IPL 2026 : എന്ത് ബുമ്ര! ആദ്യ പന്തിൽ തന്നെ അടിച്ചു പറത്തി വൈഭവ് സൂര്യവംശി
Vaibhav Sooryavanshi Jaspirt Bumrah Six : ഐപിഎല്ലിൽ ആദ്യമായിട്ടാണ് വൈഭവ് സൂര്യവംശി ജസ്പ്രിത് ബുമ്രയെ നേരിടുന്നത്. നേരിട്ട ആദ്യ പന്ത് തന്നെ ഇന്ത്യയുടെ കൗമാര താരം അടിച്ച് സിക്സർ പറത്തുകയായിരുന്നു. മഴയെ തുടർന്ന് രാജസ്ഥാൻ റോയൽസ് മുംബൈ ഇന്ത്യൻസ് മത്സരം 11 ഓവറാക്കി ചുരുക്കിയിരുന്നു.
Vaibhav Sooryavanshi
ക്രിക്കറ്റിൽ ജസ്പ്രിത് ബുമ്രയെ നേരിട്ട ആദ്യ പന്തിൽ തന്നെ സിക്സർ പറത്തി രാജസ്ഥാൻ റോയൽസിൻ്റെ ഓപ്പണറും കൗമാരത്താരവുമായി വൈഭവ് സൂര്യവംശി. ഇന്ന് ഗുവാഹത്തിയിൽ നടന്ന രാജസ്ഥാൻ- മുംബൈ ഇന്ത്യൻസ് മത്സരത്തിലാണ് വൈഭവ് ആദ്യമായി ഇന്ത്യൻ ക്രിക്കറ്റ് കണ്ട എക്കാലത്തെയും മികച്ച ബോളറെ നേരിടുന്നത്. മത്സരത്തിൽ ബുമ്രയെറിഞ്ഞ ആദ്യ പന്ത് വൈഭവ് ലോങ് ഓണിലേക്ക് സിക്സർ പറത്തി. മത്സരത്തിൽ ബുമ്രയെ നേരിട്ട മൂന്ന് പന്തിൽ രണ്ടും വൈഭവ് സിക്സറുകൾ പറത്തിയിരുന്നു.
ആദ്യ പന്തിലെ സിക്സറിന് ശേഷം സ്ട്രൈക്ക് റൊട്ടേറ്റ് ചെയ്ത് വീണ്ടും സ്ട്രൈക്ക് ലഭിച്ചത് ശേഷമാണ് വൈഭവ് തൻ്റെ സിക്സും കണ്ടെത്തുന്നത്. ബുമ്രയുടെ ലോ ബൗൺസർ ഓൺ സൈഡിലേക്ക് പായിക്കുകയായിരുന്നു 15കാരൻ. തുടർന്ന് എറിഞ്ഞ രണ്ട് പന്തുകളിൽ വൈഭവിന് റൺസ് കണ്ടെത്താൻ സാധിച്ചില്ല. ബുമ്രയെ മാത്രമല്ല, ന്യൂസിലാൻഡ് പേസർ ട്രെൻഡ് ബോൾട്ടിനെയും ഷാർദുൽ താക്കൂറിനെയും വൈഭവ് സിക്സർ പറത്തിയിരുന്നു.
മത്സരത്തിൽ 14 പന്തിൽ 39 റൺസെടുത്താണ് താരം പുറത്തായത്. ഒരു ബൗണ്ടറിയും അഞ്ച് സിക്സറുകളുമാണ് ഇന്ന് മുംബൈ ഇന്ത്യൻസിനെതിരെയുള്ള മത്സരത്തിൽ വൈഭവ് സൂര്യവംശി അടിച്ചു കൂട്ടിയത്. സൂര്യവംശിക്കൊപ്പം ഓപ്പണിങ് ഇറങ്ങിയ യശ്വസ്വി ജയ്സ്വാളിൻ്റെ മികവിൽ മഴയെ തുടർന്ന് 11 ഓവറാക്കി വെട്ടിച്ചുരുക്കിയ മത്സരത്തിൽ രാജസ്ഥാൻ 150 റൺസാണ് എടുത്തത്. ജയ്സ്വാൾ 32 പന്തിൽ 10 ബൗണ്ടറിയും നാല് സിക്സറുമായി 77 റൺസെടുത്ത് പുറത്താകാതെ നിന്നു. മുംബൈക്ക് വേണ്ടി അള്ളാ ഘസാനഫറും ഷാർദുൽ താക്കൂറുമാണ് വിക്കറ്റുകൾ സ്വന്തമാക്കിയത്.
