India vs England: ചങ്കുറപ്പ് കാണിക്കെടേ എന്ന് ഗിൽ; ഇതൊന്നും അത്ര ശരിയല്ലെന്ന് ട്രോട്ട്: ഇന്ത്യ – ഇംഗ്ലണ്ട് ടെസ്റ്റ് ചൂടുപിടിക്കുന്നു
Jonathan Trott Against Shubman Gill: ഇന്ത്യൻ ക്യാപ്റ്റൻ ശുഭ്മൻ ഗില്ലിനെതിരെ ഇംഗ്ലണ്ടിൻ്റെ മുൻ താരം ജൊനാതൻ ട്രോട്ട്. സമയം പാഴാക്കിയതിന് ഇംഗ്ലണ്ട് ഓപ്പണർമാർക്കെതിരെ ദേഷ്യപ്പെട്ടതിനാണ് താരം ഗില്ലിനെ വിമർശിച്ചത്.
ഇന്ത്യയും ഇംഗ്ലണ്ടും തമ്മിലുള്ള മൂന്നാം ടെസ്റ്റ് പുരോഗമിക്കുകയാണ്. ലോർഡ്സിൽ നടക്കുന്ന മത്സരത്തിൻ്റെ ഒന്നാം ഇന്നിംഗ്സിൽ ഇരു ടീമുകളും 387 റൺസിന് ഓൾ ഔട്ടായി. ബാറ്റും പന്തും കൊണ്ടുള്ള പോരാട്ടത്തിനൊപ്പം വാക്കുകൾ കൊണ്ടും ടീമുകൾ പരസ്പരം പോരടിക്കുകയാണ്. (Image Credits - PTI)
ഇന്ത്യൻ ഇന്നിംഗ്സ് അവസാനിച്ചതിന് പിന്നാലെ രണ്ടാം ദിനം ബാറ്റിംഗിനിറങ്ങിയ ഇംഗ്ലണ്ടിനായി ഓപ്പണർമാർ സമയം കളഞ്ഞത് വാക്കുകൾ കൊണ്ടുള്ള കടുത്ത പോരിലേക്ക് വഴിതെളിച്ചു. രണ്ട് ഓവർ എറിയാൻ സമയമുണ്ടായിരുന്നെങ്കിലും ഒരു ഓവറാക്കി ചുരുക്കുകയായിരുന്നു അവരുടെ ലക്ഷ്യം.
ഇതിനായി സാവധാനം തയ്യാറെടുത്തും ഗ്ലൗസിൽ പന്തുകൊണ്ടപ്പോൾ ഫിസിയോയെ വിളിച്ചും അവർ സമയം കളഞ്ഞു. ഇത് ഇന്ത്യൻ ക്യാപ്റ്റൻ ശുഭ്മൻ ഗില്ലിനെ ചൊടിപ്പിച്ചു. സാക്ക് ക്രോളിയോട് 'ചങ്കുറപ്പ് കാണിക്കൂ' എന്ന് പറഞ്ഞ ഗിൽ ഫിസിയോയെ വിളിച്ചപ്പോൾ പരിഹസിച്ച് കയ്യടിക്കുകയും ചെയ്തു.
ഗില്ലിൻ്റെ പെരുമാറ്റം ഇംഗ്ലണ്ടിൻ്റെ മുൻ താരം ജൊനാതൻ ട്രോട്ടിന് ഇഷ്ടമായില്ല. "ഈ അഭിനയമൊന്നും ശരിയല്ല. ഗിൽ പഴയ ക്യാപ്റ്റനെപ്പോലെ തന്നെയാണ്. കൈചൂണ്ടുന്നതൊന്നും ശരിയല്ല. ഫീൽഡിൽ കരുത്തും മത്സരബുദ്ധിയുമൊക്കെ കാണിക്കുന്നത് ശരി. അത് കൂടരുത്."- ട്രോട്ട് പറഞ്ഞു.
മത്സരം ആവേശകരമായി പുരോഗമിക്കുകയാണ്. രണ്ടാം ഇന്നിംഗ്സിൽ ബാറ്റിംഗിനിറങ്ങിയ ഇംഗ്ലണ്ടിനെ വിറപ്പിക്കുന്ന പ്രകടനമാണ് ഇന്ത്യൻ പേസർമാർ നടത്തുന്നത്. ബെൻ ഡക്കറ്റ് (12), ഒലി പോപ്പ് (4) എന്നിവരെ സിറാജും സാക്ക് ക്രോളിയെ (22) നിതീഷ് റെഡ്ഡിയും പുറത്താക്കി.
