Vaibhav Sooryavanshi: പ്രായം 15 മാത്രം, എന്നിട്ടും അണ്ടര് 19 ടീമില് സൂര്യവംശിക്ക് ഇടമില്ല; തിരിച്ചടിയായത് ബിസിസിഐ നിയമം
BCCI Rule That Cost Vaibhav Sooryavanshi His India U-19 Spot: ഓസ്ട്രേലിയന് അണ്ടര് 19 ടീമിനെതിരായ പരമ്പരയ്ക്കുള്ള ഇന്ത്യന് അണ്ടര് 19 ടീമിനെ കഴിഞ്ഞ ദിവസം പ്രഖ്യാപിച്ചു. എന്നാല് വെറും 15 വയസ് മാത്രമാണ് പ്രായമെങ്കിലും, വൈഭവ് സൂര്യവംശിയെ ടീമില് ഉള്പ്പെടുത്തിയില്ല.
ഓസ്ട്രേലിയന് അണ്ടര് 19 ടീമിനെതിരായ പരമ്പരയ്ക്കുള്ള ഇന്ത്യന് അണ്ടര് 19 ടീമിനെ കഴിഞ്ഞ ദിവസം പ്രഖ്യാപിച്ചു. എന്നാല് വെറും 15 വയസ് മാത്രമാണ് പ്രായമെങ്കിലും, വൈഭവ് സൂര്യവംശിയെ ടീമില് ഉള്പ്പെടുത്തിയില്ല. ലോകക്രിക്കറ്റില് ശ്രദ്ധാകേന്ദ്രമായ വൈഭവിനെ ഉള്പ്പെടുത്താത്തതിന് പിന്നില് ബിസിസിഐയുടെ നിയമമാണ്. സീനിയര് ടീമില് വരെ അരങ്ങേറിയ വൈഭവിനെ അണ്ടര് 19 സ്ക്വാഡില് ഉള്പ്പെടുത്താത്തതിന്റെ കാരണം പരിശോധിക്കാം (Image Credit Source: PTI).
2016-ൽ, യോഗ്യതയുണ്ടെങ്കിൽ പോലും കളിക്കാരെ ഒന്നിൽ കൂടുതൽ അണ്ടർ-19 ലോകകപ്പുകളിൽ പങ്കെടുക്കുന്നതിൽ നിന്ന് ബിസിസിഐ വിലക്കിയിരുന്നു. ഈ നിയമം കാരണം 2018-ലെ അണ്ടർ-19 ലോകകപ്പിൽ വാഷിംഗ്ടൺ സുന്ദറിന് കളിക്കാൻ സാധിച്ചിരുന്നില്ല. ഇതിനുമുമ്പ്, സർഫറാസ് ഖാൻ, സന്ദീപ് ശർമ്മ, വിജയ് സോൾ തുടങ്ങിയ താരങ്ങള് ഒന്നിലധികം ലോകകപ്പുകളിൽ പങ്കെടുത്തിട്ടുണ്ട്. സൂര്യവംശി 2026-ലെ അണ്ടർ-19 ലോകകപ്പിൽ കളിച്ചിരുന്നു.
ഇനി അണ്ടര് 19 ലോകകപ്പില് കളിക്കാന് സൂര്യവംശിക്ക് സാധിക്കില്ല. അതുകൊണ്ട് താരത്തെ ഒഴിവാക്കിയിരുന്നു. ഇതാണ് ഓസീസിനെതിരായ പരമ്പരയില് പതിനഞ്ചുകാരനായ താരത്തെ ഒഴിവാക്കിയതിന്റെ കാരണം. ജൂനിയർ പുരുഷ സെലക്ഷൻ കമ്മിറ്റിയാണ് സെപ്റ്റംബർ 18, 21, 23 തീയതികളിൽ രാജ്കോട്ടിൽ നടക്കുന്ന മൂന്ന് 50 ഓവർ മത്സരങ്ങൾ അടങ്ങുന്ന പരമ്പരയ്ക്കുള്ള ടീമുകളെ പ്രഖ്യാപിച്ചത്.
സെപ്റ്റംബർ 27 മുതൽ 30 വരെ രാജ്കോട്ടിലും, ഒക്ടോബർ 5 മുതൽ 8 വരെ അഹമ്മദാബാദിലെ നരേന്ദ്ര മോദി സ്റ്റേഡിയം 'ബി' ഗ്രൗണ്ടിലുമായി രണ്ട് റെഡ് ബോൾ (മൾട്ടി-ഡേ) മത്സരങ്ങളും നടക്കും. ലക്ഷ്യ റായ്ചന്ദ്നിയാണ് 50 ഓവർ ടീമിനെ നയിക്കുന്നത്. യാഷ്വർദ്ധൻ ചൗഹാൻ വൈസ് ക്യാപ്റ്റനാകും. റെഡ് ബോൾ മത്സരങ്ങളിൽ യാഷ്വർദ്ധൻ ചൗഹാൻ ക്യാപ്റ്റനാകും. ലക്ഷ്യ റായ്ചന്ദ്നി വൈസ് ക്യാപ്റ്റനാകും.
വീരേന്ദര് സെവാഗിന്റെ മകന് ആര്യവീറും, രാഹുല് ദ്രാവിഡിന്റെ മകന് അന്വയും ഏകദിന ടീമില് ഇടം നേടി. മൾട്ടി-ഡേ ഫോർമാറ്റ് മത്സരങ്ങൾക്കുള്ള ടീമിൽ ഇരുവരും ഉൾപ്പെട്ടിട്ടില്ല. മലയാളി താരം മാനവ് കൃഷ്ണ മള്ട്ടി ഡേ മത്സരത്തിനുള്ള ടീമിനുണ്ട്. ശ്രീലങ്ക അണ്ടര് 19 ടീമിനെതിരെ പുറത്തെടുത്ത മികച്ച പ്രകടനമാണ് മാനവിന് തുണയായത്.
