Keerthy Suresh Wedding : ‘അടുത്ത മാസം എൻ്റെ കല്യാണമാണ്, ഗോവയിൽ വെച്ച്’; വിവാഹവാർത്ത സ്ഥിരീകരിച്ച് കീർത്തി സുരേഷ്
Keerthy Suresh-Antony Thattil Wedding : തിരുപ്പതി ക്ഷേത്ര സന്ദർശനത്തിനിടെയാണ് കീർത്തി സുരേഷ് തൻ്റെ വിവാഹ വാർത്ത സ്ഥിരീകരിച്ചത്. സുഹൃത്തും വ്യവസായിയുമായ ആൻ്റണി തട്ടിലിനെയാണ് കീർത്തി വിവാഹം ചെയ്യാൻ പോകുന്നത്.
നടി കീർത്തി സുരേഷ് (Image Courtesy: TV9 Network/Keerthy Suresh Instagram)
തിരുപ്പതി : തൻ്റെ വിവാഹ വാർത്തകൾ സ്ഥിരീകരിച്ച് തെന്നിന്ത്യൻ താരം കീർത്തി സുരേഷ് (Keerthy Suresh). തിരുമല തിരുപ്പതി ക്ഷേത്രം സന്ദർശനത്തിനിടെയാണ് കീർത്തി സുരേഷ് തൻ്റെ വിവാഹ വാർത്ത സ്ഥിരീകരിച്ചത്. മാതാപിതാക്കളായ മേനക സുരേഷും ജി. സുരേഷ് കുമാറും കീർത്തിക്കൊപ്പം ക്ഷേത്രസന്ദർശനം നടത്തിയിരുന്നു. ഏറെ നാളത്തെ പ്രണയത്തിനൊടുവിലാണ് കീർത്തി തൻ്റെ സുഹൃത്തായ ആൻ്റണി തട്ടിലിനെ വിവാഹം ചെയ്യുന്നത്. നേരത്തെ ഇരുവരുടെ പ്രണയബന്ധത്തെ കുറിച്ചുള്ള സൂചന കീർത്തി തൻ്റെ സോഷ്യൽ മീഡിയ പേജിലൂടെ അറിയിച്ചിരുന്നു.
“അടുത്തത് ബേബി ജോൺ എന്ന ഹിന്ദി ചിത്രത്തിലാണ് അഭിനയിക്കുക. അടുത്ത മാസം എൻ്റെ വിവാഹമാണ്. ഗോവയിൽ വെച്ചാണ് വിവാഹം” കീർത്തി സൂരേഷ് തിരുപ്പതിയിൽ മാധ്യമങ്ങളോടായി പറഞ്ഞു. ഡിസംബറിൽ 11ന് ഗോവയിൽ വെച്ചാകും കീർത്തി സൂരേഷിൻ്റെ വിവാഹമെന്ന റിപ്പോർട്ടുകൾ കഴിഞ്ഞ ദിവസങ്ങളിൽ പുറത്ത് വന്നിരുന്നു. ഇത് ഇപ്പോൾ സ്ഥിരീകരിച്ചിരിക്കുകയാണ് നടി. ഈ റിപ്പോർട്ടുകൾക്ക് പിന്നാലെയാണ് കീർത്തി പ്രണയരഹസ്യം കഴിഞ്ഞ ദിവസം വെളിപ്പെടുത്തിയത്. എന്നാൽ വിവാഹം എന്ന്, എവിടെ വെച്ച് എന്നുള്ള സൂചനകൾ നൽകിയിരുന്നില്ല. 15 വർഷത്തെ പ്രണയത്തിനൊടുവിലാണ് കീർത്തിയും സൂഹൃത്തായ ആൻ്റണിയും തമ്മിൽ വിവാഹിതരാകുന്നത്.
ആരാണ് കീർത്തിയുടെ വരൻ ആൻ്റണി തട്ടിൽ
കീർത്തിയുടെ ബാലകാല സൂഹൃത്താണ് ആൻ്റണി. യുഎഇ ആസ്ഥാനമായി പ്രവർത്തിക്കുന്ന വ്യവസായിയായ ആൻ്റണി കൊച്ചിയിലെ ഒരു റിസോർട്ട് ശൃംഖലയുടെ ഉടമയും കൂടിയാണെന്നാണ് ഹിന്ദുസ്ഥാൻ ടൈംസ് റിപ്പോർട്ട് ചെയ്യുന്നത്. ഇതിന് പുറമെ ചെന്നൈയിൽ രജിസ്റ്റർ ചെയ്ത രണ്ട് കമ്പനികളും ആൻ്റണിയുടെ പേരിലുണ്ടെന്ന് എച്ച്ടിയുടെ റിപ്പോർട്ടിൽ പറയുന്നു. 15 വർഷത്തെ പ്രണയമാണ് ഇരുവരുടേതെങ്കിലും കീർത്തിയും ആൻ്റണി ഒരിക്കിലും ഒരുമിച്ച ഒരു പൊതുവേദി കാണാൻ ഇടയായിട്ടില്ല. ഇരുവരും ഒരുമിച്ചുള്ള ചിത്രങ്ങൾ ഇതുവരെ ഒരു സോഷ്യൽ മീഡിയ പേജിലും കാണാൻ ഇടയായിട്ടുമില്ല. 2008-09 മുതലാണ് ആൻ്റണിയും കീർത്തിയും തമ്മിലുള്ള ബന്ധം ആരംഭിക്കുന്നതെന്നാണ് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നത്.
ദിലീപിൻ്റെ കുബേരൻ എന്ന സിനിമയിൽ ബാലതാരമായിട്ടാണ് കീർത്തി സുരേഷ് സിനിമയിലേക്ക് എത്തിയത്. പിന്നീടെ 2013-ൽ പ്രിയദർശൻ-മോഹൻലാൽ കൂട്ടുകെട്ടിൽ പിറന്ന ഗീതാഞ്ജലിയിലൂടെയായിരുന്നു കീർത്തി സുരേഷിന് നായിക കഥാപാത്രം ലഭിക്കുന്നത്. പിന്നീട് റിംഗ് മാസ്റ്ററിലും അഭിനയിച്ചു. തമിഴിൽ ഇതു എന്ന മായം ആണ് ആദ്യത്തെ ചിത്രം. 2024-ൽ രഘു താത്ത, റിവോൾവർ റീത്ത തുടങ്ങിയ ചിത്രങ്ങൾ ഇനിയും കീർത്തിയുടേതായി റിലീസാകാനുണ്ട്. പിന്നാലെ മഹാനടി എന്ന സിനിമയിലൂടെ തെലുങ്കിൽ നിറയെ ആരാധകരെ കീർത്തി നേടിയെടുത്തു. വരുൺ ധവാൻ നായകനായി എത്തുന്ന ബേബി ജോൺ എന്ന ബോളിവുഡ് ചിത്രം കീർത്തിയുടേതായി അണിയറയിൽ തയ്യാറെടുക്കുന്നുണ്ട്.
