Tender Coconut Water: കരിക്കിൻ വെള്ളം നല്ലത് തന്നെ, പക്ഷേ ഇവർക്ക് ‘വിഷം’

പ്രതീകാത്മക ചിത്രം

ആരോ​ഗ്യത്തിന് ഏറെ ​ഗുണകരമായ പ്രകൃതിദത്ത പാനീയമാണ് കരിക്കിൻ വെള്ളം. ഇലക്ട്രോലൈറ്റുകളാൽ സമ്പന്നമായ കരിക്കിൻ വെള്ളം ഊർജം നൽകാനും നിർജ്ജലീകരണം തടയാനും സഹായിക്കും. എന്നാൽ എല്ലാവർക്കും ഇത് നല്ലതല്ലെന്ന് അറിയാമോ? ചില ആരോ​ഗ്യപ്രശ്നങ്ങളുള്ളവർ കരിക്കിൻ വെള്ളം കുടിക്കുന്നത് ​ഗുണത്തേക്കാൾ ദോഷം ചെയ്തേക്കാം.

കരിക്കിൻ വെള്ളം ഒഴിവാക്കേണ്ടവർ

പ്രമേഹരോ​ഗികൾ: കരിക്കിൻ വെള്ളത്തിൽ പ്രകൃതിദത്തമായ പഞ്ചസാര അടങ്ങിയിട്ടുണ്ട്. മറ്റ് സോഫ്റ്റ് ഡ്രിങ്കുകളേക്കാൾ കുറവാണെങ്കിലും, പ്രമേഹരോ​ഗികൾ കരിക്കിൻ വെള്ളം കുടിച്ചാൽ രക്തത്തിലെ പഞ്ചസാരയുടെ അളവ് ഉയരാൻ സാധ്യതയുണ്ട്.

വൃക്കരോ​ഗമുള്ളവർ: വൃക്കരോ​ഗികളും കരിക്കിൻ വെള്ളം അമിതമായി കുടിക്കരുത്. ഇതിൽ പൊട്ടാസ്യം അടങ്ങിയിട്ടുണ്ട്. വൃക്കയുടെ പ്രവർത്തനം തകരാറിലായവർ കരിക്കിൻ വെള്ളം കുടിക്കുന്നത് രക്തത്തിലെ പൊട്ടാസ്യം അമിതമായി വർദ്ധിക്കുന്ന ‘ഹൈപ്പർകലീമിയ’ എന്ന അവസ്ഥയ്ക്ക് കാരണമായേക്കും.

രക്തസമ്മർദ്ദമുള്ളവർ: കരിക്കിൻ വെള്ളത്തിലെ പൊട്ടാസ്യം രക്തസമ്മർദ്ദം കുറയ്ക്കാൻ സഹായിക്കുമെങ്കിലും ഹൈപ്പർടെൻഷന് മരുന്ന് കഴിക്കുന്നവർക്ക് പൊട്ടാസ്യത്തിന്റെ അളവ് കൂടാൻ സാധ്യതയുണ്ട്.

ALSO READ: നഖങ്ങളിൽ തവിട്ട് നിറത്തിൽ വരയുണ്ടോ? അവ​ഗണിക്കരുത്; ഈ രോ​ഗത്തിൻ്റെ ലക്ഷണമാകാം

അലർജി: കരിക്കിൻ വെള്ളം ചിലർക്ക് അലർജി പ്രശ്നത്തിലേക്ക് നയിക്കും. കരിക്കിൻ വെള്ളം കുടിക്കുമ്പോൾ ചൊറിച്ചിൽ, തൊലിപ്പുറത്തെ തടിപ്പ്, ശ്വാസതടസ്സം എന്നിവ അനുഭവപ്പെടുന്നുണ്ടെങ്കിൽ ഇത് ഒഴിവാക്കേണ്ടതാണ്.

ഇലക്ട്രോലൈറ്റ് നിയന്ത്രണം: ഹൃദ്രോ​ഗമോ മറ്റ് പ്രശ്നങ്ങളോ ഉള്ളവർക്ക് ഡോക്ടർമാർ കുറഞ്ഞ പൊട്ടാസ്യം അടങ്ങിയ ഡയറ്റ് നിർദേശിക്കാറുണ്ട്. രിക്കിൻ വെള്ളത്തിലെ പൊട്ടാസ്യം, സോഡിയം, മഗ്നീഷ്യം എന്നിവ അടങ്ങിയിട്ടുള്ളതാൽ ഇത്തരക്കാർ ഇത് ഒഴിവാക്കേണ്ടതാണ്.

ജലദോഷമുള്ളവർ: കരിക്കിൻ വെള്ളത്തിന് ശരീരത്തെ തണുപ്പിക്കാനുള്ള കഴിവുണ്ട്. അതുകൊണ്ട് തന്നെ ജലദോഷമോ പനിയോ കഫക്കെട്ടോ ഉള്ളപ്പോൾ കരിക്കിൻ വെള്ളം കുടിക്കുന്നത് ഒഴിവാക്കേണ്ടതാണ്.

നിരാകരണം: ഈ ലേഖനം പൊതുവായ വിവരങ്ങളെ അടിസ്ഥാനമാക്കിയുള്ളവയാണ്. ആരോഗ്യവിദഗ്ധന്റെ ഉപദേശത്തിന് പകരമല്ല. ടിവി9 മലയാളം സ്ഥിരീകരിക്കുന്നില്ല.