Shimla toy train: മഞ്ഞ് കണ്ട്, കളിച്ച്, ഒരു ടോയ്ട്രെയിൻ യാത്ര നടത്താം… ഷിംല വിളിക്കുന്നു, ഇപ്പോൾ ബെസ്റ്റ് ടൈം
Shimla snowfall: ശക്തമായ മഞ്ഞുവീഴ്ച തുടരുന്നത് വരും ദിവസങ്ങളിലും ടോയ് ട്രെയിൻ പാതയിലേക്ക് കൂടുതൽ സഞ്ചാരികളെ ആകർഷിക്കുമെന്നാണ് പ്രതീക്ഷിക്കുന്നത്.
ഹിമാചൽ പ്രദേശിൽ കഴിഞ്ഞ 48 മണിക്കൂറായി തുടരുന്ന ശക്തമായ മഞ്ഞുവീഴ്ചയും മഴയും ജനജീവിതത്തെ തണുപ്പിലാഴ്ത്തുമ്പോഴും വിനോദസഞ്ചാര മേഖലയ്ക്ക് ഉണർവേകുന്നു. ലോക പൈതൃക പട്ടികയിൽ ഇടംപിടിച്ച യുനെസ്കോയുടെ കൽക്ക-ഷിംല ഹെറിറ്റേജ് ടോയ് ട്രെയിൻ പാത മഞ്ഞിൽ പുതഞ്ഞതോടെ ഇത് കാണാൻ സഞ്ചാരികളുടെ വൻ തിരക്കാണ് അനുഭവപ്പെടുന്നത്.
വെള്ള പുതച്ച മലനിരകൾക്കിടയിലൂടെ മഞ്ഞുനിറഞ്ഞ റെയിൽവേ ട്രാക്കിലൂടെയുള്ള ടോയ് ട്രെയിൻ യാത്ര സഞ്ചാരികൾക്ക് പുത്തൻ അനുഭവമാണ് സമ്മാനിക്കുന്നത്. മധ്യപ്രദേശിൽ നിന്നടക്കം എത്തിയ നിരവധി വിനോദസഞ്ചാരികൾ തങ്ങളുടെ ആവേശം പങ്കുവെച്ചു.
ജീവിതത്തിൽ ആദ്യമായാണ് ഇത്തരമൊരു കാഴ്ച കാണുന്നതെന്നും യൂട്യൂബിൽ മാത്രം കണ്ടിരുന്ന ടോയ് ട്രെയിൻ യാത്ര നേരിട്ട് ആസ്വദിക്കാൻ കഴിഞ്ഞത് മറക്കാനാവാത്ത അനുഭവമാണെന്നും സഞ്ചാരികൾ പറഞ്ഞു.
മഞ്ഞുവീഴ്ച പ്രതീക്ഷിച്ചെത്തിയ സഞ്ചാരികളുടെ ആഗ്രഹം സഫലമായതോടെ ഷിംല നഗരം സജീവമായി. മഞ്ഞുനിറഞ്ഞ പാതകളിലൂടെയുള്ള യാത്രയുടെ ദൃശ്യങ്ങൾ പകർത്തിയും പ്രകൃതിഭംഗി നുകർന്നുമാണ് സന്ദർശകർ സമയം ചെലവഴിക്കുന്നത്. ഇന്ത്യയുടെ പ്രകൃതിഭംഗി അതിന്റെ പൂർണ്ണരൂപത്തിൽ ആസ്വദിക്കാൻ എല്ലാവരും ഒരിക്കലെങ്കിലും ഇവിടം സന്ദർശിക്കണമെന്ന് സഞ്ചാരികൾ അഭിപ്രായപ്പെട്ടു.
ശക്തമായ മഞ്ഞുവീഴ്ച തുടരുന്നത് വരും ദിവസങ്ങളിലും ടോയ് ട്രെയിൻ പാതയിലേക്ക് കൂടുതൽ സഞ്ചാരികളെ ആകർഷിക്കുമെന്നാണ് പ്രതീക്ഷിക്കുന്നത്.
