UAE Job Offer: യുഎഇയിൽ നിന്നൊരു ജോലി ഓഫർ ലഭിച്ചോ? അത് വ്യാജമല്ലെന്ന് ഉറപ്പുവരുത്താൻ ഇക്കാര്യങ്ങൾ ശ്രദ്ധിക്കുക

പ്രതീകാത്മക ചിത്രം

ദുബായ്: യുഎഇയിൽ നിന്ന് ഒരു തൊഴിൽ വാഗ്ദാനം ലഭിക്കുന്നത് ഏതൊരാൾക്കും വലിയൊരു നാഴികക്കല്ലാണ്. എന്നാൽ, ആ ഓഫർ യഥാർത്ഥമാണോ അതോ വ്യാജമാണോ എന്ന് ഉറപ്പുവരുത്തേണ്ടത് അത്യന്തം അനിവാര്യമാണ്. യുഎഇ നിയമപ്രകാരം എല്ലാ നിയമപരമായ തൊഴിൽ ഓഫറുകളും ഹ്യൂമൻ റിസോഴ്‌സസ് ആൻഡ് എമിറട്ടൈസേഷൻ മന്ത്രാലയം (MOHRE) വഴിയാണ് നൽകേണ്ടത്.

നിങ്ങളുടെ വർക്ക് പെർമിറ്റിനായി അപേക്ഷിക്കുമ്പോൾ മന്ത്രാലയം അംഗീകരിച്ച ഔദ്യോഗിക കരാർ ഫോം മാത്രമേ തൊഴിലുടമകൾ ഉപയോഗിക്കാൻ പാടുള്ളൂ. ഈ ഔദ്യോഗിക ഓഫർ ലെറ്ററുകളിൽ ഒരു പ്രത്യേക സീരിയൽ നമ്പറോ ബാർകോഡോ ഉണ്ടായിരിക്കും. ഇത് ഉപയോഗിച്ച് ഉദ്യോഗാർത്ഥികൾക്ക് ഓഫർ ലെറ്ററിന്റെ വിശ്വാസ്യത ഓൺലൈൻ വഴി എളുപ്പത്തിൽ പരിശോധിക്കാനാകും.

ഒരു ഔദ്യോഗിക യുഎഇ ജോബ് ഓഫർ ലെറ്ററിൽ എന്തൊക്കെ ഉണ്ടായിരിക്കണം?

മന്ത്രാലയം (MOHRE) പുറപ്പെടുവിച്ചിട്ടുള്ള മാനദണ്ഡങ്ങൾ പ്രകാരം ഒരു യഥാർത്ഥ ഓഫർ ലെറ്ററിൽ താഴെ പറയുന്ന വിവരങ്ങൾ വ്യക്തമായി രേഖപ്പെടുത്തിയിരിക്കണം:

• തസ്തിക (Job Title)
• കമ്പനിയുടെ ഔദ്യോഗിക നമ്പർ (Company Number)
• കരാറിന്റെ തരം (Type of Contract)
• ശമ്പള വിവരങ്ങൾ (പ്രതിമാസ ശമ്പളം, ദിവസക്കൂലി അല്ലെങ്കിൽ കമ്മീഷൻ വ്യവസ്ഥ എന്നിവ വ്യക്തമാക്കണം)
• ജോലിയിൽ പ്രവേശിക്കേണ്ട തീയതി
• ആഴ്ചയിലെ അവധി ദിവസങ്ങൾ
• നോട്ടീസ് പിരീഡും മറ്റ് നിബന്ധനകളും

ജോബ് ഓഫർ വ്യാജമല്ലെന്ന് എങ്ങനെ ഉറപ്പാക്കാം?

നിങ്ങൾ യുഎഇക്ക് പുറത്താണെങ്കിൽ, തട്ടിപ്പുകളിൽ വീഴാതിരിക്കാൻ താഴെ പറയുന്ന രണ്ട് വഴികളിലൂടെ ഓഫർ ലെറ്ററിന്റെ വിശ്വാസ്യത പരിശോധിക്കാം. നിങ്ങളുടെ നാട്ടിലുള്ള യുഎഇ എംബസിയിലോ കോൺസുലേറ്റിലോ ബന്ധപ്പെടുകയാണ് ആദ്യ പടി. നിങ്ങളെ ബന്ധപ്പെട്ട കമ്പനിയും അവർ നൽകിയ ഓഫറും യഥാർത്ഥമാണോ എന്ന് പരിശോധിക്കാൻ എംബസി അധികൃതർക്ക് സാധിക്കും. മറ്റൊന്ന് MOHRE പോർട്ടൽ വഴി ഓഫർ ലെറ്റർ പരിശോധിക്കുന്നതാണ്. ആർക്കും സ്വതന്ത്രമായി തന്നെ MOHRE പോർട്ടൽ വഴി ഓഫർ ലെറ്റർ പരിശോധിക്കാം. ഇതിനായി താഴെ പറയുന്ന ഘട്ടങ്ങൾ പാലിക്കുക.

• MOHRE-ന്റെ ഔദ്യോഗിക വെബ്‌സൈറ്റ് സന്ദർശിക്കുക.
• ‘Services’ വിഭാഗത്തിൽ പോയി ‘Employee Services’ തിരഞ്ഞെടുക്കുക, തുടർന്ന് ‘Transactions Inquiry Service’ ക്ലിക്ക് ചെയ്യുക.
• അവിടെയുള്ള ഓപ്ഷനുകളിൽ നിന്ന് ‘Enquiry for Job Offer’ എന്നത് തിരഞ്ഞെടുക്കുക.

നിങ്ങളുടെ ഓഫർ ലെറ്ററിലുള്ള ട്രാൻസാക്ഷൻ നമ്പർ, കമ്പനി നമ്പർ, തീയതികൾ എന്നിവ കൃത്യമായി നൽകുക. ‘Permit Type’ എന്നതിൽ ‘All Work Permits’ എന്ന് നൽകാം. വിവരങ്ങൾ സബ്മിറ്റ് ചെയ്യുമ്പോൾ ആ ഓഫർ ലെറ്റർ മന്ത്രാലയത്തിൽ രജിസ്റ്റർ ചെയ്തതാണെങ്കിൽ സിസ്റ്റത്തിൽ അത് തെളിഞ്ഞു വരും. സിസ്റ്റത്തിൽ കാണിക്കുന്നില്ലെങ്കിൽ ആ ഓഫർ വ്യാജമാകാനോ, അല്ലെങ്കിൽ തൊഴിലുടമ അത് കൃത്യമായി മന്ത്രാലയത്തിൽ സമർപ്പിക്കാതിരിക്കാനോ ഉള്ള സാധ്യതയുണ്ട്.

ഓഫർ ലെറ്റർ ഒപ്പിടുന്നതിന് മുൻപ് ശ്രദ്ധിക്കേണ്ട കാര്യങ്ങൾ

1. വിവരങ്ങൾ ഒത്തുനോക്കുക: ഇൻ്റർവ്യൂ സമയത്ത് തൊഴിലുടമ വാഗ്ദാനം ചെയ്ത ശമ്പളവും തസ്തികയും തന്നെയാണോ MOHRE സിസ്റ്റത്തിലും കാണിക്കുന്നത് എന്ന് ഉറപ്പുവരുത്തുക.
2. പണം ആവശ്യപ്പെടുന്നുണ്ടോ?: വിസാ പ്രോസസിങ് ഫീസ്, റിക്രൂട്ട്‌മെന്റ് ചാർജ്ജ് എന്നിവയ്ക്കായി കമ്പനി നിങ്ങളിൽ നിന്നും പണം ആവശ്യപ്പെടുന്നുണ്ടെങ്കിൽ ശ്രദ്ധിക്കുക. യുഎഇ തൊഴിൽ നിയമപ്രകാരം വിസയുടെയും റിക്രൂട്ട്‌മെന്റിന്റെയും എല്ലാ ചെലവുകളും തൊഴിലുടമ തന്നെയാണ് വഹിക്കേണ്ടത്.
3. ബാർകോഡ് പരിശോധിക്കുക: ഓഫർ ലെറ്റർ ഔദ്യോഗിക MOHRE ടെംപ്ലേറ്റിൽ തന്നെയാണോ എന്നും അതിൽ ബാർകോഡോ ട്രാൻസാക്ഷൻ നമ്പറോ ഉണ്ടോ എന്നും പ്രത്യേകം പരിശോധിക്കുക.

English Summary

Any legitimate job offer for employment in the UAE must be officially registered and issued through the Ministry of Human Resources and Emiratisation (MOHRE), complete with a unique barcode or transaction number. Candidates can independently verify their offer letters online via the official MOHRE portal or through a UAE embassy to ensure the document is genuine and that no illegal recruitment fees are being charged.