അടുത്ത ലോകകപ്പില്‍ ‘റോ-കോ’ തുടരുമോ? ഉറപ്പില്ല! നെഹ്‌റയുടെ മുന്നറിയിപ്പ്‌

Ashish Nehra

അടുത്ത ഏകദിന ലോകകപ്പില്‍ രോഹിത് ശര്‍മയും, വിരാട് കോലിയും കളിക്കുമോയെന്നത് സംബന്ധിച്ച് ചര്‍ച്ചകള്‍ സജീവമാണ്. പ്രധാനമായും രോഹിതിനെ ചുറ്റിപ്പറ്റിയാണ് ചര്‍ച്ച. രോഹിതിന്റെ സ്ഥാനത്തെക്കുറിച്ചുള്ള ഊഹാപോഹങ്ങള്‍ ബിസിസിഐ സെക്രട്ടറി ദേവജിത് സൈകിയ ഏതാനും ദിവസം മുമ്പ് തള്ളിക്കളഞ്ഞിരുന്നു. എന്നാലും ചര്‍ച്ചകള്‍ അവസാനിക്കുന്നില്ല. എന്നാല്‍ ലോകകപ്പിലെ രോഹിതിന്റെയും കോലിയുടെയും സാധ്യത ഇപ്പോള്‍ പ്രവചിക്കുന്നത് അപക്വമാണെന്ന് മുന്‍ താരം ആശിഷ് നെഹ്‌റ പറഞ്ഞു. കൊൽക്കത്തയിൽ നടന്ന ക്രിക്കറ്റ് അസോസിയേഷൻ ഓഫ് ബംഗാളിന്റെ വാർഷിക പുരസ്‌കാര ചടങ്ങിൽ സംസാരിക്കുകയായിരുന്നു അദ്ദേഹം.

“കഴിഞ്ഞ ദശകത്തിൽ രോഹിതും വിരാടും എന്താണ് നേടിയതെന്ന് നമുക്കെല്ലാവർക്കും അറിയാം. എന്നാൽ എന്നെ സംബന്ധിച്ചിടത്തോളം 13 മാസം എന്നത് വളരെ നീണ്ട സമയമാണ്. രോഹിത് ശർമ്മയോ വിരാട് കോലിയോ അവിടെ ഉണ്ടാകുമോ എന്ന് ഇപ്പോൾ പറയാൻ വളരെ പ്രയാസമാണ്. ആ രണ്ടുപേരുടെ കാര്യം അവിടെ നിൽക്കട്ടെ, പ്രായം എന്നത് വെറുമൊരു സംഖ്യ മാത്രമാണ്”, നെഹ്‌റ പറഞ്ഞതായി റെവ്‌സ്‌പോര്‍ട്‌സ് റിപ്പോര്‍ട്ട് ചെയ്തു.

ആരുടെയും സ്ഥാനം ഉറപ്പില്ല

ഇന്ത്യന്‍ ടീമില്‍ ആരുടെയും സ്ഥാനം ഉറപ്പില്ലെന്ന് നെഹ്‌റ പറഞ്ഞു. ഏകദിന, ടെസ്റ്റ് ടീമുകളുടെ ക്യാപ്റ്റനായിട്ടും ടി20യില്‍ ശുഭ്മാന്‍ ഗില്ലിനെ ഉള്‍പ്പെടുത്താത്തതാണ് നെഹ്‌റ ഉദാഹരണമായി ചൂണ്ടിക്കാണിച്ചത്. രോഹിതിനെയും കോലിയെയും കുറിച്ചുള്ള വലിയ ചോദ്യം പ്രായം കൊണ്ട് മാത്രം തീരുമാനിക്കപ്പെടാതെ അവരുടെ പ്രകടനത്തെ ആശ്രയിച്ചായിരിക്കും നിൽക്കുന്നത്.

Also Read: “ഭാര്യ സമ്മതിച്ചാൽ മാത്രം നോക്കാം!” ടീം ഇന്ത്യയുടെ പരിശീലക സ്ഥാനത്തെക്കുറിച്ച് ആശിഷ് നെഹ്റ

“അവർ നന്നായി കളിക്കുകയും പ്രകടനം നടത്തുകയും ചെയ്യുന്നുണ്ടെങ്കിൽ, എന്തുകൊണ്ട് പാടില്ല? എന്നാൽ വീണ്ടും പറയട്ടെ, നിങ്ങൾ പരിശീലകനാണെങ്കിലും അല്ലെങ്കിൽ ഞാൻ പരിശീലകനാണെങ്കിലും, അത് എന്റെ മാത്രം തീരുമാനമായിരിക്കില്ല. ബിസിസിഐയിൽ അത് അങ്ങനെ നടപ്പിലാകില്ല. സെലക്ടർമാരും മറ്റ് തീരുമാനമെടുക്കുന്നവരും ഇതിലുണ്ട്. അതിനാൽ തീരുമാനമെടുക്കൽ പ്രക്രിയയിൽ ധാരാളം ആളുകൾ ഉൾപ്പെട്ടിരിക്കുന്നു,” നെഹ്‌റ പറഞ്ഞു.

ഇന്ത്യൻ ടീമിനൊപ്പം താൻ പ്രവർത്തിക്കുന്നുണ്ടെങ്കിൽ പോലും, ലോകകപ്പ് ടീമിനെ ഇത്രയും മുൻകൂട്ടി പ്രവചിക്കുന്നത് യാഥാർത്ഥ്യബോധമില്ലാത്തതായിരിക്കുമെന്നും മുന്‍താരം വ്യക്തമാക്കി. ലോകകപ്പ് ഇപ്പോഴും 13 മാസം അകലെയാണ്. ഇന്ത്യൻ ക്രിക്കറ്റിൽ മാത്രമല്ല, എല്ലാ കായികരംഗത്തും രണ്ടു മൂന്ന് ആഴ്ചകൾ കൊണ്ട് കാര്യങ്ങൾ എത്രത്തോളം മാറാമെന്ന് നമ്മൾ കണ്ടിട്ടുണ്ടെന്നും ആശിഷ് നെഹ്‌റ പറഞ്ഞു. നിലവില്‍ ഇന്ത്യയുടെ ഏകദിന ലോകകപ്പ് പദ്ധതികളില്‍ രോഹിതും കോലിയുമുണ്ടോയെന്ന് വ്യക്തമല്ല. ഇതുസംബന്ധിച്ച് ടീം മാനേജ്‌മെന്റ് സൂചന നല്‍കിയിട്ടില്ല.

English Summary

Uncertainty surrounds the ODI futures of Rohit Sharma and Virat Kohli ahead of the 2027 World Cup. Former pacer Ashish Nehra believes it is too early to predict their presence in the squad. He emphasized that team selections change rapidly based on current performance rather than age alone. Both batters remain key players, but their selection will depend on consistent future performances.