India vs South Africa: ദക്ഷിണാഫ്രിക്കക്കെതിരെ ഇന്ത്യയെ നയിക്കാൻ രോഹിത് ശർമ്മ?; ആരാവും ടീമിനെ നയിക്കുക എന്നതിൽ അവ്യക്തത
India vs South Africa ODI Captain: ദക്ഷിണാഫ്രിക്കക്കെതിരായ ഏകദിന പരമ്പരയിൽ ഇന്ത്യയെ ആര് നയിക്കും? രോഹിത് ശർമ്മ, ഋഷഭ് പന്ത്, ഹാർദിക് പാണ്ഡ്യ തുടങ്ങിയ പേരുകളാണ് പറഞ്ഞുകേൾക്കുന്നത്.
ദക്ഷിണാഫ്രിക്കക്കെതിരായ ഏകദിന മത്സരത്തിൽ ഇന്ത്യയെ ആര് നയിക്കുമെന്നത് ഇപ്പോഴും വ്യക്തമല്ല. ക്യാപ്റ്റൻ ശുഭ്മൻ ഗില്ലും വൈസ് ക്യാപ്റ്റൻ ശ്രേയാസ് അയ്യരും പരിക്കേറ്റ് പുറത്തായതോടെ ഏകദിന പരമ്പരയിൽ ഇന്ത്യൻ ടീം ക്യാപ്റ്റനാരെന്ന ചോദ്യത്തിന് ഇപ്പോഴും ഉത്തരം ലഭിച്ചിട്ടില്ല. (Image Credits- PTI)
മുൻ ക്യാപ്റ്റനായ രോഹിത് ശർമ്മയെ വീണ്ടും താത്കാലിക ക്യാപ്റ്റനായി പരിഗണിച്ചേക്കുമെന്ന അഭ്യൂഹങ്ങളുണ്ട്. എന്നാൽ, ഇതുണ്ടായേക്കില്ല. ഹാർദിക് പാണ്ഡ്യ, ഋഷഭ് പന്ത്, കെഎൽ രാഹുൽ തുടങ്ങിയ ക്യാപ്റ്റൻസി ഓപ്ഷനുകൾ ഉള്ളതുകൊണ്ട് തന്നെ ഇവർ ആരെങ്കിലുമാവും ടീമിനെ നയിക്കുക.
ഋഷഭ് പന്തിനാണ് സാധ്യത കൂടുതൽ. പന്ത് ടെസ്റ്റ് ടീമിൻ്റെ വൈസ് ക്യാപ്റ്റനാണ്. ഭാവിയിലെ ക്യാപ്റ്റനായി പരിഗണിക്കപ്പെടുന്ന താരം കൂടിയാണ് ഋഷഭ് പന്ത്. അതുകൊണ്ട് തന്നെ ഗില്ലിൻ്റെ അഭാവത്തിൽ താരത്തിന് ഏകദിന ടീമിൻ്റെ താത്കാലിക ക്യാപ്റ്റൻസി നൽകിയേക്കുമെന്ന് സൂചനകളുണ്ട്.
ഇന്ത്യയുടെ ക്യാപ്റ്റൻസി പ്ലാനുകളിൽ നേരത്തെ ഉൾപ്പെട്ടിരുന്ന താരമാണ് ഹാർദിക് പാണ്ഡ്യ. പരിക്കും മറ്റ് ക്യാപ്റ്റൻസി ഓപ്ഷനുകളും കാരണമാണ് താരം ഇപ്പോൾ ലീഡർഷിപ്പ് ഗ്രൂപ്പിൽ ഇല്ലാത്തത്. ദക്ഷിണാഫ്രിക്കക്കെതിരെ വീണ്ടും താരത്തെ പരീക്ഷിക്കാനുള്ള സാധ്യതകളുണ്ട്.
ടീമിലെ മുതിർന്ന താരങ്ങളിൽ ഒരാളാണ് കെഎൽ രാഹുൽ. രാഹുലും നേരത്തെ ലീഡർഷിപ്പ് ഗ്രൂപ്പിൽ ഉൾപ്പെട്ടിരുന്നു. ചില മത്സരങ്ങളിൽ ടീമിനെ നയിച്ചിട്ടുമുണ്ട്. ക്യാപ്റ്റനും വൈസ് ക്യാപ്റ്റനും പുറത്തിരിക്കുമ്പോൾ താത്കാലിക ക്യാപ്റ്റൻസിയിലേക്ക് കെഎൽ രാഹുലിനും സാധ്യതയുണ്ട്.
