Dark Circles: കണ്ണിന് ചുറ്റുമുള്ള കറുപ്പ് ഇനി പഴങ്കഥ; തിളങ്ങുന്ന മുഖത്തിന് ഇതാ ചില വീട്ടുവൈദ്യങ്ങൾ
Dark Circles Reduces Remedies: ജോലിഭാരം കൊണ്ടുള്ള ക്ഷീണം, ഉറക്കമില്ലായ്മ, അമിതമായ ഫോൺ ഉപയോഗം എന്നിവയൊക്കെ ഈ അവസ്ഥയ്ക്ക് പിന്നിലെ കാരണങ്ങളാണ്. ഇത്തരം സാഹചര്യങ്ങളിൽ പലരും തെരഞ്ഞെടുക്കുന്നത് കെമിക്കലുകൾ അടങ്ങിയ ക്രീമുകളാണ്.
കണ്ണുകൾ നമ്മുടെ മനസ്സിൻ്റെ കണ്ണാടിയാണ്. മനസിലുള്ളത് മാത്രമല്ല ശരീരത്തിലെ മാറ്റം പോലും കണ്ണുകളിൽ അറിയാൻ കഴിയും. അതിന് ഉദാഹരണമാണ് കണ്ണിന് ചുറ്റുമുള്ള കറുപ്പ്. ഈ കണ്ണുകൾക്ക് താഴെയുള്ള കറുപ്പ് നിറം (Dark Circles) പലപ്പോഴും നമ്മുടെ മുഖത്തിൻ്റെ പ്രസരിപ്പ് ഇല്ലാതാക്കുകയും പ്രായം കൂടുതൽ തോന്നിക്കുകയും ചെയ്യുന്നു. (Image Credits: Getty Images)
ജോലിഭാരം കൊണ്ടുള്ള ക്ഷീണം, ഉറക്കമില്ലായ്മ, അമിതമായ ഫോൺ ഉപയോഗം എന്നിവയൊക്കെ ഈ അവസ്ഥയ്ക്ക് പിന്നിലെ കാരണങ്ങളാണ്. ഇത്തരം സാഹചര്യങ്ങളിൽ പലരും തെരഞ്ഞെടുക്കുന്നത് കെമിക്കലുകൾ അടങ്ങിയ ക്രീമുകളാണ്. ഇതിന് പിന്നാലെ പോകുന്നതിന് മുൻപ് നമ്മുടെ വീട്ടിൽ തന്നെയുള്ള ചില പ്രകൃതിദത്ത മാർഗ്ഗങ്ങൾ പരീക്ഷിച്ചു നോക്കുന്നതാണ് നല്ലത്. കണ്ണിന് താഴെയുള്ള കരിവാളിപ്പ് മാറ്റി കണ്ണുകൾക്ക് കുളിർമ നൽകാനും സഹായിക്കുന്ന ചില വഴികൾ നോക്കാം.
തണുപ്പിച്ച വെള്ളരിക്ക: കണ്ണുകളുടെ സംരക്ഷണത്തിന് ഏറ്റവും നല്ല മാർഗങ്ങളിൽ ഒന്നാണ് വെള്ളരിക്ക. ഇതിലെ ആൻ്റിഓക്സിഡൻ്റുകളും കുളിർമയും കണ്ണിന് താഴെയുള്ള നീർവീക്കം കുറയ്ക്കുന്നു. വട്ടത്തിൽ മുറിച്ച വെള്ളരിക്ക 30 മിനിറ്റെങ്കിലും ഫ്രിഡ്ജിൽ വെച്ച് തണുപ്പിക്കുക. ശേഷം ഇതെടുത്ത് 10 മിനിറ്റ് കണ്ണുകൾക്ക് മുകളിൽ വെക്കുക. ശേഷം തണുത്ത വെള്ളത്തിൽ കഴുകാം.
ഉരുളക്കിഴങ്ങ് നീര്: പ്രകൃതിദത്തമായ ബ്ലീച്ചിംഗ് ഏജൻ്റുകൾ ഉരുളക്കിഴങ്ങിൽ ധാരാളമായി അടങ്ങിയിട്ടുണ്ട്. ഇത് കണ്ണിന് താഴെയുള്ള കറുപ്പ് നിറം കുറയ്ക്കാൻ നല്ലതാണ്. ഉരുളക്കിഴങ്ങിൻ്റെ നീര് എടുക്കുക. ഒരു കോട്ടൺ ബോൾ ഈ നീരിൽ മുക്കി കണ്ണിന് താഴെ മൃദുവായി പുരട്ടുക. 15 മിനിറ്റിന് ശേഷം നല്ല തണുത്ത വെള്ളത്തിൽ കഴുകിക്കളയാം.
തണുത്ത ടീ ബാഗുകൾ: ചായയിലുള്ള കഫീൻ, ആൻ്റിഓക്സിഡൻ്റുകൾ എന്നിവ രക്തയോട്ടം വർദ്ധിപ്പിക്കാനും കണ്ണിൻ്റെ ക്ഷീണം മാറ്റാനും സഹായിക്കും. ഗ്രീൻ ടീ ബാഗുകളാണ് കൂടുതൽ നല്ലത്. ഉപയോഗിച്ച ടീ ബാഗുകൾ ഫ്രിഡ്ജിൽ വെച്ച് നന്നായി തണുപ്പിക്കുക. ഇത് 10-15 മിനിറ്റ് കണ്ണുകൾക്ക് മുകളിൽ വെച്ചാൽ നല്ല മാറ്റം കാണാനാകും.
