Trump new Plan: കഞ്ചാവ് ആളുകൾക്ക് കൂടുതൽ ലഭ്യമാക്കാൻ പുതിയ പദ്ധതിയുമായി ട്രംപ്
Reclassify Cannabis: ട്രൂലീവ് എന്ന പ്രമുഖ കഞ്ചാവ് കമ്പനിയുടെ സിഇഒ കിം റിവേഴ്‌സും ഈ പരിപാടിയിൽ പങ്കെടുത്തിരുന്നു. കഞ്ചാവിന്റെ പുനർവർഗ്ഗീകരണം തുടരാനും മെഡിക്കൽ കഞ്ചാവിനെക്കുറിച്ചുള്ള ഗവേഷണം വികസിപ്പിക്കാനും അവർ ട്രംപിനോട് ആവശ്യപ്പെട്ടതായി റിപ്പോർട്ടുകൾ പറയുന്നു.
ഡൊണാൾഡ് ട്രംപ്
വാഷിങ്ടൺ: യുഎസ് പ്രസിഡന്റ് ഡൊണാൾഡ് ട്രംപ് കഞ്ചാവിനെ അപകടം കുറഞ്ഞ മയക്കുമരുന്നായി പുനർവർഗ്ഗീകരിക്കാൻ ഒരുങ്ങുന്നതായി റിപ്പോർട്ട്. ഈ നീക്കം കഞ്ചാവ് കൂടുതൽ ആളുകളിലേക്ക് എത്താൻ സഹായിക്കും. ന്യൂജഴ്‌സിയിൽ നടന്ന ഒരു പരിപാടിയിൽ വെച്ച് ട്രംപ് ഇക്കാര്യം സൂചിപ്പിച്ചതായി വാൾ സ്ട്രീറ്റ് ജേണൽ റിപ്പോർട്ട് ചെയ്യുന്നു.
ന്യൂജഴ്‌സിയിലെ തന്റെ ഗോൾഫ് ക്ലബ്ബിൽ നടന്ന ഒരു പരിപാടിയിലാണ് ട്രംപ് ഈ പ്രസ്താവന നടത്തിയത്. കഞ്ചാവിനെ നിലവിലുള്ള ഷെഡ്യൂൾ I നിയന്ത്രിത വസ്തുക്കളുടെ പട്ടികയിൽ നിന്ന് മാറ്റി, ഷെഡ്യൂൾ III മയക്കുമരുന്നുകളുടെ കൂട്ടത്തിൽ ഉൾപ്പെടുത്താൻ താൽപ്പര്യപ്പെടുന്നതായി അദ്ദേഹം പറഞ്ഞു.
എന്താണ് ഈ മാറ്റം കൊണ്ട് ഉദ്ദേശിക്കുന്നത്?
കഞ്ചാവിനെ ഷെഡ്യൂൾ III പട്ടികയിലേക്ക് മാറ്റിയാൽ, അത് വാങ്ങാനും വിൽക്കാനും എളുപ്പമാകും. ഇത് കഞ്ചാവ് വ്യവസായത്തിന് വലിയ സാമ്പത്തിക വളർച്ച നൽകും. മുൻ പ്രസിഡന്റ് ജോ ബൈഡന്റെ ഭരണകൂടം ഇങ്ങനെയൊരു നീക്കത്തിന് ആദ്യം നിർദ്ദേശം നൽകിയിരുന്നു, എന്നാൽ അത് നിയമമായില്ല.
ട്രൂലീവ് എന്ന പ്രമുഖ കഞ്ചാവ് കമ്പനിയുടെ സിഇഒ കിം റിവേഴ്‌സും ഈ പരിപാടിയിൽ പങ്കെടുത്തിരുന്നു. കഞ്ചാവിന്റെ പുനർവർഗ്ഗീകരണം തുടരാനും മെഡിക്കൽ കഞ്ചാവിനെക്കുറിച്ചുള്ള ഗവേഷണം വികസിപ്പിക്കാനും അവർ ട്രംപിനോട് ആവശ്യപ്പെട്ടതായി റിപ്പോർട്ടുകൾ പറയുന്നു.
ട്രംപിന്റെ മുൻ നിലപാട്
നേരത്തെ, 2018-ൽ കഞ്ചാവ് കമ്പനി ഉടമകൾ ട്രംപിനെ ഇതേ ആവശ്യം ഉന്നയിച്ച് സമീപിച്ചിരുന്നു. അന്ന് കഞ്ചാവിന്റെ ഉപയോഗം ഐക്യു (IQ) കുറയ്ക്കുമെന്നും അത് ബുദ്ധിക്ക് പ്രശ്‌നമുണ്ടാക്കുമെന്നും ട്രംപ് പറഞ്ഞിരുന്നു. ഈ വിഷയത്തിലുള്ള അദ്ദേഹത്തിന്റെ നിലപാടിലെ മാറ്റം ശ്രദ്ധേയമാണ്.
