിന് ശേഷം റിയാദിലെ വിമാനത്താവളത്തിന് നേരെ തുടർച്ചയായി ആക്രമണങ്ങൾ ഉണ്ടാകുന്നുണ്ട്.. നേരത്തെ നടന്ന ആക്രമണങ്ങളുടെ ഉത്തരവദിത്തം ഹൂതികൾ ഏറ്റെടുത്തിരുന്നു. ബുധനാഴ്ച നടന്ന ആക്രമണത്തിൽ ഒരു സുഡാനി പൗരൻ കൊല്ലപ്പെട്ടിരുന്നു. എന്നാൽ ശനിയാഴ്ച നടന്ന ആക്രമണത്തെ കുറിച്ച് ഹൂതികൾ ഇതുവരെ ഔദ്യോഗികമായി പ്രതികരിച്ചിട്ടില്ല.

സൗദി വ്യോമാതിർത്തി വഴി സർവീസ് നടത്തുന്ന വിമാനക്കമ്പനികൾക്ക് ഹൂതികൾ കഴിഞ്ഞ ദിവസം അന്തിമ മുന്നറിയിപ്പ് നൽകിയിരുന്നു. ഇതിന് പിന്നാലെ എയർ ഇന്ത്യ, ഫ്ലൈദുബായ്, ലുഫ്താൻസ, പാകിസ്ഥാൻ ഇൻ്റർനാഷ്ണൽ എയർലൈൻസ് തുടങ്ങിയ വിമാനക്കമ്പനികളെല്ലാം റിയാദിലേക്കും മറ്റു സൗദി വിമാനത്താവളങ്ങളിലേക്കുമുള്ള സർവീസുകൾ താൽക്കാലികമായി നിർത്തിവച്ചിരിക്കുകയാണ്. വ്യാഴാഴ്ച നടന്ന ആക്രമണത്തിൽ റൺവേയിലുണ്ടായിരുന്ന സൗദിയ എയർലൈൻസിൻ്റെ ഒരു വിമാനത്തിന് കേടുപാടുകൾ സംഭവിച്ചിരുന്നു എങ്കിലും വിമാനത്തിൽ യാത്രക്കാർ ഇല്ലാതിരുന്നതിനാൽ വൻ ദുരന്തം ഒഴിവായി. യെമൻ സർക്കാരും ഹൂതി വിമതരും തമ്മിലുള്ള സംഘർഷം ചെങ്കടൽ മേഖലയിൽ കൂടുതൽ രൂക്ഷമായിരിക്കുകയാണ്. ചെങ്കടൽ വഴിയുള്ള കപ്പൽ ഗതാഗതത്തിന് ഇത് കനത്ത ഭീഷണിയാണ് സൃഷ്ടിക്കുന്നത്.

English Summary

A missile struck the passenger terminal at Riyadh’s King Khalid International Airport, injuring several people and prompting an immediate evacuation. Consequently, major airlines suspended operations amid escalating Houthi rebel threats.

ദുബായ്: യു.എ.ഇയിലെ ഏറ്റവും ജനപ്രിയ വിനോദ-സാംസ്കാരിക കേന്ദ്രമായ ദുബായ് ഗ്ലോബൽ വില്ലേജിൻ്റെ 31-ാം സീസൺ ഒക്ടോബർ 14 ബുധനാഴ്ച ആരംഭിക്കും. പുതിയ സീസണിലേക്കുള്ള പ്രവേശന ടിക്കറ്റ് നിരക്കുകൾ അധികൃതർ ഔദ്യോഗികമായി പ്രഖ്യാപിച്ചു. സാധാരണ പ്രവൃത്തിദിനങ്ങളിൽ 25 ദിർഹവും വാരാന്ത്യങ്ങളിലും പൊതു അവധി ദിവസങ്ങളിലും 30 ദിർഹവുമാണ് ടിക്കറ്റ് നിരക്ക്. ഗ്ലോബൽ വില്ലേജിൻ്റെ ഔദ്യോഗിക വെബ്‌സൈറ്റ്, മൊബൈൽ ആപ്പ് എന്നിവ വഴിയും ഉദ്ഘാടന ദിനം മുതൽ കവാടങ്ങളിലെ ടിക്കറ്റ് കൗണ്ടറുകൾ വഴിയും ടിക്കറ്റുകൾ വാങ്ങാവുന്നതാണ്.

ടിക്കറ്റ് നിരക്കുകൾ മുൻ സീസണിന് സമാനമാണെങ്കിലും ഒരു പ്രധാന മാറ്റം ഇത്തവണ വരുത്തിയിട്ടുണ്ട്. ഞായറാഴ്ചകളിൽ വാങ്ങുന്ന ടിക്കറ്റുകൾക്ക് ഇനി മുതൽ വാരാന്ത്യ നിരക്കായ 30 ദിർഹം തന്നെ നൽകേണ്ടി വരും. മുൻ സീസണിൽ ഞായർ മുതൽ വ്യാഴം വരെയുള്ള ദിവസങ്ങളിലായിരുന്നു സാധാരണ നിരക്ക് ഈടാക്കിയിരുന്നത്. ഉദ്ഘാടന ദിനമായ ഒക്ടോബർ 14-ന് വൈകുന്നേരം 6 മണി മുതലാണ് സന്ദർശകർക്കായി പ്രവേശനം അനുവദിക്കുക. തുടർന്ന് ഞായർ മുതൽ ബുധൻ വരെയുള്ള ദിവസങ്ങളിൽ വൈകുന്നേരം 4 മണി മുതൽ അർധരാത്രി 12 മണി വരെയും, വ്യാഴം മുതൽ ഞായർ വരെയും പൊതു അവധി ദിവസങ്ങളിലും പുലർച്ചെ 1 മണി വരെയുമായിരിക്കും ഗ്ലോബൽ വില്ലേജ് പ്രവർത്തിക്കുക.

Also Read: ദുബായിൽ ‘ഷെയേർഡ് ഹൗസിങ്’ അനുവദിച്ചിട്ടുള്ളത് എവിടെയെല്ലാം? പ്രവാസികൾ അറിഞ്ഞിരിക്കേണ്ട വിവരങ്ങൾ!

സന്ദർശകരുടെ തിരക്ക് ഒഴിവാക്കുന്നതിനായി 31-ാം സീസണിൽ വി.ഐ.പി പാർക്കിംഗിനായി പ്രത്യേക സെൽഫ് പേയ്‌മെൻ്റ് വെൻഡിംഗ് മെഷീൻ സംവിധാനം ഏർപ്പെടുത്തിയിട്ടുണ്ട്. ഇതുവഴി എക്സിറ്റ് പോയിൻ്റുകളിൽ എത്തുന്നതിന് മുൻപ് തന്നെ സന്ദർശകർക്ക് പാർക്കിംഗ് ഫീസ് അടയ്ക്കാൻ സാധിക്കും. ഇത് എക്സിറ്റുകളിലെ ഗതാഗതക്കുരുക്ക് കാര്യമായി കുറയ്ക്കാൻ സഹായിക്കും. വി.ഐ.പി പാക്കുകൾ ഇല്ലാത്തവർക്ക് ഒരു ദിവസത്തെ വി.ഐ.പി പാർക്കിംഗിന് 200 ദിർഹമാണ് നിരക്ക്.

ഹാപ്പിനസ് ഗേറ്റിന് 350 മീറ്റർ അകലെയുള്ള പെയ്ഡ് പാർക്കിംഗ് ഏരിയകൾക്ക് 75 ദിർഹം മുതൽ 120 ദിർഹം വരെയാണ് ഈടാക്കുന്നത്. കൂടാതെ അംഗപരിമിതർക്കായി പ്രത്യേക പാർക്കിംഗും സാധാരണക്കാർക്കായി സൗജന്യ പാർക്കിംഗ് സൗകര്യങ്ങളും ഒരുക്കിയിട്ടുണ്ട്. 31-ാം സീസൺ 2027 മെയ് മാസം വരെ നീണ്ടുനിൽക്കും. ഷോപ്പിംഗ്, കലാ സംസ്കാരിക പരിപാടികൾ, രുചിവൈവിധ്യങ്ങൾ എന്നിവക്കൊപ്പം നിരവധി പുതിയ വിനോദ കാഴ്ചകളും ഇത്തവണ സന്ദർശകർക്കായി ഒരുക്കിയിട്ടുണ്ട്.

English Summary

Dubai’s Global Village opens its 31st season on October 14. Tickets cost Dh25 on weekdays and Dh30 on weekends, which now includes Sundays. A new VIP parking payment system debuts.