ISL 2024-25: ബ്ലാസ്റ്റേഴ്സ് എന്നും ‘പഴയ’ ബ്ലാസ്റ്റേഴ്സ് തന്നെ! ജംഷഡ്പൂരിനോടും തോൽവി
Kerala Blasters vs Jamshedpur FC Match Result: ടീമിന്റെ മോശം പ്രകടനത്തെ തുടർന്ന് പരിശീലക സ്ഥാനത്ത് നിന്ന് മിക്കേൽ സ്റ്റാറെയെ പുറത്താക്കിയതിന് ശേഷം ഹോം ഗ്രൗണ്ടിൽ നടന്ന ആദ്യ മത്സരത്തിൽ മുഹമ്മദൻസ് എഫ്സിയെ കീഴടക്കി ബ്ലാസ്റ്റേഴ്സ് വിജയവഴിയിൽ തിരിച്ചെത്തിയിരുന്നു.
Jamshadpur
ജംഷഡ്പൂർ: തോറ്റ് തോറ്റ് കടങ്ങൾ ബാക്കിയാക്കി കേരളാ ബ്ലാസ്റ്റേഴ്സ്. ഐഎസ്എല്ലിൽ തുടർ വിജയം തേടി ഇറങ്ങിയ കേരളാ ബ്ലാസ്റ്റേഴ്സിന് ഇന്നും തോൽവി. ജംഷഡ്പൂർ ടാറ്റാ സ്പോർട്സ് കോംപ്ലക്സിൽ നടന്ന മത്സരത്തിൽ ജംഷഡ്പൂർ എഫ്‌സിയോട് ഏകപക്ഷീയമായ ഒരു ഗോളിന് ആണ് ബ്ലാസ്റ്റേഴ്സ് തോൽവി ഏറ്റുവാങ്ങിയത്. ജംഷഡ്പൂരിനായി പ്രതീക് ചൗധരിയാണ് വലകുലുക്കിയത്. ഐഎസ്എൽ പോയിന്റ് പട്ടികയിൽ നിലവിൽ പത്താം സ്ഥാനത്താണ് കേരളാ ബ്ലാസ്റ്റേഴ്സ്.
കേരളാ താരങ്ങൾ അവസരങ്ങൾ തുലയ്ക്കുന്നതിൽ മുന്നിട്ട് നിന്ന മത്സരത്തിൽ, മുൻ ബ്ലാസ്റ്റേഴ്സ് താരം കൂടിയായ ഗോൾകീപ്പർ ആൽബിനോ ഗോമസിന്റെ തകർപ്പൻ സേവുകളും കൂടിയായപ്പോൾ ജംഷഡ്പൂർ ജയിച്ച് കയറുകയായിരുന്നു. ടീമിന്റെ മോശം പ്രകടനത്തെ തുടർന്ന് പരിശീലക സ്ഥാനത്ത് നിന്ന് മിക്കേൽ സ്റ്റാറെയെ പുറത്താക്കിയതിന് ശേഷം ഹോം ഗ്രൗണ്ടിൽ നടന്ന ആദ്യ മത്സരത്തിൽ മുഹമ്മദൻസ് എഫ്സിയെ കീഴടക്കി ബ്ലാസ്റ്റേഴ്സ് വിജയവഴിയിൽ തിരിച്ചെത്തിയിരുന്നു. എന്നാൽ ആരാധകർക്ക് പുതുവത്സര സമ്മാനമായി എവേ മത്സരത്തിൽ ജയിച്ച് തുടർവിജയം സ്വന്തമാക്കാൻ ടീമിനായില്ല.
മത്സരത്തിന്റെ തുടക്കത്തിൽ കേരളാ താരങ്ങൾക്ക് മികച്ച അവസരങ്ങളാണ് ലഭിച്ചത്. എങ്കിലും ഒന്നും ലക്ഷ്യത്തിലെത്തിക്കാനായില്ല. സ്‌ട്രൈക്കർ ജീസസ് ജിമിനസ് പരിക്ക് മൂലം ബെഞ്ചിലിരുന്ന മത്സരത്തിൽ കേരള ബ്ലാസ്റ്റേഴ്സ് താളം കണ്ടെത്താൻ പ്രയാസപ്പെടുന്നതാണ് കണ്ടത്. ആദ്യ പകുതി ഗോൾ ഗോൾ രഹിതമായാണ് അവസാനിച്ചതെങ്കിലും രണ്ടാം പകുതിയിൽ കളി മാറി. ഇരുടീമുകളും വാശിയോടെ മുന്നേറ്റങ്ങൾ നടത്തിയെങ്കിലും ഭാഗ്യം ജംഷഡ്പൂരിനൊപ്പമായിരുന്നു. മത്സരത്തിന്റെ 61-ാം മിനിറ്റിൽ ജംഷഡ്പൂർ മുന്നിലെത്തി. കേരളാ ബ്ലാസ്റ്റേഴ്സ് താരങ്ങളുടെ പിഴവ് മുതലെടുത്ത് പ്രതീക് ചൗധരിയി ജംഷഡ്പൂരിനായി വലകുലുക്കി. എതിരാളികൾ ഒരു ഗോളിന് മത്സരത്തിൽ മുന്നോട്ട് നിന്നതോടെ കേരളം പ്രതിരോധത്തിലായി. പിന്നീട് ഒരു ഘട്ടത്തിൽ പോലും എതിരാളികൾക്ക് വെല്ലുവിളി ഉയർത്താൻ കേരളാ ബ്ലാസ്റ്റേഴ്സ് താരങ്ങൾക്ക് സാധിച്ചില്ല.
14 മത്സരങ്ങളിൽ നിന്ന് നാല് ജയവും രണ്ട് സമനിലയും എട്ട് തോൽവിയുമായി ഈ സീസണിൽ 10-ാം സ്ഥാനത്താണ് ബ്ലാസ്റ്റേഴ്സ്. എന്നാൽ 12 മത്സരങ്ങളിൽ നിന്ന് ഏഴ് ജയവും അഞ്ച് തോൽവിയുമടക്കം ജംഷ്ഡപൂർ നാലാമതാണ്. ടീമിന്റെ സഹപരിശീലകൻ ടിജി പുരുഷോത്തമന് കീഴിലാണ് ബ്ലാസ്റ്റേഴ്സ് ഇന്നും കളിക്കാനിറങ്ങിയത്. ജംഷഡ്പൂരിനെതിരെ തോൽവി വഴങ്ങിയതോടെ ബ്ലാസ്റ്റേഴ്സിന്റെ പ്ലേ ഓഫ് പ്രതീക്ഷകൾക്ക് മങ്ങലേറ്റു.
