Travel Advisory for UAE Expats: രാജ്യത്തെ വിമാനത്താവളങ്ങളിൽ സുരക്ഷ ശക്തമാക്കി; യു.എ.ഇയിൽ നിന്നുള്ള യാത്രക്കാർക്ക് മുന്നറിയിപ്പ്
India Tightens Airport Security Measures for Independence Day Celebrations: ഡൽഹി, മുംബൈ, ബെംഗളൂരു, കൊച്ചി, തിരുവനന്തപുരം തുടങ്ങി രാജ്യത്തെ പ്രധാന വിമാനത്താവളങ്ങളിൽ എത്തുന്ന യാത്രക്കാർക്ക് സുരക്ഷാ പരിശോധനകൾക്കും മറ്റ് നടപടിക്രമങ്ങൾക്കുമായി സാധാരണയിലും അധികം സമയം വേണ്ടിവന്നേക്കാം. അവസാന നിമിഷം വിമാനത്താവളത്തിൽ എത്തുന്നത് ഒഴിവാക്കണമെന്നും, പുറപ്പെടുന്നതിന് മുൻപ് വിമാനത്തിൻ്റെ സമയക്രമം കൃത്യമായി പരിശോധിക്കണമെന്നും അധികൃതർ നിർദ്ദേശം നൽകി
ന്യൂഡൽഹി: ആഗസ്റ്റ് 15-നോടനുബന്ധിച്ച് യു.എ.ഇയിൽ നിന്ന് ഇന്ത്യയിലേക്ക് യാത്ര ചെയ്യുന്നവർ യാത്ര നേരത്തെ പ്ലാൻ ചെയ്യണമെന്ന് നിർദ്ദേശം. സ്വാതന്ത്ര്യ ദിനാഘോഷങ്ങളുടെ ഭാഗമായി രാജ്യത്തെ വിവിധ വിമാനത്താവളങ്ങളിൽ സുരക്ഷാ പരിശോധനകൾ കർശനമാക്കിയതോടെ വിമാനത്താവളങ്ങളിൽ സുരക്ഷാ പരിശോധനകൾക്ക് കൂടുതൽ സമയം വേണ്ടിവന്നേക്കാം എന്നതിനാലാണ് യു.എ.ഇയിൽ നിന്നുള്ള യാത്രക്കാർക്ക് പ്രത്യേക മുന്നറിയിപ്പ് നൽകിയിരിക്കുന്നത്.
ഡൽഹി, മുംബൈ, ബെംഗളൂരു, കൊച്ചി, തിരുവനന്തപുരം തുടങ്ങി രാജ്യത്തെ പ്രധാന വിമാനത്താവളങ്ങളിൽ എത്തുന്ന യാത്രക്കാർക്ക് സുരക്ഷാ പരിശോധനകൾക്കും മറ്റ് നടപടിക്രമങ്ങൾക്കുമായി സാധാരണയിലും അധികം സമയം വേണ്ടിവന്നേക്കാം. അവസാന നിമിഷം വിമാനത്താവളത്തിൽ എത്തുന്നത് ഒഴിവാക്കണമെന്നും, പുറപ്പെടുന്നതിന് മുൻപ് വിമാനത്തിൻ്റെ സമയക്രമം കൃത്യമായി പരിശോധിക്കണമെന്നും അധികൃതർ നിർദ്ദേശം നൽകി. പരിശോധനാ വേളയിൽ സമയനഷ്ടം ഒഴിവാക്കാൻ ടിക്കറ്റ് ഉൾപ്പെടെയുള്ള യാത്രാ രേഖകൾ എളുപ്പത്തിൽ എടുക്കാൻ പാകത്തിൽ കൈയിൽ കരുതണമെന്നും നിർദ്ദേശത്തിൽ പറയുന്നു.
ബ്യൂറോ ഓഫ് സിവിൽ ഏവിയേഷൻ സെക്യൂരിറ്റിയുടെ നിർദ്ദേശപ്രകാരം കൊച്ചി വിമാനത്താവളത്തിൽ സുരക്ഷ കർശനമാക്കിയിട്ടുണ്ട്. 2026 ആഗസ്റ്റ് 20 വരെ ഈ സുരക്ഷാ ക്രമീകരണങ്ങൾ തുടരും. യാത്രക്കാരെയും ലഗേജുകളും കാർഗോയും കർശന പരിശോധനക്ക് വിധേയമാക്കുന്നതിന് പുറമെ വിമാനത്താവളത്തിന് സമീപം വാഹന പരിശോധനയും ശക്തമാക്കിയിട്ടുണ്ട്. ആഗസ്റ്റ് 20 വരെ ആഭ്യന്തര-അന്താരാഷ്ട്ര ടെർമിനലുകൾക്കുള്ളിൽ സന്ദർശകർക്ക് പ്രവേശനം ഉണ്ടായിരിക്കുന്നതല്ല എന്നും കൊച്ചി അന്താരാഷ്ട്ര വിമാനത്താവള അധികൃതർ അറിയിച്ചു.
Also Read: No Tips Before Ride : ടിപ് വേണ്ട, ഓൺലൈൻ ടാക്സികൾക്ക് കർശന നിർദേശവുമായി കേന്ദ്രം
തിരുവനന്തപുരത്തും സുരക്ഷാ പരിശോധനകൾ വർധിപ്പിച്ചിട്ടുണ്ട്. യാത്രക്കാർക്ക് ചില അധിക പരിശോധനകൾ കൂടി നേരിടേണ്ടി വരും. ടിക്കറ്റ്, തിരിച്ചറിയൽ കാർഡ്, മറ്റ് രേഖകൾ എന്നിവ വേഗത്തിൽ പരിശോധനയ്ക്കായി നൽകാൻ തയ്യാറായിരിക്കണം. വിമാനത്താവളത്തിൻ്റെ സുരക്ഷയ്ക്കായി ഉദ്യോഗസ്ഥരുമായി സഹകരിക്കണമെന്നും അധികൃതർ അഭ്യർത്ഥിച്ചു.
സ്വാതന്ത്ര്യ ദിനാഘോഷങ്ങളുടെ ഭാഗമായി ആഗസ്റ്റ് 10 മുതൽ 20 വരെയാണ് മുംബൈ വിമാനത്താവളത്തിൽ സുരക്ഷ ശക്തമാക്കിയിരിക്കുന്നത്. പരിശോധനകൾ പൂർത്തിയാക്കാൻ കൂടുതൽ സമയമെടുക്കുമെന്നതിനാൽ യാത്രാ തടസ്സങ്ങൾ ഒഴിവാക്കാൻ യാത്രക്കാർ നേരത്തെ റിപ്പോർട്ട് ചെയ്യണമെന്ന് അധികൃതർ അറിയിച്ചു.
ഡൽഹിയിലും സുരക്ഷ കർശനമാക്കിയതിനാൽ യു.എ.ഇയിൽ നിന്നുള്ള യാത്രക്കാർക്ക് ക്ലിയറൻസ് ലഭിക്കാൻ കൂടുതൽ സമയം വേണ്ടിവരും. അവസാന നിമിഷമുള്ള പ്രശ്നങ്ങൾ ഒഴിവാക്കാൻ യാത്രക്കാർ നേരത്തെ തന്നെ വിമാനത്താവളത്തിൽ എത്താൻ ശ്രദ്ധിക്കണം.
സ്വാതന്ത്ര്യ ദിനാഘോഷങ്ങളുടെ ഭാഗമായി ബെംഗളൂരുവിൽ വലിയ തിരക്ക് അനുഭവപ്പെടാൻ സാധ്യതയുണ്ട്. ചെക്ക്-ഇൻ, സുരക്ഷാ പരിശോധനകൾ എന്നിവയ്ക്ക് കൂടുതൽ സമയം വേണ്ടിവരുമെന്നതിനാൽ യാത്രക്കാർ നേരത്തെ തന്നെ വീട്ടിൽ നിന്ന് ഇറങ്ങാൻ ശ്രദ്ധിക്കണമെന്നും വിമാനത്തിൻ്റെ സമയക്രമവുമായി ബന്ധപ്പെട്ട വിവരങ്ങൾ അറിയാൻ എയർലൈനുകളുമായി ബന്ധപ്പെടണമെന്നും എയർപോർട്ട് അധികൃതർ നിർദ്ദേശം നൽകി. ഇൻഡിഗോ സ്പൈസ് ജെറ്റ് തുടങ്ങിയ എയർലൈനുകളും യാത്രക്കാർക്ക് ഈവിധം മുന്നറിയിപ്പ് നൽകിയിട്ടുണ്ട്.
English Summary
Security has been significantly tightened at major Indian airports, including Delhi, Mumbai, and Kochi, ahead of Independence Day celebrations. UAE travellers and other passengers are strongly advised to arrive early, keep their travel documents handy, and expect longer wait times for security screening and check-in procedures until August 20.
