India Operation Sindoor: ‘രാജ്യമാണ് പ്രധാനം; ബാക്കിയെല്ലാം അതിനുശേഷം’; ഐപിഎൽ നിർത്തിവച്ച നടപടിയെ പിന്തുണച്ച് സിഎസ്‌കെ

Ipl Csk

ഇന്ത്യ പാകിസ്ഥാൻ സംഘർഷം രൂക്ഷമായ സാഹചര്യത്തിൽ ഐപിഎൽ മത്സരങ്ങൾ താത്കാലികമായി നിർത്തിവെച്ചതിൽ പ്രതികരണവുമായി ചെന്നൈ സൂപ്പർ കിങ്സ്. ഐപിഎൽ നിർത്തിവച്ച തീരുമാനത്തെ പിന്തുണച്ച് കൊണ്ടായിരുന്നു സിഎസ്കെയുടെ പ്രതികരണം. രാജ്യമാണ് പ്രധാനമെന്നും ബാക്കിയെല്ലാം അതിനു ശേഷമേ വരൂ എന്നാണ് സമൂഹ മാധ്യമമായ എക്സിൽ പങ്കുവച്ച കുറിപ്പിൽ പറയുന്നത്.

‘‘സധൈര്യം ഓരോ ചുവടും. ഓരോ ഹൃദയമിടിപ്പിലും അഭിമാനം. നമ്മുടെ സായുധ സൈന്യത്തിന് സല്യൂട്ട്’ എന്നാണ് പോസ്റ്റിനൊപ്പം ചെന്നൈ സൂപ്പർ കിങ്സ് കുറിച്ചത്. ഇതോടെ നിരവധി പേരാണ് ഈ പോസ്റ്റ് ലൈക്ക് ചെയ്തിരിക്കുന്നത്. ദേശീയ പതാകയുമേന്തി കശ്മീരിലെ മഞ്ഞുമലകൾക്കിടയിൽ തോക്കുമായി നടക്കുന്ന ഇന്ത്യൻ സൈനികരുടെ ചിത്രം സഹിതമാണ് ചെന്നൈ സൂപ്പർ കിങ്സിന്റെ പോസ്റ്റ് .

Also Read:ഐപിഎൽ മത്സരങ്ങൾ റദ്ദാക്കി, പുതിയ തീയ്യതി പിന്നീട്

സംഘർഷ സാഹചര്യം കണക്കിലെടുത്താണ് ഐപിഎല്‍ മത്സരങ്ങള്‍ അനിശ്ചിതകാലത്തേയ്ക്ക് നിര്‍ത്തിവെച്ചതെന്ന് ബിസിസിഐ വൃത്തങ്ങളെ ഉദ്ധരിച്ച് വാര്‍ത്താ ഏജന്‍സിയായ പിടിഐ റിപ്പോർട്ട് ചെയ്തിരുന്നു. കഴിഞ്ഞ ദിവസം നടന്ന പഞ്ചാബ് കിങ്സ് – ഡൽഹി ക്യാപിറ്റൽസ് മത്സരം സംഘർഷാവസ്ഥ കാരണം പാതിവഴിയിൽ നിർത്തിവയ്ക്കേണ്ടി വന്നിരുന്നു. ഇതിനു പിന്നാലെ വലിയ രീതിയിലുള്ള ചർച്ചകൾ ഉയർന്നിരുന്നു. ഒടുവിലാണ് ടൂർണമെന്റ് അനിശ്ചിത കാലത്തേക്ക് നിർത്തിവയ്ക്കാൻ ബിസിസിഐ തീരുമാനിച്ചത്.