India vs South Africa: ആദ്യ ടെസ്റ്റിലൊരുങ്ങുന്നത് കുത്തിത്തിരിയുന്ന പിച്ച്?; നിർണായക വെളിപ്പെടുത്തലുമായി ക്യുറേറ്റർ
Ind vs SA First Test Pitch: ഇന്ത്യയും ദക്ഷിണാഫ്രിക്കയും തമ്മിലുള്ള ആദ്യ ടെസ്റ്റിലൊരുങ്ങുക സ്പിൻ പിച്ചെന്ന് ക്യുറേറ്റർ. കുത്തിത്തിരിയുന്ന പിച്ചാണോ എന്നഎന്ന ചോദ്യത്തിന് അദ്ദേഹം കൃത്യമായ മറുപടി നൽകിയില്ല.
ഇന്ത്യയും ദക്ഷിണാഫ്രിക്കയും തമ്മിലുള്ള ആദ്യ ടെസ്റ്റിൽ സ്പിന്നിനെ തുണയ്ക്കുന്ന പിച്ച്. ക്യുറേറ്റർ സുജൻ മുഖർജി തന്നെയാണ് ഇന്ത്യ ടുഡേയ്ക്ക് നൽകിയ അഭിമുഖത്തിൽ ഇക്കാര്യം വ്യക്തമാക്കിയത്. കൊൽക്കത്തയിലെ ഈഡൻ ഗാർഡൻസിൽ ഈ മാസം 14നാണ് ആദ്യ ടെസ്റ്റ് ആരംഭിക്കുക. (Image Credits- PTI)
"പിച്ച് നല്ലതായിരിക്കും. സ്പോർട്ടിങ് വിക്കറ്റാണ്. കളി പുരോഗമിക്കുമ്പോൾ പന്ത് തിരിയും. ബൗൺസ് ഉണ്ടാവും. പിച്ചിൽ നിന്ന് ബാറ്റർമാർക്കും ബൗളർമാർക്കും പ്രയോജനം ലഭിക്കും. ഇന്ത്യൻ ടീം സ്പിൻ പിച്ച് വേണമെന്ന് ആവശ്യപ്പെട്ടിരുന്നു."- സുജൻ മുഖർജി അഭിമുഖത്തിൽ പ്രതികരിച്ചു.
കുത്തിത്തിരിയുന്ന പിച്ചാവുമോ എന്ന ചോദ്യത്തോട് അത് തനിക്കറിയില്ലെന്ന് അദ്ദേഹം പറഞ്ഞു. "അത് ഞാനെങ്ങനെ പറയും. പിച്ചിൽ കളിക്കുന്നവർക്ക് അത് പറയാനാവും. നല്ല ഒരു പിച്ച് നിർമ്മിക്കുകയെന്നതാണ് ഞങ്ങളുടെ ജോലി. അത്തരത്തിലുള്ള പിച്ചാണ് ഇത്."- അദ്ദേഹം പറഞ്ഞു.
രണ്ട് ടെസ്റ്റിനും മൂന്ന് ഏകദിനങ്ങൾക്കും അഞ്ച് ടി20കൾക്കുമായാണ് ദക്ഷിണാഫ്രിക്ക ഇന്ത്യയിൽ എത്തിയിരിക്കുന്നത്. ഈഡൻ ഗാർഡൻസിലെ ആദ്യ ടെസ്റ്റിന് ശേഷം ഗുവാഹത്തി ബർസപര ക്രിക്കറ്റ് സ്റ്റേഡിയത്തിൽ രണ്ടാം ടെസ്റ്റ് നടക്കും. നവംബർ 22നാണ് രണ്ടാം ടെസ്റ്റ് ആരംഭിക്കുക.
ഏകദിന പരമ്പര നവംബർ 30ന് ആരംഭിക്കും. ഡിസംബർ 3, ഡിസംബർ 6 എന്നീ തീയതികളിലും ഏകദിന മത്സരങ്ങളുണ്ട്. ഇതിന് ശേഷം ഡിസംബർ 9ന് ടി20 പരമ്പരയ്ക്ക് തുടക്കമാവും. ഡിസംബർ 11, 14, 17, 19 തീയതികളിലാണ് പരമ്പരയിലെ മറ്റ് ടി20 മത്സരങ്ങൾ നടക്കുക.
