Kerala Rain Alerts : സംസ്ഥാനത്ത് ഇന്ന് വ്യാപക മഴയ്ക്ക് സാധ്യത; നാല് ജില്ലകളിൽ ഓറഞ്ച് അലർട്ട്

സംസ്ഥാനത്ത് ഇന്ന് വ്യാപക മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ്. നാല് ജില്ലകളിൽ ഓറഞ്ച് അലർട്ടും ഏഴ് ജില്ലകളിൽ യെല്ലോ അലർട്ടും പ്രഖ്യാപിച്ചു. സെപ്തംബർ ഒന്ന് വരെ സംസ്ഥാനത്ത് കനത്ത മഴ തുടരുമെന്നും കാലാവസ്ഥാ വകുപ്പ് അറിയിച്ചു. മഴയ്ക്കൊപ്പം ശക്തമായ കാറ്റിനും സാധ്യതയുണ്ട്.

കോഴിക്കോട്, കണ്ണൂർ, വയനാട്, കാസർഗോഡ് ജില്ലകളിലാണ് ഇന്ന് ഓറഞ്ച് അലർട്ട് പ്രഖ്യാപിച്ചത്. പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, പാലക്കാട്, മലപ്പുറം ജില്ലകളിലാണ് യെല്ലോ അലർട്ട്. ഇന്ന് ബംഗാൾ ഉൾക്കടലിൽ രൂപപ്പെടുമെന്ന് കരുതപ്പെടുന്ന പുതിയ ന്യൂനമർദ്ദമാണ് സംസ്ഥാനത്തിൽ മഴ ശക്തമാകാനുള്ള കാരണമായി പ്രവചിക്കപ്പെടുന്നത്. ഗുജറാത്തിലെ കച്ച് മേഖലയിലുള്ള ന്യൂനമർദ്ദം അസ്ന ചുഴലിക്കാറ്റായി അറബിക്കടലിൽ പ്രവേശിച്ച് ഒമാൻ ഭാഗത്തേക്ക് നീങ്ങാനും സാധ്യതയുണ്ട്.

മഴയ്ക്കൊപ്പം മണിക്കൂറിൽ 40 കിലോമീറ്റർ താഴെ വേഗതയിൽ വീശിയേക്കാവുന്ന കാറ്റിനും സാധ്യത കല്പിക്കപ്പെടുന്നുണ്ട്. ഓറഞ്ച് അലർട്ട് പ്രഖ്യാപിച്ച വയനാട്ടിൽ ഇന്ന് പ്രത്യേക ജാഗ്രതാനിർദ്ദേശമുണ്ട്. മണ്ണിടിച്ചിൽ സാധ്യതയുള്ളതും വെള്ളം കയറാൻ സാധ്യതയുള്ളതുമായ പ്രദേശങ്ങളിൽ താമസിക്കുന്നവർ പ്രത്യേക ജാഗ്രത പുലർത്തണം.

Also Read : Karunya Pharmacies: കാൻസർ രോ​ഗികൾക്ക് സഹായ ഹസ്തവുമായി സർക്കാർ; കുറഞ്ഞ വിലയിൽ മരുന്നുകൾ വിപണിയിൽ

അടുത്ത 3 മണിക്കൂറിൽ കേരളത്തിലെ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂർ, പാലക്കാട്, മലപ്പുറം, കോഴിക്കോട് ജില്ലകളിൽ മഴ സാധ്യതയുണ്ട്. ഒറ്റപ്പെട്ട, ഇടിമിന്നലോടു കൂടിയ ഇടത്തരം മഴയ്ക്കാണ് സാധ്യത. മണിക്കൂറിൽ 40 കിലോമീറ്ററിൽ താഴെവരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുള്ളതായി കേന്ദ്ര കാലാവസ്ഥാ വകുപ്പ് അറിയിച്ചു. മറ്റു ജില്ലകളിൽ നേരിയ മഴയ്ക്കുള്ള സാധ്യതയുമുണ്ട്.

ബംഗാൾ ഉൾക്കടലിലെയും അറബിക്കടലിലെയും ന്യൂനമർദ്ദങ്ങൾ ഈ മാസം 28ന് തന്നെ കാലാവസ്ഥാ വകുപ്പ് പ്രവചിച്ചിരുന്നു. 28ന് കച്ച് മേഖലയിലാണ് ന്യൂനമർദ്ദം ഉണ്ടായിരുന്നത്. ഗസ്റ്റ് 29 രാവിലെയോടെ ഇത് സൗരാഷ്ട്ര കച്ച് തീരത്തിന് സമീപം വടക്ക്-കിഴക്കന്‍ അറബിക്കടലില്‍ എത്തിച്ചേരാൻ സാധ്യതയുണ്ടെന്നായിരുന്നു പ്രവചനം. ഓഗസ്റ്റ് 29ഓടെ മധ്യ കിഴക്കന്‍ അല്ലെങ്കില്‍ വടക്കന്‍ ബംഗാള്‍ ഉള്‍ക്കടലില്‍ പുതിയൊരു ന്യൂനമര്‍ദ്ദം രൂപപ്പെട്ട്, വടക്കന്‍ ആന്ധ്രാ പ്രദേശ് തെക്കന്‍ ഒഡിഷ തീരത്തേക്ക് നീങ്ങാന്‍ സാധ്യതയുണ്ട് എന്നും കാലാവസ്ഥാ വകുപ്പ് അറിയിച്ചിരുന്നു. ഒറ്റപ്പെട്ട സ്ഥലങ്ങളില്‍ ഓഗസ്റ്റ് 30ന് അതിശക്തമായ മഴയ്ക്കും സെപ്റ്റംബര്‍ 1 വരെ ശക്തമായ മഴയ്ക്കും സാധ്യതയുണ്ടെന്നും കേന്ദ്ര കാലാവസ്ഥ വകുപ്പിന്റെ മുന്നറിയിപ്പില്‍ പറഞ്ഞു. മത്സ്യത്തൊഴിലാളികള്‍ ജാഗ്രത പാലിക്കണമെന്നും നിര്‍ദേശമുണ്ട്. കേരള-ലക്ഷദ്വീപ് തീരങ്ങളിലും കര്‍ണാടക തീരത്തും ഓഗസ്റ്റ് 31 വരെ മത്സ്യബന്ധനത്തിന് പോകാന്‍ പാടില്ലെന്നാണ് കേന്ദ്ര കാലാവസ്ഥ വകുപ്പ് അറിയിച്ചിട്ടുള്ളത്.