Nykaa: ലിപ്സ്റ്റിക് ജീവിതം മാറ്റി, അമ്പതാം വയസിൽ കോടികളുടെ ആസ്തി; ഇത് നൈകയുടെ കഥ

Falguni Nayar

വിജയം സ്വന്തമാക്കാൻ പ്രായമോ മുൻകാല അനുഭവങ്ങളോ തടസങ്ങളാകില്ല എന്നതിന് ഉത്തമ ഉദാഹരണമാണ് ഇന്ത്യൻ ശതകോടീശ്വരന്മാരിലെ പെൺ പുലി, ഫാൽ​ഗുനി നയ്യാർ. മാനേജിം​ഗ് ഡയറക്ടർ പദവിയിൽ നിന്ന് പടിയിറങ്ങി സ്വന്തമായൊരു സംരംഭം ആരംഭിക്കുമ്പോൾ ഫാൽഗുനിക്ക് കൈവശമുണ്ടായിരുന്നത്, വിജയിക്കണമെന്ന നിശ്ചയദാർഢ്യം മാത്രമായിരുന്നു. അമ്പതാം വയസിൽ കോടികളുടെ സാമ്രാജ്യം പടുതുയർത്തിയ, നൈകയുടെ അമരക്കാരിയുടെ കഥ അറിയാം…

ഫാൽ​ഗുനി നയ്യാർ

ഏഷ്യയിലെ ഏറ്റവും ശക്തയായ വനിത സംരംഭകരിൽ ഒരാളായ ഫാൽഗുനി നയ്യാരുടെ ജീവിതം വിജയത്തിന് പ്രായം തടസമല്ല എന്നതിന്റെ ഉത്തമ ഉദാഹരണമാണ്.  അമ്പതാം വയസിൽ കൊട്ടക് മഹീന്ദ്ര കാപിറ്റൽ കമ്പനിയുടെ മാനേജിം​ഗ് ഡയറക്ടർ ജോലി ഉപേക്ഷിച്ചാണ് ഫാൽഗുനി നയ്യാർ ബിസിനസ് രം​ഗത്തേക്ക് കുതിച്ചത്.

ഒരു സ്റ്റാർട്ടപ്പായി തുടങ്ങിയ നൈക എന്ന സ്ഥാപനം പിന്നീട് രാജ്യത്തെ പ്രമുഖ ബ്യൂട്ടി റീറ്റൈലായി വളർന്നു. നാലായിരത്തിലധികം ബ്യൂട്ടി പേഴ്സൺൽ കെയർ ഉൽപന്നങ്ങളാണ് കമ്പനി വിറ്റഴിക്കുന്നത്. കമ്പനി തുടങ്ങി ഒമ്പത് വർഷങ്ങൾക്കുള്ളിലാണ് ഈ നേട്ടങ്ങൾ സ്വന്തമാക്കിയത്. നിലവിൽ അവൈവ ഇൻഷുറൻസ് ബോർഡ്, ഡാബർ ഇന്ത്യ എന്നീ കമ്പനികളുടെ ബോർഡ് അം​ഗം കൂടിയാണ് ഫാൽഗുനി.

നൈക മാറ്റിയ ജീവിതം

ഇന്ത്യയിലെ ആദ്യത്തെ ഓൺലൈൻ ബ്യൂട്ടി ഇ-മാർക്കറ്റ് പ്ലേസാണ് നൈക. തന്റെ 50-ാം പിറന്നാളിന് തൊട്ടുമുമ്പാണ് 2012-ൽ, ജോലി ഉപേക്ഷിച്ച് അവർ നൈകക്ക് തുടക്കമിട്ടത്.  സൗന്ദര്യവർദ്ധക ഉൽപ്പന്നങ്ങൾ ഓൺലൈനിൽ വിൽക്കുന്ന ഒരു ഇ-മാർക്കറ്റ് പ്ലേസ് എന്ന ആശയം അന്ന് ഇന്ത്യയിൽ പുതിയതായിരുന്നു. ‘നായിക’ എന്ന സംസ്‌കൃത പദത്തിൽ നിന്നാണ് ‘Nykaa’ എന്ന പേര് സ്വീകരിച്ചത്. സ്ത്രീകളെ ശാക്തീകരിക്കുക എന്നതായിരുന്നു പ്രധാന ലക്ഷ്യം.

ALSO READ: പരാജയം 1009 തവണ, വിജയം 65ാം വയസിലും; ജീവിതം മാറ്റിയ ഒരു ‘കോഴിക്കാലിന്റെ’ കഥ

നൈകയുടെ വളർച്ച

തുടക്കത്തിൽ സാങ്കേതിക വെല്ലുവിളികളും ഓർഡറുകൾ കൈകാര്യം ചെയ്യുന്നതിലെ പ്രശ്‌നങ്ങളും നൈക നേരിട്ടു. എന്നാൽ സ്ഥിരമായ പരിശ്രമത്തിലൂടെ 850-ൽ അധികം ബ്രാൻഡുകളും 35,000-ത്തിലധികം ഉൽപ്പന്നങ്ങളുമായി നൈക വളർന്നു. തുടർന്ന് ഓൺലൈനിന് പുറമെ, ‘നൈക ലക്‌സ്’, ‘നൈക ഓൺ ട്രെൻഡ്’ എന്നിങ്ങനെ രണ്ട് ഫോർമാറ്റുകളിൽ രാജ്യത്തുടനീളം ഫിസിക്കൽ സ്റ്റോറുകളും നൈക സ്ഥാപിച്ചു.

ഐപിഒ വിജയം, നിലവിലെ ആസ്തി

2020-ൽ, നൈക ഐപിഒ-ക്ക് വേണ്ടിയുള്ള പ്രക്രിയ ആരംഭിച്ചു. ഒരു യൂണികോൺ കമ്പനി പൊതുജനങ്ങൾക്ക് മുന്നിൽ അവതരിപ്പിക്കുന്ന ആദ്യത്തെ ഇന്ത്യൻ വനിതയായി ഫാൽഗുനി മാറി. കോവിഡ് മഹാമാരിയുടെ ആഘാതം ഉണ്ടായിരുന്നിട്ടും, നൈകയുടെ ഐപിഒ ഏകദേശം 80% പ്രീമിയത്തോടെയാണ് അരങ്ങേറ്റം കുറിച്ചത്. ഫോബ്‌സ് മാഗസിൻ്റെ കണക്കനുസരിച്ച്, ഫാൽഗുനി നായരുടെ നിലവിലെ മൊത്തം ആസ്തി ഏകദേശം 2.7 ബില്യൺ ഡോളർ (ഏകദേശം ₹22,262 കോടി) ആണ്.