Saji Cheriyan : മുകേഷിനെ പറ്റി മിണ്ടാതെ സജി ചെറിയാൻ; മാധ്യമങ്ങൾക്കു നേരെ കുറ്റപ്പെടുത്തൽ
Minister Saji Cherian against the media: മുകേഷുമായി ബന്ധപ്പെട്ട വിഷയത്തിൽ പ്രതികരിക്കാൻ മന്ത്രി തയ്യാറായില്ല. ഒരു പരിപാടിയിൽ പങ്കെടുത്ത് പുറത്തു വന്നപ്പോഴാണ് മുകേഷ് വിഷയത്തിൽ പ്രതികരിക്കാൻ മന്ത്രി തയ്യാറാകാതിരുന്നത്.
തിരുവനന്തപുരം: മുകേഷിന്റെ വിഷയത്തിൽ മാധ്യമങ്ങൾക്കെതിരേ സംസാരിച്ച് മന്ത്രി സജി ചെറിയാൻ. എന്തും ആരെപ്പറ്റിയും എപ്പോഴും പറയാൻ ഒരു മടിയും കാണിക്കാത്ത അവസ്ഥയിലാണ് ഇപ്പോൾ മാധ്യമങ്ങളെന്നും തെറ്റുകൾ ചൂണ്ടിക്കാണിക്കണം തെറ്റിനെതിരേ നിലപാടുകൾ സ്വീകരിക്കണം എന്നും അദ്ദേഹം പറഞ്ഞു.
പക്ഷേ ഇതെല്ലാം ചെയ്യുമ്പോൾ അത് എങ്ങനെ സമൂഹത്തെ ബാധിക്കുമെന്നതിനെപ്പറ്റി കൂടി ചിന്തിക്കണം എന്നും മന്ത്രി കൂട്ടിച്ചേർത്തു. തെറ്റും കുറ്റങ്ങളും കാണിച്ചുകൊണ്ട് സമൂഹത്തെ ഉണർത്താൻ അവർക്ക് സാധിക്കണമെന്നും അദ്ദേഹം വ്യക്തമാക്കി.
മുകേഷ് വിഷയത്തിൽ പ്രതികരണമില്ല
മുകേഷുമായി ബന്ധപ്പെട്ട വിഷയത്തിൽ പ്രതികരിക്കാൻ മന്ത്രി തയ്യാറായില്ല. ഒരു പരിപാടിയിൽ പങ്കെടുത്ത് പുറത്തു വന്നപ്പോഴാണ് മുകേഷ് വിഷയത്തിൽ പ്രതികരിക്കാൻ മന്ത്രി തയ്യാറാകാതിരുന്നത്. മുകേഷിനെതിരായകേസുകളേപ്പറ്റിയുള്ള ചോദ്യത്തിന് കോടതി പരിഗണനയിലുള്ള വിഷയത്തിൽ നോ കമന്റ് എന്നായിരുന്നു മന്ത്രി പറഞ്ഞത്. കോടതിയിലുള്ള വിഷയത്തിൽ പ്രതികരിക്കില്ലെന്നും അദ്ദേഹം വ്യക്തമാക്കി.
എന്നാൽ സിനിമ നയരൂപീകരണ കമ്മിറ്റിയിൽ മുകേഷ് തുടരുന്നതിനെപ്പറ്റി ന്യായീകരിച്ചാണ് അദ്ദേഹം സംസാരിച്ചത്. നിലവിലേത് സിനിമാ നയരൂപീകരണ കമ്മറ്റി അല്ലെന്നും നയം രൂപീകരിക്കേണ്ടത് സർക്കാരും ക്യാബിനറ്റും ചേർന്നാണെന്നും മന്ത്രി പറഞ്ഞു.
ALSO READ – കോഴിയുമായി വന്ന് പ്രതിഷേധം ; ആവശ്യം മുകേഷിന്റെ രാജി
നടിയെ ലൈംഗികമായി പീഡിപ്പിച്ചെന്ന പരാതിയിൽ നടനും എംഎൽഎയുമായ മുകേഷിന്റെ അറസ്റ്റ് കോടതി ഒരാഴ്ചത്തേക്ക് തടഞ്ഞിരുന്നു. എറണാകുളം ജില്ലാ സെഷൻസ് കോടതിയാണ് കേസിൽ നടന്റെ അറസ്റ്റ് അടുത്ത മാസം മൂന്ന് വരെ തടഞ്ഞത്. നടൻ നൽകിയ മുൻകൂർ ജാമ്യാപേക്ഷ പരിഗണിച്ചാണ് കോടതിയുടെ ഇടപെടൽ.
വിശദമായ വാദം അടുത്ത മാസം മൂന്നിന് നടക്കുമെന്നും ജില്ലാ സെഷൻസ് കോടതി അറിയിച്ചു. ഐപിസി 376 (1) ബലാത്സംഗം, ഐപിസി 354 സ്ത്രീത്വത്തെ അപമാനിക്കണമെന്ന ഉദ്ദേശത്തോടെ ബലപ്രയോഗം, ഐസിപി 452 അതിക്രമിച്ച് കടക്കൽ, ഐപിസി 509 സ്ത്രീത്വത്തെ അപമാനിക്കുന്ന അംഗവിക്ഷേപം, വാക്കുകൾ തുടങ്ങിയ തുടങ്ങിയ വകുപ്പുകളാണ് മുകേഷിനെതിരെ ചുമത്തിയിരിക്കുന്നത്.
