വിജയിച്ചെങ്കിലും ജാഗ്രത വിടാതെ ശ്രേയസ് അയ്യര്‍; കരീബിയന്‍സിനെ പേടിക്കണം
Shreyas Iyer Post-Match Interview: വെസ്റ്റ് ഇന്‍ഡീസിനെ നിസാരക്കാരായി കാണരുതെന്ന് ഇന്ത്യന്‍ ടീം ക്യാപ്റ്റന്‍ ശ്രേയസ് അയ്യരുടെ മുന്നറിയിപ്പ്. ടീമിൽ ആത്മവിശ്വാസം അല്ലാതെ അഹങ്കാരമോ അലസതയോ വരാതിരിക്കാൻ പ്രത്യേകം ശ്രദ്ധിച്ചിരുന്നുവെന്നും ശ്രേയസ് വ്യക്തമാക്കി. ഉയർന്ന സ്കോറുകൾ പിറക്കുന്ന മൈതാനങ്ങളിൽ ആക്രമണോത്സുകതയോടെ കളിക്കേണ്ടത് വളരെ പ്രധാനമാണെന്നും ശ്രേയസ്.
മൂന്നാം മത്സരത്തില്‍ വിജയിച്ച് ടി20 പരമ്പരയില്‍ മുന്നിലെത്തിയെങ്കിലും വെസ്റ്റ് ഇന്‍ഡീസിനെ നിസാരക്കാരായി കാണരുതെന്ന് ഇന്ത്യന്‍ ടീം ക്യാപ്റ്റന്‍ ശ്രേയസ് അയ്യരുടെ മുന്നറിയിപ്പ്. ടീമിൽ ആത്മവിശ്വാസം അല്ലാതെ അഹങ്കാരമോ അലസതയോ വരാതിരിക്കാൻ പ്രത്യേകം ശ്രദ്ധിച്ചിരുന്നുവെന്നും ശ്രേയസ് വ്യക്തമാക്കി. ഉയർന്ന സ്കോറുകൾ പിറക്കുന്ന മൈതാനങ്ങളിൽ ആക്രമണോത്സുകതയോടെ കളിക്കേണ്ടത് വളരെ പ്രധാനമാണെന്നും അദ്ദേഹം കൂട്ടിച്ചേർത്തു. ഇന്‍ഡോറില്‍ നടന്ന മൂന്നാം ടി20ക്ക് ശേഷം സംസാരിക്കുകയായിരുന്നു അദ്ദേഹം (Image Credit Source: PTI).
14 റണ്‍സിനായിരുന്നു ഇന്ത്യയുടെ ജയം. ആദ്യം ബാറ്റു ചെയ്ത ഇന്ത്യ 223 റണ്‍സെടുത്തു. വെസ്റ്റ് ഇന്‍ഡീസിന്റെ പോരാട്ടം ഏഴു വിക്കറ്റിന് 209 റണ്‍സ് എന്ന നിലയില്‍ അവസാനിച്ചു. അഞ്ച് മത്സരങ്ങളുടെ പരമ്പരയില്‍ ഇന്ത്യ ഇതോടെ 2-1ന് മുന്നിലെത്തി.
ഇന്ത്യയുടെ ബൗളര്‍മാരെ ശ്രേയസ് പ്രശംസിച്ചു. ബൗളർമാർ മികച്ച ആത്മവിശ്വാസത്തോടെയാണ് പന്തെറിഞ്ഞതെന്നും, തങ്ങൾ എന്താണ് ചെയ്യാൻ ആഗ്രഹിക്കുന്നത് എന്ന കാര്യത്തിൽ അവർക്ക് വ്യക്തതയുണ്ടായിരുന്നതായും ശ്രേയസ് അയ്യർ പറഞ്ഞു. കളിക്കളത്തിൽ അവരുടെ തീരുമാനങ്ങളും അത് നടപ്പിലാക്കിയ രീതിയും വളരെ മികച്ചതായിരുന്നു. താൻ പന്ത് കൈമാറുമ്പോൾ ഓരോ ബൗളറും വെല്ലുവിളി ഏറ്റെടുക്കാൻ തയ്യാറായിരുന്നതായും അദ്ദേഹം കൂട്ടിച്ചേർത്തു.
ഓപ്പണർ അഭിഷേക് ശർമ്മയുടെയും (30 പന്തിൽ 69 റൺസ്) ഇഷാൻ കിഷന്റെയും (18 പന്തിൽ 37 റൺസ്) പ്രകടനങ്ങളെയും ശ്രേയസ് പ്രശംസിച്ചു. പവർപ്ലേയിൽ അഭിഷേക് തന്റെ ശൈലിയിൽ തകർത്തടിച്ചതും മികച്ച ഫോമിലുള്ള കിഷൻ നൽകിയ പിന്തുണയും എടുത്തുപറയേണ്ടതാണെന്നും അദ്ദേഹം വ്യക്തമാക്കി. ഇന്നിംഗ്സിന്റെ അവസാനഘട്ടത്തിൽ പ്രിൻസ് യാദവ് നേടിയ നിർണായകമായ റൺസും ടീമിന് വലിയ മുതൽക്കൂട്ടായെന്നും അദ്ദേഹം പറഞ്ഞു. പത്താമനായി ക്രീസിലെത്തിയ പ്രിന്‍സ് പുറത്താകാതെ ആറു പന്തില്‍ 13 റണ്‍സെടുത്തിരുന്നു.
ടോസ് നേടി ഫീൽഡിംഗ് തിരഞ്ഞെടുത്ത ശേഷം തങ്ങൾ ബൗളിങില്‍ കൂടുതൽ കൃത്യത പുലർത്തേണ്ടിയിരുന്നുവെന്ന് വെസ്റ്റ് ഇൻഡീസ് ക്യാപ്റ്റൻ ഷായ് ഹോപ്പ് പറഞ്ഞു. ടീമിന് മികച്ച രീതിയിൽ അടിത്തറയിടാൻ ഒരു മികച്ച ഓപ്പണിംഗ് കൂട്ടുകെട്ട് കണ്ടെത്തേണ്ടതുണ്ടെന്നും ഷായ് ഹോപ്പ് പറഞ്ഞു. അദ്ദേഹം ഇന്ത്യൻ ബൗളർമാരെ പ്രശംസിക്കുകയും ചെയ്തു. നാലാം ടി20 ഒക്ടോബര്‍ 14-ന് നടക്കും.
