Edible Flowers: പച്ചക്കറി വേണ്ട, കറിക്ക് ഈ പൂക്കൾ മതി! രുചിയിലും ഔഷധഗുണത്തിലും മുന്നിൽ
Edible Indian Flowers in Traditional Cooking: ആധുനിക കാലത്ത് ഫാൻസി റെസ്റ്റോറന്റ് വിഭവങ്ങളിലും ട്രെൻഡുകളിലും മാത്രമാണ് 'എഡിബിൾ ഫ്ലവേഴ്സ്' അഥവാ ഭക്ഷ്യയോഗ്യമായ പൂക്കൾ കാണാറുള്ളത്. എന്നാൽ നമ്മുടെ മുത്തശ്ശിമാർ കാലങ്ങളായി ഇന്ത്യൻ പാചകരീതിയിൽ പൂക്കൾ വിവിധ വിഭവങ്ങളിൽ ഉൾപ്പെടുത്തിയിരുന്നു. സീസണുകൾക്കനുസരിച്ച് പാചകത്തിൽ ഉപയോഗിച്ചിരുന്ന ആ പൂക്കളെ അറിഞ്ഞാലോ..
ദക്ഷിണേന്ത്യയിലും ഉത്തരേന്ത്യയിലും ഒരുപോലെ പരമ്പരാഗത പാചകത്തിൽ ഉപയോഗിക്കുന്ന ഒന്നാണ് വാഴപ്പൂവ് അഥവാ വാഴക്കൂമ്പ്. നാരുകളാലും ഇരുമ്പ് സത്തുകളാലും സമൃദ്ധമായ വാഴപ്പൂവ് തോരൻ, കറി, പരിപ്പ് കൂട്ടുകൾ എന്നിവയിൽ ചേർക്കുന്നത് ഏറെ ആരോഗ്യകരമാണ്. (Image Credit source: Unsplash)
മത്തൻ വള്ളികളിൽ കായ്കൾ ഉണ്ടാകുന്നതിന് മുമ്പ് കാണുന്ന പൂക്കൾ നമ്മുടെ നാടൻ അടുക്കളകളിൽ വളരെ പ്രശസ്തമാണ്. കേരളത്തിലും മറ്റ് പ്രദേശങ്ങളിലും ഇവ അരിമാവിലോ കടലമാവിലോ മുക്കി ക്രിസ്പിയായി പൊരിച്ചെടുക്കുന്ന രീതി പരമ്പരാഗതമായി ഉള്ളതാണ്.
മുരിങ്ങ മരത്തിന്റെ പൂക്കൾ സീസണൽ ഭക്ഷണങ്ങളിലെ പ്രധാനിയാണ്. പരിപ്പുകറികളിലും തോരനുകളിലും ലഘുവായ ഗ്രേവികളിലും ഇവ ചേർക്കാറുണ്ട്. ഔഷധഗുണങ്ങൾ ഏറെയുള്ള മുരിങ്ങപ്പൂവ് ശരീരത്തിന് ഊർജവും പ്രതിരോധശേഷിയും നൽകുന്നു.
ചെറിയ കയ്പ്പുരസമുള്ള വേപ്പൂവ് പരമ്പരാഗത ഭക്ഷണങ്ങളിൽ, പ്രത്യേകിച്ച് ചില ആഘോഷ വേളകളിലെ വിഭവങ്ങളിൽ ഉൾപ്പെടുത്താറുണ്ട്. കയ്പ്പ് ആരോഗ്യത്തിന് നല്ലതാണെന്ന വിശ്വാസവും ഇതിന്റെ ഔഷധ ഗുണങ്ങളുമാണ് കാരണം.
റോസാദളങ്ങളാണ് മറ്റൊന്ന്. പലഹാരങ്ങളിലും പാനീയങ്ങളിലും രുപിയും മണവും കൂട്ടാൻ റോസാപ്പൂവ് കാലങ്ങളായി ഉപയോഗിച്ചുവരുന്നു. ഗുൽകന്ദിന്റെ നിർമ്മാണത്തിലും റോസ് സിറപ്പുകളിലും റോസാദളങ്ങൾ ഒഴിച്ചുകൂടാനാവാത്ത ചേരുവയാണ്.
