Malayali Nannies : ബോളിവുഡ് താരകുടുംബങ്ങളിലുണ്ട് മലയാളി ‘നാനി’മാര്; താരപുത്രരുടെ വളര്ത്തമ്മമാര്
Malayali nannies in celebrities families : സെയ്ഫ് അലി ഖാന്റെയും കരീന കപൂറിന്റെയും ഇളയ പുത്രനെ നോക്കുന്നത് മലയാളിയാണ്. പേര് ഏലിയാമ്മ ഫിലിപ്പ്. രണ്ബീര് കപൂറിന്റെയും ആലിയ ഭട്ടിന്റെയും മകളെ പരിപാലിക്കുന്നതും മലയാളി ആയ തന്നെ. കരണ് ജോഹറും ഒരിക്കല് വെളിപ്പെടുത്തിയത് മലയാളി ആയയെക്കുറിച്ച്. ധോണിയുടെ മകളെ നോക്കിയത് ഷീല എന്ന മലയാളി സ്ത്രീയായിരുന്നു
നടന് സെയ്ഫ് അലി ഖാന് അക്രമണത്തിനിരയായതാണ് ഇപ്പോഴത്തെ ചര്ച്ചാ വിഷയം. അപ്രതീക്ഷിതമായാണ് താരത്തിന് അക്രമിയുടെ കുത്തേറ്റത്. പ്രമുഖരടക്കം താമസിക്കുന്ന ബാന്ദ്ര മേഖലയില് ആക്രമണങ്ങള് വര്ധിക്കുന്നതില് വിമര്ശനവുമുയരുന്നുണ്ട്. താരത്തിന്റെ ഫ്ളാറ്റില് ആദ്യം അക്രമിയെ കണ്ടതും നേരിട്ടതും മലയാളി ആയ ഏലിയാമ്മ ഫിലിപ്പായിരുന്നു (Image Credits : PTI)
സെയ്ഫിന്റെയും കരീനയുടെയും ഇളയ മകന് ജേയുടെ ആയയാണ് 56കാരിയായ ഏലിയാമ്മ. അക്രമിയെ നേരിടുന്നതിനിടെ ഏലിയാമ്മയ്ക്കും പരിക്കേറ്റിരുന്നു. നാല് വര്ഷമായി സെയ്ഫിന്റെ വസതിയിലാണ് ഏലിയാമ്മ ജോലി ചെയ്യുന്നത് (Image Credits : PTI)
സെയ്ഫിനെ കൂടാതെ മറ്റ് ചില ബോളിവുഡ് താരങ്ങള്ക്കൊപ്പവും മലയാളി ആയമാര് ജോലി ചെയ്യുന്നുണ്ട്. ബോളിവുഡ് താരങ്ങളായ രണ്ബീര് കപൂറിന്റെയും ആലിയ ഭട്ടിന്റെയും മകള് റാഹയെ പരിപാലിക്കുന്നതും ഒരു മലയാളി നഴ്സാണ്. ഒരു ടെലിവിഷന് ഷോയിലാണ് ആലിയ ഇക്കാര്യം വെളിപ്പെടുത്തിയത്. തങ്ങളുടെ കുഞ്ഞിനെ 'ഉണ്ണി വാവാവോ പൊന്നുണ്ണി വാവാവോ' എന്ന പാട്ട് പാടിയാണ് നഴ്സ് ഉറക്കിയിരുന്നതെന്നും, രണ്ബീര് ഇപ്പോള് ആ പാട്ട് പഠിച്ചതായും ആലിയ പറഞ്ഞിരുന്നു. ബോളിവുഡ് താരദമ്പതികളുടെ മകള് മലയാളം പാട്ട് കേട്ടാണ് ഉറങ്ങുന്നതെന്ന വാര്ത്ത വൈറലുമായിരുന്നു (Image Credits : PTI)
തന്റെ കുട്ടികളെയും വളര്ത്തിയിരുന്നത് മലയാളി ആയയാണെന്ന് ബോളിവുഡ് സംവിധായകന് കരണ് ജോഹറും ആ പരിപാടിയില് വെളിപ്പെടുത്തിയിരുന്നു. തന്റെ കുട്ടികള് മലയാളം നന്നായി സംസാരിക്കുമെന്നും കരണ് ആലിയക്കൊപ്പമുള്ള ടെലിവിഷന് ഷോയില് വെളിപ്പെടുത്തിയതും വാര്ത്തയായിരുന്നു. കഴിഞ്ഞ സെപ്തംബറില് ദ ഗ്രേറ്റ് ഇന്ത്യന് കപില് ഷോയിലാണ് ആലിയയും കരണും ഇക്കാര്യം പറഞ്ഞത്. ഒരു സിനിമ പ്രമോഷന്റെ ഭാഗമായാണ് ഇരുവരും പരിപാടിയില് പങ്കെടുത്തത് (Image Credits : PTI)
ഇന്ത്യന് ക്രിക്കറ്റ് ടീം മുന് ക്യാപ്റ്റന് എംഎസ് ധോണിയുടെ മകള് സിവയെ പരിപാലിച്ചിരുന്നതും മലയാളി ആയയായിരുന്നു. ഷീല എന്ന മലയാളിയായിരുന്നു സിവയുടെ ആയ. ഷീല പഠിപ്പിച്ച 'അമ്പലപ്പുഴ ഉണ്ണിക്കണ്ണനോട് നീ' എന്ന സിനിമാ ഗാനം സിവ പാടുന്ന വീഡിയോ ദൃശ്യങ്ങള് ഏതാനും വര്ഷം മുമ്പ് വൈറലായിരുന്നു (Image Credits : PTI)
