Rohit Sharma: സ്കാനിങിന് വിധേയനായി രോഹിത് ശര്മ; പഞ്ചാബിനെതിരെ കളിക്കുന്നത് സംശയത്തില്
Rohit Sharma hamstring injury update: രോഹിത് ശര്മ പരിക്കിനെ തുടര്ന്ന് സ്കാനിങിന് വിധേയനായി. ആര്സിബിക്കെതിരായ മത്സരത്തിനിടെയാണ് പരിക്കേറ്റത്. സ്കാനിങ് റിപ്പോര്ട്ട് അടിസ്ഥാനമാക്കിയാകും അടുത്ത മത്സരത്തില് രോഹിത് കളിക്കണമോയെന്ന് തീരുമാനിക്കുക. തിങ്കളാഴ്ച രാവിലെയാണ് സ്കാനിങിന് വിധേയനായത്. 19 റണ്സ് എടുത്തുനില്ക്കവെയാണ് രോഹിതിന് പരിക്കേറ്റത്.
രോഹിത് ശർമ്മ
മുംബൈ: മുംബൈ ഇന്ത്യന്സ് മുന് ക്യാപ്റ്റന് രോഹിത് ശര്മ പരിക്കിനെ തുടര്ന്ന് സ്കാനിങിന് വിധേയനായി. ആര്സിബിക്കെതിരായ മത്സരത്തിനിടെയാണ് താരത്തിന് പരിക്കേറ്റത് (hamstring injury). സ്കാനിങ് റിപ്പോര്ട്ട് അടിസ്ഥാനമാക്കിയാകും മുംബൈയുടെ അടുത്ത മത്സരത്തില് രോഹിത് കളിക്കണമോയെന്ന് തീരുമാനിക്കുക. തിങ്കളാഴ്ച രാവിലെയാണ് താരം സ്കാനിങിന് വിധേയനായത്.
സ്കാന് റിസള്ട്ട് ഇന്ന് വൈകുന്നേരത്തോടെ ലഭ്യമാകും, പരിക്ക് സാരമാണെങ്കില് താരത്തിന് രണ്ട് മത്സരങ്ങളെങ്കിലും നഷ്ടമായേക്കുമെന്നും ബന്ധപ്പെട്ട വൃത്തങ്ങളെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്ട്ട് ചെയ്തു. പരിക്കിനെ തുടര്ന്ന് ബാറ്റിങിനിടെ താരം റിട്ടയേര്ഡ് ഹര്ട്ടായി മടങ്ങുകയായിരുന്നു.
13 പന്തില് 19 റണ്സ് എടുത്തുനില്ക്കവെയാണ് രോഹിതിന് പരിക്കേറ്റത്. രണ്ട് ഫോറും, ഒരു സിക്സും നേടി മികച്ച രീതിയില് ബാറ്റു ചെയ്യുന്നതിനിടെയാണ് താരത്തിന് പരിക്കേറ്റത്. 241 റണ്സ് എന്ന കൂറ്റന്ലക്ഷ്യം പിന്തുടര്ന്ന മുംബൈയ്ക്ക്, രോഹിത് പാതിവഴിയില് മടങ്ങിയത് തിരിച്ചടിയായി.
മത്സരത്തില് സംഭവിച്ചത്
ആര്സിബിയോട് 18 റണ്സിനാണ് മുംബൈ തോറ്റത്. ഇമ്പാക്ട് പ്ലയറായെത്തി പുറത്താകാതെ 31 പന്തില് 71 റണ്സ് നേടിയ ഷെര്ഫെയ്ന് റുഥര്ഫോര്ഡിനും, 22 പന്തില് 40 റണ്സെടുത്ത ക്യാപ്റ്റന് ഹാര്ദ്ദിക് പാണ്ഡ്യയ്ക്കും മാത്രമാണ് മുംബൈയ്ക്കായി പൊരുതിയത്.
ഐപിഎല് 2026 സീസണില് ഇതുവരെ വളരെ പരിതാപകരമായ പ്രകടനമാണ് മുംബൈ പുറത്തെടുത്തത്. നാല് മത്സരങ്ങളില് മൂന്നിലും തോറ്റു. ഒരെണ്ണത്തില് മാത്രമാണ് ജയിച്ചത്. രണ്ട് പോയിന്റുമായി പോയിന്റ് പട്ടികയില് എട്ടാമതാണ് മുന് ചാമ്പ്യന്മാര്. ഏപ്രില് 16-നാണ് മുംബൈയുടെ അടുത്ത മത്സരം. മുംബൈ വാങ്കഡെ സ്റ്റേഡിയത്തിലാണ് പഞ്ചാബ് കിങ്സിനെതിരായ ഈ പോരാട്ടം.
