Supplyco: സപ്ലൈകോയുടെ റംസാൻ നിലാവ്, കിറ്റിൽ എന്തെല്ലാം?
Supplyco Ramzan Kit 2026: റംസാൻ നിലാവ് എന്ന പേരിൽ കിറ്റ് പുറത്തിറക്കി സപ്ലൈകോ. വിലക്കയറ്റം രൂക്ഷമാകുന്നതിനിടെ കിറ്റ് ആശ്വാസമാകുമെന്നാണ് പ്രതീക്ഷ. കിറ്റിൽ എത്ര ഇനങ്ങളുണ്ടെന്നും എത്ര രൂപയെന്നും അറിഞ്ഞാലോ....
റംസാൻ പ്രമാണിച്ച് പ്രത്യേക കിറ്റ് വിപണിയിലെത്തിച്ച് സപ്ലൈകോ. റംസാൻ നിലാവ് എന്ന പേരിൽ പുറത്തിറക്കിയ കിറ്റിൽ ആകെ 15 ഇനങ്ങളാണ് ഉൾപ്പെടുത്തിയിരിക്കുന്നത്. 1018 രൂപയുടെ ഈ സാധനങ്ങൾ സപ്ലൈകോ 786 രൂപയ്ക്കായിരിക്കും നൽകുന്നത്.
ഒരു കിലോ ശബരി അപ്പം പൊടി, പുട്ടുപൊടി, 100 ഗ്രാം വീതം ചിക്കൻ മസാല, പെരുംജീരകം, മീറ്റ് മസാല, ജീരകം, മല്ലിപ്പൊടി, മുളകുപൊടി, കാശ്മീരി മുളകുപൊടി, 50 ഗ്രാം കുരുമുളകുപൊടി, ഒരു കിലോ റവ, പഞ്ചസാര, 250 ഗ്രാം ശബരി ഗോൾഡ് ചായപ്പൊടി, ഏലയ്ക്ക 20 ഗ്രാം, അണ്ടിപ്പരിപ്പ് 50 ഗ്രാം എന്നിവയാണ് കിറ്റിൽ ഉൾപ്പെടുത്തിയിരിക്കുന്നത്.
മാർച്ച് 20 വരെയാണ് ഈ ഓഫർ. റംസാൻ വിപണിയിൽ വിലക്കയറ്റം രൂക്ഷമാണ്. അവശ്യ സാധനങ്ങളുടെയെല്ലാം വില കൂടുകയാണ്. റംസാൻ കാലത്ത് ഏറെ ചെലവുള്ള കൈമ അരിക്ക് നിലവിൽ കിലോയ്ക്ക് 200 രൂപയ്ക്ക് മുകളിലാണ് വില.
150 മുതൽ 175 വരെ രൂപയ്ക്ക് ലഭിച്ചിരുന്ന അരിയാണ് ഇപ്പോൾ ഈ വിലയിൽ വിൽക്കുന്നത്. കൂടാതെ, മുളക്, പാമോയിൽ, സൺഫ്ലവർ ഓയിൽ തുടങ്ങിയവയുടെ വിലയും കൂടിയിട്ടുണ്ട്. വെളിച്ചെണ്ണ വിലയിലും കയറ്റിറക്കങ്ങൾ തുടരുകയാണ്.
ഇറാൻ - ഇസ്രായേൽ - യുഎസ് സംഘർഷം മൂർച്ഛിച്ചതോടെ ഈന്തപ്പഴത്തിന്റെ വരവ് കുറഞ്ഞിട്ടുണ്ട്. കിലോയ്ക്ക് 200-രൂപ മുതൽ 1000-ത്തിന് മുകളിൽ വരെയാണ് ഈത്തപ്പഴത്തിന് വിപണിയിൽ വില. (Image Credit: Getty Images)
