Pakistan: പാകിസ്ഥാനിൽ ചാവേര്‍ ബോംബ് സ്ഫോടനം; 25 പേർ കൊല്ലപ്പെട്ടു

Pakistan suicide bomber

പാകിസ്ഥാനിൽ ഉണ്ടായ ചാവേർ ആക്രമണത്തിൽ 25 പേർ കൊല്ലപ്പെട്ടതായി റിപ്പോർട്ട്. ഇന്നലെ രാഷ്ട്രീയ പാർട്ടികൾക്കെതിരെ മൂന്ന് വ്യത്യസ്ത ആക്രമണങ്ങളാണ് ഉണ്ടായത്. ഇതിൽ തെക്കുപടിഞ്ഞാറൻ പ്രവിശ്യയായ ബലൂചിസ്ഥാനിൽ രാഷ്ട്രീയ റാലിയിൽ നടന്ന ചാവേർ ബോംബാക്രമണത്തിൽ 14 പേർ മരിച്ചതായി എഎഫ്‌പി റിപ്പോർട്ട് ചെയ്തു.

ബലൂചിസ്ഥാന്റെ തലസ്ഥാനമായ ക്വറ്റയിൽ, ബലൂചിസ്ഥാൻ നാഷണൽ പാർട്ടിയുടെ (ബിഎൻപി) രാഷ്ട്രീയ റാലിയെ ലക്ഷ്യം വച്ചായിരുന്നു ചാവേർ ബോംബ് ആക്രമണം ഉണ്ടായത്. സംഭവത്തിൽ 40 ഓളം പേർക്ക് പരിക്കേറ്റു. ഇറാനിയൻ അതിർത്തിക്കടുത്തുള്ള ബലൂചിസ്ഥാനിൽ നടന്ന മറ്റൊരു ആക്രമണത്തിൽ അഞ്ച് പേർ മരിച്ചു. ഖൈബർ പഖ്തൂൺഖ്വ പ്രവിശ്യയിൽ നടന്ന ചാവേർ ബോംബർ ആക്രമണത്തിൽ ആറ് സൈനികർ കൊല്ലപ്പെട്ടു.

വിഘടനവാദ തീവ്രവാദ സംഘടനയായ ബലൂച് ലിബറേഷൻ ആർമി (BLA) ആക്രമണത്തിന്റെ ഉത്തരവാദിത്തം ഏറ്റെടുത്തിട്ടുണ്ട്. അഫ്ഗാനിസ്ഥാനും ഇറാനും അതിർത്തി പങ്കിടുന്ന ബലൂചിസ്ഥാന്റെ സ്വാതന്ത്ര്യത്തിനായി പോരാടുന്ന വിമത ഗ്രൂപ്പാണ് ബലൂച് ലിബറേഷൻ ആർമി. പ്രവിശ്യയിലെ സമ്പന്നമായ വാതക, ധാതു വിഭവങ്ങൾ തദ്ദേശവാസികൾക്ക് പ്രയോജനപ്പെടാതെ സർക്കാർ ചൂഷണം ചെയ്യുന്നുവെന്നാണ് ബലൂച് ലിബറേഷൻ ആർമി ആരോപിക്കുന്നത്.