V.S. Achuthanandan’s Health Update: വിഎസിന്റെ ആരോഗ്യനില: ഡയാലിസിസും വെന്റിലേറ്റർ സഹായവും തുടരാൻ തീരുമാനം; പുതിയ മെഡിക്കൽ ബുള്ളറ്റിൻ പുറത്ത്
V.S. Achuthanandan's Health Update: സർക്കാർ നിയോഗിച്ച തിരുവനന്തപുരം മെഡിക്കൽ കോളേജിലെ ഡോക്ടർമാരുടെ വിദഗ്ധ സംഘം സന്ദര്ശിച്ച് ചികിത്സകള് വിലയിരുത്തിയതായി പുതിയ മെഡിക്കൽ ബുള്ളറ്റിനിൽ വ്യക്തമാക്കുന്നു.
വി.എസ്. അച്യുതാനന്ദൻ
തിരുവനന്തപുരം: ചികിത്സയിൽ കഴിയുന്ന മുൻ മുഖ്യമന്ത്രി വിഎസ് അച്യുതാനന്ദന്റെ ആരോഗ്യ നിലയുമായി ബന്ധപ്പെട്ട ഏറ്റവും പുതിയ മെഡിക്കൽ ബുള്ളറ്റിൻ പുറത്ത്. തിരുവനന്തപുരം പട്ടം എസ് യു ടി ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലുള്ള അദ്ദേഹത്തെ സർക്കാർ നിയോഗിച്ച തിരുവനന്തപുരം മെഡിക്കൽ കോളേജിലെ ഡോക്ടർമാരുടെ വിദഗ്ധ സംഘം സന്ദര്ശിച്ച് ചികിത്സകള് വിലയിരുത്തിയതായി പുതിയ മെഡിക്കൽ ബുള്ളറ്റിനിൽ വ്യക്തമാക്കുന്നു.
തുടര്ന്ന് വിഎസിന്റെ കുടുംബാംഗങ്ങളും എസ്യുടിയിലെ ഡോക്ടര്മാരും ഉള്പ്പെടെ അവലോകയോഗം ചേര്ന്നു. അദ്ദേഹത്തിന് ഇപ്പോള് നല്കിവരുന്ന വെന്റിലേറ്റര് സപ്പോര്ട്ടും ഡയാലിസിസ് ഉള്പ്പെടെയുള്ള ചികിത്സകളും തുടരാന് തീരുമാനമായി.
കഴിഞ്ഞ മാസമാണ് ഹൃദയാഘാതത്തെ തുടർന്ന് വി എസ് അച്യുതാനന്ദനെ ആശുപത്രിയില് പ്രവേശിപ്പിച്ചത്. രാവിലെ ശാരീരിക അസ്വസ്ഥത പ്രകടിപ്പിച്ചതിനെ തുടര്ന്ന് തിരുവനന്തപുരത്തെ സ്വകാര്യ ആശുപത്രിയില് പ്രവേശിപ്പിക്കുകയായിരുന്നു. പിന്നാലെ ആരോഗ്യ നില ഗുരുതരമായി തുടർന്നെങ്കിലും മരുന്നിനോട് പ്രതികരിക്കുകയായിരുന്നു. മുഖ്യമന്ത്രി പിണറായി വിജയന്, മന്ത്രിമാരായ എ കെ ശശീന്ദ്രൻ, കെ കൃഷ്ണൻകുട്ടി, മുതിർന്ന സിപിഎം നേതാവ് പി കെ ഗുരുദാസൻ, ഇ പി ജയരാജൻ, പി കെ ശ്രീമതി, ഡിജിപി റവാഡ ചന്ദ്രശേഖർ ഉൾപ്പെടെയുള്ള രാഷ്ട്രീയ പ്രമുഖർ വിഎസ് അച്യുതാനന്ദനെ നേരത്തെ ആശുപത്രിയിലെത്തി സന്ദർശിച്ചിരുന്നു.
